1 ⵡⴰⵔ ⵜⵇⴻⴵⵉⵇ ⵙ ⵓⵇⴻⵎⵎⵓⵎ ⵏⵏⴻⴽ ⵓ ⵃⴹⴰ ⴰⵇⴰ ⵓⵍ ⵏⵏⴻⴽ ⵡⴰⵔ ⵉⵜⵜⴻⵎⵃⵉⵥⵡⴰⵔ ⴰⴷ ⵉⵏⵟⴻⵇ ⴰⵡⴰⵍ ⵥⵥⴰⵜ ⵉ ⴰⵔⴻⴱⴱⵉ. ⵎⴰⵖⴰⵔ ⴰⵔⴻⴱⴱⵉ ⴷⴻⴳ ⵓⵊⴻⵏⵏⴰ, ⵎⴰⵛⴰ ⵛⴻⴽ ⴷⵉ ⵜⴻⵎⵎⵓⵔⵜ. ⵉⵡⴰ, ⴻⵊⵊ ⴰⴷ ⵉⵍⵉⵏ ⵡⴰⵡⴰⵍⴻⵏ ⵏⵏⴻⴽ ⵓⴷⵔⵓⵙⴻⵏ. 2 ⵎⴰⵖⴰⵔ ⴰⵎ ⵜⵉⵔⵊⴰ ⵜᵉⵜⵜⴰⵙ-ⴷⴷ ⵙ ⵡⴰⵟⵟⴰⵙ ⵏ ⵍⴻⵀⵀⵓ, ⴰⵎⵎⵓ ⵓⵍⴰ ⴷ ⵍⵀⴰⵔⴷ ⵏ ⵓⴱⵓⵀⴰⵍⵉ ⵙ ⵡⴰⵟⵟⴰⵙ ⵏ ⵡⴰⵡⴰⵍⴻⵏ.

3 ⵎⴰⵍⴰ ⵛⴻⴽ ⵜⴻⴳⴳⵉⴷ ⵉ ⴰⵔⴻⴱⴱⵉ ⵉⵛⵜ ⵏ ⵜⵊⴰⴵⵉⵜ, ⵡⴰⵔ ⵜⵜⵔⴰⵊⴰ ⵛⴰ ⵅⴻⵏⵏⵉ ⵎⴰⵃⴻⵏⴷ ⴰⴷ ⵜⵜ ⵜⴽⴻⵎⵎⵍⴻⴷ, ⵎⴰⵖⴰⵔ ⵡⴰⵔ ⴷ ⴰⵙ ⵜⵜⴻⵄⵊⵉⴱⴻⵏ ⵉⴱⵓⵀⴰⵍⵉⵢⵢⴻⵏ. ⵎⵉⵏ ⵜⵡⴰⵄⴷⴻⴷ, ⵉⵜⵜⵅⴻⵚⵚⴰ ⴰⴷ ⵜ ⵜⵜⴽⴻⵎⵎⵍⴻⴷ. ^■   4 ⵉⵀⵍⴰ ⵎⴰⵍⴰ ⵡⴰⵔ ⵜⵡⴰⵄⴷⴻⴷ, ⵅ ⵎⴰⵍⴰ ⵛⴻⴽ ⵜⵡⴰⵄⴷⴻⴷ ⵎⴰⵛⴰ ⵡⴰⵔ ⵜⴽⴻⵎⵎⵍⴻⴷ. ^■   5 ⵡⴰⵔ ⵜⵜⴻⵊⵊⵉ ⴰⵇⴰ ⴰⵇⴻⵎⵎⵓⵎ ⵏⵏⴻⴽ ⴰⴷ ⵢⴰⵔⵔ ⴰⵔⵔⵉⵎⴻⵜ ⵏⵏⴻⴽ ⴰⴷ ⵜⴻⵅⴹⴰ ⵓ ⵡⴰⵔ ⵜⴻⵇⵇⴰⵔ ⵥⵥⴰⵜ ⵉ ⵡⵓⴷⴻⵎ ⵏ ⵍⵎⴰⵍⴰⴽ, ⴰⵇⴰ ⵎⴰⵏ ⴰⵢⴰ ⴷ ⴰⵡⴻⴷⴷⴰⵔ ⵡⴰⵀⴰ. ⵎⴰⵢⴻⵎⵎⵉ ⵉ ⵖⴰ ⵉⴼⴼⵓⴳⴻⵎ ⴰⵔⴻⴱⴱⵉ ⵅ ⵎⵉⵏ ⵜⴻⵇⵇⴰⵔⴻⴷ ⵓ ⴰⴷ ⵢⴰⵔⴻⴷⴷⴻⴵ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⴽ? 6 ⵎⴰⵖⴰⵔ ⴷⴻⴳ ⵡⴰⵟⵟⴰⵙ ⵏ ⵜⵉⵔⵊⴰ, ⴰⵇⴰ ⴷⴰⵢⵙⴻⵏⵜ ⵎⵉⵏ ⵉⴵⴰⵏ ⴷⵉ ⵍⴱⴰⵟⴻⵍ, ⴰⵎⵎⵓ ⵓⵍⴰ ⴷⴻⴳ ⵡⴰⵟⵟⴰⵙ ⵏ ⵡⴰⵡⴰⵍⴻⵏ. ⵙ ⵓⵢⴰ: ⴳⴳⵯⴻⴷ ⴰⵔⴻⴱⴱⵉ!^■  

