1 ⵜⵉⵖⵉⵜ ⵜⴻⴱⵏⴰ ⵜⴰⴷⴷⴰⵔⵜ ⵏⵏⴻⵙ,

ⵜⴻⴳⴳⴰ ⵜⴻⵙⵙⵓⵢⴷⴰ ⵉⴱⵉⵍⴰⵔⴻⵏ ⵏⵏⴻⵙ, ⴰⵇⴰ ⴰⵜⴻⵏ ⴷⵉ ⵙⴻⴱⵄⴰ.

2 ⵏⴻⵜⵜⴰⵜ ⵜⵖⴰⵔⵚ ⵉ ⵍⵎⴰⵍ ⵏⵏⴻⵙ, ⵜⵅⴻⴵⴻⴹ ⴱⵉⵏⵓ ⵏⵏⴻⵙ.

ⵄⴰⵡⴻⴷ ⵜⴻⵙⵙⵓ ⵟⵟⴰⴱⵍⴰ ⵏⵏⴻⵙ.

3 ⵏⴻⵜⵜⴰⵜ ⵜⴻⵙⵙⴻⴽⴽ ⵜⵉⵎⵙⴻⵅⵅⴰⵔⵉⵏ ⵏⵏⴻⵙ.

ⵅ ⵜⵙⴰⵡⵉⵏ ⵢⵓⵄⵍⴰⵏ ⵇⴰⵄ ⵏ ⵍⴻⴳⵄⵓⴷⵉ ⵏ ⵜⴻⵏⴷⵉⵏⵜ ⵜᵉⵜⵜⵍⴰⵖⴰ: ^■  

4 “ⵡⴻⵏⵏⵉ ⵉⴵⴰⵏ ⴷ ⴰⵃⴰⴼⵉ, ⴻⵊⵊ ⵉ-ⵜ ⴰⴷ ⴷⴷ-ⵢⴰⵙ ⴷⴰⵏⵉⵜⴰ!”

ⵏⴻⵜⵜⴰⵜ ⵜⴻⵇⵇⴰⵔ ⵉ ⵢⴻⵏⵏⵉ ⵡⴰⵔ ⵖⴰⵔ ⵉⴵⵉ ⵛⴰ ⵡⵓⵍ ⵉⵎⵜⴻⵏ:

5 “ⴰⵙⴻⵎ-ⴷⴷ, ⵛⵛⴻⵎ ⵥⴻⴳ ⵡⴻⵖⵔⵓⵎ ⵉⵏⵓ,

ⵙⵡⴻⵎ ⵥⵉ ⴱⵉⵏⵓ ⵏⵏⵉ ⴷ ⴰⵡⴻⵎ ⴷⴷ-ⵅⴻⴵⴹⴻⵖ.

6 ⵊⵊⴻⵎ ⵜⴰⵇⵓⴱⴱⴰⵏⴻⵛⵜ, ⵓⵛⴰ ⴷⴷⴰⵔⴻⵎ,

ⵓ ⴹⴼⴰⵔⴻⵎ ⴰⴱⵔⵉⴷ ⵏ ⵍⴻⴼⵀⴰⵎⴻⵜ.”

7 “ⵡⴻⵏⵏⵉ ⵉⵜⵜⵡⴻⴱⴱⵅⴻⵏ ⴰⵎⴻⵙⵜⴻⵀⵥⵉⵢ, ⵉⵙⵙⴰⵔⴻⴱⴱⵓ ⵍⴻⴼⴹⵉⵃⴻⵜ ⵉ ⵢⵉⵅⴻⴼ ⵏⵏⴻⵙ,

ⵡⴻⵏⵏⵉ ⵉⵜⵜⵄⴰⵇⴰⴱⴻⵏ ⴰⵄⴻⴼⴼⴰⵏ, ⴰⵇⴰ ⵏⴻⵜⵜⴰ ⵢⴰⵔⴻⴱⴱⵓ ⴰⴱⴻⵇⵇⵉⴹ ⵏ ⵍⴻⴼⴹⵉⵃⴻⵜ ⵏⵏⴻⵙ.

8 ⵡⴰⵔ ⵜⵜⵄⴻⵢⵢⴰⴱ ⴰⵎⴻⵙⵜⴻⵀⵥⵉⵢ ⵃⵉⵎⴰ ⵏⴻⵜⵜⴰ ⵡⴰⵔ ⵛⴻⴽ ⵉⵛⴰⵔⵔⴻⵀ,

ⵄⴻⵢⵢⴻⴱ ⴰⵎⵉⵖⵉⵙ, ⵅⴻⵏⵏⵉ ⵏⴻⵜⵜⴰ ⴰⴷ ⵛⴻⴽ ⵉⵅⵙ. ^■  

9 ⴻⵡⵛ ⵉ ⵓⵎⵉⵖⵉⵙ, ⵅⴻⵏⵏⵉ ⴳⴳⵓⵔ ⴰⴷ ⵉⴷⵡⴻⵍ ⴷ ⵎⵉⵖⵉⵙ ⴽⵜⴰⵔ,

ⵙⵖⴰⵔ ⵜⵓⵙⵙⵏⴰ ⵉ ⵓⵎⵙⴻⴳⴳⴻⴷ, ⵅⴻⵏⵏⵉ ⵏⴻⵜⵜⴰ ⴰⴷ ⵉⴼⵀⴻⵎ ⴽⵜⴰⵔ.”

10 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⴱⴻⴷⴷⵓ ⵏ ⵜⵉⵖⵉⵜ,

ⵜⵓⵙⵙⵏⴰ ⵏ ⵓⵎⵇⴻⴷⴷⴰⵙ ⴷ ⴰⵎⵎⴻⵇⵔⴰⵏ ⴷ ⴱⴻⴷⴷⵓ ⵏ ⵍⴻⴼⵀⴰⵎⴻⵜ. ^■  

11 ⵎⴰⵖⴰⵔ ⵥⵥⴰⵢⵉ ⴰⴷ ⴽⵜⴰⵔⴻⵏ ⵡⵓⵙⵙⴰⵏ ⵏⵏⴻⴽ,

ⵉⵙⴻⴳⴳⵯⵓⵙⴰ ⵏ ⵜⵓⴷⴰⵔⵜ ⴰⴷ ⵜⵜⵡⴰⵔⵏⵉⵏ ⵉ ⵛⴻⴽ. ^■  

12 ⵎⴰⵍⴰ ⵛⴻⴽ ⴷ ⵎⵉⵖⵉⵙ, ⵅⴻⵏⵏⵉ ⴰⴷ ⵜⵉⵍⵉⴷ ⴷ ⵎⵉⵖⵉⵙ ⵉ ⵢⵉⵅⴻⴼ ⵏⵏⴻⴽ,

ⵓ ⵎⴰⵍⴰ ⵜⴻⵙⵜⴻⵀⴻⵥⵥⵉⴷ, ⴰⴷ ⵜⴰⵔⴱⵓⴷ ⴰⵢⴰ ⵙⵉⵎⴰⵏⵜ ⵏⵏⴻⴽ.

13 ⵜⴰⵎⵖⴰⵔⵜ ⵜⴰⴱⵓⵀⴰⵍⴻⵛⵜ ⵜᵉⵜⵜⴱⵓⵀⵍⵓⵢ,

ⵏⴻⵜⵜⴰⵜ ⴷ ⵜⴰⵇⵓⴱⴱⴰⵏⵉⵜ, ⵡⴰⵔ ⵜⴻⵙⵙⴻⵏ ⵡⴰⵍⵓ. ^■  

14 ⵏⴻⵜⵜⴰⵜ ⵜᵉⵜⵜⵖⵉⵎⴰ ⵖⴰⵔ ⵜⴻⵡⵡⴰⵔⵜ ⵏ ⵜⴰⴷⴷⴰⵔⵜ ⵏⵏⴻⵙ,

ⵅ ⵉⵊⵊ ⵏ ⴽⵓⵔⵙⵉ, ⵅ ⵍⴻⴳⵄⵓⴷⵉ ⵏ ⵜⴻⵏⴷⵉⵏⵜ

15 ⵃⵉⵎⴰ ⴰⴷ ⵜⵍⴰⵖⴰ ⵅ ⵉⵏⵏⵉ ⵉⵄⴻⴷⴷⵓⵏ,

ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵉⵎⴻⵙⵔⴰⵇ ⵏⵙⴻⵏ, ⵜⴻⵏⵏⴰ:

16 “ⵡⴻⵏⵏⵉ ⵉⴵⴰⵏ ⴷ ⴰⵃⴰⴼⵉ, ⴻⵊⵊ ⵉ-ⵜ ⴰⴷ ⴷⴷ-ⵢⴰⵙ ⴷⴰⵏⵉⵜⴰ!”

ⵏⴻⵜⵜⴰⵜ ⵜⴻⵇⵇⴰⵔ ⵉ ⵢⴻⵏⵏⵉ ⵡⴰⵔ ⵖⴰⵔ ⵉⴵⵉ ⵛⴰ ⵡⵓⵍ ⵉⵎⵜⴻⵏ:

17 “ⴰⵎⴰⵏ ⵉⵜⵜⵡⴰⵛⴰⵔⴻⵏ ⴷ ⵉⵎⵉⵥⵉⴷⴻⵏ,

ⴰⵖⵔⵓⵎ ⵉⵏⵏⵓⴼⴼⴰⵔⴻⵏ ⴰⵇⴰ ⵉⵛⵏⴰ.” ^■  

18 ⵏⴻⵜⵜⴰ ⵡⴰⵔ ⵉⵙⵙⵉⵏ ⴰⵇⴰ ⴷⵉⵏ ⵍⴻⵅⵢⴰⵍⴰⵜ,

ⴰⵇⴰ ⵉⵏⴻⵡⵊⵉⵡⴻⵏ ⵏⵏⴻⵙ ⴷⴻⴳ ⵡⴰⴵⴰⵖ ⵏ ⵍⴰⵅⴰⵔⵜ ⵉ ⵉⴵⴰⵏ. ^■