ⴰⵔⵛⴰⵎ ⵏ ⵜⴻⵙⵍⵉⵜ
2
1 “ⵏⴻⵛⵛ ⴷ ⵜⴰⵏⴻⵡⵡⴰⵛⵜ ⵏ ⵛⴰⵔⵓⵏ, ⴷ ⵜⴰⵍⵉⵍⵍⴻⵛⵜ ⵏ ⵜⴻⵢⵙⴰⵔⵉⵏ.” □
2 “ⴰⵎ ⵜⵍⵉⵍⵍⴻⵛⵜ ⵊⴰⵔ ⵜⵥⴻⴳⴳⵯⴰⵔⵜ,
ⴰⵎⵎⵓ ⵉ ⵜⴻⴵⴰ ⵜⴰⵎⴻⴷⴷⵓⴽⴽⴻⵞ ⵉⵏⵓ ⵊⴰⵔ ⵜⵢⴻⴵⵉⵜⵉⵏ.”
ⴰⵔⵛⴰⵎ ⵏ ⵢⴻⵙⵍⵉ
3 “ⴰⵎ ⵜⵛⴻⵊⵊⴰⵔⵜ ⵏ ⵜⵜⴻⴼⴼⴰⵃⵜ ⵊⴰⵔ ⵜⵛⴻⵊⵊⵓⵔⴰ ⵏ ⵡⴻⵥⵖⴰⵔ,
ⴰⵎⵎⵓ ⵉ ⵢⴻⴵⴰ ⵍⵍⵉⴼ ⵉⵏⵓ ⵊⴰⵔ ⵡⴰⵔⵔⴰⵡⴻⵏ.
ⵏⴻⵛⵛ ⴰⵇⴰ ⴰⵢⵉ ⵎⵎⴻⵥⵔⴻⵖ ⴰⴷ ⵇⵇⵉⵎⴻⵖ ⴷⵉ ⵜⵉⵍⵉ ⵏⵏⴻⵙ.
ⵍⵖⵉⴵⴻⵜ ⵏⵏⴻⵙ ⴷ ⵎⵉⵥⵉⴷ ⵉ ⵡⴰⵏⴻⵖ ⵉⵏⵓ.□
4 ⵏⴻⵜⵜⴰ ⵉⵏⴷⴻⵀ ⴰⵢⵉ ⴷⵉ ⵜⴰⴷⴷⴰⵔⵜ ⵏ ⴱⵉⵏⵓ,
ⵓ ⵜⴰⵢⵔⵉ ⴷ ⵜⴰⵄⴻⴵⴰⵏⵜ ⵏⵏⴻⵙ ⵅⴰⴼⵉ.
5 ⵙⵊⴻⵀⴷⴻⵎ ⴰⵢⵉ ⵙ ⵖⴰⵔⵢⵉⵜⴰ ⵏ ⵥⵥⴱⵉⴱ,
ⵙⴱⴰⵔⵔⴷⴻⵎ ⴰⵢⵉ ⵙ ⵜⵜⴻⴼⴼⴰⵃⵉⵏ,
ⵎⴰⵖⴰⵔ ⵏⴻⵛⵛ ⵀⴻⵍⵛⴻⵖ ⵙ ⵜⴰⵢⵔⵉ.
6 ⴰⴼⵓⵙ ⴰⵥⴻⵍⵎⴰⴹ ⵏⵏⴻⵙ ⵙⴰⴷⵓ ⵓⵥⴻⴵⵉⴼ ⵉⵏⵓ,
ⴰⴼⵓⵙⵉ ⵏⵏⴻⵙ ⵉⴷⴰⵔⵔⴻⵄ ⴰⵢⵉ-ⴷⴷ.
7 ⵏⴻⵛⵛ ⴰⴷ ⴽⴻⵏⵏⵉⵏⵜ ⴰⵔⵔⴻⵖ ⵜⵜⵊⴰⴵⴰⵏⵜ, ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ,
ⵖⴰⵔ ⵜⵖⴰⵢⴹⵉⵏ ⵏ ⵡⴻⵥⵖⴰⵔ ⵓ ⵖⴰⵔ ⵜⵓⴷⴰⴷⵉⵏ ⴷⴻⴳ ⵉⵢⵢⴰⵔⴻⵏ,
ⴰⵇⴰ ⴽⴻⵏⵏⵉⵏⵜ ⵡⴰⵔ ⵀⴻⴽⴽⵡⵍⴻⵏⵜ ⵜⴰⵢⵔⵉ,
ⵡⴰⵔ ⵜⵜ-ⵉ-ⴷⴷ-ⵙⵙⴻⴽⴽⴰⵔⴰⵏⵜ ⴰⵍ ⵜᵉⵜⵜⴻⵅⵙ ⵙⵉⵎⴰⵏⵜ ⵏⵏⴻⵙ.”
ⵜⴰⵡⴰⵙⵉⵜ ⵏ ⵢⴻⵙⵍⵉ
8 “ⵍⵃⴻⵙⵙ ⵏ ⵍⵍⵉⴼ ⵉⵏⵓ!
ⴰⵇⴰ ⴷⴰ, ⵉⵜⵜⴰⵙ-ⴷⴷ,
ⵉⵏⴻⵟⵟⵓ ⵅ ⵉⴷⵓⵔⴰⵔ,
ⵉⵏⴻⴳⴳⴻⵥ ⵅ ⵜⴻⵡⵔⵉⵔⵉⵏ!
9 ⵍⵍⵉⴼ ⵉⵏⵓ ⵢⴰⵔⵡⴻⵙ ⴷⴻⴳ ⵉⵖⴰⵢⴹ ⵏ ⵡⴻⵥⵖⴰⵔ,
ⵏⵉⵖ ⴷⴻⴳ ⵉⵊⵊ ⵏ ⵓⵎⴻⵥⵢⴰⵏ ⵏ ⵡⵓⴷⴰⴷⴻⵏ.
ⴰⵇⴰ-ⵜ ⴷⴰ, ⵉⴱⴻⴷⴷ ⴰⵡⴰⵔⵏⵉ ⵉ ⵍⵃⵉⴹ ⵏⵏⴻⵖ,
ⵉⵅⴻⵥⵥⴰⵔ ⵥⵉ ⵍⴻⴽⵡⴰⵥⵉ,
ⵉⵜⵜⵛⴻⵢⵢⴻⵄ ⵥⵉ ⵛⵛⴻⴱⴱⴰⵛ.”
ⵜⴰⵙⵍⵉⵜ ⵜⴻⵙⵙⵉⵡⴻⵍ ⵅ ⵍⴻⵄⵔⵓⴹ ⵏ ⵢⴻⵙⵍⵉ
10 “ⵍⵍⵉⴼ ⵉⵏⵓ ⵉⵜⵜⴰⵔⵔⴰ-ⴷⴷ ⵓⵛⴰ ⵉⵏⵏⴰ ⴰⵢⵉ:
‘ⴽⴽⴰⵔ, ⴱⴻⴷⴷ, ⴰ ⵜⴰⵎⴻⴷⴷⵓⴽⴽⴻⵞ ⵉⵏⵓ, ⴰⵥⵔⵉ ⵉⵏⵓ,
ⵓⵛⴰ ⴰⵙ-ⴷⴷ!
11 ⵎⴰⵖⴰⵔ ⴰⵇⴰ ⴷⴰ, ⵜⴰⴳⴻⵔⵙⵜ ⵜⴻⵄⴷⵓ,
ⵉⴽⵙⵉ ⵡⴻⵏⵥⴰⵔ, ⴰⵇⴰ ⵉⵔⵓⵃ.
12 ⴱⴰⵏⴻⵏ-ⴷⴷ ⵉⵏⵓⵡⵡⴰⵔⴻⵏ ⴷⵉ ⵜⴻⵎⵎⵓⵔⵜ,
ⵍⵃⴰⵍ ⵏ ⵡⴻⵏⵥⵉⵥ ⴰⵇⴰ-ⵜ ⴷⴰ,
ⵓⵛⴰ ⵜⵎⵉⵊⵊⴰ ⵏ ⵜⵊⵍⵉⵍⵍⴻⵃⵜ ⵏⴻⵙⵍⴰ ⵉ-ⵜⵜ ⵄⴰⵡⴻⴷ ⴷⵉ ⵜⴻⵎⵎⵓⵔⵜ ⵏⵏⴻⵖ.
13 ⴰⵔⵜⵓ ⵏ ⵜⴰⵥⴰⵔⵜ ⵉⵜⵜⵅⴻⵎⵎⴰⵍ ⵍⴱⴰⵛⵓⵔ ⵏⵏⴻⵙ,
ⵓⵛⴰ ⵜⵉⵥⴰⵢⴰⵔⵉⵏ ⵉⵜⵜⵏⴻⵡⵡⴰⵔⴻⵏ ⴰⵔⵅⵓⵏ ⵉ ⵍⴻⴼⵡⴰⵃ.
