14
1 ⵜⵉⵖⵉⵜ ⵏ ⵜⴻⵎⵖⴰⵔⵉⵏ ⵜⴱⴻⵏⵏⴰ ⵜⴰⴷⴷⴰⵔⵜ ⵏⵏⴻⵙ, ⵎⴰⵛⴰ ⵜⵓⴱⴱⵓⵀⴻⵍⵢⴰ ⵜⵀⴻⴷⴷⴻⵎ ⵉ-ⵜⵜ ⵙ ⵉⴼⴰⵙⵙⴻⵏ ⵏⵏⴻⵙ.
2 ⵡⴻⵏⵏⵉ ⵉⴳⴳⵓⵔⴻⵏ ⴷⵉ ⵍⴻⵚⴼⴰⵢⴻⵜ ⵏⵏⴻⵙ, ⵉⵜⵜⴻⴳⴳⵯⴻⴷ ⵙⵉⴷⵉ,
ⵎⴰⵛⴰ ⵡⴻⵏⵏⵉ ⵉⵜⵜⴻⴼⴼⵖⴻⵏ ⵥⴻⴳ ⵉⴱⵔⵉⴷⴻⵏ ⵏⵏⴻⵙ, ⵉⵙⵙⴻⵃⵇⴰⵔⴰ ⵉ-ⵜ. ■
3 ⴷⴻⴳ ⵓⵇⴻⵎⵎⵓⵎ ⵏ ⵓⴱⵓⵀⴰⵍⵉ ⴷⵉⵏ ⵍⵎⴻⵛⵄⴻⴹ ⵉ ⵏⵏⴼⴰⵅⴻⵜ ⵏⵏⴻⵙ,
ⵎⴰⵛⴰ ⵉⵢⴻⵏⵛⵉⵛⴻⵏ ⵏ ⵉⵎⵉⵖⵉⵙⴻⵏ ⵃⴻⵟⵟⴰⵏ ⵜⴻⵏ.
4 ⵎⴰⵏⵉ ⵡⴰⵔ ⴵⵉⵏ ⵉⴼⵓⵏⴰⵙⴻⵏ, ⵉⵜⵜⵖⵉⵎⴰ ⵍⵎⴻⴷⵡⴻⴷ ⵉⵚⴼⴰ,
ⵎⴰⵛⴰ ⵙ ⵊⵊⴻⵀⴷ ⵏ ⵓⴼⵓⵏⴰⵙ ⴰⵇⴰ ⴷⵉⵏ ⵚⵚⴰⴱⴻⵜ ⵜⴻⵎⵖⴰⵔ.
5 ⴰⵛⴻⵀⵀⴰⴷ ⴷ ⵜⵉⴷⴻⵜⵜ ⵡⴰⵔ ⵉⵙⵙⵅⴰⵔⵔⵉⵇ ⵛⴰ,
ⵎⴰⵛⴰ ⴰⵛⴻⵀⵀⴰⴷ ⴱⵓ-ⵉⵅⴰⵔⵔⵉⵇⴻⵏ ⵉⵜⵜⵚⵓⴹ ⵉⵅⴰⵔⵔⵉⵇⴻⵏ. ■
6 ⵉ ⵓⵎⴻⵙⵜⴻⵀⵥⵉⵢ ⵡⴰⵔ ⴷⵉⵏ ⵜⵉⵖⵉⵜ ⵅⵎⵉ ⵜⵜ ⵢⴰⵔⴻⵥⵥⵓ,
ⵎⴰⵛⴰ ⵉ ⵓⴼⴻⵀⵀⴰⵎ ⵉⵀⵡⴻⵏ ⵅⴰⵙ, ⵎⴰⵃⴻⵏⴷ ⴰⴷ ⵢⴰⴼ ⵜⵓⵙⵙⵏⴰ.
7 ⴰⴳⴳⵯⴻⵊ ⵅ ⵡⴻⵔⵢⴰⵥ ⴰⴱⵓⵀⴰⵍⵉ,
ⵎⴰⵖⴰⵔ ⵛⴻⴽ ⵡⴰⵔ ⵖⴰⵔⴻⵙ ⵜᵉⵜⵜⵉⴼⴻⴷ ⵛⴰ ⵉⵢⴻⵏⵛⵉⵛⴻⵏ ⵉ ⵉⵙⵙⴰⵡⴰⵍⴻⵏ ⵜⵓⵙⵙⵏⴰ.
