1 ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵥ ⴷⵉ ⵜⴻⵎⵎⵓⵔⵜ ⵏ ⵄⵓⵚ ⵇⵇⴰⵔⴻⵏ ⴰⵙ ⴰⵢⵓⴱ. ⴰⵔⵢⴰⵥ-ⴰ ⵜⵓⵖⴰ ⵉⴽⵎⴻⵍ ⴷ ⴰⵎⵙⴻⴳⴳⴻⴷ, ⵉⵜⵜⴻⴳⴳⵯⴻⴷ ⵥⵉ ⴰⵔⴻⴱⴱⵉ ⵓ ⵉⵜⵜⵃⴻⵢⵢⴰⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ. ^■   2 ⵜⵜⵡⴰⵔⵡⴻⵏ ⴰⵙ-ⴷⴷ ⵙⴻⴱⵄⴰ ⵏ ⵉⵃⴻⵏⵊⵉⵔⴻⵏ ⴷ ⵜⵍⴰⵜⴰ ⵏ ⵜⵃⴻⵏⵊⵉⵔⵉⵏ. 3 ⵜⴰⵃⵉⵎⴰⵔⵜ ⵏ ⵍⵎⴰⵍ ⵏⵏⴻⵙ ⴷⴰⵢⴻⵙ ⵙⴻⴱⵄⴰ-ⴰⵍⴰⴼ ⵏ ⵡⵓⴵⵉ ⵓ ⵜⴻⵍⵜ-ⴰⵍⴰⴼ ⵏ ⵉⵍⴻⵖⵎⴰⵏ ⴷ ⵅⴻⵎⵙⴰ-ⵎⵢⴰ ⵏ ⵉⴼⵓⵏⴰⵙⴻⵏ ⵏ ⵜⴻⵖⵏⴰⵛⵜ ⴷ ⵅⴻⵎⵙⴰ-ⵎⵢⴰ ⵏ ⵜⴻⵖⵢⴰⵍ, ⴰⵔⵏⵉ ⵖⴰⵔⴻⵙ ⴰⴱⴰⵔⵔⵓ ⵏ ⵉⵙⴻⵎⵖⴰⵏ. ⴰⵔⵢⴰⵥ-ⴰ ⵜⵓⵖⴰ ⴷ ⴰⵎⴻⵇⵇⵔⴰⵏ ⵅ ⵎⴰⵔⵔⴰ ⴰⵔⵔⴰⵡ ⵏ ⵛⵛⴰⵔⵇ.

4 ⵉⵃⴻⵏⵊⵉⵔⴻⵏ ⵏⵏⴻⵙ ⵏⵏⵓⵎⴻⵏ ⵜⵜⴻⴳⴳⴻⵏ ⵉⵊⵊ ⵏ ⵓⵎⴻⵏⵙⵉ, ⴽⵓⵍ ⵉⵊⵊ ⵥⵥⴰⵢⵙⴻⵏ ⵙ ⵏⵏⵓⴱⴻⵜ ⵏⵏⴻⵙ ⴷⴻⴳ ⵡⴰⵙⵙ ⵏⵏⴻⵙ ⴷⵉ ⵜⴰⴷⴷⴰⵔⵜ ⵏⵏⴻⵙ. ⵙⵙⴻⴽⴽⴰⵏ, ⵄⴰⵔⴹⴻⵏ ⵓⵍⴰ ⵅ ⵜⵍⴰⵜⴰ ⵏ ⵢⴻⵙⵙⵎⴰⵜⵙⴻⵏ ⴰⴷ ⴽⵉⴷⵙⴻⵏ ⵛⵛⴻⵏⵜ ⵓ ⴰⴷ ⴽⵉⴷⵙⴻⵏ ⵙⵡⴻⵏⵜ. 5 ⵍⴰⵎⵉ ⵄⴷⵓⵏ ⵡⵓⵙⵙⴰⵏ ⵏ ⵓⵎⴻⵏⵙⵉ, ⵉⵙⵙⴻⴽⴽ ⴰⵢⵓⴱ ⵃⵉⵎⴰ ⴰⴷ ⵜⴻⵏ ⵉⵙⵙⵇⴻⴷⴷⴻⵙ. ⵣⵉⵛ ⵖⴰⵔ ⵜⵓⴼⴼⵓⵜ ⵉⴽⴽⴰⵔ ⵓⵛⴰ ⵢⵉⵡⵉ ⴷⵉⵏ ⵜⵉⵖⴰⵔⵚⵉ ⵏ ⵡⴻⵛⵎⴰⴹ ⴰⵏⴻⵛⵜ ⵍⵄⴰⴷⴰⴷ ⵏ ⵎⴰⵔⵔⴰ ⵉⵃⴻⵏⵊⵉⵔⴻⵏ ⵏⵏⴻⵙ. ⵎⴰⵖⴰⵔ ⴰⵢⵓⴱ ⵉⵏⵏⴰ: “ⴰⴷ ⵜⴰⵖ ⵅⴹⴰⵏ ⵉⵃⴻⵏⵊⵉⵔⴻⵏ ⵉⵏⵓ ⵓ ⵃⴻⵢⵢⴷⴻⵏ ⵅ ⴰⵔⴻⴱⴱⵉ ⴷⴻⴳ ⵡⵓⵍ ⵏⵙⴻⵏ.” ⴰⵎⵎⵓ ⵉ ⵉⵜⵜⴻⴳⴳ ⴰⵢⵓⴱ ⵍⴻⴱⴷⴰ.