7 ⵎⴰⵍⴰ ⵛⴻⴽ ⵜⵃⴻⴽⴽⴰⵔⴻⴷ ⵍⴻⵃⵚⴰⵔⴻⵜ ⵏ ⵉⵎⴻⵥⵍⴰⴹ ⵓⵍⴰ ⴷ ⴰⵎⵏⴰⵄ ⵏ ⵍⵃⴻⵇⵇ ⴷ ⵜⵙⴻⴳⴷⴰ ⴷⵉ ⵍⵄⴰⵎⴰⵍⴰ, ⵡⴰⵔ ⵜⵜⴰⵔⵊⵉⴼ ⵛⴰ ⵅ ⵜⵎⴻⵙⵍⴰⵛⵜ, ⵎⴰⵖⴰⵔ ⵅ ⵢⵉⵊⵊ ⵏ ⵓⵎⴻⵇⵇⵔⴰⵏ ⴰⵇⴰ ⴷⵉⵏ ⵡⴻⵏⵏⵉ ⴷ ⴰⵎⴻⵇⵇⵔⴰⵏ ⵅⴰⵙ ⵓⵛⴰ ⵅⴰⵙⴻⵏ ⴱⴻⴷⴷⴻⵏ ⵉⵏⵏⵉ ⴷ ⵉⵎⴻⵇⵇⵔⴰⵏⴻⵏ ⵄⴰⴷ. 8 ⵉⵊⵊ ⵏ ⵓⵊⴻⴵⵉⴷ ⵉⵜⵜⵛⴻⵟⵟⴰⵔⴻⵏ ⵉ ⵜⴻⵎⵎⵓⵔⵜ ⵏ ⵜⴼⴻⴵⴰⵃⵜ, ⴰⵇⴰ ⵏⴻⵜⵜⴰ ⴷ ⵍⴻⴼⴹⴻⵍ ⵉ ⵜⴻⵎⵎⵓⵔⵜ ⴷⵉ ⵎⴰⵔⵔⴰ ⵉⵖⴻⵥⴷⵉⵙⴻⵏ.

9 ⵡⴻⵏⵏⵉ ⵉⵜⵜⴻⵅⵙⴻⵏ ⵜⵜⵎⴻⵏⵢⴰⵜ, ⵡⴰⵔ ⵉⵜⵜⵊⵉⵡⵉⵏ ⵄⴻⵎⵎⴰⵔⵚ ⵜⵜⵎⴻⵏⵢⴰⵜ, ⵓ ⵡⴻⵏⵏⵉ ⵉⵜⵜⴻⵅⵙⴻⵏ ⴰⴳⵍⴰ, ⵄⴻⵎⵎⴰⵔⵚ ⵡⴰⵔ ⵉⵜⵜⵊⵉⵡⵉⵏ ⵍⵎⵓⵏⴻⵜ ⵏⵏⴻⵙ. ⵓⵍⴰ ⴷ ⵎⴰⵏ ⴰⵢⴰ ⴰⵇⴰ-ⵜ ⴷⵉ ⵍⴱⴰⵟⴻⵍ.

10 ⵎⴰⵏⵉ ⵉⵜⵜⵎⴰⵔⵏⵉ ⵡⴰⴳⵍⴰ, ⴰⵎⵎⵓ ⵜⵜⵎⴰⵔⵏⵉⵏ ⵓⵍⴰ ⴷ ⵉⵏⵏⵉ ⵜ ⵉ ⵖⴰ ⵉⵛⵛⴻⵏ. ⵎⴰⵏ ⵍⴻⴼⴹⴻⵍ ⵉ ⵖⴰ ⵉⵇⵇⵉⵎⴻⵏ ⵉ ⴰⵢⵜⴱⴰⴱ ⵏⵏⴻⵙ ⵎⵖⵉⵔ ⵜⵉⵟⵟⴰⵡⵉⵏ ⵏⵙⴻⵏ ⵥⴻⵎⵎⴰⵔⴻⵏⵜ ⴰⴷ ⵅⵥⴰⵔⴻⵏⵜ ⴰⵢⴰ?

