ⴰⵡⴰⵍⴻⵏ ⵉⵡⴻⵥⵏⴻⵏ
1
1 ⴰⵡⴰⵍⴻⵏ ⵉⵡⴻⵥⵏⴻⵏ ⵏ ⵙⵓⵍⵉⵎⴰⵏ, ⵎⵎⵉⵙ ⵏ ⴷⴰⵡⵓⴷ, ⴰⵊⴻⴵⵉⴷ ⵏ ⵉⵙⵔⴰⵉⵍ, 2 ⵃⵉⵎⴰ ⴰⴷ ⵉⵙⵙⴻⵏ ⴱⵏⴰⴷⴻⵎ ⵜⵉⵖⵉⵜ ⴷ ⵜⵜⴰⵔⴱⵉⵢⵢⴻⵜ,
ⵃⵉⵎⴰ ⴰⴷ ⵉⴼⵀⴻⵎ ⴰⵡⴰⵍⴻⵏ ⵛⵛⵓⵔⴻⵏ ⵙ ⵍⴻⴼⵀⴰⵎⴻⵜ,
3 ⵃⵉⵎⴰ ⴰⴷ ⵉⵇⴱⴻⵍ ⵜⵜⴰⵔⴱⵉⵢⵢⴻⵜ ⴷ ⵍⴻⵄⵇⴻⵍ,
ⵜⴰⵙⴻⴳⴷⴰ ⴷ ⵍⵃⴻⵇⵇ ⴷ ⵍⴻⵚⴼⴰⵢⴻⵜ,
4 ⵃⵉⵎⴰ ⴰⴷ ⵉⵡⵛ ⴰⵙⴼⴰⵔⵥ ⵉ ⵉⵃⴰⴼⵉⵢⵢⴻⵏ,
ⵜⵓⵙⵙⵏⴰ ⴷ ⵓⵃⴰⴷⵓⵔ ⵉ ⵓⵃⵓⴷⵔⵉ.
5 ⴻⵊⵊ ⴰⵎⵉⵖⵉⵙ ⴰⴷ ⵉⵙⴻⵍ ⵓ ⴰⴷ ⵢⴰⵔⵏⵉ ⴷⵉ ⵍⴻⴼⵀⴰⵎⴻⵜ ⵏⵏⴻⵙ,
ⴻⵊⵊ ⵡⴻⵏⵏⵉ ⵉⴼⴻⵀⵀⵎⴻⵏ ⴰⴷ ⵉⴽⵙⴻⴱ ⵍⴻⵇⵏⴰⵄⴻⵜ,
6 ⵃⵉⵎⴰ ⴰⴷ ⵉⴼⵀⴻⵎ ⴰⵡⴰⵍ ⵉⵡⴻⵥⵏⴻⵏ ⴷ ⵍⵎⴰⵜⴰⵍ,
ⴰⵡⴰⵍⴻⵏ ⵏ ⵉⵎⵉⵖⵉⵙⴻⵏ ⴷ ⵍⴻⵎⵄⴰⵏⵉ ⵉⵏⵏⵓⴼⴰⵔⴻⵏ ⵏⵙⴻⵏ.
7 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⴱⴻⴷⴷⵓ ⵏ ⵜⵓⵙⵙⵏⴰ,
ⵎⴰⵛⴰ ⵉⴱⵓⵀⴰⵍⵉⵢⵢⴻⵏ ⵙⵙⴻⵃⵇⴰⵔⴰⵏ ⵜⵉⵖⵉⵜ ⴷ ⵜⵜⴰⵔⴱⵉⵢⵢⴻⵜ. ■
8 ⵙⴻⵍ, ⴰ ⵎⵎⵉ, ⵖⴰⵔ ⵜⵜⴰⵔⴱⵉⵢⵢⴻⵜ ⵏ ⴱⴰⴱⴰⵛ,
ⵡⴰⵔ ⵜⵜⴰⴳⵉ ⵛⴰ ⵜⴰⵖⵓⵔⵉ ⵏ ⵢⴻⵎⵎⴰⵛ,
9 ⵎⴰⵖⴰⵔ ⵏⵉⵜⴻⵏⵜⵉ ⴰⴷ ⵉⵍⵉⵏⵜ ⴷ ⵜⵜⴰⵊ ⵉⵛⵏⴰ ⵅ ⵓⵥⴻⴵⵉⴼ ⵏⵏⴻⴽ,
ⴷ ⵜⵙⴻⴷⴷⵢⵉⵏ ⵉⵥⴻⵡⵡⵇⴻⵏ ⵉ ⵢⵉⵔⵉ ⵏⵏⴻⴽ.
