27
1 ⵡⴰⵔ ⵜⵜⴼⴻⵢⵢⴻⵛ ⵥⴻⴳ ⵡⴰⵙⵙ ⵏ ⵜⵉⵡⴻⵛⵛⴰ, ⵎⴰⵖⴰⵔ ⵡⴰⵔ ⵜⴻⵙⵙⵉⵏⴻⴷ ⵛⴰ ⵎⵉⵏ ⴷⴷ ⵖⴰ ⵢⴰⵡⵉ ⵡⴰⵙⵙ. ■
2 ⴻⵊⵊ ⵉⵊⵊ ⵏ ⵓⴱⴰⵔⵔⴰⵏⵉ ⴰⴷ ⵛⴻⴽ ⵉⵛⴻⵏⵏⴻⵄ, ⵡⴰⵔ ⵉⴵⵉ ⴰⵇⴻⵎⵎⵓⵎ ⵏⵏⴻⴽ,
ⵉⵊⵊ ⵏ ⵎⵉⴷⴷⴻⵏ, ⵡⴰⵔ ⵉⴵⵉ ⵉⵢⴻⵏⵛⵉⵛⴻⵏ ⵏⵏⴻⴽ.
3 ⴰⵥⵔⵓ ⵉⴷⵇⴻⵍ, ⵉⵊⴷⵉ ⵉⵡⴻⵥⵥⴻⵏ ,
ⵎⴰⵛⴰ ⴰⴼⵓⴳⴻⵎ ⵏ ⵓⴱⵓⵀⴰⵍⵉ ⵉⴷⵇⴻⵍ ⵅⴰⵙⴻⵏ ⵙ ⵜⵏⴰⵢⴻⵏ ⵉⴷⵙⴻⵏ.
4 ⴰⵙⵄⴰⵔ ⴷ ⵓⴷⵓⵇⵇⴻⵥ ⵏ ⵡⴻⵖⴹⴰⴱ ⴰⵇⴰ ⴰⵜⴻⵏ ⵇⴻⵙⵃⴻⵏ,
ⵎⴰⵛⴰ ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ ⵖⴰⵔ ⵜⵓⵙⵎⵉ?
5 ⵜⴻⵃⵍⴰ ⵜⵜⴰⵔⴱⵉⵢⵢⴻⵜ ⵙ ⴱⵟⴰⵢⵟⴰⵢ ⵅ ⵜⴰⵢⵔⵉ ⵉⵏⵏⵓⴼⴼⴰⵔⴻⵏ.
6 ⵉⵢⴻⵥⵥⵉⵎⴻⵏ ⵏ ⵡⴻⵏⵏⵉ ⵛⴻⴽ ⵉⵜⵜⴻⵅⵙⴻⵏ ⴰⵇⴰ ⴷ ⵍⴻⵄⵍⴰⵎⴰⵜ ⵏ ⵜⴻⵚⴷⵉⵇⵜ,
ⵎⴰⵛⴰ ⵉⵙⵓⴷⵉⵎⴻⵏ ⵏ ⵢⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ ⴰⵇⴰ ⴷ ⴰⵟⵟⴰⵙ.
7 ⵡⴻⵏⵏⵉ ⵉⵊⵊⵉⵡⵏⴻⵏ ⵉⵄⴻⵊⵊⴻⵏ ⵅ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ,
ⵎⴰⵛⴰ ⵉ ⵡⴻⵏⵏⵉ ⵉⴵⵓⵥⴻⵏ ⵎⴰⵔⵔⴰ ⵎⵉⵏ ⵢⴰⵔⴻⵥⴳⴻⵏ ⴷ ⴰⵎⵉⵥⵉⴷ. □
8 ⴰⵎ ⵉⵊⵊ ⵏ ⵡⴻⵊⴹⵉⴹ ⵉⵟⵟⴰⵡ, ⵉⴳⴳⵯⴻⴷ ⵥⵉ ⵍⵄⵓⵛⵛ ⵏⵏⴻⵙ,
ⴰⵎⵎⵓ ⵉ ⵉⴵⴰ ⵡⴻⵔⵢⴰⵥ ⵏⵏⵉ ⵉ ⵖⴰ ⵉⵟⴻⵍⵍⵄⴻⵏ ⴱⴰⵔⵔⴰ ⵅ ⵡⴻⵎⵛⴰⵏ ⵏⵏⴻⵙ.
9 ⵣⵥⴻⵛⵜ ⴷ ⵍⴻⴱⵅⵓⵔ ⵙⵙⴼⴰⵔⵔⴰⵃⴻⵏ ⵓⵍ,
ⴰⵎⵎⵓ ⵄⴰⵡⴻⴷ ⵜⴰⵎⵙⴻⵄⵄⴰⴼⵜ ⵉⵛⵏⴰⵏ ⵏ ⵉⵊⵊ ⵏ ⵓⵎⴻⴷⴷⵓⴽⴽⴻⵍ ⵥⵉ ⵛⵛⵡⴰⵔ ⵏ ⵡⵓⵍ.
10 ⵡⴰⵔ ⵙⴻⵎⵎⴻⵃ ⴷⴻⴳ ⵓⵎⴻⴷⴷⵓⴽⴽⴻⵍ ⵏⵏⴻⴽ, ⵓⵍⴰ ⴷⴻⴳ ⵓⵎⴻⴷⴷⵓⴽⴽⴻⵍ ⵏ ⴱⴰⴱⴰⵛ,
ⵡⴰⵔ ⵜⵜⵉⴷⴻⴼ ⵛⴰ ⵖⴰⵔ ⵜⴰⴷⴷⴰⵔⵜ ⵏ ⵓⵎⴰⵛ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ ⵏⵏⴻⴽ.
ⵉⵃⵍⴰ ⵉⵊⵊ ⵏ ⵡⴰⵊⵊⴰⵔ ⵢⵓⴷⴻⵙ ⵅ ⵉⵊⵊ ⵏ ⵜⴻⵡⵎⴰⵜ ⵢⵉⴳⴳⵯⴻⵊ. ■
11 ⵉⵍⵉ ⴷ ⴰⵎⵉⵖⵉⵙ, ⴰ ⵎⵎⵉ ⵉⵏⵓ, ⵓ ⵙⴼⴰⵔⵃ ⵓⵍ ⵉⵏⵓ,
ⵎⴰⵃⴻⵏⴷ ⵥⴻⵎⵎⴰⵔⴻⵖ ⴰⴷ ⴰⵔⵔⴻⵖ ⵅ ⵡⴻⵏⵏⵉ ⴷ ⴰⵢⵉ ⵖⴰ ⵉⵙⵙⴻⵃⵇⴰⵔⴻⵏ.
12 ⵡⴻⵏⵏⵉ ⵉⴼⴻⵜⵜⵏⴻⵏ ⵉⵜⵜⵡⴰⵍⴰ ⵍⵖⴰⵔ ⵓⵛⴰ ⵉⵙⵙⵏⵓⴼⴼⴰⵔⴰ ⵉⵅⴻⴼ ⵏⵏⴻⵙ,
ⵎⴰⵛⴰ ⵉⵃⴰⴼⵉⵢⵢⴻⵏ ⴰⵔⴻⵏⵏⵉⵏ ⴳⴳⵓⵔⴻⵏ ⵓⵛⴰ ⵉⵜⵜⵅⴻⵚⵚⴰ ⴰⴷ ⵜⵜⵡⴰⵄⴰⵇⴰⴱⴻⵏ. ■
13 ⴽⵙⵉ ⴰⵔⵔⵓⴹ ⵏⵏⴻⵙ, ⵎⴰⵖⴰⵔ ⵉⴷⴷⴰⴽⴽⵡⴰⵍ ⴷ ⴰⴹⵎⴰⵏ ⵉ ⵢⵉⵊⵊ ⵏ ⵓⴱⴰⵔⵔⴰⵏⵉ,
ⴽⵙⵉ ⵜ ⴷ ⴷⴷⵉⵢⵢⴻⵜ ⵉ ⵢⵉⵛⵜ ⵏ ⵜⴻⵎⵖⴰⵔⵜ ⵥⵉ ⴱⴰⵔⵔⴰ. ■
14 ⵡⴻⵏⵏⵉ ⵉⵜⵜⴱⴰⵔⴽⴻⵏ ⴰⵎⴻⴷⴷⵓⴽⴽⴻⵍ ⵏⵏⴻⵙ ⵥⵉⵛ ⵖⴰⵔ ⵜⵓⴼⴼⵓⵜ ⵙ ⵜⵎⵉⵊⵊⴰ ⵉⵊⴻⵀⴷⴻⵏ,
ⴰⵇⴰ ⵎⴰⵏ ⴰⵢⴰ ⴰⴷ ⴰⵙ ⵉⵜⵜⵡⴰⵃⵙⴻⴱ ⴷ ⵏⵏⴻⵄⵍⴻⵜ.
