1 ⵥⵔⵉⵖ ⵄⴰⵡⴻⴷ ⵎⴰⵔⵔⴰ ⴷⴷⴻⴵ ⵉ ⵉⵜⵜⵡⴰⴳⴳⴻⵏ ⵙⴰⴷⵓ ⵜⴼⵓⵛⵜ. ⵅⵥⴰⵔ, ⴰⵇⴰ ⴷⴰ ⵉⵎⴻⵟⵟⴰⵡⴻⵏ ⵏ ⵢⵉⵏⵏⵉ ⵉⵜⵜⵡⴰⴷⴻⴵⴻⵏ, ⵉⵏⵏⵉ ⵡⴰⵔ ⵖⴰⵔ ⵉⴵⵉ ⵓⵎⴼⴻⵡⵡⴻⵊ. ⵉⴼⴼⴻⵖ-ⴷⴷ ⵍⵄⵓⵏⴼ ⵥⴻⴳ ⵓⴼⵓⵙ ⵏ ⵢⵉⵏⵏⵉ ⵜⴻⵏ ⵉⵜⵜⴻⴷⴵⴰⵏ, ⵎⴰⵛⴰ ⵡⴰⵔ ⵖⴰⵔⵙⴻⵏ ⴱⵓ ⵓⵎⴼⴻⵡⵡⴻⵊ. 2 ⵏⴻⵛⵛ ⵚⴻⴱⴱⵃⴻⵖ ⵉⵎⴻⵜⵜⵉⵏⴻⵏ ⵏⵏⵉ ⵉⵎⵎⵓⵜⴻⵏ ⵄⴰⴷ ⴰⵟⵟⴰⵙ ⵥⴻⴳ ⵡⴰⵎⵉ, ⵥⴻⴳ ⵉⵏⵏⵉ ⵉⴷⴷⴰⵔⴻⵏ, ⵉⵏⵏⵉ ⵄⴰⴷ ⵉⴷⴷⴰⵔⴻⵏ. 3 ⵉⵃⵍⴰⵏ ⵅⴰⵙⴻⵏ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⵡⴻⵏⵏⵉ ⵡⴰⵔ ⵉⴵⵉⵏ ⵄⴰⴷ, ⴷ ⵡⴻⵏⵏⵉ ⵡⴰⵔ ⵉⵥⵔⵉⵏ ⵜⵉⵎⴻⴳⴳⴰ ⵜⵉⵄⴻⴼⴼⴰⵏⵉⵏ ⵏⵏⵉ ⵉⵜⵜⵡⴰⴳⴳⴻⵏⵜ ⵙⴰⴷⵓ ⵜⴼⵓⵛⵜ.

4 ⵏⴻⵛⵛ ⵥⵔⵉⵖ ⵎⴰⵔⵔⴰ ⴰⵎⴰⵔⵔⴻⵜ ⴷ ⵎⴰⵔⵔⴰ ⵜⵉⵥⴻⵎⵎⴰⵔ ⴷⵉ ⵍⵅⴻⴷⵎⴻⵜ, ⴰⵇⴰ-ⵜ ⵎⵖⵉⵔ ⴷ ⴰⵎⵄⴰⵏⴰⴷ ⵏ ⵉⵊⵊ ⴰⴽ-ⴷ ⵡⴻⵏⵏⴻⵖⵏⵉ. ⵓⵍⴰ ⴷ ⵎⴰⵏ ⴰⵢⴰ ⴰⵇⴰ-ⵜ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ. 5 ⴰⴱⵓⵀⴰⵍⵉ ⵉⴹⴼⴻⵙ ⵉⴼⴰⵙⵙⴻⵏ ⵏⵏⴻⵙ ⵓⵛⴰ ⵉⵜⵜⴻⵜⵜ ⴰⵢⵙⵓⵎ ⵏ ⵉⵅⴻⴼ ⵏⵏⴻⵙ. ^■   6 ⵉⵃⵍⴰ ⵉⵊⵊ ⵏ ⵡⵓⵔⵓ ⵏ ⵓⴼⵓⵙ ⵉⵛⵛⵓⵔ ⵙ ⵍⵀⵓⴷⵏⴻⵜ ⵓⵍⴰ ⵜⵏⴰⵢⴻⵏ ⵏ ⵉⴼⴰⵙⵙⴻⵏ ⵛⵛⵓⵔⴻⵏ ⵙ ⴰⵔⴱⴻⵔ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.

