ⵎⴰ ⴱⴻⴷⴷⵍⴻⵏ ⵉⵎⴰⵙⵉⵃⵉⵢⵢⴻⵏ ⴰⴷⵍⵉⵙ ⵉⵇⴻⴷⴷⵙⴻⵏ ⴰⵎ ⵎⴰⵎⵎⴻⵛ ⵇⵇⴰⵔⴻⵏ ⵛⴰ ⵏ ⵉⵡⴷⴰⵏ?
ⵡⴰⵔ ⵅⴰⵙ ⵏⴻⵙⵙⵉⵡⵉⵍ, ⵎⴰⵍⴰ ⵜⴻⵇⵇⴰⵔⴻⴷ ⵎⴰⵏ ⴰⵢⴰ, ⴰⵇⴰ ⵜⵇⴰⵊⴰⵃⴻⴷ ⴰⵎⵎⵓ ⴰⵔⴻⴱⴱⵉ ⵙⵉⵎⴰⵏⵜ ⵏⵏⴻⵙ, ⵎⴰⵛⵉ ⵉⵎⴰⵙⵉⵃⵉⵢⵢⴻⵏ ⴷ ⵡⵓⴷⴰⵢⴻⵏ.
ⴰⵎⵎⵓ ⵉ ⵇⵇⴰⵔ ⴰⵔⴻⴱⴱⵉ ⴷⴻⴳ ⵡⴰⵡⴰⵍ ⵏⵏⴻⵙ ⴰⵎⵎⵓ:
« ⵅ ⵎⴰⵏ ⴰⵢⴰ ⵉ ⴷ ⴰⵢⵉ ⵉⵏⵏⴰ ⵙⵉⴷⵉ: "ⵜⴻⵥⵔⵉⴷ ⵎⵍⵉⵃ, ⴰⵇⴰ ⵏⴻⵛⵛ ⵃⴻⵟⵟⵉⵖ ⴰⵡⴰⵍ ⵉⵏⵓ ⵎⴰⵃⴻⵏⴷ ⴰⴷ ⵜ ⵜⵜⴻⴳⴳⴻⵖ” » (ⵉⵔⵎⵉⵢⴰ 1:12)
ⴰⵔⴻⴱⴱⵉ ⵡⴰⵔ ⵉⵜⵜⴻⵟⵟⴻⵚ ⵛⴰ. ⴰⵔⴻⴱⴱⵉ ⵉⵏⴹⴰⵔ ⵜⵉⵟⵟⴰⵡⵉⵏ ⵏⵏⴻⵙ ⵅ ⴷⴷⵓⵏⵉⵜ ⵓ ⵉⵃⴻⵟⵟⴰ ⴰⵡⴰⵍ ⵏⵏⴻⵙ ⵍⴰⵎⵉ ⵏⴻⵜⵜⴰ ⵉⵙⵙⴻⵏ ⴰⵇⴰ ⵍⴻⵄⴷⵓ, ⵛⵛⵉⵟⴰⵏ, ⵡⴰⵔ ⵉⵅⵙ ⵎⴰⵃⴻⵏⴷ ⵉⵡⴷⴰⵏ ⴰⴷ ⵖⴰⵔⴻⵏ ⴰⵡⴰⵍ ⵏ ⴰⵔⴻⴱⴱⵉ.
