22
1 ⵉⵙⴻⵎ ⴰⵚⴻⴱⵃⴰⵏ ⵉⵃⵍⴰ ⵅ ⵡⴰⵟⵟⴰⵙ ⵏ ⵡⴰⴳⵍⴰ, ⴰⵃⵉⵏⵏⵉ ⵉⵃⵍⴰ ⵅ ⵏⵏⵓⵇⴰⵔⵜ ⴷ ⵡⵓⵔⴻⵖ.■
2 ⴱⵓ-ⵡⴰⴳⵍⴰ ⴷ ⵓⵎⴻⵥⵍⵓⴹ ⵜⵜⴻⵎⵙⴰⴳⴰⵔⴻⵏ,
ⵙⵉⴷⵉ ⵉ-ⵜⴻⵏ ⵉⴳⴳⵉⵏ ⵎⴰⵔⵔⴰ. ■
3 ⴱⵏⴰⴷⴻⵎ ⵉⴼⴻⵜⵜⵏⴻⵏ ⵉⵜⵜⵡⴰⵍⴰ ⵍⵖⴰⵔ ⵓⵛⴰ ⵉⵜⵜⵏⵓⴼⴼⴰⵔ,
ⵎⴰⵛⴰ ⵉⵃⴰⴼⵉⵢⵢⴻⵏ ⴰⵔⴻⵏⵏⵉⵏ ⴳⴳⵓⵔⴻⵏ ⵓⵛⴰ ⴳⴳⵓⵔ ⴰⴷ ⵜⵜⵡⴰⵄⴰⵇⴰⴱⴻⵏ. ■
4 ⵍⵎⵓⵏⴻⵜ ⵉ ⵓⵡⴰⴹⴻⵄ ⵥⵉ ⵙⵙⵉⴱⴱⴻⵜ ⵏ ⵜⵉⴳⴳⵯⵓⴷⵉ ⵏ ⵙⵉⴷⵉ,
ⴷ ⴰⴳⵍⴰ ⴷ ⵛⵛⴰⵏ ⴷ ⵜⵓⴷⴰⵔⵜ.
5 ⵉⵙⴻⵏⵏⴰⵏⴻⵏ ⴷ ⵍⴻⴼⵅⵓⵅ ⴰⵇⴰ ⴰⵜⴻⵏ ⵅ ⵡⴻⴱⵔⵉⴷ ⵏ ⵡⴻⵏⵏⵉ ⵉⴼⴰⵔⵖⴻⵏ,
ⵡⴻⵏⵏⵉ ⵉⵃⴻⵟⵟⴰⵏ ⵍⴻⵄⵎⴰⵔ ⵏⵏⴻⵙ, ⵉⵜⵜⵖⵉⵎⴰ ⵖⴰⵔ ⵍⴰⴳⴳⵯⴰⵊ ⵏⵙⴻⵏ.
6 ⴷⴰⵔⵔⴻⴱ ⴰⵃⵓⴷⵔⵉ ⵄⵍⴰⵃⵙⴰⴱ ⵍⴻⵇⵢⴰⵙ ⵏ ⵡⴻⴱⵔⵉⴷ ⵏⵏⴻⵙ,
ⵡⴰⵅⵅⴰ ⵏⴻⵜⵜⴰ ⵉⵡⵙⴰⵔ, ⵡⴰⵔ ⵅⴰⵙ ⵉⵜⵜⵃⴻⵢⵢⵉⴷ ⵛⴰ.
7 ⴱⵓ-ⵡⴰⴳⵍⴰ ⵉⵜⵜⵚⴻⴵⴰⴹ ⵅ ⵉⵎⴻⵥⵍⴰⴹ,
ⴱⵓ-ⵓⵎⴰⵔⵡⴰⵙ ⴷ ⵉⵙⵎⴻⵖ ⵏ ⵡⴻⵏⵏⵉ ⴷ ⴰⵙ ⵢⴰⵔⴻⵟⵟⵍⴻⵏ.
8 ⵡⴻⵏⵏⵉ ⵉⵥⴰⵔⵔⵄⴻⵏ ⵍⵖⴻⵛⵛ, ⴰⴷ ⵉⵎⵊⴰⵔ ⵍⴻⵖⴱⴻⵏ,
ⴰⵄⵎⵓⴷ ⵏ ⵓⴷⵓⵇⵇⴻⵥ ⵏⵏⴻⵙ ⵏ ⵓⴼⵓⴳⴻⵎ ⴰⴷ ⵉⴼⵏⴰ. ■
9 ⵡⴻⵏⵏⵉ ⵖⴰⵔ ⵉⴵⴰ ⵍⵅⴻⵥⵔⴰⵜ ⵚⴻⴱⵃⴻⵏⵜ, ⴰⴷ ⵉⵜⵜⵡⴰⴱⴰⵔⴻⴽ,
ⵎⵉⵏⵥⵉ ⵏⴻⵜⵜⴰ ⵉⵜⵜⵉⵛ ⵉ ⵉⵎⴻⵥⵍⴰⴹ ⵥⴻⴳ ⵡⴻⵖⵔⵓⵎ ⵏⵏⴻⵙ. ■
10 ⴰⵥⵥⴻⵍ ⵅ ⵓⵎⴻⵙⵜⴻⵀⵥⵉⵢ, ⴰⴷ ⵉⴼⴼⴻⵖ ⵍⵀⴻⵎⵎ,
ⴰⵇⴰ ⵉⴱⴻⴷⴷ ⵓⵎⵃⴰⵔⵡⴰⴹ ⴷ ⵍⴻⴼⴹⵉⵃⴻⵜ.
11 ⵡⴻⵏⵏⵉ ⵉⵜⵜⴻⵅⵙⴻⵏ ⵍⴻⵚⴼⴰⵢⴻⵜ ⵏ ⵡⵓⵍ,
ⵡⴻⵏⵏⵉ ⵖⴰⵔ ⵉⴵⴰ ⵉⵢⴻⵏⵛⵉⵛⴻⵏ ⵉⵛⵛⵓⵔⴻⵏ ⵙ ⴰⵔⴹⴰ,
ⴰⵊⴻⴵⵉⴷ ⴰⴷ ⵢⵉⵍⵉ ⴷ ⴰⵎⴻⴷⴷⵓⴽⴽⴻⵍ ⵏⵏⴻⵙ. ■
12 ⵜⵉⵟⵟⴰⵡⵉⵏ ⵏ ⵙⵉⴷⵉ ⵃⴻⵟⵟⴰⵏⵜ ⵅ ⵜⵓⵙⵙⵏⴰ,
ⵎⴰⵛⴰ ⴰⵡⴰⵍⴻⵏ ⵏ ⵉⵖⴻⴷⴷⴰⵔⴻⵏ ⴰⴷ ⵜⴻⵏ ⵉⴱⴹⴻⵍ.
13 ⴰⵎⴻⵄⴳⵓⵥ ⵉⵇⵇⴰⵔ: “ⴰⵇⴰ ⴷⵉⵏ ⵉⵊⵊ ⵏ ⵡⴰⵢⵔⴰⴷ ⴷⵉ ⴱⴰⵔⵔⴰ!
ⴰⴷ ⵜⴰⵖ ⴱⴰⵍⴰⴽ ⴰⴷ ⵜⵜⵡⴰⵏⵖⴻⵖ ⴷⵉ ⵥⵥⵏⴰⵇⵉ!” ■
14 ⴰⵇⴻⵎⵎⵓⵎ ⵏ ⵜⴻⵎⵖⴰⵔⵉⵏ ⵜⵉⴱⴰⵔⵔⴰⵏⵉⵢⵢⵉⵏ ⴷ ⵉⵛⵜ ⵏ ⵜⴻⵙⵔⴰⴼⵜ ⵢⵓⴵⵖⴻⵏ,
ⵡⴻⵏⵏⵉ ⵅ ⵉⴼⴼⵓⴳⴻⵎ ⵙⵉⴷⵉ, ⴰⴷ ⴷⴰⵢⴻⵙ ⵉⵡⴹⴰ. ■
15 ⵜⵓⴱⴱⵓⵀⴻⵍⵢⴰ ⵜᵉⵜⵜⵖⵉⵎⴰ ⵜⵍⴻⵙⵙⴻⵇ ⴷⴻⴳ ⵡⵓⵍ ⵏ ⵓⵃⵓⴷⵔⵉ,
ⴰⵄⵎⵓⴷ ⵏ ⵓⵡⴻⴱⴱⴻⵅ ⴰⴷ ⵜⵜ ⵉⵙⵙⵓⴼⴼⴻⵖ ⵥⵥⴰⵢⴻⵙ. ■
16 ⵡⴻⵏⵏⵉ ⵉⵃⴻⵚⵚⴰⵔⴻⵏ ⴰⵎⴰⵔⵅⵓ, ⴰⴷ ⵢⴰⵔⵏⵉ ⴷⵉ ⵎⵉⵏ ⵉⴵⴰⵏ ⵏⵏⴻⵙ,
ⵡⴻⵏⵏⵉ ⵉⵜⵜⵉⵛⴻⵏ ⵉ ⴱⵓ-ⵡⴰⴳⵍⴰ, ⴰⴷ ⵉⵃⵡⴰⵊ. ■
ⴰⵡⴰⵍⴻⵏ ⵉⵡⴻⵥⵏⴻⵏ ⵏ ⴰⵢⵜ ⵏ ⵜⵉⵖⵉⵜ
17 ⴻⵡⵛ ⴰⵎⴻⵥⵥⵓⵖ ⵏⵏⴻⴽ ⵓⵛⴰ ⵙⴻⵍ ⵖⴰⵔ ⵡⴰⵡⴰⵍⴻⵏ ⵏ ⵉⵎⵉⵖⵉⵙⴻⵏ,
ⴰⵔⵔ ⵓⵍ ⵏⵏⴻⴽ ⵖⴰⵔ ⵜⵓⵙⵙⵏⴰ ⵉⵏⵓ.
18 ⵎⴰⵖⴰⵔ ⴰⵇⴰ ⵎⵍⵉⵃ ⵎⴰⵍⴰ ⵛⴻⴽ ⵜⵅⴻⵎⵎⵍⴻⴷ ⵜⴻⵏ ⴷⵉ ⴷⴰⵅⴻⵍ ⵏⵏⴻⴽ,
ⵎⴰⵍⴰ ⴰⴷ ⵜⴻⵏ ⵜⴻⵙⵙⴻⵡⵊⴷⴻⴷ ⵊⵎⵉⵄ ⵅ ⵉⵢⴻⵏⵛⵉⵛⴻⵏ ⵏⵏⴻⴽ.
19 ⵎⴰⵃⴻⵏⴷ ⴰⴷ ⵢⵉⵍⵉ ⵓⵜⴻⵛⵍⵉ ⵏⵏⴻⴽ ⵅ ⵙⵉⴷⵉ,
ⴰⴷ ⴰⵛ ⵜⴻⵏ ⵙⵙⴻⵛⵏⴻⵖ ⵍⴻⵅⵅⵓ, ⵡⴰⵀ ⵉ ⵛⴻⴽ.
20 ⵎⴰ ⵥⴻⵄⵎⴰ ⵡⴰⵔ ⴷ ⴰⵛ ⵓⵔⵉⵖ ⴰⵡⴰⵍⴻⵏ ⵉⴼⴰⵔⵥⴻⵏ ⴰⵟⵟⴰⵙ,
ⵛⵛⵓⵔⴻⵏ ⵙ ⵛⵛⵡⴰⵔ ⴷ ⵜⵓⵙⵙⵏⴰ,
21 ⵃⵉⵎⴰ ⴰⴷ ⴰⵛ ⵙⵙⴻⵛⵏⴻⵖ ⵍⴻⵎⵜⴻⵏ ⵏ ⵡⴰⵡⴰⵍⴻⵏ ⵏ ⵜⵉⴷⴻⵜⵜ,
ⵎⴰⵃⴻⵏⴷ ⵜⵥⴻⵎⵎⴰⵔⴻⴷ ⴰⴷ ⴷⴷ-ⵜⴰⵔⵔⴻⴷ ⵙ ⵍⴰⵎⴰⵏ ⵅ ⵡⴻⵏⵏⵉ ⵛⴻⴽ ⴷⴷ-ⵉⵙⵙⴻⴽⴽⴻⵏ.
22 ⵡⴰⵔ ⵜⵜⴽⴻⵛⵛⴰⴹ ⴰⵎⴰⵔⵅⵓ ⵎⴰⵖⴰⵔ ⵏⴻⵜⵜⴰ ⴷ ⴰⵎⴰⵔⵅⵓ,
ⵡⴰⵔ ⵍⴻⴱⴱⴻⵥ ⵍⵎⴻⵙⴽⵉⵏ ⵖⴰⵔ ⵜⴻⵡⵡⴰⵔⵜ, ■
23 ⵎⴰⵖⴰⵔ ⵙⵉⴷⵉ ⴰⴷ ⴰⵙⴻⵏ ⵢⴰⵖ ⵜⴰⵙⵖⴰⵔⵜ ⵏⵙⴻⵏ,
ⵏⴻⵜⵜⴰ ⴰⴷ ⵉⴽⴻⵛⵛⴻⴹ ⵍⴻⵄⵎⴰⵔ ⵏ ⵢⵉⵏⵏⵉ ⵉ-ⵜⴻⵏ ⵉⵜⵜⴽⴻⵛⵛⴰⴹⴻⵏ. ■
24 ⵡⴰⵔ ⵜⵜⴻⵎⴷⴷⵓⴽⴽⵓⵍ ⴰⴽ-ⴷ ⴰⵔⵢⴰⵥ ⵉⵜⵜⴰⵔⵔⵓⵊⴷⵓⴷⴻⵏ,
ⵡⴰⵔ ⵜⵜⵉⴷⴻⴼ ⵖⴰⵔ ⴱⴰⴱ ⵏ ⵡⴻⵙⵄⴰⵔ,
25 ⵎⴰⵃⴻⵏⴷ ⵛⴻⴽ ⵡⴰⵔ ⵜᵉⵜⵜⵏⵉⵎⵉⴷ ⵛⴰ ⴰⴽ-ⴷ ⵉⵎⴻⵙⵔⴰⵇ ⵏⵏⴻⵙ,
ⴰⴷ ⵜⴻⴳⴳⴻⴷ ⵍⴼⴻⵅ ⵉ ⵍⴻⵄⵎⴰⵔ ⵏⵏⴻⴽ.
26 ⵡⴰⵔ ⵜⵜⴰⴷⴻⴼ ⵊⴰⵔ ⵉⵏⵏⵉ ⵉⵜⵜⵉⵛⴻⵏ ⴰⵡⴰⵍ ⵙ ⵜⵎⴻⵡⵛⵉⵡⵜ ⵏ ⵉⴼⴰⵙⵙⴻⵏ,
ⵊⴰⵔ ⵉⵏⵏⵉ ⵉⴵⴰⵏ ⴷ ⴰⴹⵎⴰⵏ ⵉ ⵉⵎⴰⵔⵡⵓⵙⴰ. ■
27 ⵎⴰⵍⴰ ⵡⴰⵔ ⵖⴰⵔⴻⴽ ⵎⵉⵏ ⵥⵉ ⵖⴰ ⵜⵅⴻⴵⵚⴻⴷ,
ⵎⴰⵢⴻⵎⵎⵉ ⵉⵊⴻⴱⴱⴻⴷ ⵇⴰⵎⴰ ⵏⵏⴻⴽ ⵥⵉ ⵙⴰⴷⵓ ⵏⵏⴻⴽ? ■
28 ⵡⴰⵔ ⵙⵎⵓⵟⵟⵓⵢ ⴰⵢⵎⵉⵔ ⵏ ⵡⴻⵛⵃⴰⵍ ⵓⵢⴰ,
ⵡⴻⵏⵏⵉ ⴳⴳⵉⵏ ⵉⴱⴰⴱⴰⵜⴻⵏ ⵏⵏⴻⴽ. ■
29 ⵎⴰ ⵜⴻⵥⵔⵉⴷ ⵉⵊⵊ ⵏ ⵡⴻⵔⵢⴰⵥ ⵉⵎⴻⵃⴹⴻⵏ ⴷⵉ ⵍⵃⵉⵔⴼⴰ ⵏⵏⴻⵙ?
ⴰⴷ ⵜ ⵙⵙⴱⴻⴷⴷⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵉⵊⴻⴵⵉⴷⴻⵏ,
ⵡⴰⵔ ⵉⴵⵉ ⴰⴷ ⵉⴱⴻⴷⴷ ⵥⵥⴰⵜ ⵉ ⵡⵓⴷⴻⵎ ⵏ ⵎⵉⴷⴷⴻⵏ ⵡⴰⵔ ⴷⵉ ⵉⴵⵉ ⵍⴰⵎⴰⵏ.