10
1 ⴰⵡⴰⵍⴻⵏ ⵉⵡⴻⵥⵏⴻⵏ ⵏ ⵙⵓⵍⵉⵎⴰⵏ ⵉⵊⵊ ⵏ ⵎⵎⵉⵙ ⴷ ⴰⵎⵉⵖⵉⵙ ⵉⵙⵙⴼⴰⵔⵔⴰⵃ ⴱⴰⴱⴰ ⴰⵙ,
ⵎⴰⵛⴰ ⵉⵊⵊ ⵏ ⵓⴱⵓⵀⴰⵍⵉ ⵏ ⵎⵎⵉⵙ ⴷ ⵡⴻⵏⵏⵉ ⴷ ⴰⵎⵏⵓⵙ ⴰⵎⴻⵇⵇⵔⴰⵏ ⵏ ⵢⴻⵎⵎⴰⵙ. ■
2 ⵜⵉⵅⵓⴱⴰⵢ ⵏ ⵜⵓⵄⴻⴼⴼⵏⴰ ⵡⴰⵔ ⵏⵏⴻⴼⴼⵄⴻⵏⵜ,
ⵎⴰⵛⴰ ⵜⴰⵙⴻⴳⴷⴰ ⵜᵉⵜⵜⴼⴻⴽⴽⴰ ⵥⵉ ⵍⵎⴻⵡⵜ. ■
3 ⵙⵉⴷⵉ ⵡⴰⵔ ⵉⵜⵜⴻⵊⵊⵉ ⵍⴻⵄⵎⴰⵔ ⵏ ⵉⵎⵙⴻⴳⴳⴰⴷⴻⵏ ⴰⴷ ⵉⵃⴻⵢⵢⴻⴼ,
ⵎⴰⵛⴰ ⵎⴻⵥⵔⵉ ⵏ ⵉⵄⴻⴼⴼⴰⵏⴻⵏ ⵉⵄⴰⵔⵔⴻⵏ ⵉ-ⵜ ⵖⴰⵔ ⵍⴰⴳⴳⵯⴰⵊ.
4 ⵡⵉ ⵉⵅⴻⴷⴷⵎⴻⵏ ⵙ ⵓⴼⵓⵙ ⵢⴰⵔⵅⵓⵏ, ⵉⵜⵜⴰⵡⵉ-ⴷⴷ ⵥⵥⴻⵍⴹ,
ⵎⴰⵛⴰ ⴰⴼⵓⵙ ⵏ ⵢⵉⵏⵏⵉ ⵉⵜⵜⵛⴻⵟⵟⴰⵔⴻⵏ ⵉⵜⵜⴰⵡⵉ-ⴷⴷ ⴰⴳⵍⴰ. ■
5 ⵡⴻⵏⵏⵉ ⵉⵢⴰⵔⵔⵡⴻⵏ ⴷⴻⴳ ⵓⵏⴻⴱⴷⵓ, ⴷ ⵉⵊⵊ ⵏ ⵎⵎⵉⵙ ⵉⴼⴻⵀⵀⵎⴻⵏ,
ⵎⴰⵛⴰ ⵡⴻⵏⵏⵉ ⵉⵜⵜⴻⵟⵟⵚⴻⵏ ⴷⵉ ⵜⵎⴻⵢⵔⴰ, ⴷ ⵉⵊⵊ ⵏ ⵎⵎⵉⵙ ⵏ ⵍⴻⴼⴹⵉⵃⴻⵜ.
6 ⵍⴱⴰⵔⴰⴽⴰⵜ ⴰⵔⴻⵙⵙⴰⵏⵜ ⵅ ⵓⵥⴻⴵⵉⴼ ⵏ ⵉⵎⵙⴻⴳⴳⴰⴷⴻⵏ,
ⵎⴰⵛⴰ ⵍⵄⵓⵏⴼ ⵉⵙⵙⴷⵓⵍⵓⵢ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ.
7 ⵍⵉⴷⴰⵔⴻⵜ ⵉ ⵓⵎⵙⴻⴳⴳⴻⴷ ⴰⴷ ⴷⴷ-ⵢⴰⵡⵉ ⵍⴱⴰⵔⴰⴽⴰ,
ⵎⴰⵛⴰ ⵉⵙⴻⵎ ⵏ ⵉⵄⴻⴼⴼⴰⵏⴻⵏ ⴳⴳⵓⵔ ⴰⴷ ⵢⴰⵔⵚⵓⴹ.
8 ⵡⴻⵏⵏⵉ ⴷ ⴰⵎⵉⵖⵉⵙ ⴷⴻⴳ ⵡⵓⵍ, ⴰⴷ ⵉⵇⴱⴻⵍ ⵜⵉⵡⴻⵚⵚⴰ,
ⵎⴰⵛⴰ ⵡⴻⵏⵏⵉ ⵉⵙⵙⴰⵡⴰⵍⴻⵏ ⵜⵓⴱⴱⵓⵀⴻⵍⵢⴰ ⵙ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⴷ ⵉⵡⴹⴰ. ■
9 ⵡⴻⵏⵏⵉ ⵉⴳⴳⵓⵔⴻⵏ ⴷⵉ ⵍⴻⵚⴼⴰⵢⴻⵜ, ⵉⴳⴳⵓⵔ ⴷⵉ ⵍⴰⵎⴰⵏ,
ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ ⵉⴱⵔⵉⴷⴻⵏ ⵉⴼⴰⵔⵖⴻⵏ, ⴰⴷ ⵉⵜⵜⵡⴰⵙⵙⴻⵏ.
10 ⵡⴻⵏⵏⵉ ⵉⵜⵜⵖⴻⵎⵎⴰⵥⴻⵏ ⵙ ⵜⵉⵟⵟⴰⵡⵉⵏ, ⵉⵜⵜⴻⴳⴳⴻⵏ ⵍⴻⵃⵔⵉⵇ,
ⵡⴻⵏⵏⵉ ⵉⵙⵙⴰⵡⴰⵍⴻⵏ ⵜⵓⴱⴱⵓⵀⴻⵍⵢⴰ ⵙ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⴷ ⵉⵡⴹⴰ.
11 ⴰⵇⴻⵎⵎⵓⵎ ⵏ ⵓⵎⵙⴻⴳⴳⴻⴷ ⴷ ⵜⴰⵍⴰ ⵏ ⵜⵓⴷⴰⵔⵜ,
ⵎⴰⵛⴰ ⵍⵄⵓⵏⴼ ⵉⵙⵙⴷⵓⵍⵓⵢ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ. ■
12 ⴰⵛⵔⴰⵀ ⵜⴻⵙⵙⴻⴽⴽⴰⵔⴰ-ⴷⴷ ⵉⵎⵛⵓⴱⴱⴻⵛⴻⵏ,
ⵎⴰⵛⴰ ⵜⴰⵢⵔⵉ ⵜⴻⵙⵙⴷⵓⵔⵔⵓⵢ ⵎⴰⵔⵔⴰ ⵉⵅⴻⵟⵟⴰⵏ. ■
13 ⵅ ⵉⵢⴻⵏⵛⵉⵛⴻⵏ ⵏ ⵡⴻⵏⵏⵉ ⵖⴰⵔ ⵉⴵⴰ ⵍⴻⴼⵀⴰⵎⴻⵜ ⵜᵉⵜⵜⵡⴰⴼ ⵜⵉⵖⵉⵜ,
ⵎⴰⵛⴰ ⴰⵄⵎⵓⴷ ⵉ ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⴱⵓ ⵡⵓⵍ ⵉⵎⵜⴻⵏ. ■
14 ⵉⵎⵉⵖⵉⵙⴻⵏ ⵜⵜⵅⴻⵎⵎⴰⵔⴻⵏ ⵜⵓⵙⵙⵏⴰ,
ⵎⴰⵛⴰ ⴰⵇⴻⵎⵎⵓⵎ ⵏ ⵓⴱⵓⵀⴰⵍⵉ ⵉⵜⵜⴰⴷⴻⵙ ⵖⴰⵔ ⵓⵀⴻⵍⵍⴻⴽ.
15 ⵉ ⴱⵓ-ⵡⴰⴳⵍⴰ ⵎⵉⵏ ⵉⴵⴰⵏ ⵏⵏⴻⵙ ⴷ ⵜⴰⵏⴷⵉⵏⵜ ⵉⵊⴻⵀⴷⴻⵏ ⵏⵏⴻⵙ,
ⵍⴻⴱⵍⴰ ⵏ ⵉⵎⴻⵥⵍⴰⴹ ⴷ ⴰⵀⴻⵍⵍⴻⴽ ⵏⵙⴻⵏ.
16 ⵍⵖⵉⴵⴻⵜ ⵏ ⵓⵎⵙⴻⴳⴳⴻⴷ ⴰⵇⴰ-ⵜⵜ ⵉ ⵜⵓⴷⴰⵔⵜ,
ⵍⵎⵓⵏⴻⵜ ⵏ ⵓⵄⴻⴼⴼⴰⵏ ⵉ ⴷⴷⴻⵏⴱ.
