145
1 ⵉⵥⵍⵉ ⵏ ⵓⵚⴻⴱⴱⴻⵃ ⵏ ⴷⴰⵡⵓⴷ. ⴰⵍⵉⴼ. ⴰ, ⴰⵔⴻⴱⴱⵉ ⵉⵏⵓ, ⴰⵊⴻⴵⵉⴷ, ⵏⴻⵛⵛ ⴰⴷ ⵛⴻⴽ ⵙⵙⵄⵓⴵⴻⵖ,
ⴰⴷ ⴱⴰⵔⴽⴻⵖ ⵉⵙⴻⵎ ⵏⵏⴻⴽ ⵉ ⵍⴻⴱⴷⴰ ⵇⴰⵄ.
2 ⴱⵉⵜ. ⴽⵓⵍ ⴰⵙⵙ ⴰⴷ ⵛⴻⴽ ⴱⴰⵔⴽⴻⵖ,
ⴰⴷ ⵙⵙⴻⵎⵖⴰⵔⴻⵖ ⵉⵙⴻⵎ ⵏⵏⴻⴽ ⵉ ⵍⴻⴱⴷⴰ ⵇⴰⵄ.
3 ⴳⵉⵎⴻⵍ. ⵙⵉⴷⵉ ⴷ ⴰⵎⴻⵇⵇⵔⴰⵏ ⵓ ⵏⴻⵜⵜⴰ ⵉⵙⵙⴷⵉⵀⴻⴵ ⴰⵙⴻⵎⵖⴰⵔ ⴰⵟⵟⴰⵙ.
ⵍⴻⵎⵖⴰⵔⴻⵜ ⵏⵏⴻⵙ ⵡⴰⵔ ⴷⴰⵢⴻⵙ ⴱⵓ ⵜⴰⵔⴻⵥⵥⵓⵜ. ■
4 ⴷⴰⵍⵉⵜ. ⵊⵊⵉⵍ ⴰⵡⴰⵔⵏⵉ ⵊⵊⵉⵍ ⴰⴷ ⵉⵙⵙⴻⵎⵖⴰⵔ ⵍⴻⵅⴷⴰⵢⴻⵎ ⵏⵏⴻⴽ,
ⴰⴷ ⴱⴰⵔⵔⵃⴻⵏ ⵙ ⵜⵎⴻⴳⴳⴰ ⵏⵏⴻⴽ ⵜⵉⵎⴻⵇⵇⵔⴰⵏⵉⵏ. ■
5 ⵀⵉ. ⵏⴻⵛⵛ ⴰⴷ ⵙⵙⵉⵡⵍⴻⵖ ⵅ ⵜⴻⵙⵙⵉⵇⵜ ⵏ ⵓⵄⵓⴵⵉ ⵏ ⵍⵄⴰⴹⴰⵎⴰ ⵏⵏⴻⴽ,
ⵅ ⵍⴻⵅⴱⴰⵔ ⵏ ⵍⵎⵓⵄⵊⵉⵥⴰⵜ ⵏⵏⴻⴽ. □
6 ⵡⴰⵡ. ⵏⵉⵜⵏⵉ ⴰⴷ ⵙⵙⵉⵡⵍⴻⵏ ⵅ ⵊⵊⵀⴻⴷ ⵏ ⵜⵎⴻⴳⴳⴰ ⵏⵏⴻⴽ ⵉⵙⵙⴰⴳⴳⵯⴰⴷⴻⵏ,
ⵓ ⵏⴻⵛⵛ ⴰⴷ ⴱⴰⵔⵔⵃⴻⵖ ⵙ ⵍⴻⵎⵖⴰⵔⴻⵜ ⵏⵏⴻⴽ.
7 ⵣⴰⵢⵉⵏ. ⵍⵉⴷⴰⵔⴻⵜ ⵏ ⵜⵛⵓⵏⵉ ⵏⵏⴻⴽ ⵉⴼⴻⵢⵢⴹⴻⵏ ⴳⴳⵉⵏ ⵜⵜ ⴰⵎ ⵉⵊⵊ ⵏ ⵍⵄⵓⵏⵚⴰⵔ ⵉⵜⵜⵛⵓⵔⵛⵓⵔ,
ⴰⴷ ⵙⵍⵉⵡⵍⵉⵡⴻⵏ ⵉ ⵜⵙⴻⴳⴷⴰ ⵏⵏⴻⴽ. ■
8 ⵅⵉⵜ. ⵙⵉⴷⵉ ⴷ ⴰⵔⵃⵉⵎ ⴷ ⴰⵃⵏⵉⵏ,
ⵖⴰⵔⴻⵙ ⵜⵜⴰⵙⵉⵄ ⵏ ⵍⵅⴰⴹⴰⵔ ⴷ ⵡⴰⵟⵟⴰⵙ ⵏ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ. ■
9 ⵜⵉⵜ. ⵙⵉⴷⵉ ⴷ ⴰⵚⴻⴱⵃⴰⵏ ⵉ ⵎⴰⵔⵔⴰ,
ⴰⵔⵔⴻⵃⵎⴻⵜ ⵏⵏⴻⵙ ⴰⵇⴰ-ⵜⵜ ⵙⴻⵏⵏⴻⵊ ⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ.
10 ⵢⵓⴷ. ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⴽ, ⴰ ⵙⵉⴷⵉ, ⴰⴷ ⵛⴻⴽ ⵇⴰⴷⵉⵏ,
ⵉⵎⵜⵉⵇⵇⴰⵏ ⵏⵏⴻⴽ ⴰⴷ ⵛⴻⴽ ⴱⴰⵔⴽⴻⵏ.
11 ⴽⴰⴼ. ⵏⵉⵜⵏⵉ ⴰⴷ ⵙⵙⵉⵡⵍⴻⵏ ⵅ ⵓⵄⵓⴵⵉ ⵏ ⵜⴳⴻⵍⴷⵉⵜ ⵏⵏⴻⴽ,
ⵓ ⴰⴷ ⵉⴷⴰⵔⴻⵏ ⵜⵉⵎⴻⴳⴳⴰ ⵏⵏⴻⴽ ⵜⵉⵎⴻⵇⵇⵔⴰⵏⵉⵏ,
12 ⵍⴰⵎⵉⴷ. ⵃⵉⵎⴰ ⴰⴷ ⴱⴰⵔⵔⵃⴻⵏ ⵙ ⵜⵎⴻⴳⴳⴰ ⵏⵏⴻⵙ ⵜⵉⵎⴻⵇⵇⵔⴰⵏⵉⵏ ⵉ ⵜⴰⵔⵡⴰ ⵏ ⴱⵏⴰⴷⴻⵎ,
ⵓⵍⴰ ⵙ ⵓⵄⵓⴵⵉ ⵏ ⵍⵄⴰⴹⴰⵎⴰ ⵏ ⵜⴳⴻⵍⴷⵉⵜ ⵏⵏⴻⵙ.
13 ⵎⵉⵎ. ⵜⴰⴳⴻⵍⴷⵉⵜ ⵏⵏⴻⴽ ⴷ ⵉⵛⵜ ⵏ ⵜⴳⴻⵍⴷⵉⵜ ⵉ ⵎⴰⵔⵔⴰ ⵉⴽⵓⴷⴻⵏ,
ⵍⴻⵃⴽⴰⵎⴻⵜ ⵏⵏⴻⴽ ⴰⴷ ⵜⵉⵍⵉ ⵅ ⴽⵓⵍ ⵊⵊⵉⵍ.
