105
1 ⵇⴰⴷⴰⵎ ⵙⵉⴷⵉ, ⵍⴰⵖⴰⵎ ⵅ ⵢⵉⵙⴻⵎ ⵏⵏⴻⵙ, ⴱⴰⵔⵔⵃⴻⵎ ⵙ ⵜⵎⴻⴳⴳⴰ ⵏⵏⴻⵙ ⵊⴰⵔ ⵍⴻⴳⵏⵓⵙ. ■
2 ⵖⴻⵏⵏⵊⴻⵎ ⴰⵙ, ⵥⴻⵀⵀⴷⴻⵎ ⵉ ⵏⴻⵜⵜⴰ,
ⵙⵉⵡⵍⴻⵎ ⵅ ⵎⴰⵔⵔⴰ ⵍⵎⵓⵄⵊⵉⵥⴰⵜ ⵏⵏⴻⵙ.
3 ⵛⴻⵏⵏⵄⴻⵎ ⵉⵅⴻⴼ ⵏⵏⴻⴽ ⵙ ⵢⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ,
ⵃⵉⵎⴰ ⵓⵍ ⵏ ⵢⵉⵏⵏⵉ ⵢⴰⵔⴻⵥⵥⵓⵏ ⵙⵉⴷⵉ, ⴰⴷ ⵉⴼⴰⵔⵃ. ■
4 ⵙⴻⵇⵙⴰⵎ ⵅ ⵙⵉⴷⵉ ⴷ ⵊⵊⴻⵀⴷ ⵏⵏⴻⵙ,
ⴰⵔⵥⵓⵎ ⵓⴷⴻⵎ ⵏⵏⴻⵙ ⵍⴻⴱⴷⴰ.
5 ⵄⴻⵇⵍⴻⵎ ⵅ ⵍⵎⵓⵄⵊⵉⵥⴰⵜ ⵏⵏⴻⵙ ⵉ ⵉⴳⴳⴰ,
ⵅ ⵍⴻⵄⵍⴰⵎⴻⵜ ⵏⵏⴻⵙ ⵓ ⵅ ⵍⴻⵃⴽⴰⵎⴰⵜ ⵏ ⵓⵇⴻⵎⵎⵓⵎ ⵏⵏⴻⵙ.
6 ⵣⵥⴰⵔⵉⵄⴻⵜ ⵏ ⵉⴱⵔⴰⵀⵉⵎ, ⴰⵎⵙⴻⵅⵅⴰⵔ ⵏⵏⴻⵙ,
ⴰⵢⵜ ⵏ ⵢⴰⵄⵇⵓⴱ, ⵉⵏⵏⵉ ⵥⵥⴰⵢⴻⵙ ⵉⵜⵜⵡⴰⴼⴰⵔⵥⴻⵏ!
7 ⵏⴻⵜⵜⴰ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ.
ⵍⴻⵃⴽⴰⵎⴰⵜ ⵏⵏⴻⵙ ⵉ ⴷⴷ-ⵉⵜⵜⴰⵙⴻⵏ ⵅ ⵜⴻⵎⵎⵓⵔⵜ ⵎⴰⵔⵔⴰ.
8 ⵄⴻⵇⵍⴻⵎ ⵅ ⵍⵄⴰⵀⴷ ⵏⵏⴻⵙ ⵉ ⵍⴻⴱⴷⴰ,
ⴰⵡⴰⵍ ⵏⵏⵉ ⵉⵡⴻⵚⵚⴰ ⵉ ⵡⴰⵍⴻⴼ ⵏ ⵊⵊⵉⵍⴰⵜ,
9 ⵉ ⵉⴳⴳⴰ ⴰⴽ-ⴷ ⵉⴱⵔⴰⵀⵉⵎ,
ⵓ ⵉⵙⵙⴻⵎⵜⴻⵏ ⵉ-ⵜ ⵙ ⵜⵊⴰⴵⵉⵜ ⵏⵏⴻⵙ ⵉ ⵉⵙⵃⴰⵇ.
