8
1 “ⴰⵅ, ⵎⴰⵄⵍⵉⴽ ⵇⴰⵄ ⵛⴻⴽ ⴷ ⵓⵎⴰ, ⵡⴻⵏⵏⵉ ⵉⵟⵟⴻⴹⴻⵏ ⴷⵉ ⵜⴱⵉⴱⴱⵉⵛⵉⵏ ⵏ ⵢⴻⵎⵎⴰ.
ⵎⴰⵍⴰ ⵓⴼⵉⵖ ⵛⴻⴽ ⴷⵉ ⴱⴰⵔⵔⴰ, ⴰⴷ ⵛⴻⴽ ⵙⵙⵓⴷⵎⴻⵖ,
ⴱⵍⴰ ⵎⴰ ⴷ ⴰⵢⵉ ⵙⵙⴻⵃⵇⴰⵔⴰⵏ.
2 ⵉⵍⵉ ⴰⴷ ⵛⴻⴽ ⵏⴻⴷⵀⴻⵖ, ⴰⴷ ⵛⴻⴽ ⴰⵡⵢⴻⵖ ⵖⴰⵔ ⵜⴰⴷⴷⴰⵔⵜ ⵏ ⵢⴻⵎⵎⴰ,
ⵛⴻⴽ ⴰⴷ ⴰⵢⵉ ⵜⴻⵙⵙⵍⴻⵎⴷⴻⴷ ⴷⵉⵏ.
ⴰⴷ ⴰⵛ ⵡⵛⴻⵖ ⴱⵉⵏⵓ ⵉⵜⵜⴼⵓⵃⴻⵏ ⵙ ⵍⴻⵄⵜⵓⵍ ⴰⴷ ⵜⴻⵙⵡⴻⴷ,
ⴰⵥⴻⵎⵎⵉ ⵏ ⵜⵛⴻⵊⵊⴰⵔⵜ ⵉⵏⵓ ⵏ ⵡⴰⵔⴻⵎⵎⴰⵏ.
3 ⴰⵥⴻⵍⵎⴰⴹ ⵏⵏⴻⵙ ⴰⵇⴰ-ⵜ ⵙⴰⴷⵓ ⵓⵥⴻⴵⵉⴼ ⵉⵏⵓ,
ⵓⵛⴰ ⴰⴼⵓⵙⵉ ⵏⵏⴻⵙ ⵉⴷⴰⵔⵔⴻⵄ ⴰⵢⵉ-ⴷⴷ.
4 ⵏⴻⵛⵛ ⴰⴷ ⴽⴻⵏⵏⵉⵏⵜ ⴰⵔⵔⴻⵖ ⵜⵜⵊⵊⴰⴵⴰⵏⵜ, ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ:
ⵎⴰⵢⴻⵎⵎⵉ ⵉ ⵖⴰ ⵜⵀⴻⵡⵍⴻⵏⵜ ⵜⴰⵢⵔⵉ
ⵏⵉⵖ ⴰⴷ ⵜⵜ-ⵉ-ⴷⴷ-ⵜⴻⵙⵙⴻⴽⴽⴰⵔⴻⵏⵜ,
ⵇⴱⴻⵍ ⵎⴰ ⵜᵉⵜⵜⴻⵅⵙ ⵏⴻⵜⵜⴰⵜ.”
ⵜⴰⵙⵍⵉⵜ ⵜⴻⴼⴼⴻⵖ-ⴷⴷ ⵥⵉ ⵍⴻⵅⵍⴰ ⴰⴽ-ⴷ ⵢⴻⵙⵍⵉ ⵏⵏⴻⵙ
5 “ⵎⵉⵏ ⵜⴻⵄⵏⴰ ⵏⵏⵉ ⴷⵉⵏ ⵉⵜⵜⴳⴻⵄⵄⴰⴷⴻⵏ ⵥⵉ ⵍⴻⵅⵍⴰ,
ⵜᵉⵜⵜⵄⴻⵎⵎⴻⴷ ⵅ ⵍⵍⵉⴼ ⵏⵏⴻⵙ?”
“ⵙⴰⴷⵓ ⵜⵛⴻⵊⵊⴰⵔⵜ ⵏ ⵜⵜⴻⴼⴼⴰⵃⵜ ⴰⵔⵔⴻⵖ ⵎⴻⵥⵔⵉ ⵏⵏⴻⵎ,
ⵎⴰⵏⵉ ⵛⴻⵎ ⴷⴷ-ⵜⴻⵊⵊⴰ ⵢⴻⵎⵎⴰⵎ ⵙ ⵍⴻⵃⵔⵉⵇ ⵏ ⵜⴰⵔⵡⴰ,
ⵎⴰⵏⵉ ⵛⴻⵎ ⴷⴷ-ⵜⴻⵊⵊⴰ ⵜⴻⵏⵏⵉ ⵛⴻⵎ ⴷⴷ-ⵢⵓⵔⵡⴻⵏ.”
6 “ⵙⴰⵔⵙ ⴰⵢⵉ ⴰⵎ ⵟⵟⴰⴱⴻⵄ ⵅ ⵡⵓⵍ ⵏⵏⴻⴽ,
ⴰⵎ ⵟⵟⴰⴱⴻⵄ ⵅ ⵓⵖⵉⵍ ⵏⵏⴻⴽ,
ⵎⴰⵖⴰⵔ ⵜⴰⵢⵔⵉ ⵜⴻⵊⵀⴻⴷ ⴰⵎ ⵍⵎⴻⵡⵜ,
ⵜⵓⵙⵎⵉ ⵜⴻⵇⵙⴻⵃ ⴰⵎ ⵍⴰⵅⴰⵔⵜ.
ⵜⵉⴼⴻⵟⵟⵓⵜⵉⵏ ⵏⵏⴻⵙ ⴷ ⵜⵉⴼⴻⵟⵟⵓⵜⵉⵏ ⵏ ⵜⵎⴻⵙⵙⵉ, ⴰⵇⴰ ⴰⵜⴻⵏⵜ ⴰⵎ ⵓⵛⴻⵄⵄⴰⵍ ⵏ ⵙⵉⴷⵉ.
7 ⴰⵟⵟⴰⵙ ⵏ ⵡⴰⵎⴰⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⵙⵙⵅⴻⵙⵢⴻⵏ ⵜⴰⵢⵔⵉ,
ⵓⵍⴰ ⴷ ⵉⵖⴻⵥⵔⴰⵏ ⵡⴰⵔ ⵜⵜ ⵜⵜⵉⵡⵢⴻⵏ.
ⵡⴰⵅⵅⴰ ⵉⵡⵛⴰ ⵉⵊⵊⴻⵏ ⵉ ⵜⴰⵢⵔⵉ ⵎⴰⵔⵔⴰ ⴰⴳⵍⴰ ⵏ ⵜⴰⴷⴷⴰⵔⵜ ⵏⵏⴻⵙ,
ⴰⴷ ⵜ ⵙⵙⴻⵃⵇⴰⵔⴻⵏ ⴷ ⴰⵙⴻⵃⵇⴰⵔ.”
ⵜⴰⵙⵍⵉⵜ ⴷ ⴰⵢⵜⵎⴰⵙ
8 “ⵏⴻⵛⵛⵉⵏ ⵖⴰⵔⵏⴻⵖ ⵉⵛⵜ ⵏ ⵓⵞⵎⴰⵜⵏⴻⵖ ⵜⴰⵎⴻⵥⵢⴰⵏⵜ,
ⵄⴰⴷ ⵡⴰⵔ ⴷ ⴰⵙ ⴷⴷ-ⴼⴼⵉⵖⴻⵏ ⵉⴷⵎⴰⵔⴻⵏ.
ⵎⵉⵏ ⵉ ⵖⴰ ⵏⴻⴳⴳ ⵉ ⵓⵞⵎⴰⵜⵏⴻⵖ,
ⴷⴻⴳ ⵡⴰⵙⵙ ⵉ ⴷⵉ ⵅⴰⵙ ⵉ ⵖⴰ ⵙⵙⵉⵡⵍⴻⵏ?”
9 “ⵎⴰⵍⴰ ⵏⴻⵜⵜⴰⵜ ⴷ ⵍⵃⵉⴹ,
ⴰⴷ ⵅⴰⵙ ⵏⴻⵙⵙⴱⴻⴷⴷ ⴰⵛⴱⴰⵔ ⴰⵎ ⵉⵛⵜ ⵏ ⵜⴻⵎⵔⵉⵙⵜ ⵏ ⵏⵏⵓⵇⴰⵔⵜ.
ⵎⴰⵍⴰ ⵏⴻⵜⵜⴰⵜ ⴷ ⵜⴰⵡⵡⴰⵔⵜ,
ⴰⴷ ⵜⵜ ⵏⴻⵇⵇⴻⵏ ⵙ ⵜⴼⴻⵍⵡⵉⵏ ⵏ ⵓⴽⴻⵛⵛⵓⴹ ⵏ ⵜⴻⵏⴳⴻⵍⵜ.”
10 “ⵏⴻⵛⵛ ⴷ ⵍⵃⵉⴹ ⵓ ⵉⴷⵎⴰⵔⴻⵏ ⵉⵏⵓ ⴰⵎⴻⵛⵏⴰⵡ ⵍⴱⵓⵔⵊⴰⵜ.
ⵅⴻⵏⵏⵉ ⴷⴻⵡⵍⴻⵖ ⵏⴻⵛⵛ ⴷⵉ ⵜⵉⵟⵟⴰⵡⵉⵏ ⵏⵏⴻⵙ ⴰⵎ ⵜⴻⵏⵏⵉ ⵢⵓⴼⵉⵏ ⵍⴻⵃⵏⴰ.”
ⴰⵃⵡⵉⵛ ⵏ ⵜⵥⴰⵢⴰⵔⵜ ⵏ ⵙⵓⵍⵉⵎⴰⵏ ⴷ ⵡⴻⵃⵡⵉⵛ ⵏ ⵜⵥⴰⵢⴰⵔⵜ ⵏ ⵜⴻⵙⵍⵉⵜ
11 “ⵙⵓⵍⵉⵎⴰⵏ ⵜⵓⵖⴰ ⵖⴰⵔⴻⵙ ⵉⵊⵊ ⵏ ⵓⵎⴰⵔⵊⵓⵄ ⵏ ⵓⴹⵉⵍ ⴷⵉ ⴱⴰⵄⵍ-ⵀⴰⵎⵓⵏ.
ⵉⵡⵛⴰ ⴰⵎⴰⵔⵊⵓⵄ ⵏⵏⵉ ⵉ ⵉⵄⴻⵙⵙⴰⵙⴻⵏ.
ⵉ ⵍⵖⵉⴵⴻⵜ ⵏⵏⴻⵙ ⵇⴰⵄ ⵉⵊⵊ ⵢⵉⵡⵉ-ⴷⴷ ⴰⵍⴻⴼ ⵏ ⵍⴻⵡⵥⴻⵏ ⵏ ⵏⵏⵓⵇⴰⵔⵜ.
12 ⴰⵃⵡⵉⵛ ⵏ ⵓⴹⵉⵍ ⵉⵏⵓ, ⴰⵇⴰ-ⵜ ⵥⵥⴰⵜ ⵉ ⵜⵉⵟⵟⴰⵡⵉⵏ ⵉⵏⵓ.
ⴰⵍⴻⴼ ⵏ ⵍⴻⵡⵥⴻⵏ ⵏ ⵏⵏⵓⵇⴰⵔⵜ ⴰⵇⴰ ⴰⵜⴻⵏ ⵉ ⵛⴻⴽ, ⴰ ⵙⵓⵍⵉⵎⴰⵏ,
ⵓ ⴰⵍⴼⴰⵢⴻⵏ ⵉ ⵉⵄⴻⵙⵙⴰⵙⴻⵏ ⵏ ⵍⵖⵉⴵⴻⵜ ⵥⵥⴰⵢⴻⵙ.”
ⴰⵍⴰⵖⵉ ⵏ ⵢⴻⵙⵍⵉ ⴷ ⵜⴻⵙⵍⵉⵜ
13 “ⴰ ⵛⴻⵎ ⵜⴻⵏⵏⵉ ⵉⵥⴻⴷⴷⵖⴻⵏ ⴷⴻⴳ ⵉⵃⵡⵉⵛⴻⵏ,
ⵉⵄⵛⵉⵔⴻⵏ ⵏⵏⴻⵎ ⵜⵜⴻⵙⵍⴰⵏ ⵙ ⵉⵎⴻⵥⵥⵓⵖⴻⵏ ⵉ ⵜⵎⵉⵊⵊⴰ ⵏⵏⴻⵎ,
ⵇⵇⴰⵔⴻⵏ: ‘ⴻⵊⵊ ⴰⵢⵉ ⴰⴷ ⵜⵜ ⵙⵍⴻⵖ!”
14 “ⴷⴻⵖⵢⴰ, ⴰ ⵍⵍⵉⴼ ⵉⵏⵓ,
ⵉⵍⵉ ⴰⵎ ⵉⵖⴰⵢⴹ ⵏ ⵡⴻⵥⵖⴰⵔ,
ⵏⵉⵖ ⴰⵎ ⵓⵎⴻⵥⵢⴰⵏ ⵏ ⵓⴷⴰⴷⴻⵏ,
ⵅ ⵉⴷⵓⵔⴰⵔ ⵉⵛⵛⵓⵔⴻⵏ ⵙ ⵍⴻⵄⵛⵓⴱ ⵉⵜⵜⴼⵓⵃⴻⵏ.”