16
1 ⴱⵏⴰⴷⴻⵎ ⵖⴰⵔⴻⵙ ⵉⵅⴰⵔⵔⵉⵚⴻⵏ ⴷⴻⴳ ⵡⵓⵍ ⵏⵏⴻⵙ, ⵎⴰⵛⴰ ⵜⴰⵎⵡⴰⵔⵔⵉⵜ ⵏ ⵢⵉⵍⴻⵙ ⵜᵉⵜⵜⴰⵙ-ⴷⴷ ⵥⵉ ⵙⵉⴷⵉ. ■
2 ⵎⴰⵔⵔⴰ ⵉⴱⵔⵉⴷⴻⵏ ⵏ ⵡⴻⵔⵢⴰⵥ ⵚⴼⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵎⴰⵛⴰ ⵙⵉⴷⵉ ⵉⵜⵜⵇⴻⴵⴰⴱ ⴱⵓⵃⴱⴻⵍⴰⵜ. ■
3 ⵙⴰⵔⵙ ⵍⴻⵅⴷⴰⵢⴻⵎ ⵏⵏⴻⴽ ⵉ ⵙⵉⴷⵉ,
ⵓⵛⴰ ⵅⴻⵏⵏⵉ ⴰⴷ ⵜⵜⵡⴰⵙⵎⴻⵜⵜⵏⴻⵏ ⵉⵏⵡⴰⵢⴻⵏ ⵏⵏⴻⴽ. ■
4 ⵙⵉⴷⵉ ⵉⵅⵍⴻⵇ-ⴷⴷ ⵎⴰⵔⵔⴰ ⵉ ⵍⵖⴰⵔⴰⴹ ⵏⵏⴻⵙ,
ⵄⴰⴷ ⵓⵍⴰ ⴷ ⴰⵄⴻⴼⴼⴰⵏ ⵉⴳⴳⴰ ⵉ-ⵜ ⵉ ⵡⴰⵙⵙ ⵏ ⵍⵖⴰⵔ.■
5 ⴽⵓⵍ ⴰⵎⵄⴻⴼⴼⴰⵔ ⴷ ⵏⵏⵄⵉ ⵉ ⵙⵉⴷⵉ,
ⴰⴼⵓⵙ ⵅⴰⵙ, ⵏⴻⵜⵜⴰ ⵡⴰⵔ ⵉⵜⵜᵉⵜⵜⵡⴰⴱⴰⵔⵔⵉ ⵄⴻⵎⵎⴰⵔⵚ. ■
6 ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⴰⴷ ⵉⵜⵜⵡⴰⵚⵍⴻⵃ ⵍⵖⴻⵛⵛ,
ⵓ ⵙ ⵜⵉⴳⴳⵯⵓⴷⵉ ⵏ ⵙⵉⴷⵉ ⵉⵜⵜⵃⴻⵢⵢⴰⴷ ⵡⴻⵔⵢⴰⵥ ⵅ ⵍⵖⴰⵔ.
7 ⵎⴰⵍⴰ ⵓⵙⵉⵏ-ⴷⴷ ⵉⴱⵔⵉⴷⴻⵏ ⵏ ⵉⵊⵊ ⵏ ⵡⴻⵔⵢⴰⵥ ⵅ ⵍⵅⴰⴹⴰⵔ ⵏ ⵙⵉⴷⵉ,
ⴰⴷ ⵢⴰⵔⵔ ⵏⴻⵜⵜⴰ ⵓⵍⴰ ⴷ ⵍⵄⴻⴷⵢⴰⵏ ⵏⵏⴻⵙ ⴰⴷ ⴽⵉⴷⴻⵙ ⴳⴳⴻⵏ ⵍⴻⵀⵏⴰ.
8 ⵉⵃⵔⴰ ⴷⵔⵓⵙ ⴰⴽ-ⴷ ⵜⵙⴻⴳⴷⴰ
ⵅ ⵡⴰⵟⵟⴰⵙ ⵏ ⵍⵖⵉⴵⴻⵜ ⴱⵍⴰ ⵍⵃⴻⵇⵇ. ■
9 ⵓⵍ ⵏ ⴱⵏⴰⴷⴻⵎ ⵉⵜⵜⵅⴰⵔⵔⴻⵚ ⴰⴱⵔⵉⴷ ⵏⵏⴻⵙ,
ⵎⴰⵛⴰ ⵙⵉⴷⵉ ⵉⵏⴻⴷⴷⴻⵀ ⵉⵚⵓⵔⴰⴼ ⵏⵏⴻⵙ. □
10 ⵍⵃⵓⴽⵎ ⴱⵍⴰ ⴰⴷⵡⴰⵍ ⵅ ⵉⵢⴻⵏⵛⵉⵛⴻⵏ ⵏ ⵓⵊⴻⴵⵉⴷ,
ⴰⵇⴻⵎⵎⵓⵎ ⵏⵏⴻⵙ ⵡⴰⵔ ⵉⵅⴻⵟⵟⵉ ⴷⴻⴳ ⵡⴻⵃⴽⴰⵎ.
11 ⵍⵎⵉⵥⴰⵏ ⵏⵉⵛⴰⵏ ⴷ ⵟⵟⴰⵡⵢⴰⵜ ⵏ ⵍⵎⵉⵥⴰⵏ ⵏⵉⵛⴰⵏ ⴰⵇⴰ ⴰⵜⴻⵏ ⵏ ⵙⵉⴷⵉ,
ⵎⴰⵔⵔⴰ ⵉⵥⵔⴰ ⵏ ⵍⴻⵡⵥⴻⵏ ⴷⵉ ⵜⴻⵛⵢⴰⵔⵜ ⴷ ⵍⵅⴻⴷⵎⴻⵜ ⵏⵏⴻⵙ. ■
12 ⴷ ⵏⵏⵄⵉ ⵉ ⵉⵊⴻⴵⵉⴷⴻⵏ ⵅⵎⵉ ⵉ ⵖⴰ ⴳⴳⴻⵏ ⵍⵖⴰⵔ,
ⵎⴰⵖⴰⵔ ⵍⵄⴰⵔⵛ ⵉⵜⵜⵡⴰⵙⵙⴻⵎⵜⴻⵏ ⵥⵉ ⵜⵙⴻⴳⴷⴰ.
13 ⵉⵢⴻⵏⵛⵉⵛⴻⵏ ⵉ ⵉⵛⵛⵓⵔⴻⵏ ⵙ ⵜⵙⴻⴳⴷⴰ ⵜⵜⴻⵄⵊⵉⴱⴻⵏ ⵉ ⵓⵊⴻⴵⵉⴷ,
ⵓ ⵡⴻⵏⵏⵉ ⵉⵙⵙⴰⵡⴰⵍⴻⵏ ⵏⵉⵛⴰⵏ, ⵉⵜⵜⴻⵅⵙ ⵉ-ⵜ ⵏⴻⵜⵜⴰ.
14 ⴰⵙⵄⴰⵔ ⵏ ⵓⵊⴻⴵⵉⴷ ⴰⵎ ⵍⵎⴰⵍⴰⴽⴰⵜ ⵏ ⵍⵎⴻⵡⵜ,
ⵎⴰⵛⴰ ⴰⵔⵢⴰⵥ ⴰⵎⵉⵖⵉⵙ ⵉⵥⴻⵎⵎⴰⵔ ⴰⴷ ⵖⴰⵔⴻⵙ ⵜⵜ ⵉ-ⴷⴷ ⵢⴰⵔⵔ. ■
15 ⴷⵉ ⵜⴼⴰⵡⵜ ⵏ ⵡⵓⴷⴻⵎ ⵉⵜⵜⵉⵙⵙⵉⵇⴻⵏ ⵏ ⵓⵊⴻⴵⵉⴷ ⵜⴻⴵⴰ ⵜⵓⴷⴰⵔⵜ,
ⴰⵔⴹⴰ ⵏⵏⴻⵙ ⴰⵎ ⵓⵙⴻⵢⵏⵓ ⵏ ⵡⴻⵏⵥⴰⵔ ⴷⵉ ⵜⴻⴼⵙⵓⵜ. ■
16 ⴰⵇⴰ ⵜⴻⵃⵍⴰ ⵜⴰⵔⴻⵥⵥⵓⵜ ⵏ ⵜⵉⵖⵉⵜ ⵅ ⵡⵓⵔⴻⵖ ⵉⵜⵜⵉⵙⵙⵉⵇⴻⵏ,
ⵓ ⵎⴻⵛⵃⴰⵍ ⴽⵜⴰⵔ ⴰⴷ ⵜⵉⵍⵉ ⵜⵡⴰⴼⵉⵜ ⵏ ⵍⴻⴼⵀⴰⵎⴻⵜ ⵙⴻⵏⵏⴻⵊ ⵅ ⵜⵡⴰⴼⵉⵜ ⵏ ⵏⵏⵓⵇⴰⵔⵜ. ■
17 ⵉⵜⵜⵡⴰⵙⵙⴳⴻⵄⵄⴻⴷ ⵡⴻⴱⵔⵉⴷ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵎⴰⵃⴻⵏⴷ ⴰⴷ ⵉⵃⴻⵢⵢⴻⴷ ⵅ ⵍⵖⴰⵔ.
ⵡⴻⵏⵏⵉ ⵉⵃⴻⵟⵟⴰⵏ ⴰⴱⵔⵉⴷ ⵏⵏⴻⵙ, ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ.
18 ⵜⴰⵏⴻⴼⵙⴻⵛⵜ ⵜᵉⵜⵜⵉⵥⵡⴰⵔ-ⴷⴷ ⵉ ⴰⵔⵥⵥⵉⵢⵢⴻⵜ,
ⵓ ⵏⵏⴼⴰⵅⴻⵜ ⵜᵉⵜⵜⴰⵙ-ⴷⴷ ⵇⴱⴻⵍ ⵉ ⵓⵡⴻⵟⵟⵓ. ■
19 ⵉⵃⵍⴰ ⴰⵇⵏⴰⵄ ⵏ ⴱⵓⵃⴱⴻⵍ ⴰⴽ-ⴷ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ,
ⵅ ⵓⴱⴻⵟⵟⵓ ⵏ ⵜⴽⴻⵛⵛⴰⴹⵜ ⴰⴽ-ⴷ ⴰⵢⵜ-ⵏⵏⴼⴰⵅⴻⵜ.
20 ⵡⴻⵏⵏⵉ ⵉⵜⵜⵅⴰⵔⵔⴰⵚⴻⵏ ⵎⵍⵉⵃ ⴷⵉ ⵛⴰ ⵏ ⵜⵎⴻⵙⵍⴰⵛⵜ, ⴰⴷ ⵢⴰⴼ ⵍⵅⴰⵔ,
ⵙⵙⴻⵄⴷ ⵏ ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵙⵉⴷⵉ.■
21 ⵡⴻⵏⵏⵉ ⵖⴰⵔ ⵉⴵⴰ ⵡⵓⵍ ⴷ ⴰⵎⵉⵖⵉⵙ, ⴰⴷ ⵜ ⵙⴻⵎⵎⴰⵏ ⴱⵓ-ⵡⴻⴼⵜⴰⵏ,
ⵓ ⵜⴰⵥⵢⵓⴷⵉ ⵏ ⵍⵀⴰⵔⴷ ⵏ ⵉⵢⴻⵏⵛⵉⵛⴻⵏ ⵜⴰⵔⴻⵏⵏⵉ ⴷⵉ ⵍⴻⴼⵀⴰⵎⴻⵜ.