8 ⵜⵉⵖⵉⵜ ⵏ ⵡⴻⵏⵏⵉ ⵉⴼⴻⵜⵜⵏⴻⵏ ⴰⵇⴰ-ⵜⵜ ⴷ ⵍⴻⴼⵀⴰⵎⴻⵜ ⵏ ⵡⴻⴱⵔⵉⴷ ⵏ ⵢⵉⵅⴻⴼ ⵏⵏⴻⵙ,
ⵎⴰⵛⴰ ⵜⵓⴱⴱⵓⵀⴻⵍⵢⴰ ⵏ ⵉⴱⵓⵀⴰⵍⵉⵢⵢⴻⵏ ⴷ ⴰⵛⵎⴰⵜ.
9 ⵉⴱⵓⵀⴰⵍⵉⵢⵢⴻⵏ ⵙⵜⴻⵀⵥⴰⵏ ⵙ ⵡⴻⵄⴷⴰⵍ ⵏ ⵓⵎⴰⵔⵡⴰⵙ,
ⵎⴰⵛⴰ ⵊⴰⵔ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵉⵜⵜⵡⴰⴼ ⵍⵅⴰⴹⴰⵔ.
10 ⵓⵍ ⵉⵙⵙⴻⵏ ⵜⴰⵔⵥⵓⴳⵉ ⵏⵏⴻⵙ,
ⵍⴱⴰⵔⵔⴰⵏⵉ ⵡⴰⵔ ⵉⵥⴻⵎⵎⴰⵔ ⴰⴷ ⵢⴰⵛⴰ ⵙ ⵍⴻⴼⵔⴰⵃⴻⵜ ⵏⵏⴻⵙ.
11 ⵜⴰⴷⴷⴰⵔⵜ ⵏ ⵉⵄⴻⴼⴼⴰⵏⴻⵏ ⴰⴷ ⵜᵉⵜⵜⵡⴰⵔⴻⴷⴷⴻⴵ,
ⵎⴰⵛⴰ ⵜⴰⵇⵉⴹⵓⵏⵜ ⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵜⴻⵏⵏⴻⵡⴰⵔ.
12 ⴰⴷ ⵜⴰⵖ ⵉⵜⵜⵖⵉⵍ ⴰⵙ ⵉ ⵛⴰ ⵏ ⵢⵉⵊⵊⴻⵏ ⴰⵇⴰ ⴰⴱⵔⵉⴷ ⵏⵉⵛⴰⵏ,
ⵎⴰⵛⴰ ⴰⵏⴻⴳⴳⴰⵔ ⵏⵏⴻⵙ ⵎⵖⵉⵔ ⵉⴱⵔⵉⴷⴻⵏ ⵉⵜⵜⴰⵡⵢⴻⵏ ⵖⴰⵔ ⵍⵎⴻⵡⵜ. ■
13 ⵡⴰⵅⵅⴰ ⵖⴰⵔ ⵡⴻⴹⵃⴰⵛ ⵓⵍ ⵉⵜⵜⴻⴳⴳ ⵍⴻⵃⵔⵉⵇ,
ⵓ ⴰⵏⴻⴳⴳⴰⵔⵓ ⵏ ⵍⴻⴼⵔⴰⵃⴻⵜ ⵜᵉⵜⵜⴰⴽⴽⵡⴰⴹ-ⴷⴷ ⴰⵛⴹⴰⵏ. ■
14 ⵡⴻⵏⵏⵉ ⵖⴰⵔ ⵉⴵⴰ ⵡⵓⵍ ⵉⴼⴼⵖⴻⵏ ⵥⴻⴳ ⵡⴻⴱⵔⵉⴷ,
ⴰⴷ ⵉⵜⵜⵡⴰⵙⵢⵉⵡⴻⵏ ⵙ ⵉⴱⵔⵉⴷⴻⵏ ⵏⵏⴻⵙ,
ⵓ ⴰⵔⵢⴰⵥ ⴰⵚⴻⴱⵃⴰⵏ ⵙ ⵢⵉⵅⴻⴼ ⵏⵏⴻⵙ. ■
15 ⵡⴻⵏⵏⵉ ⵉⴵⴰⵏ ⴷ ⴰⵃⴰⴼⵉ, ⵉⵜⵜⴰⵎⴻⵏ ⴷⵉ ⴽⵓⵍ ⴰⵡⴰⵍ,
ⵎⴰⵛⴰ ⵡⴻⵏⵏⵉ ⵉⴼⴻⵜⵜⵏⴻⵏ ⵉⵃⴻⵟⵟⴰ ⴰⵚⵓⵔⵉⴼ ⵏⵏⴻⵙ.
16 ⴰⵎⵉⵖⵉⵙ ⵉⵜⵜⴻⴳⴳⵯⴻⴷ ⵓ ⵉⵜⵜⵃⴻⵢⵢⴰⴷ ⵅ ⵍⵖⴰⵔ,
ⵎⴰⵛⴰ ⴰⴱⵓⵀⴰⵍⵉ ⵉⵙⴻⵄⵄⴰⵔ, ⵓⵎⵉ ⵉⵜⵜⵖⵉⵍ ⴰⵙ ⴰⵇⴰ-ⵜ ⴷⵉ ⵍⴰⵎⴰⵏ.
17 ⵡⴻⵏⵏⵉ ⵉⵜⵜⵅⴻⵢⵢⴰⵇⴻⵏ ⴷⴻⵖⵢⴰ, ⴰⴷ ⵉⴳⴳ ⵜⵓⴱⴱⵓⵀⴻⵍⵢⴰ,
ⵓ ⴰⵔⵢⴰⵥ ⵉⵏⴻⴽⴽⵡⴰⵏ ⵜⴰⵃⵔⴰⵢⵎⴻⵛⵜ, ⴰⴷ ⵉⵜⵜⵡⴰⵛⴰⵔⵀ.
18 ⵉⵃⴰⴼⵉⵢⵢⴻⵏ ⴰⴷ ⵡⴰⵔⵜⴻⵏ ⵜⵓⴱⴱⵓⵀⴻⵍⵢⴰ,
ⵎⴰⵛⴰ ⵉⵏⵏⵉ ⵉⴼⴻⵜⵜⵏⴻⵏ, ⴰⴷ ⵜⴻⵏ ⵜⴻⵡⵡⵊⴻⵏ ⵙ ⵜⵓⵙⵙⵏⴰ.
19 ⵉⵄⴻⴼⴼⴰⵏⴻⵏ ⵜⵜⴰⴹⴰⵔⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵉⵚⴻⴱⵃⴰⵏⴻⵏ,
ⵓ ⵉⵄⴻⴼⴼⴰⵏⴻⵏ ⵥⵥⴰⵜ ⵉ ⵜⴻⵡⵡⵓⵔⴰ ⵏ ⵉⵎⵙⴻⴳⴳⴰⴷⴻⵏ.
20 ⴰⵎⴻⵥⵍⵓⴹ ⵉⵛⴰⵔⵔⴻⵀ ⵉ-ⵜ ⵄⴰⴷ ⵓⵎⴻⴷⴷⵓⴽⴽⴻⵍ ⵏⵏⴻⵙ,
ⵎⴰⵛⴰ ⴰⵟⵟⴰⵙ ⴷ ⵉⵏⵏⵉ ⵉⵜⵜⴻⵅⵙⴻⵏ ⴰⵢⵜ ⵏ ⴱⵓ-ⵡⴰⴳⵍⴰ. ■
21 ⵡⴻⵏⵏⵉ ⵉⵙⵙⴻⵃⵇⴰⵔⴰⵏ ⴰⵎⵇⴰⵔⵔⴻⴱ ⵏⵏⴻⵙ, ⵉⵜⵜⴻⴳⴳ ⴷⴷⵏⵓⴱ,
ⵎⴰⵛⴰ ⵙⵙⴻⵄⴷ ⵏ ⵡⴻⵏⵏⵉ ⵉⵜⵜⵃⵉⵏⵏⴰⵏ ⵅ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ.
22 ⵉⵏⵏⵉ ⴷⴷ-ⵉⵅⴻⴵⵇⴻⵏ ⵍⵖⴰⵔ, ⵎⴰ ⵡⴰⵔ ⵜⵜⵡⴻⴷⴷⴰⵔⵉⵏ ⵏⵉⵜⵏⵉ?
ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⴰⵇⴰ ⵖⴰⵔ ⵢⴻⵏⵏⵉ ⵉⵜⵜⵅⴰⵔⵔⴰⵚⴻⵏ ⴷⵉ ⵎⵉⵏ ⵉⵚⴻⴱⵃⴻⵏ. ■
23 ⴷⵉ ⵎⴰⵔⵔⴰ ⵍⵡⴻⵃⵍⴰⵏ ⵏ ⵡⴰⵔⴱⴻⵔ ⴷⴰⵢⴻⵙ ⵍⴻⴼⴹⴻⵍ,
ⵎⴰⵛⴰ ⵍⵀⴰⵔⴷ ⵏ ⵉⵢⴻⵏⵛⵉⵛⴻⵏ ⵉⵏⴻⴷⴷⴻⵀ ⵖⴰⵔ ⵡⴻⵃⵡⴰⵊ ⵡⴰⵀⴰ. □
24 ⵜⵜⴰⵊ ⵏ ⵉⵎⵉⵖⵉⵙⴻⵏ ⴷ ⴰⴳⵍⴰ ⵏⵙⴻⵏ,
ⵜⵓⴱⴱⵓⵀⴻⵍⵢⴰ ⵏ ⵉⴱⵓⵀⴰⵍⵉⵢⵢⴻⵏ ⴷ ⵜⵓⴱⴱⵓⵀⴻⵍⵢⴰ ⵡⴰⵀⴰ.
25 ⴰⵛⴻⵀⵀⴰⴷ ⴰⵎⵜⵉⵇⵇⵉ ⵉⵙⵙⴻⵏⵊⴰⵎ ⵍⴻⵄⵎⵓⵔ,
ⵎⴰⵛⴰ ⵡⴻⵏⵏⵉ ⵢⴰⵔⴻⵅⵅⵓⵏ ⵉ ⵉⵅⴰⵔⵔⵉⵇⴻⵏ, ⵉⵛⴻⵎⵎⴻⵜ.
26 ⴷⵉ ⵜⵉⴳⴳⵯⵓⴷⵉ ⵏ ⵙⵉⴷⵉ ⴷⴰⵢⴻⵙ ⵜⵜⵉⵇⴻⵜ ⵉⵊⴻⵀⴷⴻⵏ,
ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ ⵉ ⵉⵃⴻⵏⵊⵉⵔⴻⵏ ⵏⵏⴻⵙ.
27 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⵍⵄⵓⵏⵚⴰⵔ ⵏ ⵜⵓⴷⴰⵔⵜ,
ⵉ ⵓⵙⴻⵏⵊⴻⵎ ⵥⴻⴳ ⵉⵛⴻⴷⴷⵉⵢⴻⵏ ⵏ ⵍⵎⴻⵡⵜ. ■
28 ⴷⴻⴳ ⵡⴰⵟⵟⴰⵙ ⵏ ⵍⴳⴻⵏⵙ ⵉⵅⴻⵎⵎⴻⵍ ⵓⵛⴻⵡⵡⴰⵔ ⵏ ⵓⵊⴻⴵⵉⴷ,
ⵎⴰⵛⴰ ⴷⵉ ⴷⵔⵓⵙ ⵏ ⵛⵛⴻⵄⴱ ⵉⵅⴻⵎⵎⴻⵍ ⵓⵀⴻⵍⵍⴻⴽ ⵏ ⵍⵃⴰⴽⴻⵎ.