10 ⵏⴻⵜⵜⴰ ⵉⴳⴳⴰ ⵉ-ⵜ ⴷ ⵜⴰⵡⵚⴻⵢⵢⴻⵜ ⵉ ⵢⴰⵄⵇⵓⴱ,
ⵉ ⵉⵙⵔⴰⵉⵍ ⵉⴳⴳⴰ ⵉ-ⵜ ⴷ ⵍⵄⴰⵀⴷ ⵉ ⵍⴻⴱⴷⴰ, ■
11 ⵓⵎⵉ ⵉⵏⵏⴰ: “ⴰⴷ ⴰⵛ ⵡⵛⴻⵖ ⵜⴰⵎⵎⵓⵔⵜ ⵏ ⴽⴻⵏⵄⴰⵏ,
ⴰⴼⵉⵍⵓ ⵏ ⵍⴻⵄⴱⴰⵔ ⵏ ⵜⴻⵙⵖⴰⵔⵜ ⵏⵡⴻⵎ!” ■
12 ⵓⵎⵉ ⵜⵓⵖⴰ ⴽⴻⵏⵏⵉⵡ ⴷⴻⴳ ⵉⵊⵊ ⵏ ⵡⵓⵔⵓ ⵏ ⵢⴻⵔⵢⴰⵥⴻⵏ, ⵙ ⴷⵔⵓⵙ ⵡⴰⵀⴰ,
ⵓ ⴰⵎ ⵉⴱⴰⵔⵔⴰⵏⵉⵢⵢⴻⵏ ⵉ ⵜⴻⴵⵉⵎ ⴷⴰⵢⴻⵙ. ■
13 ⵏⵉⵜⵏⵉ ⵜⴻⵍⵄⴻⵏ ⵥⵉ ⵍⴳⴻⵏⵙ ⵖⴰⵔ ⵍⴳⴻⵏⵙ ⵏⵏⴻⵖⵏⵉ,
ⵥⴻⴳ ⵉⵛⵜ ⵏ ⵜⴳⴻⵍⴷⵉⵜ ⵖⴰⵔ ⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ.
14 ⵡⴰⵔ ⵉⵊⵊⵉ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⴰⴷ ⵜⴻⵏ ⵉⵙⵙⴻⵃⵚⴰⵔ,
ⵉⵄⴰⵇⴻⴱ ⵉⵊⴻⴵⵉⴷⴻⵏ ⴷⵉ ⵟⵟⵡⴻⵄ ⵏⵙⴻⵏ. ■
15 ⵡⴰⵔ ⵜⵜⵃⴰⴷⴰⵎ ⵛⴰ ⵉⵎⴻⴷⵀⵓⵏⴻⵏ ⵉⵏⵓ,
ⵡⴰⵔ ⵜⵜⴻⴳⴳⴻⵎ ⵍⵖⴰⵔ ⴷⴻⴳ ⵉⵏⴰⴱⵉⵢⵢⴻⵏ ⵉⵏⵓ.
16 ⵅⴻⵏⵏⵉ ⵉⵍⴰⵖⴰ-ⴷⴷ ⵉ ⵍⴰⵥ ⵖⴰⵔ ⵜⴻⵎⵎⵓⵔⵜ.
ⵢⴰⵔⵥⴰ ⴰⵙⴻⵏ ⵎⴰⵔⵔⴰ ⵍⴻⵄⵡⴻⵞ ⵏ ⵡⴻⵖⵔⵓⵎ. □
17 ⵉⵙⵙⴻⴽⴽ-ⴷⴷ ⵉⵊⵊ ⵏ ⵡⴻⵔⵢⴰⵥ ⵖⴰⵔ ⵥⵥⴰⵜ ⵉ ⵓⵖⴻⵎⴱⵓⴱ ⵏⵙⴻⵏ,
ⵢⵓⵙⵓⴼ ⵉⵎⵎⴻⵏⵥ ⴷ ⵉⵙⵎⴻⵖ. ■
18 ⵛⴰⵔⴼⴻⵏ ⵉⴹⴰⵔⴻⵏ ⵏⵏⴻⵙ ⴷⴻⴳ ⵉⵛⴻⴷⴷⵉⵢⵢⴻⵏ,
ⵍⴻⵄⵎⴰⵔ ⵏⵏⴻⵙ ⵉⵜⵜⵡⴰⵃⵚⴰⵔ ⴷⴻⴳ ⵡⵓⵥⵥⴰⵍ. □
19 ⵖⴰⵔⴻⵙ ⴰⵍⴰⵎⵉ ⵉⵜⵜⵡⴰⵙⴻⵇⴼⴻⵍ ⵡⴰⵡⴰⵍ ⵏⵏⴻⵙ,
ⵉⵚⴻⴼⴼⴰ ