19
1 ⵉⵃⵍⴰ ⵉⵊⵊ ⵏ ⵓⵎⴻⵥⵍⵓⴹ ⵉⴳⴳⵓⵔⴻⵏ ⴷⵉ ⵍⴻⵚⴼⴰⵢⴻⵜ ⵏⵏⴻⵙ, ⵅ ⵡⴻⵏⵏⵉ ⵖⴰⵔ ⵉⴵⴰⵏ ⵉⵢⴻⵏⵛⵉⵛⴻⵏ ⴼⴰⵔⵖⴻⵏ, ⵓ ⴰⵇⴰ ⵜ ⴷ ⴰⴱⵓⵀⴰⵍⵉ ⵉ ⵢⴻⴵⴰ. ■
2 ⴱⵍⴰ ⵜⵓⵙⵙⵏⴰ ⵓⵍⴰ ⴷ ⵍⴻⵄⵎⴰⵔ ⵡⴰⵔ ⵉⴵⵉ ⵛⴰ ⵎⵍⵉⵃ,
ⵡⴻⵏⵏⵉ ⵉⵜⵜⵇⴻⴵⵇⴻⵏ ⵙ ⵉⴹⴰⵔⴻⵏ ⵏⵏⴻⵙ, ⴰⴷ ⵉⵅⴹⴰ.
3 ⵜⵓⴱⴱⵓⵀⴻⵍⵢⴰ ⵏ ⴱⵏⴰⴷⴻⵎ ⵉⵙⵙⴼⴰⵔⵔⴰⵖ ⴰⴱⵔⵉⴷ ⵏⵏⴻⵙ,
ⵓ ⵅⴻⵏⵏⵉ ⵓⵍ ⵏⵏⴻⵙ ⴰⴷ ⵉⵙⵄⴰⵔ ⵅ ⵙⵉⴷⵉ. ■
4 ⴰⴳⵍⴰ ⵉⵜⵜⴰⵡⵉ-ⴷⴷ ⴰⵟⵟⴰⵙ ⵏ ⵉⵎⴻⴷⴷⵓⴽⴽⴰⵍ,
ⵎⴰⵛⴰ ⴰⵎⴻⵥⵍⵓⴹ ⵉⵜⵜⵔⴰⵃ ⵓⵎⴻⴷⴷⵓⴽⴽⴻⵍ ⵏⵏⴻⵙ ⵉⵙⴻⵎⵎⴻⵃ ⴷⴰⵢⴻⵙ. ■
5 ⴰⵛⴻⵀⵀⴰⴷ ⴱⵓ-ⵉⵅⴰⵔⵔⵉⵇⴻⵏ ⵡⴰⵔ ⵉⵜⵜⵡⴰⵃⴻⵙⵙⴻⴱ ⵛⴰ ⴷ ⴰⵎⴻⵥⴷⴰⴳ,
ⵡⴻⵏⵏⵉ ⴷⴷ-ⵢⴰⵔⴻⵅⵅⵓⵏ ⵉ ⵉⵅⴰⵔⵔⵉⵇⴻⵏ, ⵡⴰⵔ ⴳⴳⵓⵔ ⴰⴷ ⵉⵏⵊⴻⵎ. ■
6 ⴰⵟⵟⴰⵙ ⵜⵜⵥⴰⵡⴳⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵓⵎⵛⴻⵏⵏⴻⵄ,
ⴽⵓⵍ ⵉⵊⵊ ⵉⵜⵜⴻⵅⵙ ⴰⴷ ⵢⵉⵍⵉ ⴷ ⴰⵎⴻⴷⴷⵓⴽⴽⴻⵍ ⵏ ⵡⴻⵔⵢⴰⵥ ⵉ ⵖⴰⵔ ⵉⴵⴰ ⵜⴻⵔⵥⵉⴼⵉⵏ.
7 ⵎⴰⵔⵔⴰ ⴰⵢⵜⵎⴰⵙ ⵏ ⵓⵎⴻⵥⵍⵓⴹ ⵛⴰⵔⵔⵀⴻⵏ ⵜ,
ⵎⴻⵛⵃⴰⵍ ⵜⵜⵉⴳⴳⵯⴻⵊⵊⴻⵏ ⵅⴰⵙ ⵉⵎⴻⴷⴷⵓⴽⴽⴰⵍ ⵏⵏⴻⵙ!
