5
1 “ⵏⴻⵛⵛ ⵓⵙⵉⵖ-ⴷⴷ ⵖⴰⵔ ⵡⴻⵃⵡⵉⵛ ⵉⵏⵓ, ⴰ ⵓⵞⵎⴰ, ⴰ ⵜⴰⵙⵍⵉⵜ ⵉⵏⵓ, ⵍⴻⵇⴹⴻⵖ ⵎⵉⵔⵔⵓ ⵉⵏⵓ ⴰⴽ-ⴷ ⵍⴻⵄⵜⵓⵔ,
ⵛⵛⵉⵖ ⴰⵖⵔⵓⵎ ⵏ ⵜⵥⵉⵥⵡⴰ ⴰⴽ-ⴷ ⵜⴰⵎⵎⴻⵏⵜ,
ⵙⵡⵉⵖ ⴱⵉⵏⵓ ⵉⵏⵓ ⴷ ⵓⵖⵉ.
ⵉⵎⴻⴷⴷⵓⴽⴽⴰⵍ, ⵛⵛⴻⵎ, ⵙⵡⴻⵎ, ⵙⵙⵛⴰⵔⴻⵎ, ⴰ ⵉⵎⵄⵉⵥⵥⴻⵏ!” □
ⵜⴰⵙⵍⵉⵜ ⵜⵥⴻⵀⵥⴰ ⴰⴷ ⵜⴰⵔⵥⴻⵎ ⵉ ⵢⴻⵙⵍⵉ
2 “ⵏⴻⵛⵛ ⵟⵟⵙⴻⵖ, ⵎⴰⵛⴰ ⵓⵍ ⵉⵏⵓ ⵉⴼⴰⵇ.
ⴰⵇⴰ ⴷⴰ ⵜⵎⵉⵊⵊⴰ ⵏ ⵍⵍⵉⴼ ⵉⵏⵓ ⵡⴻⵏⵏⵉ ⵉⵙⵙⵇⴰⵔⵇⴱⴻⵏ
‘ⴰⵔⵥⴻⵎ ⴰⵢⵉ, ⴰ ⵓⵞⵎⴰ, ⵜⴰⵎⴻⴷⴷⵓⴽⴽⴻⵞ ⵉⵏⵓ,
ⵜⴰⴷⴱⵉⵔⵜ ⵉⵏⵓ, ⴰ ⴽⵓⵍⵛⵉ ⵉⵏⵓ,
ⵎⴰⵖⴰⵔ ⴰⵥⴻⴵⵉⴼ ⵉⵏⵓ ⵉⵛⵛⵓⵔ ⵙ ⵏⵏⴷⴰ,
ⵉⵎⵓⵥⴰⵔⴻⵏ ⵉⵏⵓ ⵛⵛⵓⵔⴻⵏ ⵙ ⵜⵓⴷⴷⵉⵎⵉⵏ ⵏ ⴵⵉⵍⴻⵜ!’
3 ⴰⵇⴰ ⴽⴽⵙⴻⵖ ⴰⵔⵔⵓⴹ ⵉⵏⵓ,
ⵎⴰⵎⵎⴻⵛ ⵉ ⵜ ⵖⴰ ⵢⴰⵔⴹⴻⵖ ⵄⴰⵡⴻⴷ?
ⵉⴹⴰⵔⴻⵏ ⵙⵙⵉⵔⴷⴻⵖ ⵜⴻⵏ,
ⵎⴰ ⴰⴷ ⵜⴻⵏ ⵙⵙⵅⴻⵎⵊⴻⵖ ⵄⴰⵡⴻⴷ?
4 ⵍⵍⵉⴼ ⵉⵏⵓ ⵉⵙⵙⴻⴽⴽ-ⴷⴷ ⴰⴼⵓⵙ ⵏⵏⴻⵙ ⵥⴻⴳ ⵓⵏⵓⵇⵇⵉⴱ ⵏ ⵜⴻⵡⵡⴰⵔⵜ,
ⵓⵛⴰ ⵉⵏⵀⴻⵥⵥ ⵡⵓⵍ ⵉⵏⵓ ⵥⵥⴰⵢⴻⵙ.
5 ⵏⴻⵛⵛ ⴱⴻⴷⴷⴻⵖ ⵃⵉⵎⴰ ⴰⴷ ⴰⵔⵥⵎⴻⵖ ⵉ ⵍⵍⵉⴼ ⵉⵏⵓ,
ⵉⴼⴰⵙⵙⴻⵏ ⵉⵏⵓ ⵓⴷⵓⵎⴻⵏ ⵙ ⵎⵉⵔⵔⵓ,
ⵓ ⵥⴻⴳ ⵉⴹⴻⵡⴹⴰⵏ ⵉⵏⵓ ⵉⵙⵙⵉⵥⵥⴻⵍ ⵎⵉⵔⵔⵓ
ⵅ ⵉⴼⴰⵙⵙⴻⵏ ⵏ ⵥⵥⴻⴽⵔⵓⵏ.