6 ⴷⴻⴳ ⵉⵊⵊ ⵏ ⵡⴰⵙⵙ ⵓⵙⵉⵏ-ⴷⴷ ⴰⵔⵔⴰⵡ ⵏ ⴰⵔⴻⴱⴱⵉ ⵃⵉⵎⴰ ⴰⴷ ⴱⴻⴷⴷⴻⵏ ⵥⵥⴰⵜ ⵉ ⵙⵉⴷⵉ, ⵓⵛⴰ ⵢⵓⵙⴰ-ⴷⴷ ⵓⵍⴰ ⴷ ⵛⵛⵉⵟⴰⵏ ⴷⵉ ⵍⵡⴻⵙⵜ ⵏⵙⴻⵏ. 7 ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵎⴰⵏⵉⵙ ⵉ ⴷⴷ-ⵜⵓⵙⵉⴷ ⵛⴻⴽ?” ⵢⴰⵔⵔⴰ-ⴷⴷ ⵛⵛⵉⵟⴰⵏ ⵅ ⵙⵉⴷⵉ, ⵉⵏⵏⴰ: “ⵓⵙⵉⵖ-ⴷⴷ ⵥⴻⴳ ⵡⴻⵜⵍⴰⵄ ⵅ ⵜⴻⵎⵎⵓⵔⵜ, ⴽⴽⵉⵖ ⵜⵜ ⵎⴰⵔⵔⴰ.” ^■   8 ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵎⴰ ⵜⴻⵃⴹⵉⴷ ⴰⵎⵙⴻⵅⵅⴰⵔ ⵉⵏⵓ ⴰⵢⵓⴱ? ⴰⵎⴻⵛⵏⴰⵡ ⵏⴻⵜⵜⴰ ⵡⴰⵔ ⵉⴵⵉ ⵅ ⵜⴻⵎⵎⵓⵔⵜ: ⴷ ⴰⵔⵢⴰⵥ ⵉⴽⵎⴻⵍ, ⵉⴳⴳⵓⵔ ⵏⵉⵛⴰⵏ, ⵉⵜⵜⴻⴳⴳⵯⴻⴷ ⴰⵔⴻⴱⴱⵉ ⵓ ⵉⵜⵜⵃⴻⵢⵢⴰⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ!”

9 ⵢⴰⵔⵔⴰ-ⴷⴷ ⵛⵛⵉⵟⴰⵏ ⵅ ⵙⵉⴷⵉ, ⵉⵏⵏⴰ: “ⵎⴰ ⴰⵎⴻⵏⵏⵉ ⵡⴰⵀⴰ ⵉⵜⵜⴻⴳⴳⵯⴻⴷ ⴰⵢⵓⴱ ⴰⵔⴻⴱⴱⵉ?

10 ⵎⴰ ⵡⴰⵔ ⵉⴵⵉ ⴷ ⵛⴻⴽ ⵡⴻⵏⵏⵉ ⵉⴳⴳⵉⵏ ⵉⵊⵊ ⵏ ⵡⴻⴼⵔⴰⵢ ⵏ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ ⵉ ⵏⴻⵜⵜⴰ ⴷ ⵜⴰⴷⴷⴰⵔⵜ ⵏⵏⴻⵙ ⴷ ⵎⴰⵔⵔⴰ ⵎⵉⵏ ⵖⴰⵔⴻⵙ? ⴰⵇⴰ ⵜⴱⴰⵔⴽⴻⴷ ⵜⵉⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵏⴻⵙ ⵓⵛⴰ ⵍⵎⴰⵍ ⵏⵏⴻⵙ ⵉⵎⵖⴰⵔ ⴰⵟⵟⴰⵙ ⴷⵉ ⵜⴻⵎⵎⵓⵔⵜ.

11 ⵙⵡⵉⵥⵥⴻⴹ ⵎⵖⵉⵔ ⴰⴼⵓⵙ ⵏⵏⴻⴽ ⵖⴰⵔⴻⵙ, ⵃⴰⴷⴰ ⵎⴰⵔⵔⴰ ⵎⵉⵏ ⵉⴵⴰⵏ ⵏⵏⴻⵙ, ⵎⴰ ⵅⴻⵏⵏⵉ ⵙ ⵜⵉⴷⴻⵜⵜ ⴰⴷ ⵉⴱⴻⵄⵄⴻⴷ ⵅ ⵡⵓⴷⴻⵎ ⵏⵏⴻⴽ?”

12 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵅⵥⴰⵔ, ⵎⴰⵔⵔⴰ ⵎⵉⵏ ⵖⴰⵔⴻⵙ ⴰⵇⴰ-ⵜ ⴷⴻⴳ ⵓⴼⵓⵙ ⵏⵏⴻⴽ. ⵎⵖⵉⵔ ⵡⴰⵔ ⴷ ⴰⵙ ⵙⵡⵉⵥⵥⵉⴹ ⴰⴼⵓⵙ ⵏⵏⴻⴽ ⵡⴰⵀⴰ!” ⵅⴰⵙ ⵓⵛⴰ ⵢⵓⵢⵓⵔ ⵛⵛⵉⵟⴰⵏ ⵥⵉ ⵥⵥⴰⵜ ⵏ ⵡⵓⴷⴻⵎ ⵏ ⵙⵉⴷⵉ.

13 ⴷⴻⴳ ⵡⴰⵙⵙ ⵎⵉⵏ ⴷⵉ ⵜⵓⵖⴰ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵢⴻⵙⵙⵉⵙ ⵜⵜᵉⵜⵜⴻⵏ ⵓ ⵙⴻⵙⵙⴻⵏ ⴱⵉⵏⵓ ⴷⵉ ⵜⴰⴷⴷⴰⵔⵜ ⵏ ⵓⵎⴰⵜⵙⴻⵏ ⴰⵎⴻⵏⵥⵓ, ⵉⵎⵙⴰⵔ,

14 ⴰⵇⴰ ⵢⵓⵙⴰ-ⴷⴷ ⵓⵔⴻⵇⵇⴰⵙ ⵖⴰⵔ ⴰⵢⵓⴱ, ⵉⵏⵏⴰ: “ⵉⴼⵓⵏⴰⵙⴻⵏ ⵜⵓⵖⴰ ⵛⴰⵔⵔⵥⴻⵏ ⵓ ⵜⵉⵖⵢⴰⵍ ⵀⴻⴷⴷⴰⵏⵜ ⵅ ⵓⵖⴻⵥⴷⵉⵙ ⵏⵙⴻⵏ.

15 ⵅⴻⵏⵏⵉ ⵀⴻⵊⵎⴻⵏ ⴰⵢⵜ ⵏ ⵙⴰⴱⴰ, ⴽⵙⵉⵏ ⵜⴻⵏ ⵓⵛⴰ ⵏⵖⵉⵏ ⵉⵃⵓⴷⵔⵉⵢⵢⴻⵏ ⵙ ⵍⴻⵇⴹⴻⵄ ⵏ ⵙⵙⵉⴼ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”

16 ⵓⵎⵉ ⵜⵓⵖⴰ ⵡⴰ ⵄⴰⴷ ⵉⵙⵙⴰⵡⴰⵍ, ⵢⵓⵙⴰ-ⴷⴷ ⵉⵊⵊ ⵏⵏⴻⵖⵏⵉ, ⵉⵏⵏⴰ: “ⵜⵉⵎⴻⵙⵙⵉ ⵏ ⴰⵔⴻⴱⴱⵉ ⵜⴻⵡⴹⴰ-ⴷⴷ ⵥⴻⴳ ⵓⵊⴻⵏⵏⴰ ⵓⵛⴰ ⵜⴰⵔⵖⴰ ⴷⴻⴳ ⵡⵓⴵⵉ ⴷ ⵉⵃⵓⴷⵔⵉⵢⵢⴻⵏ ⵓⵛⴰ ⵜⴻⵛⵛⴰ ⵉ-ⵜⴻⵏ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”

