ⵎⴰⵏ ⵡⴻⵏ ⵉⵍⵍⴰⵏ ⴷ ⵍⵎⴰⵙⵉⵃ?

    
ⵉⵏⵏⴰ ⵍⵎⴰⵍⴰⴽ ⵉ ⵢⵓⵙⵓⴼ: "ⴰ ⵢⵓⵙⵓⴼ, ⴰ ⵎⵎⵉⵙ ⵏ ⴷⴰⵡⵓⴷ, ⵡⴰⵔ ⵜⵜⴻⴳⴳʷⴻⴷ ⴰⴷ ⵖⴰⵔⴽ ⵜⵉⵍⵉ ⵎⴰⵔⵢⴻⵎ ⴷ ⵜⴰⵎⵖⴰⵔⵜ ⵏⵏⴻⴽ, ⵎⵉⵏⵣⵉ ⵎⵉⵏ ⵉ ⴷ ⴰⵙ-ⴷⴷ ⵉⵜⵡⴰⵔⵡⴻⵏ, ⴰⵇⴰ ⵏⴻⵜⵜⴰ ⵣⵉ ⴰⵔⵔⵓⵃ ⵉⵇⴻⴷⴷⵙⴻⵏ.”  ⵓⵛⴰ ⴰⴷ ⵜⴰⵔⵓⵡ ⴰⵃⴻⵏⵊⵉⵔ, ⴰⴷ ⵜ ⵜⵙⴻⵎⵎⵉⴷ ⵢⴻⵛⵛⵓ, ⵎⵉⵏⵣⵉ ⵏⴻⵜⵜⴰ ⴰⴷ ⵉⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⵙ ⵣⵉ ⴷⴷⵏⵓⴱ ⵏⵙⴻⵏ.” (ⵎⴰⵜⵜⴰ 1:20-21)

ⵢⵓⵃⴰⵏⵏⴰ ⴰⵎⵙⴻⵖⴹⴰⵚ ⵉⵏⵏⴰ ⵅ ⵢⴻⵛⵛⵓ ⵍⵎⴰⵙⵉⵃ: "ⵏⴻⵛⵛ ⴰⴷ ⴽⴻⵏⵏⵉⵡ ⵙⵙⵖⴻⴹⵚⴻⵖ ⴷⴻⴳ ⵡⴰⵎⴰⵏ ⵉ ⵜⵜⵓⴱⴻⵜ. ⵎⴰⵛⴰ ⵡⴻⵏⵏⵉ ⴷⴷ ⵉ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵢⵉ, ⵏⴻⵜⵜⴰ ⵉⵊⵀⴻⴷ ⵅⴰⴼⵉ, ⵏⴻⵛⵛ ⵡⴰⵔ ⵙⵙⴷⵉⵀⴻⵍⵍⴻⵖ ⴰⴷ ⴰⵙ ⴽⵙⵉⵖ ⵙⴰⵏⴷⴰⵍⵉⵢⴰⵜ ⵏⵏⴻⵙ, ⴰⵇⴰ ⵏⴻⵜⵜⴰ ⴰⴷ ⴽⴻⵏⵏⵉⵡ ⵉⵙⵙⴻⵖⴹⴻⵚ ⵙ ⴰⵔⵔⵓⵃ ⵉⵇⴻⴷⴷⵙⴻⵏ ⴷ ⵜⵎⴻⵙⵙⵉ." (ⵎⴰⵜⵜⴰ 3:11)

ⵍⴰⵎⵉ ⵉⵥⵔⴰ ⵏⴰⵜⴰⵏⴰⵢⵉⵍ ⵢⴻⵛⵛⵓ ⵍⵎⴰⵙⵉⵃ ⵜⵡⴰⵍⴰⵜ ⵜⴰⵎⴻⵣⵡⴰⵔⵓⵜ, ⵉⵏⵏⴰ: "“ⴰ ‘ⵔⴰⴱⴱⵉ’ (=ⵙⵉⴷⵉ, ⴰⵎⵙⴻⵍⵎⴰⴷ), ⵛⴻⴽ ⴷ ⵎⵎⵉⵙ ⵏ ⴰⵔⴻⴱⴱⵉ, ⵛⴻⴽ ⴷ ⴰⵊⴻⵍⵍⵉⴷ ⵏ ⵉⵙⵔⴰⵢⵉⵍ.” ⵢⴻⵛⵛⵓ ⵢⴰⵔⵔⴰ-ⴷ, ⵉⵏⵏⴰ ⴰⵙ “ⵎⴰ ⵜⵓⵎⵏⴻⴷ ⵙ ⵎⵉⵏ ⴷ ⴰⵛ ⵏⵏⵉⵖ ‘ⴰⵇⴰ ⵥⵔⵉⵖ ⵛⴻⴽ ⵙⵡⴰⴷⴷⴰⵢ ⵉ ⵡⴰⵔⵜⵓ’? ⴰⴷ ⵜⵥⴰⵔⴻⴷ ⵎⵉⵏ ⵉⵍⵍⴰⵏ ⴽⵜⴰⵔ ⵣⵉ ⵎⴰⵏ ⴰⵢⴰ.”  ⵉⵏⵏⴰ ⴰⵙ “ⵙ ⵜⵉⴷⴻⵜⵜ, ⵙ ⵜⵉⴷⴻⵜⵜ, ⴰⴷ ⴰⵡⴻⵎ ⵉⵏⵉⵖ, ⵣⵉ ⵙⵙⴰ ⴷ ⵜⵙⴰⵡⴻⵏⵜ ⴰⴷ ⵜⵥⴰⵔⴻⵎ ⴰⵊⴻⵏⵏⴰ ⵉⵏⵏⵓⵔⵣⴻⵎ ⵓ ⵍⵎⴰⵍⴰⴽⴰⵜ ⵏ ⴰⵔⴻⴱⴱⵉ ⵜⵜⴰⵍⵢⴻⵏ ⵀⴻⴽⴽⵡⴰⵏ ⵅ ⵎⵎⵉⵙ ⵏ ⴱⵏⴰⴷⴻⵎ.”  (ⵢⵓⵃⴰⵏⵏⴰ 1:49-51)

ⵎⵉⵏ ⵜⴻⵏⵏⴰ ⵢⴻⵎⵎⴰⵙ ⵎⴰⵔⵢⴰⵎ: “ⵎⵉⵏ ⴷ ⴰⵡⴻⵎ ⵉ ⵖⴰ ⵢⵉⵏⵉ, ⴳⴳⴻⵎ ⵜ.” (ⵢⵓⵃⴰⵏⵏⴰ 2:5)

ⵉⵏⵏⴰ ⵢⴻⵛⵛⵓ ⵍⵎⴰⵙⵉⵃ: "ⴰⵎⵎⵓ ⵉⵅⵙ ⴰⵔⴻⴱⴱⵉ ⴷⴷⵓⵏⵏⵉⵜ ⴰⵍ ⵎⴰⵏⵉ ⵉⵡⵛⴰ ⴰⵢⴻⵏⵏⵉ ⵏ ⵎⵎⵉⵙ ⵃⵉⵎⴰ ⴽⵓⵍ ⵉⵊⵊⴻⵏ ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵢⴰⵎⵏⴻⵏ, ⵡⴰⵔ ⵉⵜⵜⵎⴻⵜⵜⵉ ⵛⴰ ⵎⴰⵛⴰ ⴰⴷ ⵖⴰⵔⵙ ⵜⵉⵍⵉ ⵜⵓⴷⴰⵔⵜ ⵏ ⵍⴻⴱⴷⴰ. ⵎⵉⵏⵣⵉ ⴰⵔⴻⴱⴱⵉ ⵡⴰⵔ ⴷⴷ ⵉⵙⵙⴻⴽⴽ ⵛⴰ ⵎⵎⵉⵙ ⵖⴰⵔ ⴷⴷⵓⵏⵉⵜ ⵃⵉⵎⴰ ⴰⴷ ⵉⵃⴰⵙⴻⴱ ⴷⴷⵓⵏⵏⵉⵜ, ⵎⴰⵛⴰ ⵉⵙⵙⴻⴽⴽ ⵉⵜ-ⵉⴷⴷ ⵃⵉⵎⴰ ⴰⴷ ⵣⵣⴰⵢⴻⵙ ⵉⵙⵙⴻⵏⵊⴻⵎ ⴷⴷⵓⵏⵉⵜ. ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵢⴰⵎⵏⴻⵏ ⵡⴰⵔ ⵉⵜⵜⴻⵜⵡⴰⵃⴰⵙⴻⴱ ⵛⴰ, ⵎⴰⵛⴰ ⵡⴻⵏⵏⵉ ⵡⴰⵔ ⵉⵜⵜⵉⵎⵏⴻⵏ ⵛⴰ ⴰⵇⵇⴰ ⵉⵜⵡⴰⵃⴰⵙⴰⴱ ⵣⵉ ⵍⴻⵅⵅⵓ ⵎⵉⵏⵣⵉ ⵏⴻⵜⵜⴰ ⵡⴰⵔ ⵢⵓⵎⵉⵏ ⵛⴰ ⴷⴻⴳ ⵢⵉⵙⴻⵎ ⵏ ⵓⵢⴻⵏⵏⵉ ⵏ ⵎⵎⵉⵙ ⵏ ⴰⵔⴻⴱⴱⵉ." (ⵢⵓⵃⴰⵏⵏⴰ 3:16-18)

ⵍⵎⴰⵙⵉⵃ ⵉⵏⵏⴰ ⵉ ⵡⵓⴷⴰⵢⴻⵏ ⵏⵏⵉ ⵜⵓⵖⴰ ⵉⵅⵙⴻⵏ ⴰⴷ ⵜ ⵏⵖⴻⵏ ⵍⴰⵎⵉ ⵜⵓⵖⴰ ⵉⵜⵜⵍⴰⵖⴰ 'ⴱⴰⴱⴰ' ⵉ ⴰⵔⴻⴱⴱⵉ, ⵉⵙⵙⴻⵎⵇⵓⴷⴷⴰ ⵉⵅⴻⴼ ⵏⵏⴻⵙ ⴰⴽ-ⴷ ⴰⵔⴻⴱⴱⵉ: “ⵙ ⵜⵉⴷⴻⵜⵜ, ⵙ ⵜⵉⴷⴻⵜⵜ, ⴰⴷ ⴰⵡⴻⵎ ⵉⵏⵉⵖ, ⵜⴰⵎⴻⵎⵎⵉⵜ ⵡⴰⵔ ⵉⵣⴻⵎⵎⴰⵔ ⴰⴷ ⵢⴻⴳⴳ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵙ ⵢⵉⵅⴻⴼ ⵏⵏⴻⵙ, ⵎⵖⵉⵔ ⵎⴰⵍⴰ ⵉⵥⵔⴰ ⵜⴰⴱⴰⴱⴰⵜ ⵉⵜⵜⴻⴳⴳ ⵉⵜⵜ. ⵎⵉⵏ ⵎⵎⴰ ⵉⵜⵜⴻⴳⴳ ⵏⴻⵜⵜⴰ ⵓⵍⴰ ⴷ ⵜⴰⵎⴻⵎⵎⵉⵜ ⵉⵜⵜⴻⴳⴳ ⴰⵎⴻⵏⵏⵉ.ⵜⴰⴱⴰⴱⴰⵜ ⵉⵜⵜⴻⵅⵙ ⵜⴰⵎⴻⵎⵎⵉⵜ ⵓⵛⴰ ⵉⵙⵙⵛⴻⵏ ⴰⵙ ⵎⴰⵔⵔⴰ ⵎⵉⵏ ⵉⵜⵜⴻⴳⴳ ⵓⵛⴰ ⴰⴷ ⴰⵙ ⵉⵙⵙⵛⴻⵏ ⵍⴻⵅⴷⴰⵢⴻⵎ ⵜⵉⵎⴻⵇⵇⵔⴰⵏⵉⵏ ⵅ ⵜⵉⵏⴰ ⵃⵉⵎⴰ ⴰⴷ ⵜⴷⴻⵀⵛⴻⵎ. ⴰⵎ ⵎⴰⵎⵎⴻⵛ ⴷ ⵉⵙⵙⵏⴻⴽⴽⴰⵔ ⵜⴱⴰⴱⴰⵜ ⵉⵎⴻⵜⵜⵉⵏⴻⵏ ⵓⵛⴰ ⵉⵜⵜⵉⵛⵛ ⵜⵓⴷⴰⵔⵜ, ⴰⵎⴻⵏⵏⵉ ⵓⵍⴰ ⴷ ⵜⴰⵎⴻⵎⵎⵉⵜ ⵉⵜⵜⵉⵛⵛ ⵜⵓⴷⴰⵔⵜ ⵉ ⵡⴻⵏⵏⵉ ⵉⵅⵙ. ⵜⴰⴱⴰⴱⴰⵜ ⵡⴰⵔ ⵉⵜⵜⵃⴰⵙⴰⴱ ⵓⵍⴰ ⴷ ⵉⵊⵊ, ⵎⴰⵛⴰ ⵉⵡⵛⴰ ⵍⵃⵉⵙⴰⴱ ⵎⴰⵔⵔⴰ ⵉ ⵜⵎⴻⵎⵎⵉⵜ, ⵃⵉⵎⴰ ⴰⴷ ⵡⴻⵇⵇⴰⵔⴻⵏ ⵎⴰⵔⵔⴰ ⵜⴰⵎⴻⵎⵎⵉⵜ ⴰⵎ ⵜⵜⵡⴻⵇⵇⴰⵔⴻⵏ ⵜⴰⴱⴰⴱⴰⵜ. ⵡⴻⵏⵏⵉ ⵡⴰⵔ ⵉⵜⵜⵡⴻⵇⵇⴰⵔⴻⵏ ⵜⴰⵎⴻⵎⵎⵉⵜ, ⵡⴰⵔ ⵉⵜⵜⵡⴻⵇⵇⴰⵔ ⵛⴰ ⵜⴰⴱⴰⴱⴰⵜ ⵡⴻⵏⵏⵉ ⵉⵜ-ⵉⴷⴷ ⵉⵙⵙⴻⴽⴽⴻⵏ. (ⵢⵓⵃⴰⵏⵏⴰ 5:19-23)

ⵉⵏⵏⴰ ⵢⴻⵛⵛⵓ ⵉ ⵜⴻⵏⵄⴰⵛ ⵏ ⵉⵎⴻⵃⴹⴰⵔⴻⵏ: “ⴰⴷ ⵏⴳⴰⵄⵄⴻⴷ ⵖⴰⵔ ⵓⵔⵛⴰⵍⵉⵎ ⵓⵛⴰ ⴰⴷ ⵉⵜⵡⴰⵇⴼⴻⵍ ⵉ ⵎⵎⵉⵙ ⵏ ⴱⵏⴰⴷⴻⵎ ⵎⴰⵔⵔⴰ ⵎⵉⵏ ⵢⵓⵔⴰⵏ ⵣⴻⴳ ⵉⵏⴰⴱⵉⵢⵢⴻⵏ. ⵎⵉⵏⵣⵉ ⵏⴻⵜⵜⴰ ⴰⴷ ⵉⵜⵜⵡⴰⵙⴻⵍⵍⴻⵎ ⵉ ⵍⴻⴳⵏⵓⵙ, ⴰⴷ ⵜ ⵙⵙⴻⵃⵇⴰⵔⴻⵏ, ⴰⴷ ⵣⵣⴰⵢⴻⵙ ⵙⵙⴱⴻⵀⵜⵍⴻⵏ, ⴰⴷ ⵜ ⵜⴻⴽⴽⵡⴰⵔⴻⵏ ⵓⵛⴰ ⴰⴷ ⵅⴰⵙ ⵙⵙⵓⵙⴼⴻⵏ, ⴰⴷ ⵜ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ, ⴰⴷ ⵜ ⵏⵖⴻⵏ ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⴷⴷ-ⵉⴽⴽⴰⵔ.” (ⵍⵓⵇⴰ 18:31-33)

ⵢⴻⵛⵛⵓ ⵉⵇⵇⴰⵔ: "ⵏⴻⵛⵛ ⴷ ⴰⵎⴻⴽⵙⴰ ⴷ ⴰⵚⴻⴱⵃⴰⵏ. ⵙⵙⵏⴻⵖ ⵓⵍⵍⵉ ⵉⵏⵓ ⵓⵛⴰ ⵓⵍⵍⵉ ⵉⵏⵓ ⵉⵙⵙⴻⵏ ⴰⵢⵉ, ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵉⵙⵙⴻⵏ ⵜⴱⴰⴱⴰⵜ, ⴰⵎⵎⵓ ⵉ ⵙⵙⵏⴻⵖ ⵏⴻⵛⵛ ⵜⴰⴱⴰⴱⴰⵜ. ⵏⴻⵛⵛ ⵡⵛⵉⵖ ⵜⵓⴷⴰⵔⵜ ⵉⵏⵓ ⵉ ⵡⵓⵍⵍⵉ ⵉⵏⵓ.  ... ⵙ ⵎⴰⵏ ⴰⵢⴰ ⵉⵜⵜⴻⵅⵙ ⴰⵢⵉ ⵜⴱⴰⴱⴰⵜ, ⵎⵉⵏⵣⵉ ⵏⴻⵛⵛ ⵡⵛⵉⵖ ⵜⵓⴷⴰⵔⵜ ⵉⵏⵓ ⵃⵉⵎⴰ ⴰⴷ ⵜⵜ-ⵉⴷⴷ ⴽⵙⵉⵖ ⵄⴰⵡⴻⴷ. ⵓⵍⴰ ⴷ ⵉⵊⵊ ⵡⴰⵔ ⵣⵣⴰⵢⵉ ⵜⵜ ⵉⴽⵙⵉ, ⵎⴰⵛⴰ ⵏⴻⵛⵛ ⵡⵛⵉⵖ ⵜⵜ ⵙ ⵢⵉⵅⴻⴼ ⵉⵏⵓ. ⵖⴰⵔⵉ ⵚⵚⵓⵍⵟⴰ ⵃⵉⵎⴰ ⴰⴷ ⵜⵜ ⵡⵛⴻⵖ ⵓ ⵖⴰⵔⵉ ⵜⵉⵣⴻⵎⵎⴰⵔ ⴰⴷ ⵜⵜ-ⵉⴷⴷ ⴽⵙⵉⵖ ⵄⴰⵡⴻⴷ. ⵜⴰⵡⵚⴻⵢⵢⴻⵜ-ⴰ ⵟⵟⴼⴻⵖ ⵜⵜ ⵣⵉ ⴱⴰⴱⴰ.” (ⵢⵓⵃⴰⵏⵏⴰ 10:14,15,17,18)

ⵎⵉⵏ ⵜⴻⵏⵏⵉⴷ ⵛⴻⴽ? ⵡⵉ ⵉⵏⵏⴰⵏ ⴰⵇⴰ ⴱⴻⵍⵍⵉ ⵏⴻⵜⵜⴰ ⵉⵜⵜⴰⵎⴻⵏ ⴷⵉ ⵍⵎⴰⵙⵉⵃ, ⵉⵜⵅⴻⵚⵚⴰ ⴰⵙ ⴰⴷ ⵢⴰⵎⴻⵏ ⴷⴻⴳ ⵡⴰⵡⴰⵍⴻⵏ ⵏ ⵍⵎⴰⵙⵉⵃ. ⵎⴰⵍⴰ ⵡⴰⵔ ⵜⴻⵜⵜⵉⵎⵏⴻⴷ ⵓⵍⴰ ⴷⴰⵢⵙⴻⵏ, ⵉⵅⵙ ⴰⴷ ⵢⵉⵏⵉ ⵡⴰⵔ ⴳⴳⵓⵔ ⴰⴷ ⵜⵏⴻⵊⵎⴻⴷ ⵣⵉ ⵍⵎⵓⵄⵚⵉⵢⵢⴻⵜ ⵏⵏⴻⴽ ⵓ ⵡⴰⵔ ⴳⴳⵓⵔ ⴰⴷ ⵜⴻⵟⵟⴼⴻⴷ ⴰⵙⴰⵎⴻⵃ ⵎⴰⵃⴻⵏⴷ ⴰⴷ ⴽⵉⴷⴻⵙ ⵜⴻⵇⵇⵉⵎⴻⴷ ⵓ ⴰⴷ ⵜ ⵜⴻⴹⴼⴰⵔⴻⴷ, ⵡⴰⵔ ⴳⴳⵓⵔ ⴰⴷ ⵖⴰⵔⴻⴽ ⵜⵉⵍⵉ ⵜⵓⴷⴰⵔⵜ ⵏ ⵍⴻⴱⴷⴰ.