23
1 ⵎⴰⵍⴰ ⵜⴻⵇⵇⵉⵎⴻⴷ ⵖⴰⵔ ⵟⵟⴰⴱⵍⴰ ⵖⴰⵔ ⵉⵊⵊ ⵏ ⵍⵃⴰⴽⴻⵎ ⵎⴰⵃⴻⵏⴷ ⴰⴷ ⵜⴻⵛⵛⴻⴷ ⴰⴽⵉⴷⴻⵙ,
ⵃⴹⴰ ⵎⵍⵉⵃ ⵎⵉⵏ ⵉⴵⴰⵏ ⵥⵥⴰⵜⴻⴽ.
2 ⴻⴳⴳ ⵉⵊⵊ ⵏ ⵍⵎⵓⵙ ⵅ ⵢⵉⵍⵉ ⵏⵏⴻⴽ,
ⵎⴰⵍⴰ ⵛⴻⴽ ⴷ ⵉⵊⵊ ⵏ ⴱⵓ-ⵍⴻⵎⵖⴰⵔⴻⵜ ⵏ ⵓⵄⴻⴷⴷⵉⵙ.
3 ⵡⴰⵔ ⵜⵜⴻⴳⴳ ⵎⴻⵥⵔⵉ ⴷⵉ ⵎⴰⵛⵛⴰ ⵏⵏⴻⵙ ⵉⵛⵏⴰⵏ,
ⵎⴰⵖⴰⵔ ⴰⵇⴰ-ⵜ ⴷ ⵎⴰⵛⵛⴰ ⵏ ⵜⵓⵅⵅⵓⵏⴰ.
4 ⵡⴰⵔ ⵙⵙⵉⵃⵉⵍ ⵉⵅⴻⴼ ⵏⵏⴻⴽ ⵃⵉⵎⴰ ⴰⴷ ⵜⴷⴻⵡⵍⴻⴷ ⴷ ⴱⵓ-ⵡⴰⴳⵍⴰ,
ⴻⵊⵊ ⵍⴻⴼⵀⴰⵎⴻⵜ ⵏ ⵢⵉⵅⴻⴼ ⵏⵏⴻⴽ ⴰⴷ ⵜⴰⵔⵙⴰ.
5 ⵎⴰⵍⴰ ⵟⵟⴰⵡⴻⵏⵜ ⵜⵉⵟⵟⴰⵡⵉⵏ ⵖⴰⵔⴻⵙ, ⴰⵇⴰ ⵡⴰⵔ ⴷⵉⵏ ⴰⴳⵍⴰ ⵄⴰⴷ!
ⵎⴰⵖⴰⵔ ⴰⴷ ⵉⴳⴳ ⴰⴼⵔⵉⵡⴻⵏ ⵉ ⵢⵉⵅⴻⴼ ⵏⵏⴻⵙ,
ⴰⴷ ⵉⴹⵡⴰ ⵖⴰⵔ ⵓⵊⴻⵏⵏⴰ ⴰⵎⴻⵛⵏⴰⵡ ⵉⵊⵊ ⵏ ⵓⴳⵉⴷⴻⵔ.
6 ⵡⴰⵔ ⵜⵜᵉⵜⵜ ⴰⵖⵔⵓⵎ ⵏ ⵡⴻⵏⵏⵉ ⴷⵉ ⵜⴻⴵⴰ ⵜⵉⵟⵟ ⵜⴰⵄⴻⴼⴼⴰⵏⵜ,
ⵡⴰⵔ ⵎⴻⵥⵔⵉ ⴷⵉ ⵎⴰⵛⵛⴰ ⵏⵏⴻⵙ ⵉⵛⵏⴰⵏ.
7 ⵎⴰⵖⴰⵔ ⴰⵎ ⵎⴰⵎⵎⴻⵛ ⵜ ⵜⵓⵖⴰ ⵉⵜⵜⵅⴰⵔⵔⴰⵚ,
ⴰⵎⵎⵓ ⵉ ⵜ ⵉⵜⵜⴻⴳⴳ.
ⵉⵇⵇⴰⵔ: “ⴻⵛⵛ, ⵜⴻⵙⵡⴻⴷ!”,
ⵎⴰⵛⴰ ⵓⵍ ⵏⵏⴻⵙ ⵡⴰⵔ ⴰⴽⵉⴷⴻⴽ ⵉⴵⵉ.
8 ⴰⵥⴻⵄⵄⵉⴼ ⵉ ⵜⴻⵛⵛⵉⴷ, ⴰⴷ ⵜ-ⵉ-ⴷⴷ-ⵜⵄⵓⵇⵇⴻⴷ,
ⴰⵡⴰⵍⴻⵏ ⵉⵚⴻⴱⵃⴻⵏ ⵏⵏⴻⴽ ⵜⴹⴻⵢⵢⵄⴻⴷ ⵜⴻⵏ.
9 ⵡⴰⵔ ⵙⵙⴰⵡⴰⵍ ⴷⴻⴳ ⵓⵎⴻⵥⵥⵓⵖ ⵏ ⵉⵊⵊ ⵏ ⵓⴱⵓⵀⴰⵍⵉ,
ⵎⴰⵖⴰⵔ ⵏⴻⵜⵜⴰ ⴰⴷ ⵉⵙⵙⴻⵃⵇⴰⵔ ⴰⵡⴰⵍⴻⵏ ⵏ ⵡⴻⴼⵜⴰⵏ ⵏⵏⴻⴽ. ■
10 ⵡⴰⵔ ⵙⵎⵓⵟⵟⵓⵢ ⴰⵢⵎⵉⵔ ⵏ ⵡⴻⵛⵃⴰⵍ ⵓⵢⴰ,
ⵡⴰⵔ ⵜⵜⴰⴷⴻⴼ ⴷⴻⴳ ⵉⵢⵢⴰⵔⴻⵏ ⵏ ⵉⵢⵓⵊⵉⵍⴻⵏ, ■
11 ⵎⴰⵖⴰⵔ ⴰⵎⴼⴻⴽⴽⵉ ⵏⵙⴻⵏ ⴷ ⴰⵎⴻⵇⵇⵔⴰⵏ,
ⵏⴻⵜⵜⴰ ⴰⴷ ⴷⴷ-ⵢⴰⵖ ⵜⴰⵙⵖⴰⵔⵜ ⵏⵙⴻⵏ ⵥⵥⴰⵢⴻⴽ.
12 ⴰⵔⵔ ⵓⵍ ⵏⵏⴻⴽ ⵖⴰⵔ ⵓⵡⴻⴱⴱⴻⵅ,
ⵓⵍⴰ ⴷ ⵉⵎⴻⵥⵥⵓⵖⴻⵏ ⵏⵏⴻⴽ ⵖⴰⵔ ⵡⴰⵡⴰⵍⴻⵏ ⵏ ⵜⵓⵙⵙⵏⴰ.
13 ⵡⴰⵔ ⵜᵉⵟⵟⴻⴼ ⵜⵜⴰⵔⴱⵉⵢⵢⴻⵜ ⵅ ⵓⵃⵓⴷⵔⵉ,
ⵡⴰⵅⵅⴰ ⵜⴻⵛⵛⴰⵜⴻⴷ ⵜ ⵙ ⵡⴻⵄⵎⵓⴷ, ⵡⴰⵔ ⵉⵜⵜⵎⴻⵜⵜⵉ. ■
14 ⵛⴻⴽ ⴳⴳⵓⵔ ⴰⴷ ⵜ ⵜⴻⵡⵜⴻⴷ ⵙ ⵡⴻⵄⵎⵓⴷ,
ⵓ ⴰⴷ ⵜⴻⵙⵙⵏⴻⵊⵎⴻⴷ ⵍⴻⵄⵎⴰⵔ ⵏⵏⴻⵙ ⵥⵉ ⵍⴰⵅⴰⵔⵜ.
15 ⵎⵎⵉ ⵉⵏⵓ, ⵎⴰⵍⴰ ⵓⵍ ⵏⵏⴻⴽ ⴷ ⴰⵎⵉⵖⵉⵙ,
ⴰⴷ ⵉⴼⴰⵔⵃ ⵓⵍⴰ ⴷ ⵓⵍ ⵉⵏⵓ ⴰⴽⵉⴷⴻⵙ.
16 ⵜⵉⵥⵥⴰⵍ ⵉⵏⵓ ⴰⴷ ⵏⴻⴳⵥⴻⵏⵜ ⵙ ⵍⴻⴼⵔⴰⵃⴻⵜ,
ⵎⴰⵍⴰ ⵉⵢⴻⵏⵛⵉⵛⴻⵏ ⵏⵏⴻⴽ ⵙⵙⵉⵡⵍⴻⵏ ⵎⵉⵏ ⵉⴵⴰⵏ ⵉⵙⴻⴳⴳⴷⴻⵏ. □
17 ⴻⵊⵊ ⵓⵍ ⵏⵏⴻⴽ ⵡⴰⵔ ⵉⵜⵜⵉⵙⵉⵎ ⵥⴻⴳ ⵉⵎⴻⴷⵏⴰⴱ,
ⵎⴰⵛⴰ ⴻⵊⵊ ⵉ-ⵜ ⴰⴷ ⵢⴰⵔⵔ ⴰⵥⴻⴵⵉⴼ ⵖⴰⵔ ⵜⵉⴳⴳⵯⵓⴷⵉ ⵏ ⵙⵉⴷⵉ ⴰⵙⵙ ⵉⵎⵓⵏ! ■
18 ⵎⴰⵖⴰⵔ ⵅⴻⵏⵏⵉ ⴰⵇⴰ ⴷⵉⵏ ⵜⵉⵡⴻⵛⵛⴰ,
ⵓ ⵍⴰⵢⴰⵙ ⵏⵏⴻⴽ ⵡⴰⵔ ⵉⵜⵜⴰⵔⴻⵥⵥⵉ. ■
19 ⵙⴻⵍ-ⴷⴷ ⵛⴻⴽ, ⴰ ⵎⵎⵉ, ⵉⵍⵉ ⴷ ⴰⵎⵉⵖⵉⵙ,
ⵓⵛⴰ ⵏⴷⴻⵀ ⵓⵍ ⵏⵏⴻⴽ ⵖⴰⵔ ⵡⴻⴱⵔⵉⴷ.
20 ⵡⴰⵔ ⵜⵜⵖⵉⵎⵉ ⵖⴰⵔ ⵉⵙⴽⴰⵔⵊⵉⵢⵢⴻⵏ,
ⵓⵍⴰ ⵖⴰⵔ ⵉⵏⵏⵉ ⵉⵍⴻⵀⵀⴼⴻⵏ ⴷⴻⴳ ⵡⴻⵢⵙⵓⵎ, ■
21 ⵎⴰⵖⴰⵔ ⴰⵙⴽⴰⵔⵊⵉⵢ ⴷ ⴰⵎⴻⵍⵀⵓⴼ ⴰⴷ ⴷⴻⵡⵍⴻⵏ ⴷ ⵉⵎⴻⵥⵍⴰⴹ,
ⵓ ⴰⵏⵓⴷⴻⵎ ⵉⵙⵙⵢⵉⵔⵉⴹ ⴷⴻⴳ ⵉⵃⵍⵓⵛⴻⵏ.
