1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ.

2 ⴼⴻⴽⴽ ⴰⵢⵉ ⵥⴻⴳ ⵉⵄⴻⴼⴼⴰⵏⴻⵏ, ⴰ ⵙⵉⴷⵉ,

ⵃⴹⴰ ⴰⵢⵉ ⵥⴻⴳ ⵉⵔⵢⴰⵥⴻⵏ ⵏ ⵍⵄⵓⵏⴼ,

3 ⵉⵏⵏⵉ ⵉⵜⵜⵅⴰⵔⵔⵚⴻⵏ ⴷⴻⴳ ⵡⵓⵍ ⵏⵙⴻⵏ ⴷⵉ ⵍⵖⴰⵔ,

ⵓ ⵙⵙⴻⴽⴽⴰⵔⴻⵏ ⵉⵎⴻⵏⵖⴰⵏ ⴷⵉ ⵎⴰⵔⵔⴰ ⵓⵙⵙⴰⵏ.

4 ⵏⵉⵜⵏⵉ ⵙⵙⵇⴻⴹⵄⴻⵏ ⵉⵍⵙⴰⵡⴻⵏ ⵏⵙⴻⵏ ⴰⵎ ⵢⵉⵊⵊ ⵏ ⵓⴼⵉⵖⴰⵔ,

ⵙⵙⴻⵎ ⵉⵃⵎⴰ ⴰⵇⴰ-ⵜ ⵙⴰⴷⵓ ⵉⵢⴻⵏⵛⵉⵛⴻⵏ ⵏⵙⴻⵏ. ⵙⵉⵍⴰⵀ. ^■  

5 ⵃⴹⴰ ⵅⴰⴼⵉ, ⴰ ⵙⵉⴷⵉ, ⵥⴻⴳ ⵉⴼⴰⵙⵙⴻⵏ ⵏ ⵉⵄⴻⴼⴼⴰⵏⴻⵏ,

ⵙⵙⴰⵔ ⴰⵢⵉ ⵥⴻⴳ ⵉⵔⵢⴰⵥⴻⵏ ⵏ ⵍⵄⵓⵏⴼ, ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴰⵢⵉ ⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ. ^□  

6 ⴰⵢⵜ ⵏ ⴱⵓ-ⵏⵏⴼⴰⵅⴻⵜ ⵙⵙⵏⵓⴼⴼⴰⵔⴻⵏ ⵅⴰⴼⵉ ⵉⵊⵊ ⵏ ⵍⴼⴻⵅ,

ⵜⵜⴱⴻⵥⵥⴰⵄⴻⵏ ⵜⵉⵙⴻⵖⵡⵉⵏ ⴰⵎ ⵉⵛⵜ ⵏ ⵜⵔⴰⵛⵛⴰ ⵖⴰⵔ ⵓⵖⴻⵥⴷⵉⵙ ⵏ ⵡⴻⴱⵔⵉⴷ,

ⴰⵇⴰ ⵜⵜⴻⴳⴳⴻⵏ ⴰⵢⵉ ⵜⵉⵅⴻⴼⵛⵉⵏ. ⵙⵉⵍⴰⵀ. ^■  

7 ⵏⴻⵛⵛ ⵏⵏⵉⵖ ⵉ ⵙⵉⴷⵉ: “ⵛⴻⴽ ⴷ ⴰⵔⴻⴱⴱⵉ ⵉⵏⵓ!”

ⵙⴻⵍ, ⴰ ⵙⵉⴷⵉ, ⵖⴰⵔ ⵜⵎⵉⵊⵊⴰ ⵏ ⵓⵥⴰⵡⴻⴳ ⵉⵏⵓ.

8 ⴰ ⵙⵉⴷⵉ, ⵙⵉⴷⵉ ⵉⵏⵓ, ⵊⵊⴻⵀⴷ ⵏ ⵓⵙⴻⵏⵊⴻⵎ ⵉⵏⵓ,

ⴷⴻⵍ ⴰⵥⴻⴵⵉⴼ ⵉⵏⵓ ⴷⴻⴳ ⵡⴰⵙⵙ ⵏ ⵍⵃⴻⵙⵙ ⵏ ⵍⴻⵙⵏⴰⵃ.

9 ⴰ ⵙⵉⴷⵉ, ⵡⴰⵔ ⵜⵜⴻⵊⵊⵉ ⴰⵄⴻⴼⴼⴰⵏ ⴰⴷ ⵢⴰⵔⵔ ⵎⴻⵥⵔⵉ.

ⵡⴰⵔ ⵜⵜⴻⴳⴳ ⵜⵜⴰⵙⵉⵄ ⵉ ⵡⴻⵏⵡⴰⵢ ⵏⵏⴻⵙ ⵉⵄⴻⴼⴼⵏⴻⵏ,

ⵓⵛⴰ ⴰⴷ ⵙⵙⵄⵓⴵⴻⵏ ⵉⵅⴻⴼ ⵏⵙⴻⵏ. ⵙⵉⵍⴰⵀ.

10 ⵅ ⵓⵥⴻⴵⵉⴼ ⵏ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⴷⴷ-ⵉⵏⵏⴹⴻⵏ,

ⵉⵍⵉ ⴰⴷ ⵜⴻⵏ ⵉⴷⴻⵍ ⵓⵛⴻⵇⵇⴻⴼ ⵏ ⵉⵢⴻⵏⵛⵉⵛⴻⵏ ⵏⵙⴻⵏ,

11 ⴻⵊⵊ ⴰⴷ ⵅⴰⵙⴻⵏ ⴽⴻⴱⴱⴻⵏ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ,

ⵉⵍⵉ ⵏⴻⵜⵜⴰ ⴰⴷ ⵜⴻⵏ ⵉⵖⴹⴻⵔ ⴷⵉ ⵜⵎⴻⵙⵙⵉ, ⴷⵉ ⵍⵃⴻⵎⵍⴰⵜ ⵢⵓⴵⵖⴻⵏ,

ⵃⵉⵎⴰ ⵡⴰⵔ ⵜⵜⴻⴽⴽⴰⵔⴻⵏ ⵄⴰⴷ.

12 ⴻⵊⵊ ⴰⵔⵢⴰⵥ ⵉ ⵉⵛⴻⵇⵇⴼⴻⵏ ⵙ ⵢⵉⵍⴻⵙ ⵡⴰⵔ ⵉⵜⵜⵖⵉⵎⵉ ⵉⴱⴻⴷⴷ ⵅ ⵜⴻⵎⵎⵓⵔⵜ,

ⵉⵍⵉ ⴰⵔⵢⴰⵥ ⴱⵓ-ⵍⴻⵅⵛⵓⵏⴻⵜ, ⴰⵇⴰ ⴰⴷ ⵉⵜⵜⵡⴰⵄⴰⵔⵏ ⵙ ⵍⵖⴰⵔ ⵉ ⵉⴳⴳⴰ

ⴰⵍ ⵉ ⵖⴰ ⵉⵡⴹⴰ ⴷⴻⵖⵢⴰ ⴷⵉ ⵜⴻⵅⵛⴻⴼⵜ.

13 ⵏⴻⵛⵛ ⵙⵙⵏⴻⵖ, ⴰⵇⴰ ⵙⵉⴷⵉ ⴰⴷ ⵉⵙⵙⴻⵇⴼⴻⵍ ⴷⴷⴻⵄⵡⴻⵜ ⵏ ⵍⵎⵓⵙⴰⴽⵉⵏ,

ⵍⵃⴻⵇⵇ ⵏ ⵉⵎⴻⵥⵍⴰⴹ.

14 ⵙ ⵜⵉⴷⴻⵜⵜ, ⵉⵎⵙⴻⴳⴳⴰⴷⴻⵏ ⴰⴷ ⵇⴰⴷⴰⵏ ⵉⵙⴻⵎ ⵏⵏⴻⴽ,

ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵥⴻⵎⵎⴰⵔⴻⵏ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ.