139
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵏ ⴷⴰⵡⵓⴷ. ⴰⵥⴻⵀⵀⴻⴷ. ⴰ ⵙⵉⴷⵉ, ⵛⴻⴽ ⵜⴱⴻⵇⵇⵛⴻⴷ ⴰⵢⵉ ⵓ ⵜⴻⵙⵙⵏⴻⴷ ⴰⵢⵉ.
2 ⵛⴻⴽ ⵜⴻⵙⵙⵏⴻⴷ ⴰⵖⵉⵎⵉ ⵉⵏⵓ ⴷ ⵓⴱⴻⴷⴷⵉ ⵉⵏⵓ,
ⵥⵉ ⵍⴰⴳⴳⵯⴰⵊ ⵜⴼⴻⵀⵀⵎⴻⴷ ⵉⵅⴰⵔⵔⵉⵚⴻⵏ ⵉⵏⵓ.
3 ⵅⵎⵉ ⴳⴳⵓⵔⴻⵖ ⵓ ⵅⵎⵉ ⵟⵟⵚⴻⵖ ⵜⴰⵔⴻⵥⵥⵓⴷ ⴷⴰⵢⵉ,
ⴰⵇⴰ ⵛⴻⴽ ⵜⴻⵙⵙⵏⴻⴷ ⵎⴰⵔⵔⴰ ⵉⴱⵔⵉⴷⴻⵏ ⵉⵏⵓ.
4 ⵎⵉⵏⵥⵉ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵡⴰⵡⴰⵍ ⵅ ⵢⵉⵍⴻⵙ ⵉⵏⵓ,
ⵓ ⵅⵥⴰⵔ, ⵛⴻⴽ ⴰ ⵙⵉⴷⵉ, ⵜⴻⵙⵙⵏⴻⴷ ⵜ ⴽⵓⵍⵛⵉ.
5 ⵛⴻⴽ ⵜⵃⴻⵚⵚⴰⵔⴻⴷ ⴰⵢⵉ ⵥⵉ ⴹⴻⴼⴼⴰⵔ ⵓ ⵥⵉ ⵥⵥⴰⵜ,
ⵜⴻⵙⵙⴰⵔⵙⴻⴷ ⵅⴰⴼⵉ ⵜⴰⵍⴻⵇⵇⴰ ⵏ ⵓⴼⵓⵙ ⵏⵏⴻⴽ.
6 ⵜⵓⵙⵙⵏⴰ ⴰⵢⴰ ⴷ ⴰⵜⴻⴱⵀⴻⵜ ⵉ ⵏⴻⵛⵛ,
ⵜⵓⵄⵍⴰ ⵅⴰⴼⵉ, ⵡⴰⵔ ⵥⴻⵎⵎⴰⵔⴻⵖ ⴰⴷ ⵜⵜ ⴰⵡⴹⴻⵖ.
7 ⵖⴰⵔ ⵎⴰⵏⵉ ⵥⴻⵎⵎⴰⵔⴻⵖ ⴰⴷ ⵔⴰⵃⴻⵖ ⵥⵉ ⴰⵔⵔⵓⵃ ⵏⵏⴻⴽ,
ⵖⴰⵔ ⵎⴰⵏⵉ ⵉ ⵖⴰ ⴰⵔⴻⵡⵍⴻⵖ ⵥⴻⴳ ⵡⵓⴷⴻⵎ ⵏⵏⴻⴽ?
8 ⵎⴰⵍⴰ ⴳⴻⵄⵄⴷⴻⵖ ⵖⴰⵔ ⵓⵊⴻⵏⵏⴰ, ⴰⵇⴰ ⵛⴻⴽ ⴷⵉⵏⵏⵉ,
ⵎⴰⵍⴰ ⴳⴳⵉⵖ ⵍⴰⵅⴰⵔⵜ ⴷ ⵜⴰⵙⵙⵓⵜ ⵉⵏⵓ,
ⵅⵥⴰⵔ, ⴰⵇⴰ ⵛⴻⴽ ⵓⵍⴰ ⴷⵉⵏⵏⵉ, ■
9 ⵎⴰⵍⴰ ⴽⵙⵉⵖ ⴰⴼⵔⵉⵡⴻⵏ ⴰⵎ ⵜⴼⴰⵡⵜ ⵏ ⵍⴻⴼⵊⴰⵔ,
ⴰⴷ ⵥⴻⴷⵖⴻⵖ ⵖⴰⵔ ⵓⵏⴻⴳⴳⴰⵔ ⵇⴰⵄ ⵏ ⵍⴻⴱⵃⴰⵔ, □
10 ⵅⴻⵏⵏⵉ ⵓⵍⴰ ⴷⵉⵏⵏⵉ ⴰⴷ ⴰⵢⵉ ⵉⵏⴷⴻⵀ ⵓⴼⵓⵙ ⵏⵏⴻⴽ,
ⴰⴼⵓⵙ ⵏⵏⴻⴽ ⴰⴼⵓⵙⵉ ⴰⴷ ⴰⵢⵉ ⵉⵟⵟⴻⴼ.
11 ⵎⴰⵍⴰ ⵏⵏⵉⵖ: “ⵉⵡⴰ ⵜⴰⴵⴻⵙⵜ, ⵡⴹⴰ-ⴷⴷ ⵅⴰⴼⵉ,
ⵅⴻⵏⵏⵉ ⴵⵉⵍⴻⵜ ⴷ ⵜⴼⴰⵡⵜ ⵉ ⴷ ⴰⵢⵉ ⵉⵇⵓⵡⵡⴰⵔⴻⵏ.
12 ⵉ ⵛⴻⴽ ⵜⴰⴵⴻⵙⵜ ⵡⴰⵔ ⵜⴻⴵⵉ ⴷ ⵟⵟⵍⴰⵎ,
ⵉ ⵛⴻⴽ ⴵⵉⵍⴻⵜ ⵜᵉⵜⵜⴻⴳⴳ ⵜⴼⴰⵡⵜ ⴰⵎ ⵓⵥⵉⵍ,
ⵉ ⵛⴻⴽ ⵜⴰⴵⴻⵙⵜ ⴰⵇⴰ-ⵜⵜ ⴰⵎ ⵜⴼⴰⵡⵜ.
13 ⵎⵉⵏⵥⵉ ⵛⴻⴽ ⵜⵅⴻⵍⵇⴻⴷ-ⴷⴷ ⵜⵉⵥⵥⴰⵍ ⵉⵏⵓ,
ⵜⵎⵓⴷⴻⴷ ⴰⵢⵉ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ.
14 ⵇⴰⴷⵉⵖ ⵛⴻⴽ ⵓⵎⵉ ⴷⴷ-ⵜⵜⵡⴰⵅⴻⵍⵇⴻⵖ ⵥⴻⴳ ⵉⵛⵜ ⵏ ⵜⴻⴱⵔⵉⴷⵜ ⵏ ⵍⴻⵄⵊⴻⴱ ⴷ ⵜⴰⵎⴻⵇⵇⵔⴰⵏⵜ.
ⵜⵉⵎⴻⴳⴳⴰ ⵏⵏⴻⴽ ⴷ ⵍⵎⵓⵄⵊⵉⵥⴰⵜ, ⵍⴻⵄⵎⴰⵔ ⵉⵏⵓ ⵜⴻⵙⵙⴻⵏ ⵜ ⵎⵍⵉⵃ ⵇⴰⵄ.
15 ⵉⵅⵙⴰⵏ ⵉⵏⵓ ⵜⵓⵖⴰ ⵡⴰⵔ ⵅⴰⴼⴻⴽ ⵏⵏⵓⴼⴼⴰⵔⴻⵏ,
ⵓⵎⵉ ⵜⵜⵡⴰⴳⴳⴻⵖ ⴷⵉ ⵜⵏⵓⴼⴼⵔⴰ,
ⵜⵜⵡⴰⵎⵓⴷⴻⵖ ⴰⵎ ⵉⵊⵊ ⵏ ⵓⴱⵓⵔⴹⴰ ⴷⵉ ⵍⴰⴵⴰⵖ ⵏ ⵜⴻⵎⵎⵓⵔⵜ. ■
16 ⵜⵉⵟⵟⴰⵡⵉⵏ ⵏⵏⴻⴽ ⵥⵔⵉⵏⵜ ⴰⴱⴻⴷⴷⵓ ⵉⵏⵓ ⵉⴹⴻⴼⵚⴻⵏ.
ⴷⴻⴳ ⵡⴻⴷⵍⵉⵙ ⵏⵏⴻⴽ ⵉⵜⵜⵡⴰⵏⵏⴹⴻⵏ ⴰⵇⴰ ⵎⴰⵔⵔⴰ ⵢⵓⵔⴰⵏ,
ⴰⵇⴰ ⵓⵙⵙⴰⵏ ⵉ ⵜⵓⵖⴰ ⵜⵜⵡⴰⵔⴻⵛⵎⴻⵏ ⵎⴻⵍⵎⵉ ⵜⵓⵖⴰ ⵄⴰⴷ ⵡⴰⵔ ⵉⴵⵉ ⵓⵍⴰ ⴷ ⵉⵊⵊⴻⵏ ⵥⵥⴰⵢⵙⴻⵏ.
17 ⵎⴰⵎⵎⴻⵛ ⵖⴰⵔⵉ ⵜⵜⵄⵉⵥⵥⴰⵏ ⵉⵅⴰⵔⵔⵉⵚⴻⵏ ⵏⵏⴻⴽ, ⴰ ⴰⵔⴻⴱⴱⵉ,
ⵎⴰⵎⵎⴻⵛ ⵉⵎⵖⴰⵔ ⵓⴱⴰⵔⵔⵓ ⵏⵙⴻⵏ!
18 ⵎⴰⵍⴰ ⵅⵙⴻⵖ ⴰⴷ ⵜⴻⵏ ⵃⴻⵙⴱⴻⵖ, ⴰⵇⴰ ⴰⵜⴻⵏ ⴽⵜⴰⵔ ⴰⵟⵟⴰⵙ ⵥⴻⴳ ⵢⴻⵊⴷⵉ,
ⵓ ⵅⵎⵉ ⴼⴰⵇⴻⵖ, ⴰⵇⴰ ⴰⵢⵉ ⵄⴰⴷ ⴰⴽⵉⴷⴻⴽ.
19 ⴰ ⴰⵔⴻⴱⴱⵉ, ⵎⴻⵄⵍⵉⴽ ⵉ ⵖⴰ ⵜⴻⵏⵖⴻⴷ ⵅⴻⵏⵏⵉ ⴰⵄⴻⴼⴼⴰⵏ,
ⵎⴰⵄⵍⵉⴽ ⵉ ⵖⴰ ⵜⴻⵊⵊⴻⴷ ⵉⵔⵢⴰⵥⴻⵏ ⵉ ⵉⵙⵙⴰⵥⵥⴰⵍⴻⵏ ⵉⴷⴰⵎⵎⴻⵏ ⴰⴷ ⵅⴰⴼⵉ ⴰⴳⴳⵯⴻⵊⵊⴻⵏ,
20 ⵉⵏⵏⵉ ⵅⴰⴽ ⵉⵙⵙⴰⵡⴰⵍⴻⵏ ⵙ ⵜⵃⵔⴰⵢⵎⴻⵛⵜ,
ⵍⵄⴻⴷⵢⴰⵏ ⵏⵏⴻⴽ ⵉⵏⵏⵉ ⵉⵏⴻⵟⵟⵇⴻⵏ ⵉⵙⴻⵎ ⵏⵏⴻⴽ ⴷⵉ ⵍⴱⴰⵟⴻⵍ.
21 ⴰ ⵙⵉⴷⵉ, ⵎⴰ ⵡⴰⵔ ⵛⴰⵔⵔⵀⴻⵖ ⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ,
ⵓ ⵎⴰ ⵡⴰⵔ ⵜⵜⵄⵉⴼⴼⴻⵖ ⵉⵏⵏⵉ ⴰⴽⵉⴷⴻⴽ ⵉⵜⵜⴻⵎⵄⴰⵍⴰⵏ?
22 ⵏⴻⵛⵛ ⵛⴰⵔⵔⵀⴻⵖ ⵜⴻⵏ ⵉⵊⵊ ⵏ ⵡⴻⵛⵔⴰⵀ ⵉⴽⵎⴻⵍ,
ⴰⵇⴰ ⵏⵉⵜⵏⵉ ⴷⴻⵡⵍⴻⵏ ⴰⵢⵉ ⴷ ⵍⵄⴻⴷⵢⴰⵏ.
23 ⴰⵔⵥⵓ ⵅⴰⴼⵉ, ⴰ ⴰⵔⴻⴱⴱⵉ, ⵙⵙⴻⵏ ⵓⵍ ⵉⵏⵓ,
ⵇⴻⴵⴻⴱ ⴰⵢⵉ ⵓ ⵙⵙⴻⵏ ⵉⵅⴰⵔⵔⵉⵚⴻⵏ ⵉⵏⵓ. ■
24 ⵅⵥⴰⵔ-ⴷⴷ, ⵎⴰ ⴰⵇⴰ ⴰⵢⵉ ⴷⵉ ⵛⴰ ⵏ ⵡⴻⴱⵔⵉⴷ ⵏ ⵍⴻⵇⵊⴰⵃⴻⵜ
ⵓ ⵏⴷⴻⵀ ⴰⵢⵉ ⵖⴰⵔ ⵡⴻⴱⵔⵉⴷ ⵏ ⵍⴻⴱⴷⴰ.