ⴽⴽⴰⵔ, ⴱⴻⴷⴷ, ⵜⴰⵎⴻⴷⴷⵓⴽⴽⴻⵞ ⵉⵏⵓ, ⴰⵥⵔⵉ ⵉⵏⵓ,
ⵓⵛⴰ ⴰⵙ-ⴷⴷ!’ ”
ⵉⵙⵍⵉ ⵢⴰⵔⴻⵏⵏⵉ ⴷⵉ ⵍⴻⵄⵔⵓⴹ
14 “ⵜⴰⴷⴱⵉⵔⵜ ⵉⵏⵓ ⴷⴻⴳ ⵉⵎⵓⵛⴰⵏ ⵏ ⵓⴷⵓⵔⵔⵉ ⴷⵉ ⵍⴻⵊⵔⵓⴼ,
ⴷⴻⴳ ⵉⵊⵊ ⵏ ⵡⴻⵎⵛⴰⵏ ⵉⵏⵏⵓⴼⴼⴰⵔⴻⵏ ⴷⵉ ⵜⵙⴰⵡⴻⵏⵜ ⵏ ⵡⴻⴷⵔⴰⵔ,
ⴻⵊⵊ ⴰⵢⵉ ⴰⴷ ⵥⴰⵔⴻⵖ ⴰⵖⴻⵎⴱⵓⴱ ⵏⵏⴻⵎ, ⴰⴷ ⵙⵍⴻⵖ ⵉ ⵜⵎⵉⵊⵊⴰ ⵏⵏⴻⵎ,
ⵎⴰⵖⴰⵔ ⴷ ⵜⵎⵉⵥⵉⴷⵜⵉ ⵜⴻⴵⴰ ⵜⵎⵉⵊⵊⴰ ⵏⵏⴻⵎ, ⵉⵚⴱⴻⵃ ⵓⵖⴻⵎⴱⵓⴱ ⵏⵏⴻⵎ.”
ⵜⴰⵙⵍⵉⵜ ⵜⴻⵅⵙ ⴰⴷ ⵜⵉⵍⵉ ⵉ ⵢⴻⵙⵍⵉ ⵡⴰⵀⴰ
15 “ⵟⵟⴼⴻⵎ ⴰⵏⴻⵖ-ⴷⴷ ⵉⵛⴻⵄⴱⴰⵡⴻⵏ, ⵉⵛⴻⵄⴱⴰⵡⴻⵏ ⵉⵎⴻⵥⵢⴰⵏⴻⵏ,
ⵉⵏⵏⵉ ⵉⵜⵜⴰⵔⵢⵜⴰⵔⴻⵏ ⴰⵏⴻⵖ ⵉⵎⴰⵔⵊⴰⵄⴻⵏ ⵏ ⵓⴹⵉⵍ,
ⵎⴰⵖⴰⵔ ⵜⵉⵥⴰⵢⴰⵔⵉⵏ ⴷⴻⴳ ⵉⵎⴰⵔⵊⴰⵄⴻⵏ ⵏⵏⴻⵖ ⵜⵜⵏⴻⵡⵡⴰⵔⴻⵏⵜ ⵄⴰⴷ.
16 ⵍⵍⵉⴼ ⵉⵏⵓ ⴰⵇⴰ-ⵜ ⵉⵏⵓ ⵓ ⵏⴻⵛⵛ ⵏⵏⴻⵙ,
ⴷ ⵡⴻⵏⵏⵉ ⵢⴰⵔⴻⴽⴽⵡⵙⴻⵏ ⵊⴰⵔ ⵜⵍⵉⵍⵍⵉⵛⵉⵏ.
17 ⴰⵍ ⵉ ⵖⴰ ⵉⵙⵎⴻⴹ ⵡⴰⵙⵙ,
ⵓ ⴰⴷ ⴰⵔⴻⵡⵍⴻⵏⵜ ⵜⵉⵍⵉⵡⵉⵏ.
ⵏⵏⴻⴹ-ⴷⴷ, ⴰ ⵍⵍⵉⴼ ⵉⵏⵓ,
ⵉⵍⵉ ⴰⵎ ⵉⵊⵊ ⵏ ⵉⵖⴰⵢⴹ ⵏ ⵡⴻⵥⵖⴰⵔ
ⵏⵉⵖ ⴰⵎ ⵉⵊⵊ ⵏ ⵓⵎⴻⵥⵢⴰⵏ ⵏ ⵡⵓⴷⴰⴷⴻⵏ
ⵅ ⵉⴷⵓⵔⴰⵔ ⵏ ⵍⴻⵊⵔⵓⴼ.”