21
1 ⵓⵍ ⵏ ⵓⵊⴻⴵⵉⴷ ⴰⵎ ⵜⵉⵖⴻⵥⵔⴰⵜⵉⵏ ⵏ ⵡⴰⵎⴰⵏ ⴷⴻⴳ ⵓⴼⵓⵙ ⵏ ⵙⵉⴷⵉ. ⵏⴻⵜⵜⴰ ⵉⵏⴻⴷⴷⴻⵀ ⵉ-ⵜ, ⵎⴰⵏⵉ ⵎⴰ ⵉⵅⵙ ⵏⴻⵜⵜⴰ.
2 ⵎⴰⵔⵔⴰ ⵉⴱⵔⵉⴷⴻⵏ ⵏ ⴱⵏⴰⴷⴻⵎ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵎⴰⵛⴰ ⵙⵉⴷⵉ ⵉⵜⵜⵇⴻⴵⴰⴱ ⵓⵍⴰⵡⴻⵏ. ■
3 ⵜⵉⵎⴻⴳⴳⴰ ⵏ ⵜⵙⴻⴳⴷⴰ ⴷ ⵍⵃⴻⵇⵇ,
ⴷ ⵜⵉⵏⴰ ⵉ ⵙⵉⴷⵉ ⵃⵙⴻⵏ ⵥⵉ ⵜⴻⵡⵀⵉⴱⵜ ⵏ ⵜⵖⴰⵔⵚⵜ. ■
4 ⵏⵏⴼⴰⵅⴻⵜ ⵏ ⵜⵉⵟⵟⴰⵡⵉⵏ ⴷ ⵓⵍ ⵉⵛⴻⵏⵄⴻⵏ,
ⴰⵍⴱⴰⵔ ⵏ ⵉⵄⴻⴼⴼⴰⵏⴻⵏ ⴷ ⴷⴷⴻⵏⴱ.
5 ⵉⵅⴻⵎⵎⵉⵎⴻⵏ ⵏ ⵡⴻⵏⵏⵉ ⵉⵎⴻⵃⴹⴻⵏ ⵜⵜⴰⵡⵢⴻⵏ ⵎⵖⵉⵔ ⵖⴰⵔ ⵓⴼⴻⵢⵢⴻⴹ,
ⵎⴰⵛⴰ ⵎⴰⵔⵔⴰ ⵡⴻⵏⵏⵉ ⵉⵜⵜⵇⴻⴵⵉⵇⴻⵏ ⵉⵜⵜⴰⵡⵉ ⵖⴰⵔ ⵍⴻⵃⵡⴻⵊ ⵡⴰⵀⴰ. ■
6 ⴰⵙⵎⵓⵏⵉ ⵏ ⵡⴰⴳⵍⴰ ⵙ ⵢⵉⵍⴻⵙ ⵉⵙⵙⵅⴰⵔⵔⵉⵇⴻⵏ,
ⴰⵎⵎⵓ ⵉ ⵜⴻⴵⴰ ⵜⵡⴰⵔⵔⵉⵜ ⵏ ⵏⵏⴻⴼⵙ ⵉⵄⴻⴷⴷⵓⵏ ⴷⴻⵖⵢⴰ ⵏ ⵢⵉⵏⵏⵉ ⵢⴰⵔⴻⵥⵥⵓⵏ ⵍⵎⴻⵡⵜ. ■
7 ⵍⵄⵓⵏⴼ ⵏ ⵉⵄⴻⴼⴼⴰⵏⴻⵏ ⵉⵜⵜⵊⴰⵔⵔⴰ ⵉ-ⵜⴻⵏ,
ⵎⴰⵖⴰⵔ ⵜⵜⴰⴳⵉⵏ ⴰⴷ ⴳⴳⴻⵏ ⵎⵉⵏ ⵉⵙⴻⴳⴳⵎⴻⵏ.
8 ⴰⴱⵔⵉⴷ ⵏ ⴱⵓ-ⵓⵎⴰⵔⵡⴰⵙ ⵉⵜⵜⴻⴼⵔⵉⵖ,
ⵎⴰⵛⴰ ⴰⵎⴻⵥⴷⴰⴳ ⵉⵜⵜⴻⴳⴳ ⵎⵉⵏ ⵉⴵⴰⵏ ⵏⵉⵛⴰⵏ.
9 ⵉⵃⵍⴰ ⴰⴷ ⵜⵥⴻⴷⵖⴻⴷ ⴷⴻⴳ ⵉⵛⵜ ⵜⴻⵖⵎⴰⵔⵜ ⵏ ⵜⵥⴻⵇⵇⴰ,
ⵅ ⵜⵥⴻⴷⴷⵉⵖⵜ ⴰⴽ-ⴷ ⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴻⵎⵛⵓⴱⴱⵓⵛⴻⵏ ⴷⴻⴳ ⵉⵛⵜ ⵏ ⵜⴰⴷⴷⴰⵔⵜ ⵜⵛⴰⵔⵛ. ■
10 ⵍⴻⵄⵎⴰⵔ ⵏ ⵉⵄⴻⴼⴼⴰⵏⴻⵏ ⵉⵜⵜⵎⴻⵥⵔⵉ ⴷⵉ ⵍⵖⴰⵔ,
ⴰⵎⵇⴰⵔⵔⴻⴱ ⵏⵏⴻⵙ ⵡⴰⵔ ⵖⴰⵔⴻⵙ ⵉⵜⵜⵉⴼ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏⵏⴻⵙ.
11 ⵎⴰⵍⴰ ⵉⵜⵜⵡⴰⵅⴻⴵⴻⵚ ⵓⵎⴻⵙⵜⴻⵀⵥⵉⵢ,
ⵉⴷⴷⴰⴽⴽⵡⴰⵍ ⵡⴻⵏⵏⵉ ⵡⴰⵔ ⵖⴰⵔⴻⵙ ⴱⵓ ⵍⴻⴼⵀⴰⵎⴻⵜ ⴷ ⴰⵎⵉⵖⵉⵙ,
ⵎⴰⵍⴰ ⵙⵙⵍⴻⵎⴷⴻⵏ ⴰⵎⵉⵖⵉⵙ, ⵉⴽⴻⵙⵙⵉ ⵏⴻⵜⵜⴰ ⵜⵓⵙⵙⵏⴰ. ■
12 ⴰⵎⵙⴻⴳⴳⴻⴷ ⵉⵜⵜⴱⴻⵇⵇⴻⵛ ⵎⵍⵉⵃ ⵜⴰⴷⴷⴰⵔⵜ ⵏ ⵓⵄⴻⴼⴼⴰⵏ,
ⵉⵖⴻⵟⵟⴻⵍ ⵉⵄⴻⴼⴼⴰⵏⴻⵏ ⴷⵉ ⴰⵔⵥⵉⵢⵢⴻⵜ.
13 ⵡⴻⵏⵏⵉ ⵉⵜⵜⴱⴻⵍⵍⴰⵄⴻⵏ ⴰⵎⴻⵥⵥⵓⵖ ⵏⵏⴻⵙ ⵖⴰⵔ ⵉⵖⵓⵢⵢⴰⵏ ⵏ ⵓⵎⴻⵥⵍⵓⴹ,
ⵓⵍⴰ ⴷ ⵏⴻⵜⵜⴰ ⴰⴷ ⵉⵙⵖⵓⵢⵢ ⵎⴰⵛⴰ ⵡⴰⵔ ⵅⴰⵙ ⴷⴷ-ⵜⵜⴰⵔⵔⴰⵏ.
14 ⵚⵚⴻⴷⵇⴻⵜ ⴷⵉ ⵜⵏⵓⴼⴼⵔⴰ ⵜⴻⵚⵍⴻⵃⵃⵓ ⵡⴻⵖⴹⴰⴱ,
ⵜⴰⵔⵥⴻⴼⵜ ⵉⵎⵎⴻⵡⵛⴻⵏ ⴷⴻⴳ ⵡⴻⵃⵙⵉⵏ ⵏ ⵡⴰⵔⵔⵓⴹ ⵜⴻⵚⵍⴻⵃⵃⵓ ⴰⵅⴻⵢⵢⴻⵇ ⵉⵎⵖⴰⵔⴻⵏ. ■
15 ⴰⵇⴰ ⴷ ⵍⴻⴼⵔⴰⵃⴻⵜ ⵉ ⵓⵎⵙⴻⴳⴳⴻⴷ ⵎⴰⵃⴻⵏⴷ ⴰⴷ ⵉⴳⴳ ⵎⵉⵏ ⵉⴵⴰⵏ ⵏⵉⵛⴰⵏ,
ⵎⴰⵛⴰ ⴷ ⴰⵛⴻⵍⵡⴰⵡ ⵉ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ.
16 ⴱⵏⴰⴷⴻⵎ ⵏⵏⵉ ⵉⵜⵜⴻⴼⴼⵖⴻⵏ ⵥⴻⴳ ⵡⴻⴱⵔⵉⴷ ⵏ ⵍⴻⵄⵇⴻⵍ,
ⴰⴷ ⵢⴰⵔⴻⵢⵢⴻⵃ ⴷⴻⴳ ⵡⴻⴳⵔⴰⵡ ⵏ ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ.
17 ⵡⴻⵏⵏⵉ ⵉⵜⵜⴻⵅⵙⴻⵏ ⴰⴼⴰⵔⵔⴰⵊ, ⴳⴳⵓⵔ ⴰⴷ ⵉⵃⵡⴰⵊ,
ⵡⴻⵏⵏⵉ ⵉⵜⵜⴻⵅⵙⴻⵏ ⴱⵉⵏⵓ ⴷ ⵥⵥⴻⵛⵜ, ⵡⴰⵔ ⵉⴷⴷⵉⴽⴽⵡⵉⵍ ⴷ ⴱⵓ ⵡⴰⴳⵍⴰ.
18 ⴰⵄⴻⴼⴼⴰⵏ ⴷ ⴷⴷⴻⵢⵢⴻⵜ ⵉ ⵉⵎⵙⴻⴳⴳⴰⴷⴻⵏ,
ⴰⵖⴻⴷⴷⴰⵔ ⵉ ⵢⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ. ■
19 ⵉⵃⵍⴰ ⴰⴷ ⵜⵥⴻⴷⵖⴻⴷ ⴷⵉ ⵜⴻⵎⵎⵓⵔⵜ ⵉⵅⵍⴰⵏ,
ⵅ ⵜⴰⵥⴻⴷⴷⵉⵖⵜ ⴰⴽ-ⴷ ⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴻⵎⵛⵓⴱⴱⵓⵛⴻⵏ ⵓ ⵉⵜⵜⴻⵇⵇⵙⴻⵏ. ■
20 ⵉⵊⵊ ⵏ ⵍⴽⴻⵏⵥ ⵉⵜⵜⵡⴰⵃⵡⴰⵊⴻⵏ ⴷ ⵥⵥⴻⵛⵜ ⴰⵇⴰ ⴰⵜⴻⵏ ⴷⵉ ⵜⵥⴻⴷⴷⵉⵖⵜ ⵏ ⵉⵎⵉⵖⵉⵙⴻⵏ,
ⵎⴰⵛⴰ ⴱⵏⴰⴷⴻⵎ ⴰⴱⵓⵀⴰⵍⵉ ⵉⵚⴰⵔⵔⴻⴹ ⵉ-ⵜ.
21 ⵡⴻⵏⵏⵉ ⵢⴰⵔⴻⵥⵥⵓⵏ ⵅ ⵜⵙⴻⴳⴷⴰ ⴷ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,
ⵉⵜⵜⴰⴼ ⵜⵓⴷⴰⵔⵜ ⴷ ⵜⵙⴻⴳⴷⴰ ⴷ ⵛⵛⴰⵏ.
22 ⴰⵎⵉⵖⵉⵙ ⵉⵜⵜⴳⴻⵄⵄⴰⴷ ⵜⴻⵏⴷⵉⵏⵜ ⵏ ⴰⵢⵜ ⵏ ⴱⵓ-ⵜⴻⵖⵍⵓⴹⵜ,
ⵉⵖⴻⵟⵟⴻⵍ ⵊⵊⴻⵀⴷ ⵏ ⵜⵜⵉⵇⴻⵜ ⵏⵙⴻⵏ ⴷⵉ ⵜⴻⵎⵎⵓⵔⵜ.
23 ⵡⴻⵏⵏⵉ ⵉⵃⴻⵟⵟⴰⵏ ⴰⵇⴻⵎⵎⵓⵎ ⴷ ⵢⵉⵍⴻⵙ ⵏⵏⴻⵙ,
ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ ⵥⵉ ⵍⴻⵃⵚⴰⵔⴰⵜ. ■
24 ⵡⴻⵏⵏⵉ ⴷ ⴱⵓ-ⵏⵏⴼⴰⵅⴻⵜ ⵉⴼⴼⵓⵛⵛⵃⴻⵏ ⵜⵜⵍⴰⵖⴰⵏ ⴰⵙ ‘ⴰⵎⴻⵙⵜⴻⵀⵥⵉⵢ’,
ⵏⴻⵜⵜⴰ ⵉⵜⵜⴻⴳⴳ ⵙ ⵏⵏⴼⴰⵅⴻⵜ ⴱⵍⴰ ⵍⴻⵇⵢⴰⵙ.
25 ⵛⵛⴻⵀⵡⴻⵜ ⵏ ⵓⵎⴻⵄⴳⵓⵥ ⵜⵏⴻⵇⵇ ⵉ-ⵜ,
ⵎⴰⵖⴰⵔ ⵉⴼⴰⵙⵙⴻⵏ ⵏⵏⴻⵙ ⵓⴳⵉⵏ ⴰⴷ ⵅⴻⴷⵎⴻⵏ.
26 ⴰⵙⵙ ⵉⵎⵓⵏ ⵉⵜⵜⵛⴻⵀⵀⴰ ⵜⵉⵎⴻⵙⵍⴰⵢⵉⵏ ⵏ ⵓⵛⴻⵀⵀⵉ,
ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵉⵡⵛ ⵓ ⵡⴰⵔ ⵉⵜⵜⵖⵉⵎⵉ ⵉⵜⵜᵉⵟⵟⴻⴼ ⴷⵉ ⵛⴰ ⵉ ⵢⵉⵅⴻⴼ ⵏⵏⴻⵙ. ■
27 ⵜⴰⵖⴰⵔⵚⵜ ⵏ ⵓⵄⴻⴼⴼⴰⵏ ⴷ ⵏⵏⵄⵉ,
ⵎⴰⵀⵓ ⵎⴰⵍⴰ ⵏⵉⵜⵏⵉ ⴰⴷ ⵜⵜ ⴰⵡⵢⴻⵏ ⵙ ⵓⵏⴻⴽⴽⵡⵉ ⵉⵖⴻⵛⵛⴻⵏ. ■
28 ⴰⵛⴻⵀⵀⴰⴷ ⵉⵙⵙⵅⴰⵔⵔⵉⵇⴻⵏ ⴳⴳⵓⵔ ⴰⴷ ⵉⵜⵜⵡⴰⵀⴻⵍⵍⴻⴽ,
ⵎⴰⵛⴰ ⴰⵔⵢⴰⵥ ⵏⵏⵉ ⵉⵜⵜⴻⵙⵍⴰⵏ, ⴳⴳⵓⵔ ⴰⴷ ⵉⵙⵙⵉⵡⴻⵍ ⵜⵉⴷⴻⵜⵜ ⵍⴻⴱⴷⴰ. ■
29 ⴰⵔⵢⴰⵥ ⴰⵄⴻⴼⴼⴰⵏ ⵉⵙⵙⴻⵊⵀⴻⴷ ⵉⵅⴻⴼ ⵏⵏⴻⵙ ⴰⴽ-ⴷ ⵡⵓⴷⴻⵎ ⵏⵏⴻⵙ,
ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵉⵙⵙⴻⵎⵜⴻⵏ ⵉⴱⵔⵉⴷⴻⵏ ⵏⵏⴻⵙ.
30 ⵡⴰⵔ ⵜⴻⴵⵉ ⵜⵉⵖⵉⵜ ⵓⵍⴰ ⴷ ⵍⴻⴼⵀⴰⵎⴻⵜ,
ⵓ ⵡⴰⵔ ⴷⵉⵏ ⵉⴵⵉ ⴱⵓ ⵓⵛⴰⵡⴰⵔ ⵇⵉⴱⴰⵞ ⵉ ⵙⵉⴷⵉ.
31 ⴰⵢⵉⵙ ⴰⴷ ⴰⵙ ⵃⴻⵥⵥⵎⴻⵏ ⵉ ⵡⴰⵙⵙ ⵏ ⵓⵎⴻⵏⵖⵉ,
ⵎⴰⵛⴰ ⵍⴻⵖⵍⴻⴱ ⵖⴰⵔ ⵙⵉⴷⵉ.■