22 ⵙⴻⵍ-ⴷⴷ ⵛⴻⴽ ⵖⴰⵔ ⴱⴰⴱⴰⵛ ⵡⴻⵏⵏⵉ ⵛⴻⴽ ⵉ ⴷⴷ-ⵉⵊⵊⵉⵏ,
ⵓ ⵡⴰⵔ ⵙⵙⴻⵃⵇⵉⵔⵉ ⵢⴻⵎⵎⴰⵛ ⵎⴰⵍⴰ ⵜⴻⵡⵙⴰⵔ. ■
23 ⵙⴻⵖ-ⴷⴷ ⵜⵉⴷⴻⵜⵜ, ⵡⴰⵔ ⵜⵜ ⵜⴻⵥⵏⵓⵥⴰ ⵛⴰ,
ⴰⵎⵎⵓ ⵓⵍⴰ ⴷ ⵜⵉⵖⵉⵜ ⴷ ⵓⵡⴻⴱⴱⴻⵅ ⴷ ⵍⴻⴼⵀⴰⵎⴻⵜ. ■
24 ⴱⴰⴱⴰⵙ ⵏ ⵓⵎⵙⴻⴳⴳⴻⴷ ⴰⴷ ⵉⴼⴰⵔⵃ ⵙ ⵡⴰⵟⵟⴰⵙ,
ⵡⴻⵏⵏⵉ ⴷⴷ-ⵉⵊⵊⵉⵏ ⵉⵊⵊ ⵎⵎⵉⵙ ⴷ ⴰⵎⵉⵖⵉⵙ, ⴰⴷ ⴰⵙ ⵉⴼⴰⵔⵃ. ■
25 ⴻⵊⵊ ⴰⴷ ⵉⴼⴰⵔⵃ ⴱⴰⴱⴰⵛ ⵓⵍⴰ ⴷ ⵢⴻⵎⵎⴰⵛ,
ⴻⵊⵊ ⵜⴻⵏⵏⵉ ⵛⴻⴽ ⵉ ⴷⴷ-ⵢⵓⵔⵡⴻⵏ ⴰⴷ ⵜⴼⴰⵔⵃ.
26 ⴻⵡⵛ ⴰⵢⵉ ⵓⵍ ⵏⵏⴻⴽ, ⴰ ⵎⵎⵉ,
ⴻⵊⵊ ⵜⵉⵟⵟⴰⵡⵉⵏ ⵏⵏⴻⴽ ⴰⴷ ⴰⴼⴻⵏⵜ ⴰⵔⴹⴰ ⴷⴻⴳ ⵉⴱⵔⵉⴷⴻⵏ ⵉⵏⵓ.
27 ⵎⴰⵖⴰⵔ ⵜⴰⵎⵖⴰⵔⵜ ⴼⴰⵔⵇ-ⵛⵛⵖⴻⵍ ⴷ ⵉⵛⵜ ⵏ ⵜⴻⵙⵔⴰⴼⵜ ⵢⵓⴵⵖⴻⵏ,
ⵓ ⵜⴰⵎⵖⴰⵔⵜ ⵥⵉ ⴱⴰⵔⵔⴰ ⴷ ⵉⵊⵊ ⵏ ⵍⵄⵓⵏⵚⴰⵔ ⵉⵃⵙⴰⵔ ⴰⵍ ⵟⵟⴰⵔⴼ. ■
28 ⵡⴰⵀ, ⵏⴻⵜⵜⴰⵜ ⵜᵉⵜⵜⵃⴰⵎⴰ ⴰⵎ ⵉⵊⵊ ⵏ ⵓⵅⴻⵡⵡⴰⵏ,
ⵏⴻⵜⵜⴰⵜ ⵜⴰⵔⴻⵏⵏⵉ ⴷⴻⴳ ⵉⵖⴻⴷⴷⴰⵔⴻⵏ ⵊⴰⵔ ⵉⵡⴷⴰⵏ.
29 ⵡⵉ ⵉ ⵖⴰⵔ ⵉⴵⴰ ⵡⴻⵛⴹⴰⵏ? ⵡⵉ ⵉ ⵖⴰⵔ ⵉⴵⴰ ⵥⵥⴻⵍⴹ?
ⵡⵉ ⵉ ⵖⴰⵔ ⵉⴵⴰ ⵓⵎⵛⵓⴱⴱⴻⵛ? ⵡⵉ ⵉ ⵖⴰⵔ ⵉⴵⴰ ⵓⵛⴻⵜⵛⵉ?
ⵡⵉ ⵉ ⵖⴰⵔ ⵉⴵⴰⵏ ⵉⵢⴻⵥⵥⵉⵎⴻⵏ ⴱⵍⴰ ⵙⵙⵉⴱⴱⴻⵜ?
ⵡⵉ ⵉ ⵖⴰⵔ ⴵⴰⵏⵜ ⵜⵉⵟⵟⴰⵡⵉⵏ ⴱⴱⴰⵔⴻⵡⵢⴻⵏⵜ?
30 ⵖⴰⵔ ⵉⵏⵏⵉ ⵉⵜⵜⵖⵉⵎⴰⵏ ⵖⴰⵔ ⴱⵉⵏⵓ ⴰⵍ ⵜⴰⵎⴻⴷⴷⵉⵜ,
ⵖⴰⵔ ⵢⴻⵏⵏⵉ ⴷⴷ-ⵢⵓⵙⵉⵏ ⵃⵉⵎⴰ ⴰⴷ ⵇⵇⴰⵙⴻⵏ ⴱⵉⵏⵓ ⵉⵅⴻⴵⴹⴻⵏ. ■
31 ⵡⴰⵔ ⵅⴻⵥⵥⴰⵔ ⵖⴰⵔ ⴱⵉⵏⵓ, ⵅⵎⵉ ⵉⵜⵜⴻⵥⵡⵉⵖ,
ⵉⵜⵜⵍⵉⵇⵍⵉⵇ ⴷⵉ ⵍⴽⴰⵙ ⵓ ⵏⴻⵜⵜⴰ ⵉⵀⵡⴻⵏ ⵉ ⵜⵉⵙⵙⵉⵜ.
32 ⵖⴰⵔ ⵓⵏⴻⴳⴳⴰⵔ ⵉⵜⵜⵖⵉⵎⴰ ⵉⵥⴻⵄⵄⴻⴼ ⴰⵎ ⵉⵊⵊ ⵏ ⵓⴼⵉⵖⴰⵔ,
ⵉⵜⵜⵔⵓⵛⵛⴰ ⵙⵙⴻⵎ ⴰⵎ ⵜⵍⴻⴼⵙⴰ.
33 ⵜⵉⵟⵟⴰⵡⵉⵏ ⵏⵏⴻⴽ ⴰⴷ ⵜⵡⴰⵍⴰⵏⵜ ⵜⵉⵎⵖⴰⵔⵉⵏ ⵜⵉⴱⴰⵔⵔⴰⵏⵉⵢⵢⵉⵏ,
ⵓ ⵓⵍ ⵏⵏⴻⴽ ⴰⴷ ⵉⵙⵙⵉⵡⴻⵍ ⵙ ⵓⵅⴰⵔⵡⴻⴹ.
34 ⵛⴻⴽ ⴰⴷ ⵜⵉⵍⵉⴷ ⴰⵎⴻⵛⵏⴰⵡ ⵉⵊⵊⴻⵏ ⵉ ⵉⵜⵜⴻⵟⵟⵚⴻⵏ ⴷⵉ ⵍⵡⴻⵙⵜ ⵏ ⵍⴻⴱⵃⴰⵔ,
ⴰⵎ ⵉⵊⵊⴻⵏ ⵉ ⵉⵜⵜⴻⵟⵟⵚⴻⵏ ⴷⵉ ⵜⵇⵉⵛⵛⴰⵜ ⵏ ⵜⴻⵃⵏⴰⵛⵜ ⵏ ⵓⵖⴰⵔⵔⴰⴱⵓ
35 ⴰⴷ ⵜⵉⵏⵉⴷ: “ⵡⵜⵉⵏ ⴰⵢⵉ, ⵎⴰⵛⴰ ⵡⴰⵔ ⵢⴻⵥⵎⴻⵖ,
ⴷⴻⵅⵎⴻⵏ ⴰⵢⵉ, ⵎⴰⵛⴰ ⵡⴰⵔ ⵓⵛⵉⵖ ⴰⴽ-ⴷ ⵡⴰⵍⵓ.
ⵎⴻⵍⵎⵉ ⵉ ⴷⴷ ⵖⴰ ⴼⴰⵇⴻⵖ? ⵏⴻⵛⵛ ⴰⴷ ⴰⵔⵥⵓⵖ ⵄⴰⵡⴻⴷ ⵖⴰⵔ ⴱⵉⵏⵓ!”