109
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ. ⴰ ⴰⵔⴻⴱⴱⵉ ⵏ ⵓⵚⴻⴱⴱⴻⵃ ⵉⵏⵓ, ⵡⴰⵔ ⵙⵖⵉⴷⵉ!
2 ⵎⴰⵖⴰⵔ ⴰⵇⴻⵎⵎⵓⵎ ⵏ ⵉⵊⵊ ⵏ ⵓⵄⴻⴼⴼⴰⵏ,
ⴰⵇⴰ ⴰⵇⴻⵎⵎⵓⵎ ⵉⵛⵛⵓⵔ ⵙ ⵉⵅⴰⵔⵔⵉⵇⴻⵏ ⵉⵏⵏⵓⵔⵥⴻⵎ ⵅⴰⴼⵉ.
ⵏⵉⵜⵏⵉ ⵙⵙⴰⵡⴰⵍⴻⵏ ⴰⴽⵉⴷⵉ ⵙ ⵢⵉⵊⵊ ⵏ ⵢⵉⵍⴻⵙ ⵉⵙⵙⵅⴰⵔⵔⵉⵇⴻⵏ.
3 ⵏⵏⴹⴻⵏ ⴰⵢⵉ-ⴷⴷ ⵙ ⵡⴰⵡⴰⵍⴻⵏ ⵉⵛⵛⵓⵔⴻⵏ ⵙ ⵡⴻⵛⵔⴰⵀ,
ⵜⵜⵎⴻⵏⵖⴰⵏ ⴰⴽⵉⴷⵉ ⵅ ⵡⴰⵍⵓ. ■
4 ⵉ ⵜⵡⴰⵔⵔⵉⵜ ⵅ ⵜⵎⴻⵅⵙⵉⵡⵜ ⵉⵏⵓ ⴽⴽⴰⵔⴻⵏ ⵏⵉⵜⵏⵉ ⴹⵉⴷⴷ ⵉⵏⵓ,
ⵓ ⵏⴻⵛⵛ ⴽⴻⵙⵙⵉⵖ ⵙ ⵍⵎⴻⵄⵔⵓⴼ.
5 ⵏⵉⵜⵏⵉ ⵅⴻⴵⵚⴻⵏ ⴰⵢⵉ ⵍⵅⴰⵔ ⵙ ⵍⵖⴰⵔ,
ⵜⴰⵎⴻⵅⵙⵉⵡⵜ ⵉⵏⵓ ⵙ ⵡⴻⵛⵔⴰⵀ.
6 ⴻⴳⴳ ⵅⴰⵙ ⵉⵊⵊ ⵏ ⵓⵄⴻⴼⴼⴰⵏ,
ⴻⵊⵊ ⵛⵛⵉⵟⴰⵏ ⴰⴷ ⵉⴱⴻⴷⴷ ⵖⴰⵔ ⵓⵖⴻⵥⴷⵉⵙ ⵏⵏⴻⵙ.
7 ⵎⴰⵍⴰ ⵅⴰⵙ ⵛⴰⵔⵔⵄⴻⵏ, ⴰⴷ ⵉⴼⴼⴻⵖ ⴰⵎ ⵉⵊⵊ ⵏ ⵓⵇⵟⴰⵟⵄⵉ,
ⵓⵛⴰ ⵓⵍⴰ ⴷ ⵜⴰⵥⴰⴵⵉⵜ ⵏⵏⴻⵙ ⴰⴷ ⵜⵉⵍⵉ ⴷ ⴷⴷⴻⵏⴱ. ■
8 ⴰⴷ ⴷⴻⵡⵍⴻⵏ ⵓⵙⵙⴰⵏ ⵏⵏⴻⵙ ⵓⴷⵔⵓⵙⴻⵏ ⵡⴰⵀⴰ,
ⴻⵊⵊ ⵡⴻⵏⵏⴻⵖⵏⵉ ⴰⴷ ⵉⵟⵟⴻⴼ ⵍⴼⵓⵙⵉⵏⴰ ⵏⵏⴻⵙ.
9 ⴰⴷ ⴷⴻⵡⵍⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵉⵢⵓⵊⵉⵍⴻⵏ,
ⵜⴰⵎⵖⴰⵔⵜ ⵏⵏⴻⵙ ⴷ ⵜⴰⵊⵊⴰⵞ.
10 ⴰⴷ ⵜⴻⵍⵍⵄⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷⴰ ⴷ ⴷⵉⵀⴰ, ⴰⴷ ⵜⵜⴰⵔⴻⵏ,
ⴰⴷ ⴰⵔⵥⵓⵏ ⵅ ⵎⴰⵛⵛⴰ ⵊⴰⵔ ⵍⵅⵉⵔⴱⴰⵜ ⵏⵙⴻⵏ.
11 ⴰⴷ ⵉⵜⵜⴰⵔ ⴱⵓ-ⵓⵎⴰⵔⵡⴰⵙ ⵎⴰⵔⵔⴰ ⵎⵉⵏ ⵖⴰⵔⴻⵙ,
ⴰⴷ ⴽⴻⵛⵛⴹⴻⵏ ⵉⴱⴰⵔⵔⴰⵏⵉⵢⵢⴻⵏ ⵍⵖⵉⴵⴻⵜ ⵏ ⵡⴰⵔⴱⴻⵔ ⵏⵏⴻⵙ.
12 ⵡⴰⵔ ⵖⴰⵔⴻⵙ ⵉⵜⵜⵉⵍⵉ ⵓⵍⴰ ⴷ ⵉⵊⵊⴻⵏ ⵡⴻⵏⵏⵉ ⴷ ⴰⵙ ⵉ ⵖⴰ ⵉⴳⴳⵉⵏ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,
ⴻⵊⵊ ⵓⵍⴰ ⴷ ⵉⵊⵊ ⴰⴷ ⵉⵃⵉⵏⵏ ⵅ ⵉⵢⵓⵊⵉⵍⴻⵏ ⵏⵏⴻⵙ.
13 ⴰⴷ ⵜⵜⵡⴰⵜⴻⵃⵃⴰⵏ ⵜⴰⵔⵡⴰ ⵏⵏⴻⵙ ⴰⵡⴰⵔⵏⵉ ⴰⵙ,
ⴰⴷ ⵉⵜⵜⵡⴰⵎⵃⴰ ⵉⵙⴻⵎ ⵏⵙⴻⵏ ⴷⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ.
14 ⴰⴷ ⵢⵉⴷⴰⵔ ⵙⵉⴷⵉ ⵍⵎⵓⵄⵚⵉⵢⵢⴻⵜ ⵏ ⵉⴱⴰⴱⴰⵜⴻⵏ ⵏⵏⴻⵙ,
ⵄⴻⵎⵎⴰⵔⵚ ⵡⴰⵔ ⵉⵎⴻⵃⵃⵉ ⴷⴷⴻⵏⴱ ⵏ ⵢⴻⵎⵎⴰⵙ.
15 ⵉⵍⵉ ⴰⴷ ⴱⴻⴷⴷⴻⵏ ⵍⴻⴱⴷⴰ ⵇⵉⴱⴰⵞ ⵉ ⵙⵉⴷⵉ,
ⴻⵊⵊ ⵉ-ⵜ ⴰⴷ ⵉⴽⴽⴻⵙ ⵍⵉⴷⴰⵔⴻⵜ ⵏⵙⴻⵏ ⵅ ⵜⴻⵎⵎⵓⵔⵜ. ■
16 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵄⵇⵉⵍ ⵃⵉⵎⴰ ⴰⴷ ⵢⴻⴳⴳ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,
ⵎⴰⵛⴰ ⵉⵎⴰⵔⵔⴻⵜ ⵍⵎⴻⵙⴽⵉⵏ ⴷ ⵓⵎⴻⵥⵍⵓⴹ,
ⵓⵍⴰ ⴷ ⵡⴻⵏⵏⵉ ⵓⵎⵉ ⵉⵜⵜⵡⴰⵔⵥ ⵡⵓⵍ, ⵃⵉⵎⴰ ⴰⴷ ⵜ ⵉⵏⴻⵖ.
17 ⵏⴻⵜⵜⴰ ⵜⵓⵖⴰ ⵉⵜⵜⴻⵅⵙ ⵏⵏⴻⵄⵍⴻⵜ,
ⵅⴻⵏⵏⵉ ⴻⵊⵊ ⵉ-ⵜⵜ ⴰⴷ ⵅⴰⵙ ⵜⴻⵡⴹⴰ,
ⵓ ⵓⵎⵉ ⵡⴰⵔ ⵉⴼⴰⵔⵃ ⵙ ⵍⴱⴰⵔⴰⴽⴰ,
ⴻⵊⵊ ⵉ-ⵜⵜ ⴰⴷ ⵅⴰⵙ ⵜⵉⴳⴳⵯⴻⵊ.
18 ⵓⵎⵉ ⵢⴰⵔⴹ ⵏⵏⴻⵄⵍⴻⵜ ⴰⵎ ⵡⴰⵔⵔⵓⴹ ⵏⵏⴻⵙ,
ⴻⵊⵊ ⵉ-ⵜⵜ ⴰⴷ ⵜⴰⴷⴻⴼ ⵅⴻⵏⵏⵉ ⴰⵎ ⵡⴰⵎⴰⵏ ⵖⴰⵔ ⴷⴰⵅⴻⵍ ⵏⵏⴻⵙ,
ⴰⵎ ⵥⵥⴻⵛⵜ ⴷⴻⴳ ⵉⵅⵙⴰⵏ ⵏⵏⴻⵙ.
19 ⴻⵊⵊ ⴰⴷ ⵜⵉⵍⵉ ⵏⵏⴻⵄⵍⴻⵜ ⵏⵏⵉ ⴰⵎ ⵡⴰⵔⵔⵓⴹ ⵉ ⴷⵉ ⵉⵜⵜⵍⴻⵃⵃⴻⴼ,
ⴰⵎ ⵡⴻⴱⵢⴰⵙ ⵉ ⵉⴱⴻⴽⴽⴻⵙ ⵍⴻⴱⴷⴰ.
20 ⵜⴰ ⴷ ⵍⵎⵓⵏⴻⵜ ⵏ ⵙⵉⴷⵉ ⵉ ⵉⵖⵔⵉⵎⴻⵏ ⵉⵏⵓ,
ⵉ ⵢⴻⵏⵏⵉ ⵉⵙⵙⴰⵡⴰⵍⴻⵏ ⵍⵖⴰⵔ ⵅ ⵍⴻⵄⵎⴰⵔ ⵉⵏⵓ.
21 ⵎⴰⵛⴰ ⵛⴻⴽ, ⴰ ⵙⵉⴷⵉ, ⵙⵉⴷⵉ ⵉⵏⵓ,
ⴻⴳⴳ ⴷⴰⵢⵉ ⴰⵎ ⵎⴰⵎⵎⴻⵛ ⵜⴻⵅⵙⴻⴷ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⴽ,
ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴷ ⵜⴰⵚⴻⴱⵃⴰⵏⵜ,
ⵙⴻⵏⵊⴻⵎ ⴰⵢⵉ.
22 ⵎⴰⵖⴰⵔ ⵏⴻⵛⵛ ⴷⵉ ⵍⴻⵖⴱⴻⵏ ⵓ ⵥⴻⵍⴹⴻⵖ,
ⵓⵍ ⵉⵏⵓ ⵉⵜⵜⵡⴰⵙⵏⵓⵇⵇⴻⴱ ⵖⴰⵔ ⴷⴰⵅⴻⵍ ⴷⴻⴳ ⵉⴷⵎⴰⵔⴻⵏ ⵉⵏⵓ.
23 ⴰⵎⴻⵛⵏⴰⵡ ⵉⵛⵜ ⵏ ⵜⵉⵍⵉ ⵉⵥⵥⵓⴳⴳⴰⵔⵜⴻⵏ ⵇⴻⵟⵟⵉⵖ,
ⵥⵍⵓⵥⴰⵏ ⴰⵢⵉ ⴰⵎ ⵢⵉⵛⵜ ⵏ ⵜⵎⵓⵔⵖⵉ.
24 ⵉⴼⴰⴷⴷⴻⵏ ⵉⵏⵓ ⵜⵜⴰⵔⵊⵉⵊⵉⵏ ⵙ ⵓⵥⵓⵎⵎⵉ,
ⴰⵔⵔⵉⵎⴻⵜ ⵉⵏⵓ ⵉⵜⵜⵅⴻⵚⵚⴰ ⵉ-ⵜ ⵜⴰⴷⵓⵏⵜ.
25 ⵏⴻⵛⵛ ⴷⴻⵡⵍⴻⵖ ⴰⵙⴻⵏ ⴷ ⵉⵛⵜ ⵏ ⵍⵇⴻⵛⵄⴻⵜ ⵏ ⵓⵙⴻⵃⵇⴰⵔ.
ⵎⴰⵍⴰ ⵥⵔⵉⵏ ⴰⵢⵉ, ⵙⵙⴻⵏⵀⴻⵥⵥⴰⵏ ⴰⵥⴻⴵⵉⴼ ⵏⵙⴻⵏ.
26 ⴻⵡⵛ ⴰⵢⵉ ⴰⴼⵓⵙ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,
ⵙⴻⵏⵊⴻⵎ ⴰⵢⵉ ⵄⵍⴰⵃⵚⴰⴱ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
27 ⵃⵉⵎⴰ ⴰⴷ ⵙⵙⵏⴻⵏ ⴰⵇⴰ ⴷ ⵎⴰⵏ ⴰⵢⴰ ⴷ ⴰⴼⵓⵙ ⵏⵏⴻⴽ,
ⴰⵇⴰ ⵛⴻⴽ ⵉ ⵉⴳⴳⵉⵏ ⵎⴰⵏ ⴰⵢⴰ, ⴰ ⵙⵉⴷⵉ.
28 ⵏⵉⵜⵏⵉ ⴷ ⵢⴻⵏⵏⵉ ⵉⵏⴻⵄⵄⵍⴻⵏ, ⵎⴰⵛⴰ ⵛⴻⴽ ⴰⴷ ⵜⴱⴰⵔⴽⴻⴷ,
ⵏⵉⵜⵏⵉ ⵜⵜⵖⴻⵡⵡⵖⴻⵏ, ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ
ⵎⴰⵛⴰ ⴰⵎⵙⴻⵅⵅⴰⵔ ⵏⵏⴻⴽ ⴰⴷ ⵉⴼⴰⵔⵃ.
29 ⴻⵊⵊ ⵉⵖⵔⵉⵎⴻⵏ ⵉⵏⵓ ⴰⴷ ⵢⴰⵔⴹⴻⵏ ⵙ ⵍⴻⴼⴹⵉⵃⴻⵜ,
ⴰⴷ ⵍⴻⵃⵃⴼⴻⵏ ⴷⴻⴳ ⵓⵙⴻⴹⵃⵉ ⴰⵎ ⴷⴻⴳ ⵉⵊⵊ ⵏ ⵓⵙⴻⵍⵀⴰⵎ.
30 ⵣⴻⴳ ⵡⵓⵍ ⵉⵏⵓ ⴰⴷ ⵇⴰⴷⵉⵖ ⵙⵉⴷⵉ ⵙ ⵓⵇⴻⵎⵎⵓⵎ ⵉⵏⵓ,
ⴰⴷ ⵜ ⵙⵙⴻⵎⵖⴰⵔⴻⵖ ⵊⴰⵔ ⵡⴰⵟⵟⴰⵙ.
31 ⵎⴰⵖⴰⵔ ⵏⴻⵜⵜⴰ ⴰⴷ ⵉⴱⴻⴷⴷ ⴰⴽ-ⴷ ⵓⵎⴻⵥⵍⵓⴹ ⵖⴰⵔ ⵓⴼⵓⵙ ⵏⵏⴻⵙ ⴰⴼⵓⵙⵉ,
ⵃⵉⵎⴰ ⴰⴷ ⵜ ⵉⵙⵙⴻⵏⵊⴻⵎ ⵥⴻⴳ ⵉⵏⵏⵉ ⵉⵃⴻⴽⴽⵎⴻⵏ ⵅ ⵍⴻⵄⵎⴰⵔ ⵏⵏⴻⵙ.