ⴰⵡⴰⵍⴻⵏ ⵉⵡⴻⵥⵏⴻⵏ ⵏ ⴰⵊⵓⵔ
30
1 ⴰⵡⴰⵍⴻⵏ ⵏ ⴰⵊⵓⵔ, ⵎⵎⵉⵙ ⵏ ⵢⴰⴽⵉ. ⵜⴰⵎⴻⵙⵍⴰⵛⵜ ⵉⵇⴻⵙⵃⴻⵏ. ⴰⵡⴰⵍ ⵏ ⵡⴻⵔⵢⴰⵥ ⵉⵊⴻⵀⴷⴻⵏ ⵉ ⵉⵜⵉⵢⵉⵍ, ⵉ ⵉⵜⵉⵢⵉⵍ ⴷ ⵓⴽⴰⵍ.
2 ⵏⵉⵛⴰⵏ, ⴰⵇⴰ ⵏⴻⵛⵛ ⴷ ⴰⵇⴻⴼⴼⵓⵃ ⵏ ⵡⴻⵔⵢⴰⵥⴻⵏ,
ⵓ ⵍⴻⴼⵀⴰⵎⴻⵜ ⵏ ⴱⵏⴰⴷⴻⵎ ⵡⴰⵔ ⵖⴰⵔⵉ ⵜⴻⴵⵉ,
3 ⵓ ⵏⴻⵛⵛ ⵡⴰⵔ ⵍⵎⵉⴷⴻⵖ ⵜⵉⵖⵉⵜ,
ⵎⴰⵃⴻⵏⴷ ⴰⴷ ⵖⴰⵔⵉ ⵜⵉⵍⵉ ⵜⵓⵙⵙⵏⴰ ⵏ ⵓⵎⵇⴻⴷⴷⴰⵙ ⴰⵎⴻⵇⵇⵔⴰⵏ.
4 ⵡⵉ ⵉⴳⴻⵄⵄⴷⴻⵏ ⵖⴰⵔ ⵓⵊⴻⵏⵏⴰ ⵓⵛⴰ ⵉⵀⵡⴰ-ⴷⴷ?
ⵎⴰⵏ ⵡⴻⵏ ⵉⵢⴰⵔⵔⵡⴻⵏ ⴰⵚⴻⵎⵎⵉⴹ ⴷⴻⴳ ⵉⴼⴰⵙⵙⴻⵏ ⵏⵏⴻⵙ?
ⵡⵉ ⵉⵙⵙⴻⵏⵏⴹⴻⵏ ⴰⵎⴰⵏ ⴷⴻⴳ ⵡⴰⵔⵔⵓⴹ?
ⵡⵉ ⵢⴰⵔⴻⴽⴽⵏⴻⵏ ⵎⴰⵔⵔⴰ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ?
ⵎⴰⵏ ⵉⵙⴻⵎ ⵏⵏⴻⵙ ⵓ ⵎⴰⵏ ⵉⵙⴻⵎ ⵏ ⵎⵎⵉⵙ,
ⵎⴰⵍⴰ ⵛⴻⴽ ⵜⴻⵙⵙⵏⴻⴷ ⵜ? ■
5 ⵎⴰⵔⵔⴰ ⴰⵡⴰⵍⴻⵏ ⵏ ⴰⵔⴻⴱⴱⵉ ⵜⵜⵡⴰⵚⴻⴼⴼⴰⵏ,
ⴰⵇⴰ ⵏⴻⵜⵜⴰ ⴷ ⴰⴷⵓⵔⵔⵉ ⵉ ⵢⴻⵏⵏⵉ ⵅⴰⵙ ⵉⵜⵜⵛⴰⵍⴰⵏ. ■
6 ⵡⴰⵔ ⴰⵔⴻⵏⵏⵉ ⵖⴰⵔ ⵡⴰⵡⴰⵍⴻⵏ ⵏⵏⴻⵙ,
ⵃⵉⵎⴰ ⵏⴻⵜⵜⴰ ⵡⴰⵔ ⵛⴻⴽ ⵉⵜⵜⵡⴻⴱⴱⴻⵅ,
ⵓ ⴰⴷ ⵜⴱⴰⵏⴻⴷ-ⴷⴷ ⵛⴻⴽ ⴷ ⴱⵓ-ⵉⵅⴰⵔⵔⵉⵇⴻⵏ. ■
7 ⵏⴻⵛⵛ ⵜⵜⴰⵔⴻⵖ ⴰⵛ ⵜⵏⴰⵢⴻⵏ ⵏ ⵜⵎⴻⵙⵍⴰⵢⵉⵏ,
ⵡⴰⵔ ⵅⴰⴼⵉ ⵜⴻⵏⵜ ⵇⴻⵟⵟⴻⵄ ⵇⴱⴻⵍ ⵉ ⵖⴰ ⵎⵎⵜⴻⵖ.
8 ⵙⵉⴳⴳⵯⴻⵊ ⵅⴰⴼⵉ ⵎⵉⵏ ⵉⴱⴻⴹⵍⴻⵏ ⴷ ⵍⵀⴰⵔⴹ ⵉⵅⴰⵔⵔⵉⵇⴻⵏ,
ⵡⴰⵔ ⴷ ⴰⵢⵉ ⵜⵜⵉⵛ ⵥⵥⴻⵍⴹ ⵓⵍⴰ ⴷ ⵡⴰⴳⵍⴰ,
ⵙⴻⵄⴷⵓ ⴰⵢⵉ-ⴷⴷ ⵜⴰⵙⵖⴰⵔⵜ ⵉⵏⵓ ⵉ ⴷ ⴰⵢⵉ ⴷⴷ-ⵉⵜⵜⴰⵙⴻⵏ ⵥⴻⴳ ⵡⴻⵖⵔⵓⵎ,
9 ⵎⴰⵍⴰ ⵍⵍⴰ, ⵅⵎⵉ ⵉ ⵖⴰ ⵊⵊⵉⵡⵏⴻⵖ, ⴰⴷ ⵜⴰⵖ ⴰⴷ ⵛⴻⴽ ⵏⴽⴰⵔⴻⵖ,
ⴰⴷ ⵉⵏⵉⵖ ‘ⵡⵉ ⵉⴵⴰⵏ ⵙⵉⴷⵉ?’,
ⵏⵉⵖ ⵅⴻⵏⵏⵉ, ⵎⴰⵍⴰ ⵥⴻⵍⴹⴻⵖ, ⴰⴷ ⴰⵛⴰⵔⴻⵖ,
ⵓ ⴰⴷ ⴳⴳⴻⵖ ⵍⵄⵉⴱ ⴷⴻⴳ ⵢⵉⵙⴻⵎ ⵏ ⴰⵔⴻⴱⴱⵉ ⵉⵏⵓ.
10 ⵡⴰⵔ ⵛⴻⵇⵇⴻⴼ ⴷⴻⴳ ⵉⵊⵊ ⵏ ⵓⵎⵙⴻⵅⵅⴰⵔ ⵖⴰⵔ ⵙⵉⴷⵉⵙ ⵏⵏⴻⵙ,
ⵃⵉⵎⴰ ⵏⴻⵜⵜⴰ ⵡⴰⵔ ⵛⴻⴽ ⵉⵏⴻⵄⵄⴻⵍ ⵓ ⵅⴻⵏⵏⵉ ⵛⴻⴽ ⴰⴷ ⴷⴰⵢⴻⴽ ⵢⵉⵍⵉ ⵍⵄⵉⴱ.
11 ⴰⵇⴰ ⴷⵉⵏ ⵉⵊⵊ ⵏ ⵊⵊⵉⵍ ⵉ ⵉⵏⴻⵄⵄⵍⴻⵏ ⴱⴰⴱⴰⵙ,
ⵓ ⵡⴰⵔ ⵉⵜⵜⴱⴰⵔⴻⴽ ⵢⴻⵎⵎⴰⵙ,
12 ⵉⵊⵊ ⵏ ⵊⵊⵉⵍ ⵉ ⵢⴻⴵⴰⵏ ⴷ ⴰⵎⴻⵥⴷⴰⴳ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵎⴰⵛⴰ ⵡⴰⵔ ⵉⵜⵜⵡⴰⵙⵉⵔⴷ ⵥⵉ ⵍⴻⵅⵎⴻⵊ ⵏⵏⴻⵙ,
13 ⵉⵊⵊ ⵏ ⵊⵊⵉⵍ ⵙ ⵍⵅⴻⵥⵔⴰⵜ ⵉⵏⴻⴼⵅⴻⵏ,
ⵙ ⵡⴰⴱⵍⵉⵡⴻⵏ ⵏⵏⴻⵙ ⵉⴳⴻⵄⵄⴷⴻⵏ, ■
14 ⵉⵊⵊ ⵏ ⵊⵊⵉⵍ ⵙ ⵜⴻⵖⵎⴰⵙ ⴰⵎ ⵍⴻⵙⵢⵓⴼ ⴷ ⵜⴻⵖⵎⴰⵙ ⵏ ⵜⴻⵖⵎⴰⵔⵜ ⴰⵎ ⵍⴻⵎⵡⴰⵙ,
ⵃⵉⵎⴰ ⴰⴷ ⵚⴰⵔⴹⴻⵏ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵥⵉ ⵜⴻⵎⵎⵓⵔⵜ ⴷ ⵉⵎⴻⵥⵍⴰⴹ ⵥⴻⴳ ⵉⵡⴷⴰⵏ. ■
15 ⵜⴰⴷⴷⴰ ⵖⴰⵔⴻⵙ ⵜⵏⴰⵢⴻⵏ ⵏ ⵢⴻⵙⵙⵉⵙ ‘ⴻⵡⵛ!’ ‘ⴻⵡⵛ!’
ⴰⵇⴰ ⴷⵉⵏ ⵜⵍⴰⵜⴰ ⵏⵏⵉ ⵄⴻⵎⵎⴰⵔⵚ ⴰⴷ ⵊⵊⵉⵡⵏⴻⵏ.
ⴰⵔⴻⴱⵄⴰ ⵄⴻⵎⵎⴰⵔⵚ ⴰⴷ ⵉⵏⵉⵏ: “ⵛⴼⴰ!”
16 ⵍⴰⵅⴰⵔⵜ ⴷ ⵍⴻⵎⵍⴰⵡⴻⵜ ⵉⴱⴻⵍⵍⵄⴻⵏ,
ⵜⴰⵎⵎⵓⵔⵜ ⵉ ⵡⴰⵔ ⵉⵊⵊⵉⵡⵏⴻⵏ ⵄⴻⵎⵎⴰⵔⵚ ⵥⴻⴳ ⵡⴰⵎⴰⵏ,
ⵓⵍⴰ ⴷ ⵜⵎⴻⵙⵙⵉ ⵡⴰⵔ ⵇⵇⴰⵔⴻⵏⵜ ⵄⴻⵎⵎⴰⵔⵚ: “ⵛⴼⴰ!”
17 ⵜⵉⵟⵟ ⵉ ⵉⵙⵙⵜⴻⵀⵥⴰⵏ ⵥⵉ ⴱⴰⴱⴰⵙ,
ⵓ ⵜⴻⵙⵙⴻⵃⵇⴰⵔ ⵟⵟⴰⵄⴻⵜ ⵉ ⵢⴻⵎⵎⴰⵙ,
ⴰⴷ ⵜⵜ ⵇⴻⵍⵄⴻⵏ ⵉⴱⴰⵖⵍⵉⵡⴻⵏ ⵖⴰⵔ ⵜⴻⵖⵥⴰⵔⵜ,
ⵓ ⵉⵎⴻⵥⵢⴰⵏⴻⵏ ⵏ ⵓⴳⵉⴷⴻⵔ ⴰⴷ ⵜⵜ ⵛⵛⴻⵏ.
18 ⵜⵍⴰⵜⴰ ⴰⵢⴰ ⵏ ⵜⵎⴻⵙⵍⴰⵢⵉⵏ ⵄⴷⵓⵏⵜ ⴰⵢⵉ ⵙ ⵍⴻⵄⵊⴻⴱ,
ⴰⵔⴻⴱⵄⴰ ⵡⴰⵔ ⵜⴻⵏⵜ ⵙⵙⵉⵏⴻⵖ:
19 ⴰⴱⵔⵉⴷ ⵏ ⵓⴳⵉⴷⴻⵔ ⴷⴻⴳ ⵓⵊⴻⵏⵏⴰ,
ⴰⴱⵔⵉⴷ ⵏ ⵓⴼⵉⵖⴰⵔ ⵅ ⵜⴻⵚⴹⴰⵔⵜ,
ⴰⴱⵔⵉⴷ ⵏ ⵓⵖⴰⵔⵔⴰⴱⵓ ⴷⴻⴳ ⵡⵓⵍ ⵏ ⵍⴻⴱⵃⴰⵔ
ⵓ ⴰⴱⵔⵉⴷ ⵏ ⵡⴻⵔⵢⴰⵥ ⴰⴽ-ⴷ ⵜⴻⵄⵥⴰⵔⴻⵛⵜ.
20 ⴰⵎⵎⵓ ⵉ ⵉⵜⵜⴻⴳⴳ ⴰⴱⵔⵉⴷ ⵏ ⵉⵛⵜ ⵏ ⵜⴻⵎⵖⴰⵔⵜ ⵉⵥⴻⵏⵏⴰⵏ:
ⵏⴻⵜⵜⴰⵜ ⵜᵉⵜⵜⴻⵜⵜ, ⵜⴻⵙⵙⵉⵔⵉⴷ ⴰⵇⴻⵎⵎⵓⵎ ⵏⵏⴻⵙ,
ⵜⴻⵇⵇⴰⵔ: “ⵏⴻⵛⵛ ⵡⴰⵔ ⴳⴳⵉⵖ ⵡⴰⵍⵓ ⴷ ⵍⵖⴻⵛⵛ!”
21 ⵙⴰⴷⵓ ⵜⵍⴰⵜⴰ ⵏ ⵜⵎⴻⵙⵍⴰⵢⵉⵏ-ⴰ ⵜⴻⵏⵀⴻⵥⵥ ⵜⴻⵎⵎⵓⵔⵜ,
ⵙⴰⴷⵓ ⴰⵔⴻⴱⵄⴰ ⵉ ⵡⴰⵔ ⵜⵥⴻⵎⵎⴰⵔ ⴰⴷ ⵜⴰⵔⴱⵓ:
22 ⵙⴰⴷⵓ ⵉⵊⵊ ⵏ ⵓⵎⵙⴻⵅⵅⴰⵔ ⵎⴰⵍⴰ ⵏⴻⵜⵜⴰ ⵉⴷⵡⴻⵍ ⴷ ⴰⵊⴻⴵⵉⴷ,
ⵙⴰⴷⵓ ⵉⵊⵊ ⵏ ⵓⴱⵓⵀⴰⵍⵉ ⵎⴰⵍⴰ ⵏⴻⵜⵜⴰ ⵉⵊⵊⵉⵡⴻⵏ ⴰⵖⵔⵓⵎ,
23 ⵙⴰⴷⵓ ⵉⵛⵜ ⵏ ⵜⴻⵎⵖⴰⵔⵜ ⵜᵉⵜⵜⵡⴰⵛⴰⵔⵀ ⵎⴰⵍⴰ ⵏⴻⵜⵜⴰⵜ ⵜᵉⵜⵜⵡⴰⵙⵙⴻⵎⵍⴻⵛ,
ⵓ ⵙⴰⴷⵓ ⵉⵛⵜ ⵏ ⵜⴻⵙⵎⴻⵖⵜ ⵎⴰⵍⴰ ⵜᵉⵟⵟⴻⴼ ⵍⵡⴰⵔⵜ ⵏ ⵍⴰⵍⵍⴰⵙ.
24 ⴰⵔⴻⴱⵄⴰ ⴰⵢⴰ ⴷ ⵉⵎⴻⵥⵢⴰⵏⴻⵏ ⵇⴰⵄ ⵅ ⵜⴻⵎⵎⵓⵔⵜ,
ⵄⴰⴷ ⵏⵉⵜⵏⵉ ⴷ ⵉⵎⵉⵖⵉⵙⴻⵏ ⵇⴰⵄ.
25 ⵜⵉⴽⴻⴹⴼⵉⵏ ⵡⴰⵔ ⴵⵉⵏⵜ ⴷ ⵍⴳⴻⵏⵙ ⵉⵊⴻⵀⴷⴻⵏ,
ⵎⴰⵛⴰ ⵄⴰⴷ ⵏⵉⵜⴻⵏⵜⵉ ⵙⵙⴻⵡⵊⴰⴷⴻⵏⵜ ⵎⴰⵛⵛⴰ ⵏⵙⴻⵏ ⴷⴻⴳ ⵓⵏⴻⴱⴷⵓ. ■
26 ⵉⴽⴰⵡⴽⴰⵡⴻⵏ ⵏ ⵜⴻⵚⴹⴰⵔⵜ ⴷ ⵉⵊⵊ ⵏ ⵍⴳⴻⵏⵙ ⵏⵀⵍⴰ ⵊⵊⵀⴻⴷ,
ⵎⴰⵛⴰ ⵏⵉⵜⵏⵉ ⴱⴻⵏⵏⴰⵏ ⵜⴰⵥⴻⴷⴷⵉⵖⵜ ⵏⵙⴻⵏ ⵅ ⵜⴻⵚⴹⴰⵔⵜ.
27 ⵜⴰⵎⵓⵖⵔⵉ ⵡⴰⵔ ⵖⴰⵔⴻⵙ ⴱⵓ ⴰⵊⴻⴵⵉⴷ,
ⵡⴰⵅⵅⴰ ⴰⵎⴻⵏⵏⵉ ⵉⴼⴼⴻⵖ ⵙ ⵓⵙⴻⵜⵜⴻⴼ ⵎⴰⵔⵔⴰ,
28 ⴰⵥⴻⵔⵎⵓⵎⵎⵉ ⵜⵥⴻⵎⵎⴰⵔⴻⴷ ⴰⴷ ⵜ ⵜᵉⵟⵟⴼⴻⴷ ⵙ ⵜⵏⴰⵢⴻⵏ ⵏ ⵉⴼⴰⵙⵙⴻⵏ,
ⵄⴰⴷ ⴰⵇⴰ-ⵜ ⵏⴻⵜⵜⴰ ⴷⵉ ⵍⴻⵇⵚⵓⵔ ⵏ ⵉⵊⴻⴵⵉⴷⴻⵏ.
29 ⵜⵍⴰⵜⴰ ⴰⵢⴰ ⵚⵚⵓⵔⵓⴼⴻⵏ ⵙ ⵍⵄⴻⵥⵥ,
ⴰⵔⴻⴱⵄⴰ ⴳⴳⵓⵔⴻⵏ ⵙ ⵜⴻⵛⵍⵉ ⵜⴻⵛⵏⴻⵄ.
30 ⴰⵢⵔⴰⴷ, ⴱⵓ-ⵜⴻⵖⵔⵓⴹⵜ ⵊⴰⵔ ⵍⵎⴰⵔ,
ⵡⴻⵏⵏⵉ ⵡⴰⵔ ⵉⵜⵜⵡⴻⵅⵅⵉⵔⴻⵏ ⵥⵥⴰⵜ ⵉ ⵃⴻⴷ,
31 ⵉⵊⵊ ⵏ ⵓⵖⵉⵍⴰⵙ ⵙ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ ⴱⴻⵢⵙⴻⵏⵜ, ⵏⵉⵖ ⵉⵊⵊ ⵏ ⵓⵎⵢⴰⵏ,
ⵓ ⵉⵊⵊ ⵏ ⵓⵊⴻⴵⵉⴷ ⵡⴻⵏⵏⵉ ⵖⴰⵔ ⵉⴵⴰ ⵓⵍⴰⵖⵉ ⵏ ⵓⵎⴻⵏⵖⵉ. ■
32 ⵎⴰⵍⴰ ⵛⴻⴽ ⵜⴻⴳⴳⵉⴷ ⵙ ⵜⵓⴱⴱⵓⵀⴻⵍⵢⴰ ⵓⵎⵉ ⵜⴻⵙⵙⴳⴻⵄⵄⴷⴻⴷ ⵉⵅⴻⴼ ⵏⵏⴻⴽ,
ⵏⵉⵖ ⵜⵅⴻⵎⵎⴻⵎⴻⴷ ⴷⵉ ⵜⴻⵃⵔⴰⵢⵎⴻⵛⵜ: ⵙⴰⵔⵙ ⴰⴼⵓⵙ ⵅ ⵓⵇⴻⵎⵎⵓⵎ! ■
33 ⵎⴰⵖⴰⵔ ⴰⵙⴻⵏⴷⵓ ⵏ ⵓⵖⵉ ⵉⵜⵜⴰⵡⵉ-ⴷⴷ ⵜⵔⵓⵙⵙⵉ,
ⵓ ⴰⵙⴻⵏⴷⵓ ⵏ ⵡⴻⵏⵥⴰⵔⴻⵏ ⵉⵜⵜⴰⵡⵉ-ⴷⴷ ⵉⴷⴰⵎⵎⴻⵏ,
ⵓ ⴰⵙⴻⵏⴷⵓ ⵏ ⵓⵅⴻⵢⵢⴻⵇ, ⵉⵜⵜⴰⵡⵉ-ⴷⴷ ⴰⵎⵛⵓⴱⴱⴻⵛ.