1 ⵉⵃⵍⴰ ⵉⵊⵊ ⵏ ⵓⵥⴻⵄⵄⵉⴼ ⵏ ⵡⴻⵖⵔⵓⵎ ⵢⵓⵥⵖⴻⵏ ⴰⴽ-ⴷ ⵍⴻⵀⵏⴰ,

ⵅ ⵉⵛⵜ ⵏ ⵜⴰⴷⴷⴰⵔⵜ ⵜⴻⵛⵛⵓⵔ ⵙ ⵜⵖⴰⵔⵚⴰ, ⴷⴰⵢⴻⵙ ⴰⵎⴻⵏⵖⵉ. ^■  

2 ⵉⵊⵊ ⵏ ⵢⵉⵙⵎⴻⵖ ⵉⴼⴻⵜⵏⴻⵏ ⴰⴷ ⵉⴷⴻⴱⴱⴰⵔ ⵅ ⵉⵊⵊ ⵏ ⵎⵎⵉⵙ ⵏⵏⵉ ⵉⵜⵜⴰⵡⵢⴻⵏ ⵖⴰⵔ ⵍⴻⴼⴹⵉⵃⴻⵜ,

ⴷⵉ ⵍⵡⴻⵙⵜ ⵏ ⵢⴰⵢⵜⵎⴰⵙ ⴰⴷ ⵉⴱⴹⴰ ⵏⴻⵜⵜⴰ ⵍⵡⴰⵔⵜ.

3 ⴰⵟⴻⵏⵊⵉⵔ ⵏ ⵓⵙⴻⴼⵙⵉ ⵉ ⵏⵏⵓⵇⴰⵔⵜ ⵓ ⴰⴼⴰⵔⵔⴰⵏ ⵉ ⵡⵓⵔⴻⵖ,

ⵎⴰⵛⴰ ⵙⵉⴷⵉ ⵉⵜⵜⵊⴰⵔⵔⴰⴱ ⵓⵍⴰⵡⴻⵏ. ^■  

4 ⴰⵄⴻⴼⴼⴰⵏ ⵉⵅⴻⵥⵥⴰⵔ ⵖⴰⵔ ⵉⵢⴻⵏⵛⵉⵛⴻⵏ ⵉⵄⴻⴼⴼⴰⵏⴻⵏ,

ⴱⵓ-ⵉⵅⴰⵔⵔⵉⵇⴻⵏ ⵉⵜⵜⵉⵛ ⴰⵎⴻⵥⵥⵓⵖ ⵉ ⵢⵉⵍⴻⵙ ⵉⵛⵛⵓⵔⴻⵏ ⵙ ⵍⵖⴻⵛⵛ.

5 ⵡⴻⵏⵏⵉ ⵉⵜⵜⵃⴻⵛⵛⴻⵏ ⵅ ⵓⵎⴻⵥⵍⵓⴹ, ⵉⵙⵙⴼⴻⵟⵟⴻⵃ ⵡⴻⵏⵏⵉ ⵜ-ⵉ-ⴷⴷ-ⵉⵅⴻⵍⵇⴻⵏ,

ⵡⴻⵏⵏⵉ ⵉⴼⴰⵔⵔⵃⴻⵏ ⵅ ⴰⵔⵥⵉⵢⵢⴻⵜ, ⵡⴰⵔ ⵉⵜⵜⵡⵉⵃⵙⵉⴱ ⴷ ⴰⵎⴻⵥⴷⴰⴳ.^■  

6 ⵜⵜⴰⵊ ⵏ ⵉⵡⴻⵙⵙⵓⵔⴰ ⴷ ⴰⵢⵢⴰⵡⴻⵏ,

ⵓ ⵜⴰⵍⵡⵉⵥⵜ ⵏ ⵉⵃⴻⵏⵊⵉⵔⴻⵏ ⴷ ⵉⴱⴰⴱⴰⵜⴻⵏ ⵏⵙⴻⵏ.

7 ⴰⵢⴻⵏⵛⵉⵛ ⵏ ⵛⵛⴰⵏ ⵡⴰⵔ ⴷⴷ-ⵉⵜⵜⵉⵙ ⴰⴽ-ⴷ ⵓⴱⵓⵀⴰⵍⵉ,

ⵅⴻⵏⵏⵉ ⵄⴻⵙⵙⴰⴽ ⵄⴰⴷ ⴰⵢⴻⵏⵛⵉⵛ ⵉⵙⵙⵅⴰⵔⵔⵉⵇⴻⵏ ⴰⴽ-ⴷ ⵓⵎⵛⴻⵏⵏⴻⵄ.