22 ⵍⴻⵄⵇⴻⵍ ⴷ ⵍⵄⵓⵏⵚⴰⵔ ⵏ ⵜⵓⴷⴰⵔⵜ ⵉ ⴱⴰⴱ ⵏⵏⴻⵙ,
ⵎⴰⵛⴰ ⵜⵜⴰⵔⴱⵉⵢⵢⴻⵜ ⵉ ⵉⴱⵓⵀⴰⵍⵉⵢⵢⴻⵏ ⴷ ⵜⵓⴱⴱⵓⵀⴻⵍⵢⴰ ⵡⴰⵀⴰ.■
23 ⵓⵍ ⵏ ⵓⵎⵉⵖⵉⵙ ⵉⵜⵜⴰⵔⵔⴰ ⴰⵇⴻⵎⵎⵓⵎ ⵏⵏⴻⵙ ⵉⴼⴻⵀⵀⴻⵎ,
ⵥⴻⴳ ⵉⵢⴻⵏⵛⵉⵛⴻⵏ ⵏⵏⴻⵙ ⴰⴷ ⴼⴻⵀⵎⴻⵏ ⴽⵜⴰⵔ.
24 ⴰⵡⴰⵍⴻⵏ ⵉⵛⴻⵡⵡⴰⵔⴻⵏ ⴳⴳⵉⵏ ⴰⵎ ⵜⴰⵎⵎⴻⵏⵜ ⵏ ⵜⴻⵖⵔⴰⵙⵜ,
ⴰⵇⴰ-ⵜⴻⵏ ⴷ ⵉⵎⵉⵥⵉⴷⴻⵏ ⵉ ⵍⴻⵄⵎⴰⵔ ⴷ ⵓⴳⴻⵏⴼⵓ ⵉ ⵢⴻⵅⵙⴰⵏ.
25 ⴰⴷ ⵜⴰⵖ ⵉⵜⵜⵖⵉⵍ ⴰⵙ ⵉ ⵛⴰ ⵏ ⵢⵉⵊⵊⴻⵏ ⴰⵇⴰ ⴰⴱⵔⵉⴷ ⵏⵏⴻⵙ ⵏⵉⵛⴰⵏ,
ⵎⴰⵛⴰ ⴰⵏⴻⴳⴳⴰⵔ ⵏⵏⴻⵙ ⵎⵖⵉⵔ ⵉⴱⵔⵉⴷⴻⵏ ⵉⵜⵜⴰⵡⵢⴻⵏ ⵖⴰⵔ ⵍⵎⴻⵡⵜ. ■
26 ⵍⴰⵥ ⵏ ⵓⵛⴻⵡⵡⴰⵔ ⵉⵅⴻⴷⴷⴻⵎ ⴰⵙ ⵉ ⵏⴻⵜⵜⴰ,
ⵎⴰⵖⴰⵔ ⴰⵇⴻⵎⵎⵓⵎ ⵏⵏⴻⵙ ⵉⵏⴻⴷⴷⴻⵀ ⵉ-ⵜ.
27 ⴰⵔⵢⴰⵥ ⵉ ⵡⴰⵔ ⵉⵙⴻⴽⴽⵡⵉⵏ ⵉⵖⴻⵥⵥⴰ ⵍⵖⴰⵔ,
ⵅ ⵉⵢⴻⵏⵛⵉⵛⴻⵏ ⵏⵏⴻⵙ ⴰⵎⴻⵛⵏⴰⵡ ⵉⵛⵜ ⵏ ⵜⵎⴻⵙⵙⵉ ⵉⵜⵜⵛⴻⵄⵄⴰⵍⴻⵏ. ■
28 ⴰⵔⵢⴰⵥ ⵉⵛⵛⵓⵔⴻⵏ ⵙ ⵍⴻⵅⴷⴰⵄⴰⵜ ⵉⵙⵙⴻⴽⴽⴰⵔⴰ ⴰⵎⴻⵏⵖⵉ,
ⵓ ⴰⵅⴱⴰⵔⵊⵉ ⵉⵜⵜⴰⵡⵉ-ⴷⴷ ⵄⴰⴷ ⴰⴱⴻⵟⵟⵓ ⴰⴽ-ⴷ ⵓⵎⴻⴷⴷⵓⴽⴽⴻⵍ ⵉⵚⴻⴱⵃⴻⵏ ⴰⵟⵟⴰⵙ. ■
29 ⴰⵔⵢⴰⵥ ⴱⵓ-ⵍⴻⵅⵛⵓⵏⴻⵜ ⵉⵜⵜⵖⴰⵔⵔⴰ ⴰⵎⵇⴰⵔⵔⴻⴱ ⵏⵏⴻⵙ,
ⵉⵏⴻⴷⴷⴻⵀ ⵉ-ⵜ ⵖⴰⵔ ⵉⵊⵊ ⵏ ⵡⴻⴱⵔⵉⴷ ⵡⴰⵔ ⵉⴵⵉⵏ ⵎⵍⵉⵃ.
30 ⵏⴻⵜⵜⴰ ⵉⵜⵜⴻⵇⵇⴻⵏ ⵜⵉⵟⵟⴰⵡⵉⵏ ⵏⵏⴻⵙ ⵎⴰⵃⴻⵏⴷ ⴰⴷ ⵉⵅⴰⵔⵔⴻⵚ ⵎⴰⵔⵔⴰ ⴷⴷⴰⵔⴱⴰⵜ ⵏ ⵍⴻⵅⴷⴰⵄⴻⵜ,
ⵉⵜⵜⴽⴻⵎⵎⴻⵛ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⵇⴰ ⴷⴰ ⵉⴳⴳⴰ ⵍⵖⴰⵔ. ■
31 ⴰⵛⴻⵡⵡⴰⴼ ⵉⵛⴰⴱⴻⵏ ⴷ ⵉⵛⵜ ⵏ ⵜⴻⵎⵔⵉⵙⵜ ⵉⵥⴻⵡⵡⵇⴻⵏ,
ⵜⵥⴻⵎⵎⴰⵔⴻⴷ ⴰⴷ ⵜⵜ ⵜⴰⴼⴻⴷ ⵅ ⵡⴻⴱⵔⵉⴷ ⵏ ⵜⵙⴻⴳⴷⴰ.
32 ⵉⵃⵍⴰ ⴱⵓ-ⵜⵜⴰⵙⵉⵄ ⵏ ⵍⵅⴰⴹⴰⵔ ⵅ ⵉⵊⵊ ⵏ ⵡⴻⵔⵢⴰⵥ ⵉⵊⴻⵀⴷⴻⵏ
ⵓ ⵡⴻⵏⵏⵉ ⵉⵜⵜⴻⴱⴱⴰⵜⴻⵏ ⴱⵓⵃⴱⴻⵍ ⵏⵏⴻⵙ ⵉⵃⵍⴰ ⵅ ⵡⴻⵏⵏⵉ ⵉⵃⴻⵡⵡⵙⴻⵏ ⵉⵛⵜ ⵏ ⵜⴻⵏⴷⵉⵏⵜ.
33 ⵜⴰⵇⴻⴷⴷⵓⵃⵜ ⵜⴻⵎⵎⴻⵏⴹⴰⵔ ⴷⴻⴳ ⵡⴻⵃⵙⵉⵏ,
ⵎⴰⵛⴰ ⵎⴽⵓⵍ ⴰⵔⵔⴰⵢ ⵉⵜⵜⴰⵙ-ⴷⴷ ⵥⵉ ⵙⵉⴷⵉ.