ⵏⴻⵜⵜⴰ ⵉⴹⴻⴼⴼⴰⵔ ⴰⵡⴰⵍⴻⵏ, ⵉⵏⵏⵉ ⵡⴰⵔ ⵉⵙⴻⴽⴽⵡⵉⵏ ⵡⴰⵍⵓ. ■
8 ⵡⴻⵏⵏⵉ ⵉⵜⵜⴰⵔⴻⴱⴱⴰⵏ ⵓⵍ ⵏⵏⴻⵙ, ⵉⵜⵜⴻⵅⵙ ⵍⴻⵄⵎⴰⵔ ⵏⵏⴻⵙ,
ⵡⴻⵏⵏⵉ ⵉⵃⴻⵟⵟⴰⵏ ⵍⴻⴼⵀⴰⵎⴻⵜ, ⴰⴷ ⵢⴰⴼ ⵎⵉⵏ ⵉⵛⵏⴰⵏ.
9 ⵉⵊⵊ ⵏ ⵓⵛⴻⵀⵀⴰⴷ ⴱⵓ-ⵉⵅⴰⵔⵔⵉⵇⴻⵏ ⵡⴰⵔ ⵉⵜⵜⵡⴰⵃⴻⵙⵙⴻⴱ ⵛⴰ ⴷ ⴰⵎⴻⵥⴷⴰⴳ,
ⵡⴻⵏⵏⵉ ⵢⴰⵔⴻⵅⵅⵓⵏ ⵉ ⵉⵅⴰⵔⵔⵉⵇⴻⵏ, ⴰⴷ ⵉⵜⵜⵡⴰⵀⴻⵍⵍⴻⴽ.
10 ⴰⴼⴻⵢⵢⴻⵛ ⵡⴰⵔ ⴷⴷ-ⵢⵓⵙⵉ ⵅ ⵓⴱⵓⵀⴰⵍⵉ,
ⵎⴰⵎⵎⴻⵛ ⵄⴰⴷ ⵅ ⵓⵎⵙⴻⵅⵅⴰⵔ ⵎⴰⵃⴻⵏⴷ ⴰⴷ ⵉⵙⴻⵍⵍⴻⵟ ⵅ ⵍⵃⵓⴽⴽⴰⵎ. ■
11 ⵍⴻⵄⵇⴻⵍ ⵏ ⴱⵏⴰⴷⴻⵎ ⵉⵜⵜⴰⵔⵔⴰ ⵉ-ⵜ ⴰⴷ ⵉⴳⴳ ⵙ ⵜⵜⴰⵙⵉⵄ ⵏ ⵍⵅⴰⴹⴰⵔ
ⵜⵓⵙⴰ-ⴷⴷ ⵅⴰⵙ ⵎⴰⵃⴻⵏⴷ ⴰⴷ ⵉⵎⴻⵢⵢⴻⴽ ⵅ ⵓⵅⴻⵟⵟⵓ ⵏⵏⴻⵙ.
12 ⴰⵙⵅⴻⴹ ⵏ ⵓⵊⴻⴵⵉⴷ ⴰⵎ ⵥⵥⵀⵉⵔ ⵏ ⵡⴻⵢⵔⴰⴷ ⴷⵉ ⵜⴻⵎⵥⵉ ⵏⵏⴻⵙ,
ⵎⴰⵛⴰ ⴰⵔⴹⴰ ⵏⵏⴻⵙ ⴰⵎ ⵏⵏⴷⴰ ⵅ ⴰⵔⵔⴱⵉⵄ. ■
13 ⵎⵎⵉⵙ ⴰⴱⵓⵀⴰⵍⵉ ⴷ ⴰⵔⵥⵉⵢⵢⴻⵜ ⵉ ⴱⴰⴱⴰⵙ,
ⴰⵎⵛⵓⴱⴱⴻⵛ ⵏ ⵜⴻⵎⵖⴰⵔⵜ ⵉⴳⴳⴰ ⴰⵎ ⵜⵓⴷⴷⵉⵎⵜ ⵏ ⵜⵥⴻⵇⵇⴰ ⵡⴰⵔ ⵉⵇⴻⵟⵟⵉⵏ. ■
14 ⵜⴰⴷⴷⴰⵔⵜ ⴷ ⵡⴰⴳⵍⴰ ⴰⵇⴰ ⴰⵜⴻⵏ ⴷ ⵍⵡⴰⵔⵜ ⵏ ⵉⴱⴰⴱⴰⵜⴻⵏ,
ⵎⴰⵛⴰ ⵉⵛⵜ ⵏ ⵜⴻⵎⵖⴰⵔⵜ ⵉⴼⴻⵀⵀⵎⴻⵏ ⴰⵇⴰ-ⵜⵜ ⵏ ⵙⵉⴷⵉ. ■
15 ⵍⴻⵄⴳⴻⵥ ⵢⴰⵔⵔⴰ ⴱⵏⴰⴷⴻⵎ ⴰⴷ ⵉⵡⴹⴰ ⴷⴻⴳ ⵉⴹⴻⵚ ⵢⵓⴵⵖⴻⵏ,
ⵓ ⵍⴻⵄⵎⴰⵔ ⵉⵛⵛⵓⵔ ⵙ ⵍⵖⴻⵛⵛ ⴰⴷ ⵉⴵⴰⵥ. ■
16 ⵡⴻⵏⵏⵉ ⵉⵃⴻⵟⵟⴰⵏ ⵜⴰⵡⵚⴻⵢⵢⴻⵜ, ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ,
ⵡⴻⵏⵏⵉ ⵡⴰⵔ ⵉⵃⴻⵟⵟⵉⵏ ⵉⴱⵔⵉⴷⴻⵏ ⵏⵏⴻⵙ, ⴰⴷ ⵉⵎⵎⴻⵜ. ■
17 ⵡⴻⵏⵏⵉ ⵉⵜⵜⵃⵉⵏⵏⴰⵏ ⵅ ⵓⵎⴻⵥⵍⵓⴹ, ⵢⴰⵔⴻⵟⵟⴻⵍ ⵉ ⵙⵉⴷⵉ,
ⵓ ⵏⴻⵜⵜⴰ ⴰⴷ ⴰⵙ ⵉⵅⴻⴵⴻⵚ ⵍⵅⴻⴷⵎⴻⵜ ⵏⵏⴻⵙ.
18 ⵡⴻⴱⴱⴻⵅ ⵎⵎⵉⵛ, ⵎⴰⵍⴰ ⵄⴰⴷ ⴷⵉⵏ ⵛⴰ ⵏ ⵍⴰⵢⴰⵙ,
ⵎⴰⵛⴰ ⵡⴰⵔ ⵜ ⵏⴻⵇⵇ ⵛⴰ, ⵡⴰⵔ ⵜⵜⴻⵊⵊⵉ ⵛⴰ ⴰⴷ ⵉⴽⵙⵉ-ⴷⴷ ⴰⵢⴰ ⵍⴻⵄⵎⴰⵔ ⵏⵏⴻⴽ. ■
19 ⵡⴻⵏⵏⵉ ⵉⵙⵄⴰⵔⴻⵏ ⴰⵟⵟⴰⵙ, ⴰⴷ ⵉⵜⵜⵡⴰⵅⴻⴵⴻⵚ ⵉ ⵎⴰⵏⴰⵢⴻⵏⵏⵉ,
ⵎⴰⵖⴰⵔ ⵎⴰⵍⴰ ⵜⴻⵅⵙⴻⴷ ⴰⴷ ⵅⴰⵙ ⵜⴻⵙⵙⴱⴻⵄⵄⴷⴻⴷ, ⵅⴻⵏⵏⵉ ⴰⴷ ⴷⴰⵢⵙⴻⵏⵜ ⵜⴰⵔⴻⵏⵢⴻⴷ.
20 ⵙⴻⵍ ⵛⴻⴽ ⵖⴰⵔ ⵓⵛⴰⵡⴰⵔ ⵓⵛⴰ ⵇⴱⴻⵍ ⵜⵜⴰⵔⴱⵉⵢⵢⴻⵜ,
ⵎⴰⵃⴻⵏⴷ ⴰⴷ ⵜⴷⴻⵡⵍⴻⴷ ⴷ ⴰⵎⵉⵖⵉⵙ ⵖⴰⵔ ⵓⵏⴻⴳⴳⴰⵔ.
21 ⴰⵇⴰ ⴷⵉⵏ ⴰⵟⵟⴰⵙ ⵏ ⵉⵅⴻⵎⵎⵉⵎⴻⵏ ⴷⴻⴳ ⵡⵓⵍ ⵏ ⵡⴻⵔⵢⴰⵥ,
ⵎⴰⵛⴰ ⵛⵛⵡⴰⵔ ⵏ ⵙⵉⴷⵉ ⵉⵜⵜⵖⵉⵎⴰ ⵉⴱⴻⴷⴷ. ■
22 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴱⵏⴰⴷⴻⵎ ⴷ ⵍⴻⴹⵔⴰⴼⴻⵜ ⵏⵏⴻⵙ,
ⴰⵎⵎⵓ ⵉ ⵉⴵⴰ ⵉⵊⵊ ⵏ ⵓⵎⴻⵥⵍⵓⴹ ⵃⵙⴻⵏ ⵅ ⵉⵊⵊ ⵏ ⴱⵓ-ⵉⵅⴰⵔⵔⵉⵇⴻⵏ.
23 ⵜⵉⴳⴳⵯⵓⴷⵉ ⵏ ⵙⵉⴷⵉ ⵜⵏⴻⴷⴷⴻⵀ ⵖⴰⵔ ⵜⵓⴷⴰⵔⵜ,
ⵎⴰⵖⴰⵔ ⵉⵜⵜⴻⵟⵟⴻⵚ ⵉⵊⵊⵉⵡⴻⵏ,
ⵡⴰⵔ ⴳⴳⵓⵔ ⴰⴷ ⵖⴰⵔⴻⵙ ⴷⴷ-ⵢⴰⵙ ⵛⴰ ⵎⵉⵏ ⵡⴰⵔ ⵉⵃⵍⵉⵏ. ■
24 ⴰⵎⴻⵄⴳⵓⵥ ⵉⵙⵙⵏⵓⴼⴼⴰⵔ ⴰⴼⵓⵙ ⵏⵏⴻⵙ ⴷⵉ ⵟⵟⴻⴱⵚⵉ,
ⵡⴰⵔ ⵜ-ⵉ-ⴷⴷ-ⵉⵜⵜⴰⵔⵔⵉ ⵄⴰⵡⴻⴷ ⵖⴰⵔ ⵓⵇⴻⵎⵎⵓⵎ ⵏⵏⴻⵙ. □ ■
25 ⵡⵡⴻⵜ ⴰⵎⴻⵙⵜⴻⵀⵥⵉⵢ, ⴰⵎⵎⵓ ⵉ ⵖⴰ ⵉⴼⵜⴻⵏ ⵡⴻⵏⵏⵉ ⵡⴰⵔ ⵖⴰⵔⴻⵙ ⴱⵓ ⵍⴻⴼⵀⴰⵎⴻⵜ,
ⵓ ⵄⴰⵇⴻⴱ ⴰⴼⴻⵀⵀⴰⵎ, ⵅⴻⵏⵏⵉ ⴰⴷ ⵉⴽⵙⴻⴱ ⵍⴻⴼⵀⴰⵎⴻⵜ. ■
26 ⵡⴻⵏⵏⵉ ⵉⵜⵜⴻⴳⴳⴻⵏ ⵖⴻⵥⵥⵓ ⴷⵉ ⴱⴰⴱⴰⵙ ⵏⵉⵖ ⵡⴻⵏⵏⵉ ⵉⵙⵙⵓⴼⴼⵓⵖⴻⵏ ⵢⴻⵎⵎⴰⵙ,
ⴰⵇⴰ ⴷ ⵎⵎⵉⵙ ⵏ ⵍⴻⴼⴹⵉⵃⴻⵜ ⵏⵏⵉ ⵢⴰⵔⵔⴰⵏ ⴱⵏⴰⴷⴻⵎ ⴰⴷ ⵉⵙⵙⴻⴹⵃⴰ.
27 ⵙⴱⴻⴷⴷ-ⴷⴷ, ⴰ ⵎⵎⵉ, ⵎⴰⵃⴻⵏⴷ ⴰⴷ ⵜⴻⵙⵍⴻⴷ ⵖⴰⵔ ⵓⵡⴻⴱⴱⴻⵅ,
ⵎⴰⵍⴰ ⵜⴻⵅⵙⴻⴷ ⴰⴷ ⵜⵃⴻⵢⵢⴷⴻⴷ ⵅ ⵡⴰⵡⴰⵍⴻⵏ ⵉⵛⵛⵓⵔⴻⵏ ⵙ ⵜⵓⵙⵙⵏⴰ.
28 ⵉⵊⵊ ⵏ ⵓⵛⴻⵀⵀⴰⴷ ⵉ ⵡⴰⵔ ⵉⵙⴻⴽⴽⵡⵉⵏ ⵉⵖⴻⵟⵟⴻⵍ ⵥⵉ ⵍⵃⴻⵇⵇ,
ⵓⵛⴰ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ ⵉⵚⴰⵔⵔⴻⴹ ⵍⵖⴻⵛⵛ.
29 ⵉⵎⴻⵙⵜⴻⵀⵥⴰⵢⴻⵏ ⵜᵉⵜⵜⵔⴰⵊⴰ ⴰⵜⴻⵏ ⵍⴻⵃⴽⴰⵎⴻⵜ,
ⵓ ⵜⵉⵢⵉⵜⵜⴰ ⴷⴻⴳ ⵡⴻⵄⵔⵓⵔ ⵉ ⵉⴱⵓⵀⴰⵍⵉⵢⵢⴻⵏ.