6
1 “ⵎⴰⵏⵉ ⵢⵓⵢⵓⵔ ⵍⵍⵉⴼ ⵏⵏⴻⵎ, ⴰ ⵛⴻⵎ ⵉⵛⵏⴰⵏ ⵇⴰⵄ ⵅ ⵜⴻⵎⵖⴰⵔⵉⵏ?
ⵎⴰⵏⵉ ⵢⴰⵔⵔⴰ ⵙ ⵓⵥⴻⴵⵉⴼ ⵍⵍⵉⴼ ⵏⵏⴻⵎ?
ⵏⴻⵛⵛⵉⵏ ⵏⴻⵅⵙ ⴰⴷ ⵅⴰⵙ ⵏⴰⵔⵥⵓ ⴰⴽⵉⴷⴻⵎ!”
2 “ⵍⵍⵉⴼ ⵉⵏⵓ ⵉⵀⵡⴰ ⵖⴰⵔ ⵓⵃⵡⵉⵛ ⵏⵏⴻⵙ,
ⵖⴰⵔ ⵜⴱⵓⴷⴰ ⵙ ⵍⴻⵄⵟⵓⵔ,
ⵃⵉⵎⴰ ⴰⴷ ⵢⴰⵔⵡⴻⵙ ⴷⴻⴳ ⵉⵃⵡⵉⵛⴻⵏ,
ⵃⵉⵎⴰ ⴰⴷ ⵉⵙⵙⵎⵓⵏ ⵜⵉⵍⵉⵍⵍⵉⵛⵉⵏ. □
3 ⵏⴻⵛⵛ ⵥⴻⴳ ⵍⵍⵉⴼ ⵉⵏⵓ,
ⵓ ⵍⵍⵉⴼ ⵉⵏⵓ ⴰⵇⴰ-ⵜ ⵉⵏⵓ,
ⵏⴻⵜⵜⴰ ⴷ ⵡⴻⵏⵏⵉ ⵢⴰⵔⴻⴽⴽⵡⵙⴻⵏ ⵊⴰⵔ ⵜⵍⵉⵍⵍⵉⵛⵉⵏ.”
ⴰⵙⵍⵉ ⵉⵖⴻⵏⵏⴻⵊ ⵅ ⵡⴻⵥⵔⵉ ⵏ ⵜⴻⵙⵍⵉⵜ
4 “ⵛⴻⵎ ⵜⵚⴻⴱⵃⴻⴷ, ⴰ ⵜⴰⵎⴻⴷⴷⵓⴽⴽⴻⵞ ⵉⵏⵓ,
ⴰⵎⴻⵛⵏⴰⵡ ⵜⵉⵔⵚⴰ,
ⵜⴻⵛⵏⵉⴷ ⴰⵎ ⵓⵔⵛⴰⵍⵉⵎ,
ⵜⴻⵙⵙⴰⴳⴳⵯⴰⴷⴻⴷ ⴰⵎ ⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ ⵙ ⵜⵄⴻⴵⴰⵏⵉⵏ ⵏⵙⴻⵏ.
5 ⴽⴽⴻⵙ ⵜⵉⵟⵟⴰⵡⵉⵏ ⵥⵥⴰⵢⵉ,
ⵎⴰⵖⴰⵔ ⵏⵉⵜⴻⵏⵜⵉ ⵖⴻⴹⵍⴻⵏⵜ ⴰⵢⵉ ⵉⴼⴰⴷⴷⴻⵏ ⴰⵟⵟⴰⵙ.
ⴰⵛⴻⵡⵡⴰⴼ ⵏⵏⴻⵎ ⴰⵎⴻⵛⵏⴰⵡ ⵜⴰⵃⵉⵎⴰⵔⵜ ⵏ ⵉⵖⴰⵢⴹⴻⵏ
ⵉ ⵉⵊⵏⴰⵏ ⵅ ⵉⴷⵓⵔⴰⵔ ⵏ ⵊⵉⵍⵄⴰⴷ.
6 ⵜⵉⵖⵎⴰⵙ ⵏⵏⴻⵎ ⴳⴳⵉⵏⵜ ⴰⵎ ⵜⵃⵉⵎⴰⵔⵜ ⵏ ⵡⵓⴵⵉ,
ⵉ ⴷⴷ-ⵉⵜⵜⴳⴻⵄⵄⴰⴷⴻⵏ ⵥⴻⴳ ⵡⴻⵎⵛⴰⵏ ⵏ ⵓⵚⴻⴱⴱⴻⵏ,
ⵎⴰⵔⵔⴰ ⵜⵉⵅⴻⵙⵡⵉⵏ ⵓⵔⵡⴻⵏⵜ ⵜⴰⵛⵏⵉⵡⵜ,
ⵡⴰⵔ ⵜⴻⵇⵇⵉⵎ ⵉⵛⵜ ⵏⴱⵍⴰ ⵉⵃⴻⵏⵊⵉⵔⴻⵏ.
7 ⵍⵃⴻⵏⴽⴰⵜ ⵏⵏⴻⵎ ⴰⵎ ⵜⵔⴻⵎⵎⴰⵏⵜ ⵉⴱⴹⴰⵏ
ⴰⵡⴰⵔⵏⵉ ⵉ ⵍⵍⵜⴰⵎ ⵏⵏⴻⵎ.
8 ⴰⵇⴰ ⴷⵉⵏ ⵙⴻⵜⵜⵉⵏ ⵏ ⵜⵊⴻⴵⵉⴷⵉⵏ ⴷ ⵜⵎⴻⵏⵢⵉⵏ ⵏ ⵜⵉⵢⵢⴰ,
ⵓⵍⴰ ⴷ ⵜⵉⵄⵥⴰⵔⵉⵢⵢⵉⵏ ⴱⵍⴰ ⵍⴻⵃⵙⴰⴱ.
9 ⵡⴻⵃⵃⴷⴻⵙ ⵏⴻⵜⵜⴰⵜ, ⵜⴰⴷⴱⵉⵔⵜ ⵉⵏⵓ, ⵜⴻⵏⵏⵉ ⵉⴽⴻⵎⵎⵍⴻⵏ ⵉⵏⵓ,
ⴰⵢⴻⵏⵏⵉ ⵏ ⵢⴻⵙⵙⵉⵙ ⵏ ⵢⴻⵎⵎⴰⵙ,
ⵏⴻⵜⵜⴰⵜ ⴷ ⵜⴻⵏⵏⵉ ⵉⴼⴰⵔⵥⴻⵏ ⵖⴰⵔ ⵜⴻⵏⵏⵉ ⵉ ⴷ ⴰⵙ ⴷⴷ-ⵢⵓⵔⵡⴻⵏ.
ⵎⴰⵍⴰ ⵥⵍⵉⵏⵜ ⵜⵜ ⵜⵢⴻⵙⵙⵉⵜ, ⴰⴷ ⵜⵜ ⵙⵙⵄⵓⴵⴰⵏⵜ,
ⵜⵉⵊⴻⴵⵉⴷⵉⵏ ⴷ ⵜⵉⵢⵢⴰ ⴰⴷ ⵜⵜ ⵛⴻⵏⵏⵄⴻⵏⵜ ⵙ ⵉⵥⵍⴰⵏ.”
10 “ⵎⵉⵏ ⵜⴻⵄⵏⴰ ⵜⴻⵏⵏⵉ ⴷⴷ-ⵉⵙⵙⵉⵊⵊⴻⵏ ⴰⵎ ⵜⴼⴰⵡⵜ ⵏ ⵍⴻⴼⵊⴰⵔ,
ⵜⴻⵛⵏⴰ ⴰⵎ ⵜⵥⵉⵔⵉ ⵉⵇⴻⴼⵍⴻⵏ, ⵜⴻⵚⴼⴰ ⴰⵎ ⵜⴼⵓⵛⵜ ⵢⴰⵔⴻⵇⵇⴻⵏ,
ⵜⴻⵙⵙⴰⴳⴳⵯⴰⴷ ⴰⵎ ⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ ⵙ ⵜⵄⴻⴵⴰⵏⵉⵏ?”
11 “ⵏⴻⵛⵛ ⵃⵡⵉⵖ ⵖⴰⵔ ⵜⴻⵃⵡⵉⵛⵜ ⵏ ⵜⵛⴻⵊⵊⵓⵔⴰ ⵏ ⵜⴻⵖⵢⴰⵛⵜ
ⵃⵉⵎⴰ ⴰⴷ ⵅⵥⴰⵔⴻⵖ ⴰⵖⴻⵎⵎⵓⵢ ⵉⴱⴻⴷⴷⴻⵏ ⴷⵉ ⵜⴻⵖⵥⵓⵔⵜ,
ⵃⵉⵎⴰ ⴰⴷ ⵅⵥⴰⵔⴻⵖ ⵎⴰ ⵜⴰⵥⴰⵢⴰⵔⵜ ⵜⴻⵙⵙⵓⴼⴼⴻⵖ-ⴷⴷ,
ⵎⴰ ⵜⵉⵛⴻⵊⵊⵓⵔⴰ ⵏ ⴰⵔⴻⵎⵎⴰⵏ ⵜⵜⵏⴻⵡⵡⴰⵔⴻⵏⵜ.
12 ⵜⵓⵖⴰ ⵡⴰⵔ ⴷⴷ-ⴰⵔⵔⵉⵖ ⵜⴰⵢⵏⵉⵜ ⴰⵇⴰ ⵍⴻⵄⵎⴰⵔ ⵉⵏⵓ ⵉⵏⴹⴰⵔ ⴰⵢⵉ
ⴷⴻⴳ ⵉⴽⴰⵔⵔⵓⵜⴻⵏ ⵏ ⵍⴳⴻⵏⵙ ⵉⵏⵓ, ⵏ ⵉⵊⵊ ⵏ ⵡⴻⵛⵔⵉⵎ.”