1 ⴰⵡⴰⵍⴻⵏ ⵏ ⵓⵎⴱⴰⵔⵔⴻⵃ, ⵎⵎⵉⵙ ⵏ ⴷⴰⵡⵓⴷ, ⴰⵊⴻⴵⵉⴷ ⴷⵉ ⵓⵔⵛⴰⵍⵉⵎ.

2 ⴷ ⵉⴱⴻⵟⵟⴰⵍⴻⵏ ⵇⴰⵄ, ⵉⵇⵇⴰⵔ ⵓⵎⴱⴰⵔⵔⴻⵃ, ⴷ ⵉⴱⴻⵟⵟⴰⵍⴻⵏ ⵇⴰⵄ, ⴰⵇⴰ ⴽⵓⵍⵛⵉ ⴷⵉ ⵍⴱⴰⵟⴻⵍ. ^■   3 ⵎⴰⵏ ⵍⴻⴼⴹⴻⵍ ⵉ ⵉⴵⴰⵏ ⵖⴰⵔ ⴱⵏⴰⴷⴻⵎ ⴷⵉ ⵎⴰⵔⵔⴰ ⴰⵔⴱⴻⵔ ⵉ ⵥⵉ ⵉⵜⵜⵎⴰⵔⵔⴻⵜ ⵙⴰⴷⵓ ⵜⴼⵓⵛⵜ? ^■   4 ⵊⵊⵉⵍ ⵉⴳⴳⵓⵔ, ⵉⵊⵊ ⵏ ⵊⵊⵉⵍ ⵏⵏⴻⵖⵏⵉ ⵉⵜⵜⴰⵙ-ⴷⴷ, ⵎⴰⵛⴰ ⵜⴰⵎⵎⵓⵔⵜ ⴰⴷ ⵜⴻⵇⵇⵉⵎ ⵜⴱⴻⴷⴷ ⵉ ⵍⴻⴱⴷⴰ. ^■   5 ⵜⵏⴻⵇⵇⴰⵔ-ⴷⴷ ⵜⴼⵓⵛⵜ ⵓ ⵜⵖⴻⴵⵉ ⵜⴼⵓⵛⵜ ⵄⴰⵡⴻⴷ, ⵓ ⴰⴷ ⴷⴷ-ⵜⴻⴷⵡⴻⵍ ⴷⴻⵖⵢⴰ ⵖⴰⵔ ⵎⴰⵏⵉⵙ ⵉ ⴷⴷ-ⵜⵏⴻⵇⵇⴰⵔ. 6 ⵏⴻⵜⵜⴰ ⵉⴳⴳⵓⵔ ⵖⴰⵔ ⵍⵊⴰⵏⵓⴱ ⵓ ⵉⵜⵜⴻⵏⵏⴻⴹ ⵄⴰⵡⴻⴷ ⵖⴰⵔ ⵛⵛⴰⵎⴰⵍ. ⴰⵎ ⵉⴳⴳⵓⵔ ⵉⵜⵜⴻⵏⵏⴻⴹ ⵓ ⵉⵜⵜⴻⵏⵏⴻⴹ ⵓⵙⴻⵎⵎⵉⴹ, ⵓ ⵉⵜⵜⵖⵉⵎⴰ ⵓⵚⴻⵎⵎⵉⴹ ⵉⴷⴷⴰⴽⴽⵡⴰⵍ-ⴷⴷ ⵖⴰⵔ ⵓⴷⵓⵡⵡⴰⵔ ⵏⵏⴻⵙ. 7 ⵎⴰⵔⵔⴰ ⵉⵖⴻⵥⵔⴰⵏ ⵜⵜⴽⴻⴱⴱⴰⵏ ⴷⵉ ⵍⴻⴱⵃⴰⵔ, ⵡⴰⵅⵅⴰ ⴰⵎⴻⵏⵏⵉ ⵡⴰⵔ ⵉⵜⵜⵛⵛⵓⵔⵉ ⵍⴻⴱⵃⴰⵔ. ⵖⴰⵔ ⵎⴰⵏⵉⵙ ⴷⴷ-ⵜⵜⴰⵥⵥⵍⴻⵏ ⵉⵖⴻⵥⵔⴰⵏ, ⴷⵉⵏⵏⵉ ⵜⵜⵖⵉⵎⴻⵏ ⵜⵜⴰⵥⵥⵍⴻⵏ ⵄⴰⵡⴻⴷ. ^■   8 ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⴳⴳⵓⵔⴻⵏⵜ ⴱⵍⴰ ⵇⴻⵟⵟⵓ, ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵥⴻⵎⵎⴰⵔ ⴰⴷ ⵅⴰⵙ ⵢⵉⵏⵉ ⵛⴰ. ⵄⴻⵎⵎⴰⵔⵚ ⵜⵉⵟⵟ ⴰⴷ ⵜⴻⵊⵊⴰⵡⴻⵏ ⵥⴻⴳ ⵡⴻⵥⵔⵉ ⵓⵛⴰ ⴰⵎⴻⵥⵥⵓⵖ ⵄⴻⵎⵎⴰⵔⵚ ⴰⴷ ⵉⵊⵊⴰⵡⴻⵏ ⵥⴻⴳ ⵓⵜⴻⵙⵍⵉ. 9 ⵎⵉⵏ ⵜⵓⵖⴰ ⵉⴵⴰⵏ ⴰⴷ ⵢⵉⵍⵉ, ⵎⵉⵏ ⵉⵜⵜⵡⴰⴳⴳⴻⵏ ⴰⴷ ⵉⵜⵜⵡⴰⴳⴳ ⵄⴰⵡⴻⴷ. ⵡⴰⵔ ⴷⵉⵏ ⵉⴵⵉ ⵊⴷⵉⴷ ⵙⴰⴷⵓ ⵜⴼⵓⵛⵜ. ^■  

10 ⵎⴰ ⴰⵇⴰ ⴷⵉⵏ ⵛⴰ ⵏ ⵍⵃⴰⵊⵊⴻⵜ ⵇⵇⴰⵔⴻⵏ ⵅⴰⵙ: “ⵅⵥⴰⵔ, ⵎⴰⵏ ⴰⵢⴰ ⵏ ⵊⴷⵉⴷ!”? ⴰⵇⴰ-ⵜⵜ ⴷⵉⵏ ⴷⴻⴳ ⵉⴽⵓⴷⴻⵏ ⵏⵏⵉ ⵜⵓⵖⴰ ⵉⴵⴰⵏ ⵇⴱⴻⵍ ⵉ ⵏⴻⵛⵛⵉⵏ.

11 ⵡⴰⵔ ⴵⵉⵏ ⴷ ⵉⵅⴰⵔⵔⵉⵚⴻⵏ ⵅ ⵢⴻⵏⵏⵉ ⵜⵓⵖⴰ ⴷⵉⵏ ⵉⵎⴻⵥⵡⵓⵔⴰ ⵓⵍⴰ ⵅ ⵢⴻⵏⵏⵉ ⵉ ⵖⴰ ⵢⵉⵍⵉⵏ ⴷ ⵉⵏⴻⴳⴳⵓⵔⴰ ⵏⵏⵉ ⴷⴷ ⵖⴰ ⵢⴰⵙⴻⵏ ⵄⴰⴷ, ⵓⵍⴰ ⵅ ⵢⵉⵏⴰ ⵡⴰⵔ ⵜⵜⵉⵍⵉⵏ ⵉⵅⴰⵔⵔⵉⵚⴻⵏ ⵖⴰⵔ ⵢⴻⵏⵏⵉ ⴷⴷ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵙⴻⵏ ⵄⴰⴷ.

12 ⵏⴻⵛⵛ, ⴰⵎⴱⴰⵔⵔⴻⵃ, ⵜⵓⵖⴰ ⴰⵢⵉ ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ, ⴷⵉ ⵓⵔⵛⴰⵍⵉⵎ.

13 ⵏⴻⵛⵛ ⵜⵓⵖⴰ ⴽⴽⵙⴻⵖ ⴷⴻⴳ ⵡⵓⵍ ⵉⵏⵓ ⴰⴷ ⴰⵔⵥⵓⵖ ⵓ ⴰⴷ ⴱⴻⵇⵇⵛⴻⵖ ⵙ ⵜⵉⵖⵉⵜ ⴷⵉ ⵎⴰⵔⵔⴰ ⵎⵉⵏ ⵉⵎⵙⴰⵔⴻⵏ ⵙⴰⴷⵓ ⵓⵊⴻⵏⵏⴰ. ⵎⴰⵏ ⴰⵢⴰ ⴷ ⵉⵊⵊ ⵏ ⵛⵛⵖⴻⵍ ⵉⵡⵄⴰⵔ, ⵉⵡⵛⴰ ⵉ-ⵜ ⴰⵔⴻⴱⴱⵉ ⵉ ⵜⴰⵔⵡⴰ ⵏ ⴱⵏⴰⴷⴻⵎ ⵃⵉⵎⴰ ⴰⴷ ⴷⴰⵢⴻⵙ ⵍⵀⴰⵏ.

14 ⵏⴻⵛⵛ ⵥⵔⵉⵖ ⵎⴰⵔⵔⴰ ⵜⵉⵎⴻⴳⴳⴰ ⵉ ⵉⵜⵜⵡⴰⴳⴳⴻⵏ ⵙⴰⴷⵓ ⵜⴼⵓⵛⵜ, ⵓ ⵅⵥⴰⵔ, ⵎⴰⵔⵔⴰ ⴰⵢⴰ ⵜⵓⵖⴰ-ⵜ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.

15 ⵎⵉⵏ ⵉⴼⴰⵔⵖⴻⵏ ⵡⴰⵔ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵙⴻⴳⴳⴻⵎ, ⵓ ⵎⵉⵏ ⵉⵜⵜⵅⴻⵚⵚⴰⵏ ⵡⴰⵔ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵃⵙⴻⴱ.

16 ⵏⴻⵛⵛ ⵙⵙⵉⵡⵍⴻⵖ ⴰⴽ-ⴷ ⵡⵓⵍ ⵉⵏⵓ, ⵏⵏⵉⵖ: “ⵅⵥⴰⵔ, ⵏⴻⵛⵛ ⵙⵙⴻⵎⵖⴰⵔⴻⵖ ⵜⵉⵖⵉⵜ ⵉⵏⵓ ⵓⵛⴰ ⴰⵔⵏⵉⵖ ⴷⴰⵢⴻⵙ, ⵎⴰⵀⵓ ⵎⴰⵔⵔⴰ ⵉⵏⵏⵉ ⵜⵓⵖⴰ ⵉⵥⴻⴷⴷⵖⴻⵏ ⴷⵉ ⵓⵔⵛⴰⵍⵉⵎ ⵇⴱⴻⵍ ⵉⵏⵓ. ⵓⵍ ⵉⵏⵓ ⵉⵥⵔⴰ ⴰⵟⵟⴰⵙ ⵏ ⵜⵉⵖⵉⵜ ⴷ ⵜⵓⵙⵙⵏⴰ.

17 ⵏⴻⵛⵛ ⴳⴳⵉⵖ ⵓⵍ ⵉⵏⵓ ⵎⴰⵃⴻⵏⴷ ⴰⴷ ⴷⴷ-ⴰⵡⵢⴻⵖ ⵜⵉⵖⵉⵜ, ⵎⴰⵃⴻⵏⴷ ⴰⴷ ⵙⵙⵏⴻⵖ ⵜⵓⴱⴱⵓⵀⴻⵍⵢⴰ ⴷ ⵓⴼⵓⵛⵛⴻⵃ. ⵏⴻⵛⵛ ⵓⴼⵉⵖ ⵓⵍⴰ ⴷ ⵎⴰⵏ ⴰⵢⴰ ⴰⵇⴰ ⴷ ⴰⴹⴼⴰⵔ ⵏ ⵓⵙⴻⵎⵎⵉⴹ.

18 ⵎⴰⵖⴰⵔ ⴷⴻⴳ ⵡⴰⵟⵟⴰⵙ ⵏ ⵜⵉⵖⵉⵜ ⴷⵉⵏ ⴰⵟⵟⴰⵙ ⵏ ⵍⵀⴻⵎⵎ ⵓ ⵡⴻⵏⵏⵉ ⵢⴰⵔⴻⵏⵏⵉⵏ ⴷⵉ ⵜⵓⵙⵙⵏⴰ, ⵢⴰⵔⴻⵏⵏⵉ ⴷⴻⴳ ⵡⴻⵎⵏⵓⵙ.