106
1 ⵀⴰⵍⵍⵉⵍⵓ-ⵢⴰⵀ, ⵇⴰⴷⴰⵎ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⵉⵚⴱⴻⵃ, ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ. ■
2 ⵡⵉ ⵉⵥⴻⵎⵎⴰⵔⴻⵏ ⴰⴷ ⵉⵃⴰⵊⴰ ⵜⵉⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ ⵏ ⵙⵉⴷⵉ,
ⴰⴷ ⵉⴱⴰⵔⵔⴻⵃ ⵎⴰⵔⵔⴰ ⵛⵛⴰⵏ ⵏⵏⴻⵙ?
3 ⵙⵙⴻⵄⴷ ⵏⵙⴻⵏ ⵉ ⵢⵉⵏⵏⵉ ⵉⵃⴹⴰⵏ ⵍⵃⴻⵇⵇ,
ⵙⵙⴻⵄⴷ ⵏⵏⴻⵙ ⵉ ⵡⴻⵏⵏⵉ ⵉⵜⵜⴻⴳⴳⴻⵏ ⵍⴻⴱⴷⴰ ⵜⴰⵙⴻⴳⴷⴰ.
4 ⵄⵇⴻⵍ ⵅⴰⴼⵉ, ⴰ ⵙⵉⴷⵉ, ⵙ ⴰⵔⴹⴰ ⵖⴰⵔ ⵍⴳⴻⵏⵙ ⵏⵏⴻⴽ,
ⵄⴰⵀⴻⴷ ⴰⵢⵉ ⵙ ⵓⵙⴻⵏⵊⴻⵎ ⵏⵏⴻⴽ,
5 ⵎⴰⵃⴻⵏⴷ ⴰⴷ ⵥⴰⵔⴻⵖ ⵍⵅⴰⵔ ⵉ ⵢⴻⵏⵏⵉ ⵥⵥⴰⵢⴻⴽ ⵉⵜⵜⵡⴰⴼⴰⵔⵥⴻⵏ,
ⵎⴰⵃⴻⵏⴷ ⴰⴷ ⴼⴰⵔⵃⴻⵖ ⵙ ⵍⴻⴼⵔⴰⵃⴻⵜ ⵏ ⵍⴳⴻⵏⵙ ⵏⵏⴻⴽ,
ⵎⴰⵃⴻⵏⴷ ⴰⴷ ⴼⴰⵔⵃⴻⵖ ⵙ ⵢⵉⵅⴻⴼ ⵉⵏⵓ ⵊⵎⵉⵄ ⴰⴽ-ⴷ ⵜⴻⵙⵖⴰⵔⵜ ⵏⵏⴻⴽ.
6 ⵏⴻⵛⵛⵉⵏ ⵏⴻⵅⴹⴰ, ⵊⵎⵉⵄ ⴰⴽ-ⴷ ⵉⴱⴰⴱⴰⵜⴻⵏ ⵏⵏⴻⵖ,
ⵏⴻⴳⴳⴰ ⵍⵖⴻⵛⵛ,
ⵏⴻⴳⴳⴰ ⵜⵓⵄⴻⴼⴼⵏⴰ. ■
7 ⵉⴱⴰⴱⴰⵜⴻⵏ ⵏⵏⴻⵖ ⴷⵉ ⵎⵉⵚⵔⴰ ⵡⴰⵔ ⴼⵀⵉⵎⴻⵏ ⵉ ⵍⵎⵓⵄⵊⵉⵥⴰⵜ ⵏⵏⴻⴽ,
ⵡⴰⵔ ⵅⴰⵔⵔⵚⴻⵏ ⴷⴻⴳ ⵓⴼⴻⵢⵢⴻⴹ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
ⵎⴰⵛⴰ ⵖⴻⵡⵡⵖⴻⵏ ⵖⴰⵔ ⵍⴻⴱⵃⴰⵔ, ⵖⴰⵔ ⵍⴻⴱⵃⴰⵔ ⵏ ⵜⴻⵍⴳⴰ. ■
8 ⵎⴰⵛⴰ ⵏⴻⵜⵜⴰ ⵉⵙⵙⴻⵏⵊⴻⵎ ⵉ-ⵜⴻⵏ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⵙ,
ⵃⵉⵎⴰ ⴰⴷ ⵜᵉⵜⵜⵡⴰⵙⵙⴻⵏ ⵍⴻⵎⵖⴰⵔⴻⵜ ⵏⵏⴻⵙ. ■
9 ⵏⴻⵜⵜⴰ ⵉⵡⴻⴱⴱⴻⵅ ⵍⴻⴱⵃⴰⵔ ⵏ ⵜⴻⵍⴳⴰ ⴰⵍⴰⵎⵉ ⵉⴷⵡⴻⵍ ⵢⵓⵥⴻⵖ,
ⵓⵛⴰ ⵉⵊⵊⴰ ⵉ-ⵜⴻⵏ ⴰⴷ ⴽⴽⴻⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏ ⵡⴰⵎⴰⵏ ⵢⵓⴵⵖⴻⵏ ⴰⵎⴻⵛⵏⴰⵡ ⴷⵉ ⵍⴻⵅⵍⴰ. ■
10 ⵏⴻⵜⵜⴰ ⵉⴼⴻⴽⴽ ⵉ-ⵜⴻⵏ ⵥⴻⴳ ⵓⴼⵓⵙ ⵏ ⵢⵉⵏⵏⵉ ⵉ-ⵜⴻⵏ ⵉⵛⴰⵔⵔⵀⴻⵏ,
ⵉⵙⵙⴻⵏⵊⴻⵎ ⵉ-ⵜⴻⵏ ⵥⴻⴳ ⵓⴼⵓⵙ ⵏ ⵍⴻⵄⴷⵓ.
11 ⴰⵎⴰⵏ ⴷⵍⵉⵏ ⵉⵏⵏⵉ ⵜⴻⵏ ⵉⵃⴻⵚⵚⴰⵔⴻⵏ,
ⵡⴰⵔ ⵉⵇⵇⵉⵎ ⵓⵍⴰ ⴷ ⵉⵊⵊⴻⵏ ⵥⵥⴰⵢⵙⴻⵏ. ■
12 ⵏⵉⵜⵏⵉ ⵜⵜⴻⵛⵍⴻⵏ ⵅ ⵡⴰⵡⴰⵍⴻⵏ ⵏⵏⴻⵙ,
ⵚⴻⴱⴱⵃⴻⵏ ⴰⵙ ⵙ ⵢⵉⵊⵊ ⵏ ⵢⴻⵥⵍⵉ ⵏ ⵓⵚⴻⴱⴱⴻⵃ. ■
13 ⵎⴰⵛⴰ ⵜⵜⵓⵏ ⴷⴻⵖⵢⴰ ⵜⵉⵎⴻⴳⴳⴰ ⵏⵏⴻⵙ,
ⵡⴰⵔ ⵅⵙⴻⵏ ⴰⴷ ⵔⴰⵊⴰⵏ ⵄⴰⴷ ⵛⵛⵡⴰⵔ ⵏⵏⴻⵙ.
14 ⵏⵉⵜⵏⵉ ⴷⴻⵡⵍⴻⵏ ⵜⵜⵎⴻⵖⵖⵍⴻⵏ ⴰⵟⵟⴰⵙ ⴷⵉ ⵍⴻⵅⵍⴰ,
ⵇⴻⴵⴱⴻⵏ ⴰⵔⴻⴱⴱⵉ ⴷⵉ ⵜⵏⴻⵥⵔⵓⴼⵜ. ■
15 ⵅⴻⵏⵏⵉ ⵉⵡⵛⴰ ⴰⵙⴻⵏ ⵎⵉⵏ ⵜⵜⴰⵔⴻⵏ,
ⵎⴰⵛⴰ ⵉⵙⵙⴻⵎⵥⵉ ⵍⵇⴻⴷⴷ ⵏ ⵍⴻⵄⵎⵓⵔ ⵏⵙⴻⵏ. ■
16 ⵏⵉⵜⵏⵉ ⴷⴻⵡⵍⴻⵏ ⵓⵙⵎⴻⵏ ⵥⵉ ⵎⵓⵙⴰ ⴷⵉ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ,
ⵓⵍⴰ ⵥⵉ ⵀⴰⵔⵓⵏ, ⴰⵎⵇⴻⴷⴷⴻⵙ ⵏ ⵙⵉⴷⵉ. ■
17 ⵜⴰⵎⵎⵓⵔⵜ ⵜⴻⵏⵏⵓⵔⵥⴻⵎ, ⵜⵚⴰⵔⴹ ⴷⴰⵜⴰⵏ,
ⵓⵛⴰ ⵜⴻⵏⵜⵉ ⴰⴱⴰⵔⵔⵓ ⵏ ⴰⴱⵉⵔⴰⵎ. ■
