ⵉⵥⵍⵉ ⵅ ⵉⵥⵍⴰⵏ
ⵎⵎⴻⵥⵔⵉ ⵏ ⵜⴻⵙⵍⵉⵜ ⵉ ⵢⴻⵙⵍⵉ
1
1 ⵉⵥⵍⵉ ⵅ ⵉⵥⵍⴰⵏ ⵏⵏⵉ ⵉⴵⴰⵏ ⵏ ⵙⵓⵍⵉⵎⴰⵏ. 2 “ⴻⵊⵊ ⵉ-ⵜ ⴰⴷ ⴰⵢⵉ ⵉⵙⵙⵓⴷⴻⵎ ⵙ ⵉⵙⵓⴷⵉⵎⴻⵏ ⵏ ⵓⵇⴻⵎⵎⵓⵎ ⵏⵏⴻⵙ,
ⵎⵉⵏⵥⵉ ⵜⴰⵢⵔⵉ ⵏⵏⴻⴽ ⵃⵙⴻⵏ ⵥⵉ ⴱⵉⵏⵓ.
3 ⵍⴻⴼⵡⴰⵃⴻⵜ ⵏ ⵥⵥⴻⵛⵜ ⵏⵏⴻⴽ ⵜⴻⵛⵏⴰ,
ⵉⵙⴻⵎ ⵏⵏⴻⴽ ⴰⵎ ⵥⵥⴻⵛⵜ ⵉⵥⴻⴵⵄⴻⵏ,
ⵙ ⵓⵢⴰ ⵜⵜⴻⵅⵙⴻⵏⵜ ⵛⴻⴽ ⵜⴻⵄⵥⴰⵔⵉⵢⵢⵉⵏ.
4 ⵊⴱⴻⴷ ⴰⵢⵉ ⴰⵡⴰⵔⵏⵉ ⴰⵛ, ⵏⴻⵛⵛⵉⵏ ⴰⴷ ⵏⴰⵥⵥⴻⵍ ⴰⵡⴰⵔⵏⵉ ⴰⵛ!
ⴰⵊⴻⴵⵉⴷ ⵉⵏⴷⴻⵀ ⴰⵢⵉ ⴷⴻⴳ ⵉⵅⵅⴰⵎⴻⵏ ⵏⵏⴻⵙ.
ⴻⵊⵊ ⴰⵏⴻⵖ ⴰⴷ ⵏⴰⵔⵛⴻⵇ ⵓ ⴰⴷ ⵥⵥⴰⵢⴻⴽ ⵏⴼⴰⵔⵃ,
ⴰⴷ ⵏⴻⵄⵇⴻⵍ ⵅ ⵜⴰⵢⵔⵉ ⵏⵏⴻⴽ
ⴽⵜⴰⵔ ⵅ ⵎⵉⵏ ⵖⴰ ⵏⴻⵄⵇⴻⵍ ⵅ ⴱⵉⵏⵓ.
ⵏⵉⵛⴰⵏ ⵜⵜⴻⵅⵙⴻⵏⵜ ⵛⴻⴽ.”
5 “ⴷ ⵜⴰⴱⴰⵔⵛⴰⵏⵜ ⵏⴻⵛⵛ, ⵓ ⵚⴻⴱⵃⴻⵖ,
ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ,
ⴰⵎ ⵜⵇⵉⴹⵓⵏⵉⵏ ⵏ ⵇⵉⴷⴰⵔ,
ⴰⵎ ⵍⵉⵥⴰⵔⴰⵜ ⵏ ⵙⵓⵍⵉⵎⴰⵏ.
6 ⵡⴰⵔ ⴷ ⴰⵢⵉ ⵅⴻⵥⵥⴰⵔⴻⵏⵜ ⴰⵎⵎⵓ,
ⵎⵉⵏⵥⵉ ⵏⴻⵛⵛ ⴱⴱⴰⵔⵛⵏⴻⵖ,
ⵎⵉⵏⵥⵉ ⵜⴻⵙⵙⴻⵛⵎⴻⴹ ⴰⵢⵉ ⵜⴼⵓⵛⵜ,
ⵉⵃⴻⵏⵊⵉⵔⴻⵏ ⵏ ⵢⴻⵎⵎⴰ ⵜⵓⵖⴰ ⵅⴻⵢⵢⵇⴻⵏ ⵅⴰⴼⵉ,
ⵊⵊⵉⵏ ⴰⵢⵉ ⴰⴷ ⵃⴹⵉⵖ ⵉⵎⴰⵔⵊⴰⵄⴻⵏ ⵏ ⵓⴹⵉⵍ.
ⴰⵎⴰⵔⵊⴻⵄ ⵏ ⵢⵉⵅⴻⴼ ⵉⵏⵓ ⵡⴰⵔ ⵜ ⵃⴹⵉⵖ ⵛⴰ.”
7 “ⵛⴻⴽ, ⵡⴻⵏⵏⵉ ⵉⵜⵜⴻⵅⵙ ⴱⵓⵃⴱⴻⵍ ⵉⵏⵓ, ⵉⵏⵉ ⴰⵢⵉ,
ⵎⴰⵏⵉ ⵜⴰⵔⴻⴽⴽⵡⴻⵙⴻⴷ,
ⵎⴰⵏⵉ ⵜⴻⵙⵙⴰⵔⴻⵢⵢⴰⵃⴻⴷ ⵜⴰⵃⵉⵎⴰⵔⵜ ⵖⴰⵔ ⵟⵃⴰ ⵏ ⵓⵥⵉⵍ,
ⵎⵉⵏⵥⵉ ⵉ ⵓⵎⵉ ⵖⴰ ⵉⵍⵉⵖ ⴰⵎ ⵜⴻⵏⵏⵉ ⵉⵃⴻⵊⴱⴻⵏ
ⵖⴰⵔ ⵜⵃⵉⵎⵔⵉⵡⵉⵏ ⵏ ⵉⵎⵄⴰⵛⴰⵔⴻⵏ ⵏⵏⴻⴽ?”
8 “ⵎⴰⵍⴰ ⵛⴻⵎ ⵡⴰⵔ ⵜ ⵜⴻⵙⵙⵉⵏⴻⴷ,
ⵛⴻⵎ ⵜⴻⵏⵏⵉ ⵉⵛⵏⴰⵏ ⵇⴰⵄ ⵊⴰⵔ ⵜⴻⵎⵖⴰⵔⵉⵏ,
ⵅⴻⵏⵏⵉ ⴼⴼⴻⵖ, ⴹⴼⴰⵔ ⵍⴰⵜⴰⵔ ⵏ ⵡⵓⴵⵉ
ⵓ ⴰⵔⵡⴻⵙ ⵜⵉⵖⴰⴹⵜⵉⵏ ⵏⵏⴻⵎ ⵎⴰⵏⵉ ⵥⴻⴷⴷⵖⴻⵏ ⵉⵎⴻⴽⵙⴰⵡⴻⵏ.” □
ⵍⴻⵖⵏⵓⵊ ⵏ ⵢⴻⵙⵍⵉ ⴷ ⵜⴻⵙⵍⵉⵜ ⵙ ⵏⵏⵓⴱⵜⴰⵜ
9 “ⵙⵙⴻⵎⵇⵓⴷⴷⵉⵖ ⵛⴻⵎ ⴰⴽ-ⴷ ⵓⵢⵉⵙ ⵥⵥⴰⵜ ⵉⴽⴰⵔⵔⵓⵜⴻⵏ ⵏ ⴼⵉⵔⵄⵓⵏ,
ⴰ ⵜⴰⵎⴻⴷⴷⵓⴽⴽⴻⵞ ⵉⵏⵓ.
