24
1 ⵡⴰⵔ ⵜⵜⴰⵙⴻⵎ ⵥⴻⴳ ⵉⵔⵢⴰⵥⴻⵏ ⵉⵄⴻⴼⴼⴰⵏⴻⵏ, ⵡⴰⵔ ⴰⵔⴻⵥⵥⵓ ⵛⴰ ⵜⵎⵓⵏⴻⵜ ⴰⴽⵉⴷⵙⴻⵏ. ■
2 ⵎⴰⵖⴰⵔ ⵓⵍ ⵏⵙⴻⵏ ⵉⵜⵜⴻⵇⵇⴻⵔ ⵖⴰⵔ ⵓⵔⴻⴷⴷⴻⴵ,
ⵓ ⵉⵢⴻⵏⵛⵉⵛⴻⵏ ⵏⵙⴻⵏ ⵙⵙⴰⵡⴰⵍⴻⵏ ⴰⵔⵥⵉⵢⵢⴻⵜ. ■
3 ⵜⴰⴷⴷⴰⵔⵜ ⵜᵉⵜⵜⵡⴰⴱⵏⴰ ⵙ ⵜⵉⵖⵉⵜ,
ⵜᵉⵜⵜⵡⴰⵙⴻⵎⵜⴻⵏ ⵙ ⵍⴻⴼⵀⴰⵎⴻⵜ,
4 ⵙ ⵜⵓⵙⵙⵏⴰ ⵜⵜⵡⴰⵄⴻⵎⵎⴰⵔⴻⵏ ⵉⵅⵅⴰⵎⴻⵏ ⵏ ⴷⴰⵅⴻⵍ,
ⵙ ⵎⴰⵔⵔⴰ ⴰⴳⵍⴰ ⵉⵖⵍⴰⵏ ⴷ ⵡⴰⴳⵍⴰ ⵉⵍⵉⵇⵇⴻⵏ.
5 ⴰⵔⵢⴰⵥ ⴰⵎⵉⵖⵉⵙ ⵉⵊⵀⴻⴷ,
ⴰⵔⵢⴰⵥ ⵏ ⵜⵓⵙⵙⵏⴰ ⵢⴰⵔⴻⵏⵏⵉ ⴷⵉ ⵊⵊⴻⵀⴷ ⵏⵏⴻⵙ, ■
6 ⵎⴰⵖⴰⵔ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴷⴻⵀ ⵓⵎⴻⵏⵖⵉ ⵙ ⵓⴷⴻⴱⴱⴰⵔ,
ⵓ ⵙ ⵍⴻⵎⵖⴰⵔⴻⵜ ⵏ ⵓⵎⵛⴰⵡⴰⵔ ⴰⴷ ⵢⵉⵍⵉ ⵓⵙⴻⵏⵊⴻⵎ. ■
7 ⵜⵉⵖⵉⵜ ⵜⵓⵄⵍⴰ ⵅ ⵓⴱⵓⵀⴰⵍⵉ,
ⵏⴻⵜⵜⴰ ⵡⴰⵔ ⴳⴳⵓⵔ ⴰⴷ ⵢⴰⵔⵥⴻⵎ ⴰⵇⴻⵎⵎⵓⵏ ⵏⵏⴻⵙ ⴷⵉ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ. ■
8 ⵡⴻⵏⵏⵉ ⵉⵜⵜⵅⴰⵔⵔⵉⵚⴻⵏ ⴷⵉ ⵍⵖⴰⵔ,
ⴰⴷ ⴰⵙ ⵍⴰⵖⴰⵏ ‘ⴰⵔⵔⴰⵢⵙ ⵏ ⴱⵓ-ⵜⴻⵃⵍⴰⵢⵎⴻⵛⵜ’.
9 ⵍⴻⵎⵡⴰⵢⴰⵍ ⵏ ⵓⵅⴰⵔⵔⴻⵚ ⵏ ⵓⴱⵓⵀⴰⵍⵉ ⴷ ⴷⴷⴻⵏⴱ,
ⵓ ⴰⵎⴻⵙⵜⴻⵀⵥⵉⵢ ⴷ ⵏⵏⵄⵉ ⵉ ⴱⵏⴰⴷⴻⵎ.
10 ⵎⴰⵍⴰ ⵜⴰⵔⵅⵓⴷ ⵥⴻⴳ ⵉⵅⴻⴼ ⵏⵏⴻⴽ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ,
ⴰⵎⵎⵓ ⵓⵍⴰ ⴷ ⵊⵊⵀⴻⴷ ⵏⵏⴻⴽ ⴰⴷ ⵜᵉⵜⵜⵡⴰⵃⵚⴰⵔ.
11 ⵙⴻⵏⵊⴻⵎ ⵉⵏⵏⵉ ⵉⵜⵜⵡⴰⵟⵟⴼⴻⵏ ⵎⴰⵃⴻⵏⴷ ⴰⴷ ⵜⵜⵡⴰⵏⵖⴻⵏ,
ⵉⵏⵏⵉ ⵜⴻⵏ ⵉⵜⵜⴰⵡⵢⴻⵏ ⵖⴰⵔ ⵎⴰⵏⵉ ⵜⴻⵏ ⵉ ⵖⴰ ⵏⵖⴻⵏ, ⵙⴱⴻⴷⴷ ⵉ-ⵜⴻⵏ! ■
12 ⵎⴰⵍⴰ ⵛⴻⴽ ⴰⴷ ⵜⵉⵏⵉⴷ: “ⵅⵥⴰⵔ, ⴰⵇⴰ ⵡⴰⵔ ⵏⴻⵙⵙⵉⵏ ⵡⴰⵍⵓ ⵅ ⵎⴰⵏ ⴰⵢⴰ!”,
ⵎⴰ ⵡⴻⵏⵏⵉ ⵉⵡⴻⵥⵥⵏⴻⵏ ⵓⵍⴰⵡⴻⵏ, ⵡⴰⵔ ⵜ ⵉⵙⵙⴰⵔⴳⵉⴱ?
ⵡⴻⵏⵏⵉ ⵉⵃⴻⵟⵟⴰⵏ ⵍⴻⵄⵎⴰⵔ ⵏⵏⴻⴽ, ⵉⵙⵙⴻⵏ ⵉ-ⵜ!
ⵏⴻⵜⵜⴰ ⴰⴷ ⵉⵅⴻⴵⴻⵚ ⴱⵏⴰⴷⴻⵎ ⵄⵍⴰⵃⵙⴰⴱ ⵍⵅⴻⴷⵎⴻⵜ ⵏⵏⴻⵙ. ■
13 ⴻⵛⵛ ⵜⴰⵎⵎⴻⵏⵜ, ⴰ ⵎⵎⵉ, ⵎⴰⵖⴰⵔ ⵏⴻⵜⵜⴰⵜ ⵜⴻⵚⴱⴻⵃ,
ⵓ ⵜⴰⵎⵎⴻⵏⵜ ⵏ ⵜⴻⵖⵔⴰⵙⵜ ⴰⵇⴰ ⴷ ⵜⵎⵉⵥⵉⴷⵜ ⵉ ⵡⴰⵏⴻⵖ ⵏⵏⴻⴽ.
14 ⴰⵎⵎⵓ ⵉ ⵜⴻⴵⴰ ⵜⵓⵙⵙⵏⴰ ⵏ ⵜⵉⵖⵉⵜ ⵉ ⵍⴻⵄⵎⴰⵔ ⵏⵏⴻⴽ.
ⵎⴰⵍⴰ ⵜⵓⴼⵉⴷ ⵜⵜ, ⵅⴻⵏⵏⵉ ⵜⴻⴵⴰ ⵜⵉⵡⴻⵛⵛⴰ, ⵓ ⵜⵔⴰⵊⵉⵜ ⵏⵏⴻⴽ ⵡⴰⵔ ⵜᵉⵜⵜⵡⴰⵇⴻⵟⵟⴻⵄ ⵛⴰ. ■
15 ⴰ ⴰⵄⴻⴼⴼⴰⵏ, ⵡⴰⵔ ⵜᵉⵜⵜⵃⴰⵎⴰ ⵅ ⵜⵥⴻⴷⴷⵉⵖⵜ ⵏ ⵓⵎⵙⴻⴳⴳⴻⴷ,
ⵡⴰⵔ ⵀⴻⴷⴷⴻⵎ ⴰⵎⵛⴰⵏ ⵏ ⵡⴰⵔⴻⵢⵢⴻⵃ ⵏⵏⴻⵙ!
16 ⵎⴰⵖⴰⵔ ⴰⵎⵙⴻⴳⴳⴻⴷ ⴰⴷ ⵉⵡⴹⴰ ⵙⴻⴱⵄⴰ ⵏ ⵜⵡⴰⵍⴰⵡⵉⵏ, ⴰⴷ ⴷⴷ-ⵉⴽⴽⴰⵔ ⵄⴰⵡⴻⴷ,
ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⵏⵏⵇⴰⵔⴹⴻⵏ ⵙ ⵍⵖⴰⵔ. ■
17 ⵡⴰⵔ ⴼⴰⵔⵔⴻⵃ ⵉ ⵓⵡⴻⵟⵟⵓ ⵏ ⵍⴻⵄⴷⵓ ⵏⵏⴻⴽ,
ⵎⴰⵍⴰ ⵏⴻⵜⵜⴰ ⵉⵏⵇⴰⵔⴹ, ⴻⵊⵊ ⵓⵍ ⵏⵏⴻⴽ ⵡⴰⵔ ⵉⴼⴰⵔⵔⴻⵃ, ■
18 ⵎⴰⵃⴻⵏⴷ ⵙⵉⴷⵉ ⵡⴰⵔ ⵜ ⵉⵥⴰⵔⵔ
ⵓ ⵎⴰⵏ ⴰⵢⴰ ⴰⴷ ⵢⵉⵍⵉ ⴷ ⵍⵄⵉⴱ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵓ ⵏⴻⵜⵜⴰ ⴰⴷ ⵅⴰⵙ ⵉⵙⵙⵃⴻⵢⵢⴻⴷ ⴰⵖⴹⴰⴱ ⵏⵏⴻⵙ.
19 ⵡⴰⵔ ⵜⵜⵅⴻⵢⵢⵉⵇ ⴰⵟⵟⴰⵙ ⵅ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ,
ⵡⴰⵔ ⵜⵜⴰⵙⴻⵎ ⵥⴻⴳ ⵉⵄⴻⴼⴼⴰⵏⴻⵏ, ■
20 ⵎⴰⵖⴰⵔ ⴰⵇⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ ⵡⴰⵔ ⵖⴰⵔⴻⵙ ⵜⵉⵡⴻⵛⵛⴰ,
ⵍⴻⴼⵏⴰⵔ ⵏ ⵉⵄⴻⴼⴼⴰⵏⴻⵏ ⴰⴷ ⵉⵜⵜⵡⴰⵙⴻⵅⵙⵉ. ■
21 ⴰ ⵎⵎⵉ, ⴳⴳⵯⴻⴷ ⵙⵉⴷⵉ ⴷ ⵓⵊⴻⴵⵉⴷ,
ⵡⴰⵔ ⵜⵜⵅⴻⴵⴻⴹ ⵛⴰ ⵉⵅⴻⴼ ⵏⵏⴻⴽ ⴰⴽ-ⴷ ⵢⴻⵏⵏⵉ ⵖⴰⵔ ⵉⴵⴰ ⵍⴱⴰⵍ ⵏⵏⴻⵖⵏⵉ,
22 ⵎⴰⵖⴰⵔ ⴰⴷ ⴷⴷ-ⵢⴰⵙ ⵓⴹⴻⵢⵢⴻⵄ ⵏⵙⴻⵏ ⴷⴻⴳ ⵉⵊⵊ ⵏ ⵓⵎⵓⵔ,
ⵡⵉ ⵉⵙⵙⵏⴻⵏ ⴰⵏⴻⴳⴳⴰⵔⵓ ⴰⵄⴻⴼⴼⴰⵏ ⵏ ⵉⵙⴻⴳⴳⵯⵓⵙⴰ ⵏⵙⴻⵏ?
23 ⵓⵍⴰ ⴷ ⵢⵉⵏⴰ ⴷ ⴰⵡⴰⵍⴻⵏ ⵉⵡⴻⵥⵏⴻⵏ ⵏ ⵉⵎⵉⵖⵉⵙⴻⵏ.
ⴰⵙⴼⴰⵔⵥ ⵏ ⵡⵓⴷⵎⴰⵡⴻⵏ ⴷⵉ ⴷⴷⴻⵄⵡⴻⵜ ⵡⴰⵔ ⵉⴵⵉ ⵛⴰ ⵎⵍⵉⵃ. ■
24 ⵡⴻⵏⵏⵉ ⵉⵇⵇⴰⵔⴻⵏ ⵉ ⵓⵄⴻⴼⴼⴰⵏ: “ⵛⴻⴽ ⴷ ⴰⵎⵙⴻⴳⴳⴻⴷ!”,
ⵡⴰⵏⵉⵜⴰ ⴰⴷ ⵜ ⵏⴻⵄⵍⴻⵏ ⵍⴻⴳⵏⵓⵙ, ⴰⴷ ⵜ ⵛⴰⵔⵀⴻⵏ ⵛⵛⵓⵄⵓⴱ. ■
25 ⵎⴰⵛⴰ ⵉⵏⵏⵉ ⵜⴻⵏ ⵉ ⵖⴰ ⵉⵃⴰⴽⵎⴻⵏ, ⴰⴷ ⵉⵍⵉⵏ ⵎⵍⵉⵃ,
ⵍⴱⴰⵔⴰⴽⴰ ⵙ ⵎⴰⵔⵔⴰ ⵍⵅⴰⵔ ⴰⴷ ⵖⴰⵔⵙⴻⵏ ⴷⴷ-ⵜⴰⵙ.
26 ⴰⵎ ⵉⵊⵊⴻⵏ ⵡⴻⵏⵏⵉ ⵉⵙⵙⵓⴷⵓⵎⴻⵏ ⵉⵢⴻⵏⵛⵉⵛⴻⵏ,
ⴰⵎⵎⵓ ⵉ ⵢⴻⴵⴰ ⵡⴻⵏⵏⵉ ⴷⴷ-ⵉⵜⵜⴰⵔⵔⴰⵏ ⵙ ⵡⴰⵡⴰⵍⴻⵏ ⵉⵙⴻⴳⴳⵎⴻⵏ.
27 ⵙⴻⵡⵊⴻⴷ ⵍⵅⴻⴷⵎⴻⵜ ⵏⵏⴻⴽ ⴱⴰⵔⵔⴰ,
ⵓⵛⴰ ⴽⴻⵎⵎⴻⵍ ⵉ-ⵜⵜ ⵉ ⵢⵉⵅⴻⴼ ⵏⵏⴻⴽ ⴷⴻⴳ ⵉⵢⵢⴰⵔ,
ⵓⵛⴰ ⴱⵏⴰ ⵜⴰⴷⴷⴰⵔⵜ ⵏⵏⴻⴽ ⴰⵡⴰⵔⵏⵉ ⵎⴰⵏ ⴰⵢⴰ!
28 ⵡⴰⵔ ⵜⵜⵉⵍⵉ ⴷ ⴰⵛⴻⵀⵀⴰⴷ ⴱⵍⴰ ⵙⵙⵉⴱⴱⴻⵜ ⵅ ⵓⵎⵇⴰⵔⵔⴻⴱ ⵏⵏⴻⴽ.
ⵎⴰ ⵉⵄⴻⴷⴷⴻⵍ ⴰⴷ ⵜⵖⴰⵔⵔⴻⴷ ⵙ ⵉⵢⴻⵏⵛⵉⵛⴻⵏ ⵏⵏⴻⴽ?