6 ⵏⴻⵛⵛ ⴰⵔⵥⵎⴻⵖ ⵉ ⵍⵍⵉⴼ ⵉⵏⵓ,
ⵎⴰⵛⴰ ⵍⵍⵉⴼ ⵉⵏⵓ ⵜⵓⵖⴰ ⵢⵓⵢⵓⵔ, ⵉⵄⴷⵓ.
ⵉⴼⴼⴻⵖ ⵍⴻⵄⵎⴰⵔ ⵉⵏⵓ ⵓⵎⵉ ⵜⵓⵖⴰ ⵉⵙⵙⴰⵡⴰⵍ!
ⵏⴻⵛⵛ ⴰⵔⵥⵓⵖ ⵅⴰⵙ, ⵎⴰⵛⴰ ⵡⴰⵔ ⵜ ⵓⴼⵉⵖ.
ⵏⴻⵛⵛ ⵍⴰⵖⵉⵖ ⴰⵙ, ⵏⴻⵜⵜⴰ ⵡⴰⵔ ⵅⴰⴼⵉ ⴷⴷ-ⵢⴰⵔⵔⵉ.
7 ⵓⴼⵉⵏ ⴰⵢⵉ ⵉⵄⴻⵙⵙⴰⵙⴻⵏ ⵖⴰⵔ ⵡⴻⵏⵏⴻⴹ ⵏⵙⴻⵏ ⴷⵉ ⵜⴻⵏⴷⵉⵏⵜ,
ⵏⵉⵜⵏⵉ ⵡⵜⵉⵏ ⴰⵢⵉ, ⵢⴻⵥⵎⴻⵏ ⴰⵢⵉ,
ⴰⵇⴻⵏⴷⵓⵔ ⵉⵏⵓ ⴽⴽⵙⴻⵏ ⴰⵢⵉ ⵜ ⵉⵄⴻⵙⵙⴰⵙⴻⵏ ⵏ ⵍⴻⵃⵢⵓⴹ.”
ⵉⵥⵍⵉ ⵏ ⵜⴻⵙⵍⵉⵜ ⴰⴽ-ⴷ ⵢⴻⵙⵙⵉⵙ ⵏ ⵓⵔⵛⴰⵍⵉⵎ
8 “ⵏⴻⵛⵛ ⴰⴷ ⴽⴻⵏⵏⵉⵏⵜ ⴰⵔⵔⴻⵖ ⵜⵜⵊⵊⴰⴵⴰⵏⵜ, ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ,
ⵎⴰⵍⴰ ⴽⴻⵏⵏⵉⵏⵜ ⵜⵓⴼⵉⵏⵜ ⵍⵍⵉⴼ ⵉⵏⵓ, ⵎⵉⵏ ⴷ ⴰⵙ ⵖⴰ ⵜⵉⵏⵉⵏⵜ?
ⴰⵇⴰ ⵜⴻⵙⵙⴻⵃⵍⴻⵛ ⴰⵢⵉ ⵜⴰⵢⵔⵉ.”
9 “ⵎⵉⵏ ⵖⴰⵔⴻⵙ ⵖⴰⵔ ⵍⵍⵉⴼ ⵏⵏⴻⵎ ⴽⵜⴰⵔ ⵅ ⵍⵍⵉⴼ ⵏⵏⴻⵖⵏⵉ,
ⴰ ⵛⴻⵎ ⵉ ⴷⵉ ⵉⴵⴰ ⵡⴰⵥⵔⵉ ⵇⴰⵄ ⵥⵉ ⵜⴻⵎⵖⴰⵔⵉⵏ?
ⵎⵉⵏ ⵖⴰⵔⴻⵙ ⵖⴰⵔ ⵍⵍⵉⴼ ⵏⵏⴻⵎ ⴽⵜⴰⵔ ⵅ ⵉⵏⵏⴻⵖⵏⵉ,
ⴰⵇⴰ ⵛⴻⵎ ⴰⵎⵎⵓ ⵉ ⴷ ⴰⵏⴻⵖ ⵜⴰⵔⵔⵉⴷ ⵏⴻⵜⵜⵊⵊⴰⴵⴰ?”
10 “ⵍⵍⵉⴼ ⵉⵏⵓ ⴷ ⴰⵛⴻⵎⵍⴰⵍ ⵉⵜⵜⵉⵙⵙⵉⵇⴻⵏ ⴷ ⴰⵥⴻⴳⴳⵯⴰⵖ ⴰⵎ ⵉⴷⴰⵎⵎⴻⵏ,
ⵉⵜⵜⴱⴰⵏ ⴰⵎ ⵜⵄⴻⴵⴰⵏⵜ ⵙⴻⵏⵏⴻⵊ ⵅ ⵄⴻⵛⵔⴰ ⵏ ⵍⵓⵍⵓⴼ.
