1 ⵀⴰⵍⵍⵉⵍⵓ-ⵢⴰⵀ, ⵎⴰⵖⴰⵔ ⴰⵥⴻⵀⵀⴻⴷ ⵉ ⴰⵔⴻⴱⴱⵉ ⵏⵏⴻⵖ ⴷ ⴰⵚⴻⴱⵃⴰⵏ,

ⵎⵉⵏⵥⵉ ⵉⵛⵏⴰ, ⵉⵜⵜⴰⵙ-ⴷⴷ ⴰⴽⵉⴷⴻⵙ ⴰⴷ ⴰⵙ ⵏⵚⴻⴱⴱⴻⵃ. ^■  

2 ⵙⵉⴷⵉ ⵉⴱⴻⵏⵏⴰ ⵓⵔⵛⴰⵍⵉⵎ,

ⵉⵙⵙⵎⵓⵏ ⵉⵎⵎⴻⵏⴻⵄⵔⴰⵇ ⵏ ⵉⵙⵔⴰⵉⵍ.

3 ⵏⴻⵜⵜⴰ ⵉⵙⵙⴳⴻⵏⴼⴰ ⵉⵏⵏⵉ ⵖⴰⵔⵙⴻⵏ ⵓⵍ ⵢⴰⵔⵥⴻⵏ,

ⵉⵜⵜⵛⴻⴷⴷⴰ ⵉⵢⴻⵥⵥⵉⵎⴻⵏ ⵏⵙⴻⵏ ⵉⵜⵜⴻⵇⵙⴻⵏ. ^■  

4 ⵉⵃⴻⵙⵙⴻⴱ ⵇⴻⴷⴷⴰ ⵏ ⵉⵜⵔⴰⵏ,

ⵉⵜⵜⵍⴰⵖⴰ-ⴷⴷ ⵅⴰⵙⴻⵏ ⵎⴰⵔⵔⴰ ⵙ ⵢⵉⵙⴻⵎ. ^■  

5 ⵙⵉⴷⵉⵜⵏⴻⵖ ⴷ ⴰⵎⴻⵇⵇⵔⴰⵏ ⵓ ⵊⵊⴻⵀⴷ ⵏⵏⴻⵙ ⵉⵎⵖⴰⵔ.

ⵍⴻⵄⵇⴻⵍ ⵏⵏⴻⵙ ⵡⴰⵔ ⵖⴰⵔⴻⵙ ⴱⵓ ⵍⴻⵄⴱⴰⵔ.

6 ⵙⵉⴷⵉ ⵉⵜⵜⵙⴻⵏⵏⴻⴷ ⵉⵎⵡⴰⴹⵄⴻⵏ,

ⵉⵙⵙⵀⴻⴽⴽⵡⴰ ⵉⵄⴻⴼⴼⴰⵏⴻⵏ ⴰⵍ ⵜⴰⵎⵎⵓⵔⵜ.

7 ⵇⴰⴷⴰⵎ ⵙⵉⴷⵉ ⵙ ⵓⵖⴻⵏⵏⴻⵊ,

ⵥⴻⵀⵀⴷⴻⵎ ⵉ ⴰⵔⴻⴱⴱⵉ ⵏⵏⴻⵖ ⵙ ⵍⴳⴰⵎⴱⵔⵉ.

8 ⵏⴻⵜⵜⴰ ⴷ ⵡⴻⵏⵏⵉ ⵉⴷⴷⴰⵍⴻⵏ ⴰⵊⴻⵏⵏⴰ ⵙ ⵉⵙⴻⵢⵏⵓⵜⴻⵏ,

ⴷ ⵡⴻⵏⵏⵉ ⵉⵙⵙⴻⵡⵊⴰⴷⴻⵏ ⴰⵏⵥⴰⵔ ⵉ ⵜⴻⵎⵎⵓⵔⵜ,

ⴷ ⵡⴻⵏⵏⵉ ⵉⵙⵙⵖⴻⵎⵎⴰⵢⴻⵏ ⴰⵔⵔⴱⵉⵄ ⵅ ⵉⴷⵓⵔⴰⵔ. ^■  

9 ⴷ ⵡⴻⵏⵏⵉ ⵉⵜⵜⵉⵛⴻⵏ ⵉ ⵍⵎⴰⵍ ⵎⴰⵛⵛⴰ ⵏⵏⴻⵙ,

ⵉ ⵜⴰⵔⵡⴰ ⵏ ⵉⴱⴰⵖⵍⵉⵡⴻⵏ ⵅⵎⵉ ⵉ ⵖⴰ ⵙⵖⵓⵢⵢⴻⵏ.

10 ⵏⴻⵜⵜⴰ ⵡⴰⵔ ⴷ ⴰⵙ ⵉⵜⵜⴻⵄⵊⵉⴱ ⵊⵊⴻⵀⴷ ⵏ ⵓⵢⵉⵙ,

ⵡⴰⵔ ⵢⴰⵔⴻⵟⵟⵉ ⵙ ⵉⴹⴰⵔⴻⵏ ⵏ ⵡⴻⵔⵢⴰⵥ.

11 ⵢⴰⵔⴻⵟⵟⴰ ⴰⵙ ⵉ ⵙⵉⴷⵉ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ,

ⵉⵏⵏⵉ ⵉⵙⵙⵉⵜⵎⴻⵏ ⴷⵉ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ.

12 ⴰ ⵓⵔⵛⴰⵍⵉⵎ, ⵚⴻⴱⴱⴻⵃ ⵉ ⵙⵉⴷⵉ,

ⴰ ⵚⵉⵀⵢⵓⵏ, ⵚⴻⴱⴱⴻⵃ ⵉ ⴰⵔⴻⴱⴱⵉ ⵏⵏⴻⵎ.

13 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵎⵃⴻⴷ ⵥⵥⴻⴽⵔⵓⵏⴰⵜ ⵏ ⵜⴻⵡⵡⵓⵔⴰ ⵏⵏⴻⴽ,

ⵉⴱⴰⵔⴻⴽ ⵉⵃⴻⵏⵊⵉⵔⴻⵏ ⵏⵏⴻⴽ ⴷⵉ ⵍⵡⴻⵙⵜ ⵏⵏⴻⴽ,

14 ⵏⴻⵜⵜⴰ ⵉⵡⵛⴰ ⵍⴻⵀⵏⴰ ⵉ ⵉⵢⵎⵉⵔⴻⵏ ⵏⵏⴻⴽ,

ⵉⵙⵙⵢⵉⵡⴻⵏ ⵉ ⵛⴻⴽ ⵙ ⵎⵉⵏ ⵉⵚⴻⴱⵃⴻⵏ ⵇⴰⵄ ⵏ ⵢⵉⵔⴷⴻⵏ.

15 ⵏⴻⵜⵜⴰ ⵉⵙⵙⴻⴽⴽⴰ ⵜⵉⵡⴰⵍⵉⵏ ⵏⵏⴻⵙ ⵖⴰⵔ ⵜⴻⵎⵎⵓⵔⵜ,

ⴰⵡⴰⵍ ⵏⵏⴻⵙ ⵉⵜⵜⴰⵥⵥⴻⵍ ⴰⵟⵟⴰⵙ. ^■  

16 ⵉⵜⵜⵉⵛ ⴰⴷⴼⴻⵍ ⴰⵎ ⵜⴹⵓⴼⵜ,

ⵉⵥⵥⵓⵥⵥⴰⵔⴰ ⵏⵏⴷⴰ ⵉⴳⴻⵔⵙⴻⵏ ⴰⵎ ⵉⵖⵖⴻⴹ.

17 ⵉⵙⵙⴻⴽⴽⴰ ⴰⴷⴼⴻⵍ ⵏⵏⴻⵙ ⴷ ⵉⴱⵇⵓⵇⴻⵏ,

ⵡⵉ ⵉⵥⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ ⵥⵥⴰⵜ ⵉ ⵜⴻⵙⵎⵓⴹⵉ ⵏⵏⴻⵙ?

18 ⵉⵙⵙⴻⴽⴽⴰ ⴰⵡⴰⵍ ⵏⵏⴻⵙ ⵓⵛⴰ ⵉⵜⵜⴰⵔⵔⴰ ⵜⴻⵏ ⴰⴷ ⴼⴻⵙⵢⴻⵏ,

ⵏⴻⵜⵜⴰ ⵉⵜⵜⴻⵊⵊⴰ ⴰⵙⴻⵎⵎⵉⴹ ⵏⵏⴻⵙ ⵉⵜⵜⵚⵓⴹ, ⵅⴻⵏⵏⵉ ⵜⵜⵓⵛⵔⵓⵔⴻⵏ ⵡⴰⵎⴰⵏ.

19 ⵏⴻⵜⵜⴰ ⵉⴱⴰⵔⵔⴻⵃ ⵉ ⵢⴰⵄⵇⵓⴱ ⴰⵡⴰⵍⴻⵏ ⵏⵏⴻⵙ,

ⵉ ⵉⵙⵔⴰⵉⵍ ⵜⵉⵡⴻⵚⵚⴰ ⵏⵏⴻⵙ ⴷ ⵍⴼⴰⵔⴰⵢⵉⴹ ⵏⵏⴻⵙ.

20 ⵓⵍⴰ ⵉ ⵢⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ ⵡⴰⵔ ⴷ ⴰⵙ ⵉⴳⴳⵉ ⴰⵎⵎⵓ,

ⵓ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵛⴰ ⵍⴼⴰⵔⴰⵢⵉⴹ ⵏⵏⴻⵙ. ⵀⴰⵍⵍⵉⵍⵓ-ⵢⴰⵀ! ^■