7 ⵄⴰⵡⴻⴷ ⵥⵔⵉⵖ ⵛⴰ ⵎⵉⵏ ⵉⴵⴰⵏ ⴷⵉ ⵍⴱⴰⵟⴻⵍ ⵙⴰⴷⵓ ⵜⴼⵓⵛⵜ. 8 ⴰⵇⴰ ⴷⵉⵏ ⵉⵊⵊⴻⵏ ⴰⵇⴰ ⵜ ⵃⴰⴼⵉ ⵓ ⵡⴰⵔ ⴷⵉⵏ ⵡⴻⵏⵏⵉ ⴷ ⵡⵉⵙⵙ ⵜⵏⴰⵢⴻⵏ ⵉ ⵉⴱⴻⴷⴷⴻⵏ ⵖⴰⵔⴻⵙ. ⵓⵍⴰ ⵡⴰⵔ ⵖⴰⵔⴻⵙ ⵉⴵⵉ ⵓⵃⴻⵏⵊⵉⵔ ⵓ ⵡⴰⵔ ⵖⴰⵔⴻⵙ ⵓⵎⴰⵙ. ⵡⴰⵔ ⵉⴵⵉ ⵓⵏⴻⴳⴳⴰⵔ ⵖⴰⵔ ⵎⴰⵔⵔⴰ ⴰⵔⴱⴻⵔ ⵏⵏⴻⵙ, ⵓⵍⴰ ⵡⴰⵔ ⵜᵉⵜⵜⵢⵉⵡⵉⵏ ⵜⵉⵟⵟ ⵏⵏⴻⵙ ⵥⴻⴳ ⵡⴰⴳⵍⴰ. “ⵉ ⵓⵎⵉ ⵜⵜⴻⴳⴳⴻⵖ ⵜⴰⵎⴰⵔⴰ ⵓ ⵙⵙⴻⴽⴽⵉⵖ ⵜⵜ ⴷⵉ ⵍⴻⵄⵎⴰⵔ ⵉⵏⵓ ⵥⵉ ⵜⵛⵓⵏⵉ?” ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ ⴷ ⵉⵊⵊ ⵏ ⵛⵛⵖⴻⵍ ⵉⵡⵄⴰⵔ ⵉ ⵢⴻⴵⴰ. 9 ⵜⵏⴰⵢⴻⵏ ⵃⵙⴻⵏ ⵥⴻⴳ ⵉⵊⵊⴻⵏ ⵡⴰⵀⴰ, ⵎⴰⵖⴰⵔ ⵏⵉⵜⵏⵉ ⵖⴰⵔⵙⴻⵏ ⵍⵎⵓⵏⴻⵜ ⴷ ⵍⴻⵎⵍⵉⵃ ⴷⴻⴳ ⵡⴰⵔⴱⴻⵔ ⵏⵙⴻⵏ.

10 ⵎⴰⵖⴰⵔ ⵎⴰⵍⴰ ⵏⵉⵜⵏⵉ ⵡⴹⴰⵏ, ⴰⴷ ⵉⵙⵙⵏⴻⴽⴽⴰⵔ ⵉⵊⵊⴻⵏ ⵥⴻⴳ ⵓⵎⵄⴰⵛⴰⵔ ⵏⵏⴻⵙ ⵄⴰⵡⴻⴷ. ⵎⴰⵛⴰ ⴰⵅⴻⵢⵢⴻⴱ ⵉ ⵡⴻⵏⵏⵉ ⵉ ⵉⴵⴰⵏ ⵡⴻⵃⵃⴷⴻⵙ ⵎⴰⵍⴰ ⵏⴻⵜⵜⴰ ⵉⵡⴹⴰ, ⵎⵉⵏⵥⵉ ⵡⴰⵔ ⴷⵉⵏ ⵉⵜⵜⵉⵍⵉ ⵃⴻⴷ ⵎⴰⵃⴻⵏⴷ ⴰⴷ ⵜ ⵉⵙⵙⵏⴻⴽⴽⴰⵔ ⴰⴷ ⵉⴱⴻⴷⴷ.

11 ⵄⴰⵡⴻⴷ ⵎⴰⵍⴰ ⵜⵏⴰⵢⴻⵏ ⵟⵟⵙⴻⵏ ⵎⵓⵏⴻⵏ, ⴰⴷ ⵖⴰⵔⵙⴻⵏ ⵢⵉⵍⵉ ⵍⴻⵃⵎⵓ, ⵎⴰⵛⴰ ⵎⴰⵎⵎⴻⵛ ⵉ ⵖⴰ ⵉⴳⴳ ⵉⵊⵊⴻⵏ ⵡⴻⵃⵃⴷⴻⵙ ⴰⴷ ⵉⵃⵎⴰ?

12 ⵎⴰⵛⴰ ⵎⴰⵍⴰ ⵏⴻⵜⵜⴰ, ⵡⴻⵃⵃⴷⴻⵙ, ⵢⴰⵔⵏⴰ ⵉⵊⵊⴻⵏ, ⵥⴻⵎⵎⴰⵔⴻⵏ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴰⴷ ⵖⴰⵔⵙⴻⵏ ⴱⴻⴷⴷⴻⵏ. ⵉⵊⵊ ⵏ ⵡⴻⵙⵖⵓⵏ ⵉⵎⵓⴷⴻⵏ ⵅ ⵜⵍⴰⵜⴰ ⵡⴰⵔ ⵉⵇⴻⵟⵟⵓ ⴷⴻⵖⵢⴰ.

13 ⵉⵃⵔⴰ ⵉⵊⵊ ⵏ ⵓⵃⵓⴷⵔⵉ ⴷ ⴰⵎⴻⵥⵍⵓⴹ ⴷ ⴰⵎⵉⵖⵉⵙ ⵥⴻⴳ ⵉⵊⵊ ⵏ ⵓⵊⴻⴵⵉⴷ ⵉⵡⵙⴰⵔ ⴷ ⴰⴱⵓⵀⴰⵍⵉ ⵉ ⵡⴰⵔ ⵉⴼⴻⵀⵀⵎⴻⵏ ⵄⴰⴷ ⵉ ⵡⴻⵄⵍⴰⵎ.

14 ⵎⴰⵖⴰⵔ ⴰⴷ ⴷⴷ-ⵉⴼⴼⴻⵖ ⵥⵉ ⵍⴻⵃⴱⴻⵙ ⵎⴰⵃⴻⵏⴷ ⴰⴷ ⵉⴷⵡⴻⵍ ⴷ ⴰⵊⴻⴵⵉⴷ ⵡⴰⵅⵅⴰ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⴷ ⴰⵎⴻⵥⵍⵓⴹ ⴷⵉ ⵜⴳⴻⵍⴷⵉⵜ ⵏⵏⴻⵙ.

15 ⵏⴻⵛⵛ ⵥⵔⵉⵖ ⵎⴰⵔⵔⴰ ⵉⵏⵏⵉ ⵉⴷⴷⴰⵔⴻⵏ ⵉ ⵉⴳⴳⵓⵔⴻⵏ ⵙⴰⴷⵓ ⵜⴼⵓⵛⵜ, ⵊⵎⵉⵄ ⴰⴽ-ⴷ ⵓⵃⵓⴷⵔⵉ, ⵡⴻⵏⵏⵉ ⴷ ⵡⵉⵙⵙ ⵜⵏⴰⵢⴻⵏ ⵏⵏⵉ ⴳⴳⵓⵔ ⴰⴷ ⵉⴱⴻⴷⴷ ⴷⴻⴳ ⵡⴻⵎⵛⴰⵏ ⵏⵏⴻⵙ.

16 ⵡⴰⵔ ⴷⵉⵏ ⴰⵏⴻⴳⴳⴰⵔ ⵖⴰⵔ ⵍⴳⴻⵏⵙ ⵏⵏⵉ ⴰⵎ ⵉⴽⵎⴻⵍ ⵏⵏⵉ ⵥⵉ ⵉⵥⵡⴰⵔ ⵏⴻⵜⵜⴰ ⴰⵎ ⵢⵉⵅⴻⴼ. ⵡⴰⵅⵅⴰ ⴰⵎⴻⵏⵏⵉ ⵓⵍⴰ ⴷ ⵉⵏⵏⵉ ⴷⴷ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵙ, ⵡⴰⵔ ⵥⵥⴰⵢⴻⵙ ⴼⴰⵔⵔⵃⴻⵏ. ⴰⵎⵎⵓ ⵓⵍⴰ ⴷ ⵎⴰⵏ ⴰⵢⴰ ⴰⵇⴰ-ⵜ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.

17 ⵃⴹⴰ ⴰⵚⵓⵔⵉⴼ ⵏⵏⴻⴽ ⵎⴰⵍⴰ ⵛⴻⴽ ⵜⴻⴳⴳⵓⵔⴻⴷ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ. ⴰⵇⴰⵔⵔⴻⴱ ⵃⵉⵎⴰ ⴰⴷ ⵜⴻⵙⵃⴻⵙⵙⴻⴷ, ⵃⵙⴻⵏ ⵥⴻⴳ ⵓⵡⴻⵀⵀⴻⴱ ⵏ ⵜⵖⴰⵔⵚⵜ ⵙ ⵓⴼⵓⵙ ⵏ ⵉⴱⵓⵃⴰⵍⵉⵢⵢⴻⵏ, ⵎⴰⵖⴰⵔ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵡⴰⵍⵓ ⵓ ⴰⵎⵎⵓ ⵉ ⵖⴰ ⴳⴳⴻⵏ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ.