26
1 ⴰⵎ ⵡⴻⴷⴼⴻⵍ ⴷⴻⴳ ⵓⵏⴻⴱⴷⵓ ⵓ ⴰⵎ ⵡⴻⵏⵥⴰⵔ ⴷⵉ ⵜⵎⴻⵢⵔⴰ, ⴰⵎⵎⵓ ⵡⴰⵔ ⴷⴷ-ⵉⵜⵜⵉⵙ ⵛⵛⴰⵏ ⴰⴽ-ⴷ ⵓⴱⵓⵀⴰⵍⵉ.
2 ⴰⵎ ⵥⵥⴰⵡⴻⵛ ⵉⵜⵜⴼⴰⵔⴼⴰⵔⴻⵏ, ⴰⵎ ⵜⴼⴰⵍⴵⴻⵙⵜ ⵉⵟⵟⴰⵡⴻⵏ ⵙⵙⴰ ⴷ ⵙⵙⴰ,
ⴰⵎⵎⵓ ⵉ ⵜⴻⴳⴳⴰ ⵉⵛⵜ ⵏ ⵏⵏⴻⵄⵍⴻⵜ ⴱⵍⴰ ⵙⵙⵉⴱⴱⴻⵜ, ⵏⴻⵜⵜⴰⵜ ⵡⴰⵔ ⵜⵍⴻⵇⵇⴻⴼ. □
3 ⴰⵔⴻⴽⴽⵓⴹ ⵉ ⵓⵢⵉⵙ, ⵙⵍⵉⵎⴻⵜ ⵉ ⵡⴻⵖⵢⵓⵍ,
ⵓ ⴰⵄⵎⵓⴷ ⵉ ⵡⴻⵄⵔⵓⵔ ⵏ ⵉⴱⵓⵀⴰⵍⵉⵢⵢⴻⵏ. ■
4 ⵡⴰⵔ ⵜⵜⴰⵔⵔⵉ ⵅ ⵓⴱⵓⵀⴰⵍⵉ ⴰⵏⴻⵛⵜ ⵜⵓⴱⴱⵓⵀⴻⵍⵢⴰ ⵏⵏⴻⵙ,
ⵎⴰⵃⴻⵏⴷ ⵓⵍⴰ ⴷ ⵛⴻⴽ ⵡⴰⵔ ⴷⴰⵢⴻⵙ ⵜⴰⵔⴻⴽⴽⵡⴻⵙⴻⴷ.
5 ⴰⵔⵔ ⵅ ⵓⴱⵓⵀⴰⵍⵉ ⵄⵍⴰⵃⵙⴰⴱ ⵜⵓⴱⴱⵓⵀⴻⵍⵢⴰ ⵏⵏⴻⵙ,
ⵎⴰⵃⴻⵏⴷ ⵡⴰⵔ ⵉⵜⵜⵖⵉⵍ ⵏⴻⵜⵜⴰ ⴷ ⴰⵎⵉⵖⵉⵙ ⴷⵉ ⵜⵉⵟⵟⴰⵡⵉⵏ ⵏⵏⴻⵙ.
6 ⴰⵎ ⵡⴻⵏⵏⵉ ⵉⵜⵜⵇⴻⵙⵙⴻⵏ ⵉⴹⴰⵔⴻⵏ ⵏ ⵢⵉⵅⴻⴼ ⵏⵏⴻⵙ ⵓ ⴰⵎ ⵡⴻⵏⵏⵉ ⵉⵙⵙⴻⵙⵙⴻⵏ ⵍⵄⵓⵏⴼ,
ⴰⵎⵎⵓ ⵉ ⵢⴻⴵⴰ ⵡⴻⵏⵏⵉ ⵉⵙⵙⴻⴽⴽⴰⵏ ⵜⵉⴱⵔⴰⵜⵉⵏ ⵙ ⵓⴼⵓⵙ ⵏ ⵉⵊⵊ ⵏ ⵓⴱⵓⵀⴰⵍⵉ.
7 ⵜⵉⵎⴻⵙⵙⴰⴹⵉⵏ ⵏ ⵓⵏⴻⵄⴹⴰⴱ ⴰⵔⴻⵀⴼⴻⵏⵜ,
ⴰⵎⵎⵓ ⵉ ⵢⴻⴵⴰ ⵓⵍⴰ ⴷ ⴰⵡⴰⵍ ⵉⵡⴻⵥⵏⴻⵏ ⴷⴻⴳ ⵓⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ.