10 ⵎⴻⵛⵃⴰⵍ ⵚⴻⴱⵃⴻⵏ ⵉⵎⴻⴳⴳⵉⵥⴻⵏ ⵏⵏⴻⵎ ⵊⴰⵔ ⵜⵙⴻⴷⴷⵢⵉⵏ,
ⵉⵔⵉ ⵏⵏⴻⵎ ⵊⴰⵔ ⵉⴼⵉⵍⴰⵏ ⵙ ⵜⵢⴰⵇⵓⵜⵉⵏ.
11 ⴰⴷ ⴰⵎ ⵏⴻⴳⴳ ⵜⵉⵙⴻⴷⴷⵢⵉⵏ ⵏ ⵡⵓⵔⴻⵖ,
ⴰⴽ-ⴷ ⵜⵏⴻⵇⵇⵉⴹⵉⵏ ⵏ ⵏⵏⵓⵇⴰⵔⵜ.”
12 “ⵎⵉⵏ ⵖⴰ ⵢⴻⴽⴽ ⵓⵊⴻⴵⵉⴷ ⵉⵇⵇⵉⵎ ⵖⴰⵔ ⵟⵟⴰⴱⵍⴰ ⵏⵏⴻⵙ ⵜⴰⵇⵓⵔⴰⵔⵉⵜ,
ⵉⵜⵜⵉⵛⵛ ⵚⵚⴻⵏⴱⴻⵍ ⵉⵏⵓ ⵍⴻⴼⵡⴰⵃⴻⵜ ⵏⵏⴻⵙ.
13 ⵍⵍⵉⴼ ⵉⵏⵓ ⵉⵜⵜⴻⴳⴳ ⴰⵢⵉ ⴰⵎ ⵜⴻⵛⵢⴰⵔⵜ ⵏ ⵎⵉⵔⵔⵓ,
ⵜⴻⵏⵏⵉ ⵉⵙⵙⴻⵏⵙⴻⵏ ⵊⴰⵔ ⵉⴷⵎⴰⵔⴻⵏ ⵉⵏⵓ.
14 ⵍⵍⵉⴼ ⵉⵏⵓ ⵉ ⵏⴻⵛⵛ ⴰⵎ ⵜⵇⴻⴱⴱⵉⴹⵜ ⵏ ⵏⴻⵡⵡⴰⵛ ⵏ ⵍⵃⴻⵏⵏⵉ,
ⴷⴻⴳ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵏ ⵄⴰⵢⵏ-ⵊⴰⴷⵉ.”
15 “ⵅⵥⴰⵔ, ⵜⴻⵛⵏⵉⴷ ⵛⴻⵎ, ⵜⴰⵎⴻⴷⴷⵓⴽⴽⴻⵞ ⵉⵏⵓ!
ⵅⵥⴰⵔ, ⵛⴻⵎ ⵜⴻⵛⵏⵉⴷ, ⵜⵉⵟⵟⴰⵡⵉⵏ ⵏⵏⴻⵎ ⴷ ⵉⴷⴱⵉⵔⴻⵏ.”
16 “ⴰⵇⴰ ⴷⴰⵢⴻⴽ ⴰⵥⵔⵉ, ⴰ ⵍⵍⵉⴼ ⵉⵏⵓ, ⵡⴰⵀ, ⵜⴹⴰⵔⴼⴻⴷ,
ⵜⵓⵥⵥⵉⵥⴻⵡⵜ ⴷ ⵜⴰⵙⵙⵓⵜ ⵏⵏⴻⵖ,
17 ⵜⵉⵃⴻⵏⵢⴰ ⵏ ⵜⵓⴷⵔⵉⵏ ⵏⵏⴻⵖ ⴷ ⵜⵉⵏⴻⴳⵍⵉⵏ,
ⵜⵉⵃⴻⵏⵢⴰ ⵏ ⵜⵥⴻⵇⵇⴰ ⴰⵇⴰ ⴰⵜⴻⵏⵜ ⴷ ⵜⵉⵛⴻⵊⵊⵓⵔⴰ ⵏ ⵓⵎⴻⵔⵥⵉ.”