ⵉⵥⵍⵉ ⵏ ⵢⴻⵙⵍⵉ ⵅ ⵜⴻⵙⵍⵉⵜ
4
1 “ⵅⵥⴰⵔ, ⵜⴻⵛⵏⵉⴷ ⵛⴻⵎ, ⵜⴰⵎⴻⴷⴷⵓⴽⴽⴻⵞ ⵉⵏⵓ, ⵛⴻⵎ ⵜⴻⵛⵏⵉⴷ. ⴰⵡⴰⵔⵏⵉ ⵉ ⵍⵍⵜⴰⵎ ⵏⵏⴻⵎ ⵜⵉⵟⵟⴰⵡⵉⵏ ⵏⵏⴻⵎ ⴷ ⵜⵉⴷⴱⵉⵔⵉⵏ.
ⴰⵛⴻⵡⵡⴰⴼ ⵏⵏⴻⵎ ⴰⵎⴻⵛⵏⴰⵡ ⵜⴰⵃⵉⵎⴰⵔⵜ ⵏ ⵉⵖⴰⵢⴹⴻⵏ
ⵉ ⵉⵊⵏⴰⵏ ⵅ ⵉⴷⵓⵔⴰⵔ ⵏ ⵊⵉⵍⵄⴰⴷ.
2 ⵜⵉⵖⵎⴰⵙ ⵏⵏⴻⵎ ⴳⴳⵉⵏⵜ ⴰⵎ ⵜⵃⵉⵎⴰⵔⵜ ⵏ ⵡⵓⴵⵉ ⵍⵙⵉⵏ ⵜⴻⵏ,
ⵉⵏⵏⵉ ⴷⴷ-ⵉⵜⵜⴳⴻⵄⵄⴰⴷⴻⵏ ⵥⴻⴳ ⵡⴻⵎⵛⴰⵏ ⵏ ⵓⵚⴻⴱⴱⴻⵏ,
ⵎⴰⵔⵔⴰ ⵜⵉⵅⴻⵙⵡⵉⵏ ⵓⵔⵡⴻⵏⵜ ⵜⴰⵛⵏⵉⵡⵉⵏ,
ⵡⴰⵔ ⵜⴻⵇⵇⵉⵎ ⵉⵛⵜ ⵏⴱⵍⴰ ⵉⵃⴻⵏⵊⵉⵔⴻⵏ.
3 ⵉⵢⴻⵏⵛⵉⵛⴻⵏ ⵏⵏⴻⵎ ⴰⵎ ⵓⴼⵉⵍⵓ ⴰⵥⴻⴳⴳⵯⴰⵖ ⵉⵃⴻⴷⵇⴻⵏ,
ⵉⵚⴱⴻⵃ ⵓⵇⴻⵎⵎⵓⵎ ⵏⵏⴻⵎ.
ⵍⵃⴻⵏⴽⴰⵜ ⵏⵏⴻⵎ ⴰⵎ ⵜⵔⴻⵎⵎⴰⵏⵜ ⵉⴱⴹⴰⵏ
ⵙⴰⴷⵓ ⵍⵍⵜⴰⵎ ⵏⵏⴻⵎ.
4 ⵉⵔⵉ ⵏⵏⴻⵎ ⴰⵎ ⵚⵚⵓⵎⵄⴻⵜ ⵏ ⴷⴰⵡⵓⴷ,
ⴱⵏⴰⵏ ⵜⵜ ⴰⵎ ⵜⴻⵙⴼⵉⴼⵉⵏ ⵏ ⵜⵙⴻⴷⴷⵢⵉⵏ.
ⴰⵍⴻⴼ ⵏ ⵜⵙⴻⴷⴷⴰⵔⵉⵢⵉⵏ ⵏ ⵓⵄⴻⵙⴽⴰⵔⵉ ⵓⵢⵍⴻⵏⵜ ⵖⴰⵔⴻⵙ,
ⵎⴰⵔⵔⴰ ⴰⵎ ⵜⵙⴻⴷⴷⴰⵔⵉⵢⵉⵏ ⵉⵇⴻⵙⵃⴻⵏ ⵉⵇⵓⵔⴰⵔⴻⵏ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ.