18 ⵜⵉⵎⴻⵙⵙⵉ ⵜⴻⴱⴷⴰ ⵜⴻⵛⵎⴻⴹ ⵊⴰⵔ ⵓⴱⴰⵔⵔⵓ ⵏⵙⴻⵏ,
ⵉⵊⵊ ⵏ ⵓⵛⴻⵄⵄⴰⵍ ⵏ ⵜⵎⴻⵙⵙⵉ ⵉⵇⵇⴻⴷ ⵉⵄⴻⴼⴼⴰⵏⴻⵏ ⵏⵏⵉ. ■
19 ⵏⵉⵜⵏⵉ ⴳⴳⵉⵏ ⵉⵊⵊ ⵏ ⵓⵢⴻⵏⴷⵓⵥ ⵖⴰⵔ ⵃⵓⵔⵉⴱ,
ⵓⵛⴰ ⵓⴹⴰⵔⴻⵏ ⵥⵥⴰⵜ ⵉ ⵢⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ. ■
20 ⵏⵉⵜⵏⵉ ⴱⴻⴷⴷⵍⴻⵏ ⴰⵄⵓⴵⵉ ⵏ ⵙⵉⴷⵉ
ⴰⴽ-ⴷ ⵍⴻⵅⵢⴰⵍ ⵏ ⵉⵊⵊ ⵏ ⵓⴼⵓⵏⴰⵙ ⵉ ⵉⵜⵜⴻⵜⵜⴻⵏ ⴰⵔⵔⴱⵉⵄ.
21 ⵜⵜⵓⵏ ⴰⵔⴻⴱⴱⵉ, ⴰⵎⵙⴻⵏⵊⴻⵎ ⵏⵙⴻⵏ,
ⵡⴻⵏⵏⵉ ⵜⵓⵖⴰ ⵉⴳⴳⵉⵏ ⵜⵉⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ ⴷⵉ ⵎⵉⵚⵔⴰ,
22 ⵍⵎⵓⵄⵊⵉⵥⴰⵜ ⴷⵉ ⵜⴻⵎⵎⵓⵔⵜ ⵏ ⵃⴰⵎ,
ⵜⵉⵎⴻⴳⴳⴰ ⵙⵙⴰⴳⴳⵯⴰⴷⴻⵏⵜ ⵖⴰⵔ ⵍⴻⴱⵃⴰⵔ ⵏ ⵜⴻⵍⴳⴰ.
23 ⵉⵏⵏⴰ ⴰⵇⴰ ⴰⴷ ⵜⴻⵏ ⵉⴽⴻⵃⵃⴻⴹ,
ⵎⵍⵉ ⵡⴰⵔ ⵉⴵⵉ ⴷ ⵎⵓⵙⴰ, ⵡⴻⵏⵏⵉ ⵥⵥⴰⵢⴻⵙ ⵉⵜⵜⵡⴰⴼⴰⵔⵥⴻⵏ,
ⵉⴽⴽⴰⵔ-ⴷⴷ ⴷⵉ ⵜⵅⴻⵏⴷⵓⵇⵜ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ ⴷⵉ ⵟⵟⵡⴻⵄ ⵏⵙⴻⵏ,
ⵎⴰⵃⴻⵏⴷ ⴰⴷ ⵉⵙⵙⴱⴻⵄⵄⴻⴷ ⴰⵙⵄⴰⵔ ⵏⵏⴻⵙ ⵉ ⵥⵉ ⵉⵅⵙ ⴰⴷ ⵜⴻⵏ ⵉⵀⴻⵍⵍⴻⴽ. ■
24 ⵏⵉⵜⵏⵉ ⴽⴽⵙⴻⵏ ⵜⴰⵇⵛⵓⵔⵜ ⵅ ⵜⴻⵎⵎⵓⵔⵜ ⵉⵄⵉⵥⵥⴻⵏ,
ⵡⴰⵔ ⵜⵜⴻⵛⵍⴻⵏ ⵛⴰ ⵅ ⵡⴰⵡⴰⵍ ⵏⵏⴻⵙ. ■
25 ⵏⵉⵜⵏⵉ ⵏⴷⴻⵇⵎⴻⵏ ⴷⴻⴳ ⵉⵇⵉⴹⴰⵏ ⵏⵙⴻⵏ,
ⵡⴰⵔ ⵙⵍⵉⵏ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ.