29 ⵡⴻⵏⵏⵉ ⵖⴰⵔ ⵉⴵⴰ ⵜⵜⴰⵙⵉⵄ ⵏ ⵍⵅⴰⴹⴰⵔ, ⵖⴰⵔⴻⵙ ⵍⴻⴼⵀⴰⵎⴻⵜ ⵜⴻⵎⵖⴰⵔ,
ⵎⴰⵛⴰ ⵡⴻⵏⵏⵉ ⴷⵉ ⵉⴵⴰ ⴱⵓⵃⴱⴻⵍ ⵉⵃⵚⴰⵔⴻⵏ ⵉⵙⵙⴻⴽⴽⴰⵔ ⵜⵓⴱⴱⵓⵀⴻⵍⵢⴰ.
30 ⴰⵔⵥⴰⵎ ⵏ ⵡⵓⵍ ⴰⵇⴰ ⴷ ⵜⵓⴷⴰⵔⵜ ⵉ ⴰⵔⵔⵉⵎⴻⵜ,
ⵎⴰⵛⴰ ⵜⵓⵙⵎⵉ ⴷ ⴰⵔⴻⵚⵚⵓⴹ ⵏ ⵢⴻⵅⵙⴰⵏ.
31 ⵡⴻⵏⵏⵉ ⵉⵃⴻⵚⵚⴰⵔⴻⵏ ⴰⵎⴻⵃⴷⴰⵊ, ⵉⵙⵙⴻⵃⵇⴰⵔⴰ ⵡⴻⵏⵏⵉ ⵜ ⵉ-ⴷⴷ-ⵉⵅⴻⵍⵇⴻⵏ,
ⵎⴰⵛⴰ ⵡⴻⵏⵏⵉ ⵉⵜⵜⵃⵉⵏⵏⴰⵏ ⵅ ⵓⵎⴻⵥⵍⵓⴹ, ⵉⵜⵜⵛⴻⵏⵏⴻⵄ ⵉ-ⵜ. ■
32 ⴰⵄⴻⴼⴼⴰⵏ ⵉⵜⵜⴰⵥⵥⴻⵍ ⵅ ⵢⵉⵅⴻⴼ ⵏⵏⴻⵙ ⵙ ⵍⵖⴰⵔ ⵏⵏⴻⵙ ⵉ ⵉⵜⵜⴻⴳⴳ,
ⵎⴰⵛⴰ ⴰⵎⵙⴻⴳⴳⴻⴷ ⵉⵜⵜⵖⵉⵎⴰ ⵉⵜⵜⵛⴻⵍ ⵄⴰⴷ ⴷⵉ ⵍⵎⴻⵡⵜ ⵏⵏⴻⵙ.
33 ⵜⵉⵖⵉⵜ ⵜⴰⵔⵙⴰ ⴷⴻⴳ ⵡⵓⵍ ⵏ ⵉⴼⴻⵀⵀⴰⵎⴻⵏ,
ⵎⴰⵛⴰ ⵎⵉⵏ ⵉⴵⴰⵏ ⴷⴰⵅⴻⵍ ⴷⴻⴳ ⵉⴱⵓⵃⴰⵔⵉⵢⵢⴻⵏ ⴳⴳⵓⵔ ⴰⴷ ⵉⵜⵜⵡⴰⵙⵙⵏⴻⵏ. ■
34 ⵜⴰⵙⴻⴳⴷⴰ ⵜⴻⵙⵙⵄⵓⴵⴰ ⵍⴳⴻⵏⵙ,
ⵎⴰⵛⴰ ⵍⴻⴼⴹⵉⵃⴻⵜ ⵏ ⵛⵛⵓⵄⵓⴱ ⴷ ⴷⴷⵏⵓⴱ.
35 ⵍⵅⴰⴹⴰⵔ ⵏ ⵓⵊⴻⴵⵉⴷ ⵢⴰⵔⵙⴰ ⵅ ⵓⵎⵙⴻⵅⵅⴰⵔ ⵉⴼⴻⵀⵀⵎⴻⵏ
ⵎⴰⵛⴰ ⵡⴻⵏⵏⵉ ⵉⴼⴻⵟⵟⵃⴻⵏ ⵉⵍⴻⵇⵇⴻⴼ ⵉ-ⵜ ⵓⴷⵓⵇⵇⴻⵥ ⵏⵏⴻⵙ ⵏ ⵓⴼⵓⴳⴻⵎ.