ⵎⴰ ⵉⵇⵇⴰⵔ ⵡⴻⴷⵍⵉⵙ ⵉⵇⴻⴷⴷⵙⴻⵏ ⵙ ⵜⵉⴷⴻⵜⵜ ⴱⴻⵍⵍⵉ ⵢⴻⵛⵛⵓ ⵍⵎⴰⵙⵉⵃ ⵉⵎⵎⵓⵜ ⵅ ⵚⵚⴰⵍⵉⴱ?

ⵎⴰ ⴳⴳⵓⵔ ⴰⴷ ⴰⵛ ⵜ ⵜⴰⴷⴻⴼ ⴷⴻⴳ ⵓⵣⴻⵍⵍⵉⴼ ⵅⵎⵉ ⴷ ⴰⵛ ⵉ ⵖⴰ ⵢⵉⵏⵉ ⵡⴻⵏⵏⵉ ⵖⴰⵔ ⵉⵍⵍⴰⵏ 33 ⵉⵙⴻⴳⴳʷⵓⵙⵙⴰ, ⵡⴻⵏⵏⵉ ⵉ ⵅⴰⴼⴻⴽ ⵉⵄⵉⵣⵣⴻⵏ ⴰⵟⵟⴰⵙ, ⴷ ⵡⴻⵏⵏⵉ ⴰⵎⴻⵇⵇⵔⴰⵏ ⵏⵏⴻⵛ, ⴰⵇⴰ ⴳⴳⵓⵔ ⴰⴷ ⴽⵉⴽ ⵉⵙⵙⵉⵡⴻⵍ ⵙ ⵜⵃⴻⴱⴱⴰ ⴱⴻⵍⵍⵉ ⴳⴳⵓⵔ ⴰⴷ ⵉⵜⵡⴰⵄⴻⴷⴷⴻⴱ ⵣⵉ ⴱⵏⴰⴷⴻⵎ ⵓ ⴳⴳⵓⵔ ⴰⴷ ⵉⵎⵎⴻⵜ ⴷⴻⵖⵢⴰ ⵅ ⵚⵚⴰⵍⵉⴱ ⵓ ⴳⴳⵓⵔ ⴰⴷ ⴷⴷ-ⵉⵜⵡⴰⵙⵏⴻⴽⴽⴰⵔ ⴰⵡⴰⵔⵏⵉ ⵜⵍⴰⵜⴰ ⵏ ⵡⵓⵙⵙⴰⵏ?

ⴷ ⵎⴰⵏ ⴰⵢⴰ ⵉ ⵉⵎⵙⴰⵔⴻⵏ ⵉ ⵉⵎⴻⵃⴹⴰⵔⴻⵏ ⵏ ⵢⴻⵛⵛⵓ ⵍⵎⴰⵙⵉⵃ ⵍⴰⵎⵉ ⵜ ⵜⵓⵖⴰ ⴰⴽⵉⴷⵙⴻⵏ.

 

ⵢⴻⵛⵛⵓ ⵜⵓⵖⴰ ⵉⵙⵙⴻⵏ ⵇⴱⴻⵍ ⵅ ⵍⵎⴻⵡⵜ ⵏⵏⴻⵙ ⵅ ⵚⵚⴰⵍⵉⴱ ⵓ ⵜⵓⵖⴰ ⵉⵙⵙⴻⵏ ⴱⴻⵍⵍⵉ ⵉⵜⵜⵅⴻⵚⵚⴰ ⴰⴷ ⵜⵉⵍⵉ ⵉ ⵓⵙⴻⵏⵊⴻⵎ ⵏ ⴱⵏⴰⴷⴻⵎ ⵓ ⵜⵓⵖⴰ ⵉⵏⵡⴰ ⵏⵉⵛⴰⵏ ⵓ ⵉⵄⴻⵎⵎⴻⴷ ⵎⴰⵃⴻⵏⴷ ⴰⴷ ⵅⴰⵙ ⵢⴻⴽⴽ ⵓⵄⴻⴷⴷⴻⴱ ⵏ ⵓⵚⴻⵍⵍⴻⴱ (ⵍⵄⵉⵇⴰⴱ ⵏ ⵉⵔⵓⵎⴰⵏⵉⵢⵢⴻⵏ ⵉ ⵉⵇⵟⴰⵟⵄⵉⵢⵢⴻⵏ) ⵓ ⵏⴻⵜⵜⴰ ⵜⵓⵖⴰ ⵉⵄⴻⵎⵎⴻⴷ ⴰⴷ ⵉⴽⵙⵉ ⵎⵉⵏ ⵉⵡⵄⴰⵔⴻⵏ ⴱⵍⴰ ⵇⴻⵟⵟⵓ ⵅ ⵎⴰⵏ ⴰⵢⴰ, ⵣⴻⵄⵎⴰ ⴰⵎⵙⴻⴱⴹⴰ ⵉⴽⴻⵎⵎⵍⴻⵏ ⵅ ⴱⴰⴱⴰⵙ ⴷⴻⴳ ⵉⵊⴻⵏⵡⴰⵏ ⴷⵉ ⵜⵙⴰⵄⴰⵜⵉⵏ ⵏⵏⵉ ⵅ ⵚⵚⴰⵍⵉⴱ, ⴰⵎⵙⴻⴱⴹⴰ ⵡⴻⵏⵏⵉ ⴷ ⵍⵄⵉⵇⴰⴱ (=ⴰⵡⴻⴷⴷⴻⴱ) ⵏ ⴰⵔⴻⴱⴱⵉ ⵉ ⴷⴷⴻⵏⴱ ⵉ ⵉⵜⵜⵅⴻⵚⵚⴰⵏ ⴰⴷ ⴷⴷ-ⵢⴰⵙ ⵅ ⴰⴷⴰⵎ, ⵉⵅⵙ ⴰⴷ ⵢⵉⵏⵉ ⵅ ⵎⴰⵔⵔⴰ ⵉⵡⴷⴰⵏ. ⴰⵎⵎⵓ ⴳⴳⵓⵔ ⴰⴷ ⴽⴻⵎⵎⵍⴻⵏ ⵏⵏⵓⴱⵓⵡⴰⵜ ⵅⴰⵙ ⵓ ⴰⵎⵎⵓ ⵉⴷⵡⴻⵍ ⵏⴻⵜⵜⴰ ⴷ ⵉⵣⵎⴰⵔ ⵏ ⴰⵔⴻⴱⴱⵉ ⵉⵚⴼⴰⵏ ⴱⵍⴰ ⵍⵄⵉⴱ (ⵍⴰⵎⵉ ⵡⴰⵔ ⵉⵜⵜⵡⵉⴼ ⴷⴰⵢⵙ ⵓⵍⴰ ⴷ ⵉⵊⵊ ⵏ ⴷⴷⴻⵏⴱ) ⵎⴰⵃⴻⵏⴷ ⴰⴷ ⵉⴽⴽⴻⵙ ⴷⴷⴻⵏⴱ ⵅ ⴷⴷⵓⵏⵉⵜ.

 

ⵍ'ⵉⵏⵊⵉⵍ ⵉⵙⵙⴰⵡⴰⵍ ⵅ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⵎⵉⵏ ⴷⵉ ⵉⴱⴰⵔⵔⴻⵃ ⵢⴻⵛⵛⵓ ⵍⵎⴰⵙⵉⵃ ⵙ ⵚⵚⴼⴰⵢⴻⵜ  ⵉ ⵉⵎⴻⵃⴹⴰⵔⴻⵏ ⵏⵏⴻⵙ ⵅ ⵓⵄⴻⴷⴷⴻⴱ ⵓ ⵅ ⵍⵎⴻⵡⵜ ⵏⵏⴻⵙ. ⴰⴷ ⴰⵛ ⵏⴻⵙⵙⵛⴻⵏ ⵙⵡⴰⴷⴷⴰⵢ ⵎⵉⵏ ⵉⵏⵏⴰ. ⵜⵍⴰⵜⴰ ⵏ ⵜⵡⴰⵍⴰⵡⵉⵏ-ⴰ ⵜⵡⴰⵙⴻⵊⵊⵍⴻⵏ ⵙ ⵓⴼⵓⵙ ⵏ ⵜⵍⴰⵜⴰ ⵏ ⵉⵎⴻⵃⴹⴰⵔⴻⵏ ⵏⵏⴻⵙ ⴷⵉ ⵍ'ⵉⵏⵊⵉⵍ! ⴰⴷ ⴰⵛ ⵜⴻⵏ-ⴷⴷ ⵏⵇⴻⴷⴷⴻⵎ ⵍⴻⵅⵅⵓ ⵙⵡⴰⴷⴷⴰⵢ ...

 

ⵢⴻⵛⵛⵓ ⵍⵎⴰⵙⵉⵃ ⵉⵙⵙⴰⵡⴰⵍ ⵅ ⵓⵄⴻⴷⴷⴻⴱ ⴷ ⵍⵎⴻⵡⵜ ⵏⵏⴻⵙ ⵉ ⵜⵡⴰⵍⴰⵜ ⵜⴰⵎⴻⵣⵡⴰⵔⵓⵜ

ⵣⵉ ⵙⵙⴻⵏⵏⵉ ⵉⴱⴷⴰ ⵢⴻⵛⵛⵓ ⴰⴷ ⵉⵙⵙⵛⴻⵏ ⵉ ⵉⵎⴻⵃⴹⴰⵔⴻⵏ ⵏⵏⴻⵙ ⴱⴻⵍⵍⵉ ⵉⵜⵜⵅⴻⵚⵚⴰ ⴰⵙ ⴰⴷ ⵉⵔⴰⵃ ⵖⴰⵔ ⵓⵔⵛⴰⵍⵉⵎ, ⴰⴷ ⵉⵡⴻⴷⴷⴻⴱ ⴰⵟⵟⴰⵙ ⵣⴻⴳ ⵉⵎⵖⴰⵔⴻⵏ ⵏ ⵍⴳⴻⵏⵙ ⴷ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ, ⴰⴷ ⵉⵜⵡⴰⵏⴻⵖ ⵓⵛⴰ ⴰⴷ ⴷⴷ-ⵉⵜⵡⴰⵙⵙⵏⴻⴽⴽⴰⵔ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ. ⴱⵓⵟⵔⵓⵙ ⵅⴻⵏⵏⵉ ⵉⴽⵙⵉ ⵜ ⵖⴰⵔⵙ, ⵉⴱⴷⴰ ⵉⵜⵜⵎⴻⵏⵖⴰ ⴰⴽⵉⵙ, ⵉⵏⵏⴰ “ⵙⵉⴷⵉ ⴰⵔⴻⴱⴱⵉ ⴰⴷ ⵛⴻⴽ ⵢⴰⵔⵃⴻⵎ, ⴰ ⵙⵉⴷⵉ, ⵎⴰⵏ ⴰⵢⴰ ⵡⴰⵔ ⴷ ⴰⵛ ⵉⵜⵜⴻⵎⵙⴰⵔ ⵄⴻⵎⵎⴰⵔⵚ.” ⵎⴰⵛⴰ ⵏⴻⵜⵜⴰ ⵉⵏⵏⴻⵇⵍⴻⴱ, ⵉⵏⵏⴰ ⵉ ⴱⵓⵟⵔⵓⵙ “ⴼⴼⴻⵖ ⵅⴰⴼⵉ, ⴰ ⵛⵛⵉⵟⴰⵏ, ⵛⴻⴽ ⴷ ⵉⵛⵜ ⵏ ⵜⵄⴻⵏⴽⵔⵉⴼⵜ ⵉ ⵏⴻⵛⵛ, ⵎⵉⵏⵣⵉ ⵛⴻⴽ ⵡⴰⵔ ⴷ ⴰⵛ ⵉⵛⵇⵉ ⵎⵉⵏ ⵉⵍⵍⴰⵏ ⵏ ⴰⵔⴻⴱⴱⵉ, ⵎⴰⵛⴰ ⵎⵉⵏ ⵉⵍⵍⴰⵏ ⵏ ⵉⵡⴷⴰⵏ.” (ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵜⵜⴰ 16:21-23)

 

ⵉⴱⴷⴰ ⵉⵙⵙⴻⵍⵎⴰⴷ ⴰⵇⴰ ⵎⵎⵉⵙ ⵏ ⴱⵏⴰⴷⴻⵎ ⵉⵜⵜⵅⴻⵚⵚⴰ ⴰⵙ ⴰⴷ ⵉⵡⴻⴷⴷⴻⴱ ⴰⵟⵟⴰⵙ ⵓⵛⴰ ⴰⴷ ⵉⵜⵡⴰⵙⵙⴻⵃⵇⴰⵔ ⵣⴻⴳ ⵉⵎⵖⴰⵔⴻⵏ ⵏ ⵍⴳⴻⵏⵙ ⴷ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ, ⴰⴷ ⵜ ⵏⵖⴻⵏ ⵓⵛⴰ ⴰⵡⴰⵔⵏⵉ ⵜⵍⴰⵜⴰ ⵏ ⵡⵓⵙⵙⴰⵏ ⴰⴷ ⴷⴷ-ⵉⴽⴽⴰⵔ ⵄⴰⵡⴻⴷ. ⵉⵏⵏⴰ ⴰⵡⴰⵍ-ⴰ ⵙ ⴱⵟⴰⵢⵟⴰⵢ. ⵅⴻⵏⵏⵉ ⵉⴽⵙⵉ ⵜ ⴱⵓⵟⵔⵓⵙ ⵖⴰⵔⵙ ⵖⴰⵔ ⵓⵖⴻⵣⴷⵉⵙ ⵓⵛⴰ ⵉⴱⴷⴰ ⵉⵜⵜⵡⴻⴱⴱⴻⵅ ⵉⵜ. ⵎⴰⵛⴰ ⵉⵏⵏⴻⵇⵍⴻⴱ, ⵉⵅⵥⴰⵔ ⴷⴻⴳ ⵉⵎⴻⵃⴹⴰⵔⴻⵏ ⵏⵏⴻⵙ ⵓⵛⴰ ⵉⵡⴻⴱⴱⴻⵅ ⴱⵓⵟⵔⵓⵙ, ⵉⵇⵇⴰⵔ “ⴰⴳⴳʷⴻⵊ ⵅⴰⴼⵉ ⴰⵡⴰⵔⵏⵉ ⴰⵢⵉ, ⴰ ⵛⵛⵉⵟⴰⵏ, ⵎⵉⵏⵣⵉ ⵛⴻⴽ ⵡⴰⵔ ⴷ ⴰⵛ ⵉⵛⵇⵉ ⵎⵉⵏ ⵉⵍⵍⴰⵏ ⵏ ⴰⵔⴻⴱⴱⵉ, ⵎⴰⵛⴰ ⵎⵉⵏ ⵉⵍⵍⴰⵏ ⵏ ⵉⵡⴷⴰⵏ.” (ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵔⴽⵓ 8:31-32)

 

ⵉⵏⵏⴰ “ⵉⵜⵜⵅⴻⵚⵚⴰ ⵉ ⵎⵎⵉⵙ ⵏ ⴱⵏⴰⴷⴻⵎ ⴰⴷ ⵉⵡⴻⴷⴷⴻⴱ ⴰⵟⵟⴰⵙ ⵓⵛⴰ ⴰⴷ ⵉⵎⵎⴻⵏⴹⴰⵔ ⵣⴻⴳ ⵉⵎⵖⴰⵔⴻⵏ ⵏ ⵍⴳⴻⵏⵙ ⴷ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ, ⴰⴷ ⵉⵜⵡⴰⵏⴻⵖ ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⴷⴷ-ⵉⴽⴽⴰⵔ.” (ⵍⵉⵏⵊⵉⵍ ⵙ ⵓⴼⵓⵙ ⵏ ⵍⵓⵇⴰ 9:22)

 

ⵢⴻⵛⵛⵓ ⵍⵎⴰⵙⵉⵃ ⵉⵙⵙⴰⵡⴰⵍ ⵅ ⵓⵄⴻⴷⴷⴻⴱ ⴷ ⵍⵎⴻⵡⵜ ⵏⵏⴻⵙ ⵉ ⵜⵡⴰⵍⴰⵜ ⵡⵉⵙⵙ ⵜⵏⴰⵢⴻⵏ

 

ⵍⴰⵎⵉ ⵜⴻⵏ ⵜⵓⵖⴰ ⵊⵎⵉⵄ ⴷⵉ ⵍⵊⴰⵍⵉⵍ, ⵉⵏⵏⴰ ⵢⴻⵛⵛⵓ ⵉ ⵉⵎⴻⵃⴹⴰⵔⴻⵏ ⵏⵏⴻⵙ “ⵎⵎⵉⵙ ⵏ ⴱⵏⴰⴷⴻⵎ ⴰⴷ ⵉⵜⵡⴰⵙⴻⵍⵍⴻⵎ ⴷⴻⴳ ⵉⴼⴰⵙⵙⴻⵏ ⵏ ⵉⵡⴷⴰⵏ ⴰⴷ ⵜ ⵏⵖⴻⵏ ⵓⵛⴰ ⴰⴷ ⴷⴷ-ⵉⵜⵡⴰⵙⵙⵏⴻⴽⴽⴰⵔ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ.” ⵅⴻⵏⵏⵉ ⵛⴻⴹⵏⴻⵏ ⴰⵟⵟⴰⵙ. (ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵜⵜⴰ 17:22-23)

 

ⴼⴼⵖⴻⵏ-ⴷⴷ ⵙⵙⴻⵏⵏⵉ ⵓⵛⴰ ⵛⵓⵇⴻⵏ ⴷⵉ ⵍⵊⴰⵍⵉⵍ ⵓ ⵏⴻⵜⵜⴰ ⵜⵓⵖⴰ ⵡⴰⵔ ⵉⵅⵙ ⴰⴷ ⵉⵙⵙⴻⵏ ⵎⴰⵏ ⴰⵢⴰ ⵓⵍⴰ ⴷ ⵉⵊⵊ. ⵎⵉⵏⵣⵉ ⵜⵓⵖⴰ ⵉⵙⵙⴻⵍⵎⴰⴷ ⵉⵎⴻⵃⴹⴰⵔⴻⵏ ⵏⵏⴻⵙ, ⵉⵇⵇⴰⵔ ⴰⵙⴻⵏ “ⴰⵇⴰ ⵎⵎⵉⵙ ⵏ ⴱⵏⴰⴷⴻⵎ ⴰⴷ ⵉⵜⵡⴰⵙⴻⵍⵍⴻⵎ ⴷⴻⴳ ⵉⴼⴰⵙⵙⴻⵏ ⵏ ⵉⵡⴷⴰⵏ, ⴰⴷ ⵜ ⵏⵖⴻⵏ ⵓⵛⴰ ⴰⵡⴰⵔⵏⵉ ⵍⴰⵎⵉ ⵜ ⵉ ⵖⴰ ⵏⵖⴻⵏ, ⴰⴷ ⴷⴷ-ⵉⴽⴽⴰⵔ ⴰⵡⴰⵔⵏⵉ ⵜⵍⴰⵜⴰ ⵏ ⵡⵓⵙⵙⴰⵏ.” ⵎⴰⵛⴰ ⵏⵉⵜⵏⵉ ⵡⴰⵔ ⴼⵀⵉⵎⴻⵏ ⵉ ⵡⴰⵡⴰⵍ-ⴰ ⵓⵛⴰ ⴳⴳʷⴻⴷⴻⵏ ⴰⴷ ⵜ ⵙⵙⴻⵇⵙⴰⵏ ⵅ ⵓⵢⴰ. (ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵔⴽⵓ 9:30-32)

 

ⵎⴰⵔⵔⴰ ⵜⵜⵄⴻⵊⴱⴻⵏ ⴷⵉ ⵍⴻⵎⵖⴰⵔⴻⵜ ⵏ ⴰⵔⴻⴱⴱⵉ. ⵓⵎⵉ ⵜⵜⴱⴻⵀⵜⴻⵏ ⵎⴰⵔⵔⴰ ⴷⵉ ⵎⴰⵔⵔⴰ ⵎⵉⵏ ⵉⴳⴳⴰ, ⵉⵏⵏⴰ ⵉ ⵉⵎⴻⵃⴹⴰⵔⴻⵏ ⵏⵏⴻⵙ “ⴳⴳⴻⵎ ⵓⵍⴰ ⴷ ⴽⴻⵏⵏⵉⵡ ⴰⵡⴰⵍⴻⵏ-ⴰ ⴷⴻⴳ ⵉⵎⴻⵣⵣⵓⵖⴻⵏ ⵏⵡⴻⵎ, ⵎⵉⵏⵣⵉ ⵎⵎⵉⵙ ⵏ ⴱⵏⴰⴷⴻⵎ ⴰⴷ ⵉⵜⵡⴰⵙⴻⵍⵍⴻⵎ ⵖⴰⵔ ⵉⴼⴰⵙⵙⴻⵏ ⵏ ⵉⵡⴷⴰⵏ.” ⵎⴰⵛⴰ ⵏⵉⵜⵏⵉ ⵡⴰⵔ ⴼⵀⵉⵎⴻⵏ ⵉ ⵡⴰⵡⴰⵍ-ⴰ, ⵜⵓⵖⴰ ⵉⵜⵡⴰⵙⵙⵏⵓⴼⴼⴰⵔ ⵅⴰⵙⴻⵏ ⵎⴰⵃⴻⵏⴷ ⵡⴰⵔ ⴷ ⴰⵙ ⴼⴻⵀⵀⵎⴻⵏ. ⵓⵛⴰ ⵏⵉⵜⵏⵉ ⴳⴳʷⴻⴷⴻⵏ ⴰⴷ ⵜ ⵙⵙⴻⵇⵙⴰⵏ ⵅ ⵡⴰⵡⴰⵍ-ⴰ. (ⵍⵉⵏⵊⵉⵍ ⵙ ⵓⴼⵓⵙ ⵏ ⵍⵓⵇⴰ 9:43-45)

 

ⵢⴻⵛⵛⵓ ⵍⵎⴰⵙⵉⵃ ⵉⵙⵙⴰⵡⴰⵍ ⵅ ⵓⵄⴻⴷⴷⴻⴱ ⴷ ⵍⵎⴻⵡⵜ ⵏⵏⴻⵙ ⵉ ⵜⵡⴰⵍⴰⵜ ⵡⵉⵙⵙ ⵜⵍⴰⵜⴰ

 

ⵍⴰⵎⵉ ⵉⴳⴰⵄⵄⴻⴷ ⵢⴻⵛⵛⵓ ⵖⴰⵔ ⵓⵔⵛⴰⵍⵉⵎ, ⵢⵉⵡⵉ ⵜⴻⵏⵄⴰⵛ ⵏ ⵉⵎⴻⵃⴹⴰⵔⴻⵏ ⵏⵏⴻⵙ ⵖⴰⵔ ⵓⵖⴻⵣⴷⵉⵙ ⴷⴻⴳ ⵡⴻⴱⵔⵉⴷ, ⵉⵏⵏⴰ ⴰⵙⴻⵏ “ⵅⵥⴰⵔ, ⴰⴷ ⵏⴳⴰⵄⵄⴻⴷ ⵖⴰⵔ ⵓⵔⵛⴰⵍⵉⵎ ⵓⵛⴰ ⴰⴷ ⵙⴻⵍⵍⵎⴻⵏ ⵎⵎⵉⵙ ⵏ ⴱⵏⴰⴷⴻⵎ ⵉ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵓ ⵏⵉⵜⵏⵉ ⴰⴷ ⵅⴰⵙ ⵃⴻⴽⵎⴻⵏ ⵙ ⵍⵎⴻⵡⵜ. ⵏⵉⵜⵏⵉ ⴰⴷ ⵜ ⵙⴻⵍⵍⵎⴻⵏ ⵉ ⵍⴻⴳⵏⵓⵙ ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵙⵜⴻⵀⵣⴰⵏ, ⴰⴷ ⵜ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ ⵓⵛⴰ ⴰⴷ ⵜ ⵚⴻⵍⵍⴱⴻⵏ, ⵅⴻⵏⵏⵉ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⴷⴷ-ⵉⵜⵡⴰⵙⵙⵏⴻⴽⴽⴰⵔ.” (ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵜⵜⴰ 20:17-19)

 

ⵜⵓⵖⴰ-ⵜⴻⵏ ⴷⴻⴳ ⵡⴻⴱⵔⵉⴷ ⵖⴰⵔ ⵓⵔⵛⴰⵍⵉⵎ. ⵢⴻⵛⵛⵓ ⵜⵓⵖⴰ ⵉⵣⵣⴰⵔ ⴰⵙⴻⵏ ⵓⵛⴰ ⵜⵓⵖⴰ ⵏⵉⵜⵏⵉ ⵜⵜⴱⴻⵀⵜⴻⵏ ⵓ ⵉⵏⵏⵉ ⵜ-ⵉⴷⴷ ⵉⴹⴼⴰⵔⴻⵏ, ⴳⴳʷⴻⴷⴻⵏ. ⵉⴽⵙⵉ ⵄⴰⵡⴻⴷ ⵜⴻⵏⵄⴰⵛ ⵖⴰⵔ ⵓⵖⴻⵣⴷⵉⵙ ⵓⵛⴰ ⵉⴱⴷⴰ ⵉⵇⵇⴰⵔ ⴰⵙⴻⵏ ⵅ ⵎⵉⵏ ⴷ ⴰⵙ ⵉ ⵖⴰ ⵉⵎⵙⴰⵔⴻⵏ “ⴰⵇⴰ ⵏⴻⵛⵛⵉⵏ ⴰⴷ ⵏⴳⴰⵄⵄⴻⴷ ⵖⴰⵔ ⵓⵔⵛⴰⵍⵉⵎ ⵓ ⵎⵎⵉⵙ ⵏ ⴱⵏⴰⴷⴻⵎ ⴰⴷ ⵉⵜⵡⴰⵙⴻⵍⵍⴻⵎ ⵉ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵓ ⵏⵉⵜⵏⵉ ⴰⴷ ⵅⴰⵙ ⵃⴻⴽⵎⴻⵏ ⵙ ⵍⵎⴻⵡⵜ, ⴰⴷ ⵜ ⵙⴻⵍⵍⵎⴻⵏ ⵉ ⵍⴻⴳⵏⵓⵙ, ⴰⴷ ⵜ ⵙⵙⵃⴻⵇⴰⵔⴻⵏ, ⴰⴷ ⵜ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ, ⴰⴷ ⵅⴰⵙ ⵙⵙⵓⵙⴼⴻⵏ, ⴰⴷ ⵜ ⵏⵖⴻⵏ ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⴷⴷ-ⵉⴽⴽⴰⵔ.” (ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵔⴽⵓ 10:32-34)

 

ⵉⴽⵙⵉ ⵖⴰⵔⴻⵙ ⵜⴻⵏⵄⴰⵛ, ⵉⵏⵏⴰ ⴰⵙⴻⵏ “ⴰⴷ ⵏⴳⴰⵄⵄⴻⴷ ⵖⴰⵔ ⵓⵔⵛⴰⵍⵉⵎ ⵓⵛⴰ ⴰⴷ ⵉⵜⵡⴰⵇⴼⴻⵍ ⵉ ⵎⵎⵉⵙ ⵏ ⴱⵏⴰⴷⴻⵎ ⵎⴰⵔⵔⴰ ⵎⵉⵏ ⵢⵓⵔⴰⵏ ⵣⴻⴳ ⵉⵏⴰⴱⵉⵢⵢⴻⵏ. ⵎⵉⵏⵣⵉ ⵏⴻⵜⵜⴰ ⴰⴷ ⵉⵜⵡⴰⵙⴻⵍⵍⴻⵎ ⵉ ⵍⴻⴳⵏⵓⵙ, ⴰⴷ ⵜ ⵙⵙⴻⵃⵇⴰⵔⴻⵏ, ⴰⴷ ⵣⵣⴰⵢⴻⵙ ⵙⵙⴱⴻⵀⵜⵍⴻⵏ, ⴰⴷ ⵜ ⵜⴻⴽⴽⵡⴰⵔⴻⵏ ⵓⵛⴰ ⴰⴷ ⵅⴰⵙ ⵙⵙⵓⵙⴼⴻⵏ, ⴰⴷ ⵜ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ, ⴰⴷ ⵜ ⵏⵖⴻⵏ ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⴷⴷ-ⵉⴽⴽⴰⵔ.” ⵏⵉⵜⵏⵉ ⵡⴰⵔ ⴼⵀⵉⵎⴻⵏ ⵡⴰⵍⵓ ⵣⵉ ⵎⴰⵏ ⴰⵢⴰ. ⵜⵓⵖⴰ ⴰⵡⴰⵍ-ⴰ ⵉⴼⴼⴰⵔ ⵅⴰⵙⴻⵏ ⵓⵛⴰ ⵡⴰⵔ ⴼⵀⵉⵎⴻⵏ ⵎⵉⵏ ⵉⵜⵡⴰⵏⵏⴰⵏ. (ⵍⵉⵏⵊⵉⵍ ⵙ ⵓⴼⵓⵙ ⵏ ⵍⵓⵇⴰ 18:31-34)

 

ⵎⴰ ⵜⵃⴻⴽⴽⴰⵔⴻⴷ ⴰⵡⴰⵍ-ⴰ ⵏ ⵉⵎⴻⵃⴹⴰⵔⴻⵏ ⵏⵏⴻⵙ: "ⵏⵉⵜⵏⵉ ⵡⴰⵔ ⴼⵀⵉⵎⴻⵏ ⵡⴰⵍⵓ ⵣⵉ ⵎⴰⵏ ⴰⵢⴰ. ⵜⵓⵖⴰ ⴰⵡⴰⵍ-ⴰ ⵉⴼⴼⴰⵔ ⵅⴰⵙⴻⵏ ⵓⵛⴰ ⵡⴰⵔ ⴼⵀⵉⵎⴻⵏ ⵎⵉⵏ ⵉⵜⵡⴰⵏⵏⴰⵏ."  ⵜⵍⴰⵜⴰ ⵏ ⵉⵎⵓⵔⴻⵏ ⵉⵛⴰⵔⵔⴻⵃ ⵢⴻⵛⵛⵓ ⵍⵎⴻⵙⵉⵃ ⵍⵅⴰⴹⴰⵔ ⵏⵏⴻⵙ ⵉ ⴱⵏⴰⴷⴻⵎ ⵓⵛⴰ ⵉⴳⴳⴰ ⵉⵜ ⵉ ⵓⵙⴻⵏⵊⴻⵎ ⵏⵏⴻⵖ, ⵉⴳⴳⴰ ⵉⵜ ⵉ ⵏⴻⵛⵛⵉⵏ ⵎⴰⵃⴻⵏⴷ ⴰⴷ ⵏⴻⴼⵀⴻⵎ ⵏⵉⵛⴰⵏ ⴱⴻⵍⵍⵉ ⴰⵇⴰ ⵏⴻⵜⵜⴰ ⵉⵙⵙⴰⵡⴰⵍ-ⴷⴷ ⵖⴰⵔⵏⴻⵖ. ⵎⴰⵖⴰⵔ ⵏⴻⵛⵛⵉⵏ ⵏⴼⴻⵀⵀⴻⵎ ⵎⵖⵉⵔ ⵙ ⵛⵡⴰⵢⵜ ⵛⵡⴰⵢⵜ ⵜⵉⵎⴻⵙⵍⴰⵢⵉⵏ ⵏ ⴰⵔⴻⴱⴱⵉ ⵣⵉ ⵙⵙⵉⴱⴱⴻⵜ ⵏ ⴷⴷⴻⵏⴱ ⴷⴻⴳ ⵡⵓⵍ ⵏⵏⴻⵖ ⴷ ⵓⵎⵄⴰⵔⵔⵉ ⵏⵏⴻⵖ ⴰⴽ-ⴷ ⵎⵉⵏ ⵉⵅⵙ ⵏⴻⵜⵜⴰ. ⵎⴻⵛⵃⴰⵍ ⵏ ⵉⵡⴷⴰⵏ ⴷⵉ ⴷⴷⵓⵏⵏⵉⵜ ⵏⴻⴽⴽⴰⵔⴻⵏ ⵏⵉⵖ ⵡⴰⵔ ⵜⵜⵉⵎⵏⴻⵏ ⴱⴻⵍⵍⵉ ⵢⴻⵛⵛⵓ ⵉⵜⵡⴰⵚⴻⵍⵍⴻⴱ ⵓ ⵎⴻⵛⵃⴰⵍ ⵡⴰⵔ ⵜ ⴼⵀⵉⵎⴻⵏ ⵇⴰⵄ, ⵡⴰⵅⵅⴰ ⵣⴻⵎⵎⴰⵔⴻⵏ ⴰⴷ ⵖⴰⵔⴻⵏ ⵍ'ⵉⵏⵊⵉⵍ ⵓ ⵡⴰⵅⵅⴰ ⵙⵍⵉⵏ ⵉ ⵎⴰⵏ ⴰⵢⴰ ⵎⴰⵔⵔⴰ!

 

ⴻⵊⵊ ⴰⵏⴻⵖ ⴰⴷ ⵏⵉⵍⵉ ⵏⴻⵙⵙⴻⵏ ⵉⵍⵍⴰ ⴷⴷⴻⵏⴱ ⵉⵜⵜⴰⵡⵉ ⵖⴰⵔ ⵍⵎⴻⵡⵜ. ⴰⵎⴻⵏ ⴷⵉ ⵢⴻⵛⵛⵓ ⵍⵎⴰⵙⵉⵃ ⵡⴻⵏⵏⵉ ⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ, ⵎⴰⵖⴰⵔ ⵎⴰⵍⴰ ⵏⵛⴰⵔⵛ ⴷⵉ ⵍⵎⴻⵡⵜ ⵏⵏⴻⵙ ⵙ ⵍⵉⵎⴰⵏ ⴰⴷ ⵏⵛⴰⵔⵛ ⵓⵍⴰ ⴷⵉ ⵜⵏⵓⴽⵔⴰ ⵏⵏⴻⵙ ⵍⵉⵎⴰⵏ.

 

ⴰⵔⴻⴱⴱⵉ ⵡⴰⵔ ⵉⵙⵙⵉⵡⴻⵍ ⵛⴰ ⵎⵖⵉⵔ ⵜⵍⴰⵜⴰ ⵏ ⵉⵎⵓⵔⴻⵏ ⵡⴰⵀⴰ ⵙ ⵓⵇⴻⵎⵎⵓⵎ ⵏ ⵢⴻⵛⵛⵓ ⵍⵎⴰⵙⵉⵃ ⵍⴰⵎⵉ ⵉⴷⴷⴰⵔ ⵊⴰⵔⴰⵏⴻⵖ ⵓ ⵜⵓⵖⴰ ⵉⵙⵙⴰⵡⴰⵍ ⴰⴽ-ⴷ ⵉⵎⴻⵃⴹⴰⵔⴻⵏ ⵏⵏⴻⵙ, ⵎⴰⵛⴰ ⴰⵔⴻⴱⴱⵉ ⵜⵓⵖⴰ ⵉⵏⴻⴱⴱⴰ ⵎⴰⵏ ⴰⵢⴰ ⵙ ⵡⴰⵟⵟⴰⵙ ⵏ ⵉⴱⵔⵉⴷⴻⵏ ⴷⴻⴳ ⵉⴷⵍⵉⵙⴻⵏ ⵏ ⵎⵓⵙⴰ ⴷ ⵉⵏⴰⴱⵉⵢⵢⴻⵏ ⵇⴱⴻⵍ ⵎⵎⴰ ⴷⴷ-ⵢⵓⵙⴰ ⵍⵎⴰⵙⵉⵃ ⵖⴰⵔ ⵜⴻⵎⵎⵓⵔⵜ ⴷⵉ ⵚⵙⵉⴼⴻⵜ ⵏ ⵢⵉⵊⵊ ⵏ ⴱⵏⴰⴷⴻⵎ.

 

ⴱⴰⵍⴰⴽ ⴰⴷ ⵜⵉⵏⵉⴷ ⴰⵎⴻⵛⵏⴰⵡ ⵉⵎⴻⵃⴹⴰⵔⴻⵏ ⴰⵇⴰ ⵡⴰⵔ ⵜⴻⴼⵀⵉⵎⴻⴷ ⵎⴰⵏ ⴰⵢⴰ. ⵎⴰ ⵏⵉⵛⴰⵏ?

ⵎⴰⵎⵎⴻⵛ ⵜⵅⴰⵔⵔⴰⵚⴻⴷ ⴰⴷ ⵜⴻⵙⵙⵏⴻⴷ ⴰⴷ ⵜⴼⴻⵀⵎⴻⴷ ⵡⴻⵏⵏⵉ ⵛⴻⴽ ⴷⴷ-ⵉⵅⴻⵍⵇⴻⵏ? ⵎⴰ ⵡⴰⵔ ⵢⴻⵍⵍⵉ ⵏⴻⵜⵜⴰ ⴱⵍⴰ ⵍⴻⵄⴱⴰⵔ ⴷ ⴰⵎⴻⵇⵇⵔⴰⵏ ⵅⴰⵏⴻⵖ? ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⵏⴻⵇⴱⴻⵍ ⵎⵉⵏ ⵉⵇⵇⴰⵔ ⴰⵔⴻⴱⴱⵉ ⵓ ⴰⴷ ⵏⴰⵔⵣⴻⵎ ⵓⵍ ⵏⵏⴻⵖ ⵓ ⴰⴷ ⵏⵅⴰⵔⵔⴻⵚ ⴷⵉ ⵎⵉⵏ ⵉⵇⵇⴰⵔ. ⵉⵜⵜⵅⴻⵚⵚⴰ ⴰⴷ ⵏⴰⵎⴻⵏ ⴷⵉ ⴰⵔⴻⴱⴱⵉ ⵓ ⴷⵉ ⵔⵉⵅⴹⴰⵔⴻⵜ ⵏⵏⴻⵙ ⵎⴰⵃⴻⵏⴷ ⴰⴷ ⵢⴻⵊⵊ ⵎⵎⵉⵙ ⴰⴷ ⵉⵜⵡⴰⵙⴻⵎⵎⴰⵔ ⵅ ⵚⵚⴰⵍⵉⴱ ⴷⵉ ⵟⵟⵡⴻⵄ ⵏ ⵉⵎⴻⴷⵏⴰⴱ! ⵡⴰⵔ ⴷⵉⵏⵏⵉ ⵎⵉⵏ ⵉ ⵖⴰ ⵉⵇⴱⴻⵍ ⵓⵅⴰⵔⵔⴻⵚ ⵏ ⴱⵏⴰⴷⴻⵎ ⴷⵉ ⵎⴰⵏ ⴰⵢⴰ, ⴰⵇⴰ-ⵜ ⴷ ⵜⵉⵎⴻⴳⴳⴰ ⵏ ⴰⵔⴻⴱⴱⵉ ⵣⵉ ⵜⴰⵢⵔⵉ ⵏⵏⴻⵙ ⵡⴰⵔ ⵉⵜⵜⴻⵏⵃⴻⴷⴷⵉⵏ. ⵎⴻⵍⵎⵉ ⵎⵎⴰ ⵏⴻⴱⴷⴰ ⴷⴻⵖⵢⴰ ⴰⴷ ⵜ ⵏⴻⵇⴱⴻⵍ, ⴳⴳⵓⵔ ⴰⴷ ⵏⴻⵙⵙⴻⵏ ⴱⴻⵄⴷⴰ ⵛⵡⴰⵢⵜ ⴽⵜⴰⵔ.

 

ⴻⵊⵊ ⴰⵏⴻⵖ ⴰⴷ ⵏⵖⴰⵔ ⵉⵊⵊ ⵣⵉ ⴰⵔⴻⴱⵄⴰ ⵏ ⵉⵙⴰⵡⴹⴻⵏ ⴷⵉ ⵍⵉⵏⵊⵉⵍ ⵙ ⵓⴼⵓⵙ ⵏ ⵎⴰⵜⵜⴰ 27 ⴷ 28 ⵅ ⵓⵚⴻⵍⵍⴻⴱ ⵎⴰⵖⴰⵔ ⴷ ⵡⴻⵏⵏⵉ ⴷ ⵜⵡⴰⵔⵉⵜ ⵅ ⵓⵙⴻⵇⵙⵉ ⵉ ⵉⵍⵍⴰⵏ ⵙⴻⵏⵏⴻⵊ ⵉ ⵜⴻⵡⵔⵉⵇⵜ.

 

ⵢⴻⵛⵛⵓ ⵇⵉⴱⴰč ⵉ ⵍⵄⴻⵎⵉⵍ ⴱⵉⵍⴰⵟⵓⵙ (ⵎⴰⵔ. 15:2-5; ⵍⵓⴽ. 23:3-5; ⵢⵓⵃ. 18:33-38)

ⵢⴻⵛⵛⵓ ⵜⵓⵖⴰ ⵉⴱⴻⴷⴷ ⵇⵉⴱⴰč ⵉ ⵍⵄⴻⵎⵉⵍ. ⵍⵄⴻⵎⵉⵍ ⵉⵙⵙⴻⵇⵙⴰ ⴰⵙ, ⵉⵏⵏⴰ “ⵎⴰ ⵛⴻⴽ ⴷ ⴰⵊⴻⵍⵍⵉⴷ ⵏ ⵡⵓⴷⴰⵢⴻⵏ?” ⵢⴻⵛⵛⵓ ⵉⵏⵏⴰ ⴰⵙ “ⵛⴻⴽ ⵜⴻⵏⵏⵉⴷ ⵜ.” ⵓⵛⴰ ⵍⴰⵎⵉ ⵜ ⵜⴻⵀⵎⴻⵏ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵖⴰⵔⴻⵏ ⵏ ⵡⴻⵢⴷⵓⴷ, ⵢⴰⵔⵔ-ⴷⴷ ⵙ ⵡⴰⵍⵓ. ⵅⴻⵏⵏⵉ ⵉⵏⵏⴰ ⴰⵙ ⴱⵉⵍⴰⵟⵓⵙ “ⵎⴰ ⵡⴰⵔ ⵜⴻⵙⵍⵉⴷ ⵎⴻⵛⵃⴰⵍ ⵅⴰⴽ ⵛⴻⵀⴷⴻⵏ?” ⵏⴻⵜⵜⴰ ⵡⴰⵔ ⴷⴷ ⵅⴰⵙ ⵢⴰⵔⵔⵉ ⵓⵍⴰ ⵅ ⵉⵊⵊ ⵏ ⵡⴰⵡⴰⵍ, ⴰⵍⴰⵎⵉ ⵉⵇⵇⵉⵎ ⵍⵄⴻⵎⵉⵍ ⵉⵜⵜⴻⴱⵀⴻⵜ.

 

ⴱⵉⵍⴰⵟⵓⵙ ⵢⴰⵔⴻⵣⵣⵓ ⴰⴷ ⵉⴹⵍⴻⵇ ⵉ ⵢⴻⵛⵛⵓ (ⵎⴰⵔ. 15:6-15; ⵍⵓⴽ. 23:13-25; ⵢⵓⵃ. 18:39-19:16)

ⵜⵓⵖⴰ ⵍⵄⴻⵎⵉⵍ ⵉⵏⵏⵓⵎ ⵢⴰⵔⴻⵅⵅⵓ ⴷⵉ ⴽⵓⵍ ⵍⵄⵉⴷ ⵉ ⵢⵉⵊⵊ ⵏ ⵓⵎⴻⵃⴱⵓⵙ ⵉ ⵍⵖⴰⵛⵉ, ⵡⴻⵏⵏⵉ ⵉⵅⵙⴻⵏ ⵏⵉⵜⵏⵉ. ⵜⵓⵖⴰ ⵖⴰⵔⵙⴻⵏ ⴷⴻⴳ ⵡⵓⵙⵙⴰⵏ ⵏⵏⵉ ⵉⵊⵊ ⵏ ⵓⵎⴻⵃⴱⵓⵙ ⵉⵜⵡⴰⵙⵙⴻⵏ, ⵇⵇⴰⵔⴻⵏ ⴰⵙ ⴱⴰⵔⴰⴱⴱⴰⵙ. ⵅⴻⵏⵏⵉ ⵍⴰⵎⵉ ⵎⵓⵏⴻⵏ, ⵉⵏⵏⴰ ⴰⵙⴻⵏ ⴱⵉⵍⴰⵟⵓⵙ “ⵡⵉ ⵜⴻⵅⵙⴻⵎ ⴰⴷ ⴰⵡⴻⵎ ⴰⵔⵅⵓⵖ, ⴱⴰⵔⴰⴱⴱⴰⵙ ⵏⵉⵖ ⵢⴻⵛⵛⵓ ⵡⴻⵏⵏⵉ ⵓⵎⵉ ⵇⵇⴰⵔⴻⵏ ⵍⵎⴰⵙⵉⵃ?” ⵎⵉⵏⵣⵉ ⵏⴻⵜⵜⴰ ⵉⵙⵙⴻⵏ ⴰⵇⴰ ⵏⵉⵜⵏⵉ ⵙⴻⵍⵍⵎⴻⵏ ⵜ ⵣⵉ ⵍⴻⵃⵙⴻⴷ. ⴰⵎ ⵜⵓⵖⴰ ⵉⵇⵇⵉⵎ ⵅ ⵍⴽⵓⵔⵙⵉ ⵏ ⵍⵃⵓⴽⵎ, ⵜⴻⵙⵙⴻⴽⴽ-ⴷⴷ ⵖⴰⵔⵙ ⵜⴻⵎⵖⴰⵔⵜ ⵏⵏⴻⵙ, ⵜⴻⵏⵏⴰ “ⴱⴰⵔⵔⴰ ⵉⵅⴻⴼ ⵏⵏⴻⴽ ⵣⴻⴳ ⵓⵎⵙⴻⴳⴳⴰⴷ ⵏⵏⵉ, ⵎⵉⵏⵣⵉ ⴰⵇⴰ ⴰⵙⵙ-ⴰ ⵜⵡⴰⵄⴻⴷⴷⴱⴻⵖ ⴰⵟⵟⴰⵙ ⴷⵉ ⵜⴰⵔⵊⵉⵜ ⴷⵉ ⵙⵙⵉⴱⴱⴻⵜ ⵏⵏⴻⵙ.” ⵎⴰⵛⴰ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⵎⵖⴰⵔⴻⵏ ⵏ ⵍⴳⴻⵏⵙ ⵙⵙⵇⴻⵏⵄⴻⵏ ⵍⵖⴰⵛⵉ ⵃⵉⵎⴰ ⴰⴷ ⵜⵜⴰⵔⴻⵏ ⴱⴰⵔⴰⴱⴱⴰⵙ ⵓⵛⴰ ⴰⴷ ⵏⵖⴻⵏ ⵢⴻⵛⵛⵓ. ⵍⵄⴻⵎⵉⵍ ⵢⴰⵔⵔⴰ-ⴷⴷ, ⵉⵏⵏⴰ ⴰⵙⴻⵏ “ⵎⴰⵏ ⵡⴻⵏ ⵣⵉ ⵜⵏⴰⵢⴻⵏ-ⴰ ⵉ ⵜⴻⵅⵙⴻⵎ ⴰⴷ ⴰⵔⵅⵓⵖ?” ⵏⵏⴰⵏ “ⴱⴰⵔⴰⴱⴱⴰⵙ”. ⴱⵉⵍⴰⵟⵓⵙ ⵉⵏⵏⴰ ⴰⵙⴻⵏ “ⵎⵉⵏ ⵉ ⵖⴰ ⴳⴳⴻⵖ ⵅⴻⵏⵏⵉ ⴰⴽ-ⴷ ⵢⴻⵛⵛⵓ ⵓⵎⵉ ⵇⵇⴰⵔⴻⵏ ⵍⵎⴰⵙⵉⵃ?” ⵏⵏⴰⵏ ⴰⵙ ⵎⴰⵔⵔⴰ “ⴻⵊⵊ ⵉⵜ ⴰⴷ ⵉⵜⵡⴰⵚⴻⵍⵍⴻⴱ!” ⵎⴰⵛⴰ ⵍⵄⴻⵎⵉⵍ ⵉⵏⵏⴰ “ⵎⴰⵏ ⵜⵓⵄⴻⴼⴼⵏⴰ ⵉ ⵉⴳⴳⴰ?” ⵙⵖⵓⵢⵢⴻⵏ ⵙ ⵊⵊⴻⵀⴷ ⴽⵜⴰⵔ, ⵏⵏⴰⵏ “ⴻⵊⵊ ⵉⵜ ⴰⴷ ⵉⵜⵡⴰⵚⴻⵍⵍⴻⴱ.” ⵍⴰⵎⵉ ⵉⵥⵔⴰ ⴱⵉⵍⴰⵟⵓⵙ ⴱⴻⵍⵍⵉ ⵏⴻⵜⵜⴰ ⵡⴰⵔ ⵢⵉⵡⴻⴹ ⵖⴰⵔ ⵡⴰⵍⵓ, ⵎⴰⵀⵓ ⴰⴷ ⵉⴽⴽⴰⵔ ⵓⵖⵓⵡⵡⴻⵖ, ⵉⴽⵙⵉ ⴰⵎⴰⵏ, ⵉⵙⵙⵉⵔⴷ ⵉⴼⴰⵙⵙⴻⵏ ⵏⵏⴻⵙ ⵇⵉⴱⴰč ⵉ ⵍⵖⴰⵛⵉ, ⵉⵏⵏⴰ“ⵏⴻⵛⵛ ⵡⴰⵔ ⵜⵜⵓⵔⵙⴻⵖ ⵛⴰ ⴷⴻⴳ ⵉⴷⴰⵎⵎⴻⵏ ⵏ ⵓⵎⵙⴻⴳⴳⴰⴷ-ⴰ, ⵅⵥⴰⵔⴻⵎ ⴽⴻⵏⵏⵉⵡ!” ⵍⴳⴻⵏⵙ ⵢⴰⵔⵔ-ⴷⴷ, ⵉⵏⵏⴰ “ⵉⴷⴰⵎⵎⴻⵏ ⵏⵏⴻⵙ ⴰⴷ ⵅⴰⵏⴻⵖ ⵉⵍⵉⵏ ⵓ ⵅ ⵜⴰⵔⵡⴰ ⵏⵏⴻⵖ.” ⵅⴻⵏⵏⵉ ⵢⴰⵔⵅⵓ ⴰⵙⴻⵏ-ⴷⴷ ⵉ ⴱⴰⵔⴰⴱⴱⴰⵙ, ⵎⴰⵛⴰ ⴰⵡⴰⵔⵏⵉ ⵍⴰⵎⵉ ⵉⵀⴻⵜⵜⴻⴽ ⵢⴻⵛⵛⵓ ⵙ ⵓⵔⴻⴽⴽⵓⴹ, ⵉⵙⴻⵍⵍⴻⵎ ⵉⵜ ⵃⵉⵎⴰ ⴰⴷ ⵉⵜⵡⴰⵚⴻⵍⵍⴻⴱ.

 

ⴰⵙⴻⵃⵇⴰⵔ ⵏ ⵢⴻⵛⵛⵓ ⵣⵉ ⵍⵄⴻⵙⴽⴰⵔ (ⵎⴰⵔ. 15:16-20; ⵢⵓⵃ. 19:2-3)

ⴳⴻⵡⵡⴷⴻⵏ ⵜ ⵉⵄⴻⵙⴽⴰⵔⵉⵢⵢⴻⵏ ⵖⴰⵔ ⴷⴰⵅⴻⵍ ⵏ ⵍⴻⵎⵔⴰⵃ ⵏ ⵜⴰⴷⴷⴰⵔⵜ ⵏ ⵛⵛⵔⴰⵄ ⵓⵛⴰ ⵙⵙⵎⵓⵏⴻⵏ ⵎⴰⵔⵔⴰ ⵍⵄⴻⵙⴽⴰⵔ.  ⵙⵙⵢⴰⵔⴹⴻⵏ ⴰⵙ (ⵉⵊⵊ ⵏ ⵡⴻⵔⵔⵓⴹ) ⴷ ⴰⵣⴻⴳⴳʷⴰⵖ, ⵎⵓⴷⴻⵏ ⴰⵙ ⵉⵛⵜ ⵏ ⵜⴻⵎⵔⵉⵙⵜ ⵙ ⵉⵙⴻⵏⵏⴰⵏⴻⵏ ⵓⵛⴰ ⵇⵇⵏⴻⵏ ⴰⵙ-ⵜⵜ, ⴱⴷⴰⵏ ⵜⵜⵙⴻⵍⵍⴰⵎⴻⵏ ⵅⴰⵙ, ⵇⵇⴰⵔⴻⵏ ⴰⵙ “ⴰⵣⵓⵍ ⵅⴰⴽ, ⴰ ⴰⵊⴻⵍⵍⵉⴷ ⵏ ⵡⵓⴷⴰⵢⴻⵏ!” ⵜⵓⵖⴰ ⵛⵛⴰⵜⴻⵏ ⵜ ⵖⴰⵔ ⵓⵣⴻⵍⵍⵉⴼ ⵙ ⵢⵉⵊⵊ ⵏ ⵡⴻⵄⵎⵓⴷ ⵏ ⵓⵖⴰⵏⵉⵎ, ⵙⵙⵓⵙⵓⴼⴻⵏ ⵅⴰⵙ ⵓⵛⴰ, ⵓⵎⵉ ⴰⴹⴰⵔⴻⵏ ⵅ ⵉⴼⴰⴷⴷⴻⵏ ⵏⵙⴻⵏ, ⵄⴻⴱⴷⴻⵏ ⵜ. ⴰⵡⴰⵔⵏⵉ ⵍⴰⵎⵉ ⵜ ⵙⵙⴻⵃⵇⴰⵔⴰⵏ, ⵙⴻⵍⵅⴻⵏ ⵅⴰⵙ ⴰⵙⴻⵍⵀⴰⵎ ⴰⵣⴻⴳⴳⵯʷⴰⵖ ⵓⵛⴰ ⵙⵙⵢⴰⵔⴹⴻⵏ ⴰⵙ ⴰⵔⵔⵓⴹ ⵏⵏⴻⵙ, ⵅⴻⵏⵏⵉ ⴳⴳⴻⵡⴷⴻⵏ ⵜ ⴱⴰⵔⵔⴰ ⵃⵉⵎⴰ ⴰⴷ ⵜ ⵚⴻⵍⵍⴱⴻⵏ.

 

ƴⴰⵔ ⵚⵚⴰⵍⵉⴱ  (ⵎⴰⵔ. 15:21-32; ⵍⵓⴽ. 23:26-39; ⵢⵓⵃ. 19:17-19)

ⴰⵎ ⴼⴼⵖⴻⵏ ⵖⴰⵔ ⴱⴰⵔⵔⴰ ⵏ ⵜⴻⵏⴷⵉⵏⵜ, ⵓⴼⵉⵏ ⵉⵊⵊⴻⵏ ⵣⵉ ⵇⴰⵢⵔⴰⵡⴰⵏ ⵇⵇⴰⵔⴻⵏ ⴰⵙ ⵙⵉⵎⵄⴰⵏ ⵓⵛⴰ ⵣⵉⵢⵢⴰⵔⴻⵏ ⵅⴰⵙ ⵃⵉⵎⴰ ⴰⴷ ⵢⴰⵔⴱⵓ ⵚⵚⴰⵍⵉⴱ ⵏⵏⴻⵙ. ⴰⵍⴰⵎⵉ ⵉⵡⴹⴻⵏ ⵖⴰⵔ ⵢⵉⵊⵊ ⵏ ⵡⴻⵎⵛⴰⵏ ⵇⵇⴰⵔⴻⵏ ⴰⵙ ⵊⵓⵍⵊⵓⵜⴰ, ⵎⵉⵏ ⵉⵅⵙ ⴰⴷ ⵢⵉⵏⵉ ‘ⴰⵎⵛⴰⵏ ⵏ ⵜⵛⴻⵇⵇⵓⴼⵜ ⵏ ⵓⵣⴻⵍⵍⵉⴼ’, ⵡⵛⵉⵏ ⴰⵙ ⴱⵉⵏⵓ ⵢⴰⵔⵣⴻⴳⵉⵅⴻⵍⵍⴹⴻⵏ ⵙ ‘ⵅⵓⵍⵍ’ (=ⴰⵃⵔⵉⵔ ⴰⵎⴰⵔⵣⴰⴳ ⴰⵟⵟⴰⵙ). ⴰⵍⴰⵎⵉ ⵜ ⵉⵇⵇⴰⵙ, ⵢⵓⴳⵉ ⴰⴷ ⵉⵙⵓ. ⴰⵡⴰⵔⵏⵉ ⵍⴰⵎⵉ ⵜ ⵚⴻⵍⵍⴱⴻⵏ, ⴱⴹⴰⵏ ⴰⵔⵔⵓⴹ ⵏⵏⴻⵙ ⵊⴰⵔⴰⵙⴻⵏ ⵓⵛⴰ ⴳⴳⵉⵏ ⵅⴰⵙ ⴰⴽⴻⵛⵛⵓⴹ ⵃⵉⵎⴰ ⴰⴷ ⵉⵜⵡⴰⴽⴻⵎⵎⴻⵍ ⵎⵉⵏ ⵉⵏⵏⴰ ⵓⵏⴰⴱⵉ “ⴼⴰⵔⵇⴻⵏ ⴰⵔⵔⵓⴹ ⵉⵏⵓ ⵊⴰⵔⴰⵙⴻⵏ ⵓⵛⴰ ⴳⴳⵉⵏ ⴰⴽⴻⵛⵛⵓⴹ ⵅ ⵡⴰⵔⵔⵓⴹ ⵉⵏⵓ.” ⵓⵛⴰ, ⴰⵎ ⵇⵇⵉⵎⴻⵏ ⵏⵉⵜⵏⵉ, ⵄⴻⵙⵙⴻⵏ ⵅⴰⵙ. ⴳⴳⵉⵏ ⴰⵙ ⵙⴻⵏⵏⴻⵊ ⵉ ⵓⵣⴻⵍⵍⵉⴼ ⵏⵏⴻⵙ ⵉⵛⵜ ⵏ ⵜⵉⵔⴰ, ⵓⵔⵉⵏ ⵅⴰⵙ ⵜⵜⵓⵀⵎⴻⵜ ⵏⵏⴻⵙ “ⵡⴰ ⴷ ⵢⴻⵛⵛⵓ, ⴰⵊⴻⵍⵍⵉⴷ ⵏ ⵡⵓⴷⴰⵢⴻⵏ.” ⵅⴻⵏⵏⵉ ⵚⴻⵍⵍⴱⴻⵏ ⴰⴽⵉⵙ ⵜⵏⴰⵢⴻⵏ ⵏ ⵉⵅⴻⵡⵡⴰⵏⴻⵏ, ⵉⵊⵊⴻⵏ ⵖⴰⵔ ⵓⴼⵓⵙⵉ ⵏⵏⴻⵙ ⵓ ⵉⵊⵊⴻⵏ ⵖⴰⵔ ⵓⵣⴻⵍⵎⴰⴹ ⵏⵏⴻⵙ. ⵓ ⵉⵏⵏⵉ ⵜⵓⵖⴰ ⵉⵜⵜⴻⴽⴽⴰⵏ, ⵜⵜⵛⴻⵇⵇⴰⴼⴻⵏ ⴷⴰⵢⴻⵙ, ⵜⵜⵀⴻⵣⵣⴰⵏ ⴰⵣⴻⵍⵍⵉⴼ ⵏⵙⴻⵏ, ⵇⵇⴰⵔⴻⵏ “ⴰ ⵛⴻⴽ ⵡⴻⵏⵏⵉ ⵉⵀⴻⴷⵎⴻⵏ ⵜⴰⴷⴷⴰⵔⵜ ⵉⵇⴻⴷⴷⵙⴻⵏ ⵓ ⴷⵉ ⵜⵍⴰⵜⴰ ⵏ ⵡⵓⵙⵙⴰⵏ ⴰⴷ ⵜⵜ ⵜⴻⴱⵏⵉⴷ ⵄⴰⵡⴻⴷ, ⵙⴻⵏⵊⴻⵎ ⵉⵅⴻⴼ ⵏⵏⴻⴽ ⵎⴰⵍⴰ ⵛⴻⴽ ⴷ ⵎⵎⵉⵙ ⵏ ⴰⵔⴻⴱⴱⵉ, ⵀⵡⴰ-ⴷⴷ ⵅⴻⵏⵏⵉ ⵣⵉ ⵚⵚⴰⵍⵉⴱ.” ⵓⵍⴰ ⴷ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴰⴽ-ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⵎⵖⴰⵔⴻⵏ ⵏ ⵍⴳⴻⵏⵙ ⵙⵜⴻⵀⴻⵣⵣⴰⵏ ⵣⵣⴰⵢⴻⵙ ⴰⵎⴻⵏⵏⵉ, ⵏⵏⴰⵏ “ⵉⵙⵙⴻⵏⵊⴻⵎ ⵉⵏⵏⴻⴹⵏⵉ ⵎⴰⵛⴰ ⵡⴰⵔ ⵉⵣⴻⵎⵎⴰⵔ ⴰⴷ ⵉⵙⵙⴻⵏⵊⴻⵎ ⵉⵅⴻⴼ ⵏⵏⴻⵙ. ⵎⴰⵍⴰ ⵏⴻⵜⵜⴰ ⴷ ⴰⵊⴻⵍⵍⵉⴷ ⵏ ⵉⵙⵔⴰⵢⵉⵍ, ⴻⵊⵊ ⵉⵜ ⴰⴷ ⴷⴷ-ⵉⵀⵡⴰ ⵣⵉ ⵚⵚⴰⵍⵉⴱ, ⵏⴻⵛⵛⵉⵏ ⴰⴷ ⵣⵣⴰⵢⴻⵙ ⵏⴰⵎⴻⵏ. ⵉⵜⵜⵛⴻⵍ ⵅ ⴰⵔⴻⴱⴱⵉ, ⴻⵊⵊ ⵉⵜ ⵏⴻⵜⵜⴰ ⴰⴷ ⵜ ⵉⵙⵙⴻⵏⵊⴻⵎ ⵎⴰⵍⴰ ⵢⴰⵔⴹⴰ ⵅⴰⵙ ⴰⵔⴻⴱⴱⵉ, ⵎⵉⵏⵣⵉ ⵉⵏⵏⴰ ‘ⵏⴻⵛⵛ ⴷ ⵎⵎⵉⵙ ⵏ ⴰⵔⴻⴱⴱⵉ’.” ⵓⵍⴰ ⴷ ⵉⵅⴻⵡⵡⴰⵏⴻⵏ, ⵉⵏⵏⵉ ⵜⵓⵖⴰ ⵉⵜⵡⴰⵚⴻⵍⵍⴱⴻⵏ ⴰⴽⵉⵙ, ⵜⵓⵖⴰ ⵙⵙⴼⴻⴹⴰⵀⴻⵏ ⵣⵣⴰⵢⴻⵙ ⴰⵎⴻⵏⵏⵉ.

 

ⵍⵎⴻⵡⵜ ⵏ ⵢⴻⵛⵛⵓ (ⵎⴰⵔ. 15:33-41; ⵍⵓⴽ. 23:44-49; ⵢⵓⵃ. 19:28-30)

ⵣⵉ ⵜⵙⴰⵄⵄⴻⵜ ⵡⵉⵙⵙ ⵙⴻⵜⵜⴰ ⵜⴻⵡⴹⴰ-ⴷⴷ ⵜⴰⵍⵍⴻⵙⵜ ⵅ ⵎⴰⵔⵔⴰ ⵜⴰⵎⵎⵓⵔⵜ ⴰⵍ ⵜⴰⵙⴰⵄⵄⴻⵜ ⵡⵉⵙⵙ ⵜⴻⵙⵄⴰ. ⵊⵡⴰⵢⴻⵀ ⵏ ⵜⵙⴰⵄⵄⴻⵜ ⵡⵉⵙⵙ ⵜⴻⵙⵄⴰ ⵉⵙⵖⵓⵢⵢ ⵢⴻⵛⵛⵓ ⵙ ⵜⵎⵉⵊⵊⴰ ⵉⵊⴻⵀⴷⴻⵏ, ⵉⵏⵏⴰ ⵙ ⵢⵉⵍⴻⵙ ⵏ ⵜⴰⵔⴰⵎⵉⵜ “ⵉⵍⵉ, ⵉⵍⵉ, ⵍⵉⵎⴰ ⵛⴰⴱⴰⵇⵜⴰⵏⵉ?” ⵎⵉⵏ ⵉⵅⵙ ⴰⴷ ⵢⵉⵏⵉ“ⴰ ⴰⵔⴻⴱⴱⵉ, ⴰ ⴰⵔⴻⴱⴱⵉ, ⵎⴰⵢⴻⵎⵎⵉ ⴷ ⴰⵢⵉ ⵜⵙⴻⵎⵃⴻⴷ?” ⵙⵍⵉⵏ ⴰⵙ ⵢⴻⵏⵏⵉ ⴷⵉⵏ ⵉⴱⴻⴷⴷⴻⵏ, ⵏⵏⴰⵏ “ⵉⵜⵜⵍⴰⵖⴰ ⵅ ⵉⵍⵉⵢⴰ.” ⴷⴻⵖⵢⴰ ⵢⵓⵣⵣⴻⵍ-ⴷⴷ ⵖⴰⵔⴻⵙ ⵉⵊⵊⴻⵏ ⵣⵣⴰⵢⵙⴻⵏ, ⵉⴽⵙⵉ ⵙⴱⵓⵏⵅⴰ, ⵉⵙⵙⵓⴼⴼ ⵉⵜⵜ ⵙ ⵍⵅⴻⵍⵍ (=ⴱⵉⵏⵓ ⴰⵙⴻⵎⵎⴰⵎ), ⵉⴳⴳⴰ ⵉⵜⵜ ⵅ ⵢⵉⵊⵊ ⵏ ⵓⵖⴰⵏⵉⵎ ⵓⵛⴰ ⵉⵡⵛ ⴰⵙ ⴰⴷ ⵉⵙⵓ. ⵉⵏⵏⴻⴹⵏⵉ ⵏⵏⴰⵏ “ⵊⵊⴻⵎ ⴰⴷ ⵏⵥⴰⵔ, ⵎⴰ ⴰⴷ ⴷⴷ-ⵢⴰⵙ ⵉⵍⵉⵢⴰ ⵃⵉⵎⴰ ⴰⴷ ⵜ ⵉⵙⵙⴻⵏⵊⴻⵎ.” ⴰⵡⴰⵔⵏⵉ ⵍⴰⵎⵉ ⵉⵙⵖⵓⵢⵢ ⵄⴰⵡⴻⴷ ⵙ ⵜⵎⵉⵊⵊⴰ ⵉⵊⴻⵀⴷⴻⵏ, ⵉⵙⵙⴰⵔⵅⵓ ⵢⴻⵛⵛⵓ ⴰⵔⵔⵓⵃ. ⵅⵥⴰⵔ, ⴰⵔⵡⴰⵇ ⵏ ⵜⴰⴷⴷⴰⵔⵜ ⵉⵇⴻⴷⴷⵙⴻⵏ ⵉⵛⴰⵔⵔⴻⴳ ⵅ ⵜⵏⴰⵢⴻⵏ ⵣⵉ ⵙⴻⵏⵏⴻⵊ ⴰⵍ ⵙⵡⴰⴷⴷⴰⵢ, ⵜⴰⵎⵎⵓⵔⵜ ⵜⴻⵏⵀⴻⵣⵣ, ⵜⵉⵚⵓⴹⴰⵔ ⴼⴻⵍⵍⵇⴻⵏⵜ, ⵉⵎⴻⴹⵍⴰⵏ ⵜⵡⴰⵔⴻⵣⵎⴻⵏ ⵓⵛⴰ ⴰⵟⵟⴰⵙ ⵏ ⵍⵅⴻⵛⴱⴰⵜ ⵏ ⵉⵎⵇⴻⴷⴷⴰⵙⴻⵏ ⵉⵏⵏⵉ ⵜⵓⵖⴰ ⵉⵟⵟⵚⴻⵏ, ⵜⵡⴰⵙⵙⵏⴻⴽⴽⴰⵔⴻⵏⵜ-ⴷⴷ. ⴼⴼⵖⴻⵏ ⵏⵉⵜⵏⵉ ⵣⴻⴳ ⵉⵎⴻⴹⵍⴰⵏ ⴰⵡⴰⵔⵏⵉ ⵜⵏⵓⴽⵔⴰ ⵏⵏⴻⵙ, ⵓⴷⴼⴻⵏ ⵖⴰⵔ ⵜⴻⵏⴷⵉⵏⵜ ⵉⵇⴻⴷⴷⵙⴻⵏ ⵓ ⴱⴰⵏⴻⵏ-ⴷⴷ ⵉ ⵡⴰⵟⵟⴰⵙ. ⵍⴰⵎⵉ ⵍⵇⴻⴱⵟⴰⵏ ⵅ ⵎⵢⴰ ⴷ ⵢⴻⵏⵏⵉ ⵜⵓⵖⴰ ⴰⴽⵉⴷⴻⵙ ⵉⵃⴻⵟⵟⴰⵏ ⵢⴻⵛⵛⵓ, ⵥⵔⵉⵏ ⴰⵏⵀⴻⵣⵣⵉ ⵏ ⵜⴻⵎⵎⵓⵔⵜ ⴷ ⵎⵉⵏ ⵉⵎⵙⴰⵔⴻⵏ, ⴳⴳʷⴻⴷⴻⵏ ⵏⵉⵜⵏⵉ ⴰⵟⵟⴰⵙ, ⵏⵏⴰⵏ “ⵙ ⵜⵉⴷⴻⵜⵜ, ⵡⴰ ⴷ ⵎⵎⵉⵙ ⵏ ⴰⵔⴻⴱⴱⵉ.”

ⵜⵓⵖⴰ ⴷⵉⵏ ⴰⵟⵟⴰⵙ ⵏ ⵜⴻⵎⵖⴰⵔⵉⵏ ⵜⵉⵏⵏⵉ ⵜⵓⵖⴰ ⵉⵅⴻⵥⵥⴰⵔⴻⵏ ⵣⵉ ⵍⴰⴳⴳʷⴰⵊ, ⵏⵉⵜⴻⵏⵜⵉ ⴹⴼⴰⵔⴻⵏⵜ ⵢⴻⵛⵛⵓ ⵣⵉ ⵍⵊⴰⵍⵉⵍ ⵃⵉⵎⴰ ⴰⴷ ⵣⵣⴰⵢⴻⵙ ⵅⴻⴷⵎⴻⵏⵜ. ⵊⴰⵔⴰⵙⴻⵏⵜ ⵎⴰⵔⵢⴰⵎ ⵏ ⵎⴰⵊⴷⴰⵍⴰ ⴷ ⵎⴰⵔⵢⴰⵎ, ⵢⴻⵎⵎⴰⵙ ⵏ ⵢⴰⵄⵇⵓⴱ ⴷ ⵢⵓⵙⵉⵙ, ⵓⵍⴰ ⴷ ⴰⵢⵜ ⵏ ⵣⴰⴱⴰⴷⵉ.

 

ⴰⵏⴹⴻⵍ ⵏ ⵢⴻⵛⵛⵓ (ⵎⴰⵔ. 15:42-47; ⵍⵓⴽ. 23:50-56; ⵢⵓⵃ. 19:38-42)

ⵍⴰⵎⵉ ⴷⴷ-ⵜⵉⵡⴻⴹ ⵜⵎⴻⴷⴷⵉⵜ, ⵢⵓⵙⴰ-ⴷⴷ ⵖⴰⵔⵙ ⵢⵉⵊⵊ ⵏ ⵡⴻⵔⵢⴰⵣ ⵣⵉ ⴰⵔⵉⵎⴰⵜⵉⵢⴰ, ⵇⵇⴰⵔⴻⵏ ⴰⵙ ⵢⵓⵙⵓⴼ, ⵡⴻⵏⵏⵉ ⵜⵓⵖⴰ ⵉⴷⴻⵡⵍⴻⵏ ⵄⴰⵡⴻⴷ ⴷ ⴰⵎⴻⵃⴹⴰⵔ ⵏ ⵢⴻⵛⵛⵓ. ⵉⵔⵓⵃ ⵖⴰⵔ ⴱⵉⵍⴰⵟⵓⵙ, ⵉⵜⵜⴰⵔ ⴰⵙ ⴰⵔⵔⵉⵎⴻⵜ ⵏ ⵢⴻⵛⵛⵓ. ⵍⴻⵅⴷⴻⵏⵏⵉ ⵉⵡⴻⵚⵚⴰ ⴱⵉⵍⴰⵟⵓⵙ ⵎⴰⵃⴻⵏⴷ ⴰⴷ ⴰⵙ ⵜⴻⵎⵎⴻⵡⵛ. ⵢⵓⵙⵓⴼ ⵉⴽⵙⵉ ⴰⵔⵔⵉⵎⴻⵜ, ⵉⵏⵏⴻⴹ ⵉⵜⵜ ⴷⵉ ⵍⴻⵛⴼⴻⵏ ⵏ ⵇⴰⵟⵉⴼⴰ ⵉⵚⴼⴰⵏ, ⵉⵙⵙⴰⵔⵙ ⵉⵜⵜ ⴷⴻⴳ ⵉⵊⵊ ⵏ ⵡⴻⵏⴹⴻⵍ ⴷ ⵊⴷⵉⴷ ⵉ ⵜⵓⵖⴰ ⵉⵖⵣⴰ ⵓⵛⴰ ⴰⵡⴰⵔⵏⵉ ⵍⴰⵎⵉ ⵉⵙⵙⴻⵇⵏⵓⵏⵏⵉ ⵉⵛⵜ ⵏ ⵜⴻⵚⴹⴰⵔⵜ ⵃⵉⵎⴰ ⴰⴷ ⵉⵇⴼⴻⵍ ⵜⴰⵡⵡⴰⵔⵜ ⵏ ⵡⴻⵏⴹⴻⵍ, ⵉⵔⵓⵃ. ⵜⵓⵖⴰ ⴷⵉⵏ ⵎⴰⵔⵢⴰⵎ ⵏ ⵎⴰⵊⴷⴰⵍⴰ ⴷ ⵎⴰⵔⵢⴰⵎ ⵏⵏⴻⴹⵏⵉⵜ ⵇⵇⵉⵎⴻⵏⵜ ⵇⵉⴱⴰč ⵉ ⵡⴻⵏⴹⴻⵍ.

 

ⵉⵎⵅⴰⵣⵏⵉⵢⵢⴻⵏ ⵉⵜⵜⵄⴻⵙⵙⴰⵏ ⵅ ⵡⴻⵏⴹⴻⵍ ⵏ ⵢⴻⵛⵛⵓ

ⵜⵉⵡⴻⵛⵛⴰ ⵏⵏⴻⵙ ⴰⵡⴰⵔⵏⵉ ⴰⵙⵙ ⵏ ⵓⵙⴻⵡⵊⴻⴷ, ⵎⵓⵏⴻⵏ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⴷ ⵉⴼⴰⵔⵉⵙⵉⵢⵢⴻⵏ ⵖⴰⵔ ⴱⵉⵍⴰⵟⵓⵙ, ⵏⵏⴰⵏ “ⴰ ⵙⵉⴷⵉ, ⵏⴻⵄⵇⴻⵍ ⴱⴻⵍⵍⵉ ⴰⵖⴻⵛⵛⴰⵛ-ⴰ, ⴰⵎ ⵜⵓⵖⴰ ⵄⴰⴷ ⵉⴷⴷⴰⵔ, ⵉⵏⵏⴰ ‘ⴰⵡⴰⵔⵏⵉ ⵜⵍⴰⵜⴰ ⵏ ⵡⵓⵙⵙⴰⵏ ⴰⴷ ⴽⴽⴰⵔⴻⵖ.’ ⵅⴻⵏⵏⵉ ⵓⵎⵓⵔ ⵃⵉⵎⴰ ⴰⴷ ⴹⴻⵎⵏⴻⵏ ⴰⵏⴹⴻⵍ ⴰⵍ ⴰⵙⵙ ⵡⵉⵙⵙ ⵜⵍⴰⵜⴰ ⵃⵉⵎⴰ ⴰⴷ ⵜⴰⵖ ⵉⵎⴻⵃⴹⴰⵔⴻⵏ ⵏⵏⴻⵙ ⵡⴰⵔ ⴷⴷ-ⵜⵜⵉⵙⴻⵏ ⵙ ⵍⵍⵉⵍⴻⵜ ⴰⴷ ⵜ ⴰⵛⴰⵔⴻⵏ, ⵅⴻⵏⵏⵉ ⴰⴷ ⵅⴻⴱⴱⴰⵔⴻⵏ ⵍⴳⴻⵏⵙ, ⴰⵇⴰ ⵉⴽⴽⴰⵔ-ⴷⴷ ⵣⴻⴳ ⵉⵎⴻⵜⵜⵉⵏⴻⵏ. ⴰⵎⵎⵓ ⵉ ⵖⴰ ⵢⵉⵍⵉ ⵓⵅⴻⵟⵟⵓ ⴰⵏⴻⴳⴳⴰⵔⵓ ⴽⵜⴰⵔ ⵅ ⵓⵎⴻⵣⵡⴰⵔ. ⵉⵏⵏⴰ ⴰⵙⴻⵏ ⴱⵉⵍⴰⵟⵓⵙ “ⴰⵇⴰ ⵖⴰⵔⵡⴻⵎ ⵜⴰⵔⴱⵉⵄⵜ ⵏ ⵉⵄⴻⵙⵙⴰⵙⴻⵏ, ⵔⵓⵃⴻⵎ, ⴹⴻⵎⵏⴻⵏ ⵜ ⴰⵎ ⵜⴻⵙⵙⵏⴻⵎ.” ⵔⵓⵃⴻⵏ ⵏⵉⵜⵏⵉ ⵓⵛⴰ ⴹⴻⵎⵏⴻⵏ ⴰⵏⴹⴻⵍ ⵙ ⵉⵛⵜ ⵏ ⵜⴻⵔⴱⵉⵄⵜ ⵏ ⵉⵄⴻⵙⵙⴰⵙⴻⵏ ⴰⵡⴰⵔⵏⵉ ⵍⴰⵎⵉ ⴱⴻⵍⵍⵄⴻⵏ ⴰⵏⴹⴻⵍ ⵙ ⵢⵉⵊⵊ ⵏ ⵜⴰⵚⴹⴰⵔⵜ.

 

ⵜⴰⵏⵓⴽⵔⴰ ⵏ ⵢⴻⵛⵛⵓ (ⵎⴰⵔ. 16:1-8; ⵍⵓⴽ. 24:1-12; ⵢⵓⵃ. 20:1-10)

ⵍⴰⵎⵉ ⵜⴻⵄⴷⵓ ⵙⵙⴻⴱⵜ, ⵖⴰⵔ ⵍⴻⴼⵊⴰⵔ ⵏ ⵡⴰⵙⵙ ⴰⵎⴻⵣⵡⴰⵔⵓ ⵏ ⵙⵙⵉⵎⴰⵏⴰ, ⵜⵓⵙⴰ-ⴷⴷ ⵎⴰⵔⵢⴻⵎ ⵏ ⵎⴰⵊⴷⴰⵍⴰ ⴷ ⵎⴰⵔⵢⴻⵎ ⵏⵏⴻⴹⵏⵉⵜ ⵃⵉⵎⴰ ⴰⴷ ⵙⵙⵉⵊⵊⴻⵏⵜ ⵅ ⵡⴻⵏⴹⴻⵍ. ⵅⵥⴰⵔ, ⵉⵎⵙⴰⵔ ⵢⵉⵊⵊ ⵏ ⵡⴻⵏⵀⴻⵣⵣⵉ ⵏ ⵜⴻⵎⵎⵓⵔⵜ ⵉⵎⵖⴰⵔ ⵎⵉⵏⵣⵉ ⵉⵊⵊ ⵏ ⵍⵎⴰⵍⴰⴽ ⵏ ⴰⵔⴻⴱⴱⵉ ⵉⵀⵡⴰ-ⴷⴷ ⵣⴻⴳ ⵓⵊⴻⵏⵏⴰ, ⵉⵇⴰⵔⵔⴻⴱ-ⴷⴷ ⵓⵛⴰ ⵉⵙⵙⴻⵇⵏⵓⵏⵏⵉ ⵜⴰⵚⴹⴰⵔⵜ ⵣⵉ ⵜⴻⵡⵡⴰⵔⵜ ⵓⵛⴰ ⵉⵇⵇⵉⵎ ⵅⴰⵙ. ⵜⵓⵖⴰ ⵚⵚⵉⴼⴻⵜ ⵏⵏⴻⵙ ⴰⵎ ⵡⴰⵊⵊⴰⵊ ⵓ ⴰⵔⵔⵓⴹ ⵏⵏⴻⵙ ⴰⵎ ⵡⴻⴷⴼⴻⵍ. ⵉⵄⴻⵙⵙⴰⵙⴻⵏ ⴳⴳʷⴻⴷⴻⵏ ⵣⵣⴰⵢⴻⵙ, ⴷⴻⵡⵍⴻⵏ ⴰⵎ ⵉⵎⴻⵜⵜⵉⵏⴻⵏ. ⵎⴰⵛⴰ ⵍⵎⴰⵍⴰⴽ ⵢⴰⵔⵔ-ⴷⴷ, ⵉⵏⵏⴰ ⵉ ⵜⴻⵎⵖⴰⵔⵉⵏ “ⵡⴰⵔ ⵜⵜⴻⴳⴳʷⴻⴷⴻⵏⵜ ⵛⴰ, ⵎⵉⵏⵣⵉ ⵙⵙⵏⴻⵖ ⴰⵇⴰ ⴽⴻⵏⵏⵉⵏⵜ ⵜⵜⴰⵔⴻⵣⵣⵓⵏⵜ ⵅ ⵢⴻⵛⵛⵓ ⵡⴻⵏⵏⵉ ⵜⵓⵖⴰ ⵉⵜⵡⴰⵚⴻⵍⵍⴱⴻⵏ. ⵡⴰⵔ ⴷⴰ ⵉⵍⵍⵉ, ⵎⵉⵏⵣⵉ ⵏⴻⵜⵜⴰ ⵉⴽⴽⴰⵔ-ⴷⴷ ⴰⵎ ⵎⴰⵎⵎⴻⵛ ⵉⵏⵏⴰ. ⴰⵙⴻⵏⵜ-ⵉⴷⴷ ⴷⴰ, ⵅⵥⴰⵔⴻⵏⵜ ⴰⵎⵛⴰⵏ ⵎⴰⵏⵉ ⵜⵓⵖⴰ ⵉⵎⵎⴰⵔⵙ ⵙⵉⴷⵉ. ⵔⵓⵃⴻⵏⵜ ⴷⴻⵖⵢⴰ, ⵉⵏⵉⵏⵜ ⵉ ⵉⵎⴻⵃⴹⴰⵔⴻⵏ ⵏⵏⴻⵙ, ⴰⵇⴰ ⵉⵜⵡⴰⵙⵙⵏⴻⴽⴽⴰⵔ-ⴷⴷ ⵣⴻⴳ ⵉⵎⴻⵜⵜⵉⵏⴻⵏ, ⵓⵛⴰ ⵅⵥⴰⵔ, ⵏⴻⵜⵜⴰ ⴷ ⴰⵡⴻⵎ ⵉ ⵖⴰ ⵉⵣⵡⴰⵔⴻⵏ ⵖⴰⵔ ⵍⵊⴰⵍⵉⵍ. ⴷⵉⵏ ⴰⴷ ⵜ ⵜⵥⴰⵔⴻⵎ. ⵅⵥⴰⵔ, ⴰⵇⴰ ⵏⵏⵉⵖ ⴰⵡⴻⵎ ⵜ.” ⴼⴼⵖⴻⵏⵜ ⵏⵉⵜⴻⵏⵜⵉ ⴷⴻⵖⵢⴰ ⵣⴻⴳ ⵡⴻⵏⴹⴻⵍ ⵙ ⵜⵉⴳⴳʷⵓⴷⵉ ⴷ ⵍⴻⴼⵔⴰⵃⴻⵜ ⵉⵎⵖⴰⵔⴻⵏ, ⵜⵜⴰⵣⵣⵍⴻⵏⵜ ⵃⵉⵎⴰ ⴰⴷ ⵜⵜ ⵅⴻⴱⴱⴰⵔⴻⵏⵜ ⵉⵎⴻⵃⴹⴰⵔⴻⵏ. ⵓⵛⴰ ⴰⵎ ⵔⵓⵃⴻⵏⵜ ⵃⵉⵎⴰ ⴰⴷ ⵜ ⵅⴻⴱⴱⴰⵔⴻⵏⵜ ⵉⵎⴻⵃⴹⴰⵔⴻⵏ, ⵅⵥⴰⵔ, ⵢⴻⵛⵛⵓ ⵉⵍⵇⴰ ⵜⴻⵏⵜ, ⵉⵇⵇⴰⵔ “ⵙⵍⴰⵎ ⵅⴰⴽⴻⵏⵜ!” ⵏⵉⵜⴻⵏⵜⵉ ⵓⵙⵉⵏⵜ-ⵉⴷⴷ ⵖⴰⵔⴻⵙ, ⵟⵟⴼⴻⵏⵜ ⴷⴻⴳ ⵉⴹⴰⵔⴻⵏ ⵏⵏⴻⵙ ⵓⵛⴰ ⵙⴻⵊⴷⴻⵏⵜ ⴰⵙ. ⵍⴻⵅⴷⴻⵏⵏⵉ ⵉⵏⵏⴰ ⴰⵙⴻⵏⵜ ⵢⴻⵛⵛⵓ “ⵡⴰⵔ ⵜⵜⴻⴳⴳʷⴻⴷⴻⵏⵜ ⵛⴰ, ⵙⵙⵉⵡⴹⴻⵏⵜ ⵍⴻⵅⴱⴰⵔ-ⴰ ⵉ ⴰⵢⵜⵎⴰ, ⵃⵉⵎⴰ ⴰⴷ ⵔⴰⵃⴻⵏ ⵖⴰⵔ ⵍⵊⴰⵍⵉⵍ, ⴷⵉⵀⴰ ⴰⴷ ⴰⵢⵉ ⵥⴰⵔⴻⵏ.”

 

ⵛⵀⴰⴷⴻⵜ ⵏ ⵥⵥⵓⵔ ⵏ ⵉⵎⵅⴰⵣⵏⵉⵢⵢⴻⵏ ⴷ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ

ⴰⵎ ⵔⵓⵃⴻⵏⵜ, ⵅⵥⴰⵔ, ⴰⵇⴰ ⵛⴰ ⵣⴻⴳ ⵉⵄⴻⵙⵙⴰⵙⴻⵏ ⵓⵙⵉⵏ-ⴷⴷ ⵖⴰⵔ ⵜⴻⵏⴷⵉⵏⵜ ⵃⵉⵎⴰ ⴰⴷ ⵅⴻⴱⴱⴰⵔⴻⵏ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⵅ ⵎⴰⵔⵔⴰ ⵎⵉⵏ ⵉⵎⵙⴰⵔⴻⵏ. ⵓⵛⴰ ⵍⴰⵎⵉ ⵎⵓⵏⴻⵏ ⴰⴽ-ⴷ ⵉⵎⵖⴰⵔⴻⵏ ⵏ ⵍⴳⴻⵏⵙ ⵓⵛⴰ ⵎⵛⴰⵡⴰⵔⴻⵏ ⴰⴽⵉⴷⵙⴻⵏ, ⵡⵛⵉⵏ ⴰⵙⴻⵏ ⵉ ⵉⵄⴻⵙⴽⴰⵔⵉⵢⵢⴻⵏ ⴰⵟⵟⴰⵙ ⵏ ⵜⴻⵏⵄⴰⵛⵉⵏ, ⵏⵏⴰⵏ “ⵉⵏⵉⵎ ‘ⵉⵎⴻⵃⴹⴰⵔⴻⵏ ⵏⵏⴻⵙ ⵓⵙⵉⵏ-ⴷⴷ ⵙ ⵍⵍⵉⵍⴻⵜ ⵓⵛⴰ ⵓⵛⴰⵔⴻⵏ ⵜ ⴰⵎ ⵜⵓⵖⴰ ⵏⴻⵟⵟⴻⵚ’, ⵓ ⵎⴰⵍⴰ ⵍⵄⴻⵎⵉⵍ ⴰⴷ ⵜ ⵉⵙⴻⵍ, ⵏⴻⵛⵛⵉⵏ ⴰⴷ ⵜ ⵏⴻⵙⵙⴻⵇⵏⴻⵄ ⵓⵛⴰ ⵡⴰⵔ ⴽⴻⵏⵏⵉⵡ ⵏⴻⵜⵜⴻⵊⵊⵉ ⵛⴰ ⴰⴷ ⵜⵉⵍⵉⵎ ⴷⴻⴳ ⵉⵎⵓⵏⴰⵙ.” ⵟⵟⴼⴻⵏ ⵜⵎⴻⵏⵢⴰⵜ ⵓⵛⴰ ⴳⴳⵉⵏ ⴰⵎ ⵎⴰⵎⵎⴻⵛ ⴷ ⴰⵙⴻⵏ ⵄⴻⵍⵎⴻⵏ. ⵍⴻⵅⴱⴰⵔ-ⴰ ⴰⵇⴰ ⵉⴼⴼⴻⵖ ⵖⴰⵔ ⵡⵓⴷⴰⵢⴻⵏ ⴰⵍ ⴰⵙⵙ ⵏ ⵢⵉⴹⴰ.

 

ⵍⴻⵅⴱⴰⵔ ⴰⵚⴻⴱⵃⴰⵏ ⵉ ⵎⴰⵔⵔⴰ ⴷⴷⵓⵏⵏⵉⵜ (ⵎⴰⵔ. 16:14-18; ⵍⵓⴽ. 24:36-49; ⵢⵓⵃ. 20:19-23; ⵍⴻⵅ. 1:6-8)

ⵃⵉⴷⵄⴰⵛ ⵏ ⵉⵎⴻⵃⴹⴰⵔⴻⵏ ⵏⵏⵉ ⵔⵓⵃⴻⵏ ⵖⴰⵔ ⵍⵊⴰⵍⵉⵍ, ⵖⴰⵔ ⵡⴻⴷⵔⴰⵔ ⵎⴰⵏⵉ ⵜⴻⵏ ⵢⵓⵎⵓⵔ ⵙⵉⴷⵉ. ⴰⵍⴰⵎⵉ ⵜ ⵥⵔⵉⵏ, ⵙⴻⵊⴷⴻⵏ ⴰⵙ, ⵎⴰⵛⴰ ⵛⴰ ⵛⴻⴽⴽⴻⵏ. ⵢⴻⵛⵛⵓ ⵉⵇⴰⵔⵔⴻⴱ-ⴷⴷ ⵖⴰⵔⵙⴻⵏ ⵉⵙⵙⵉⵡⴻⵍ ⴰⴽⵉⵙⴻⵏ, ⵉⵏⵏⴰ “ⵜⴻⵎⵎⴻⵡⵛ ⴰⵢⵉ ⵎⴰⵔⵔⴰ ⵚⵚⵓⵍⵟⴰ ⴷⴻⴳ ⵓⵊⴻⵏⵏⴰ ⵓ ⵅ ⵜⴻⵎⵎⵓⵔⵜ. ⵔⵓⵃⴻⵎ, ⴰⵔⵔⴻⵎ ⵎⴰⵔⵔⴰ ⵍⴻⴳⵏⵓⵙ ⴷ ⵉⵎⴻⵃⴹⴰⵔⴻⵏ ⵉⵏⵓ, ⵙⵖⴻⴹⵚⴻⵎ ⵜⴻⵏ ⵙ ⵢⵉⵙⴻⵎ ⵏ ⵜⴱⴰⴱⴰⵜ ⴷ ⵜⵎⴻⵎⵎⵉⵜ ⴷ ⴰⵔⵔⵓⵃ ⵉⵇⴻⴷⴷⵙⴻⵏ ⵓ ⵙⵍⴻⵎⴷⴻⵎ ⵜⴻⵏ ⴰⴷ ⵟⵟⴼⴻⵏ ⴷⵉ ⵎⴰⵔⵔⴰ ⵎⵉⵏ ⵅⴻⴼ ⴽⴻⵏⵏⵉⵡ ⵓⵎⵓⵔⴻⵖ ⵣⵣⴰⵢⴻⵙ, ⵓ ⵅⵥⴰⵔ, ⵏⴻⵛⵛ ⴰⵇⵇⴰ-ⵢⵉ ⴰⴽⵉⴷⵡⴻⵎ ⵎⴰⵔⵔⴰ ⵓⵙⵙⴰⵏ ⴰⵍ ⵇⴻⵟⵟⵓ ⵏ ⴷⴷⵓⵏⵏⵉⵜ.”