25
1 ⵓⵍⴰ ⴷ ⵉⵏⴰ ⴷ ⴰⵡⴰⵍⴻⵏ ⵉⵡⴻⵥⵏⴻⵏ ⵏ ⵙⵓⵍⵉⵎⴰⵏ ⵏⵏⵉ ⵉⵜⵜⵄⴰⵡⴰⴷⴻⵏ ⵓⵔⵉⵏ ⵜⴻⵏ ⵉⵔⵢⴰⵥⴻⵏ ⵏ ⵃⵉⵥⵇⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ.
2 ⴰⵇⴰ ⴷ ⵛⵛⴰⵏ ⵏ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵉⵙⵙⴰⵔ ⵉⵛⵜ ⵏ ⵜⵎⴻⵙⵍⴰⵛⵜ,
ⵎⴰⵛⴰ ⵛⵛⴰⵏ ⵏ ⵉⵊⴻⴵⵉⴷⴻⵏ ⴰⵏⴱⴰⵛ ⴷⴻⴳ ⵉⵛⵜ ⵏ ⵜⵎⴻⵙⵍⴰⵛⵜ. ■
3 ⵍⵓⵄⵍⴰ ⵏ ⵓⵊⴻⵏⵏⴰ ⴷ ⵍⴰⴵⴰⵖ ⵏ ⵜⴻⵎⵎⵓⵔⵜ,
ⴷ ⵡⵓⵍ ⵏ ⵉⵊⴻⴵⵉⴷⴻⵏ ⵡⴰⵔ ⴵⵉⵏ ⵉ ⵓⴱⴻⵇⵇⴻⵛ.
4 ⴽⴽⴻⵙ ⴽⵓⴼⴼⵓ ⵥⵉ ⵏⵏⵓⵇⴰⵔⵜ,
ⵓ ⴳⴳⵓⵔ ⴰⴷ ⴷⴷ-ⵜⴻⴼⴼⴻⵖ ⵉⵛⵜ ⵏ ⵍⵇⴻⵛⵄⴻⵜ ⵉ ⵡⴻⵎⵥⵉⵍ.
5 ⵙⴱⴻⵄⵄⴻⴷ ⵉⵄⴻⴼⴼⴰⵏⴻⵏ ⵥⵉ ⵥⵥⴰⵜ ⵏ ⵡⵓⴷⴻⵎ ⵏ ⵓⵊⴻⴵⵉⴷ,
ⵓⵛⴰ ⵅⴻⵏⵏⵉ ⴰⴷ ⵉⵜⵜⵡⴰⵙⵙⴻⵎⵜⴻⵏ ⵍⵄⴰⵔⵛ ⵏⵏⴻⵙ ⵙ ⵜⵙⴻⴳⴷⴰ. ■
6 ⵡⴰⵔ ⵜⴼⴻⵢⵢⴻⵛ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ,
ⵡⴰⵔ ⵜⵜⴱⴻⴷⴷⵉ ⵎⴰⵏⵉ ⵜⵜⴱⴻⴷⴷⴰⵏ ⵉⵎⴻⵇⵇⵔⴰⵏⴻⵏ.
7 ⵎⴰⵖⴰⵔ ⵉⵃⵍⴰ, ⴰⴷ ⴰⵛ ⵉⵏⵉⵏ: “ⴳⴰⵄⵄⴻⴷ-ⴷⴷ ⴷⴰ!”,
ⵓⵍⴰ ⵎⴰ ⴰⴷ ⵛⴻⴽ ⵙⵙⴻⵀⵡⴰⵏ ⵥⵥⴰⵜ ⵉ ⵡⵓⴷⴻⵎ ⵏ ⵉⵊⵊ ⵏ ⵓⵎⵛⴻⵏⵏⴻⵄ
ⵏⵏⵉ ⵥⵔⵉⵏ ⵜⵉⵟⵟⴰⵡⵉⵏ ⵏⵏⴻⴽ. ■
8 ⵡⴰⵔ ⵜⵜⵇⴻⴵⵉⵇ ⴰⴷ ⵜⴻⴷⵄⵉⴷ,
ⵎⴰⵖⴰⵔ ⵎⵉⵏ ⵜⴻⵅⵙⴻⴷ ⴰⴷ ⵜⴻⴳⴳⴻⴷ ⵖⴰⵔ ⵓⵏⴻⴳⴳⴰⵔ ⵏⵏⴻⵙ,
ⵎⴰⵍⴰ ⴰⵎⵇⴰⵔⵔⴻⴱ ⵏⵏⴻⴽ ⴰⴷ ⵛⴻⴽ ⵉⵙⵙⴻⴼⴹⴻⵃ? ■
9 ⵛⴰⵔⵔⴻⵄ ⴰⴽ-ⴷ ⵓⵎⵇⴰⵔⵔⴻⴱ ⵏⵏⴻⴽ,
ⵎⴰⵛⴰ ⵡⴰⵔ ⵙⵙⵓⴼⴼⵓⵖ ⵙⵙⵉⵔⵔ ⵏ ⵡⴻⵏⵏⴻⵖⵏⵉ,
10 ⵃⵉⵎⴰ ⵡⴻⵏⵏⵉ ⴷ ⴰⵙ ⵉⵜⵜⴻⵙⵍⴰⵏ ⵡⴰⵔ ⵛⴻⴽ ⵉⵙⵙⵃⴻⵛⵛⴻⵎ ⵛⴰ,
ⵎⴰⵖⴰⵔ ⵍⴻⵅⴷⴻⵏⵏⵉ ⵡⴰⵔ ⵉⵥⴻⵎⵎⴰⵔ ⴰⴷ ⵜᵉⵜⵜⵡⴰⵙⴱⴻⵄⵄⴻⴷ ⵍⴻⴼⴹⵉⵃⴻⵜ ⵏⵏⴻⴽ ⵄⴰⴷ.
11 ⴰⵎ ⵜⵜⴻⴼⴼⴰⵃⵉⵏ ⵏ ⵡⵓⵔⴻⵖ ⵅ ⵟⵟⴱⴰⵙⴰ ⵏ ⵏⵏⵓⵇⴰⵔⵜ,
ⴰⵎⵎⵓ ⴵⴰⵏ ⵡⴰⵡⴰⵍⴻⵏ ⵙⵙⵉⵡⵍⴻⵏ ⵜⴻⵏ ⵙ ⵍⴻⵇⵢⴰⵙ ⵏⵏⴻⵙ.
12 ⴰⵎ ⵉⵛⵜ ⵏ ⵜⵅⴰⴷⴻⵏⵜ ⵏ ⵡⵓⵔⴻⵖ ⵓ ⴰⵎ ⵉⵛⵜ ⵏ ⵜⵙⴻⴷⴷⴻⵛⵜ ⵏ ⵡⵓⵔⴻⵖ ⵉⵖⵍⴰⵏ ⵇⴰⵄ,
ⴰⵎⵎⵓ ⵉ ⵉⴵⴰ ⵓⵡⴻⴱⴱⴻⵅ ⴰⵎⵉⵖⵉⵙ ⵖⴰⵔ ⵓⵎⴻⵥⵥⵓⵖ ⵉⵜⵜⴻⵙⵍⴰⵏ.
13 ⴰⵎ ⵡⴻⴷⴼⴻⵍ ⴰⵙⴻⵎⵎⴰⴹ ⴷⴻⴳ ⵉⵊⵊ ⵏ ⵡⴰⵙⵙ ⵏ ⵜⵎⴻⵢⵔⴰ,
ⴰⵎⵎⵓ ⵉ ⵉⴵⴰ ⵓⵎⵙⴻⵅⵅⴰⵔ ⵉⵜⵜⴰⵎⵏⴻⵏ ⴷⴻⴳ ⵡⴻⵏⵏⵉ ⵜ ⵉⵙⵙⴻⴽⴽⴰⵏ,
ⵎⴰⵖⴰⵔ ⵉⵙⵙⴼⴰⵇⴰ ⵍⴻⵄⵎⴰⵔ ⵏ ⴱⴰⴱ ⵏⵏⴻⵙ. ■
14 ⴰⵎ ⵉⵙⴻⵢⵏⵓⵜⴻⵏ ⴷ ⵓⵙⴻⵎⵎⵉⴹ ⴱⵍⴰ ⴰⵏⵥⴰⵔ,
ⴰⵎⵎⵓ ⴰⵔⵢⴰⵥ ⵏⵏⵉ ⵉⵜⵜⵄⴻⴼⴼⴰⵔ ⴷⴻⴳ ⵉⵛⵜ ⵏ ⵜⴻⵔⵥⴻⴼⵜ ⵡⴰⵔ ⵉⵙⴻⴽⴽⵡⵉⵏ.
15 ⵙ ⵜⵜⴰⵙⵉⵄ ⵏ ⵍⵅⴰⴹⴰⵔ ⵉⵜⵜⵡⴰⵙⴻⵇⵏⴻⵄ ⵍⵃⴰⴽⴻⵎ,
ⵉⵊⵊ ⵏ ⵢⵉⵍⴻⵙ ⴰⵎⵉⵥⵉⴷ ⵉⵜⵜⴰⵔⴻⵥⵥⴰ ⵉⵅⵙⴰⵏ. ■
16 ⵎⴰⵍⴰ ⵜⵓⴼⵉⴷ ⵜⴰⵎⵎⴻⵏⵜ, ⴻⵛⵛ ⵎⵉⵏ ⵜⴻⵃⵡⴰⵊⴻⴷ ⵡⴰⵀⴰ,
ⵏⵉⵖ ⴰⴷ ⵜⴰⴼⴼ ⵜⴻⵛⵛⵉⴷ ⴽⵜⴰⵔ ⵥⵉ ⵎⵉⵏ ⵜⴻⵃⵡⴰⵊⴻⴷ,
ⵓ ⴱⴰⵍⴰⴽ ⴰⴷ ⵜⵜ-ⵉ-ⴷⴷ ⵜⵄⵓⵇⵇⴻⴷ.
17 ⵡⴰⵔ ⵙⵙⵔⵓⵙⴰ ⴰⴹⴰⵔ ⵏⵏⴻⴽ ⴰⵟⵟⴰⵙ ⴷⵉ ⵜⴰⴷⴷⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⴽ,
ⵏⵉⵖ ⴰⴷ ⵛⴻⴽ ⵉⵊⵊⵉⵡⴻⵏ ⵓ ⴰⴷ ⵛⴻⴽ ⵉⵄⵉⴼⴼ.
18 ⴰⵎ ⵡⴻⴼⴹⵉⵙ ⴷ ⵙⵙⵉⴼ ⴷ ⴼⵍⵉⵜⵛⴰ ⵉⵇⴻⴹⵄⴻⵏ,
ⴰⵎⵎⵓ ⵉ ⵉⴵⴰ ⵡⴻⵔⵢⴰⵥ ⵏⵏⵉ ⵉⵛⴻⵀⵀⴷⴻⵏ ⵙ ⵥⵓⵔ ⵅ ⵓⵎⵇⴰⵔⵔⴻⴱ ⵏⵏⴻⵙ. ■
19 ⴰⵎ ⵜⵉⵖⵎⴻⵙⵜ ⵢⴰⵔⵥⴻⵏ ⵓ ⴰⵎ ⵓⴹⴰⵔ ⵉⵏⵇⵔⴰⴹⴻⵏ,
ⴰⵎⵎⵓ ⵉ ⵉⴵⴰ ⵓⵜⴻⵛⵍⵉ ⵅ ⵡⴻⵏⵏⵉ ⵡⴰⵔ ⴷⵉ ⵉⴵⵉ ⵜⵜⵉⵇⴻⵜ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ.
20 ⴰⵎ ⵡⴻⵏⵏⵉ ⵉⵜⵜⴻⴽⴽⵙⴻⵏ ⴰⴱⴰⵔⵜⴻⵙⵙⵓ ⵏⵏⴻⵙ ⴷⴻⴳ ⵉⵊⵊ ⵏ ⵡⴰⵙⵙ ⵉⵙⵎⴻⴹ
ⵓ ⴰⵎ ⵍⵅⴻⴵ ⵉ ⵜⵜⴻⴳⴳⴻⵏ ⵅ ⵏⵉⵟⵔⵓⵏ,
ⴰⵎⵎⵓ ⵉ ⵉⴵⴰ ⵡⴻⵏⵏⵉ ⵉⵜⵜⵖⴻⵏⵏⴰⵊⴻⵏ ⵉⵥⵍⴰⵏ ⵥⵥⴰⵜ ⵉ ⵢⵉⵊⵊⴻⵏ ⵙ ⵡⵓⵍ ⵉⵛⴹⴻⵏ. ■
21 ⵎⴰⵍⴰ ⵉⴵⵓⵥ ⵡⴻⵏⵏⵉ ⵛⴻⴽ ⵉⵛⴰⵔⵔⵀⴻⵏ, ⵅⴻⵏⵏⵉ ⴻⵡⵛ ⴰⵙ ⴰⵖⵔⵓⵎ,
ⵎⴰⵍⴰ ⵉⴼⴼⵓⴷ, ⴻⵡⵛ ⴰⵙ ⴰⴷ ⵉⵙⵓ, ■
22 ⵎⴰⵖⴰⵔ ⴰⵎⵎⵓ ⵉ ⵜⵢⴰⵔⵔⵡⴻⴷ ⵛⴻⴽ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵅ ⵓⵥⴻⴵⵉⴼ ⵏⵏⴻⵙ,
ⵓ ⵙⵉⴷⵉ ⴰⴷ ⵛⴻⴽ ⵉⵅⴻⴵⴻⵚ.
23 ⴰⵙⴻⵎⵎⵉⴹ ⵥⵉ ⵛⵛⴰⵎⴰⵍ ⵉⵜⵜⴰⵡⵉ-ⴷⴷ ⴰⵏⵥⴰⵔ,
ⵉⵍⴻⵙ ⴰⵖⴻⴷⴷⴰⵔ ⵉⵜⵜⴰⵡⵉ-ⴷⴷ ⵉⵊⵊ ⵏ ⵡⵓⴷⴻⵎ ⵉⵅⴻⵢⵢⵇⴻⵏ.
24 ⵉⵃⵍⴰ ⴰⴷ ⵜⵥⴻⴷⵖⴻⴷ ⴷⴻⴳ ⵉⵛⵜ ⵜⴻⵖⵎⴰⵔⵜ ⵏ ⵜⵥⴻⵇⵇⴰ,
ⵓⵍⴰ ⵅ ⵜⴰⵥⴻⴷⴷⵉⵖⵜ ⴰⴽ-ⴷ ⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴻⵎⵛⵓⴱⴱⵓⵛⴻⵏ
ⴷⴻⴳ ⵉⵛⵜ ⵏ ⵜⴰⴷⴷⴰⵔⵜ ⵜⵛⴰⵔⵛ. ■
25 ⴰⵎ ⵡⴰⵎⴰⵏ ⵉⵚⴻⵎⵎⴰⴹⴻⵏ ⵉ ⵢⵉⵊⵊ ⵏ ⵍⴻⵄⵎⴰⵔ ⵢⵓⵃⴻⵍ,
ⴰⵎⵎⵓ ⵉ ⵉⴵⴰ ⵍⴻⵅⴱⴰⵔ ⴰⵚⴻⴱⵃⴰⵏ ⵥⴻⴳ ⵉⵛⵜ ⵏ ⵜⴻⵎⵎⵓⵔⵜ ⵜⵉⴳⴳⵯⴻⵊ.
26 ⴰⵎ ⵉⵊⵊ ⵏ ⵍⵄⵓⵏⵚⴰⵔ ⵉⵜⵜⵡⴰⴼⴻⵙⴷⴻⵏ ⵓ ⴰⵎ ⵉⵊⵊ ⵏ ⵡⴰⵏⵓ ⵖⴻⵛⵛⴻⵏ ⵜ,
ⴰⵎⵎⵓ ⵉ ⵉⴵⴰ ⵓⵎⵙⴻⴳⴳⴻⴷ ⵉⵜⵜⵥⴻⵄⵥⵉⵄⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵉⵄⴻⴼⴼⴰⵏⴻⵏ.
27 ⵎⴰⵛⵛⴰ ⵏ ⵡⴰⵟⵟⴰⵙ ⵏ ⵜⴰⵎⵎⴻⵏⵜ ⵡⴰⵔ ⵉⴵⵉ ⵛⴰ ⵎⵍⵉⵃ,
ⵎⴰⵛⴰ ⵜⴰⵔⴻⵥⵥⵓⵜ ⴷⵉ ⵜⵎⴻⵙⵍⴰⵢⵉⵏ ⵢⴻⵡⵄⴰⵔⴻⵏ ⴷ ⵛⵛⴰⵏ.
28 ⴰⵎ ⵉⵛⵜ ⵏ ⵜⴻⵏⴷⵉⵏⵜ ⵉⵀⴻⴷⵎⴻⵏ ⴱⵍⴰ ⵍⵃⵉⴹ,
ⴰⵎⵎⵓ ⵉ ⵉⴵⴰ ⵉⵊⵊ ⵏ ⵡⴻⵔⵢⴰⵥ ⵡⴰⵔ ⵉⵜⵜⴻⵟⵟⴻⴼ ⴱⵓⵃⴱⴻⵍ ⵏⵏⴻⵙ. ■