12
1 ⵡⴻⵏⵏⵉ ⵉⵜⵜⴻⵅⵙⴻⵏ ⵜⵜⴰⵔⴱⵉⵢⵢⴻⵜ, ⵉⵜⵜⴻⵅⵙ ⵜⵓⵙⵙⵏⴰ, ⵎⴰⵛⴰ ⵡⴻⵏⵏⵉ ⵉⵛⴰⵔⵔⵀⴻⵏ ⴰⵡⴻⴱⴱⴻⵅ ⴰⵇⴰ ⵏⴻⵜⵜⴰ ⴷ ⴰⵇⴻⴼⴼⵓⵃ.
2 ⴱⵏⴰⴷⴻⵎ ⴷ ⴰⵚⴻⴱⵃⴰⵏ ⵉⵜⵜⴰⴼ ⴰⵔⴹⴰ ⵏ ⵙⵉⴷⵉ,
ⵎⴰⵛⴰ ⴰⵔⵢⴰⵥ ⵉⵏⴻⴽⴽⵡⴰⵏ ⵜⴰⵃⵔⴰⵢⵎⴻⵛⵜ ⴰⴷ ⵜ ⵉⴱⴰⵔⵔⴻⵃ ⴷ ⴱⵓ-ⵓⵎⴰⵔⵡⴰⵙ.
3 ⴱⵏⴰⴷⴻⵎ ⵡⴰⵔ ⵉⵥⴻⵎⵎⴰⵔ ⴰⴷ ⵉⵇⵇⵉⵎ ⵉⴱⴻⴷⴷ ⵓⵎⵉ ⵉⵜⵜⴻⴳⴳ ⵍⵖⴰⵔ,
ⵎⴰⵛⴰ ⴰⵥⵡⴰⵔ ⵏ ⵉⵎⵙⴻⴳⴳⴰⴷⴻⵏ ⵡⴰⵔ ⵉⵥⴻⵎⵎⴰⵔ ⴰⴷ ⵉⵏⵀⴻⵥⵥ. ■
4 ⵜⴰⵎⵖⴰⵔⵜ ⵉⵎⴻⵃⴹⴻⵏ ⴷ ⵜⵜⴰⵊ ⵏ ⵡⴻⵔⵢⴰⵥ ⵏⵏⴻⵙ,
ⵎⴰⵛⴰ ⵜⴻⵏⵏⵉ ⵜ ⵢⴰⵔⵔⵉⵏ ⵉⵜⵜⵙⴻⴹⵃⴰ, ⴷ ⵜⴻⵏⵏⵉ ⴰⵎ ⵡⴰⵔⴻⵚⵚⵓⴹ ⴷⴻⴳ ⵉⵅⵙⴰⵏ ⵏⵏⴻⵙ. ■
5 ⵉⵅⴻⵎⵎⵉⵎⴻⵏ ⵏ ⵉⵎⵙⴻⴳⴳⴰⴷⴻⵏ ⴷ ⵍⵃⴻⵇⵇ,
ⵎⴰⵛⴰ ⵉⵅⴰⵔⵔⵉⵚⴻⵏ ⵏ ⵉⵄⴻⴼⴼⴰⵏⴻⵏ ⴷ ⵍⵖⴻⵛⵛ ⵎⴰⵔⵔⴰ.
6 ⴰⵡⴰⵍⴻⵏ ⵏ ⵉⵄⴻⴼⴼⴰⵏⴻⵏ ⵍⴻⴱⵜⴻⵏ ⴷⴻⴳ ⵉⴷⴰⵎⵎⴻⵏ,
ⵎⴰⵛⴰ ⴰⵇⴻⵎⵎⵓⵎ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴳⴳⵓⵔ ⴰⴷ ⵜⴻⵏ ⵉⵙⵙⴻⵏⵊⴻⵎ.■
7 ⵉⵄⴻⴼⴼⴰⵏⴻⵏ ⵜⵜⵏⴻⵇⵍⴰⴱⴻⵏ ⵓ ⵡⴰⵔ ⴵⵉⵏ ⵄⴰⴷ,
ⵎⴰⵛⴰ ⵜⴰⴷⴷⴰⵔⵜ ⵏ ⵉⵎⵙⴻⴳⴳⴰⴷⴻⵏ ⴳⴳⵓⵔ ⴰⴷ ⵜⴻⵇⵇⵉⵎ ⵜⴱⴻⴷⴷ. ■
8 ⵉⵜⵜⵡⴰⵙⵙⴻⵎⵖⴰⵔ ⴱⵏⴰⴷⴻⵎ ⵄⵍⴰⵃⵙⴰⴱ ⵍⵇⴻⴷⴷ ⵏ ⵍⴻⵄⵇⴻⵍ ⵏⵏⴻⵙ,
ⵎⴰⵛⴰ ⵡⴻⵏⵏⵉ ⴷⵉ ⵉⴵⴰ ⵡⵓⵍ ⵉⴼⴰⵔⵖⴻⵏ, ⴰⴷ ⵉⵜⵜⵡⴰⵙⵙⴻⵃⵇⴰⵔ.
9 ⵉⵃⵍⴰ ⵡⴻⵏⵏⵉ ⵡⴰⵔ ⵉⵃⴻⵙⵙⴱⴻⵏ ⵅ ⵉⵅⴻⴼ ⵏⵏⴻⵙ ⴰⵟⵟⴰⵙ, ⵎⴰⵛⴰ ⵖⴰⵔⴻⵙ ⵉⵊⵊ ⵏ ⵓⵎⵙⴻⵅⵅⴰⵔ,
ⵅ ⵡⴻⵏⵏⵉ ⵉⵜⵜⵛⴻⵏⵏⵄⴻⵏ ⵙ ⵉⵅⴻⴼ ⵏⵏⴻⵙ, ⵎⴰⵛⴰ ⴰⵖⵔⵓⵎ ⵡⴰⵔ ⵖⴰⵔⴻⵙ ⵢⴻⴵⵉ. ■
10 ⴰⵎⵙⴻⴳⴳⴻⴷ ⵉⵙⵙⴻⵏ ⵍⴻⵄⵎⴰⵔ ⵏ ⵍⴻⴱⵀⵉⵎⴻⵜ ⵏⵏⴻⵙ,
ⵎⴰⵛⴰ ⴰⵔⵔⴻⵃⵎⴰⵜ ⵏ ⵓⵄⴻⴼⴼⴰⵏ ⵇⴻⵙⵃⴻⵏⵜ. ■
11 ⵡⴻⵏⵏⵉ ⵉⵛⴰⵔⵔⵥⴻⵏ ⵜⴰⵎⵎⵓⵔⵜ ⵏⵏⴻⵙ, ⴰⴷ ⵉⵊⵊⴰⵡⴻⵏ ⵙ ⵡⴻⵖⵔⵓⵎ,
ⵎⴰⵛⴰ ⵡⴻⵏⵏⵉ ⵢⴰⵔⴻⴷⴷⴼⴻⵏ ⵎⵉⵏ ⵉⴵⴰⵏ ⵉⵅⵡⴰⵏ, ⵡⴰⵔ ⵖⴰⵔⴻⵙ ⵛⴰ ⵡⵓⵍ ⵉⵎⵜⴻⵏ. ■
12 ⴰⵄⴻⴼⴼⴰⵏ ⵉⵜⵜⴻⵅⵙ ⵎⵉⵏ ⵉⴵⴰⵏ ⴷⵉ ⵜⵔⴰⵛⵛⴰ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ,
ⵎⴰⵛⴰ ⴰⵥⵡⴰⵔ ⵏ ⵉⵎⵙⴻⴳⴳⴰⴷⴻⵏ ⵉⵜⵜⵖⵉⵎⴰ ⵉⵜⵜⵉⵛ ⵍⵖⵉⴵⴻⵜ.
13 ⴷⴻⴳ ⵓⵅⴻⵟⵟⵓ ⵏ ⵉⵢⴻⵏⵛⵉⵛⴻⵏ ⴷⴰⵢⴻⵙ ⵉⵊⵊ ⵏ ⵍⴼⴻⵅ ⴷ ⴰⵄⴻⴼⴼⴰⵏ,
ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵉⵏⵊⴻⵎ ⵥⵉ ⵍⴻⵃⵚⴰⵔⴻⵜ. ■
14 ⵣⵉ ⵍⵖⵉⴵⴻⵜ ⵏ ⵓⵇⴻⵎⵎⵓⵎ ⵏⵏⴻⵙ ⵉⵜⵜⵡⴰⵙⵢⵉⵡⴻⵏ ⴽⵓⵍ ⵉⵊⵊ ⵙ ⵍⵅⵉⵔ,
ⵓ ⵎⵉⵏ ⴷⴷ-ⵜⵜⴰⵡⵢⴻⵏ ⵉⴼⴰⵙⵙⴻⵏ ⵏ ⴱⵏⴰⴷⴻⵎ ⴰⴷ ⵖⴰⵔⴻⵙ ⴷⴷ-ⵉⴷⵡⴻⵍ. ■
15 ⴰⴱⵔⵉⴷ ⵏ ⵓⴱⵓⵀⴰⵍⵉ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵎⴰⵛⴰ ⵡⴻⵏⵏⵉ ⵉⵜⵜⴻⵙⵍⴰⵏ ⵉ ⵛⵛⵡⴰⵔ, ⴰⵇⴰ ⵏⴻⵜⵜⴰ ⴷ ⴰⵎⵉⵖⵉⵙ. ■
16 ⴰⴱⵓⵀⴰⵍⵉ ⵉⵙⵙⵛⴰⵏⴰ ⵍⵀⴻⵎⵎ ⵏⵏⴻⵙ ⴷⴻⴳ ⵡⴰⵙⵙ ⴷ ⵉⵊⵊ,
ⵎⴰⵛⴰ ⵡⴻⵏⵏⵉ ⵉⴼⴻⵜⵜⵏⴻⵏ, ⵉⵜⵜⴷⴰⵍⴰ ⵍⴻⵃⵢⴰ ⵏⵏⴻⵙ.
17 ⵡⴻⵏⵏⵉ ⴷⴷ-ⵉⵏⴻⵟⵟⵇⴻⵏ ⵜⵉⴷⴻⵜⵜ, ⵉⵙⵙⵛⴰⵏⴰ ⵜⴰⵙⴻⴳⴷⴰ,
ⵎⴰⵛⴰ ⴰⵛⴻⵀⵀⴰⴷ ⴱⵓ-ⵉⵅⴰⵔⵔⵉⵇⴻⵏ ⵉⵙⵙⵛⴰⵏⴰ ⴰⵛⵎⴰⵜ. ■
18 ⴰⵇⴰ ⴷⵉⵏ ⵡⴻⵏⵏⵉ ⵉⵜⵜⵀⴰⵔⵡⴰⴹⴻⵏ ⴰⵎ ⵜⴻⵊⵊⵓⵜ ⵏ ⵙⵙⵉⴼ,
ⵎⴰⵛⴰ ⵉⵍⴻⵙ ⵏ ⵉⵎⵉⵖⵉⵙⴻⵏ ⵉⵜⵜⴰⵡⵉ-ⴷⴷ ⴰⴳⴻⵏⴼⵓ. ■
19 ⵉⵢⴻⵏⵛⵉⵛⴻⵏ ⵉⵛⵛⵓⵔⴻⵏ ⵙ ⵜⵉⴷⴻⵜⵜ ⴰⴷ ⵜⵜⵡⴰⴹⵎⴻⵏ ⵉ ⵍⴻⴱⴷⴰ,
ⵎⴰⵛⴰ ⵉⵍⴻⵙ ⵉⵙⵙⵅⴰⵔⵔⵉⵇⴻⵏ ⵎⵖⵉⵔ ⵉ ⵢⵉⵊⵊ ⵏ ⵓⵎⵓⵔ ⵡⴰⵀⴰ.
20 ⴰⵛⵎⴰⵜ ⴰⵇⴰ-ⵜ ⴷⴻⴳ ⵡⵓⵍ ⵏ ⵢⵉⵏⵏⵉ ⵉⵏⴻⴽⴽⵡⴰⵏ ⵜⵓⵄⴻⴼⴼⵏⴰ,
ⵎⴰⵛⴰ ⵉ ⵢⴻⵏⵏⵉ ⵉⵏⴻⵙⵙⵃⴻⵏ ⵍⴻⵀⵏⴰ, ⴰⵇⴰ ⴷⵉⵏ ⵍⴻⴼⵔⴰⵃⴻⵜ.
21 ⴰⵎⵙⴻⴳⴳⴻⴷ ⵡⴰⵔ ⵜ ⵉⵍⴻⵇⵇⴻⴼ ⵍⵖⴻⵛⵛ,
ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵛⵛⵓⵔⴻⵏ ⵙ ⵍⵖⴰⵔ.
22 ⵉⵢⴻⵏⵛⵉⵛⴻⵏ ⵉⵙⵅⴰⵔⵔⵉⵇⴻⵏ ⴷ ⵏⵏⵄⵉ ⵉ ⵙⵉⴷⵉ,
ⵎⴰⵛⴰ ⵉⵏⵏⵉ ⵉⵜⵜⴻⵎⵚⵓⵔⵔⵓⴼⴻⵏ ⵙ ⵍⴰⵎⴰⵏ ⵢⴰⵔⴹⴰⵏ ⴰⵙ.
23 ⴱⵏⴰⴷⴻⵎ ⵉⴼⴻⵜⵏⴻⵏ ⵉⵙⵙⴷⵓⵍⵓⵢ ⵜⵓⵙⵙⵏⴰ ⵏⵏⴻⵙ,
ⵎⴰⵛⴰ ⵓⵍ ⵏ ⵉⴱⵓⵀⴰⵍⵉⵢⵢⴻⵏ ⵉⵙⵖⵓⵢⵢⵓ ⵙ ⵜⵓⴱⴱⵓⵀⴻⵍⵢⴰ ⴷⵉ ⵍⴻⵅⵍⴰ. ■
24 ⴰⴼⵓⵙ ⵏ ⵡⴻⵏⵏⵉ ⵉⵎⴻⵃⴹⴻⵏ ⴳⴳⵓⵔ ⴰⴷ ⵉⵃⴽⴻⵎ,
ⵎⴰⵛⴰ ⵍⴻⵄⴳⴻⵥ ⵉⵏⴻⴷⴷⴻⵀ ⵖⴰⵔ ⵜⴻⵙⵎⵓⵖⵉ. ■
25 ⴰⵎⵏⵓⵙ ⴷⴻⴳ ⵡⵓⵍ ⵏ ⴱⵏⴰⴷⴻⵎ ⵉⵙⵙⵀⴻⴽⴽⵡⴰ ⵉ-ⵜ,
ⵎⴰⵛⴰ ⴰⵡⴰⵍ ⵉⵚⴻⴱⵃⴻⵏ ⵉⵙⵙⴼⴰⵔⵔⴰⵃ ⵉ-ⵜ. ■
26 ⴰⵎⵙⴻⴳⴳⴰⴷ ⵉⵙⵙⵛⴰⵏⴰ ⴰⴱⵔⵉⴷ ⵉ ⵓⵎⵇⴰⵔⵔⴻⴱ ⵏⵏⴻⵙ,
ⵎⴰⵛⴰ ⴰⴱⵔⵉⴷ ⵏ ⵓⵄⴻⴼⴼⴰⵏ ⵢⴰⵔⵔⴰ ⵉ-ⵜⴻⵏ ⴰⴷ ⵡⴻⴷⴷⴰⵔⴻⵏ.
27 ⴰⵎⴻⵄⴳⵓⵥ ⵡⴰⵔ ⵉⴹⴻⴼⴼⴰⵔ ⵛⴰ ⴰⵏⴻⵢⵎⴰⵔ ⵏⵏⴻⵙ.
ⵎⴰⵛⴰ ⴰⴳⵍⴰ ⵉⵖⵍⴰⵏ ⵏ ⵉⵡⴷⴰⵏ ⴰⵇⴰ ⴷ ⴰⵎⵃⴰⴹ.
28 ⴷⴻⴳ ⵓⵎⴻⵙⵔⵓⵇ ⵏ ⵜⵙⴻⴳⴷⴰ ⵜⴻⴵⴰ ⵜⵓⴷⴰⵔⵜ,
ⴰⴱⵔⵉⴷ ⵏ ⵍⴰⵜⴰⵔ ⵏⵏⴻⵙ ⵡⴰⵔ ⴷⴰⵢⴻⵙ ⴱⵓ ⵍⵎⴻⵡⵜ.