10 ⴰ ⵎⵎⵉ ⵉⵏⵓ, ⵎⴰⵍⴰ ⵅⵙⴻⵏ ⵉⵎⴻⴷⵏⴰⴱ ⴰⴷ ⵛⴻⴽ ⵖⵡⴰⵏ,
ⵡⴰⵔ ⴷ ⴰⵙⴻⵏ ⵜⵜⴻⴳⴳ ⵛⴰ ⴰⵔⵔⴰⵢ.
11 ⵎⴰⵍⴰ ⵏⵉⵜⵏⵉ ⵇⵇⴰⵔⴻⵏ:
“ⵓⵢⵓⵔ ⴰⴽⵉⴷⵏⴻⵖ, ⴻⵊⵊ ⴰⴷ ⵏⵃⴰⵎⴰ ⵉ ⵓⵙⵉⵥⵥⴻⵍ ⵏ ⵉⴷⴰⵎⵎⴻⵏ,
ⴻⵊⵊ ⴰⵏⴻⵖ ⴰⴷ ⵏⴻⴳⴳ ⵉⵛⵜ ⵏ ⵜⴻⵅⵛⴻⴼⵜ ⵉ ⵓⵎⴻⵥⴷⴰⴳ, ⴱⵍⴰ ⵙⵙⵉⴱⴱⴻⵜ.
12 ⴻⵊⵊ ⴰⵏⴻⵖ ⴰⴷ ⵜⴻⵏ ⵏⵚⴰⵔⴹ ⴰⵎ ⴷⴷⴰⵔⴻⵏ, ⴰⵎ ⵎⴰⵎⵎⴻⵛ ⵜⵚⴰⵔⴻⴹ ⵍⴰⵅⴰⵔⵜ,
ⴰⵎ ⴽⴻⵎⵍⴻⵎ, ⴰⵎⴻⵛⵏⴰⵡ ⵢⴻⵏⵏⵉ ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.
13 ⴰⴷ ⵏⴰⴼ ⵎⴰⵔⵔⴰ ⵍⴻⵃⵡⴰⵢⴻⵊ ⵢⵉⵖⵍⴰⵏ ⴰⵟⵟⴰⵙ,
ⵜⵓⴷⵔⵉⵏ ⵏⵏⴻⵖ ⴰⴷ ⵜⴻⵏⵜ ⵏⴻⵛⵛⵓⵔ ⵙ ⵜⴽⴻⵛⵛⴰⴹⵜ.
14 ⵛⴻⴽ ⴰⴷ ⵜⴻⵏⴹⴰⵔⴻⴷ ⵜⴰⵇⴻⴷⴷⵓⵃⵜ ⵏⵏⴻⴽ ⵊⴰⵔ ⴰⵏⴻⵖ,
ⴰⴷ ⵖⴰⵔⵏⴻⵖ ⵜⵉⵍⵉ ⵎⴰⵔⵔⴰ ⵉⵛⵜ ⵏ ⵜⴻⵛⵢⴰⵔⵜ.”
15 ⴰ ⵎⵎⵉ ⵉⵏⵓ, ⵡⴰⵔ ⴽⵉⴷⵙⴻⵏ ⴳⴳⵓⵔ ⴷⴻⴳ ⵡⴻⴱⵔⵉⴷ,
ⵙⵉⴳⴳⵯⴻⵊ ⴰⴹⴰⵔ ⵏⵏⴻⴽ ⵅ ⵓⵎⴻⵙⵔⵓⵇ ⵏⵙⴻⵏ,
16 ⵎⴰⵖⴰⵔ ⵉⴹⴰⵔⴻⵏ ⵏⵙⴻⵏ ⵜⵜⴰⵥⵥⵍⴻⵏ ⵖⴰⵔ ⵍⵖⴰⵔ,
ⵓ ⵏⵉⵜⵏⵉ ⵜⵜⵇⴻⴵⵉⵇⴻⵏ ⵎⴰⵃⴻⵏⴷ ⴰⴷ ⵙⵙⵉⵥⵥⵍⴻⵏ ⵉⴷⴰⵎⵎⴻⵏ. ■
17 ⵎⴰⵖⴰⵔ ⵙ ⵍⴱⴰⵟⴻⵍ ⴰⴷ ⵜᵉⵜⵜⵡⴰⴱⴻⵥⵥⴻⵄ ⵜⵔⴰⵛⵛⴰ,
ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵎⵉⵏ ⵖⴰⵔ ⵉⴵⴰ ⵡⴰⴼⵔⵉⵡⴻⵏ,
18 ⵎⴰⵖⴰⵔ ⵏⵉⵜⵏⵉ ⵜⵜⵃⴰⵎⴰⵏ ⵉⴷⴰⵎⵎⴻⵏ ⵏ ⵢⵉⵅⴻⴼ ⵏⵙⴻⵏ,
ⵓ ⵜⵜⴻⴳⴳⴻⵏ ⵜⴰⵅⵛⴻⴼⵜ ⵉ ⵍⴻⵄⵎⵓⵔ ⵏ ⵢⵉⵅⴻⴼ ⵏⵙⴻⵏ.
19 ⴰⵎⵎⵓ ⵉ ⵉⴵⴰⵏ ⵉⴱⵔⵉⴷⴻⵏ ⵏ ⴽⵓⵍ ⵉⵊⵊ ⵡⴻⵏⵏⵉ ⵉⵜⵜⴰⵥⵥⵍⴻⵏ ⵖⴰⵔ ⴰⵔⴱⴻⵃ,
ⴰⵇⴰ ⴰⵢⴰ ⵉⵜⵜⴻⵟⵟⴻⴼ ⵍⴻⵄⵎⴰⵔ ⵏ ⵙⵉⴷⵉⵙ. ■
20 ⵜⵉⵖⵉⵜ ⵜⴱⴰⵔⵔⴻⵃ ⵙ ⵊⵊⵀⴻⴷ ⴷⵉⵀⴰ ⴱⴰⵔⵔⴰ,
ⵜⴻⵙⵙⴳⴻⵄⵄⴻⴷ ⵜⵎⵉⵊⵊⴰ ⵏⵏⴻⵙ ⴷⴻⴳ ⵡⴰⵥⵥⴰⵢⴻⵏ.
21 ⵎⴰⵏⵉ ⵉⴱⴷⴰ ⵍⵀⴰⵔⴰⵊ, ⵜᵉⵜⵜⴱⴰⵔⵔⴰⵃ ⵏⴻⵜⵜⴰⵜ,
ⵖⴰⵔ ⵡⴰⴷⴰⴼⴻⵏ ⵏ ⵜⴻⵡⵡⵓⵔⴰ ⵏ ⵜⴻⵏⴷⵉⵏⵜ ⵜⴻⵙⵙⴰⵡⴰⵍ ⴰⵡⴰⵍⴻⵏ ⵏⵏⴻⵙ.
22 “ⴰⵍ ⵎⴻⵍⵎⵉ ⵉ ⵖⴰ ⵇⵇⵉⵎⴻⵏ ⵉⵃⴰⴼⵉⵢⵢⴻⵏ ⵜⵜⴻⵅⵙⴻⵏ ⵜⴰⵇⵓⴱⴱⴰⵏⴻⵛⵜ,
ⴰⵍ ⵎⴻⵍⵎⵉ ⵉ ⴷ ⴰⵙⴻⵏ ⵉ ⵖⴰ ⵉⵄⵊⴻⴱ ⵓⵃⴻⵛⵛⵉ ⵉ ⵉⵎⴻⵙⵜⴻⵀⵥⴰⵢⴻⵏ,
ⵓ ⴰⵍ ⵎⴻⵍⵎⵉ ⵉ ⵖⴰ ⵛⴰⵔⵀⴻⵏ ⵉⴱⵓⵀⴰⵍⵉⵢⵢⴻⵏ ⵜⵓⵙⵙⵏⴰ?
23 ⴷⴻⵡⵍⴻⵎ ⵖⴰⵔ ⵓⵡⴻⴱⴱⴻⵅ ⵉⵏⵓ!
ⵅⵥⴰⵔⴻⵎ, ⵏⴻⵛⵛ ⴰⴷ ⵅⴰⵡⴻⵎ ⵙⵙⴼⴰⵔⵔⵖⴻⵖ ⴰⵔⵔⵓⵃ ⵉⵏⵓ,
ⴰⵡⴰⵍⴻⵏ ⵉⵏⵓ ⴰⴷ ⴰⵡⴻⵎ ⵜⴻⵏ ⵄⴻⵍⵎⴻⵖ.”
24 “ⴰⵇⴰ ⵥⴻⵄⵎⴰ ⵍⴰⵖⵉⵖ ⵓ ⴽⴻⵏⵏⵉⵡ ⵡⴰⵔ ⵜⴻⵅⵙⴻⵎ,
ⵙⵙⵡⵉⵥⵥⴹⴻⵖ ⵏⴻⵛⵛ ⴰⴼⵓⵙ ⵉⵏⵓ, ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⴷ ⴰⵙ ⵉⵃⴻⴽⴽⴰⵔ. ■
25 ⵜⴻⵏⴹⴰⵔⴻⵎ ⵛⵛⵡⴰⵔ ⵉⵏⵓ,
ⴰⵡⴻⴱⴱⴻⵅ ⵉⵏⵓ ⵡⴰⵔ ⵜ ⵜⴻⵇⴱⵉⵍⴻⵎ.