11 ⴰⵥⴻⴵⵉⴼ ⵏⵏⴻⵙ ⴷ ⵓⵔⴻⵖ ⵉⵇⵇⵓⵔ ⵉⵚⴼⴰⵏ,
ⵉⵎⵓⵥⴰⵔⴻⵏ ⵏ ⵓⵛⴻⵡⵡⴰⴼ ⵏⵏⴻⵙ ⴷ ⵜⵉⵡⵔⵉⵔⵉⵏ ⵉ ⵉⵜⵜⴻⴳⴳⴻⵏ ⴰⵎ ⵍⴻⵎⵡⴰⵊ,
ⴷ ⵉⴱⴰⵔⵛⴰⵏⴻⵏ ⴰⵎ ⵉⴱⴰⵖⵍⵉⵡⴻⵏ.
12 ⵜⵉⵟⵟⴰⵡⵉⵏ ⵏⵏⴻⵙ ⴳⴳⵉⵏⵜ ⴰⵎ ⵜⴻⴷⴱⵉⵔⵉⵏ ⵖⴰⵔ ⵜⵙⴻⴵⵢⴰⵡⵉⵏ ⵏ ⵡⴰⵎⴰⵏ,
ⵜⵜⵡⴰⵙⵉⵔⴷⴻⵏⵜ ⵙ ⵓⵖⵉ,
ⵇⵇⵉⵎⴻⵏⵜ ⴷⵉ ⵜⵛⵓⵢⴰⵔ ⵏⵙⴻⵏ ⴰⵎ ⵉⵥⵔⴰ ⵉⵖⵍⴰⵏ.
13 ⵉⵎⴻⴳⴳⵉⵥⴻⵏ ⵏⵏⴻⵙ ⴳⴳⵉⵏ ⴰⵎ ⵉⵃⵡⵉⵛⴻⵏ ⵏ ⵍⴻⵄⵟⵓⵔ,
ⵊⴰⵔ ⵍⴻⵄⵛⵓⴱ ⵉⵜⵜⴼⵓⵃⴻⵏ,
ⵉⵢⴻⵏⵛⵉⵛⴻⵏ ⵏⵏⴻⵙ ⴰⵎ ⵜⵍⵉⵍⵍⵉⵛⵉⵏ,
ⵜⵜⵓⴷⵓⵎⴻⵏ ⵙ ⵎⵉⵔⵔⵓ ⵉⴼⴻⵙⵢⴻⵏ. □
14 ⵉⴼⴰⵙⵙⴻⵏ ⵏⵏⴻⵙ ⴰⵎ ⵜⴻⴱⵔⵉⵇⵉⵏ ⵏ ⵡⵓⵔⴻⵖ,
ⵄⴻⵎⵎⴰⵔⴻⵏⵜ ⵙ ⵉⵥⵔⴰ ⵥⵉ ⵜⴰⵔⵛⵉⵛ,
ⴰⵄⴻⴷⴷⵉⵙ ⵏⵏⴻⵙ ⵉⴳⴳⴰ ⴰⵎ ⵍⵄⴰⵊ ⵉⵜⵜⵉⵙⵙⵉⵇⴻⵏ,
ⵍⴻⵃⵃⴼⴻⵏ ⵜ ⵙ ⵜⵢⴰⵇⵓⵜⵉⵏ ⵏ ⵚⴰⴼⴼⵉⵔ.
15 ⵉⵎⴻⵙⴹⴰⵏ ⵏⵏⴻⵙ ⴷ ⵉⴱⵉⵍⴰⵔⴻⵏ ⵏ ⵍⵎⴰⵔⵎⵓⵔ,
ⵅ ⴷⵙⵓⵙⴰ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ.
ⵉⴱⴰⵏ-ⴷⴷ ⵏⴻⵜⵜⴰ ⴰⵎ ⵍⵓⴱⵏⴰⵏ,
ⵉⵜⵜⵡⴰⴼⴰⵔⵥ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ.
16 ⴰⵏⴻⵖ ⵏⵏⴻⵙ ⵉⵛⵛⵓⵔ ⵙ ⵜⴰⵥⵢⵓⴷⵉ,
ⵓⵛⴰ ⵎⴰⵔⵔⴰ ⵎⵉⵏ ⵖⴰⵔⴻⵙ ⵉⵛⵓⵡⵡⴰⵔ.
ⵡⴰ ⴷ ⵍⵍⵉⴼ ⵉⵏⵓ,
ⵡⴰ ⴷ ⴰⵎⴻⴷⴷⵓⴽⴽⴻⵍ ⵉⵏⵓ,
ⴰ ⴽⴻⵏⵏⵉⵏⵜ ⵢⴻⵙⵙⵉⵙ ⵏ ⵓⵔⵛⴰⵍⵉⵎ!”