11 ⴷ ⵎⵉⵥⵉⴷ ⵉⴹⴻⵙ ⵏ ⵓⵅⴻⴷⴷⴰⵎ, ⵎⴰ ⵏⴻⵜⵜⴰ ⵖⴰⵔⴻⵙ ⴷⵔⵓⵙ ⵏⵉⵖ ⴰⵟⵟⴰⵙ ⵏ ⵎⴰⵛⵛⴰ, ⵎⴰⵛⴰ ⵉ ⴱⴰⴱ ⵏ ⵡⴰⴳⵍⴰ ⴰⴼⴻⵢⵢⴻⴹ ⵏⵙⴻⵏ ⵡⴰⵔ ⵜⴻⵏ ⵉⵜⵜⴻⵊⵊⵉ ⴰⴷ ⵟⵟⵚⴻⵏ.

12 ⴰⵇⴰ ⴷⵉⵏ ⵉⵊⵊ ⵏ ⵍⵖⴰⵔ ⵉⴳⴳⴰ ⴰⵎ ⵍⴻⵀⵍⴰⵛ ⵉ ⵥⵔⵉⵖ ⵙⴰⴷⵓ ⵜⴼⵓⵛⵜ: ⴰⴳⵍⴰ ⵉⵜⵜⵄⴻⵙⵙ ⵅⴰⵙ ⴱⴰⴱ ⵏⵏⴻⵙ ⵉ ⴷⵔⵓⵛⵜ ⵉ ⵉⵅⴻⴼ ⵏⵏⴻⵙ.

13 ⵉⴼⵏⴰ ⵥⴻⵄⵎⴰ ⵡⴰⴳⵍⴰ ⵏⵏⴻⵙ ⵙ ⵉⵛⵜ ⵏ ⵜⴻⵎⵙⴰⵔⵜ ⴷ ⵜⴰⵄⴻⴼⴼⴰⵏⵜ ⵓⵛⴰ ⵏⴻⵜⵜⴰ ⵜⵓⵖⴰ ⵢⴻⵊⵊ-ⴷⴷ ⵎⵎⵉⵙ, ⵅⴻⵏⵏⵉ ⵡⴰⵔ ⵖⴰⵔⴻⵙ ⵉⵇⵇⵉⵎ ⵡⴰⵍⵓ ⵄⴰⴷ ⴷⴻⴳ ⵓⴼⵓⵙ ⵏⵏⴻⵙ.

14 ⴰⵎ ⵎⴰⵎⵎⴻⵛ ⴷⴷ-ⵉⴼⴼⴻⵖ ⵏⴻⵜⵜⴰ ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵙ, ⴰⵎⵎⵓ ⵉ ⵖⴰ ⵉⵄⵇⴻⴱ ⴷ ⴰⵄⴰⵔⵢⴰⵏ. ⴰⴷ ⵢⵓⵢⵓⵔ ⴰⵎ ⵎⴰⵎⵎⴻⵛ ⵉ ⴷⴷ-ⵢⵓⵙⴰ, ⵡⴰⵔ ⵉⵥⴻⵎⵎⴰⵔ ⴰⴷ ⵉⴽⵙⵉ ⵓⵍⴰ ⴷ ⵉⵛⵜ ⵏ ⵍⵃⴰⵊⵊⴻⵜ ⵥⴻⴳ ⵓⵎⴰⵔⵔⴻⵜ ⵏⵏⴻⵙ ⵥⵉ ⵎⴰⵔⵔⴰ ⵎⵉⵏ ⵉⵥⴻⵎⵎⴰⵔ ⴰⴷ ⴽⵉⴷⴻⵙ ⵉⴽⵙⵉ ⴷⴻⴳ ⵓⴼⵓⵙ ⵏⵏⴻⵙ. ^■  

15 ⵓⵍⴰ ⴷ ⵜⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⴷ ⵜⴰⵄⴻⴼⴼⴰⵏⵜ: ⵏⵉⵛⴰⵏ ⵎⴰⵎⵎⴻⵛ ⵉ ⴷⴷ-ⵢⵓⵙⴰ ⵏⴻⵜⵜⴰ, ⴰⴷ ⵢⵓⵢⵓⵔ. ⵎⴰⵏ ⵍⴻⴼⴹⴻⵍ ⵏⵏⴻⵙ ⵅⴻⵏⵏⵉ ⵉ ⵡⴻⵏⵏⵉ ⵉⵎⴰⵔⵔⵜⴻⵏ ⵉ ⵓⵚⴻⵎⵎⵉⴹ ⵡⴰⵀⴰ?

16 ⵄⴰⵡⴻⴷ ⵉⵜⵜⵖⵉⵎⴰ ⵉⵜⵜⴻⵜⵜ ⴷⵉ ⵜⴰⴵⴻⵙⵜ ⵓⵙⵙⴰⵏ ⵏⵏⴻⵙ ⴰⵎ ⴽⴻⵎⵍⴻⵏ. ⵉⵜⵜⵡⴰⵎⴰⵔⵔⴻⵜ ⵙ ⵍⴻⵃⵍⴰⵛ ⵏⵏⴻⵙ ⴷ ⵓⴷⵓⵇⵇⴻⵥ ⵏⵏⴻⵙ ⵏ ⵡⴻⵖⴹⴰⴱ.

17 ⵅⵥⴰⵔ, ⵎⵉⵏ ⵜⵜⵡⴰⵍⵉⵖ, ⴰⵇⴰ ⴷ ⵍⴻⵎⵍⵉⵃ ⵓ ⵉⵛⵏⴰ ⴰⵇⴰ ⵉⵊⵊ ⴰⴷ ⵉⵛⵛ ⴰⴷ ⵉⵙⵓ ⵓ ⴰⴷ ⵉⵥⴰⵔ ⵎⴰⵔⵔⴰ ⵍⵅⴰⵔ ⵉ ⵎⴰⵔⵔⴰ ⴰⵎⴰⵔⵔⴻⵜ ⵏⵏⴻⵙ ⵉ ⵡⴻⵏⵏⵉ ⵓⵎⵉ ⵉⵜⵜⵎⴰⵔⵔⴰⵜ ⴱⵏⴰⴷⴻⵎ ⵙⴰⴷⵓ ⵜⴰⴼⵓⵛⵜ ⴷⵉ ⵍⵇⴻⴷⴷ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉ ⴷ ⴰⵙ ⴷⴷ-ⵢⴰⵔⵥⴻⴼ ⴰⵔⴻⴱⴱⵉ, ⵎⴰⵖⴰⵔ ⵜⴰ ⴷ ⵜⴰⵙⵖⴰⵔⵜ ⵏⵏⴻⵙ. ^■  

18 ⵄⴰⵡⴻⴷ ⴽⵓⵍ ⴱⵏⴰⴷⴻⵎ ⵉ ⵓⵎⵉ ⵉⵡⵛⴰ ⴰⵔⴻⴱⴱⵉ ⴰⴳⵍⴰ ⴷ ⵜⵅⵓⴱⴰⵢ ⵓ ⵉ ⵓⵎⵉ ⵉⵡⵛⴰ ⵜⵉⵥⴻⵎⵎⴰⵔ ⵎⴰⵃⴻⵏⴷ ⴰⴷ ⵥⵥⴰⵢⴻⵙ ⵉⵛⵛ ⵓ ⴰⴷ ⵥⵥⴰⵢⴻⵙ ⵢⴰⵔⴱⵓ ⵜⴰⵙⵖⴰⵔⵜ ⵓ ⴰⴷ ⵥⵥⴰⵢⴻⵙ ⵉⴼⴰⵔⵃ ⵖⴰⵔ ⵡⴰⵔⴱⴻⵔ ⵏⵏⴻⵙ, ⴰⵇⴰ-ⵜⵜ ⴷ ⵜⴰⵔⵥⴻⴼⵜ ⵏ ⴰⵔⴻⴱⴱⵉ.

19 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵜⵜⵉⴷⴰⵔ ⵄⴰⴷ ⴰⵟⵟⴰⵙ ⴷⴻⴳ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ, ⵎⵉⵏⵥⵉ ⴰⵔⴻⴱⴱⵉ ⵉⵡⴻⵀⵀⴰ ⴰⵙ-ⴷⴷ ⵙ ⵎⵉⵏ ⵉⵙⵙⴼⴰⵔⵔⴰⵃⴻⵏ ⵓⵍ ⵏⵏⴻⵙ.