1 ⵎⴰⵔⵔⴰ ⵖⴰⵔⴻⵙ ⵍⵎⵉⵊⴰⵍ ⵏⵏⴻⵙ ⵓ ⴰⵇⴰ ⴷⵉⵏ ⵜⴰⵙⴰⵄⵄⴻⵜ ⵉⵜⵜⵡⴰⴳⴳⴻⵏ ⵉ ⴽⵓⵍ ⵜⴰⵎⴻⵙⵍⴰⵛⵜ ⵙⴰⴷⵓ ⴰⵊⴻⵏⵏⴰ.

2 ⴰⵇⴰ ⴷⵉⵏ ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵔⵡⴰ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⵎⴻⵡⵜ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵥⵥⵓⵜ ⵓ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵇⵍⴰⵄ ⵏ ⵎⵉⵏ ⵉⵜⵡⴰⵥⵥⵓⵏ,

3 ⵉⵛⵜ ⵏ ⵜⵙⴰⵄⵄⴻⵜ ⵏ ⵜⵎⴻⵏⵖⵉⵡⵜ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵙⴳⴻⵏⴼⵉ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵀⴷⴰⵎ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⴻⴱⵏⵉ,

4 ⵉⵛⵜ ⵏ ⵜⵙⴰⵄⵄⴻⵜ ⵏ ⵉⵎⴻⵟⵟⴰⵡⴻⵏ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴹⴻⵃⵃⴰⵛⵜ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵛⴹⴰⵏ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵛⵛⴹⵉⵃ,

5 ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵃⴻⵊⵊⴰⵔ ⵏ ⵡⴻⵥⵔⵓ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵊⵔⴰⵡ ⵏ ⵡⴻⵥⵔⵓ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵓⴷⴰⵔⵔⴻⵄ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⴰⴳⴳⵯⴰⵊ ⵅ ⵓⴷⴰⵔⵔⴻⵄ, ^■  

6 ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵔⴻⵥⵥⵓⵜ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵡⴻⴷⴷⴰⵔ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵅⴻⵎⵎⴻⵔ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵙⴻⵢⵢⴻⴱ,

7 ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵛⴰⵔⵔⴻⴳ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵅⴻⵢⵢⴻⴹ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵙⴻⵖⴷⵉ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⵀⴰⵔⴹ,

8 ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵢⵔⵉ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵛⵔⴰⵀ,

ⵉⵛⵜ ⵏ ⵜⵙⴰⵄⵄⴻⵜ ⵏ ⴳⴰⵔⵔⴰ ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⴻⵀⵏⴰ.

9 ⵎⴰⵏ ⵜⵉⵥⵉ ⵖⴰⵔ ⵡⴻⵏⵏⵉ ⵉⵅⴻⴷⴷⵎⴻⵏ ⵅ ⵎⵉⵏ ⵅⴻⴼ ⵢⴰⵔⴻⴱⴱⴻⵍ? ^■  

10 ⵏⴻⵛⵛ ⵥⵔⵉⵖ ⵛⵛⵖⴻⵍ ⵏⵏⵉ ⵉⵡⵛⴰ ⴰⵔⴻⴱⴱⵉ ⵉ ⵜⴰⵔⵡⴰ ⵏ ⴱⵏⴰⴷⴻⵎ ⵎⴰⵃⴻⵏⴷ ⴰⴷ ⵥⵥⴰⵢⴻⵙ ⵙⵙⵉⵃⵍⴻⵏ ⵉⵅⴻⴼ ⵏⵙⴻⵏ.

11 ⵏⴻⵜⵜⴰ ⵉⴳⴳⴰ ⵎⴰⵔⵔⴰ ⴷ ⴰⵚⴻⴱⵃⴰⵏ ⴷⵉ ⵍⵡⴻⵇⵜ ⵏⵏⴻⵙ. ⵉⴳⴳⴰ ⵓⵍⴰ ⴷ ⴰⴽⵓⴷ ⵉ ⵍⴻⴱⴷⴰ ⴷⴻⴳ ⵡⵓⵍ ⵏⵙⴻⵏ, ⴱⵍⴰ ⵎⴰ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵉⵃⴰⴽⴰ ⴷⵉ ⵜⵎⴻⴳⴳⴰ ⵏⵏⵉ ⵉⴳⴳⴰ ⴰⵔⴻⴱⴱⵉ ⵥⴻⴳ ⵓⵎⴻⵥⵡⴰⵔⵓ ⵖⴰⵔⴻⵙ ⴰⵍ ⴰⵏⴻⴳⴳⴰⵔⵓ.

12 ⵏⴻⵛⵛ ⵓⴼⵉⵖ ⵡⴰⵔ ⵖⴰⵔⵙⴻⵏ ⵉⴵⵉ ⵎⵉⵏ ⵉⵃⵍⴰⵏ ⵅ ⵎⵉⵏⵏⵉ ⴼⴰⵔⵔⵃⴻⵏ ⵉⵡⴷⴰⵏ ⵏⵉⵖ ⴰⴷ ⴰⵔⵔⴻⵏ ⵎⴻⵥⵔⵉ ⵎⴻⵍⵎⵉ ⵏⵉⵜⵏⵉ ⵄⴰⴷ ⴷⵉ ⵜⵓⴷⴰⵔⵜ ⵏⵙⴻⵏ.

13 ⵓ ⵄⴰⵡⴻⴷ ⴰⵇⴰ ⴽⵓⵍ ⴱⵏⴰⴷⴻⵎ ⴰⴷ ⵉⵛⵛ ⵓ ⴰⴷ ⵉⵙⵓ ⵓⵛⴰ ⴰⴷ ⵢⴰⵔⵔ ⵎⴻⵥⵔⵉ ⴷⵉ ⵎⵉⵏ ⵉⵚⴻⴱⵃⴻⵏ ⴷⵉ ⵎⴰⵔⵔⴰ ⴰⵎⴰⵔⵔⴻⵜ ⵏⵏⴻⵙ. ⴰⵢⴰ ⴷ ⵉⵛⵜ ⵏ ⵜⴰⵔⵥⴻⴼⵜ ⵏ ⴰⵔⴻⴱⴱⵉ.

14 ⵏⴻⵛⵛ ⵙⵙⵏⴻⵖ ⴰⵇⴰ ⵎⴰⵔⵔⴰ ⵎⵉⵏ ⵉⵜⵜⴻⴳⴳ ⴰⵔⴻⴱⴱⵉ, ⴰⴷ ⵢⵉⵍⵉ ⵉ ⵍⴻⴱⴷⴰ. ⵡⴰⵔ ⵖⴰⵔⴻⵙ ⵉⵜⵜⵎⴰⵔⵏⵉ ⵡⴰⵍⵓ ⵓ ⵡⴰⵔ ⵥⵥⴰⵢⴻⵙ ⵉⵜⵜⵡⴰⵙⴻⵏⵇⵉⵙ ⵡⴰⵍⵓ. ⴰⵔⴻⴱⴱⵉ ⵉⴳⴳⴰ ⵉ-ⵜ ⵎⴰⵃⴻⵏⴷ ⴰⴷ ⴳⴳⵯⴻⴷⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ.

15 ⵎⵉⵏ ⵉⴵⴰⵏ, ⵜⵓⵖⴰ ⵉⴵⴰ ⵇⴱⴻⵍ, ⵓⵛⴰ ⵎⵉⵏ ⵖⴰ ⵢⵉⵍⵉⵏ, ⵜⵓⵖⴰ ⵉⴵⴰ ⵄⴰⴷ. ⴰⵔⴻⴱⴱⵉ ⵢⴰⵔⴻⵥⵥⵓ ⵅ ⵎⵉⵏ ⵉⵄⴷⵓⵏ.

16 ⴰⵇⴰ ⵥⵔⵉⵖ ⵙⴰⴷⵓ ⵜⴼⵓⵛⵜ ⵄⴰⵡⴻⴷ ⴰⵎⵛⴰⵏ ⵏ ⵍⵃⴻⵇⵇ, ⴰⵇⴰ ⵉⵙⴻⵍⵍⴻⵟ ⴷⵉⵏ ⵍⵖⴻⵛⵛ, ⵓⵍⴰ ⴷ ⴰⵎⵛⴰⵏ ⵏ ⵜⵙⴻⴳⴷⴰ, ⴰⵇⴰ ⴷⵉⵏ ⵍⵖⴰⵔ.

17 ⵏⴻⵛⵛ ⵏⵏⵉⵖ ⴷⴻⴳ ⵡⵓⵍ ⵉⵏⵓ: “ⴰⵔⴻⴱⴱⵉ ⴰⴷ ⵉⵃⴽⴻⵎ ⴰⵎⵙⴻⴳⴳⴻⴷ ⴷ ⵓⵄⴻⴼⴼⴰⵏ, ⵎⴰⵖⴰⵔ ⴷⵉⵏⵏⵉ ⵉⵛⵜ ⵏ ⵜⵙⴰⵄⵄⴻⵜ ⵉ ⴽⵓⵍ ⵜⴰⵎⴻⵙⵍⴰⵛⵜ ⵓ ⵉ ⵇⴰⵄ ⵍⵅⴻⴷⵎⴻⵜ.”

18 ⵏⴻⵛⵛ ⵏⵏⵉⵖ ⴷⴻⴳ ⵡⵓⵍ ⵉⵏⵓ: “ⴰⵇⴰ ⴷⵉ ⵟⵟⵡⴻⵄ ⵏ ⵜⴰⵔⵡⴰ ⵏ ⴱⵏⴰⴷⴻⵎ, ⴰⵇⴰ ⴰⵔⴻⴱⴱⵉ ⴰⴷ ⵜⴻⵏ ⵉⵙⵙⵉⴼⴻⴼ ⵓ ⵏⵉⵜⵏⵉ ⴳⴳⵓⵔ ⴰⴷ ⵜⵡⴰⵍⴰⵏ ⴰⵇⴰ ⵏⵉⵜⵏⵉ ⴰⵎⴻⵛⵏⴰⵡ ⵍⵎⴰⵍ, ⵏⵉⵜⵏⵉ ⴷⴻⴳ ⵉⵅⴻⴼ ⵏⵙⴻⵏ.”

19 ⵎⴰⵖⴰⵔ ⵅ ⵜⵉⵔⴰ ⵏ ⵜⴰⵔⵡⴰ ⵏ ⴱⵏⴰⴷⴻⵎ ⵓ ⵅ ⵜⵉⵔⴰ ⵏ ⵍⵎⴰⵍ: ⵏⵉⵜⵏⵉ ⵖⴰⵔⵙⴻⵏ ⵜⵉⵔⴰ ⴷ ⵉⵛⵜ. ⴰⵎ ⵎⴰⵎⵎⴻⵛ ⵉⵎⵎⵓⵜ ⵡⴰ, ⵉⵎⵎⵓⵜ ⵓⵍⴰ ⴷ ⵡⴻⵏⵏⴻⵖⵏⵉ, ⵎⴰⵔⵔⴰ ⵉⴷⵙⴻⵏ ⵖⴰⵔⵙⴻⵏ ⴷ ⵜⵡⴰⵔⵔⵉⵜ ⵏ ⵏⵏⴻⴼⵙ ⴷ ⵉⵊⵊ. ⵡⴰⵔ ⴷⵉⵏ ⵉⴵⵉ ⵍⴻⴼⴹⴻⵍ ⵉ ⴱⵏⴰⴷⴻⵎ ⵅ ⵍⵎⴰⵍ, ⵎⴰⵖⴰⵔ ⵎⴰⵔⵔⴰ ⴰⵇⴰ-ⵜ ⴷⵉ ⵍⴱⴰⵟⴻⵍ. 20 ⵎⴰⵔⵔⴰ ⵉⴷⵙⴻⵏ ⴳⴳⵓⵔⴻⵏ ⵖⴰⵔ ⵉⵊⵊ ⵏ ⵡⴻⵎⵛⴰⵏ, ⵎⴰⵔⵔⴰ ⵏⵉⵜⵏⵉ ⵥⴻⴳ ⵓⵛⴰⵍ ⵓⵛⴰ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵓⵛⴰⵍ. ^■   21 ⵡⵉ ⵉⵙⵙⵏⴻⵏ ⵎⴰ ⴱⵓⵃⴱⴻⵍ ⵏ ⵜⴰⵔⵡⴰ ⵏ ⴱⵏⴰⴷⴻⵎ ⴰⴷ ⵉⴳⴻⵄⵄⴻⴷ ⵖⴰⵔ ⵙⴻⵏⵏⴻⵊ ⵓ ⴱⵓⵃⴱⴻⵍ ⵏ ⵍⵎⴰⵍ ⴰⴷ ⴷⴷ-ⵉⵀⵡⴰ ⵖⴰⵔ ⵜⴻⵎⵎⵓⵔⵜ? 22 ⴰⵎⵎⵓ ⵉ ⵜⵡⴰⵍⵉⵖ ⵡⴰⵔ ⵉⴵⵉ ⵎⵉⵏ ⵉⵃⵍⴰⵏ ⵅ ⵎⵉⵏⵏⵉ ⵉⴼⴰⵔⵔⴻⵃ ⴱⵏⴰⴷⴻⵎ ⴷⵉ ⵜⵎⴻⴳⴳⴰ ⵏⵏⴻⵙ, ⵎⴰⵖⴰⵔ ⵎⴰⵏ ⴰⵢⴰ ⴷ ⵜⴰⵙⵖⴰⵔⵜ ⵏⵏⴻⵙ, ⵎⵉⵏⵥⵉ ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⵜ ⵢⴰⵔⵔ ⴰⵍ ⵖⴰ ⵉⵥⴰⵔ ⵎⵉⵏ ⵖⴰ ⵢⵉⵍⵉⵏ ⴰⵡⴰⵔⵏⵉ ⴰⵙ?