17 ⵡⴻⵏⵏⵉ ⵉⵃⴻⵟⵟⴰⵏ ⵜⵜⴰⵔⴱⵉⵢⵢⴻⵜ, ⴰⵇⴰ-ⵜ ⵅ ⵡⴻⴱⵔⵉⴷ ⵏ ⵜⵓⴷⴰⵔⵜ,
ⵎⴰⵛⴰ ⵡⴻⵏⵏⵉ ⵉⵙⴻⵎⵎⵃⴻⵏ ⴷⴻⴳ ⵓⵡⴻⴱⴱⴻⵅ, ⴳⴳⵓⵔ ⴰⴷ ⵉⵡⴻⴷⴷⴰⵔ.
18 ⵡⵉ ⵉⵜⵜⴻⴼⴼⴰⵔⴻⵏ ⴰⵛⵔⴰⵀⵉ ⵖⴰⵔⴻⵙ ⵉⵢⴻⵏⵛⵉⵛⴻⵏ ⵙⵙⵅⴰⵔⵔⵉⵇⴻⵏ,
ⵡⵉ ⵉⵜⵜⵛⴻⵇⵇⴰⴼⴻⵏ ⴰⵇⴰ-ⵜ ⴷ ⴰⴱⵓⵀⴰⵍⵉ.
19 ⵖⴰⵔ ⵡⴰⵟⵟⴰⵙ ⵏ ⵡⴰⵡⴰⵍⴻⵏ ⵡⴰⵔ ⵉⵇⵇⵉⵎ ⵓⵅⴻⵟⵟⵓ ⵉⵏⴻⵇⵇⴻⵙ,
ⵎⴰⵛⴰ ⵡⴻⵏⵏⵉ ⵉⵎⴻⵏⵏⵄⴻⵏ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⵇⴰ ⵉⵜⵜⴻⴳⴳ ⵙ ⵍⴻⵄⵇⴻⵍ.
20 ⵏⵏⵓⵇⴰⵔⵜ ⵉⵇⵇⵓⵔⴻⵏ ⴷ ⵉⵍⴻⵙ ⵏ ⵓⵎⵙⴻⴳⴳⴻⴷ,
ⵓⵍ ⵏ ⵉⵄⴻⴼⴼⴰⵏⴻⵏ ⵡⴰⵔ ⵉⵙⴻⴽⴽⵡⵉⵏ.
21 ⵉⵢⴻⵏⵛⵉⵛⴻⵏ ⵏ ⵉⵎⵙⴻⴳⴳⴰⴷⴻⵏ ⵙⵙⴻⵛⵛⴰⵏ ⴰⵟⵟⴰⵙ,
ⵎⴰⵛⴰ ⵉⴱⵓⵀⴰⵍⵉⵢⵢⴻⵏ ⵎⵎⵓⵜⴻⵏ ⵓⵎⵉ ⵡⴰⵔ ⵖⴰⵔⵙⴻⵏ ⴱⵓ ⵡⵓⵍ ⵉⵎⵜⴻⵏ.
22 ⵍⴱⴰⵔⴰⴽⴰ ⵏ ⵙⵉⴷⵉ ⵜᵉⵜⵜⴰⵡⵉ-ⴷⴷ ⴰⴳⵍⴰ,
ⴰⵔⴱⴻⵔ ⵏ ⴱⵏⴰⴷⴻⵎ ⵡⴰⵔ ⴷⴰⵢⴻⵙ ⵢⴰⵔⴻⵏⵏⵉ ⵡⴰⵍⵓ.
23 ⵉ ⵓⴱⵓⵀⴰⵍⵉ ⵜⴰⵎⴻⴳⴳⵉⵜ ⵏ ⵍⴻⴼⴹⵉⵀⴻⵜ ⴰⵎ ⵉⵛⵜ ⵏ ⵍⵓⵔⴰⵔⴻⵜ,
ⵎⴰⵛⴰ ⵉ ⵡⴻⵔⵢⴰⵥ ⵏ ⵍⴻⴼⵀⴰⵎⴻⵜ ⴰⴷⴻⴱⴱⴰⵔ ⵙ ⵜⵉⵖⵉⵜ ⴰⵎ ⵎⴰⵏ ⴰⵢⴰ. ■
24 ⵎⵉⵏ ⵥⵉ ⵉⵜⵜⴻⴳⴳⵯⴻⴷ ⵓⵄⴻⴼⴼⴰⵏ ⴰⴷ ⵜ ⵉⵍⵇⴻⴼ,
ⵎⴰⵛⴰ ⴰⵙⵉⵜⴻⵎ ⵏ ⵉⵎⵙⴻⴳⴳⴰⴷⴻⵏ ⴰⴷ ⵢⵉⵍⵉ.
25 ⵎⴰⵍⴰ ⵜⴻⵄⴷⵓ-ⴷⴷ ⵜⵃⴰⵔⵢⴰⴹⵜ, ⴰⵄⴻⴼⴼⴰⵏ ⵡⴰⵔ ⵉⵜⵜⵖⵉⵎⵉ,
ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵉⵇⵇⵉⵎ ⵉⵎⵜⴻⵏ ⵉ ⵍⴻⴱⴷⴰ.
26 ⴰⵎ ⴱⵉⵏⵓ ⴰⵙⴻⵎⵎⴰⵎ ⵉ ⵜⴻⵖⵎⴰⵙ ⴷ ⴷⴷⴻⵅⵅⴰⵏ ⵉ ⵜⵉⵟⵟⴰⵡⵉⵏ,
ⴰⵎⵎⵓ ⵉ ⵉⴳⴳⴰ ⵓⵎⴻⵄⴳⵓⵥ ⵉ ⵢⴻⵏⵏⵉ ⵜ ⵉⵙⵙⴻⴽⴽⴻⵏ.
27 ⵜⵉⴳⴳⵯⵓⴷⵉ ⵏ ⵙⵉⴷⵉ ⵜⴰⵔⴻⵏⵏⵉ ⴷⴻⴳ ⵓⵙⵙⴰⵏ ⵉ ⵜⵓⴷⴰⵔⵜ,
ⵎⴰⵛⴰ ⵉⵙⴻⴳⴳⵯⵓⵙⴰ ⵏ ⵉⵄⴻⴼⴼⴰⵏⴻⵏ ⵜⵜⵡⴰⵙⵇⵓⴹⴹⴻⵏ. ■
28 ⵜⴰⵔⴰⵊⵉⵜ ⵏ ⵉⵎⵙⴻⴳⴳⴰⴷⴻⵏ ⴷ ⵍⴻⴼⵔⴰⵃⴻⵜ,
ⵎⴰⵛⴰ ⴰⵙⵉⵜⴻⵎ ⵏ ⵉⵄⴻⴼⴼⴰⵏⴻⵏ ⴳⴳⵓⵔ ⴰⴷ ⵉⴼⵏⴰ. ■
29 ⴰⴱⵔⵉⴷ ⵏ ⵙⵉⴷⵉ ⴷ ⵍⴱⵓⵔⵊ ⵉⵊⴻⵀⴷⴻⵏ ⵉ ⵡⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ,
ⵎⴰⵛⴰ ⴷ ⴰⵀⴻⵍⵍⴻⴽ ⵉ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ. ■
30 ⴰⵎⵙⴻⴳⴳⴻⴷ ⵄⴻⵎⵎⴰⵔⵚ ⴰⴷ ⵉⵏⵀⴻⵥⵥ ⵉ ⵍⴻⴱⴷⴰ,
ⵎⴰⵛⴰ ⵉⵄⴻⴼⴼⴰⵏⴻⵏ ⵡⴰⵔ ⴳⴳⵓⵔ ⴰⴷ ⵇⵇⵉⵎⴻⵏ ⵥⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ.
31 ⴰⵇⴻⵎⵎⵓⵎ ⵏ ⵓⵎⵙⴻⴳⴳⴻⴷ ⵉⵜⵜⴰⵡⵉ-ⴷⴷ ⵜⵉⵖⵉⵜ ⵙ ⵡⴰⵟⵟⴰⵙ,
ⵎⴰⵛⴰ ⵉⵊⵊ ⵏ ⵢⵉⵍⴻⵙ ⵉⵄⴻⵎⵎⴰⵔ ⵙ ⵍⴻⵅⴷⴰⵄⴰⵜ ⴰⴷ ⵉⵜⵜⵡⴰⵇⴻⵙⵙ.
32 ⵉⵢⴻⵏⵛⵉⵛⴻⵏ ⵏ ⵓⵎⵙⴻⴳⴳⴻⴷ ⵙⵙⵏⴻⵏ ⵎⵉⵏ ⵢⴰⵔⴹⴰⵏ,
ⵎⴰⵛⴰ ⴰⵇⴻⵎⵎⵓⵎ ⵏ ⵓⵄⴻⴼⴼⴰⵏ ⵉⵙⵙⴻⵏ ⵍⴻⵅⴷⴰⵄⴰⵜ ⵡⴰⵀⴰ.