5 ⵉⴷⵎⴰⵔⴻⵏ ⵏⵏⴻⵎ ⴳⴳⵉⵏ ⴰⵎ ⵜⵏⴰⵢⴻⵏ ⵏ ⵉⵖⴰⵢⴹⴻⵏ ⵉⵎⴻⵥⵢⴰⵏⴻⵏ,
ⴰⵎ ⵡⴰⵛⵏⵉⵡⴻⵏ ⵏ ⵜⵖⴰⵢⴹⴻⵜ ⵏ ⵡⴻⵥⵖⴰⵔ,
ⵀⴻⴷⴷⴰⵏ ⴷⵉ ⵜⵍⵉⵍⵍⵉⵛⵉⵏ.□
6 ⴰⵍ ⵉ ⵖⴰ ⵉⵙⵎⴻⴹ ⵡⴰⵙⵙ ⵓ ⴰⴷ ⴰⵔⴻⵡⵍⴻⵏⵜ ⵜⵉⵍⵉⵡⵉⵏ,
ⴰⴷ ⵓⵢⵓⵔⴻⵖ ⵖⴰⵔ ⵡⴻⴷⵔⴰⵔ ⵏ ⵓⵎⵉⵔⵔⵓ,
ⵖⴰⵔ ⵜⴻⵡⵔⵉⵔⵜ ⵏ ⵊⵊⴰⵡⵉ.
7 ⵛⴻⵎ ⵎⴰⵔⵔⴰ ⴷ ⴰⵥⵔⵉ, ⵜⴰⵎⴻⴷⴷⵓⴽⴽⴻⵞ ⵉⵏⵓ,
ⵡⴰⵔ ⴷⴰⵢⴻⵎ ⵓⵍⴰ ⴷ ⵉⵊⵊ ⵏ ⵍⵄⵉⴱ.
8 ⵀⵡⴰ-ⴷⴷ ⴰⴽⵉⴷⵉ ⵥⴻⴳ ⵉⴷⵓⵔⴰⵔ ⵏ ⵍⵓⴱⵏⴰⵏ, ⴰ ⵜⴰⵙⵍⵉⵜ ⵉⵏⵓ,
ⵀⵡⴰ-ⴷⴷ ⴰⴽⵉⴷⵉ ⵥⴻⴳ ⵉⴷⵓⵔⴰⵔ ⵏ ⵍⵓⴱⵏⴰⵏ,
ⵚⵡⴻⴷ-ⴷⴷ ⵥⵉ ⵜⵇⵉⵛⵛⴻⵜ ⵏ ⴰⵎⴰⵏⴰ,
ⵥⵉ ⵜⵇⵉⵛⵛⴻⵜ ⵏ ⵛⴰⵏⵉⵔ ⴷ ⵀⵉⵔⵎⵓⵏ,
ⵥⵉ ⵖⴰⵔ ⵍⵎⴰⵔⴳⴰⵃⴰⵜ ⵏ ⵡⴰⵢⵔⴰⴷⴻⵏ,
ⵥⴻⴳ ⵉⴷⵓⵔⴰⵔ ⵏ ⵉⵖⵉⵍⴰⵙⴻⵏ.
9 ⵜⵓⵛⴰⵔⴻⴷ ⴰⵢⵉ ⵓⵍ, ⴰ ⵓⵞⵎⴰ, ⴰ ⵜⴰⵙⵍⵉⵜ ⵉⵏⵓ,
ⵡⴰⵀ ⵜⵓⵛⴰⵔⴻⴷ ⴰⵢⵉ ⵓⵍ,
ⵙ ⵉⵛⵜ ⵏ ⵍⵅⴻⵥⵔⴰⵜ ⵏ ⵜⵉⵟⵟⴰⵡⵉⵏ ⵏⵏⴻⵎ,
ⵙ ⵉⵛⵜ ⵏ ⵜⵙⴻⴷⴷⴻⵛⵜ ⵏ ⵢⵉⵔⵉ ⵏⵏⴻⵎ.
10 ⵎⴰⵎⵎⴻⵛ ⵜⴻⵛⵏⴰ ⵜⴰⵢⵔⵉ ⵏⵏⴻⵎ, ⴰ ⵓⵞⵎⴰ, ⴰ ⵜⴰⵙⵍⵉⵜ ⵉⵏⵓ,
ⵎⴻⵛⵃⴰⵍ ⵜⴻⵚⴱⴻⵃ ⵜⴰⵢⵔⵉ ⵏⵏⴻⵎ ⵅ ⴱⵉⵏⵓ,
ⵍⴻⴼⵡⴰⵃⴻⵜ ⵏ ⵥⵥⴻⵛⵜ ⵏⵏⴻⵎ ⵅ ⵎⴰⵔⵔⴰ ⵍⴻⵄⵟⵓⵔ.