26 ⵙ ⵓⵢⴻⵏⵏⵉ ⵓⵍⴰ ⴷ ⵏⴻⵛⵛ ⴰⴷ ⴹⴻⵃⵛⴻⵖ ⵅ ⵓⴹⴻⵢⵢⴻⵄ ⵏⵡⴻⵎ,
ⵏⴻⵛⵛ ⴰⴷ ⵥⵥⴰⵢⵡⴻⵎ ⵙⵜⴻⵀⵥⴻⵖ ⵅⵎⵉ ⴷⴷ ⵖⴰ ⵢⴰⵙ ⵓⵏⴻⵅⵍⵉⵄ ⵏⵡⴻⵎ,
27 ⵅⵎⵉ ⴷⴷ ⵖⴰ ⵢⴰⵙ ⵓⵏⴻⵅⵍⵉⵄ ⵏⵡⴻⵎ ⴰⵎ ⵢⵉⵊⵊ ⵏ ⵓⵔⴻⴷⴷⴻⴵ,
ⴰⴹⴻⵢⵢⴻⵄ ⵏⵡⴻⵎ ⴰⵎ ⵉⵛⵜ ⵏ ⵜⵃⴰⵔⵢⴰⴹⵜ,
ⵅⵎⵉ ⵅⴰⵡⴻⵎ ⴷⴷ ⵖⴰ ⵜⴻⵡⴹⴰ ⵍⴻⵃⵚⴰⵔⴻⵜ ⴷ ⵜⴻⴳⴳⵯⵓⴷⵉ. ■
28 ⵅⴻⵏⵏⵉ ⴰⴷ ⵅⴰⴼⵉ ⴷⴷ-ⵍⴰⵖⴰⵏ, ⵎⴰⵛⴰ ⵏⴻⵛⵛ ⵡⴰⵔ ⴷⴷ-ⵜⵜⴰⵔⵔⵉⵖ,
ⴰⴷ ⵅⴰⴼⵉ ⴰⵔⵥⵓⵏ, ⵎⴰⵛⴰ ⵡⴰⵔ ⴷ ⴰⵢⵉ ⵜⵜⵉⴼⴻⵏ,
29 ⵎⵉⵏⵥⵉ ⵏⵉⵜⵏⵉ ⵛⴰⵔⵀⴻⵏ ⵜⵓⵙⵙⵏⴰ,
ⵓ ⵡⴰⵔ ⵉⵅⴹⴰⵔⴻⵏ ⴰⴷ ⵟⵟⴼⴻⵏ ⴷⵉ ⵜⵉⴳⴳⵯⵓⴷⵉ ⵏ ⵙⵉⴷⵉ.
30 ⵏⵉⵜⵏⵉ ⵡⴰⵔ ⵅⵙⴻⵏ ⵛⴰ ⵍⴻⵛⵡⴰⵔ ⵉⵏⵓ,
ⵎⴰⵔⵔⴰ ⴰⵡⴻⴱⴱⴻⵅ ⵉⵏⵓ ⵏⴹⴰⵔⴻⵏ ⵜ.
31 ⵏⵉⵜⵏⵉ ⴰⴷ ⵛⵛⴻⵏ ⵥⵉ ⵍⵖⵉⴵⴻⵜ ⵏ ⵡⴻⴱⵔⵉⴷ ⵏⵙⴻⵏ,
ⵓ ⴰⴷ ⵊⵊⵉⵡⵏⴻⵏ ⵙ ⵉⵅⴰⵔⵔⵉⵚⴻⵏ ⵏ ⵢⵉⵅⴻⴼ ⵏⵙⴻⵏ,
32 ⵎⵉⵏⵥⵉ ⵓⴼⵓⵖ ⵏ ⵉⵃⴰⴼⴻⵢⵢⴻⵏ ⵅ ⵡⴻⴱⵔⵉⴷ ⴰⴷ ⵜⴻⵏ ⵉⵏⴻⵖ,
ⵓ ⴰⴼⵍⴰⵃ ⵏ ⵉⴱⵓⵀⴰⵍⵉⵢⵢⴻⵏ ⴰⴷ ⵜⴻⵏ ⵉⵙⵙⵀⴻⵍⵍⴻⴽ.
33 ⵡⵉ ⵖⴰⵔⵉ ⵉ ⵖⴰ ⵉⵙⵍⴻⵏ, ⴰⴷ ⵉⵥⴷⴻⵖ ⴷⵉ ⵍⴰⵎⴰⵏ,
ⴰⴷ ⵢⴰⵔⴻⵢⵢⴻⵃ ⵥⴻⴳ ⵓⵏⴻⵅⵍⵉⵄ ⵏ ⵜⵓⵄⴻⴼⴼⵏⴰ.”