ⴰⴷⵍⵉⵙ ⵡⵉⵙⵙ ⵅⴻⵎⵙⴰ: ⵉⵣⴻⵀⵀⵉⴷⴻⵏ 107-150
107
1 ⵇⴰⴷⴰⵎ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⴷ ⴰⵚⴻⴱⵃⴰⵏ, ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.
2 ⴻⵊⵊ ⵉⵏⵏⵉ ⵉⵜⵜⵡⴰⴼⴷⵉⵏ ⵥⵉ ⵙⵉⴷⵉ ⴰⴷ ⵙⵙⵉⵡⵍⴻⵏ ⴰⵎⵎⵓ,
ⵉⵏⵏⵉ ⵉⴼⴷⵉ ⵥⴻⴳ ⵓⴼⵓⵙ ⵏ ⵢⵉⵏⵏⵉ ⵜⴻⵏ ⵉⵃⴻⵚⵚⴰⵔⴻⵏ, □
3 ⵉⵏⵏⵉ ⵉⵙⵙⵎⵓⵏ ⵥⵉ ⵜⴻⵎⵎⵓⵔⴰ,
ⵥⵉ ⵛⵛⴰⵔⵇ, ⵥⵉ ⵍⵖⴰⵔⴱ, ⵥⵉ ⵛⵛⴰⵎⴰⵍ ⵓ ⵥⵉ ⵍⴻⴱⵃⴰⵔ.
4 ⵜⵓⵖⴰ ⴷⵉⵏ ⵉⵏⵏⵉ ⵉⵡⴻⴷⴷⴰⵔⴻⵏ ⴷⵉ ⵍⴻⵅⵍⴰ,
ⴰⴱⵔⵉⴷ ⵏⵙⴻⵏ ⵉⴽⴽⴰ ⵅ ⵜⵏⴻⵥⵔⵓⴼⵜ,
ⵡⴰⵔ ⵓⴼⵉⵏ ⵜⴰⵏⴷⵉⵏⵜ ⵎⴰⵃⴻⵏⴷ ⴰⴷ ⴷⴰⵢⴻⵙ ⵥⴻⴷⵖⴻⵏ.
5 ⴷⴰⵢⵙⴻⵏ ⵍⴰⵥ ⴷ ⵓⴼⴰⴷⵉ,
ⵍⴻⵄⵎⴰⵔ ⵏⵙⴻⵏ ⵉⴼⵛⴻⵍ ⴷⴰⵢⵙⴻⵏ.
6 ⵅⴻⵏⵏⵉ ⵙⵖⵓⵢⵢⴻⵏ ⵖⴰⵔ ⵙⵉⴷⵉ ⴷⵉ ⵍⴻⵃⵚⴰⵔⴻⵜ ⵏⵙⴻⵏ,
ⵓ ⵏⴻⵜⵜⴰ ⵉⵙⵙⴻⵏⵊⴻⵎ ⵉ-ⵜⴻⵏ ⵥⵉ ⵜⵉⴳⴳⵯⵓⴷⵉ ⵏⵙⴻⵏ.
7 ⵏⴻⵜⵜⴰ ⵉⵏⴷⴻⵀ ⵉ-ⵜⴻⵏ ⴷⴻⴳ ⵉⵊⵊ ⵏ ⵡⴻⴱⵔⵉⴷ ⵉⵙⴻⴳⴳⴻⴷ,
ⵎⴰⵃⴻⵏⴷ ⴰⴷ ⵓⵢⵓⵔⴻⵏ ⵖⴰⵔ ⵉⵛⵜ ⵏ ⵜⴻⵏⴷⵉⵏⵜ ⵃⵉⵎⴰ ⴰⴷ ⴷⴰⵢⴻⵙ ⵥⴻⴷⵖⴻⵏ.
8 ⴻⵊⵊ ⵉ-ⵜⴻⵏ ⴰⴷ ⵇⴰⴷⴰⵏ ⵙⵉⴷⵉ ⵅ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ,
ⵅ ⵍⵎⵓⵄⵊⵉⵥⴰⵜ ⵏⵏⴻⵙ ⵉ ⵜⴰⵔⵡⴰ ⵏ ⴱⵏⴰⴷⴻⵎ.
9 ⵎⴰⵖⴰⵔ ⵏⴻⵜⵜⴰ ⵉⵙⵙⵊⵊⵉⵡⴻⵏ ⵍⴻⵄⵎⴰⵔ ⵉⴼⴼⵓⴷⴻⵏ,
ⵍⴻⵄⵎⴰⵔ ⵉⴵⵓⵥⴻⵏ ⵉⵛⵛⵓⵔ ⵉ-ⵜ ⵙ ⵍⵅⴰⵔ.
10 ⵜⵓⵖⴰ ⴷⵉⵏ ⵉⵏⵏⵉ ⵉⵇⵇⵉⵎⴻⵏ ⴷⵉ ⵜⴰⴵⴻⵙⵜ ⴷ ⵜⵉⵍⵉ ⵏ ⵍⵎⴻⵡⵜ,
ⵙ ⵉⵛⴻⴷⴷⵉⵢⴻⵏ ⵏ ⴷⴷⴻⴵ ⴷ ⵡⵓⵥⵥⴰⵍ,
11 ⵎⴰⵖⴰⵔ ⵖⴻⵡⵡⵖⴻⵏ ⴰⴽ-ⴷ ⵡⴰⵡⴰⵍⴻⵏ ⵏ ⴰⵔⴻⴱⴱⵉ,
ⵡⴰⵔ ⵙⵍⵉⵏ ⵖⴰⵔ ⵛⵛⵡⴰⵔ ⵏ ⵓⵎⵄⵓⴵⵉ ⵅ ⴽⵓⵍⵛⵉ.
12 ⵏⴻⵜⵜⴰ ⵉⵙⵙⴻⵇⵏⴻⵄ ⵓⵍ ⵏⵙⴻⵏ ⵙ ⵜⴰⵎⴰⵔⴰ,
ⵏⵏⴷⴻⵔⴼⴻⵏ ⵡⴰⵔ ⵓⴼⵉⵏ ⵡⵉ ⵖⴰ ⵉⵡⵛⴻⵏ ⴰⴼⵓⵙ.
13 ⵅⴻⵏⵏⵉ ⵍⴰⵖⴰⵏ ⵉ ⵙⵉⴷⵉ ⴷⵉ ⵍⴻⵃⵚⴰⵔⴻⵜ ⵏⵙⴻⵏ,
ⵓ ⵏⴻⵜⵜⴰ ⵉⵙⵙⴻⵏⵊⴻⵎ ⵉ-ⵜⴻⵏ ⵥⵉ ⵜⵉⴳⴳⵯⵓⴷⵉ ⵏⵙⴻⵏ.
14 ⵏⴻⵜⵜⴰ ⵉⵙⵙⵓⴼⴼⴻⵖ ⵉ-ⵜⴻⵏ ⵥⵉ ⵜⴰⴵⴻⵙⵜ ⵓ ⵥⵉ ⵜⵉⵍⵉ ⵏ ⵍⵎⴻⵡⵜ,
ⵓ ⵢⴰⵔⵥⴰ ⵉⵛⴻⴷⴷⵉⵢⴻⵏ ⵏⵙⴻⵏ.
15 ⴻⵊⵊ ⵉ-ⵜⴻⵏ ⴰⴷ ⵇⴰⴷⴰⵏ ⵙⵉⴷⵉ ⵅ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ,
ⵅ ⵍⵎⵓⵄⵊⵉⵥⴰⵜ ⵏⵏⴻⵙ ⵉ ⵜⴰⵔⵡⴰ ⵏ ⴱⵏⴰⴷⴻⵎ.
16 ⵎⴰⵖⴰⵔ ⵏⴻⵜⵜⴰ ⵢⴰⵔⵥⴰ ⵜⵉⵡⵡⵓⵔⴰ ⵏ ⵏⵏⵃⴰⵙ,
ⵉⵛⴰⵔⵔⴻⴳ ⵥⵥⴻⴽⵔⵓⵏⴰⵜ ⵏ ⵡⵓⵥⵥⴰⵍ.
17 ⵜⵓⵖⴰ ⴷⵉⵏ ⵉⴱⵓⵀⴰⵍⵉⵢⵢⴻⵏ ⵉⵏⵏⵉ ⵉⵜⵜⵡⴰⵖⴻⵥⵥⴰⵏ,
ⵥⵉ ⵙⵙⵉⴱⴱⴻⵜ ⵏ ⵓⵅⴻⵟⵟⵓ ⵏⵙⴻⵏ ⴷ ⵏ ⵍⵎⵓⵄⵚⵉⵢⵢⴻⵜ ⵏⵙⴻⵏ.
18 ⵉⵄⵉⴼⴼ ⵍⴻⵄⵎⴰⵔ ⵏⵙⴻⵏ ⵥⵉ ⵎⴰⵔⵔⴰ ⵎⴰⵛⵛⴰ,
ⵉⵡⴹⴻⵏ ⴰⵍ ⵜⴻⵡⵡⵓⵔⴰ ⵏ ⵍⵎⴻⵡⵜ.
19 ⵅⴻⵏⵏⵉ ⵍⴰⵖⴰⵏ ⵉ ⵙⵉⴷⵉ ⴷⵉ ⵍⴻⵃⵚⴰⵔⴻⵜ ⵏⵙⴻⵏ,
ⵓ ⵏⴻⵜⵜⴰ ⵉⵙⵙⴻⵏⵊⴻⵎ ⵉ-ⵜⴻⵏ ⵥⵉ ⵜⵉⴳⴳⵯⵓⴷⵉ ⵏⵙⴻⵏ.
20 ⵏⴻⵜⵜⴰ ⵉⵙⵙⴻⴽⴽ ⴰⵡⴰⵍ ⵏⵏⴻⵙ,
ⵓ ⵉⵙⵙⴳⴻⵏⴼⴰ ⵉ-ⵜⴻⵏ ⵓ ⵉⵙⵙⴻⵏⵊⴻⵎ ⵉ-ⵜⴻⵏ ⵥⴻⴳ ⵉⵎⴻⴹⵍⴰⵏ.
21 ⴻⵊⵊ ⵉ-ⵜⴻⵏ ⴰⴷ ⵇⴰⴷⴰⵏ ⵙⵉⴷⵉ ⵅ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ,
ⵅ ⵍⵎⵓⵄⵊⵉⵥⴰⵜ ⵏⵏⴻⵙ ⵉ ⵜⴰⵔⵡⴰ ⵏ ⴱⵏⴰⴷⴻⵎ.
22 ⴻⵊⵊ ⵉ-ⵜⴻⵏ ⴰⴷ ⴰⵡⵢⴻⵏ ⵜⵉⵡⵀⵉⴱⵉⵏ ⵏ ⵓⵇⴰⴷⵉ,
ⴰⴷ ⴱⴰⵔⵔⵃⴻⵏ ⵜⵉⵎⴻⴳⴳⴰ ⵏⵏⴻⵙ ⵙ ⵓⵙⵍⵉⵡⵍⴻⵡ. ■
23 ⵜⵓⵖⴰ ⴷⵉⵏ ⵉⵏⵏⵉ ⵉⵀⴻⴽⴽⵡⴰⵏ ⵖⴰⵔ ⵍⴻⴱⵃⴰⵔ ⵙ ⵉⵖⴰⵔⵔⵓⴱⴰ,
ⵉⵏⵏⵉ ⵉⵅⴻⴷⴷⵎⴻⵏ ⵅ ⵡⴰⵎⴰⵏ ⵉⵡⴻⵙⵄⴻⵏ. ■
24 ⵥⵔⵉⵏ ⵎⵉⵏ ⵉⴳⴳⴰ ⵙⵉⴷⵉ,
ⵓⵍⴰ ⴷ ⵍⵎⵓⵄⵊⵉⵥⴰⵜ ⵏⵏⴻⵙ ⴷⵉ ⵍⴰⴵⴰⵖ ⵏ ⵍⴻⴱⵃⴰⵔ.
25 ⵎⴰⵍⴰ ⵏⴻⵜⵜⴰ ⵉⵙⵙⵉⵡⴻⵍ,
ⵉⴽⴽⴰⵔ-ⴷⴷ ⵉⵊⵊ ⵏ ⵓⵙⴻⵎⵎⵉⴹ,
ⵏⵏⵉ ⵉⵙⵙⴳⴻⵄⵄⴷⴻⵏ ⵍⴻⵎⵡⴰⵊ ⵏⵏⴻⵙ.
26 ⴳⴰⵄⵄⴷⴻⵏ ⵖⴰⵔ ⵓⵊⴻⵏⵏⴰ,
ⵓⵛⴰ ⵀⵡⴰⵏ ⵖⴰⵔ ⵜⵉⵙⵉ ⵏ ⵡⴰⵎⴰⵏ ⵏ ⵍⴰⴵⴰⵖ.
ⵉⴼⵙⵉ ⵍⴻⵄⵎⴰⵔ ⵏⵙⴻⵏ ⵥⵉ ⵜⵉⴳⴳⵯⵓⴷⵉ.
27 ⵎⴻⵢⵢⵍⴻⵏ, ⵎⴻⵢⵢⵍⴻⵎ ⵥⵉ ⵙⵙⴰ ⵖⴰⵔ ⴷⴰ ⴰⵎ ⵓⵎⴻⵙⵛⴰⵔ,
ⵉⵡⴻⴷⴷⴰⵔ ⴰⵙⴻⵏ ⵎⴰⵔⵔⴰ ⵍⴻⵄⵇⴻⵍ ⵏⵙⴻⵏ ⵅ ⵎⵉⵏ ⵖⴰ ⴳⴳⴻⵏ.
28 ⵅⴻⵏⵏⵉ ⵍⴰⵖⴰⵏ ⵉ ⵙⵉⴷⵉ ⴷⵉ ⵍⴻⵃⵚⴰⵔⴻⵜ ⵏⵙⴻⵏ,
ⵓ ⵏⴻⵜⵜⴰ ⵉⵙⵙⵓⴼⴼⴻⵖ ⵉ-ⵜⴻⵏ-ⴷⴷ ⵥⵉ ⵜⵉⴳⴳⵯⵓⴷⵉ ⵏⵙⴻⵏ.
29 ⵏⴻⵜⵜⴰ ⵢⴰⵔⵔⴰ ⴰⵙⴻⵎⵎⵉⴹ ⴰⴷ ⵢⴰⵔⵙ,
ⴰⵍⴰⵎⵉ ⴷⴻⵡⵍⴻⵏ ⵍⴻⵎⵡⴰⵊ ⵙⵙⴻⵖⴹⴻⵏ.
30 ⵏⵉⵜⵏⵉ ⴼⴰⵔⵃⴻⵏ ⵓⵎⵉ ⴰⵔⵙⵉⵏ ⵍⴻⵎⵡⴰⵊ,
ⵓ ⵓⵎⵉ ⵏⴻⵜⵜⴰ ⵉⵏⴷⴻⵀ ⵉ-ⵜⴻⵏ ⵖⴰⵔ ⵍⵎⵓⵢⵢⵉ ⵉ ⵖⴰⵔⴻⵙ ⵜⵓⵖⴰ ⵎⴻⵥⵔⴻⵏ.
31 ⴻⵊⵊ ⵉ-ⵜⴻⵏ ⴰⴷ ⵇⴰⴷⴰⵏ ⵙⵉⴷⵉ ⵅ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ,
ⵅ ⵍⵎⵓⵄⵊⵉⵥⴰⵜ ⵏⵏⴻⵙ ⵉ ⵜⴰⵔⵡⴰ ⵏ ⴱⵏⴰⴷⴻⵎ,
32 ⴻⵊⵊ ⵉ-ⵜⴻⵏ ⴰⴷ ⵜ ⵙⵙⵄⵓⴵⴻⵏ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ,
ⴰⴷ ⵜ ⵛⴻⵏⵏⵄⴻⵏ ⴷⵉ ⵍⵃⴻⵍⵇⴻⵜ ⵏ ⵉⵎⵖⴰⵔⴻⵏ.
33 ⵏⴻⵜⵜⴰ ⵢⴰⵔⵔⴰ ⵉⵖⴻⵥⵔⴰⵏ ⴷ ⵍⴻⵅⵍⴰ,
ⵍⵄⵓⵏⵚⴰⵔⴰⵜ ⵢⴰⵔⵔⴰ ⵉ-ⵜⴻⵏⵜ ⴷ ⵜⴰⵎⵎⵓⵔⵜ ⵉⴼⴼⵓⴷⴻⵏ,
34 ⵜⴰⵎⵎⵓⵔⵜ ⵉ ⵉⵜⵜⵉⵛⴻⵏ ⵍⵖⵉⴵⴻⵜ ⵢⴰⵔⵔⴰ ⵉ-ⵜⵜ ⴷ ⵜⴰⵎⴻⴵⴰⵃⵜ,
ⵥⵉ ⵙⵙⵉⴱⴱⴻⵜ ⵏ ⵜⵓⵄⴻⴼⴼⵏⴰ ⵏ ⵢⵉⵏⵏⵉ ⴷⴰⵢⴻⵙ ⵉⵥⴻⴷⴷⵖⴻⵏ.
35 ⵏⴻⵜⵜⴰ ⵢⴰⵔⵔⴰ ⵍⴻⵅⵍⴰ ⴷ ⴰⵢⴻⵍⵎⴰⵎ ⵏ ⵡⴰⵎⴰⵏ,
ⵜⴰⵎⵎⵓⵔⵜ ⵢⵓⵥⵖⴻⵏ ⴷ ⵍⵄⵓⵏⵚⴰⵔⴰⵜ.■
36 ⴷⵉⵏⵏⵉ ⵉ ⵉⵙⵙⴻⵥⴷⴻⵖ ⵉⵏⵏⵉ ⵉⴵⵓⵥⴻⵏ,
ⵓⵛⴰ ⴷⵉⵏ ⵙⵙⴱⴻⴷⴷⴻⵏ ⵏⵉⵜⵏⵉ ⵉⵛⵜ ⵏ ⵜⴻⵏⴷⵉⵏⵜ ⵎⴰⵃⴻⵏⴷ ⴰⴷ ⴷⴰⵢⴻⵙ ⵥⴻⴷⵖⴻⵏ.
37 ⵏⵉⵜⵏⵉ ⵥⴰⵔⵔⵄⴻⵏ ⴷⴻⴳ ⵉⵢⵢⴰⵔⴻⵏ ⵓ ⵜⵜⴻⵥⵥⵓⵏ ⵜⵉⵥⴰⵢⴰⵔⵉⵏ ⴷⴻⴳ ⵉⵎⴰⵔⵊⴰⵄⴻⵏ,
ⵜⵉⵏⵏⵉ ⴷⴷ-ⵉⵜⵜⴰⵡⵢⴻⵏ ⵉⴳⵓⵎⵎⴰ ⴷ ⵍⵖⵉⴵⴻⵜ ⵏⵙⴻⵏ.
38 ⵏⴻⵜⵜⴰ ⵉⴱⴰⵔⴻⴽ ⵉ-ⵜⴻⵏ, ⴰⵍⴰⵎⵉ ⴷⴻⵡⵍⴻⵏ ⴷⴻⴳ ⵡⴰⵟⵟⴰⵙ,
ⴰⴳⵍⴰ ⵏ ⵍⵎⴰⵍ ⵏⵙⴻⵏ ⵡⴰⵔ ⵉⵜⵜⵡⴰⵙⴻⵎⵥⵉ.
39 ⵅⴻⵏⵏⵉ ⵎⴰⵛⴰ ⴷⴰⴽⴽⵡⴰⵍⴻⵏ ⵏⵉⵜⵏⵉ ⴷⵉ ⴷⵔⵓⵙ ⵄⴰⵡⴻⴷ,
ⵀⴻⴽⴽⵡⴰⵏ ⵖⴰⵔ ⵍⴰⴵⴰⵖ ⵥⵉ ⵙⵙⵉⴱⴱⴻⵜ ⵏ ⵍⴻⵃⵚⴰⵔⴻⵜ ⴷ ⵍⵖⴰⵔ ⴷ ⵡⴻⵛⴹⴰⵏ.
40 ⵏⴻⵜⵜⴰ ⵉⵜⵜⴽⴻⴱⴱⴰ ⴰⵙⴻⵃⵇⴰⵔ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ ⵏⵙⴻⵏ,
ⵉⵊⵊⴰ ⵉ-ⵜⴻⵏ ⵜⵜᵉⵜⵍⵉⵄⴻⵏ ⴷⵉ ⵍⴻⵅⵍⴰ ⵎⴰⵏⵉ ⵡⴰⵔ ⴵⵉⵏ ⵉⴱⵔⵉⴷⴻⵏ.
41 ⵉⵙⵙⴳⴻⵄⵄⴻⴷ-ⴷⴷ ⴰⵎⴻⵥⵍⵓⴹ ⵥⵉ ⵍⴻⵖⴱⴻⵏ,
ⵓⵛⴰ ⵢⴰⵔⵔⴰ ⵍⴰⴵⴰⵜ ⴰⵎ ⵜⵃⵉⵎⴰⵔⵉⵏ ⵏ ⵡⵓⴵⵉ. ■
42 ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵜⵜⵡⴰⵍⴰⵏ ⵓⵛⴰ ⴼⴰⵔⵔⵃⴻⵏ,
ⵎⴰⵛⴰ ⵎⴰⵔⵔⴰ ⴰⵢⵜ ⵏ ⵍⵎⵓⵄⵚⵉⵢⵢⴻⵜ ⵜⵜⴻⵇⵇⵏⴻⵏ ⴰⵇⴻⵎⵎⵓⵎ ⵏⵙⴻⵏ. ■
43 ⵡⴻⵏⵏⵉ ⴷ ⴰⵎⵉⵖⵉⵙ, ⴻⵊⵊ ⵉ-ⵜ ⴰⴷ ⵉⵃⴹⴰ,
ⴻⵊⵊ ⵉ-ⵜⴻⵏ ⴰⴷ ⵙⵙⵏⴻⵏ ⵏⵉⵛⴰⵏ ⵎⵉⵏ ⵉⵅⵙ ⴰⴷ ⵜⵉⵏⵉ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵙⵉⴷⵉ.