ⴻⴳⴳ ⵓⵍ ⵏⵏⴻⴽ ⵅ ⵜⵉⵖⵉⵜ
4
1 ⵙⵍⴻⵎ, ⴽⴻⵏⵏⵉⵡ ⵉⵃⴻⵏⵊⵉⵔⴻⵏ, ⵖⴰⵔ ⵜⵜⴰⵔⴱⵉⵢⵢⴻⵜ ⵏ ⴱⴰⴱⴰⵜⵡⴻⵎ, ⵃⴻⴽⴽⴰⵔⴻⵎ ⵎⵍⵉⵃ ⵎⴰⵃⴻⵏⴷ ⴰⴷ ⵜⴻⴽⵙⵉⵎ ⵜⵓⵙⵙⵏⴰ ⵙ ⵍⴻⴼⵀⴰⵎⴻⵜ,
2 ⵎⴰⵖⴰⵔ ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ ⵜⴰⵖⵓⵔⵉ ⵉⵚⴻⴱⵃⴻⵏ,
ⵡⴰⵔ ⵙⴻⵎⵎⵃⴻⵎ ⴷⵉ ⵜⵖⵓⵔⵉ ⵉⵏⵓ.
3 ⵎⴰⵖⴰⵔ ⵏⴻⵛⵛ ⵜⵓⵖⴰ ⴰⵢⵉ ⴷ ⵎⵎⵉⵙ ⵉ ⴱⴰⴱⴰ,
ⴰⵔⴻⵇⵇⴰⵖ ⴷ ⵓⵢⴻⵏⵏⵉ ⵏ ⵎⵎⵉⵙ ⵥⵥⴰⵜ ⵉ ⵡⵓⴷⴻⵎ ⵏ ⵢⴻⵎⵎⴰ, ■
4 ⵓⵛⴰ ⵏⴻⵜⵜⴰ ⵉⵙⵙⴻⵍⵎⴻⴷ ⴰⵢⵉ, ⵉⵏⵏⴰ ⴰⵢⵉ:
“ⴻⵊⵊ ⵓⵍ ⵏⵏⴻⴽ ⴰⴷ ⵉⵟⵟⴻⴼ ⴷⴻⴳ ⵡⴰⵡⴰⵍⴻⵏ ⵉⵏⵓ,
ⵃⴹⴰ ⵜⵉⵡⴻⵚⵚⴰ ⵉⵏⵓ, ⵅⴻⵏⵏⵉ ⴰⴷ ⵜⴻⴷⴷⴰⵔⴻⴷ!” ■
5 ⵊⴱⴻⴷ-ⴷⴷ ⵖⴰⵔⴻⴽ ⵜⵉⵖⵉⵜ, ⵊⴱⴻⴷ-ⴷⴷ ⵖⴰⵔⴻⴽ ⵍⴻⵄⵇⴻⵍ,
ⵡⴰⵔ ⵜᵉⵜⵜⵓ ⵓ ⵡⴰⵔ ⵜⵃⴻⵢⵢⵉⴷ ⵅ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ.
6 ⵡⴰⵔ ⵙⴻⵎⵎⴻⵃ ⴷⵉ ⵜⵉⵖⵉⵜ, ⵅⴻⵏⵏⵉ ⵏⴻⵜⵜⴰⵜ ⴰⴷ ⵛⴻⴽ ⵜⴻⵃⴹⴰ,
ⵙⵄⵉⵥⵥ ⵉ-ⵜⵜ ⵓ ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⴰⵔ. □
7 ⴱⴻⴷⴷⵓ ⵏ ⵜⵉⵖⵉⵜ ⴷ ⵓⴹⵓⴼ ⵏ ⵜⵉⵖⵉⵜ,
ⴰⵇⴰ ⴰⴷ ⵜᵉⵟⵟⴼⴻⴷ ⵍⴻⴼⵀⴰⵎⴻⵜ ⵙ ⵎⴰⵔⵔⴰ ⵎⵉⵏ ⵖⴰⵔⴻⴽ. ■
8 ⵙⴳⴻⵄⵄⴻⴷ ⵉ-ⵜⵜ-ⵉ-ⴷⴷ, ⵅⴻⵏⵏⵉ ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⴳⴻⵄⵄⴻⴷ,
ⵏⴻⵜⵜⴰⵜ ⴰⴷ ⴰⵛ ⵜⴻⴳⴳ ⵛⵛⴰⵏ ⵎⴰⵍⴰ ⵜⴷⴰⵔⵔⵄⴻⴷ ⴰⵙ.