8 ⵜⴰⵔⵥⴻⴼⵜ ⵏ ⴰⵔⵔⴻⵛⵡⴻⵜ ⴷ ⵉⵊⵊ ⵏ ⵡⴻⵥⵔⵓ ⵉⵥⴻⵡⵡⵇⴻⵏ ⴷⵉ ⵜⵉⵟⵟⴰⵡⵉⵏ ⵏ ⴱⴰⴱ ⵏⵏⴻⵙ,

ⵎⴰⵏⵉ ⵎⴰ ⵢⴰⵔⵔⴰ ⵙ ⵓⵥⴻⴵⵉⴼ, ⵉⵜⵜⴼⴻⵍⵉⵃ.

9 ⵡⴻⵏⵏⵉ ⵉⵙⵙⴷⵓⵍⵓⵢⴻⵏ ⴰⵅⴻⵟⵟⵓ, ⵢⴰⵔⴻⵥⵥⵓ ⵜⴰⵢⵔⵉ,

ⵎⴰⵛⴰ ⵡⴻⵏⵏⵉ ⵉⵜⵜⵄⴰⵡⴰⴷⴻⵏ ⵉⵛⵜ ⵏ ⵍⵃⴰⵊⵊⴻⵜ ⵥⵉ ⵊⴷⵉⴷ, ⵉⴱⴻⵟⵟⴰ ⵉⵎⴻⴷⴷⵓⴽⴽⴰⵍ ⵉⵛⵏⴰⵏ.

10 ⵉⵜⵜⵇⴰⵔⵔⴰ ⵓⵜⴻⵅⵜⴻⵅ ⵅ ⵓⴼⴻⵀⵀⴰⵎ

ⴰⵟⵟⴰⵙ ⵅ ⵎⵢⴰ ⵏ ⵜⴻⵢⵢⵉⵜⴰ ⵅ ⵢⵉⵊⵊ ⵏ ⵓⴱⵓⵀⴰⵍⵉ.

11 ⴰⵎⵖⴻⵡⵡⴻⵖ ⵢⴰⵔⴻⵥⵥⵓ ⵎⵖⵉⵔ ⵅ ⵍⵖⴰⵔ,

ⵅ ⵓⵢⴰ ⴰⴷ ⵖⴰⵔⴻⵙ ⴷⴷ-ⵉⵜⵜⵡⴰⵙⵙⴻⴽⴽ ⵉⵊⵊ ⵏ ⵓⵎⵙⴻⵅⵅⴰⵔ ⵉⵇⴻⵙⵃⴻⵏ ⴹⵉⴷⴷ ⵏⵏⴻⵙ.

12 ⴻⵊⵊ ⴰⴷ ⵉⵎⵎⴻⵍⵇⴰ ⵉⵊⵊⴻⵏ ⴰⴽ-ⴷ ⵛⴰ ⵏ ⴷⴷⵓⴱ ⵉ ⵓⵎⵉ ⵜⵜⵡⴰⵛⴰⵔⴻⵏ ⵜⴰⵔⵡⴰ,

ⵎⴰⵛⴰ ⵡⴰⵔ ⵉⴵⵉ ⴰⴱⵓⵀⴰⵍⵉ ⴷⵉ ⵜⵓⴱⴱⵓⵀⴻⵍⵢⴰ ⵏⵏⴻⵙ.

13 ⵡⴻⵏⵏⵉ ⵉⵜⵜⵅⴻⴵⴰⵚⴻⵏ ⵎⵉⵏ ⵉⵚⴻⴱⵃⴻⵏ ⵙ ⵍⵖⴰⵔ,

ⵡⴰⵔ ⵜᵉⵜⵜⵃⴻⵢⵢⵉⴷ ⴰⵔⵥⵉⵢⵢⴻⵜ ⵅ ⵜⴰⴷⴷⴰⵔⵜ ⵏⵏⴻⵙ. ^■  

14 ⴱⴻⴷⴷⵓ ⵏ ⵓⵎⴻⵏⵖⵉ ⴰⵎⴻⵛⵏⴰⵡ ⴰⵔⵥⴰⵎ ⵏ ⵍⵃⴻⵎⵍⴻⵜ ⵏ ⵡⴰⵎⴰⵏ.

ⴻⵊⵊ ⴰⵎⴻⵏⵖⵉ ⴰⴷ ⵢⴰⵔⵙ ⵇⴱⴻⵍ ⵉ ⵖⴰ ⵉⴷⴷⵓⵇⵇⴻⵥ. ^■  

15 ⵡⴻⵏⵏⵉ ⵉⵜⵜⴱⴰⵔⵔⴰⵏ ⴰⵄⴻⴼⴼⴰⵏ ⵓ ⵡⴻⵏⵏⵉ ⵉⵜⵜⴱⴰⵔⵔⴰⵃⴻⵏ ⴰⵇⴰ ⴰⵎⵙⴻⴳⴳⴻⴷ ⴷ ⴰⵄⴻⴼⴼⴰⵏ,

ⴰⵇⴰ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⵏⵏⵄⵉ ⵉ ⵙⵉⴷⵉ. ^■  

16 ⵎⴰⵢⴻⵎⵎⵉ ⴷⵉⵏ ⵉ ⵖⴰ ⵉⵍⵉⵏⵜ ⵜⵎⴻⵏⵢⴰⵜ ⴷⴻⴳ ⵓⴼⵓⵙ ⵏ ⵓⴱⵓⵀⴰⵍⵉ ⵎⴰⵃⴻⵏⴷ ⴰⴷ ⵉⵙⴻⵖ ⵜⵉⵖⵉⵜ,

ⴰⵎ ⵡⴰⵔ ⵖⴰⵔⴻⵙ ⵓⵍ ⵉ ⵎⴰⵏ ⴰⵢⴰ?

17 ⴰⵎⴻⴷⴷⵓⴽⴽⴻⵍ ⴷ ⵜⵉⴷⴻⵜⵜ ⵉⵜⵜⴻⵅⵙ ⵍⴻⴱⴷⴰ,

ⵓ ⵜⴰⵡⵎⴰⵜ ⵜᵉⵜⵜⵡⴰⵅⵍⴻⵇ-ⴷⴷ ⵉ ⵍⴻⵃⵚⴰⵔⴻⵜ.

18 ⴱⵏⴰⴷⴻⵎ ⵏⵏⵉ ⵡⴰⵔ ⵖⴰⵔ ⵉⴵⵉ ⵡⵓⵍ ⵉⵎⵜⴻⵏ, ⵉⵛⵛⴰⵜ ⴰⴼⵓⵙ,

ⵉⵜⵜⴻⴳⴳ ⵉⵅⴻⴼ ⵏⵏⴻⵙ ⴷ ⴰⴹⵎⴰⵏ ⵉ ⵓⵎⵇⴰⵔⵔⴻⴱ ⵏⵏⴻⵙ.

19 ⵡⴻⵏⵏⵉ ⵉⵜⵜⴻⵅⵙⴻⵏ ⴰⵅⴻⵟⵟⵓ, ⵉⵜⵜⴻⵅⵙ ⴰⵎⵛⵓⴱⴱⴻⵛ,

ⵡⴻⵏⵏⵉ ⵉⵜⵜⴻⴳⴳⴻⵏ ⵜⴰⵡⵡⴰⵔⵜ ⵏⵏⴻⵙ ⵜⴳⴻⵄⵄⴻⴷ, ⵢⴰⵔⴻⵥⵥⵓ ⵜⴰⵔⴻⵥⵥⵉⵜ. ^■  

20 ⵡⴻⵏⵏⵉ ⵖⴰⵔ ⵉⴵⴰ ⵓⵍ ⵉⴼⴰⵔⵖ, ⵡⴰⵔ ⵉⵜⵜⵉⴼ ⵎⵉⵏ ⵉⵚⴻⴱⵃⴻⵏ,

ⵡⴻⵏⵏⵉ ⵉⴼⴰⵔⵔⵖⴻⵏ ⵙ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⴷ ⵉⵡⴹⴰ ⴷⵉ ⴰⵔⵥⵉⵢⵢⴻⵜ.

21 ⵡⴻⵏⵏⵉ ⴷⴷ-ⵢⵓⵔⵡⴻⵏ ⵉⵊⵊ ⵏ ⵓⴱⵓⵀⴰⵍⵉ, ⵉⵜⵜⴰⵡⵉ-ⴷⴷ ⴰⵛⴹⴰⵏ ⵉ ⵢⵉⵅⴻⴼ ⵏⵏⴻⵙ,

ⴱⴰⴱⴰⵙ ⵏ ⵓⴱⵓⵀⴰⵍⵉ ⵡⴰⵔ ⵉⵥⴻⵎⵎⴰⵔ ⴰⴷ ⵉⴼⴰⵔⵃ.

22 ⵓⵍ ⵉⴼⴰⵔⵃⴻⵏ ⵉⵊⴻⴱⴱⴻⴷ ⴰⴳⴻⵏⴼⵓ,

ⵎⴰⵛⴰ ⴱⵓⵃⴱⴻⵍ ⵉⵛⴻⴹⵏⴻⵏ ⵉⵙⵙⴰⵥⴰⵖ ⵉⵅⵙⴰⵏ. ^■  

23 ⴰⵄⴻⴼⴼⴰⵏ ⴰⴷ ⴷⴷ-ⵉⴽⵙⵉ ⵜⴰⵔⵥⴻⴼⵜ ⵏ ⴰⵔⵔⴻⵛⵡⴻⵜ ⵥⴻⴳ ⵡⴻⵃⵙⵉⵏ,

ⵃⵉⵎⴰ ⴰⴷ ⵉⵙⵙⴼⴰⵔⵖ ⵉⵎⴻⵙⵔⴰⵇ ⵏ ⵍⵃⴻⵇⵇ.

24 ⴰⴼⴻⵀⵀⴰⵎ ⵉⵜⵜⴻⴳⴳ ⵜⵉⵖⵉⵜ ⵥⵥⴰⵜ ⵉ ⵜⵎⵓⵖⵍⵉ ⵏⵏⴻⵙ,

ⵎⴰⵛⴰ ⵜⵉⵟⵟⴰⵡⵉⵏ ⵏ ⵓⴱⵓⵀⴰⵍⵉ ⵜⵜⴰⵡⵢⴻⵏⵜ ⴰⵍ ⵟⵟⴰⵔⴼ ⵏ ⵜⴻⵎⵎⵓⵔⵜ. ^■  

25 ⵉⵊⵊ ⵏ ⵎⵎⵉⵙ ⴰⴱⵓⵀⴰⵍⵉ ⴷ ⵍⴻⵄⴷⴰⴱ ⵉ ⴱⴰⴱⴰⵙ,

ⴷ ⵉⵊⵊ ⵏ ⵍⴻⵃⵍⵉⵇ ⴰⵎⴻⵔⵥⴰⴳ ⵉ ⵡⴻⵏⵏⵉ ⵜ-ⵉ-ⴷⴷ ⵢⵓⵔⵡⴻⵏ. ^■  

26 ⴰⵡⴻⴷⴷⴻⴱ ⵏ ⵓⵎⵙⴻⴳⴳⴻⴷ ⵡⴰⵔ ⵉⴵⵉ ⵏⵉⵛⴰⵏ,

ⴰⵎⵎⵓ ⵓⵍⴰ ⴷ ⵜⵉⵢⵢⵉⵜⴰ ⵉ ⴰⵢⵜ ⵏ ⵟⵟⴰⵙⵉⵍⴻⵜ ⴷⵉ ⵙⵙⵉⴱⴱⴻⵜ ⵏ ⵍⴻⵚⴼⴰⵢⴻⵜ ⵏⵙⴻⵏ.

27 ⵡⴻⵏⵏⵉ ⵖⴰⵔ ⵜⴻⴵⴰ ⵜⵓⵙⵙⵏⴰ, ⵉⵎⴻⵏⵏⴻⵄ ⴰⵡⴰⵍⴻⵏ ⵏⵏⴻⵙ,

ⴰⵔⵢⴰⵥ ⴰⴼⴻⵀⵀⴰⵎ ⴷⴰⵢⴻⵙ ⴱⵓⵃⴱⴻⵍ ⵏⵏⴻⵙ ⵢⴰⵔⵙⴰ.

28 ⵓⵍⴰ ⴰⴱⵓⵀⴰⵍⵉ ⵉⵙⵙⵖⴰⴷⴻⵏ, ⴰⴷ ⵉⵜⵜⵡⴰⵃⵙⴻⴱ ⴷ ⴰⵎⵉⵖⵉⵙ,

ⵡⴻⵏⵏⵉ ⵉⴱⴻⵍⵍⵄⴻⵏ ⵉⵢⴻⵏⵛⵉⵛⴻⵏ ⵏⵏⴻⵙ ⴰⴷ ⵉⵜⵜⵡⴰⵃⵙⴻⴱ ⴷ ⴰⴼⴻⵜⵜⴰⵏ.