28
1 ⵉⵄⴻⴼⴼⴰⵏⴻⵏ ⵜⵜⵔⴰⴽⴽⵡⴰⵍⴻⵏ ⵡⴰⵅⵅⴰ ⵡⴰⵔ ⴷⵉⵏⵏⵉ ⵡⵉ ⵉ-ⵜⴻⵏ ⵉⴹⴰⴼⴼⴰⵔⴻⵏ, ⵎⴰⵛⴰ ⵉⵎⵙⴻⴳⴳⴰⴷⴻⵏ ⴷⴰⵢⵙⴻⵏ ⵜⴰⵔⵢⴰⵙⵜ ⴰⵎ ⵏ ⵉⵊⵊ ⵏ ⵡⴰⵢⵔⴰⴷ. ■
2 ⵣⵉ ⵙⵙⵉⴱⴱⴻⵜ ⵏ ⵓⵄⴻⴷⴷⵉ ⵏ ⵜⴻⵎⵎⵓⵔⵜ ⴰⵇⴰ ⴷⵉⵏ ⴰⵟⵟⴰⵙ ⵏ ⵍⵃⵓⴽⴽⴰⵎ,
ⵎⴰⵛⴰ ⵙ ⵉⵊⵊ ⵏ ⴱⵏⴰⴷⴻⵎ ⵙ ⵍⴻⵄⵇⴻⵍ ⴷ ⵜⵓⵙⵙⵏⴰ,
ⴰⴷ ⵜⴻⵇⵇⵉⵎ ⵚⵚⵓⵍⵟⴰ ⵜⴱⴻⴷⴷ ⵉ ⵢⵉⵊⵊ ⵏ ⵍⵡⴻⵇⵜ ⴷ ⴰⵥⵉⵔⴰⵔ.
3 ⴰⵔⵢⴰⵥ ⴰⵎⴻⵥⵍⵓⴹ ⵡⴻⵏⵏⵉ ⵉⵜⵜⵥⴻⵢⵢⴰⵔⴻⵏ ⵅ ⵉⵎⴰⵔⵅⴰ,
ⴰⵎ ⵡⴻⵏⵥⴰⵔ ⵉⵜⵜⴰⵡⵢⴻⵏ ⵎⴰⵔⵔⴰ ⴰⵍ ⵡⴰⵔ ⵉⵜⵜⵖⵉⵎⵉ ⵄⴰⴷ ⵡⴻⵖⵔⵓⵎ.
4 ⵉⵏⵏⵉ ⵉⵜⵜⴻⵊⵊⴰⵏ ⵛⵛⴰⵔⵉⵄⴰ ⵙⵙⴻⵎⵖⴰⵔⴰⵏ ⴰⵄⴻⴼⴼⴰⵏ,
ⵎⴰⵛⴰ ⵉⵏⵏⵉ ⵉⵃⴻⵟⵟⴰⵏ ⵛⵛⴰⵔⵉⵄⴰ ⵜⵜⵎⴻⵏⵖⴰⵏ ⴰⴽⵉⴷⵙⴻⵏ.
5 ⵉⵔⵢⴰⵥⴻⵏ ⵉⵄⴻⴼⴼⴰⵏⴻⵏ ⵡⴰⵔ ⴼⴻⵀⵀⵎⴻⵏ ⵍⵃⴻⵇⵇ,
ⵎⴰⵛⴰ ⵉⵏⵏⵉ ⵢⴰⵔⴻⵥⵥⵓⵏ ⵙⵉⴷⵉ, ⴼⴻⵀⵀⵎⴻⵏ ⵉ ⴽⵓⵍⵛⵉ.