9 ⵏⴻⵜⵜⴰⵜ ⴰⴷ ⴰⵛ ⵜⴻⵡⵛ ⵉⵛⵜ ⵏ ⵜⴻⵎⵔⵉⵙⵜ ⵜⴻⵛⵏⴰ ⵅ ⵓⵥⴻⴵⵉⴼ ⵏⵏⴻⴽ,
ⴰⴷ ⴰⵛ ⵜⴻⵡⵛ ⵉⵊⵊ ⵏ ⵜⵜⴰⵊ ⵉⵥⴻⵡⵡⵇⴻⵏ. ■
10 ⵙⴻⵍ, ⴰ ⵎⵎⵉ ⵉⵏⵓ, ⵓ ⴽⵙⵉ ⴰⵡⴰⵍⴻⵏ ⵉⵏⵓ,
ⵅⴻⵏⵏⵉ ⴰⴷ ⵎⵎⴰⵔⵏⵉⵏ ⵉⵙⴻⴳⴳⵯⵓⵙⴰ ⵏ ⵜⵓⴷⴰⵔⵜ ⵏⵏⴻⴽ.
11 ⵙⵙⵍⴻⵎⴷⴻⵖ ⴰⵛ ⴰⴱⵔⵉⴷ ⵏ ⵜⵉⵖⵉⵜ,
ⵏⴻⴷⵀⴻⵖ ⵛⴻⴽ ⴷⵉ ⵍⴰⵜⴰⵔⴰⵜ ⵉⵙⴻⴳⴳⵎⴻⵏ.
12 ⵎⴰⵍⴰ ⵜⵓⵢⵓⵔⴻⴷ, ⴰⵚⵓⵔⵉⴼ ⵏⵏⴻⴽ ⵡⴰⵔ ⵉⵜⵜⵏⴻⵃⵚⵚⴰⵔ,
ⵎⴰⵍⴰ ⵜⴰⵥⵥⵍⴻⴷ, ⵡⴰⵔ ⵜⵜⵏⴻⵇⵔⵉⴹⴻⴷ.■
13 ⵛⴻⴱⴱⴰⵔ ⴷⵉ ⵜⵜⴰⵔⴱⵉⵢⵢⴻⵜ, ⵡⴰⵔ ⵅⴰⵙ ⵜⴻⵎⵎⵙⴻⴱⴹⴰ,
ⵃⴹⴰ ⵜⵜ, ⵎⴰⵖⴰⵔ ⵏⴻⵜⵜⴰⵜ ⴷ ⵜⵓⴷⴰⵔⵜ ⵏⵏⴻⴽ.
14 ⵡⴰⵔ ⴳⴳⵓⵔ ⵅ ⵓⵎⴻⵙⵔⵓⵇ ⵏ ⵉⵄⴻⴼⴼⴰⵏⴻⵏ,
ⵡⴰⵔ ⵜⵜⵉⴷⵉⴼ ⴰⴱⵔⵉⴷ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ, ■
15 ⵃⴻⵢⵢⴻⴷ ⵅⴰⵙ, ⵡⴰⵔ ⵅⴰⵙ ⴳⴳⵓⵔ,
ⴼⴼⴻⵖ ⵥⵥⴰⵢⴻⵙ ⵓ ⴳⴳⵯⴻⵊ ⵅⴰⵙ.
16 ⵎⴰⵖⴰⵔ ⵏⵉⵜⵏⵉ ⵡⴰⵔ ⵜⵜᵉⵟⵟⵙⴻⵏ ⴰⵎ ⵡⴰⵔ ⵥⴻⵎⵎⴰⵔⴻⵏ ⴰⴷ ⴳⴳⴻⵏ ⵜⵓⵄⴻⴼⴼⵏⴰ,
ⵉⵜⵜⵔⴰⵃ ⴰⵙⴻⵏ ⵉⴹⴻⵙ ⵏⵙⴻⵏ ⵎⴰⵍⴰ ⵡⴰⵔ ⵙⵙⵏⴻⵇⵔⵉⴹⴻⵏ ⵃⴻⴷ ⵄⴰⴷ,
17 ⵎⴰⵖⴰⵔ ⵏⵉⵜⵏⵉ ⵜⵜᵉⵜⵜⴻⵏ ⴰⵖⵔⵓⵎ ⵏ ⵍⵖⴻⵛⵛ,
ⵓ ⵙⴻⵙⵙⴻⵏ ⴱⵉⵏⵓ ⵥⵉ ⵜⵎⴻⴳⴳⴰ ⵏ ⵍⴻⵅⵛⵓⵏⴻⵛⵜ.
18 ⴰⵎⴻⵙⵔⵓⵇ ⵏ ⵉⵎⵙⴻⴳⴳⴰⴷⴻⵏ ⴰⵎ ⵜⴼⴰⵡⵜ ⵉⵜⵜⵉⵙⵙⵉⵇⴻⵏ ⵏ ⵜⴻⴼⴼⵓⵜ,
ⵜⴻⵏⵏⵉ ⵜⴰⵔⴻⵏⵏⵉ ⴷⴻⴳ ⵓⵙⴻⵇⵙⴻⵇ ⵖⴰⵔⴻⵙ ⴰⵍ ⵉⵎⵖⴰⵔ ⵡⴰⵙⵙ ⵇⴰⵄ.
19 ⴰⴱⵔⵉⴷ ⵏ ⵉⵄⴻⴼⴼⴰⵏⴻⵏ ⴰⵎ ⵜⴰⴵⴻⵙⵜ,
ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵎⵉⵏ ⴷⵉ ⵉ ⵖⴰ ⵏⵇⴰⵔⴹⴻⵏ.
20 ⵎⵎⵉ ⵉⵏⵓ, ⴻⵡⵛ ⵜⴰⵢⵏⵉⵜ ⵉ ⵡⴰⵡⴰⵍⴻⵏ ⵉⵏⵓ,
ⴻⵡⵛ ⴰⵎⴻⵥⵥⵓⵖ ⵏⵏⴻⴽ ⵉ ⵡⴰⵡⴰⵍⴻⵏ ⵉⵏⵓ,
21 ⵡⴰⵔ ⵜⴻⵏ ⵜⵜⴻⵊⵊⴰ ⴰⴷ ⵖⴻⴼⵍⴻⵏ ⵥⵉ ⵜⵉⵟⵟⴰⵡⵉⵏ ⵏⵏⴻⴽ,
ⵅⴻⵎⵎⴻⵍ ⵉ-ⵜⴻⵏ ⴷⴰⵅⴻⵍ ⴷⴻⴳ ⵡⵓⵍ ⵏⵏⴻⴽ,
22 ⵎⴰⵖⴰⵔ ⵏⵉⵜⵏⵉ ⴷ ⵜⵓⴷⴰⵔⵜ ⵉ ⵡⴻⵏⵏⵉ ⵜⴻⵏ ⵉ ⵖⴰ ⵢⴰⴼⴻⵏ,
ⵓⵍⴰ ⴷ ⴰⴳⴻⵏⴼⵓ ⵉ ⴰⵔⵔⵉⵎⴻⵜ ⵏⵏⴻⵙ ⵎⴰⵔⵔⴰ. ■
23 ⵃⴹⴰ ⵓⵍ ⵏⵏⴻⴽ ⵅ ⵎⴰⵔⵔⴰ ⵎⵉⵏ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵃⴹⴰ,
ⵎⴰⵖⴰⵔ ⵥⵥⴰⵢⴻⵙ ⴼⴼⵖⴻⵏ ⵉⵥⴻⵡⵔⴰⵏ ⵏ ⵜⵓⴷⴰⵔⵜ.
24 ⴽⴽⴻⵙ ⵉⵅⴰⵔⵔⵉⵇⴻⵏ ⵏ ⵓⵇⴻⵎⵎⵓⵎ ⵏⵏⴻⴽ,
ⵙⴱⴻⵄⵄⴻⴷ ⵅⴰⴽ ⴰⴼⴰⵔⵢⴻⴹ ⵏ ⵉⵢⴻⵏⵛⵉⵛⴻⵏ ⵏⵏⴻⴽ.
25 ⴻⵊⵊ ⵜⵉⵟⵟⴰⵡⵉⵏ ⵏⵏⴻⴽ ⴰⴷ ⵅⵥⴰⵔⴻⵏⵜ ⵖⴰⵔ ⵥⵥⴰⵜ,
ⴻⵊⵊ ⴰⴱⵍⵉⵡⴻⵏ ⵏⵏⴻⴽ ⴰⴷ ⵅⵥⴰⵔⴻⵏ ⵖⴰⵔ ⵎⵉⵏ ⵉⴵⴰⵏ ⴰⵔⴻⵏⴷⴰⴷ ⵏⵏⴻⴽ.
26 ⵡⴰⵟⴰ ⵍⴰⵜⴰⵔ ⵏ ⵓⴹⴰⵔ ⵏⵏⴻⴽ,
ⴻⵊⵊ ⴰⴷ ⵉⵍⵉⵏ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⴽ ⵙⴰⵔⵔⵃⴻⵏ.
27 ⵡⴰⵔ ⴼⴰⵔⵔⴻⵖ ⵖⴰⵔ ⵢⴻⴼⴼⵓⵙ ⵓⵍⴰ ⵖⴰⵔ ⵓⵥⴻⵍⵎⴰⴹ,
ⵙⴱⴻⵄⵄⴻⴷ ⴰⴹⴰⵔ ⵏⵏⴻⴽ ⵥⵉ ⵜⵓⵄⴻⴼⴼⵏⴰ. ■