ⴰⵡⴰⵍ ⵏ ⴰⵔⴻⴱⴱⵉ ⴷ ⵜⵉⴷⴻⵜⵜ (ⵢⵓⵃⴰⵏⵏⴰ 17:17), ⴰⵇⴰ-ⵜ ⴷ ⴰⵔⵔⵓⵃ ⴷ ⵜⵓⴷⴰⵔⵜ (ⵢⵓⵃⴰⵏⵏⴰ 6:36). ⵙ ⵓⵢⴻⵏⵏⵉ ⵛⵛⵉⵟⴰⵏ ⵡⴰⵔ ⵉⵅⵙ ⵛⴰ ⴰⵇⴰ ⴰⴷ ⵅⴰⵙ ⴰⵔⵣⵓⵏ ⵉⵡⴷⴰⵏ. ⵏⴻⵜⵜⴰ ⵢⵉⵡⴻⴹ ⴰⴷ ⵉⵙⵙⴻⵇⵏⴻⵄ ⴰⴱⴰⵔⵔⵓ ⵏ ⵉⵡⴷⴰⵏ ⵎⴰⵃⴻⵏⴷ ⵡⴰⵔ ⵇⵇⴰⵔⴻⵏ ⵍ'ⵉⵏⵊⵉⵍ ⵓⵛⴰ ⵉⵙⵙⵉⴷⴻⴼ ⴰⵙⴻⵏ ⴷⴻⴳ ⵓⵣⴻⵍⵍⵉⴼ ⴱⴻⵍⵍⵉ ⵉⵎⴰⵙⵉⵃⵉⵢⵢⴻⵏ ⵣⴻⵡⵡⴰⵔⴻⵎ ⴰⵡⴰⵍ ⵏⵏⴻⵙ ⵓⵛⴰ ⵉⵡⴷⴰⵏ ⵜⵜⵄⴰⵡⴰⴷⴻⵏ ⵉⵅⴰⵔⵔⵉⵇⴻⵏ ⵏⵏⴻⵙ ⴱⵍⴰ ⵎⴰ ⴰⴷ ⵅⴰⵔⵚⴻⵏ. ⵉⵏⵏⴰ ⵢⴻⵛⵛⵓ ⵍⵎⴰⵙⵉⵃ:
« ⵎⵉⵏⵣⵉ ⵙ ⵜⵉⴷⴻⵜⵜ ⴰⴷ ⴰⵡⴻⵎ ⵉⵏⵉⵖ, ⴰⵍ ⵉ ⵖⴰ ⵉⴼⵏⴰ ⵓⵊⴻⵏⵏⴰ ⴷ ⵜⴻⵎⵎⵓⵔⵜ,
ⵡⴰⵔ ⵉⴼⴻⵏⵏⵉ ⵓⵍⴰ ⴷ ⵉⵊⵊ ⵏ ⵍⵃⴰⵔⴼ ⵏⵉⵖ ⴷ ⵜⴰⵏⴻⵇⵇⵉⵟ ⵣⵉ ⵛⵛⴰⵔⵉⵄⴰ ⴰⵍ ⵉ ⵖⴰ ⵉⵎⵙⴰⵔ ⴽⵓⵍⵛⵉ. » (ⵎⴰⵜⵜⴰ 5:18).
ⵎⴰ ⵜⴻⵖⵔⵉⴷ ⵍ'ⵉⵏⵊⵉⵍ? ⵎⵉⵏ ⵅⴰⵙ ⵜⴻⵙⵙⵏⴻⴷ? ⵎⴰ ⵉⵄⴻⴷⴷⴻⵍ ⵉⵎⴻⵃⴹⴰⵔⴻⵏ ⵏ ⵓⵏⴰⴱⵉ ⵣⴻⵄⵎⴰ ⴰⴷ ⵙⵙⴼⴰⵔⵖⴻⵏ ⴰⵡⴰⵍⴻⵏ ⵏⵏⴻⵙ ⵓ ⴰⴷ ⵙⵙⴻⵄⴷⵓⵏ ⵛⴰ ⵏ ⵡⴰⵡⴰⵍⴻⵏ ⵏⵏⴻⴹⵏⵉ ⴷⴻⴳ ⵡⴻⵎⵛⴰⵏ ⵏⵙⴻⵏ? ⵎⴰ ⵣⴻⵄⵎⴰ ⴳⴳⵓⵔ ⴰⴷ ⴰⴼⴻⵏ ⴰⵡⴰⵍⴻⵏ ⵏ ⵓⵎⴰⵣⴰⵏ ⵡⴰⵔ ⵉⵖⵍⵉⵏ ⵅ ⵜⵓⴷⴰⵔⵜ ⵏⵙⴻⵏ? ⵉⵙⵙⴻⵄⴷⵓ ⵢⴻⵛⵛⵓ ⵍⵎⴰⵙⵉⵃ ⴰⵡⴰⵍⴻⵏ ⵏⵏⴻⵙ ⵉ ⵉⵎⴻⵃⴹⴰⵔⴻⵏ ⵏⵏⴻⵙ ⵎⴰⵃⴻⵏⴷ ⴰⴷ ⵜⴻⵏ ⵃⴹⴰⵏ ⵏⵉⵛⴰⵏ. ⵉⵏⵏⴰ ⵍⵎⴰⵙⵉⵃ ⵅ ⵡⴰⵡⴰⵍⴻⵏ ⵏⵏⴻⵙ:
“ⴰⵊⴻⵏⵏⴰ ⴷ ⵜⵎⵓⵔⵜ ⴰⴷ ⵄⴷⵓⵏ ⵎⴰⵛⴰ ⴰⵡⴰⵍⴻⵏ ⵉⵏⵓ ⵡⴰⵔ ⵄⴻⴷⴷⵓⵏ ⵄⴻⵎⵎⴰⵔⵚ.” (ⵎⴰⵜⵜⴰ 24:35)
ⵍⴰⵎⵉ ⵜⵓⵖⴰ ⵉⴷⴷⴰⵔ ⵍⵎⴰⵙⵉⵃ ⴷⵉ ⵜⴻⵎⵎⵓⵔⵜ, ⵜⵓⵖⴰ ⵉⴳⴳⵓⵔ ⵎⴰⵏⵉ ⵎⵎⴰ. ⴰⵟⵟⴰⵙ ⵏ ⵉⵄⵓⵔⵔⴰⵛ ⵏ ⵉⵡⴷⴰⵏ ⵓⵙⵉⵏ-ⴷⴷ ⵎⴰⵃⴻⵏⴷ ⴰⴷ ⵥⴰⵔⴻⵏ ⵎⵉⵏ ⵉⵜⵜⴻⴳⴳ ⵓ ⵎⴰⵃⴻⵏⴷ ⴰⴷ ⵙⵍⴻⵏ ⵎⵉⵏ ⵉⵇⵇⴰⵔ. ⵎⴰ ⵣⴻⵄⵎⴰ ⴳⴳⵓⵔ ⴰⴷ ⵜⵜⵓⵏ ⴰⵡⴰⵍⴻⵏ ⵏⵏⴻⵙ ⴷ ⵍⴻⴼⵄⴰⵢⴻⵍ ⵏⵏⴻⵙ? ⵎⴰ ⵣⴻⵄⵎⴰ ⴳⴳⵓⵔ ⴰⴷ ⵇⴻⴱⵍⴻⵏ ⴰⵡⴰⵍⴻⵏ ⵏ ⵍⵎⴰⵙⵉⵃ ⵎⴰⵄⵍⵉⴽ ⴼⴰⵔⵖⴻⵏ?
ⵅⴻⵏⵏⵉ ⴷⵉⵏ ⵓⵍⴰ ⴷ ⵉⵛⵜ ⵏ ⵍⵃⴰⵊⴻⵜ ⵏⵏⴻⴹⵏⵉ. ⵍⴰⵎⵉ ⵓⵔⵉⵏ ⵉⵎⴻⵃⴷⴰⵔⴻⵏ ⴰⵡⴰⵍⴻⵏ ⵏ ⵍⵎⴰⵙⵉⵃ (ⵍⴻⵅⴱⴰⵔ ⴰⵙⴻⴱⵃⴰⵏ) ⴰⵇⴰ ⵉⵜⵡⴰⵙⵙⴻⵄⴷⵓ ⵖⴰⵔ ⵎⴰⵔⵔⴰ ⵜⵉⵖⴻⵎⵎⵓⵔⴰ ⵏ ⴷⴷⵓⵏⵉⵜ. ⵅⵎⵉ ⵉ ⵖⴰ ⵏⵉⵏⵉ ⴰⵇⴰ ⵛⴰ ⵏ ⵉⵡⴷⴰⵏ ⴰⵔⴻⵣⵣⵓⵏ ⴰⴷ ⵙⵙⴼⴰⵔⵖⴻⵏ ⵏⵉⵖ ⴰⴷ ⵣⴻⵡⵡⴰⵔⴻⵏ ⵍⴻⵅⴱⴰⵍ ⴰⵙⴻⴱⵃⴰⵏ, ⵎⴰⵎⵎⴻⵛ ⴳⴳⵉⵏ ⵣⴻⵎⵎⴰⵔⴻⵏ ⴰⴷ ⴱⴻⴷⴷⵍⴻⵏ ⵜⵉⵔⴰ-ⵢⴰ ⵎⴰⵔⵔⴰ ⵎⴰⵏⵉ ⵎⵎⴰ ⵓ ⴰⴷ ⵜ ⴱⴻⴷⴷⵍⴻⵏ ⵏⵉⵛⴰⵏ ⴷⴻⴳ ⵓⵎⵓⵔ ⴷ ⵉⵊⵊⴻⵏ ⴷⵉ ⴷⴷⵓⵏⵉⵜ ⵎⴰⵔⵔⴰ? ⴰⵇⴰ ⵡⴰⵔ ⵣⴻⵎⵎⴰⵔⴻⵏ ⴰⴷ ⴳⴳⴻⵏ ⵎⴰⵏ ⴰⵢⴰ. ⵍⴻⵅⴱⴰⵍ ⴰⵙⴻⴱⵃⴰⵏ ⵡⴰⵔ ⵉⵣⴻⵡⵡⴰⵔ ⵛⴰ. ⴰⵔⴻⴱⴱⵉ ⵉⵃⴻⵟⵟⴰ ⴰⵡⴰⵍⴻⵏ ⵏⵏⴻⵙ. ⵍ'ⵉⵏⵊⵉⵍ ⵡⴰⵔ ⴷ ⴰⵏⴻⵖ ⵉⵙⵙⵉⴳⴳʷⵉⵊ ⵛⴰ ⵣⵉ ⴰⵔⴻⴱⴱⵉ, ⵎⴰⵛⴰ ⵍ'ⵉⵏⵊⵉⵍ ⵉⵙⵙⴱⴰⵏ ⴰⵏⴻⵖ-ⴷⴷ ⵎⴰⵎⵎⴻⵛ ⵉⵜⵜⵅⴻⵚⵚⴰ ⴰⴷ ⵖⴰⵔⵙ ⴷⴷ-ⵏⵇⴰⵔⵔⴻⴱ ⵓ ⵎⴰⵎⵎⴻⵛ ⵏⵣⴻⵎⵎⴰⵔ ⴰⴷ ⵏⴻⵙⵙⴻⵏ ⴰⵇⴰ ⴰⵔⴻⴱⴱⵉ ⵉⵅⵙ ⴰⴷ ⴰⵏⴻⵖ ⵉⴱⴰⵔⴻⴽ ⴷⵉ ⵍⵎⴰⵙⵉⵃ.
ⵡⴰⵔ ⵜⴻⵊⵊⵉ ⵍⴻⵄⴷⵓ ⴰⴷ ⵛⴻⴽ ⵉⵙⵙⵃⴰⵔⵔⴻⵎ ⵅ ⵡⴰⵡⴰⵍ ⵏ ⴰⵔⴻⴱⴱⵉ ⵓ ⵅ ⵡⴻⵏⵏⵉ ⴷ ⴰⵛ / ⴰⵎ ⵉⵜⵜⴻⵅⵙⴻⵏ ⴷ ⵡⴻⵏⵏⵉ ⵉⵡⵛⵉⵏ ⵜⵓⴷⴰⵔⵜ ⵏⵏⴻⵙ ⵅⴰⴽ / ⵅⴰⵎ.
ⴱⵍⴰ ⴰⵡⴰⵍ ⵏ ⵜⵉⴷⴻⵜⵜ ⵏ ⴰⵔⴻⴱⴱⵉ, ⵡⴰⵔ ⵜⴻⴳⴳⵓⵔⴻⴷ ⴰⴷ ⵜⵣⴻⵎⵎⴰⵔⴻⴷ ⴰⴷ ⵜⴻⵙⵙⵏⴻⴷ ⴰⵔⴻⴱⴱⵉ ⵏ ⵜⵉⴷⴻⵜⵜ ⵓⵍⴰ ⴷ ⴰⴱⵔⵉⴷ ⵉ ⵖⴰⵔⵙ ⵉⵜⵜⴰⵡⵢⴻⵏ.