20
1 ⴱⵉⵏⵓ ⴷ ⵉⵊⵊ ⵏ ⵓⵎⴻⵙⵜⴻⵀⵥⵉⵢ, ⵛⵛⵔⴰⴱ ⴷ ⴱⵓ-ⵙⵙⴹⴻⵄ, ⴽⵓⵍ ⵉⵊⵊⴻⵏ ⵡⴻⵏⵏⵉ ⵥⵥⴰⵢⴻⵙ ⵉ ⵖⴰ ⵉⵡⴻⴷⴷⴰⵔⴻⵏ, ⵄⴻⵎⵎⴰⵔⵚ ⵡⴰⵔ ⵉⴷⴷⵉⴽⴽⵡⵉⵍ ⴷ ⴰⵎⵉⵖⵉⵙ.
2 ⴰⵀⵓⴷⴷⵉ ⵏ ⵓⵊⴻⴵⵉⴷ ⴰⵎ ⵥⵥⵀⵉⵔ ⵏ ⵡⴰⵢⵔⴰⴷ:
ⵡⴻⵏⵏⵉ ⵜ ⵉⵙⵙⴻⵄⴰⵔⴻⵏ, ⵉⵅⴻⵟⵟⴰ ⴰⴽ-ⴷ ⵍⴻⵄⵎⴰⵔ ⵏⵏⴻⵙ.■
3 ⴰⵙⵎⴰⵃ ⴷⴻⴳ ⵓⵎⵛⵓⴱⴱⴻⵛ ⴰⵇⴰ ⴷ ⵛⵛⴰⵏ ⵉ ⵡⴻⵔⵢⴰⵥ,
ⵎⴰⵛⴰ ⴽⵓⵍ ⴰⴱⵓⵀⴰⵍⵉ ⴳⴳⵓⵔ ⴰⴷ ⵉⴷⴷⵓⵇⵇⴻⵥ. ■
4 ⴰⵎⴻⵄⴳⵓⵥ ⵡⴰⵔ ⵉⵛⴰⵔⵔⴻⵥ ⴷⵉ ⵍⵎⴻⵛⵜⴰ,
ⵅⴻⵏⵏⵉ ⴰⴷ ⵉⵜⵜⴰⵔ ⴷⵉ ⵍⵡⴻⵇⵜ ⵏ ⵜⵎⴻⵢⵔⴰ, ⵎⴰⵛⴰ ⵡⴰⵔ ⵉⵜⵜⵉⴼ ⵡⴰⵍⵓ.
5 ⵉⵅⴰⵔⵔⵉⵚⴻⵏ ⴷⴻⴳ ⵡⵓⵍ ⵏ ⴱⵏⴰⴷⴻⵎ ⴰⵎⴰⵏ ⵢⵓⴵⵖⴻⵏ,
ⵎⴰⵛⴰ ⵉⵊⵊ ⵏ ⵡⴻⵔⵢⴰⵥ ⵙ ⵍⴻⴼⵀⴰⵎⴻⵜ ⵉⵙⵙⴻⵏ ⴰⴷ ⵜⴻⵏ ⵢⴰⵢⴻⵎ. ■
6 ⴰⵟⵟⴰⵙ ⵏ ⵉⵡⴷⴰⵏ ⵜⵜⵍⴰⵖⴰⵏ ⵅ ⵛⴰ ⵏ ⵉⵊⵊⴻⵏ ‘ⴰⵎⴻⴷⴷⵓⴽⴽⴻⵍ ⴷ ⴰⵎⵜⵉⵇⵇⵉ’,
ⵎⴰⵛⴰ ⴰⵔⵢⴰⵥ ⴷ ⴰⵎⵜⵉⵇⵇⵉ, ⵎⴰⵏ ⵡⴻⵏ ⵜ ⵉ ⵖⴰ ⵢⴰⴼⴻⵏ?
7 ⴰⵎⵙⴻⴳⴳⴻⴷ ⵉⴳⴳⵓⵔ ⴷⵉ ⵍⴻⵚⴼⴰⵢⴻⵜ ⵏⵏⴻⵙ,
ⵙⵙⴻⵄⴷ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵉ ⵉⵜⵜⴻⵊⵊⴰ ⴰⵡⴰⵔⵏⵉ ⴰⵙ.
8 ⵉⵊⵊ ⵏ ⵓⵊⴻⴵⵉⴷ ⵏⵏⵉ ⵉⵜⵜⵖⵉⵎⴰⵏ ⵅ ⵍⴽⵓⵔⵙⵉ ⵏ ⵛⵛⵔⴻⵄ,
ⵉⵜⵜⵚⴻⴼⴼⴰ ⵎⴰⵔⵔⴰ ⵍⵖⴰⵔ ⵙ ⵜⵉⵟⵟⴰⵡⵉⵏ ⵏⵏⴻⵙ. ■
9 ⵡⵉ ⵉⵥⴻⵎⵎⴰⵔⴻⵏ ⴰⴷ ⵢⵉⵏⵉ: “ⵏⴻⵛⵛ ⵙⵙⵉⵥⴻⴷⴳⴻⵖ ⵓⵍ ⵉⵏⵓ,
ⵏⴻⵛⵛ ⵉⵥⴷⵉⴳⴻⵖ ⵥⵉ ⴷⴷⵏⵓⴱ ⵉⵏⵓ!”? ■
10 ⵉⵊⵊ ⵏ ⵍⴻⵡⵥⴻⵏ ⴷ ⵉⵊⵊ ⵏ ⵍⴻⵡⵥⴻⵏ ⵏⵏⴻⵖⵏⵉ, ⵉⵊⵊ ⵏ ⵉⴼⴰ ⴷ ⵉⵊⵊ ⵏ ⵉⴼⴰ ⵏⵏⴻⵖⵏⵉ,
ⴰⵇⴰ-ⵜⴻⵏ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⵏⵏⵄⵉ ⵉ ⵙⵉⴷⵉ. ■
11 ⴰⵃⵓⴷⵔⵉ ⵉⵜⵜⴱⴰⵏ ⴷⵉ ⵜⵎⴻⴳⴳⴰ ⵏⵏⴻⵙ,
ⵎⴰ ⵍⵅⴻⴷⵎⴻⵜ ⵏⵏⴻⵙ ⵜⴻⵚⴼⴰ ⵏⵉⵖ ⴰⵇⴰ ⵏⵉⵛⴰⵏ ⵉ ⵜⴻⴵⴰ.
12 ⴰⵎⴻⵥⵥⵓⵖ ⵉⵜⵜⴻⵙⵍⴰⵏ ⴷ ⵜⵉⵟⵟ ⵉⵜⵜⵡⴰⵍⴰⵏ,
ⵙⵉⴷⵉ ⵉⴳⴳⴰ ⵉ-ⵜⴻⵏ ⵙ ⵜⵏⴰⵢⴻⵏ ⵉⴷⵙⴻⵏ. ■
13 ⵡⴰⵔ ⵜⵜⴻⵅⵙ ⵉⴹⴻⵚ ⵎⴰⵃⴻⵏⴷ ⵡⴰⵔ ⵜⴻⴷⴷⵉⴽⴽⵡⵉⵍⴻⴷ ⴷ ⴰⵎⴻⵥⵍⵓⴹ,
ⴰⵔⵥⴻⵎ ⵜⵉⵟⵟⴰⵡⵉⵏ ⵏⵏⴻⴽ, ⵙⵙⵢⵉⵡⴻⵏ ⵉⵅⴻⴼ ⵏⵏⴻⴽ ⵙ ⵡⴻⵖⵔⵓⵎ. ■
14 ‘ⵡⴰⵔ ⵉⵃⵍⵉ, ⵡⴰⵔ ⵉⵃⵍⵉ!’, ⵉⵇⵇⴰⵔ ⵓⵎⵙⴻⵡⵡⴻⵇ,
ⵎⴰⵛⴰ ⵎⴰⵍⴰ ⵢⵓⵢⵓⵔ, ⴰⵎⵎⵓ ⵉ ⵉⵜⵜⵛⴻⵏⵏⴻⵄ ⵉⵅⴻⴼ ⵏⵏⴻⵙ.
15 ⵓⵔⴻⵖ ⵉⴵⴰ, ⵓⵍⴰ ⴷ ⴰⵟⵟⴰⵙ ⵏ ⵍⵎⴰⵔⵊⴰⵏ,
ⵎⴰⵛⴰ ⵉⵢⴻⵏⵛⵉⵛⴻⵏ ⵛⵛⵓⵔⴻⵏ ⵙ ⵜⵓⵙⵙⵏⴰ ⴷ ⵉⵛⵜ ⵏ ⵍⵇⴻⵛⵄⴻⵜ ⵉⵖⵍⴰⵏ ⴰⵟⵟⴰⵙ. ■
16 ⵎⴰⵍⴰ ⵉⵊⵊⴻⵏ ⵉⴷⴷⴰⴽⴽⵡⴰⵍ ⴷ ⴰⴹⵎⴰⵏ ⵉ ⵢⵉⵊⵊ ⵏ ⵓⴱⴰⵔⵔⴰⵏⵉ,
ⵅⴻⵏⵏⵉ ⴽⵙⵉ ⴰⵔⵔⵓⴹ ⵏⵏⴻⵙ ⵓ ⴽⵙⵉ ⵜ ⴷ ⴷⴷⵉⵢⵢⴻⵜ ⵉ ⵢⴻⵏⵏⵉ ⵡⴰⵔ ⵉⵜⵜⵡⴰⵙⵙⵏⴻⵏ. ■
17 ⴷ ⴰⵎⵉⵥⵉⴷ ⵉ ⴱⵏⴰⴷⴻⵎ ⴰⵖⵔⵓⵎ ⵏⵏⵉ ⵉⵟⵟⴻⴼ ⵙ ⵉⵅⴰⵔⵔⵉⵇⴻⵏ,
ⴰⵡⴰⵔⵏⵉ ⴰⵙ ⵎⴰⵛⴰ ⴰⴷ ⵉⵛⵛⵓⵔ ⵓⵇⴻⵎⵎⵓⵎ ⵏⵏⴻⵙ ⵙ ⵉⵇⴰⵢⴰⵙⴻⵏ. ■
18 ⵉⵅⴻⵎⵎⵉⵎⴻⵏ ⵜⵜⴻⴽⵎⵉⵍⴻⵏ ⵙ ⵓⵛⴰⵡⴰⵔ,
ⵅ ⵓⵢⴻⵏⵏⵉ ⵏⴷⴻⵀ ⴰⵎⴻⵏⵖⵉ ⵙ ⵓⴷⴻⴱⴱⴰⵔ. □
19 ⵡⴻⵏⵏⵉ ⵉⴳⴳⵓⵔⴻⵏ ⴷⴰ ⴷ ⴷⵉⵀⴰ ⵙ ⵜⴻⵅⴱⴰⵔⵊⵉⵜ, ⵉⵙⵙⵄⴰⵔⵔⴰ ⵎⵉⵏ ⵉⵏⵏⵓⴼⴼⴰⵔⴻⵏ,
ⵡⴰⵔ ⵜⵙⴻⴱⴱⴻⴱ ⴰⴽ-ⴷ ⵡⴻⵏⵏⵉ ⵉⵙⵙⵃⵉⵏⵏⵉⴱⴻⵏ ⵙ ⵉⵢⴻⵏⵛⵉⵛⴻⵏ ⵏⵏⴻⵙ ⵉⵚⴻⴱⵀⴻⵏ. ■
20 ⵡⴻⵏⵏⵉ ⵉ ⵖⴰ ⵉⵏⴻⵄⵍⴻⵏ ⵅ ⴱⴰⴱⴰⵙ ⴷ ⵢⴻⵎⵎⴰⵙ,
ⵍⴻⴼⵏⴰⵔ ⵏⵏⴻⵙ ⴰⴷ ⵉⵜⵜⵡⴰⵙⴻⵅⵙⵉ ⴷⵉ ⵜⴰⴵⴻⵙⵜ ⵜⴰⴱⴰⵔⵛⴰⵏⵜ. ■
21 ⵎⴰⵍⴰ ⵜⴰⵙⵖⴰⵔⵜ ⵜᵉⵜⵜⵡⴰⴽⵙⴻⴱ ⴷⴻⵖⵢⴰ ⵙ ⵜⴰⵥⵍⴰ ⴷⴻⴳ ⵓⵎⴻⵥⵡⴰⵔⵓ,
ⵡⴰⵔ ⴷⴷ-ⵜⵉⵡⴻⴹ ⴷ ⵍⴱⴰⵔⴰⴽⴰ ⵖⴰⵔ ⵓⵏⴻⴳⴳⴰⵔ. ■
22 ⵡⴰⵔ ⵇⵇⴰⵔ: “ⵏⴻⵛⵛ ⴰⴷ ⵅⴻⵍⴼⴻⵖ ⵍⵖⴰⵔ!”
