ⴰⵥⵔⵉ ⵏ ⵜⴻⵙⵍⵉⵜ ⵖⴰⵔ ⵛⵛⴷⵉⵃ
7
1 “ⵄⵇⴻⴱ-ⴷⴷ, ⵄⵇⴻⴱ-ⴷⴷ, ⴰ ⵛⵓⵍⴰⵎⵉⵜ! ⵄⵇⴻⴱ-ⴷⴷ, ⵄⵇⴻⴱ-ⴷⴷ, ⵎⴰⵃⴻⵏⴷ ⴰⴷ ⴷⴰⵢⴻⵎ ⵏⴻⵅⵥⴰⵔ.”
“ⵎⵉⵏ ⵜⴻⵅⵙⴻⵎ ⴰⴷ ⵜⵥⴰⵔⴻⵎ ⴷⵉ ⵛⵓⵍⴰⵎⵉⵜ?”
“ⵏⴻⵜⵜⴰⵜ ⴰⵎ ⵛⵛⴹⵉⵃ ⵙ ⵏⵏⵓⴱⵜⴰⵜ ⵏ ⵜⵏⴰⵢⴻⵏ ⵏ ⵍⵄⴻⵙⴽⴰⵔⴰⵜ.”
2 “ⵎⴻⵛⵃⴰⵍ ⵛⵏⴰⵏ ⵉⵚⵓⵔⴰⴼ ⵏⵏⴻⵎ ⴷⵉ ⵚⴰⵏⴷⴰⵍⵉⵢⵢⴰⵜ ⵏⵏⴻⵎ,
ⴰ, ⵛⴻⵎ ⵢⴻⵙⵙⵉⵙ ⵏ ⵉⵊⵊ ⵏ ⵡⴻⵛⵔⵉⵎ!
ⴰⵃⵏⵓⵏⵏⵉ ⵏ ⵜⵎⴻⵚⵚⴰⴹⵜ ⵏⵏⴻⵎ ⴰⵎ ⵜⵙⴻⴷⴷⵢⵉⵏ ⵉⵖⵍⴰⵏ ⵜⵜⵔⴰⵃⴻⵏⵜ ⵜⵜⴰⵙⴻⵏⵜ-ⴷⴷ,
ⵚⵚⴻⵏⵄⴻⵜ ⵏ ⵉⴼⴰⵙⵙⴻⵏ ⵏ ⵓⴼⴻⵏⵏⴰⵏ.
3 ⵜⴰⵄⴻⴱⴱⵓⴹⵜ ⵏⵏⴻⵎ ⴰⵎ ⵜⵙⴰⵔⵉⵊⵜ ⵜⴻⵃⵏⵓⵏⵏⵉ,
ⵎⴰⵏⵉ ⵡⴰⵔ ⵉⵜⵜⵅⴻⵚⵚⵉ ⴱⵉⵏⵓ ⵉⵅⴻⴵⴹⴻⵏ.
ⴰⵄⴻⴷⴷⵉⵙ ⵏⵏⴻⵎ ⴷ ⴰⴽⴻⵎⵎⵉⵛ ⵏ ⵉⵔⴷⴻⵏ,
ⵏⵏⴹⴻⵏⵜ ⴰⵙ-ⴷⴷ ⵜⵍⵉⵍⵍⵉⵛⵉⵏ. □
4 ⵉⴷⵎⴰⵔⴻⵏ ⵏⵏⴻⵎ ⴳⴳⵉⵏ ⴰⵎ ⵜⵏⴰⵢⴻⵏ ⵏ ⵉⵖⴰⵢⴹⴻⵏ ⵉⵎⴻⵥⵢⴰⵏⴻⵏ,
ⴰⵎ ⵡⴰⵛⵏⵉⵡⴻⵏ ⵏ ⵜⵖⴰⵢⴹⴻⵜ ⵏ ⵡⴻⵥⵖⴰⵔ.
5 ⵉⵔⵉ ⵏⵏⴻⵎ ⵉⴳⴳⴰ ⴰⵎ ⵚⵚⵓⵎⵄⴻⵜ ⵏ ⵍⵄⴰⵊ,
ⵜⵉⵟⵟⴰⵡⵉⵏ ⵏⵏⴻⵎ ⴰⵎ ⵉⵢⴻⵍⵎⴰⵎⴻⵏ ⵏ ⵃⴰⵛⴱⵓⵏ,
ⵖⴰⵔ ⵜⴻⵡⵡⴰⵔⵜ ⵏ ⴱⴰⵜ-ⵔⴰⴱⴱⵉⵎ,
ⵜⵉⵏⵥⴰⵔⵜ ⵏⵏⴻⵎ ⴰⵎ ⵚⵚⵓⵎⵄⴻⵜ ⵏ ⵍⵓⴱⵏⴰⵏ
ⵉ ⵉⵙⵙⴰⵊⵊⴰⵏ ⵖⴰⵔ ⴷⵉⵎⴰⵛⵇ.
6 ⵜⵉⵡⴰ ⵏⵏⴻⵎ ⵉⴳⴳⴰ ⴰⵥⴻⴵⵉⴼ ⵏⵏⴻⵎ ⴰⵎ ⴽⴰⵔⵎⵉⵍ,
ⴰⵛⴻⵡⵡⴰⴼ ⵏ ⵓⵥⴻⴵⵉⴼ ⵏⵏⴻⵎ ⴰⵎ ⴰⵔⵊⵓⵡⴰⵏⵉ.
ⴰⵊⴻⴵⵉⴷ ⵉⵜⵜⵡⴰⵃⴱⴻⵙ ⴷⴻⴳ ⵉⵎⵓⵥⴰⵔⴻⵏ ⵏⵏⴻⵎ.”
7 “ⵎⴻⵛⵃⴰⵍ ⴷ ⴰⵥⵔⵉ ⵉ ⴷⴰⵢⴻⵎ,
ⵓ ⵎⴻⵛⵃⴰⵍ ⵜⵚⴻⴱⵃⴻⴷ, ⴰ ⵜⴰⵢⵔⵉ,
ⴷⵉ ⴽⵓⵍⵛⵉ ⵎⵉⵏ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵢⴰⵔⵔ ⵎⴻⵥⵔⵉ!”
ⴰⵡⴰⵍ ⵏ ⵢⴻⵙⵍⵉ
8 “ⵜⵉⴷⴷⵉ ⵏⵏⴻⵎ ⵜⴰⵔⵡⴻⵙ ⴷⵉ ⵜⵛⴻⵊⵊⴰⵔⵜ ⵏ ⵜⵉⵏⵉ,
ⵉⴷⵎⴰⵔⴻⵏ ⵏⵏⴻⵎ ⴷⴻⴳ ⵉⵥⴻⴽⴽⵓⵏⴻⵏ ⵏ ⵓⴹⵉⵍ.
9 ⵏⴻⵛⵛ ⵏⵏⵉⵖ: ‘ⴰⴷ ⵏⵢⴻⵖ ⵅ ⵜⵛⴻⵊⵊⴰⵔⵜ ⵏ ⵜⵉⵏⵉ,
ⴰⴷ ⵟⵟⴼⴻⵖ ⴷⵉ ⵍⴻⴼⵔⵓⵄ ⵏⵏⴻⵙ.’
ⵉⴷⵎⴰⵔⴻⵏ ⵏⵏⴻⵎ ⴰⴷ ⵉⵍⵉⵏ ⴰⵎ ⵉⵥⴻⵏⴽⴰⴽ ⵏ ⵓⴹⵉⵍ ⵖⴰⵔ ⵜⵥⴰⵢⴰⵔⵜ,
ⵓ ⵍⴻⴼⵡⴰⵃⴻⵜ ⵏ ⵡⴻⵏⵥⴰⵔⴻⵏ ⵏⵏⴻⵎ ⴰⵎ ⵜⵜⴻⴼⴼⴰⵃⵉⵏ,
10 ⴰⵏⴻⵖ ⵏⵏⴻⵎ ⴰⵎ ⴱⵉⵏⵓ ⵉⵚⴻⴱⵃⴻⵏ ⴰⵟⵟⴰⵙ...”,
“... ⵡⴻⵏⵏⵉ ⵉⵜⵜⵔⴰⵃⴻⵏ ⵏⵉⵛⴰⵏ ⵖⴰⵔ ⵍⵍⵉⴼ ⵉⵏⵓ,
ⵡⴻⵏⵏⵉ ⵉⵜⵜⴰⵔⵔⴰⵏ ⵉⵢⴻⵏⵛⵉⵛⴻⵏ ⵏ ⵢⵉⵏⵏⵉ ⵉⵟⵟⵚⴻⵏ ⴰⴷ ⵏⵀⴻⵥⵥⴻⵏ.”
ⵜⴰⵙⵍⵉⵜ ⵜⴻⵙⵙⵉⵡⴻⵍ ⵅ ⵎⵎⴻⵥⵔⵉ ⵏⵏⴻⵙ ⵉ ⵢⴻⵙⵍⵉ.
11 “ⵏⴻⵛⵛ ⵏ ⵍⵍⵉⴼ ⵉⵏⵓ,
ⵖⴰⵔⵉ ⴷⴷ-ⵉⵜⵜⴰⵙ ⵎⴻⵥⵔⵉ ⵏⵏⴻⵙ.
12 ⴰⵙ-ⴷⴷ, ⵍⵍⵉⴼ ⵉⵏⵓ, ⴻⵊⵊ ⴰⵏⴻⵖ ⴰⴷ ⵏⵓⵢⵓⵔ ⵖⴰⵔ ⵢⴻⵢⵢⴰⵔ,
ⴰⴷ ⵏⴻⵙⵙⴻⵏⵙ ⴷⵉ ⵍⴻⴷⵛⵓⵔ.
13 ⴻⵊⵊ ⴰⵏⴻⵖ ⴰⴷ ⵏⴻⴽⴽⴰⵔ ⵥⵉⵛ ⵃⵉⵎⴰ ⴰⴷ ⵏⵓⵢⵓⵔ ⵖⴰⵔ ⵉⵎⴰⵔⵊⴰⵄⴻⵏ ⵏ ⵓⴹⵉⵍ,
ⴻⵊⵊ ⴰⵏⴻⵖ ⴰⴷ ⵏⵥⴰⵔ, ⵎⴰ ⵜⴰⵥⴰⵢⴰⵔⵜ ⴰⵇⴰ ⵜⴻⵙⵙⵓⴼⴼⵓⵖ,
ⵎⴰ ⵏⵏⵓⵡⵡⴰⵔ ⵏⵏⴻⵙ ⵏⵏⵓⵔⵥⵎⴻⵏ,
ⵎⴰ ⵜⵉⵛⴻⵊⵊⵓⵔⴰ ⵏ ⴰⵔⴻⵎⵎⴰⵏ ⵏⴻⵡⵡⴰⵔⴻⵏⵜ.
ⴷⵉⵏⵏⵉ ⵉ ⵖⴰ ⵡⵛⴻⵖ ⵜⴰⵢⵔⵉ ⵉⵏⵓ.
14 ⵜⵜⵉⴼⴼⴰⵃⵉⵏ ⵏ ⵜⴰⵢⵔⵉ ⴰⵔⵅⵓⵏⵜ ⵉ ⵍⴻⴼⵡⴰⵃ,
ⵓ ⵜⵉⵡⴰ ⵏ ⵜⴻⵡⵡⵓⵔⴰ ⵏⵏⴻⵖ ⴰⵇⴰ ⴷⵉⵏ ⴼⵔⵓⵜⴰⵜ ⵉⵛⴻⵡⵡⴰⵔⴻⵏ,
ⵜⵉⵏⵏⵉ ⵏ ⵟⵟⵔⵉ ⴷ ⵜⵉⵏⵏⵉ ⵉⵜⵜⵡⴰⵅⴻⵎⵎⵍⴻⵏ.
ⴰ ⵍⵍⵉⴼ ⵉⵏⵓ, ⵅⴻⵎⵎⵍⴻⵖ ⵜⴻⵏⵜ ⵉ ⵛⴻⴽ!”