ⵍⵄⴰⵀⴷ ⴰⵇⴷⵉⵎ ⴷ ⵍⵄⴰⵀⴷ ⴰⵊⴷⵉⴷ ⵎⴰ ⵏⵉⵜⵏⵉ ⴷ ⵜⵏⴰⵢⴻⵏ ⵏ ⵉⴷⵍⵉⵙⴻⵏ ⵉⵜⵡⴰⴼⴰⵔⵣⴻⵏ?
ⴰⵟⵟⴰⵙ ⵏ ⵉⵡⴷⴰⵏ ⵉⵜⵜⵖⵉⵍ ⴰⵙⴻⵏ ⴱⴻⵍⵍⵉ ⵓⴷⴰⵢⴻⵏ ⵖⴰⵔⵙⴻⵏ ⴰⴷⵍⵉⵙ ⵏⵙⴻⵏ ⵓ ⵉⵎⴰⵙⵉⵃⵉⵢⵢⴻⵏ ⵖⴰⵔⵙⴻⵏ ⵉⵊⵊⴻⵏ ⵏⵏⴻⴹⵏⵉ! ⵉⵡⴰ ⴰⵇⴰ ⵎⴰⵏ ⴰⵢⴰ ⵡⴰⵔ ⵉⵍⵍⵉ ⵛⴰ ⴷ ⵜⵉⴷⴻⵜⵜ!
ⵉⵏⵏⴻⴹⵏⵉ ⵇⵇⴰⵔⴻⵏ ⴰⵇⴰ ⵓⴷⴰⵢⴻⵏ ⵖⴰⵔⵙⴻⵏ ⵜⵏⴰⵢⴻⵏ ⵏ ⵉⴷⵍⵉⵙⴻⵏ ⵓⵎⵉ ⵇⵇⴰⵔⴻⵏ ⵜⵜⴰⵡⵔⴰⵜ ⴷ ⵣⵣⴰⴱⵓⵔ (ⴰⵡⴰⵍ-ⴰ ⵉⵅⵙ ⴰⴷ ⵢⵉⵏⵉ 'ⵉⴷⵍⵉⵙⴻⵏ') ⵓ ⴰⵇⴰ ⵉⵎⴰⵙⵉⵃⵉⵢⵢⴻⵏ ⵖⴰⵔⵙⴻⵏ ⵉⵊⵊ ⵏ ⵡⴻⴷⵍⵉⵙ ⵡⵉⵙⵙ ⵜⵍⴰⵜⴰ ⵉⵄⴷⵓ ⵉⴷⵍⵉⵙⴻⵏ ⵜⵏⴰⵢⴻⵏ ⵉⵎⴻⵣⵡⵓⵔⴰ ⵓ ⵇⵇⴰⵔⴻⵏ ⴰⵙ ⵍ'ⵉⵏⵊⵉⵍ (ⴰⵡⴰⵍ-ⴰ ⵉⵅⵙ ⴰⴷ ⵢⵉⵏⵉ `ⵍⴻⵅⴱⴰⵔ ⴰⵚⴻⴱⵃⴰⵏ'). ⵓ ⵄⴰⵡⴻⴷ ⴷⵉⵏ ⴰⵟⵟⴰⵙ ⵏ ⵉⵡⴷⴰⵏ-ⴰ ⴳⴳⵓⵔ ⴰⴷ ⵉⵏⵉⵏ ⴰⵇⴰ ⴰⵔⴻⴱⴱⵉ ⵉⵙⵙⵓⴼⴼⴻⵖ-ⴷⴷ ⵄⴰⴷ ⴰⴷⵍⵉⵙ ⵡⵉⵙⵙ ⴰⵔⴻⴱⵄⴰ. ⵉⵡⴰ ⴰⵇⴰ ⵓⵍⴰ ⴷ ⵎⴰⵏ ⴰⵢⴰ ⵡⴰⵔ ⵉⵍⵍⵉ ⵏⵉⵛⴰⵏ!
ⴰⵔⴻⴱⴱⵉ ⵉⵡⵛⴰ ⴰⵏⴻⵖ ⵎⵖⵉⵔ ⵉⵊⵊ ⵏ ⵡⴻⴷⵍⵉⵙ ⵎⵉⵏ ⴷⵉ ⵉⵍⵍⴰ ⵛⴰ ⵏ ⵉⵙⵎⵓⵏⵉⵜⴻⵏ ⵏ ⵉⴷⵍⵉⵙⴻⵏ, ⵎⴰⵛⴰ ⵎⴰⵔⵔⴰ ⵉⴷⵙⴻⵏ ⵡⴰⵔ ⵜⵡⴰⵃⴰⵔⵔⴼⴻⵏ ⵓ ⵡⴰⵔ ⵜⵡⴰⴱⴻⴹⵍⴻⵏ ⵛⴰ, ⴰⵇⴰ-ⵜⴻⵏ ⵊⵎⵉⵄ ⴷ ⴰⵡⴰⵍ ⵏ ⴰⵔⴻⴱⴱⵉ ⴷ ⵉⵊⵊⴻⵏ!
ⵉⵜⵜⵅⴻⵚⵚⴰ ⴰⴷ ⵜⴻⵙⵙⵏⴻⴷ ⴰⵎⴻⵣⵡⴰⵔⵓ ⴰⵇⴰ ⵓⴷⴰⵢⴻⵏ ⴱⴹⴰⵏ ⵉⴷⵍⵉⵙⴻⵏ ⵏ ⵍⵄⴰⵀⴷ ⴰⵇⴷⵉⵎ ('ⵜⵉⵏⴰⵅ') ⵅ ⵜⵍⴰⵜⴰ ⵏ ⵉⵙⵎⵓⵏⵉⵜⴻⵏ ⵓⵎⵉ ⵇⵇⴰⵔⴻⵏ ⵜⵀoⵔⴰⵀ (ⴰⵡⴰⵍ-ⴰ ⵉⵅⵙ ⴰⴷ ⵢⵉⵏⵉ "ⵜⴰⵖⵓⵔⵉ", ⴷⴰⵢⵙ ⵅⴻⵎⵙⴰ ⵏ ⵉⴷⵍⵉⵙⴻⵏ ⵉⵎⴻⵣⵡⵓⵔⴰ ⵏ ⵎⵓⵙⴰ, ⵉⵅⵙ ⴰⴷ ⵢⵉⵏⵉ ⵜⵜⴰⵡⵔⴰⵜ), ⴽⴻⵜⵓⴱⵉⵎ (ⴰⵡⴰⵍ-ⴰ ⵉⵅⵙ ⴰⴷ ⵢⵉⵏⵉ 'ⵉⴷⵍⵉⵙⴻⵏ' ⵏⵉⵖ 'ⵣⵣⴰⴱⵓⵔ' ⵓ ⵏⴻⵜⵜⴰ ⵊⴰⵔⴰⵙⴻⵏ ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⵙⵓⵍⴰⵢⵎⴰⵏ ⴷ ⵉⵣⴻⵀⵀⵉⴷⴻⵏ ⵏ ⴷⴰⵡⵓⴷ ⵓⵍⴰ ⴷ ⴰⴷⵍⵉⵙ ⴰⵢⵓⴱ) ⴷ ⵏⴻⴱⵉⵢⵉⵎ (ⵉⵅⵙ ⴰⴷ ⵢⵉⵏ ⵉⴷⵍⵉⵙⴻⵏ ⵏ ⵉⵏⴰⴱⵉⵢⵢⴻⵏ, ⵉⵏⴰⴱⵉⵢⵢⴻⵏ ⵉⵎⴻⵇⵇⵔⴰⵏⴻⵏ ⴷ ⵉⵎⴻⵥⵢⴰⵏⴻⵏ ⵏⵏⵉ ⵢⵓⵔⴰⵏ ⴽⵓⵍ ⵉⵊⵊ ⵣⵣⴰⵢⵙⴻⵏ ⵉⵊⵊ ⵏ ⵡⴻⴷⵍⵉⵙ ⵙ ⵢⵉⵙⴻⵎ ⵏⵙⴻⵏ). ⵜⵉⵏⴰ ⵜⵓⵖⴰ ⴷ ⵜⵉⵔⴰ ⵉⵇⴻⴷⴷⵙⴻⵏ ⵏ ⵡⵓⴷⴰⵢⴻⵏ ⵄⵍⴰⵃⴰⵍ 400 ⵉⵙⴻⴳⴳʷⵓⵙⵙⴰ ⵇⴱⴻⵍ ⵜⵍⴰⵍⵉⵜ ⵏ ⵢⴻⵛⵛⵓ ⵍⵎⴰⵙⵉⵃ ⵣⵉ ⴰⵔⵔⵓⵃ ⵉⵇⴻⴷⴷⵙⴻⵏ ⵣⵉ ⵜⴻⵄⵣⴰⵔⴻⵛⵜ ⵎⴰⵔⵢⴰⵎ.
ⴰⵟⵟⴰⵙ ⵏ ⵡⵓⴷⴰⵢⴻⵏ ⵓⵎⵏⴻⵏ ⴷⴰⵢⴻⵙ ⵓ ⵎⴰⵔⵔⴰ ⵉⵎⴰⵣⴰⵏⴻⵏ ⵏ ⵢⴻⵛⵛⵓ ⵜⵓⵖⴰ-ⵜⴻⵏ ⴷ ⵓⴷⴰⵢⴻⵏ ⵉ ⴷⴰⵢⴻⵙ ⵢⵓⵎⵏⴻⵏ. ⵓ ⵏⵉⵛⴰⵏ ⴷⴻⴳ ⵉⵢⵓⵔⴻⵏ ⵉⵎⴻⵣⵡⵓⵔⴰ ⴰⵡⴰⵔⵏⵉ ⵍⴰⵎⵉ ⵉⵎⵎⴻⴽⵙⵉ ⵢⴻⵛⵛⵓ ⵍⵎⴰⵙⵉⵃ ⵖⴰⵔ ⵓⵊⴻⵏⵏⴰ ⵓⴷⴼⴻⵏ ⴷⵉ ⵍⵉⵎⴰⵏ ⴷⴰⵢⵙ ⵎⵖⵉⵔ ⴷⵉ ⵓⵔⵛⴰⵍⵉⵎ ⵡⴰⵀⴰ ⴰⵎⴻⵛⵏⴰⵡ ⵍⵓⵍⵓⴼ ⵏ ⵉⵡⴷⴰⵏ, ⵓⵎⴻⵏ ⴱⴻⵍⵍⵉ ⵏⴻⵜⵜⴰ ⴷ ⵍⵎⴰⵙⵉⵃ ⵉⵜⵡⴰⵡⴰⵄⴷⴻⵏ.
ⵓⴷⴰⵢⴻⵏ ⵏⵏⵉ ⵓⵎⵏⴻⵏ ⴷⵉ ⵍⵎⴰⵙⵉⵃ ⵜⵡⴰⴱⴻⵣⵣⵄⴻⵏ ⴰⵡⴰⵔⵏⵉ ⵛⴰ ⵏ ⵍⵡⴻⵇⵜ ⴷⵉ ⵍⴻⵙⴱⴰⴱ ⵏ ⵜⵇⴻⵟⵟⴰⵄⵜ ⵏ ⵡⴻⴱⵔⵉⴷ ⴷ ⵓⴹⵟⴰⵀⴻⴷ ⵉ ⵜⵓⵖⴰ ⴷⴷ-ⵉⵜⵜⴰⵙⴻⵏ ⴰⵎⴻⵣⵡⴰⵔⵓ ⵣⵉ ⵊⵊⵉⵀⴻⵜ ⵏ ⵡⵓⴷⴰⵢⴻⵏ ⵉⵎⴻⵇⵇⵔⴰⵏⴻⵏ ⵏ ⴷⴷⵉⵏ ⴷⵉ ⵍⵡⴻⵇⵜ ⵏⵏⵉ. ⵉⵊⵊⴻⵏ ⵣⵣⴰⵢⵙⴻⵏ, ⴱⵓⵍⵓⵙ, ⵜⵓⵖⴰ-ⵜ ⴷ ⴰⵎⴻⵇⵇⵔⴰⵏ ⵏ ⵍⵉⴹⵟⵉⵀⴰⴷ ⵏ ⵡⵓⴷⴰⵢⴻⵏ ⵉⵎⴰⵙⵉⵃⵉⵢⵢⴻⵏ, ⵎⴰⵛⴰ ⵢⵓⵙⴰ-ⴷⴷ ⵖⴰⵔ ⵍⵉⵎⴰⵏ ⴷⵉ ⵍⵎⴰⵙⵉⵃ ⴰⵡⴰⵔⵏⵉ ⵍⴰⵎⵉ ⴷⴷ-ⵉⴹⵀⴰⵔ ⵍⵎⴰⵙⵉⵃ ⵖⴰⵔⴻⵙ ⵉⵊⵊ ⵏ ⵜⴼⴰⵡⵜ ⵜⴰⵎⴻⵇⵇⵔⴰⵏⵜ ⴷⴻⴳ ⵡⴻⴱⵔⵉⴷ ⵏⵏⴻⵙ ⵖⴰⵔ ⴷⵉⵎⴰⵛⵇ ⵡⴻⵏⵏⵉ ⵢⵓⵎⵓⵔⴻⵏ ⴱⵓⵍⵓⵙ ⵎⴰⵃⴻⵏⴷ ⴰⴷ ⵉⴱⴰⵔⵔⴻⵃ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵢⴻⵛⵛⵓ ⵍⵎⴰⵙⵉⵃ ⵉ ⵎⴰⵔⵔⴰ ⵉⵡⴷⴰⵏ ⴷ ⵎⴰⵔⵔⴰ ⵉⵢⴷⵓⴷⴻⵏ.
ⴰⵔⵢⴰⵣ-ⴰ ⴱⵓⵍⵓⵙ ⴷ ⵜⴻⵏⵄⴰⵛ ⵏ ⵉⵎⴰⵣⴰⵏⴻⵏ ⵜⵓⵖⴰ-ⵜⴻⵏ ⵎⴰⵔⵔⴰ ⴷ ⵓⴷⴰⵢⴻⵏ ⵓⵛⴰ ⵏⵉⵜⵏⵉ ⵎⴰⵔⵔⴰ ⵓⵎⵏⴻⵏ ⴷⵉ ⵍⵎⴰⵙⵉⵃ, ⵓⵎⵏⴻⵏ ⴰⵇⴰ-ⵜ ⴷ ⵍⵎⴰⵙⵉⵃ ⵉⵜⵜⵡⴰⵡⴰⵄⴷⴻⵏ ⵉ ⵍⴳⴻⵏⵙ ⵏ ⵡⵓⴷⴰⵢⴻⵏ ⵙ ⵓⵇⴻⵎⵎⵓⵎ ⵏ ⵉⵏⴰⴱⵉⵢⵢⴻⵏ ⵏⵙⴻⵏ. ⵏⵉⵜⵏⵉ ⵎⴰⵔⵔⴰ ⵅⴻⴷⵎⴻⵏ ⴰⴽ ⵡⴰⵢⴰⵡⵢⴰ ⵎⴰⵃⴻⵏⴷ ⴰⴷ ⵙⵙⴻⵄⴷⵓⵏ ⵍⴻⵅⴱⴰⵔ ⴱⴻⵍⵍⵉ ⵢⴻⵛⵛⵓ ⵍⵎⴰⵙⵉⵃ ⴰⵇⴰ-ⵜ ⴷ "ⵀⴰ-ⵎⴰⵛⵉⵢⴰⵅ" (=ⵍⵎⴰⵙⵉⵃ), ⵡⴻⵏⵏⵉ ⵉⵜⵡⴰⴷⴻⵀⵏⴻⵏ ⵣⵉ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵉⵙⵙⴻⵏⵊⴻⵎ ⵉⵡⴷⴰⵏ ⵏⵏⴻⵙ. ⵉⵡⴷⴰⵏ ⵏⵏⴻⵙ ⴷ ⵢⴻⵏⵏⵉ ⵢⵓⵎⵏⴻⵏ ⴷⵉ ⵢⴻⵛⵛⵓ ⵍⵎⴰⵙⵉⵃ ⵣⵉ ⵎⴰⵔⵔⴰ ⵜⵉⵇⴻⴱⴱⴰⵍ ⵓ ⵣⵉ ⵎⴰⵔⵔⴰ ⵍⴻⴳⵏⵓⵙ ⵓ ⵣⵉ ⵎⴰⵔⵔⴰ ⵜⵉⵎⵎⵓⵔⴰ
ⵛⴰ ⵏ ⵉⵎⴰⵣⴰⵏⴻⵏ ⵏ ⵍⵎⴰⵙⵉⵃ ⴷ ⴱⵓⵍⵓⵙ ⴷ ⵓⵏⴻⴹⴼⴰⵔ ⴰⵅⴻⴷⴷⴰⵎ ⵏ ⴱⵓⵍⵓⵙ ⵍⵓⵇⴰ, ⴰⴹⴱⵉⴱ, (ⴱⴰⵍⴰⴽ ⵜⵓⵖⴰ-ⵜ ⴷ ⴰⵢⵓⵏⴰⵏⵉ), ⴰⵇⴰ ⵓⵔⴰⵏ ⵣⵣⵢⴰⴷⴰ ⵏ ⵉⴷⵍⵉⵙⴻⵏ ⵏⵏⵉ ⴷⴷ-ⵉⵜⵡⴰⵅⴻⵍⵇⴻⵏ ⵣⵉ ⴰⵔⵔⵓⵃ ⵉⵇⴻⴷⴷⵙⴻⵏ ⵏ ⴰⵔⴻⴱⴱⵉ, ⵜⵜⵡⴰⵙⵙⵏⴻⵏ ⵍⵓⵅⴰ ⴰⵎ ⵍ'ⵉⵏⵊⵉⵍ. ⵅⴻⵏⵏⵉ ⵉⵜⵜⵡⴰⵎⴰⵔⵏⵉ ⵍ'ⵉⵏⵊⵉⵍ ⵖⴰⵔ ⵜⵍⴰⵜⴰ ⵏ ⵉⵙⵎⵓⵏⵉⵜⴻⵏ ⵏ ⵉⴷⵍⵉⵙⴻⵏ ⵏ ⵡⵓⴷⴰⵢⴻⵏ (ⵜⵀoⵔⴰⵀ, ⴽⴻⵜⵓⴱⵉⵎ ⴷ ⵏⴻⴱⵉⵢⵉⵎ) ⵉⵏⵏⵉ ⵜⵓⵖⴰ-ⵜⴻⵏ ⵇⴱⴻⵍ ⵓ ⴰⵎⵎⵓ ⵉ ⴽⴻⵡⵡⵏⴻⵏ ⵏⵉⵜⵏⵉ ⵙ ⴰⵔⴻⴱⵄⴰ ⵜⵉⵔⴰ ⵉⵇⴻⴷⴷⵙⴻⵏ ⴰⵍ ⴰⵙⵙ-ⴰ.
ⴷⵉ ⵍ'ⵉⵏⵊⵉⵍ ⵏⴻⵜⵜⴰⴼ ⴷⴰⵢⵙ ⴰⵔⴻⴱⵄⴰ ⵏ ⵉⵎⴻⵣⵔⵓⵢⴻⵏ ⵏ ⵢⴻⵛⵛⵓ ⵍⵎⴰⵙⵉⵃ, ⴰⴷⵍⵉⵙ 'ⵍⴻⵅⴷⴰⵢⴻⵎ ⵏ ⵉⵎⴰⵣⴰⵏⴻⵏ (=ⵔⵔⵓⵙⵓⵍ)' ⵓ ⴽⵜⴰⵔ ⵇⴻⴷⴷⴰ ⵏ ⵜⴻⴱⵔⴰⵜⵉⵏ ⴷⴷ-ⵉⵜⵜⵡⴰⵡⴻⵃⵃⴰⵏ ⵉⵜⵜⵡⴰⵔⵉⵏ ⵙ ⵓⴼⵓⵙ ⵏ ⵉⵎⴰⵣⴰⵏⴻⵏ ⵉ ⵍⴽⴰⵏⴰⵢⵉⵙ (=ⵜⵉⵎⴻⵙⵎⵓⵏⵉⵏ) ⵏ ⵡⵓⵙⵙⴰⵏ ⵏⵏⵉ ⵓ ⵉ ⵛⴰ ⵏ ⵉⵏⴻⴹⴼⴰⵔⴻⵏ ⵉⵅⴻⴷⴷⴰⵎⴻⵏ. ⵖⴰⵔ ⵓⵏⴻⴳⴳⴰⵔ ⵏ ⵍ'ⵉⵏⵊⵉⵍ ⵎⴰⵔⵔⴰ ⵏⴻⵜⵜⴰⴼ ⴰⴷⵍⵉⵙ 'ⴰⵙⴰⵔⴳⴻⴱ' ⵙ ⵓⴼⵓⵙ ⵏ ⵓⵎⴰⵣⴰⵏ ⵢⵓⵃⴰⵏⵏⴰ ⵖⴰⵔ ⵓⵏⴻⴳⴳⴰⵔ ⵏ ⵍⵇⴰⵔⵏ ⵓⵎⴻⵣⵡⴰⵔⵓ ⴰⵡⴰⵔⵏⵉ ⵉ ⵜⵍⴰⵍⵉⵜ ⵏ ⵍⵎⴰⵙⵉⵃ. ⴷⴻⴳ ⵡⴻⴷⵍⵉⵙ-ⴰ ⵉⵙⵙⵉⵡⴻⵍ ⵢⵓⵃⴰⵏⵏⴰ ⵅ ⵢⵉⵊⵊ ⵏ ⵓⵡⴻⵃⵀⵉ ⴷ ⴰⵎⴻⵇⵇⵔⴰⵏ ⵓ ⵅ ⵜⵎⴻⵙⵍⴰⵢⵉⵏ ⵏ ⵜⵜⵓⵇⴰⵜ ⵏ ⴷⴷⵓⵏⵏⵉⵜ. ⵉⴷⵍⵉⵙⴻⵏ-ⴰ ⵅⴻⵏⵏⵉ ⴷ ⴰⵙⵎⵓⵏⵉ ⵡⵉⵙⵙ ⴰⵔⴻⴱⵄⴰ ⵏ ⵉⴷⵍⵉⵙⴻⵏ ⵉⵏⵏⵉ ⵉⴽⴻⵡⵡⵏⴻⵏ ⵊⵎⵉⵄ ⵜⵉⵔⴰ ⵉⵇⴻⴷⴷⵙⴻⵏ ⵏ ⵡⵓⴷⴰⵢⴻⵏ, ⵇⵇⴰⵔⴻⵏ ⴰⵙ ⵍⵉⵏⵊⵉⵍ ⵏⵉⵖ ⵍⵄⴰⵀⴷ ⴰⵊⴷⵉⴷ.
ƴⴰⵔ ⵓⴱⴻⵍⵍⴻⵄ ⵏ ⵡⴻⴷⵍⵉⵙ-ⴰ ⵖⴰⵔ ⵓⵏⴻⴳⴳⴰⵔⵓ ⵏ ⵍⴻⵛⵜⴰⴱ ⵉⵇⴻⴷⴷⵙⴻⵏ ⵏⵜⴰⴼ ⴰⵡⴰⵍⴻⵏ-ⴰ:
"ⵏⴻⵛⵛ ⵛⴻⵀⵀⴷⴻⵖ ⵉ ⵎⴰⵔⵔⴰ ⵉⵏⵏⵉ ⵉⵜⵜⴻⵙⵍⴰⵏ ⴰⵡⴰⵍⴻⵏ ⵏ ⴰⵔⴻⴱⴱⵉ ⵣⴻⴳ ⵡⴻⴷⵍⵉⵙ-ⴰ,
ⵎⴰⵍⴰ ⴷⵉⵏ ⵃⴻⴷ ⵡⴻⵏⵏⵉ ⵅⴰⵙⴻⵏ ⵉ ⵖⴰ ⵢⴰⵔⵏⵉⵏ (ⵅ ⵡⴰⵡⴰⵍⴻⵏ-ⴰ),
ⴰⵔⴻⴱⴱⵉ ⴰⴷ ⵅⴰⵙ ⵉⵖⴹⴻⵍ ⵊⵊⵔⴰⵢⴻⵃ ⵜⵉⵏⵏⵉ ⵉⵜⵡⴰⵔⵉⵏ ⴷⴻⴳ ⵡⴻⴷⵍⵉⵙ-ⴰ.
ⵎⴰⵍⴰ ⵛⴰ ⵏ ⵉⵊⵊⴻⵏ ⴰⴷ ⵉⴽⴽⴻⵙ ⵣⴻⴳ ⵡⴰⵡⴰⵍⴻⵏ ⵏ ⴰⵔⴻⴱⴱⵉ ⵣⴻⴳ ⵡⴻⴷⵍⵉⵙ-ⴰ,
ⴰⴷ ⴰⵙ ⵉⴽⴽⴻⵙ ⴰⵔⴻⴱⴱⵉ ⵜⴰⵙⵖⴰⵔⵜ ⵏⵏⴻⵙ ⵣⵉ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ ⵓ ⵣⵉ ⵜⴻⵏⴷⵉⵏⵜ ⵉⵇⴻⴷⴷⵙⴻⵏ
ⵓ ⵣⵉ ⵎⵉⵏ ⵢⵓⵔⴰⵏ ⴷⴻⴳ ⵡⴻⴷⵍⵉⵙ-ⴰ.
ⵡⴻⵏⵏⵉ ⵉⵛⴻⵀⵀⴷⴻⵏ ⵅ ⵎⴰⵏ ⴰⵢⴰ, ⵉⵇⵇⴰⵔ “ⵡⴰⵀ, ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ!”
“ⴰⵎⵉⵏ! ⴰⵙ-ⴷⴷ, ⴰ ⵙⵉⴷⵉ ⵢⴻⵛⵛⵓ!” .
ⵍⵅⴰⴹⴰⵔ ⵏ ⵙⵉⴷⵉ ⵢⴻⵛⵛⵓ ⵍⵎⴰⵙⵉⵃ ⴰⴷ ⵜⵉⵍⵉ ⴰⴽ-ⴷ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ. ⴰⵎⵉⵏ !".
(ⴰⵙⴰⵔⴳⴻⴱ 22:18-21)
ⵉⵏⴰ ⴷ ⴰⵡⴰⵍⴻⵏ ⵉⵏⴻⴳⴳⵓⵔⴰ ⵏ ⵡⴻⴷⵍⵉⵙ ⵉⵇⴻⴷⴷⵙⴻⵏ ( 'ⴱⵉⴱⵍⴻ'). ⴰⴷⵍⵉⵙ ⵉⵇⴻⴷⴷⵙⴻⵏ ⵡⴰⵏⵉⵜⴰ ⵉⴱⴷⴰ ⵙ ⵜⵍⴰⵜⴰ ⵏ ⵉⵙⵎⵓⵏⵉⵜⴻⵏ ⵏ ⵉⴷⵍⵉⵙⴻⵏ ⵣⴻⴳ ⵡⵓⴷⴰⵢⴻⵏ: 'ⵜⵀoⵔⴰⵀ', 'ⴽⴻⵜⵓⴱⵉⵎ' ⴰⵏⴷ 'ⵏⴻⴱⵉⵢⵉⵎ', ⵇⵇⴰⵔⴻⵏ ⴰⵙⴻⵏ ⵙ ⵜⵍⴰⵜⴰ 'ⵍⵄⴰⵀⴷ ⴰⵇⴷⵉⵎ'. ⵅⴻⵏⵏⵉ ⴰⵡⴰⵔⵏⵉ ⵎⴰⵏ ⴰⵢⴰ ⵖⴰⵔ ⵓⵏⴻⴳⴳⴰⵔⵓ ⵏ ⵡⴻⴷⵍⵉⵙ ⵉⵇⴻⴷⴷⵙⴻⵏ ⴰⵇⴰ ⴷⵉⵏ ⵉⵊⵊ ⵏ ⵓⵙⵎⵓⵏⵉ ⵏ ⵉⴷⵍⵉⵙⴻⵏ (ⴰⵙⵎⵓⵏⵉ-ⵢⴰ ⵉⵜⵡⴰⵙⵙⵓⴼⴼⵓⵖ-ⴷⴷ ⵓⵍⴰ ⵙ ⵓⴼⵓⵙ ⵏ ⵡⵓⴷⴰⵢⴻⵏ ⵏⵏⵉ ⵢⵓⵎⵏⴻⵏ ⴷⵉ ⵍⵎⴰⵙⵉⵃ ⵓ ⵇⵇⴰⵔⴻⵏ ⴰⵙ ⵉ ⵓⵙⵎⵓⵏⵉ-ⵢⴰ ⵓⵏⴻⴳⴳⴰⵔ ⵍ'ⵉⵏⵊⵉⵍ, ⵉⵅⵙ ⴰⴷ ⵢⵉⵏⵉ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵢⴻⵛⵛⵓ ⵍⵎⴰⵙⵉⵃ, ⵡⴻⵏⵏⵉ ⵇⵇⴰⵔⴻⵏ ⴰⵙ ⵄⴰⵡⴻⴷ 'ⵍⵄⴰⵀⴷ ⵏ ⵊⴷⵉⴷ'.
ⵙ ⵓⵢⴻⵏⵏⵉ ⴷⵉⵏ ⵎⵖⵉⵔ ⵉⵊⵊ ⵏ ⵡⴻⴷⵍⵉⵙ ⵏ ⴰⵔⴻⴱⴱⵉ ⵉ ⵢⵓⵔⴰⵏ ⵙ ⵡⴻⵏⴷⴰⵀ ⵏ ⴰⵔⵔⵓⵃ ⵉⵇⴻⴷⴷⵙⴻⵏ ⵏ ⴰⵔⴻⴱⴱⵉ ⵙ ⵓⴼⵓⵙ ⵏ ⵡⴰⵟⵟⴰⵙ ⵏ ⵉⵡⴷⴰⵏ ⵉⵏⵏⵉ ⵜⵓⵖⴰ ⵎⴰⵔⵔⴰ ⴷ ⵓⴷⴰⵢⴻⵏ (ⴱⴰⵍⴰⴽ ⵍⵓⵇⴰ ⵡⴰⵀⴰ ⵉ ⵡⴰⵔ ⵉⵍⵍⵉⵏ ⴷ ⵓⴷⴰⵢ) ⵓ ⴰⴷⵍⵉⵙ ⵏ ⴰⵔⴻⴱⴱⵉ ⵡⴰⵏⵉⵜⴰ ⵉⵜⵡⴰⴱⴹⴰⵏ ⴷⵉ ⵍⵄⴰⵀⴷ ⴰⵇⴷⵉⵎ ⴷ ⵍⵄⴰⵀⴷ ⴰⵊⴷⵉⴷ.