ⵎⴰⵛⴰ ⵜⵛⴻⵍ ⵅ ⵙⵉⴷⵉ ⵓ ⵏⴻⵜⵜⴰ ⴰⴷ ⵛⴻⴽ ⵉⵙⵙⴻⵏⵊⴻⵎ. ■
23 ⵉⵊⵊ ⵏ ⵍⴻⵡⵥⴻⵏ ⴷ ⵉⵊⵊ ⵏ ⵍⴻⵡⵥⴻⵏ ⵏⵏⴻⵖⵏⵉ, ⴰⵇⴰ ⴰⵜⴻⵏ ⴷ ⵏⵏⵄⵉ ⵉ ⵙⵉⴷⵉ,
ⵍⵎⵉⵥⴰⵏⴰⵜ ⵉⵖⴻⵛⵛⴻⵏ ⵡⴰⵔ ⴵⵉⵏ ⵛⴰ ⵎⵍⵉⵃ. ■
24 ⵉⵚⵓⵔⴰⴼ ⵏ ⵉⵊⵊ ⵏ ⵡⴻⵔⵢⴰⵥ ⴰⵇⴰ ⴰⵜⴻⵏ ⵏ ⵙⵉⴷⵉ,
ⵅⴻⵏⵏⵉ ⵎⴰⵎⵎⴻⵛ ⵉ ⵖⴰ ⵢⴻⴳⴳ ⴱⵏⴰⴷⴻⵎ ⴰⴷ ⵉⵙⵙⴻⵏ ⴰⴱⵔⵉⴷ ⵏⵏⴻⵙ? ■
25 ⴰⵇⴰ-ⵜⵜ ⴷ ⵜⴰⵅⵛⴻⴼⵜ ⵉ ⴱⵏⴰⴷⴻⵎ ⵉ ⵖⴰ ⵉⵍⴰⵖⴰⵏ ⵙ ⵓⵇⴻⴵⴻⵇ ‘ⴰⵎⵇⴻⴷⴷⴻⵙ’,
ⵓ ⵄⴰⴷ ⴰⵡⴰⵔⵏⵉ ⵍⵡⵓⵄⵓⴷ ⵏⵏⴻⵙ ⵉ ⵉⴳⴳⴰ ⴰⴷ ⵉⵅⴰⵔⵔⴻⵚ.
26 ⵉⵊⵊ ⵏ ⵓⵊⴻⴵⵉⴷ ⴰⵎⵉⵖⵉⵙ ⵉⵜⵜⵚⴻⴼⴼⴰ ⵉⵄⴻⴼⴼⴰⵏⴻⵏ,
ⵓ ⵉⵜⵜⴻⵊⵊⴰ ⵜⵊⴰⵔⵔⴰⵔⵉⵏ ⵏ ⵜⴻⵍⵡⵉⵃⵜ ⵉⵜⵜⴻⵃⵍⵓⴵⵓⴹⴻⵏ ⵉ ⵓⵙⴰⵔⵡⴻⵜ ⴰⴷ ⵅⴰⵙⴻⵏ ⵉⵄⵇⴻⴱ.
27 ⵜⵡⴰⵔⵔⵉⵜ ⵏ ⵏⵏⴻⴼⵙ ⵏ ⴱⵓⵃⴱⴻⵍ ⵏ ⴱⵏⴰⴷⴻⵎ ⴷ ⵍⴻⴼⵏⴰⵔ ⵏ ⵙⵉⴷⵉ,
ⵉⵏⵏⵉ ⵢⴰⵔⴻⵥⵥⵓⵏ ⴷⵉ ⴷⴰⵅⴻⵍ ⵏ ⵉⵅⵅⴰⵎⴻⵏ ⵏ ⵓⵄⴻⴷⴷⵉⵙ.
28 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵀⴻⵟⵟⴰⵏ ⴰⵊⴻⴵⵉⴷ,
ⵓ ⵍⵄⴰⵔⵛ ⵏⵏⴻⵙ ⵉⵙⵙⴻⵊⵀⴻⴷ ⵉ-ⵜ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ.
29 ⵜⴰⵍⵡⵉⵥⵜ ⵏ ⵉⵃⵓⴷⵔⵉⵢⵢⴻⵏ ⴷ ⵊⵊⴻⵀⴷ ⵏⵙⴻⵏ,
ⵓ ⵍⵄⴰⴹⴰⵎⴰ ⵏ ⵉⵡⴻⵙⵙⵓⵔⴰ ⴷ ⴰⵛⴻⵡⵡⴰⴼ ⵉⵛⴰⴱⴻⵏ. ■
30 ⵉⵢⴻⵥⵥⵉⵎⴻⵏ ⵉⵜⵜⴰⵥⵥⵍⴻⵏ ⵙ ⵉⴷⴰⵎⵎⴻⵏ ⵙⵙⵉⵥⴷⵉⴳⴻⵏ ⴱⵏⴰⴷⴻⵎ ⵥⵉ ⵍⵖⴰⵔ,
ⵓ ⵜⵉⵢⵢⵉⵜⴰ ⵚⴻⴼⴼⴰⵏⵜ ⵓⵍⴰ ⴷ ⵜⴰⴽⵔⵉⵛⵜ.■