26 ⵏⴻⵜⵜⴰ ⵉⵙⵙⴳⴻⵄⵄⴻⴷ ⴰⴼⵓⵙ ⵏⵏⴻⵙ ⵅⴰⵙⴻⵏ,
ⵉⵊⵊⵓⴵ ⴰⴷ ⵜⴻⵏ ⵉⵙⵙⴻⵖⴹⴻⵍ ⴷⵉ ⵍⴻⵅⵍⴰ, ■
27 ⵎⴰⵃⴻⵏⴷ ⴰⴷ ⵉⵙⵙⴻⵖⴹⴻⵍ ⵜⴰⵔⵡⴰ ⵏⵙⴻⵏ ⵊⴰⵔ ⵍⴻⴳⵏⵓⵙ,
ⵎⴰⵃⴻⵏⴷ ⴰⴷ ⵜⴻⵏ ⵉⵥⴻⴵⴻⵄ ⴷⵉ ⵜⴻⵎⵎⵓⵔⴰ. ■
28 ⵏⵉⵜⵏⵉ ⵙⵙⵍⴻⵃⵎⴻⵏ ⵉⵅⴻⴼ ⵏⵙⴻⵏ ⵖⴰⵔ ⴱⴰⵄⴰⵍ-ⴼⴰⵖⵓⵔ,
ⵛⵛⵉⵏ ⵜⵉⵖⴰⵔⵚⴰ ⵉ ⵉⵎⴻⵜⵜⴰⵏ. ■
29 ⵙⵄⴰⵔⴻⵏ ⵜ ⵙ ⵜⵎⴻⴳⴳⴰ ⵏⵙⴻⵏ,
ⵖⴰⵔⴻⵙ ⴰⵍⴰⵎⵉ ⴷⴷ ⵅⴰⵙⴻⵏ ⵜⴻⵡⴹⴰ ⵊⵊⵔⵉⵃⴻⵛⵜ.
30 ⵅⴻⵏⵏⵉ ⵉⴽⴽⴰⵔ-ⴷⴷ ⴼⵉⵏⴰⵃⴰⵙ, ⵢⵓⵙⴰ-ⴷⴷ ⵊⴰⵔ ⴰⵙⴻⵏ,
ⵓ ⴰⵎⵎⵓ ⵉ ⵜᵉⵜⵜⵡⴰⵙⴱⴻⴷⴷ ⵊⵊⵔⵉⵃⴻⵛⵜ.
31 ⴰⵢⴰ ⵉⵜⵜⵡⴰⵃⵙⴻⴱ ⴰⵙ-ⴷⴷ ⴷ ⵜⴰⵙⴻⴳⴷⴰ,
ⵥⵉ ⵊⵊⵉⵍ ⴰⵍ ⵊⵊⵉⵍ ⵉ ⵍⴻⴱⴷⴰ.
32 ⵏⵉⵜⵏⵉ ⵙⵄⴰⵔⴻⵏ ⴰⴼⵓⴳⴻⵎ ⵏⵏⴻⵙ ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ,
ⴰⵍⴰⵎⵉ ⵉⴳⴳⴰ ⵎⵓⵙⴰ ⵍⵖⴰⵔ ⴷⵉ ⵙⵙⵉⴱⴱⴻⵜ ⵏⵙⴻⵏ, ■
33 ⵎⴰⵖⴰⵔ ⵙⵙⴰⵔⴻⵥⴳⴻⵏ ⵍⴻⵄⵎⴰⵔ ⵏⵏⴻⵙ,
ⵖⴰⵔⴻⵙ ⴰⵍⴰⵎⵉ ⵉⴼⴼⴻⵖ ⵡⴰⵡⴰⵍ ⵡⴰⵔ ⵉⴹⴱⵉⵄⴻⵏ ⵥⴻⴳ ⵉⵢⴻⵏⵛⵉⵛⴻⵏ ⵏⵏⴻⵙ.
34 ⵏⵉⵜⵏⵉ ⵡⴰⵔ ⵜⴻⵃⵃⴰⵏ ⵍⴻⴳⵏⵓⵙ
ⵉ ⵅⴻⴼ ⵉ ⴷ ⴰⵙⴻⵏ ⵉⵏⵏⴰ ⵙⵉⴷⵉ ⵉⵜⵜⵅⴻⵚⵚⴰ ⴰⴷ ⵜⴻⵏ ⵜⴻⵃⵃⴰⵏ.
35 ⵎⴰⵛⴰ ⵚⵚⵓⵔⴻⵏ ⵉⵅⴻⴼ ⵏⵙⴻⵏ ⴰⴽ-ⴷ ⵍⴻⴳⵏⵓⵙ
ⵍⴻⵎⴷⴻⵏ ⴰⴷ ⴳⴳⴻⵏ ⵎⵉⵏ ⴳⴳⵉⵏ ⵏⵉⵜⵏⵉ. ■
36 ⵏⵉⵜⵏⵉ ⵜⵓⵖⴰ ⵜⵜⵙⴻⵅⵅⴰⵔⴻⵏ ⵉ ⵍⴻⵅⵢⴰⵍⴰⵜ ⵏ ⵚⵚⴰⵏⴰⵎ ⵏⵙⴻⵏ,
ⵉⵏⵏⵉ ⴷ ⴰⵙⴻⵏ ⵉⴷⴻⵡⵍⴻⵏ ⴷ ⵜⴰⵅⵛⴻⴼⵜ.
37 ⵏⵉⵜⵏⵉ ⵉⵡⵢⴻⵏ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵜⵃⴻⵏⵊⵉⵔⵉⵏ ⵏⵙⴻⵏ ⴷ ⵜⴰⵖⴰⵔⵚⵜ ⵉ ⵛⵛⵡⴰⵟⴻⵏ. ■
38 ⵏⵉⵜⵏⵉ ⵙⵙⵉⵥⵥⵍⴻⵏ ⵉⴷⴰⵎⵎⴻⵏ ⵉⵎⴻⵥⴷⴰⴳⴻⵏ,
ⵉⴷⴰⵎⵎⴻⵏ ⵏ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵜⵃⴻⵏⵊⵉⵔⵉⵏ ⵏⵙⴻⵏ,
ⵏⵏⵉ ⵉⵡⵢⴻⵏ ⴷ ⵜⴰⵖⴰⵔⵚⵜ ⵉ ⵍⴻⵅⵢⴰⵍⴰⵜ ⵏ ⵚⵚⴰⵏⴰⵎ ⵏ ⴽⴻⵏⵄⴰⵏ,
ⴰⵍⴰⵎⵉ ⵜⴻⴷⵡⴻⵍ ⵜⴻⵎⵎⵓⵔⵜ ⵜⴻⴼⵙⴻⴷ ⵙ ⵉⴷⴰⵎⵎⴻⵏ. ■
39 ⵏⵉⵜⵏⵉ ⴷⴻⵡⵍⴻⵏ ⵅⴻⵎⵊⴻⵏ ⵥⵉ ⵜⵎⴻⴳⴳⴰ ⵏⵙⴻⵏ,
ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵙ ⵍⴻⵅⴷⴰⵢⴻⵎ ⵏⵙⴻⵏ.
40 ⵢⴰⵔⵖⴰ ⵡⴻⵖⴹⴰⴱ ⵏ ⵙⵉⴷⵉ ⵅ ⵍⴳⴻⵏⵙ ⵏⵏⴻⵙ,
ⵓ ⵏⴻⵜⵜⴰ ⵉⵄⵉⴼⴼ ⵜⴰⵙⵖⴰⵔⵜ ⵏⵏⴻⵙ.
41 ⵏⴻⵜⵜⴰ ⵉⵙⴻⵍⵍⴻⵎ ⵉ-ⵜⴻⵏ ⵖⴰⵔ ⵉⴼⴰⵙⵙⴻⵏ ⵏ ⵍⴻⴳⵏⵓⵙ,
ⵓ ⵉⵏⵏⵉ ⵜⴻⵏ ⵉⵛⴰⵔⵔⵀⴻⵏ ⴷⴻⵡⵍⴻⵏ ⵜⵜⵙⴻⴵⴰⴹⴻⵏ ⵅⴰⵙⴻⵏ.
42 ⵃⵚⴰⵔⴻⵏ ⵜⴻⵏ ⵍⵄⴻⴷⵢⴰⵏ ⵏⵙⴻⵏ,
ⵏⵉⵜⵏⵉ ⵜⵜⵡⴰⵙⵡⴰⴹⵄⴻⵏ ⵙⴰⴷⵓ ⴰⴼⵓⵙ ⵏⵙⴻⵏ.
43 ⴰⵟⵟⴰⵙ ⵏ ⵜⵡⴰⵍⴰⵡⵉⵏ ⵜⵓⵖⴰ ⵉⵙⵙⴻⵏⵊⴰⵎ ⵉ-ⵜⴻⵏ,
ⵎⴰⵛⴰ ⵏⵉⵜⵏⵉ ⵙⵙⴰⵔⴻⵥⴳⴻⵏ ⵅⴰⵙ ⵙ ⵜⵖⴻⵏⵏⴰⵏⵜ ⵏⵙⴻⵏ,
ⵜⵜⵡⴰⵙⵎⴻⵥⵢⴻⵏ ⵙ ⵍⵎⵓⵄⵚⵉⵢⵢⴻⵜ ⵏⵙⴻⵏ.
44 ⵡⴰⵅⵅⴰ ⴰⵎⴻⵏⵏⵉ ⵏⴻⵜⵜⴰ ⵉⵅⵥⴰⵔ-ⴷⴷ ⵄⴰⴷ ⵖⴰⵔⵙⴻⵏ ⵓⵎⵉ ⵜⴻⵏ ⵜⵓⵖⴰ ⴷⵉ ⵍⴻⵃⵚⴰⵔⴻⵜ,
ⵓⵎⵉ ⵉⵙⵍⴰ ⵜⵖⵓⵢⵢⵉⵜ ⵏⵙⴻⵏ.
45 ⵢⵉⴷⴰⵔ ⵍⵄⴰⵀⴷ ⵏⵏⴻⵙ ⴷⵉ ⵟⵟⵡⴻⵄ ⵏⵙⴻⵏ,
ⵓ ⵉⵏⴷⴻⵎ ⵥⵉ ⵙⵙⵉⴱⴱⴻⵜ ⵏ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ.
46 ⵉⵙⵙⵛⴻⵏ ⴰⵙⴻⵏ ⴰⵔⵔⴻⵃⵎⴻⵜ ⵏⵏⴻⵙ,
ⵥⵥⴰⵜ ⵉ ⵡⵓⴷⴻⵎ ⵏ ⵎⴰⵔⵔⴰ ⵉⵏⵏⵉ ⵜⴻⵏ ⵉⵃⴻⴱⴱⵙⴻⵏ.
47 ⵙⴻⵏⵊⴻⵎ ⴰⵏⴻⵖ, ⴰ ⵙⵉⴷⵉ, ⴰⵔⴻⴱⴱⵉ,
ⵏⴷⴻⵀ ⴰⵏⴻⵖ ⵏⵎⵓⵏ ⵥⵉ ⵍⴻⴳⵏⵓⵙ,
ⵃⵉⵎⴰ ⴰⴷ ⵏⵇⴰⴷⴰ ⵉⵙⴻⵎ ⴰⵎⵇⴻⴷⴷⴰⵙ ⵏⵏⴻⴽ,
ⴰⴷ ⵛⴻⴽ ⵏⵚⴻⴱⴱⴻⵃ ⵙ ⵢⴻⵥⵍⴰⵏ ⵏ ⵓⵙⴻⵎⵖⴰⵔ. ■
48 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ,
ⵥⵉ ⵍⴻⴱⴷⴰ ⴰⵍ ⵍⴻⴱⴷⴰ!”
ⴻⵊⵊ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ! ⵀⴰⵍⵍⵉⵍⵓ-ⵢⴰⵀ!’ ■