11 ⵣⴻⴳ ⵉⵢⴻⵏⵛⵉⵛⴻⵏ ⵏⵏⴻⵎ, ⴰ ⵜⴰⵙⵍⵉⵜ ⵉⵏⵓ,
ⵜᵉⵜⵜⵓⴷⵓⵎ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ,
ⵜⴰⵎⵎⴻⵏⵜ ⴷ ⵓⵖⵉ ⵙⴰⴷⵓ ⵉⵍⴻⵙ ⵏⵏⴻⵎ,
ⵓ ⵍⴻⴼⵡⴰⵃⴻⵜ ⵏ ⵡⴰⵔⵔⵓⴹ ⵏⵏⴻⵎ ⴰⵎ ⵍⴻⴼⵡⴰⵃⴻⵜ ⵏ ⵉⴷⵓⵔⴰⵔ ⵏ ⵍⵓⴱⵏⴰⵏ.
12 ⴰ ⵓⵞⵎⴰ, ⴰ ⵜⴰⵙⵍⵉⵜ ⵉⵏⵓ, ⵛⴻⵎ ⴷ ⵜⴰⵃⵡⵉⵛⵜ ⵉⴱⴻⵍⵍⵄⴻⵏ,
ⴷ ⵜⴰⵍⴰ ⵉⵇⵇⵏⴻⵏ, ⴷ ⵍⵄⵓⵏⵚⴰⵔ ⵉⵛⴻⵎⵎⵄⴻⵏ.
13 ⵍⴻⴼⵔⵓⵄ ⵉ ⵥⵥⴰⵢⴻⵎ ⵉⵙⵙⵏⴻⵟⵟⵉⵢⴻⵏ ⴷ ⵊⴻⵏⵏⴻⵜ ⵏ ⵜⵔⴻⵎⵎⴰⵏⵉⵏ,
ⵙ ⵍⵖⵉⴵⴻⵜ ⵉⵚⴻⴱⵃⴻⵏ ⴰⵟⵟⴰⵙ, ⵏⵏⴻⵡⵡⴰⵛ ⵏ ⵍⵃⴻⵏⵏⵉ ⴷ ⵚⵚⴻⵏⴱⴻⵍ.
14 ⵚⵚⴻⵏⴱⴻⵍ ⴷ ⵥⵥⵄⴻⴼⵔⴰⵏ,
ⴰⵖⴰⵏⵉⵎ ⵓⵃⴻⵎⵎⵓⵎ ⵉⵜⵜⴼⵓⵃⴻⵏ ⴰⴽ-ⴷ ⵍⵇⴰⵔⴼⴰ,
ⵄⵍⴰⵎ ⴽⵓⵍ ⵜⵉⵛⴻⵊⵊⵓⵔⴰ ⵏ ⵊⵊⴰⵡⵉ, ⵎⵉⵔⵔⵓ ⴷ ⵡⴻⵛⴼⵉⵍ,
ⴰⴽ-ⴷ ⵎⴰⵔⵔⴰ ⵍⴻⵄⵟⵓⵔ ⵉⵚⴻⴱⵃⴻⵏ ⵇⴰⵄ.
15 ⴰ ⵜⴰⵍⴰ ⵏ ⵉⵃⵡⵉⵛⴻⵏ,
ⴰⵏⵓ ⵏ ⵡⴰⵎⴰⵏ ⵉⴷⴷⴰⵔⴻⵏ
ⵉⵏⵏⵉ ⴷⴷ-ⵉⵜⵜⴰⵥⵥⵍⴻⵏ ⵥⴻⴳ ⵉⴷⵓⵔⴰⵔ ⵏ ⵍⵓⴱⵏⴰⵏ.”
ⵜⴰⵙⵍⵉⵜ ⵜⴻⵙⵙⵉⵡⴻⵍ, ⵉⵙⵍⵉ ⵢⴰⵔⵔⴰ-ⴷⴷ
16 “ⴽⴽⴰⵔ, ⴰ ⴰⵙⴻⵎⵎⵉⴹ ⵏ ⵏⵏⴻⵊ,
ⴰⵙ-ⴷⴷ, ⴰ ⴰⵙⴻⵎⵎⵉⴹ ⵏ ⵙⵡⴰⴷⴷⴰⵢ,
ⵚⵓⴹ ⵅ ⵡⴻⵃⵡⵉⵛ ⵉⵏⵓ, ⴻⵊⵊ ⵍⴻⴼⵡⴰⵃⴻⵜ ⵏ ⵍⴻⵄⵟⵓⵔ ⵏⵏⴻⵙ ⴰⴷ ⵜⵓⵢⵓⵔ.
ⴻⵊⵊ ⵍⵍⵉⴼ ⵉⵏⵓ ⴰⴷ ⴷⴷ-ⵢⴰⵙ ⵖⴰⵔ ⵡⴻⵃⵡⵉⵛ ⵏⵏⴻⵙ,
ⴰⴷ ⵉⵛⵛ ⵥⵉ ⵍⵖⵉⴵⴻⵜ ⵏⵏⴻⵙ ⵉⵚⴻⴱⵃⴻⵏ!”