14 ⵙⴰⵎⵉⵅ. ⵙⵉⴷⵉ ⵉⵜⵜⵖⴻⵎⵎⴻⴷ ⵎⴰⵔⵔⴰ ⵉⵏⵏⵉ ⵉⵡⴹⴰⵏ,
ⵉⵜⵜⵙⴻⴳⴳⴻⵎ ⵎⴰⵔⵔⴰ ⵉⵏⵏⵉ ⵉⵇⵡⵉⵙⴻⵏ.
15 ⵄⴰⵢⵉⵏ. ⵎⴰⵔⵔⴰ ⵜⵉⵟⵟⴰⵡⵉⵏ ⵜⵜⵔⴰⵊⴰⵏⵜ ⵛⴻⴽ,
ⵛⴻⴽ ⵜᵉⵜⵜⵉⵛⴻⴷ ⴰⵙⴻⵏ ⵎⴰⵛⵛⴰ ⴷⵉ ⵍⵡⴻⵇⵜ ⵏⵙⴻⵏ ⵏⵉⵛⴰⵏ. ■
16 ⴱⵉ. ⵛⴻⴽ ⵜⴰⵔⴻⵥⵥⵎⴻⴷ ⴰⴼⵓⵙ ⵏⵏⴻⴽ,
ⵜⴻⵙⵙⵢⴰⵡⴰⵏⴻⴷ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ ⴰⴽ-ⴷ ⵎⵉⵏ ⵉⵅⵙ ⵍⵅⴰⴹⴰⵔ ⵏⵙⴻⵏ.
17 ⵜⵙⴰⴷⵉ. ⵙⵉⴷⵉ ⴰⵇⴰ-ⵜ ⵏⵉⵛⴰⵏ ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ,
ⵉⵜⵜⴻⴳⴳ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ.
18 ⵇⵓⴼ. ⵙⵉⴷⵉ ⵢⵓⴷⴻⵙ ⵉ ⵎⴰⵔⵔⴰ ⵉⵏⵏⵉ ⵅⴰⵙ ⵉⵜⵜⵍⴰⵖⴰⵏ,
ⵎⴰⵔⵔⴰ ⵉⵏⵏⵉ ⵅⴰⵙ ⵉⵜⵜⵍⴰⵖⴰⵏ ⴷⵉ ⵜⵉⴷⴻⵜⵜ.
19 ⵔⵉⵅ. ⵏⴻⵜⵜⴰ ⵉⴳⴳⴰ ⵙ ⵍⵅⴰⴹⴰⵔ ⵉ ⵎⴰⵔⵔⴰ ⵉⵏⵏⵉ ⵜ ⵉⵜⵜⴻⴳⴳⵯⴷⴻⵏ,
ⵉⵜⵜⴻⵙⵍⴰ ⵉⵖⵓⵢⵢⴰⵏ ⵏⵙⴻⵏ ⵓ ⵉⵙⵙⴻⵏⵊⴰⵎ ⵉ-ⵜⴻⵏ.
20 ⵛⵉⵏ. ⵙⵉⴷⵉ ⵉⵃⴻⵟⵟⴰ ⵅ ⵎⴰⵔⵔⴰ ⵉⵏⵏⵉ ⵜ ⵉⵜⵜⴻⵅⵙⴻⵏ,
ⵎⴰⵛⴰ ⵎⴰⵔⵔⴰ ⵉⵄⴻⴼⴼⴰⵏⴻⵏ ⵉⵜⵜⴻⵃⵃⴰ ⵉ-ⵜⴻⵏ.
21 ⵜⴰⵡ. ⴰⵇⴻⵎⵎⵓⵎ ⵉⵏⵓ ⴰⴷ ⵉⵙⵙⵉⵡⴻⵍ ⵅ ⵓⵚⴻⴱⴱⴻⵃ ⵏ ⵙⵉⴷⵉ,
ⵎⴰⵔⵔⴰ ⴷⴷⴰⵜ ⴰⴷ ⵉⴱⴰⵔⴻⴽ ⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ,
ⵉ ⵍⴻⴱⴷⴰ ⵇⴰⵄ.