1 ⴰⵇⴰ ⴷⵉⵏ ⵉⵊⵊ ⵏ ⵍⵖⴰⵔ ⵏⵏⵉ ⵥⵔⵉⵖ ⵙⴰⴷⵓ ⵜⴼⵓⵛⵜ ⵏⵏⵉ ⵉⵎⵙⴰⵔⴻⵏ ⴰⵟⵟⴰⵙ ⵊⴰⵔ ⵢⴻⵡⴷⴰⵏ: 2 ⵉⵊⵊⴻⵏ ⵢⴰⵔⵥⴻⴼ ⴰⵙ ⴰⵔⴻⴱⴱⵉ ⴰⴳⵍⴰ ⴷ ⵜⵅⵓⴱⴰⵢ ⴷ ⵛⵛⴰⵏ. ⴰⵇⴰ ⵡⴰⵔ ⵉⵜⵜⵅⴻⵚⵚⵉ ⵡⴰⵍⵓ ⵉ ⵍⴻⵄⵎⴰⵔ ⵏⵏⴻⵙ ⵥⵉ ⵎⴰⵔⵔⴰ ⵎⵉⵏ ⴷⴰⵢⴻⵙ ⴷ ⵎⴻⵥⵔⵉ, ⵎⴰⵛⴰ ⴰⵔⴻⴱⴱⵉ ⵡⴰⵔ ⵜ ⵉⵊⵊⵉ ⴰⴷ ⵥⵥⴰⵢⴻⵙ ⵉⵛⵛ, ⵎⴰⵖⴰⵔ ⵉⵊⵊ ⵏ ⵓⴱⴰⵔⵔⴰⵏⵉ ⴰⴷ ⵜ ⵉⵛⵛ. ⴰⵇⴰ ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ ⴷ ⵉⵊⵊ ⵏ ⵍⵖⴰⵔ ⴷ ⴰⵄⴻⴼⴼⴰⵏ.

3 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⵢⴻⵊⵊ-ⴷⴷ ⵎⵢⴰ ⵏ ⵉⵃⴻⵏⵊⵉⵔⴻⵏ ⵓ ⵉⴷⴷⴰⵔ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ, ⴰⵍⴰⵎⵉ ⴷⴻⵡⵍⴻⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⴷⴻⴳ ⵡⴰⵟⵟⴰⵙ, ⵎⴰⵛⴰ ⵍⴻⵄⵎⴰⵔ ⵏⵏⴻⵙ ⵡⴰⵔ ⵉⵊⵊⵉⵡⴻⵏ ⵛⴰ ⵙ ⵍⵅⴰⵔ ⵓ ⵡⴰⵔ ⵉⵜⵜⵡⵉⴼⴼ ⵡⴻⵏⴹⴻⵍ ⵉ ⵏⴻⵜⵜⴰ, ⵏⴻⵛⵛ ⴰⴷ ⵉⵏⵉⵖ: ⵉⵊⵊ ⵏ ⵡⴻⵖⵔⴰⵢ ⵜⴻⵛⵏⴰ ⴰⵙ ⵅ ⵏⴻⵜⵜⴰ. 4 ⵎⴰⵖⴰⵔ ⵢⵓⵙⴰ-ⴷⴷ ⴷⵉ ⵍⴱⴰⵟⴻⵍ ⵓⵛⴰ ⵉⴼⴼⴻⵖ ⴷⵉ ⵜⴰⴵⴻⵙⵜ ⵓ ⵙ ⵜⴰⴵⴻⵙⵜ ⵉⵜⵜⵡⴰⵍⴻⵃⵃⴻⴼ ⵉⵙⴻⵎ ⵏⵏⴻⵙ. 5 ⵏⴻⵜⵜⴰ ⵄⴰⵡⴻⴷ ⵡⴰⵔ ⵉⵥⵔⵉ ⵜⴰⴼⵓⵛⵜ ⵓ ⵡⴰⵔ ⵜⵜ ⵉⵙⵙⵉⵏ. ⴰⵎⵎⵓ ⵖⴰⵔ ⵡⴰ ⵍⵀⵓⴷⵏⴻⵜ ⴽⵜⴰⵔ ⵅ ⵡⴻⵔⵢⴰⵥ ⵏⵏⵉ,^■   6 ⵡⴰⵀ, ⵡⴰⵅⵅⴰ ⵎⴰⵍⴰ ⵏⴻⵜⵜⴰ ⵉⴷⴷⴰⵔ ⴰⵍⴼⴰⵢⴻⵏ ⵏ ⵉⵙⴻⴳⴳⵯⵓⵙⴰ, ⵎⴰⵛⴰ ⴱⵍⴰ ⵎⴰ ⴰⴷ ⵉⵥⴰⵔ ⵍⵅⴰⵔ! ⵎⴰ ⵡⴰⵔ ⴳⴳⵓⵔⴻⵏ ⵎⴰⵔⵔⴰ ⵖⴰⵔ ⵡⴻⵎⵛⴰⵏ ⴷ ⵉⵊⵊ?

7 ⵎⴰⵔⵔⴰ ⴰⵔⴱⴻⵔ ⵏ ⴱⵏⴰⴷⴻⵎ ⵉ ⵓⵇⴻⵎⵎⵓⵎ ⵏⵏⴻⵙ, ⵡⴰⵅⵅⴰ ⴰⵎⴻⵏⵏⵉ ⵄⴻⵎⵎⴰⵔⵚ ⵡⴰⵔ ⵉⵜⵜⵛⵛⵓⵔⵉ ⵍⴻⵄⵎⴰⵔ ⵏⵏⴻⵙ. 8 ⵎⴰⵖⴰⵔ ⵎⴰⵏ ⵍⴻⴼⴹⴻⵍ ⵉ ⵓⵎⵉⵖⵉⵙ ⵅ ⵓⴱⵓⵀⴰⵍⵉ? ⵎⴰⵏ ⵍⴻⴼⴹⴻⵍ ⵉ ⵓⵎⴻⵥⵍⵓⴹ ⵏⵏⵉ ⵉⵙⵙⵏⴻⵏ ⴰⴷ ⵢⵓⵢⵓⵔ ⵥⵥⴰⵜ ⵉ ⵢⴻⵏⵏⵉ ⵉⴷⴷⴰⵔⴻⵏ? 9 ⵉⵃⵍⴰ ⵎⵉⵏ ⵉⴵⴰⵏ ⵥⵥⴰⵜ ⵉ ⵜⵉⵟⵟⴰⵡⵉⵏ ⵅ ⵡⴻⵜⵍⴰⵄ ⵏ ⵍⴻⵄⵎⴰⵔ. ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.

10 ⵎⵉⵏ ⵎⴰ ⵜⵓⵖⴰ ⵉⴵⴰⵏ, ⴰⵇⴰ ⵉⵙⴻⵎ ⵏⵏⴻⵙ ⵉⵜⵜⵡⴰⵍⴰⵖⴰ ⵇⴱⴻⵍ, ⵓ ⵜⵓⵖⴰ ⵉⵜⵜⵡⴰⵙⵙⴻⵏ ⵎⵉⵏ ⵖⴰ ⵢⵉⵍⵉ ⵡⴻⵔⵢⴰⵥ. ⵏⴻⵜⵜⴰ ⵡⴰⵔ ⵉⵥⴻⵎⵎⴰⵔ ⴰⴷ ⵉⵎⵛⵓⴱⴱⴻⵛ ⴰⴽ-ⴷ ⵡⴻⵏⵏⵉ ⵅⴰⵙ ⵉⵊⴻⵀⴷⴻⵏ.

11 ⵎⴰⵖⴰⵔ ⴰⵇⴰ ⴷⵉⵏ ⴰⵟⵟⴰⵙ ⵏ ⵡⴰⵡⴰⵍⴻⵏ ⵏⵏⵉ ⵢⴰⵔⴻⵏⵏⵢⴻⵏ ⴷⵉ ⵍⴱⴰⵟⴻⵍ. ⵎⴰⵏ ⵍⴻⴼⴹⴻⵍ ⵏ ⵓⵢⴰ ⵉ ⴱⵏⴰⴷⴻⵎ?

12 ⵎⴰⵖⴰⵔ ⵡⵉ ⵉⵥⴻⵎⵎⴰⵔⴻⵏ ⴰⴷ ⵉⵙⵙⴻⵏ ⵎⵉⵏ ⵉⵃⵍⴰⵏ ⵉ ⴱⵏⴰⴷⴻⵎ ⴷⵉ ⵜⵓⴷⴰⵔⵜ ⵏⵏⴻⵙ ⴷⵉ ⵍⵡⴻⵇⵜ ⵏ ⵍⵇⴻⴷⴷ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⵉⴼⴻⵏⵏⴰⵏ ⵏⵏⵉ ⵉⵙⵙⴻⵄⴷⴷⵓ ⴰⵎ ⵜⵉⵍⵉ? ⵎⴰⵖⴰⵔ ⵡⵉ ⵉⵥⴻⵎⵎⴰⵔⴻⵏ ⴰⴷ ⵉⵙⵙⵛⴻⵏ ⵉ ⴱⵏⴰⴷⴻⵎ ⵎⵉⵏ ⵖⴰ ⵉⵎⵙⴰⵔⴻⵏ ⴰⵡⴰⵔⵏⵉ ⴰⵙ ⵙⴰⴷⵓ ⵜⴼⵓⵛⵜ? ^■