29 ⵡⴰⵔ ⵇⵇⴰⵔ: “ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵉⴳⴳⴰ ⵏⴻⵜⵜⴰ,
ⴰⵎⵎⵓ ⵉ ⴷⴷ-ⴰⵙ ⵉ ⵖⴰ ⴳⴳⴻⵖ ⵓⵍⴰ ⴷ ⵏⴻⵛⵛ!”,
ⵎⴰⵖⴰⵔ ⵏⴻⵛⵛ ⴰⴷ ⴷⴷ-ⵅⴻⵍⴼⴻⵖ ⵥⵉ ⴽⵓⵍ ⵉⵊⵊⴻⵏ ⵄⵍⴰⵃⵙⴰⴱ ⵍⵅⴻⴷⵎⴻⵜ ⵏⵏⴻⵙ. ■
30 ⵏⴻⵛⵛ ⴽⴽⴻⵖ ⵅ ⵢⴻⵢⵢⴰⵔ ⵏ ⵉⵊⵊ ⵏ ⵓⵎⴻⵄⴳⵓⵥ,
ⵓ ⵅ ⵓⵎⴰⵔⵊⵓⵄ ⵏ ⵓⴹⵉⵍ ⵏ ⵉⵊⵊ ⵏ ⴱⵏⴰⴷⴻⵎ ⵙ ⵡⵓⵍ ⵏⵏⴻⵙ ⵡⴰⵔ ⵉⵎⵜⵉⵏⴻⵏ.
31 ⵅⵥⴰⵔ, ⵜⴳⴻⵄⵄⴻⴷ-ⴷⴷ ⵅⴰⵙ ⵎⴰⵔⵔⴰ ⵜⴻⵢⵥⵉⵜ,
ⵜⴻⴷⵍⴰ ⵜⵥⴻⴳⴳⵯⴰⵔⵜ ⵓⴷⴻⵎ ⵏ ⵜⴻⵎⵎⵓⵔⵜ ⵏⵏⴻⵙ,
ⴰⵇⴰ ⵍⵃⵉⴹ ⵏⵏⴻⵙ ⵏ ⵡⴻⵥⵔⵓ ⵉⵜⵜⵡⴰⵀⴷⴻⵎ.
32 ⵍⴰⵎⵉ ⵜⵜ ⵥⵔⵉⵖ, ⴽⵙⵉⵖ ⵜⵜ ⵖⴰⵔ ⵡⵓⵍ ⵉⵏⵓ,
ⵥⵔⵉⵖ ⵜⵜ ⵓⵛⴰ ⴽⵙⵉⵖ ⵜⵜ ⴰⵎ ⵉⵊⵊ ⵏ ⵓⵡⴻⴱⴱⴻⵅ.
33 “ⴻⵊⵊ ⴰⵢⵉ ⴰⴷ ⵟⵟⵙⴻⵖ ⵛⵡⴰⵢⵜ ⴷⵔⵓⵙⵜ, ⵛⵡⴰⵢⵜ ⴷⵔⵓⵙⵜ ⵏ ⵓⵏⵓⴷⴻⵎ,
ⵛⵡⴰⵢⵜ ⴷⵔⵓⵙⵜ ⵏ ⵓⴱⵓⵥⵥⴻⵍ ⵙ ⵉⴼⴰⵙⵙⴻⵏ ⴹⴻⴼⵚⴻⵏ, ■
34 ⴷⵉⵏⵏⵉ ⴷⴷ ⵖⴰ ⵢⴰⵙ ⵥⵥⴻⵍⴹ ⵏⵏⴻⴽ,
ⵓⵍⴰ ⴷ ⵍⴻⵖⴱⴻⵏ ⵏⵏⴻⴽ ⴰⵎ ⵉⵊⵊ ⵏ ⵡⴻⵔⵢⴰⵥ ⵙ ⵍⴻⵙⵏⴰⵃ.”