17 ⵓⵎⵉ ⵜⵓⵖⴰ ⵡⴰ ⵄⴰⴷ ⵉⵙⵙⴰⵡⴰⵍ, ⵢⵓⵙⴰ-ⴷⴷ ⵉⵊⵊ ⵏⵏⴻⵖⵏⵉ, ⵉⵏⵏⴰ: “ⴰⵢⵜ ⵏ ⵉⴽⴰⵍⴷⴰⵏⵉⵢⵢⴻⵏ ⵙⵙⴱⴻⴷⴷⴻⵏ ⵜⵍⴰⵜⴰ ⵏ ⴱⴰⵏⴷⵉⵢⵢⴰⵜ, ⵀⴻⵊⵎⴻⵏ ⵅ ⵉⵍⴻⵖⵎⴰⵏ, ⴽⵙⵉⵏ ⵜⴻⵏ ⵓⵛⴰ ⵏⵖⵉⵏ ⵉⵃⵓⴷⵔⵉⵢⵢⴻⵏ ⵙ ⵍⴻⵇⴹⴻⵄ ⵏ ⵙⵙⵉⴼ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”

18 ⵓⵎⵉ ⵜⵓⵖⴰ ⵡⴰ ⵄⴰⴷ ⵉⵙⵙⴰⵡⴰⵍ, ⵢⵓⵙⴰ-ⴷⴷ ⵉⵊⵊ ⵏⵏⴻⵖⵏⵉ, ⵉⵏⵏⴰ: “ⵉⵃⴻⵏⵊⵉⵔⴻⵏ ⵏⵏⴻⴽ ⴷ ⵢⴻⵙⵙⵉⵛ ⵛⵛⵉⵏ ⵓ ⵙⵡⵉⵏ ⴱⵉⵏⵓ ⴷⵉ ⵜⴰⴷⴷⴰⵔⵜ ⵏ ⵓⵎⴰⵜⵙⴻⵏ, ⴰⵎⴻⵏⵥⵓ.

19 ⵓⵛⴰ ⵅⵥⴰⵔ, ⵢⵓⵙⴰ-ⴷⴷ ⵉⵊⵊ ⵏ ⵓⵚⴻⵎⵎⵉⴹ ⵉⵡⵄⴰⵔ ⵅ ⵜⵉⵡⴰ ⵏ ⵍⴻⵅⵍⴰ, ⵉⵍⵇⴻⴼ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵜⴰⴷⴷⴰⵔⵜ ⵓⵛⴰ ⵜⴻⵡⴹⴰ ⵜⴰⴷⴷⴰⵔⵜ ⵅ ⵉⵃⵓⴷⵔⵉⵢⵢⴻⵏ ⴷ ⵜⵃⵓⴷⵔⵉⵢⵢⵉⵏ ⵓⵛⴰ ⵎⵎⵓⵜⴻⵏ ⵏⵉⵜⵏⵉ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”

20 ⵅⴻⵏⵏⵉ ⵉⴽⴽⴰⵔ ⴰⵢⵓⴱ, ⵉⵛⴰⵔⵔⴻⴳ ⴰⵙⴻⵍⵀⴰⵎ ⵏⵏⴻⵙ, ⵉⵃⴻⴼⴼ ⴰⵥⴻⴵⵉⴼ ⵏⵏⴻⵙ, ⵉⵡⴹⴰ ⵅ ⵜⴻⵎⵎⵓⵔⵜ ⵓⵛⴰ ⵢⵓⴹⴰⵔ, 21 ⵉⵏⵏⴰ: “ⴷ ⴰⵄⴰⵔⵢⴰⵏ ⵉ ⴷⴷ-ⵓⵙⵉⵖ ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ ⵓ ⴷ ⴰⵄⴰⵔⵢⴰⵏ ⵉ ⴷⵉⵏ ⵉ ⵖⴰ ⴷⴻⵡⵍⴻⵖ. ⵙⵉⴷⵉ ⵉⵡⵛⴰ, ⵙⵉⴷⵉ ⵉⴽⴽⴻⵙ, ⴰⴷ ⵉⵜⵜⵡⴰⴱⴰⵔⴻⴽ ⵉⵙⴻⵎ ⵏ ⵙⵉⴷⵉ.” ^■   22 ⴷⵉ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵅⴹⵉ ⴰⵢⵓⴱ ⵛⴰ ⵓ ⵡⴰⵔ ⵉⵏⵏⵉ ⵎⵉⵏ ⵡⴰⵔ ⵉⵄⴻⴷⴷⵍⴻⵏ ⵅ ⴰⵔⴻⴱⴱⵉ.