15 ⴰⵎⴻⵛⵏⴰⵡ ⵜⵓⴷⴷⵉⵎⵜ ⵡⴰⵔ ⵉⵜⵜⴱⴻⴷⴷⵉⵏ ⴷⴻⴳ ⵡⴰⵙⵙ ⵏ ⵡⴻⵏⵥⴰⵔ ⵉⵊⴻⵀⴷⴻⵏ,
ⴰⵎⵎⵓ ⵉ ⵜⴻⴵⴰ ⵜⴻⵎⵖⴰⵔⵜ ⵉⵜⵜⴻⵎⵛⵓⴱⴱⵓⵛⴻⵏ. ■
16 ⵡⴻⵏⵏⵉ ⵉⵜⵜⴻⵅⵙⴻⵏ ⴰⴷ ⴰⵙ ⵉⴱⴻⵍⵍⴻⵄ,
ⴰⵇⴰ-ⵜ ⴰⵎ ⵡⴻⵏⵏⵉ ⵉⵜⵜⴻⵅⵙⴻⵏ ⴰⴷ ⵉⵇⴰⵍⴰ ⵉ ⵓⵙⴻⵎⵎⵉⴹ,
ⵓ ⴰⴼⵓⵙ ⵏⵏⴻⵙ ⴰⴼⵓⵙⵉ ⴰⴷ ⵉⵟⵟⴻⴼ ⵥⵥⴻⵛⵜ ⵉⵜⵜⴻⵃⵔⵓⴵⵓⴹⴻⵏ.
17 ⴰⵎ ⵡⴻⵏⵏⵉ ⵉⵙⵙⴻⵇⴹⴰⵄⴻⵏ ⵓⵥⵥⴰⵍ ⵙ ⵡⵓⵥⵥⴰⵍ,
ⴰⵎⵎⵓ ⵉ ⵉⵙⵙⴻⵇⴹⴰⵄ ⵡⴻⵔⵢⴰⵥ ⵓⴷⴻⵎ ⵏ ⵡⴻⵏⵏⵉ ⵜ ⵢⵓⴷⵙⴻⵏ.
18 ⵡⴻⵏⵏⵉ ⵉⵃⴻⵟⵟⴰⵏ ⵅ ⵉⵊⵊ ⵏ ⵡⴰⵔⵜⵓ, ⴰⴷ ⵉⵛⵛ ⵍⵖⵉⴵⴻⵜ ⵏⵏⴻⵙ,
ⵡⴻⵏⵏⵉ ⵉⵃⴻⵟⵟⴰⵏ ⴱⴰⴱ ⵏⵏⴻⵙ, ⴰⴷ ⵉⵜⵜⵡⴰⵛⴻⵏⵏⴻⵄ.
19 ⴰⵎ ⴷⴷ-ⵉⵜⵜⴱⴰⵏ ⵓⵖⴻⵎⴱⵓⴱ ⴷⴻⴳ ⵓⵖⴻⵎⴱⵓⴱ ⴷⴻⴳ ⵡⴰⵎⴰⵏ,
ⴰⵎⵎⵓ ⴷⴷ-ⵉⵜⵜⴱⴰⵏ ⵡⵓⵍ ⵏ ⴱⵏⴰⴷⴻⵎ ⵅ ⴱⵏⴰⴷⴻⵎ ⵄⴰⵡⴻⴷ.
20 ⴰⵎ ⵍⴰⵅⴰⵔⵜ ⴷ ⵓⵙⵀⴻⵍⵍⴻⴽ ⵡⴰⵔ ⵜⵜⵢⵉⵡⵉⵏⴻⵏ,
ⴰⵎⵎⵓ ⵓⵍⴰ ⴷ ⵜⵉⵟⵟⴰⵡⵉⵏ ⵏ ⵉⵡⴷⴰⵏ ⵡⴰⵔ ⵜⵜⵉⵡⴹⴻⵏⵜ ⴰⴷ ⵊⵊⵉⵡⵏⴻⵏⵜ. ■
21 ⴰⵟⴻⵏⵊⵉⵔ ⵏ ⵓⵙⴻⴼⵙⵉ ⵉ ⵏⵏⵓⵇⴰⵔⵜ ⴷ ⵓⴼⴰⵔⵔⴰⵏ ⵉ ⵡⵓⵔⴻⵖ,
ⴰⵎⵎⵓ ⵉ ⵉⴵⴰ ⵓⵍⴰ ⴷ ⴰⵔⵢⴰⵥ ⴰⵎ ⵎⴰⵎⵎⴻⵛ ⵜ ⵜⵜⵎⴻⴷⴷⴰⵃⴻⵏ.
22 ⵎⴰⵍⴰ ⵜⴻⴷⴷⵥⴻⴷ ⴰⴱⵓⵀⴰⵍⵉ ⵙ ⵡⴻⵥⴷⵓⵥ ⴷⵉ ⵍⵎⴻⵀⵔⴰⵥ ⵊⴰⵔ ⵍⵃⴻⴱⴱ ⵏ ⵉⵎⴻⵏⴷⵉ,
ⵜⵓⴱⴱⵓⵀⴻⵍⵢⴰ ⵏⵏⴻⵙ ⵡⴰⵔ ⵅⴰⵙ ⵜⵃⴻⵢⵢⵉⴷ.
23 ⵃⴹⴰ ⵎⴰⵃⴻⵏⴷ ⴰⴷ ⵜⴻⵙⵙⵏⴻⴷ ⵎⴰⵎⵎⴻⵛ ⴷⴷ-ⵉⵜⵜⴱⴰⵏ ⵡⵓⴵⵉ ⵏⵏⴻⴽ,
ⵡⴻⵊⵊⴻⵀ ⵓⵍ ⵏⵏⴻⴽ ⵖⴰⵔ ⵜⵃⵉⵎⵔⵉⵡⵉⵏ.
24 ⵎⴰⵖⴰⵔ ⵍⴻⴽⵙⵉⴱⴻⵜ ⵡⴰⵔ ⵜᵉⵜⵜⵖⵉⵎⵉ ⵉ ⵍⴻⴱⴷⴰ,
ⵏⵉⵖ ⵎⴰ ⴰⴷ ⵉⵇⵇⵉⵎ ⵜⵜⴰⵊ ⵥⵉ ⵊⵊⵉⵍ ⴰⵍ ⵊⵊⵉⵍ ⵏⵏⴻⵖⵏⵉ?
25 ⵎⴰⵍⴰ ⵉⵔⵓⵃ ⴰⵔⵔⴱⵉⵄ ⵓⵛⴰ ⵉⴱⴰⵏ-ⴷⴷ ⵓⵖⴻⵎⵎⵓⵢ ⴰⵥⵉⵥⴰ,
ⵓⵛⴰ ⵉⵜⵜⵡⴰⵃⵜⴻⵛ ⵍⴻⴱⵥⴰⵔ ⵅ ⵉⴷⵓⵔⴰⵔ,
26 ⵅⴻⵏⵏⵉ ⴰⴷ ⵉⵍⵉⵏ ⵉⵥⵎⴰⵔⴻⵏ ⵉ ⵡⴰⵔⵔⵓⴹ ⵏⵏⴻⴽ,
ⵓ ⵉⵖⴰⵢⴹⴻⵏ ⴷ ⵜⵜⴰⵎⴰⵏ ⵏ ⵜⵎⴻⵙⵖⵉⵡⵜ ⵉ ⵢⵉⵊⵊ ⵏ ⵢⴻⵢⵢⴰⵔ. ■
27 ⵓⵛⴰ ⴰⴷ ⵖⴰⵔⴻⴽ ⵢⵉⵍⵉ ⵎⵉⵏ ⵜⴻⵃⵡⴰⵊⴻⴷ ⵏ ⵓⵖⵉ ⵏ ⵜⵖⴰⵢⵟⵉⵏ ⵉ ⵎⴰⵛⵛⴰ ⵏⵏⴻⴽ,
ⴰⴷ ⵢⵉⵍⵉ ⴷ ⵎⴰⵛⵛⴰ ⵉ ⵜⴰⴷⴷⴰⵔⵜ ⵏⵏⴻⴽ ⵓⵍⴰ ⴷ ⵍⴻⵄⵡⴻⵞ ⵉ ⵜⵉⵢⵢⴰⵡⵉⵏ ⵏⵏⴻⴽ.