8 ⴰⵎⴻⵛⵏⴰⵡ ⵡⴻⵏⵏⵉ ⵉⵜⵜⵛⴻⴷⴷⴰⵏ ⴰⵥⵔⵓ ⵉⵖⵍⴰⵏ ⴷⴻⴳ ⵉⴵⵉⵢ,
ⴰⵎⵎⵓ ⵉ ⵉⴵⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵛⵛⴰⵏ ⵉ ⵓⴱⵓⵀⴰⵍⵉ.
9 ⴰⵎ ⵉⵛⵜ ⵏ ⵜⵉⵡⴻⵏⵜ ⵏ ⵜⵥⴻⴳⴳⵯⴰⵔⵜ ⴷⴷ-ⵉⴳⴳⴻⵄⵄⴷⴻⵏ ⴷⴻⴳ ⵓⴼⵓⵙ ⵏ ⵓⵙⴽⴰⵔⵊⵉ,
ⴰⵎⵎⵓ ⵉ ⵉⴵⴰ ⵍⵎⴰⵜⴰⵍ ⴷⴻⴳ ⵓⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ.
10 ⴰⵟⵟⴰⵙ ⵉⵥⴻⵎⵎⴰⵔ ⴰⴷ ⴷⴷ-ⵉⵙⵙⵓⴼⴼⴻⵖ ⵎⴰⵔⵔⴰ ⵥⴻⴳ ⵢⵉⵅⴻⴼ ⵏⵏⴻⵙ,
ⵎⴰⵛⴰ ⵍⵎⵓⵏⴻⵜ ⵏ ⵓⴱⵓⵀⴰⵍⵉ ⴷ ⵡⴻⵏⵏⵉ ⵜ ⵖⴰ ⵉⵛⵔⴰⵏ, ⴰⴷ ⵅⵚⴰⵔⴻⵏ.
11 ⴰⵎ ⵉⵊⵊ ⵏ ⵡⴻⵇⵥⵉⵏ ⵉⵄⴻⵇⴱⴻⵏ ⵖⴰⵔ ⵎⵉⵏ ⵉⵄⵓⵇⵇ,
ⴰⵎⵎⵓ ⵉ ⵉⵜⵜⵄⴰⵡⴰⴷ ⵉⵊⵊ ⵏ ⵓⴱⵓⵀⴰⵍⵉ ⵜⵓⴱⴱⵓⵀⴻⵍⵢⴰ ⵏⵏⴻⵙ. ■
12 ⵎⴰ ⵜⴻⵥⵔⵉⴹ ⵄⴻⵎⵎⴰⵔⵚ ⵉⵊⵊ ⵏ ⵡⴻⵔⵢⴰⵥ ⵉ ⵉⵜⵜⴻⴳⴳⴻⵏ ⵉⵅⴻⴼ ⵏⵏⴻⵙ ⴷ ⴰⵎⵉⵖⵉⵙ?
ⴰⵇⴰ ⴷⵉⵏ ⴰⵙⵉⵜⴻⵎ ⴰⵟⵟⴰⵙ ⵉ ⵢⵉⵊⵊ ⵏ ⵓⴱⵓⵀⴰⵍⵉ ⵓⵍⴰ ⵅⴰⵙ. ■
13 ⴰⵎⴻⵄⴳⵓⵥ ⵉⵇⵇⴰⵔ: “ⴰⵇⴰ ⴷⵉⵏ ⵉⵊⵊ ⵏ ⵡⴰⵢⵔⴰⴷ ⵉⵥⴻⵀⵀⴰⵔⴻⵏ ⴷⴻⴳ ⵡⴻⴱⵔⵉⴷ,
ⵉⵊⵊ ⵏ ⵡⴻⵢⵔⴰⴷ ⵢⵓⵢⵓⵔ ⴷⴻⴳ ⵡⴰⵥⵥⴰⵢⴻⵏ!” ■
14 ⴰⵎ ⵜⴻⵡⵡⴰⵔⵜ ⵜᵉⵜⵜⵓⵏⵏⵓⴹ ⵉ ⵜⴻⵖⵎⴰⵔⵜ ⵏⵏⴻⵙ,
ⴰⵎⵎⵓ ⵉ ⵉⵜⵜⵓⵏⵓⴹ ⵓⵍⴰ ⴷ ⴰⵎⴻⵄⴳⵓⵥ ⴷⵉ ⵇⴰⵎⴰ ⵏⵏⴻⵙ.
15 ⴰⵎⴻⵄⴳⵓⵥ ⵉⵙⵙⵏⵓⴼⴼⴰⵔ ⴰⴼⵓⵙ ⵏⵏⴻⵙ ⴷⵉ ⵟⵟⴻⴱⵚⵉ,
ⴰⵇⴰ ⵏⴻⵜⵜⴰ ⵢⴰⵔⵅⵓ ⵎⴰⵃⴻⵏⴷ ⴰⴷ ⵜ ⵉⵙⵙⵉⵡⴻⴹ ⵖⴰⵔ ⵓⵇⴻⵎⵎⵓⵎ ⵏⵏⴻⵙ. □ ■
16 ⴰⵎⴻⵄⴳⵓⵥ ⵉⵜⵜⵡⴰⵍⴰ ⵉⵅⴻⴼ ⵏⵏⴻⵙ ⴷ ⴰⵎⵉⵖⵉⵙ,
ⵥⵉ ⵙⴻⴱⵄⴰ ⵉⵔⵢⴰⵥⴻⵏ ⵏⵏⵉ ⵉⵥⴻⵎⵎⴰⵔⴻⵏ ⴰⴷ ⴷⴷ-ⴰⵔⵔⴻⵏ ⵙ ⵍⴻⴼⵀⴰⵎⴻⵜ.
17 ⴰⵎ ⵡⴻⵏⵏⵉ ⵉⵜⵜⵛⴻⴱⴱⴰⵔⴻⵏ ⴷⴻⴳ ⵉⵎⴻⵥⵥⵓⵖⴻⵏ ⵏ ⵡⴻⵇⵥⵉⵏ,
ⴰⵎⵎⵓ ⵉ ⵢⴻⴵⴰ ⵡⴻⵏⵏⵉ ⵉⵜⵜⴰⴷⴼⴻⵏ ⴷⴻⴳ ⵓⵎⵛⵓⴱⴱⴻⵛ ⵏⵏⵉ ⵡⴰⵔ ⵉⴵⵉ ⵏⵏⴻⵙ.
18 ⴰⵎ ⵉⵊⵊ ⵏ ⵓⵎⴻⵊⵏⵓⵏ
ⵏⵏⵉ ⵉⵛⵛⴰⵜⴻⵏ ⵉⵚⴻⴼⴹⴰⵡⴻⵏ ⴷ ⴼⵍⵉⵜⵛⴰⵜ ⴷ ⵙⵙⴻⵎ ⵉⵏⴻⵇⵇⴻⵏ,
19 ⴰⵎⵎⵓ ⵉ ⵉⴵⴰ ⵡⴻⵔⵢⴰⵥ ⵏⵏⵉ ⵉⵛⴻⵎⵜⴻⵏ ⴰⵎⵇⴰⵔⵔⴻⴱ ⵏⵏⴻⵙ,
ⵓⵛⴰ ⵉⵇⵇⴰⵔ: “ⴰⵇⴰ ⵜⵜⵇⴻⵙⵙⴰⵔⴻⵖ ⵡⴰⵀⴰ, ⵏⵉⵖ ⵍⵍⴰ!”
20 ⵎⴰⵍⴰ ⵡⴰⵔ ⵉⴵⵉ ⵓⴽⴻⵛⵛⵓⴹ, ⴰⴷ ⵜⴻⵅⵙⵉ ⵜⵎⴻⵙⵙⵉ,
ⵓ ⵎⴰⵍⴰ ⵡⴰⵔ ⴷⵉⵏ ⵉⴵⵉ ⵓⵅⴱⴰⵔⵊⵉ, ⵢⴰⵔⴻⵙⵙⴰ ⵓⵎⵛⵓⴱⴱⴻⵛ. ■
21 ⴰⵎ ⵉⴵⴰ ⵍⴻⴼⵃⴻⵎ ⵉ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⴷ ⵓⴽⴻⵛⵛⵓⴹ ⵉ ⵜⵎⴻⵙⵙⵉ,
ⴰⵎⵎⵓ ⵉ ⵢⴻⴵⴰ ⵉⵊⵊ ⵏ ⵡⴻⵔⵢⴰⵥ ⵉⵜⵜⴻⵎⵛⵓⴱⴱⵓⵛⴻⵏ
ⵎⴰⵃⴻⵏⴷ ⴰⴷ ⴷⴷ-ⵉⵙⵏⴻⴽⴽⴰⵔ ⴰⵎⴻⵏⵖⵉ. ■
22 ⴰⵡⴰⵍⴻⵏ ⵏ ⵓⵅⴱⴰⵔⵊⵉⵢ ⴰⵎ ⵃⴰⵍⴰⵡⵉⵜ,
ⵜⵉⵏⵏⵉ ⵀⴻⴽⴽⵡⴰⵏⵜ ⴷⴻⴳ ⵉⵅⵅⴰⵎⴻⵏ ⵏ ⴷⴰⵅⴻⵍ ⵏ ⵓⵄⴻⴷⴷⵉⵙ. ■
23 ⴰⵎ ⴽⵓⴼⴼⵓ ⵏ ⵏⵏⵓⵇⴰⵔⵜ ⵅ ⵓⵛⴻⴵⵉⵇ ⵏ ⵜⵍⴰⵅⵜ,
ⴰⵎⵎⵓ ⵉ ⴵⴰⵏ ⵉⵢⴻⵏⵛⵉⵛⴻⵏ ⵉⵎⵉⵥⵉⴹⴻⵏ ⵏ ⵢⵉⵊⵊⴻⵏ ⵙ ⵡⵓⵍ ⴷ ⴰⵄⴻⴼⴼⴰⵏ.
24 ⵡⴻⵏⵏⵉ ⴷⵉ ⵉⴵⴰ ⵡⴻⵛⵔⴰⵀ, ⵉⵙⵙⵏⵓⴼⴼⴰⵔⴰ ⵉ-ⵜ ⵙ ⵢⵉⵍⴻⵙ ⵏⵏⴻⵙ
ⵎⴰⵛⴰ ⴷⴻⴳ ⵡⵓⵍ ⵏⵏⴻⵙ ⵉⵜⵜⵅⴰⵔⵔⴻⵚ ⴷⵉ ⵍⵖⴻⵛⵛ.
25 ⵎⴰⵍⴰ ⵏⴻⵜⵜⴰ ⵉⵜⵜⵃⴻⵛⵛⴻⵎ ⵙ ⵜⵎⵉⵊⵊⴰ ⵏⵏⴻⵙ, ⵡⴰⵔ ⵜ ⵜⵜⵉⵇⵇⵉ ⵛⴰ,
ⵎⴰⵖⴰⵔ ⵙⴻⴱⵄⴰ ⵏ ⵏⵏⵄⴰⵡⴰⵜ ⴰⵇⴰ ⴷⵉⵏ ⴷⴻⴳ ⵡⵓⵍ ⵏⵏⴻⵙ.
26 ⵓⵍⴰ ⵎⴰⵍⴰ ⵉⵍⴻⵃⵃⴻⴼ ⵡⴻⵛⵔⴰⵀ ⵏⵏⴻⵙ ⴷⴻⴳ ⵡⴻⵛⵎⴰⵜ,
ⵜⵓⵄⴻⴼⴼⵏⴰ ⵏⵏⴻⵙ ⴰⴷ ⵜᵉⵜⵜⵡⴰⵄⴰⵔⵔⴰ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ.
27 ⵡⴻⵏⵏⵉ ⵉⵖⵥⵉⵏ ⵜⴰⵙⵔⴰⴼⵜ, ⴰⴷ ⴷⴰⵢⴻⵙ ⵉⵡⴹⴰ ⵙⵉⵎⴰⵏⵜ ⵏⵏⴻⵙ,
ⵓ ⵡⴻⵏⵏⵉ ⵉⵙⵙⴻⵇⵏⵓⵏⵏⵓⵢⴻⵏ ⵉⵛⵜ ⵏ ⵜⴻⵚⴹⴰⵔⵜ, ⴰⴷ ⵖⴰⵔⴻⵙ ⴷⴷ-ⵜⴻⴷⵡⴻⵍ. ■
28 ⵉⵍⴻⵙ ⵉⵙⵙⵅⴰⵔⵔⵉⵇⴻⵏ ⵉⵛⴰⵔⵔⴻⵀ ⵡⴻⵏⵏⵉ ⵉⵜⵜⴰⵔⴻⴷⴷⴵⴻⵏ,
ⵉⵊⵊ ⵏ ⵓⵇⴻⵎⵎⵓⵎ ⴰⵍⴻⵇⵇⴰⵖ ⵙ ⵜⴻⵃⵔⴰⵢⵎⴻⵛⵜ ⵉⵜⵜⴰⵡⵉ-ⴷⴷ ⵍⵅⴰⵔⴱⴻⵜ.