6 ⵉⵃⵍⴰ ⵓⵎⴻⵥⵍⵓⴹ ⵏⵏⵉ ⵉⴳⴳⵓⵔⴻⵏ ⵉⵚⴼⴰ,
ⵅ ⵡⴻⵏⵏⵉ ⵉⴳⴳⵓⵔⴻⵏ ⵉⴼⴰⵔⵖ ⴷⵉ ⵜⵏⴰⵢⴻⵏ ⵏ ⵉⴱⵔⵉⴷⴻⵏ, ⵡⴰⵅⵅⴰ ⵏⴻⵜⵜⴰ ⵖⴰⵔⴻⵙ ⴰⴳⵍⴰ. ■
7 ⵡⴻⵏⵏⵉ ⵉⵃⴻⵟⵟⴰⵏ ⵛⵛⴰⵔⵉⵄⴰ, ⴷ ⵉⵊⵊ ⵏ ⵎⵎⵉⵙ ⵉⴼⴻⵀⵀⴻⵎ,
ⵎⴰⵛⴰ ⵡⴻⵏⵏⵉ ⴷ ⴰⵎⴻⴷⴷⵓⴽⴽⴻⵍ ⵏ ⵉⵎⴻⵍⵀⴰⴼ, ⵢⴰⵔⵔⴰ ⴱⴰⴱⴰⵙ ⴰⴷ ⵉⵙⵙⴻⴹⵃⴰ. ■
8 ⵡⴻⵏⵏⵉ ⵉⵙⵙⴻⵎⵖⴰⵔⴰⵏ ⴰⴳⵍⴰ ⵏⵏⴻⵙ ⵙ ⴰⵔⵔⵉⴱⴰ ⴷ ⵡⴰⵔⴱⴻⵃ,
ⵉⵙⵙⵎⵓⵏⴰ ⴰⵢⴰ ⵉ ⵡⴻⵏⵏⵉ ⵉⵜⵜⵃⵉⵏⵏⴰⵏ ⵅ ⵉⵎⴻⵥⵍⴰⴹ. ■
9 ⵡⴻⵏⵏⵉ ⵉⵙⵙⵃⴻⵢⵢⴰⴷⴻⵏ ⴰⵎⴻⵥⵥⵓⵖ ⵏⵏⴻⵙ ⵥⴻⴳ ⵓⵙⴻⴵⵉ ⵏ ⵛⵛⴰⵔⵉⵄⴰ,
ⵄⴰⴷ ⵜⴰⵥⴰⴵⵉⵜ ⵏⵏⴻⵙ ⴷ ⵏⵏⵄⵉ.
10 ⵡⴻⵏⵏⵉ ⵉⵜⵜⴰⵔⵔⴰⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵡⴻⴷⴷⴰⵔⴻⵏ ⵅ ⵉⵊⵊ ⵏ ⵡⴻⴱⵔⵉⴷ ⴰⵄⴻⴼⴼⴰⵏ,
ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⴰⴷ ⵉⵡⴹⴰ ⴷⵉ ⵜⴻⵙⵔⴰⴼⵜ ⵏⵏⴻⵙ,
ⵎⴰⵛⴰ ⵉⵏⵏⵉ ⵉ ⴷⵉ ⵜⴻⴵⴰ ⵍⴻⴽⵎⴰⵔⴻⵜ ⴰⴷ ⵡⴰⵔⵜⴻⵏ ⵎⵉⵏ ⵉⵚⴻⴱⵃⴻⵏ. ■
11 ⴱⵓ-ⵡⴰⴳⵍⴰ ⵉⵜⵜⴻⴳⴳ ⵉⵅⴻⴼ ⵏⵏⴻⵙ ⴷ ⴰⵎⵉⵖⵉⵙ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵎⴰⵛⴰ ⵉⵊⵊ ⵏ ⵓⵎⴻⵥⵍⵓⴹ ⵏⵏⵉ ⴷⵉ ⵜⴻⴵⴰ ⵍⴻⴼⵀⴰⵎⴻⵜ, ⵢⴰⵔⴳⴻⴱ ⵅⴰⵙ.
12 ⵎⴰⵍⴰ ⴰⴷ ⵙⵍⵉⵡⵍⵉⵡⴻⵏ ⵉⵎⵙⴻⴳⴳⴰⴷⴻⵏ ⵙ ⵍⴻⴼⵔⴰⵃⴻⵜ, ⴰⵇⴰ ⴷⵉⵏ ⴰⵄⵓⴵⵉ ⴰⵎⴻⵇⵇⵔⴰⵏ,
ⵎⴰⵛⴰ ⵎⴰⵍⴰ ⴽⴽⴰⵔⴻⵏ-ⴷⴷ ⵉⵄⴻⴼⴼⴰⵏⴻⵏ, ⴰⴷ ⵉⵙⵙⵏⵓⴼⴼⴰⵔ ⴱⵏⴰⴷⴻⵎ ⵉⵅⴻⴼ ⵏⵏⴻⵙ. ■
13 ⵡⴻⵏⵏⵉ ⵉⴷⴷⴰⵍⴻⵏ ⵉⵅⴻⵟⵟⴰⵏ ⵏⵏⴻⵙ, ⵡⴰⵔ ⵉⵜⵜⴻⴼⵍⵉⵃ,
ⵎⴰⵛⴰ ⵡⴻⵏⵏⵉ ⵥⵥⴰⵢⵙⴻⵏ ⵉⵏⴻⵄⵄⵎⴻⵏ ⵓ ⵉⵜⵜⵃⴻⵢⵢⴰⴷ ⵅⴰⵙⴻⵏ, ⴰⴷ ⵢⴰⴼ ⴰⵔⵔⴻⵃⵎⴻⵜ. ■
14 ⵙⵙⴻⵄⴷ ⵏ ⴱⵏⴰⴷⴻⵎ ⵏⵏⵉ ⵉⵜⵜⵡⴻⵇⵇⴰⵔⴻⵏ ⴱⵍⴰ ⴰⴱⴻⴷⴷⵉ,
ⵎⴰⵛⴰ ⵡⴻⵏⵏⵉ ⵉⵙⵙⴻⵇⵙⴰⵃⴻⵏ ⵓⵍ ⵏⵏⴻⵙ, ⴰⴷ ⵉⵡⴹⴰ ⴷⵉ ⵍⵖⴰⵔ.
15 ⴰⵎ ⵉⵊⵊ ⵏ ⵡⴻⵢⵔⴰⴷ ⵉⵜⵜⴰⵔⵔⵓⵊⴷⵓⴷⴻⵏ
ⵓ ⴰⵎ ⵉⵊⵊ ⵏ ⴷⴷⵓⴱ ⵉⵜⵜⵍⴰⵥⴰⵏ ⵉⵜⵜⴰⵥⵥⵍⴻⵏ ⵥⵉ ⵙⵙⴰ ⵖⴰⵔ ⴷⵉⵀⴰ,
ⴰⵎⵎⵓ ⵉ ⵉⴵⴰ ⵉⵊⵊ ⵏ ⵍⵃⴰⴽⴻⵎ ⴰⵄⴻⴼⴼⴰⵏ ⵅ ⵉⵊⵊ ⵏ ⵍⴳⴻⵏⵙ ⴰⵎⴻⵥⵍⵓⴹ.
16 ⵍⵃⴰⴽⴻⵎ ⵏⵏⵉ ⵉⵃⵡⴰⵊⴻⵏ ⵍⴻⴼⵀⴰⵎⴻⵜ ⵉⵜⵜⴰⵡⵉ-ⴷⴷ ⵍⴻⵃⵚⴰⵔⴻⵜ ⴰⵟⵟⴰⵙ,
ⵎⴰⵛⴰ ⵡⴻⵏⵏⵉ ⵉⵛⴰⵔⵔⵀⴻⵏ ⴰⵔⴱⴻⵃ ⴰⴷ ⵉⵥⵥⵓⴳⴳⴰⵔⵜ ⵓⵙⵙⴰⵏ ⵏⵏⴻⵙ.
17 ⵉⵊⵊ ⵏ ⴱⵏⴰⴷⴻⵎ ⵉⵜⵜⵡⴰⵃⵚⴰⵔⴻⵏ ⵓⵎⵉ ⵉⵙⵙⵉⵥⵥⴻⵍ ⵉⴷⴰⵎⵎⴻⵏ ⵏ ⵛⴰ ⵏ ⵢⵉⵊⵊⴻⵏ,
ⴰⴷ ⵢⴰⵔⵡⴻⵍ ⵖⴰⵔ ⵡⴻⵃⴼⵓⵔ ⵏ ⵡⴻⵏⴹⴻⵍ ⵏ ⵢⵉⵅⴻⴼ ⵏⵏⴻⵙ. ⵡⴰⵔ ⵜⵜⴻⵊⵊⵉ ⵃⴻⴷ ⴰⴷ ⵜ ⵉⵙⵙⴱⴻⴷⴷ!
18 ⵡⴻⵏⵏⵉ ⵉⴳⴳⵓⵔⴻⵏ ⴰⴱⵔⵉⴷ ⵏⵏⴻⵙ ⴷⵉ ⵍⴻⵚⴼⴰⵢⴻⵜ, ⴰⴷ ⵉⵏⵊⴻⵎ,
ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ ⵉⴼⴰⵔⵖ ⴷⵉ ⵜⵏⴰⵢⴻⵏ ⵏ ⵉⴱⵔⵉⴷⴻⵏ, ⵡⴰⵔ ⵉⵜⵜⵄⴻⵟⵟⴰⵔ ⴰⴷ ⵉⵡⴹⴰ.
19 ⵡⴻⵏⵏⵉ ⵉⵛⴰⵔⵔⵥⴻⵏ ⵜⴰⵎⵎⵓⵔⵜ ⵏⵏⴻⵙ, ⴰⴷ ⵉⵊⵊⴰⵡⴻⵏ ⵙ ⵡⴻⵖⵔⵓⵎ,
ⵎⴰⵛⴰ ⵡⴻⵏⵏⵉ ⵉⴹⴻⴼⴼⴰⵔⴻⵏ ⴰⵔⵢⴰⵥ ⵉⵅⵡⴰⵏ ⴰⴷ ⵉⵊⵊⴰⵡⴻⵏ ⵥⵥⴻⵍⴹ.
20 ⴰⵔⵢⴰⵥ ⵉ ⴷⵉ ⵉⴵⴰ ⵍⴰⵎⴰⵏ ⴰⵟⵟⴰⵙ ⴰⴷ ⵉⴽⵙⵉ ⴰⵟⵟⴰⵙ ⵏ ⵍⴱⴰⵔⴰⴽⴰⵜ,
ⵎⴰⵛⴰ ⵡⴻⵏⵏⵉ ⵉⵜⵜⵇⴻⴵⵉⵇⴻⵏ ⵃⵉⵎⴰ ⴰⴷ ⵉⴳⴳ ⴰⴳⵍⴰ, ⵡⴰⵔ ⵉⵜⵜⵡⵉⵃⵙⵉⴱ ⴷ ⴰⵎⴻⵥⴷⴰⴳ. ■
21 ⴰⵙⴼⴰⵔⵥ ⵏ ⵡⵓⴷⵎⴰⵡⴻⵏ ⵡⴰⵔ ⵉⵛⵏⵉ ⵛⴰ,
ⵎⴰⵖⴰⵔ ⵉ ⵢⵉⵊⵊ ⵏ ⵓⵍⴻⵇⵇⵓⵥ ⵏ ⵡⴻⵖⵔⵓⵎ ⵉⵥⴻⵎⵎⴰⵔ ⵛⴰ ⵏ ⵡⴻⵔⵢⴰⵥ ⴰⴷ ⵉⵅⴹⴰ. ■
22 ⵡⴻⵏⵏⵉ ⵉⵜⵜⵇⴻⴵⵉⵇⴻⵏ ⵖⴰⵔ ⵡⴰⴳⵍⴰ, ⴰⵇⴰ ⴷ ⴰⵔⵢⴰⵥ ⵙ ⵜⵉⵟⵟ ⵜⴰⵄⴻⴼⴼⴰⵏⵜ,
ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵙⵙⵉⵏ ⴰⵇⴰ ⵍⴻⵅⵙⴻⵙ ⴰⴷ ⵖⴰⵔⴻⵙ ⴷⴷ-ⵢⴰⵙ.
23 ⵡⴻⵏⵏⵉ ⵉⵜⵜⵄⴰⵇⴰⴱⴻⵏ ⵉⵊⵊ ⵏ ⴱⵏⴰⴷⴻⵎ, ⴰⵇⴰ ⵖⴰⵔ ⵓⵏⴻⴳⴳⴰⵔ ⴰⴷ ⵢⴰⴼ ⴰⵔⴹⴰ ⴽⵜⴰⵔ
ⵅ ⵡⴻⵏⵏⵉ ⵉⵙⵙⵛⴰⵏⴰⵏ ⵜⴰⵥⵢⵓⴹⵉ ⵙ ⵢⵉⵍⴻⵙ ⵏⵏⴻⵙ.
24 ⵡⴻⵏⵏⵉ ⵉⵜⵜⴽⴻⵛⵛⴰⴹⴻⵏ ⴱⴰⴱⴰⵙ ⵏⵉⵖ ⵢⴻⵎⵎⴰⵙ ⵓⵛⴰ ⵉⵇⵇⴰⵔ: “ⵡⴰⵔ ⵉⴵⵉ ⴷ ⴷⴷⴻⵏⴱ!”,
ⴰⵇⴰ-ⵜ ⴷ ⴰⵛⵔⵉⵛ ⵏ ⵉⵊⵊ ⵏ ⴱⵓ-ⵍⴰⵅⴰⵔⵜ.
25 ⵡⴻⵏⵏⵉ ⴷⵉ ⵉⴵⴰ ⵏⵏⴼⴰⵅⴻⵜ, ⵉⵙⵙⴻⴽⴽⴰⵔⴰ-ⴷⴷ ⴰⵎⵛⵓⴱⴱⴻⵛ,
ⵎⴰⵛⴰ ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵙⵉⴷⵉ, ⴰⴷ ⵉⴷⵡⴻⵍ ⵍⴰⴱⴰⵙ ⵅⴰⵙ. ■
26 ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵡⵓⵍ ⵏⵏⴻⵙ, ⴰⵇⴰ ⴷ ⴰⴱⵓⵀⴰⵍⵉ,
ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ ⴰⴱⵔⵉⴷ ⵏⵏⴻⵙ ⴷⵉ ⵜⵉⵖⵉⵜ ⴰⴷ ⵉⵏⵊⴻⵎ.
27 ⵡⴻⵏⵏⵉ ⵉⵜⵜⵉⵛⴻⵏ ⵉ ⵉⵎⴻⵥⵍⴰⴹ, ⵡⴰⵔ ⴷⴰⵢⴻⵙ ⵉⵜⵜⵉⵍⵉ ⴱⵓ ⵍⴻⵖⴱⴻⵏ,
ⵎⴰⵛⴰ ⵡⴻⵏⵏⵉ ⵉⵜⵜⴻⵇⵇⵏⴻⵏ ⵜⵉⵟⵟⴰⵡⵉⵏ ⵏⵏⴻⵙ,
ⴰⴷ ⵉⵜⵜⵡⴰⵏⵄⴻⵍ ⴰⵟⵟⴰⵙ. ■
28 ⵎⴰⵍⴰ ⴽⴽⴰⵔⴻⵏ-ⴷⴷ ⵉⵄⴻⴼⴼⴰⵏⴻⵏ, ⵅⴻⵏⵏⵉ ⵉⵜⵜⵏⵓⴼⴼⴰⵔ ⴱⵏⴰⴷⴻⵎ,
ⵎⴰⵛⴰ ⵎⴰⵍⴰ ⵜⵜⵡⴰⵀⴻⵍⵍⴽⴻⵏ ⵏⵉⵜⵏⵉ, ⴰⴷ ⴷⴷ-ⵎⵎⴰⵔⴻⵏⵢⴻⵏ ⵉⵎⵙⴻⴳⴳⴰⴷⴻⵏ.■