13
1 ⵉⵊⵊ ⵏ ⵎⵎⵉⵙ ⴷ ⴰⵎⵉⵖⵉⵙ ⴰⵇⴰ ⵜ ⴷ ⵚⵚⵉⴼⴻⵜ ⵏ ⵓⵡⴻⴱⴱⴻⵅ ⵏ ⴱⴰⴱⴰⵙ, ⵎⴰⵛⴰ ⴰⵎⴻⵙⵜⴻⵀⵥⵉⵢ ⵡⴰⵔ ⵉⵜⵜⴻⵙⵍⵉ ⵖⴰⵔ ⵓⵜⴻⵅⵜⵉⵅ.
2 ⵣⵉ ⵍⵖⵉⴵⴻⵜ ⵏ ⵡⴰⵡⴰⵍⴻⵏ ⵏⵏⴻⵙ ⴰⴷ ⵢⴻⵛⵛ ⴱⵏⴰⴷⴻⵎ ⵍⵅⴰⵔ,
ⵎⴰⵛⴰ ⵍⴻⵄⵎⴰⵔ ⵏ ⵉⵖⴻⴷⴷⴰⵔⴻⵏ ⴰⴷ ⵢⴻⵛⵛ ⵍⵄⵓⵏⴼ. ■
3 ⵡⴻⵏⵏⵉ ⵢⴻⵙⵙⴰⵔⴻⵏ ⴰⵇⴻⵎⵎⵓⵎ ⵏⵏⴻⵙ, ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ,
ⵎⴰⵛⴰ ⵡⴻⵏⵏⵉ ⵢⴰⵔⴻⵥⵥⵎⴻⵏ ⵉⵢⴻⵏⵛⵉⵛⴻⵏ ⵏⵏⴻⵙ ⴰⵟⵟⴰⵙ, ⵉⵜⵜⵔⴰⵊⴰ ⵜ ⵓⵀⴻⵍⵍⴻⴽ.
4 ⵍⴻⵄⵎⴰⵔ ⵏ ⵓⵎⴻⵄⴳⵓⵥ ⵢⴰⵔⵊⴻⴼ, ⵡⴰⵅⵅⴰ ⴰⵢⴰ ⵡⴰⵔ ⵉⵏⴻⴼⴼⴻⵄ ⴷⵉ ⵡⴰⵍⵓ,
ⵎⴰⵛⴰ ⵍⴻⵄⵎⴰⵔ ⵏ ⵢⵉⵏⵏⵉ ⵉⵜⵜⵛⴻⵟⵟⴰⵔⴻⵏ ⴰⴷ ⵜⵜⵡⴰⵙⵢⵉⵡⵏⴻⵏ.
5 ⴰⵡⴰⵍⴻⵏ ⵏ ⵉⵅⴰⵔⵔⵉⵇⴻⵏ ⵉⵛⴰⵔⵔⴻⵀ ⵉ-ⵜⴻⵏ ⵓⵎⵙⴻⴳⴳⴻⴷ,
ⵎⴰⵛⴰ ⴰⵄⴻⴼⴼⴰⵏ ⵉⵙⵙⴰⵔⵥⴰⴳ ⵉⵅⴻⴼ ⵏⵏⴻⵙ ⵓ ⵉⵙⵙⴼⴻⵟⵟⴰⵃ ⵉⵏⵏⴻⵖⵏⵉ.
6 ⵜⴰⵙⴻⴳⴷⴰ ⵜⵃⴻⵟⵟⴰ ⵡⴻⵏⵏⵉ ⵉⴳⴳⵓⵔⴻⵏ ⴰⴱⵔⵉⴷ ⵏⵏⴻⵙ ⵏⵉⵛⴰⵏ,
ⵎⴰⵛⴰ ⵜⵓⵄⴻⴼⴼⵏⴰ ⴰⴷ ⵜ ⵉⵙⵙⵀⴻⵍⵍⴻⴽ ⴰⵎⴻⴷⵏⵓⴱ. ■
7 ⴰⵇⴰ ⴷⵉⵏ ⵉⵏⵏⵉ ⵉⵜⵜⴰⵔⵔⴰⵏ ⵉⵅⴻⴼ ⵏⵙⴻⵏ ⴷ ⴱⵓ-ⵡⴰⴳⵍⴰ ⵡⴰⵅⵅⴰ ⵡⴰⵔ ⵖⴰⵔⵙⴻⵏ ⵡⴰⵍⵓ,
ⵓ ⴰⵇⴰ ⴷⵉⵏ ⵉⵏⵏⵉ ⵉⵜⵜⴰⵔⵔⴰⵏ ⵉⵅⴻⴼ ⵏⵙⴻⵏ ⴷ ⵉⵎⴻⵥⵍⴰⴹ, ⵡⴰⵅⵅⴰ ⵖⴰⵔⵙⴻⵏ ⴰⵟⵟⴰⵙ. ■
8 ⴷⴷⴻⵢⵢⴻⵜ ⵉ ⵍⴻⵄⵎⴰⵔ ⵏ ⵛⴰ ⵏ ⵢⵉⵊⵊⴻⵏ ⴷ ⴰⴳⵍⴰ ⵏⵏⴻⵙ,
ⵎⴰⵛⴰ ⴰⵎⴻⵥⵍⵓⴹ ⵡⴰⵔ ⵉⵜⵜⴻⵙⵍⵉ ⵛⴰ ⵓⵍⴰ ⴷ ⵉⵊⵊ ⵏ ⵓⵀⵓⴷⴷⵉ.
9 ⵜⴰⴼⴰⵡⵜ ⵏ ⵉⵎⵙⴻⴳⴳⴰⴷⴻⵏ ⴳⴳⵓⵔ ⴰⴷ ⵜⴰⵔⵖ ⵙ ⵍⴻⴼⵔⴰⵃⴻⵜ,
ⵎⴰⵛⴰ ⵍⴻⴼⵏⴰⵔ ⵏ ⵉⵄⴻⴼⴼⴰⵏⴻⵏ ⴰⴷ ⵉⵅⵙⵉ. ■
10 ⵣⵉ ⵜⵏⴻⴼⵙⴻⵛⵜ ⵉⵜⵜⴰⵙ-ⴷⴷ ⵎⵖⵉⵔ ⵓⵎⴻⵏⵖⵉ,
ⵎⴰⵛⴰ ⵉⵏⵏⵉ ⵉⴽⴻⵙⵙⵉⵏ ⴰⵛⴰⵡⴰⵔ, ⵖⴰⵔⵙⴻⵏ ⵜⵉⵖⵉⵜ.
11 ⴰⴳⵍⴰ ⵏ ⴷⴻⵖⵢⴰ, ⴰⴷ ⵢⵉⵍⵉ ⴷⵔⵓⵙ,
ⵎⴰⵛⴰ ⵡⴻⵏⵏⵉ ⵉⵢⴰⵔⵔⵡⴻⵏ ⵙ ⵓⴼⵓⵙ, ⴰⴷ ⵢⴰⵔⴱⴻⵃ. ■
12 ⵍⴰⵢⴰⵙ ⵢⵓⵢⵍⴻⵏ ⵉⵙⵙⵄⵉⴵⴰ ⵓⵍ,
ⵎⴰⵛⴰ ⵜⵡⴰⵔⵔⵉⵜ ⵏ ⵎⴻⵥⵔⵉ ⵉⵛⵛⵓⵔⴻⵏ, ⴰⵇⴰ ⵜⵜ ⴷ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ. □
13 ⵡⴻⵏⵏⵉ ⵉⵙⵙⴻⵃⵇⴰⵔⴰⵏ ⴰⵡⴰⵍ, ⴰⴷ ⵥⵥⴰⵢⴻⵙ ⵉⵜⵜⵡⴰⵇⵇⴻⵏ,
ⵎⴰⵛⴰ ⵡⴻⵏⵏⵉ ⵉⵜⵜⴻⴳⴳⵯⴻⴷⴻⵏ ⵜⴰⵡⵚⴻⵢⵢⴻⵜ, ⴳⴳⵓⵔ ⴰⴷ ⵉⵜⵜⵡⴰⵅⴻⴵⴻⵚ.
14 ⵜⴰⵖⵓⵔⵉ ⵏ ⵓⵎⵉⵖⵉⵙ ⴷ ⵍⵄⵓⵏⵚⴰⵔ ⵏ ⵜⵓⴷⴰⵔⵜ,
ⵎⴰⵃⴻⵏⴷ ⴰⴷ ⵢⴰⵍⵡⴻⵍ ⴱⵏⴰⴷⴻⵎ ⵉ ⵍⴻⴼⵅⵓⵅ ⵏ ⵍⵎⴻⵡⵜ. ■
15 ⵍⴻⵄⵇⴻⵍ ⵉⵚⴻⴱⵃⴻⵏ ⵉⵜⵜⴰⵡⵉ-ⴷⴷ ⴰⵔⴹⴰ,
ⵎⴰⵛⴰ ⴰⴱⵔⵉⴷ ⵏ ⵉⵖⴻⴷⴷⴰⵔⴻⵏ ⴰⵇⴰ ⵉⵇⵙⴻⵃ ⴰⵟⵟⴰⵙ.
16 ⴽⵓⵍ ⵉⵊⵊⴻⵏ ⵡⴻⵏⵏⵉ ⵉⴼⴻⵜⵜⵏⴻⵏ, ⵉⵅⴻⴷⴷⴻⵎ ⵙ ⵜⵓⵙⵙⵏⴰ,
ⵎⴰⵛⴰ ⴰⴱⵓⵀⴰⵍⵉ ⵉⵜⵜⴱⴻⵥⵥⴰⵄ ⵜⴰⵖⵢⵓⵍⵉ ⵏⵏⴻⵙ.■
17 ⴰⵎⵙⴻⵅⵅⴰⵔ ⴰⵄⴻⴼⴼⴰⵏ ⵉⵡⴻⵟⵟⴰ ⴷⵉ ⵍⵖⴰⵔ,
ⵎⴰⵛⴰ ⴰⵎⵙⴻⵅⵅⴰⵔ ⴷ ⴰⵎⵜⵉⵇⵇⵉ ⵉⵜⵜⴰⵡⵉ-ⴷⴷ ⴰⴳⴻⵏⴼⵓ.
18 ⵣⵥⵍⴻⴹ ⴷ ⵍⴻⴼⴹⵉⵃⴻⵜ ⴰⵇⴰ ⴰⵜⴻⵏ ⵉ ⵡⴻⵏⵏⵉ ⵢⵓⴳⵉⵏ ⵜⵜⴰⵔⴱⵉⵢⵢⴻⵜ,
ⵎⴰⵛⴰ ⵡⴻⵏⵏⵉ ⵉⴽⵙⵉⵏ ⴰⵡⴻⴱⴱⴻⵅ ⵖⴰⵔ ⵡⵓⵍ ⵏⵏⴻⵙ, ⴳⴳⵓⵔ ⴰⴷ ⵉⵜⵜⵡⴰⵡⴻⵇⵇⴰⵔ.
19 ⵉⵊⵊ ⵏ ⵓⵙⵉⵜⴻⵎ ⵉⵛⵛⵓⵔⴻⵏ ⴷ ⴰⵎⵉⵥⵉⴷ ⵉ ⵍⴻⵄⵎⴰⵔ,
ⵎⴰⵛⴰ ⵉ ⵉⴱⵓⵀⴰⵍⵉⵢⵢⴻⵏ ⴷ ⵏⵏⵄⵉ ⵎⴰⵃⴻⵏⴷ ⴰⴷ ⵃⴻⵢⵢⴷⴻⵏ ⵅ ⵍⵖⴰⵔ.
20 ⵡⴻⵏⵏⵉ ⵉⴳⴳⵓⵔⴻⵏ ⴰⴽ-ⴷ ⵉⵎⵉⵖⵉⵙⴻⵏ, ⴰⴷ ⵉⴷⵡⴻⵍ ⴷ ⴰⵎⵉⵖⵉⵙ,
ⵎⴰⵛⴰ ⵡⴻⵏⵏⵉ ⵉⵜⵜⴻⵎⵚⵓⵔⵔⵓⴼⴻⵏ ⴰⴽ-ⴷ ⵉⴱⵓⵀⴰⵍⵉⵢⵢⴻⵏ ⴰⴷ ⵜ ⵉⵍⵇⴻⴼ ⴷⴷⴻⴵ.
21 ⵍⵖⴰⵔ ⴰⴷ ⵉⴹⴼⴰⵔ ⵉⵎⴻⴷⵏⴰⴱ,
ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵜ ⵅⴻⴵⴹⴻⵏ ⵙ ⵍⵅⴰⵔ.
22 ⵡⴻⵏⵏⵉ ⵉⵚⴻⴱⵃⴻⵏ ⵉⵜⵜⴻⵊⵊⴰ ⵉ ⵡⴰⵢⵢⴰⵡⴻⵏ ⵏⵏⴻⵙ ⵜⴰⵙⵖⴰⵔⵜ,
ⵎⴰⵛⴰ ⴰⴳⵍⴰ ⵏ ⴰⵢⵜ-ⴱⵓ-ⴷⴷⵏⵓⴱ ⵉⵜⵜⵡⴰⵅⴻⵎⵎⴻⵍ ⵉ ⵓⵎⵙⴻⴳⴳⴻⴷ. ■
23 ⴰⵔⴱⴻⵔ ⵏ ⵉⵎⴻⵥⵍⴰⴹ ⵉⵜⵜⴰⵡⵉ-ⴷⴷ ⵎⴰⵛⵛⴰ ⵙ ⵡⴰⵟⵟⴰⵙ,
ⵎⴰⵛⴰ ⴰⵇⴰ ⴷⵉⵏ ⵉⵏⵏⵉ ⵉⵜⵜⵡⴰⵀⴻⵍⵍⴽⴻⵏ ⵍⴰⵎⵉ ⴷⵉⵏ ⴰⵏⵇⴰⵙ ⵏ ⵍⵃⴻⵇⵇ. ■
24 ⵡⴻⵏⵏⵉ ⵉⵎⴻⵏⵏⵄⴻⵏ ⴰⵄⵎⵓⴷ ⵏⵏⴻⵙ, ⵉⵛⴰⵔⵀ ⵎⵎⵉⵙ,
ⵎⴰⵛⴰ ⵡⴻⵏⵏⵉ ⵜ ⵉⵜⵜⴻⵅⵙⴻⵏ, ⵉⵜⵜⴻⴽⴽⴰⵔ ⴰⴽⵉⴷⴻⵙ ⵉⵜⵜⵡⴻⴱⴱⴻⵅ ⵉ-ⵜ ⴷⵉ ⵍⵡⴻⵇⵜ. ■
25 ⴰⵎⵙⴻⴳⴳⴻⴷ ⴰⴷ ⵉⵛⵛ ⴰⵍ ⵖⴰ ⵉⵊⵊⴰⵡⴻⵏ ⵍⴻⵄⵎⴰⵔ ⵏⵏⴻⵙ,
ⵎⴰⵛⴰ ⴰⵄⴻⴷⴷⵉⵙ ⵏ ⵉⵄⴻⴼⴼⴰⵏⴻⵏ ⴰⴷ ⵉⵇⵇⵉⵎ ⵉⵜⵜⴻⵃⵡⴰⵊⴰ ⵍⴻⴱⴷⴰ.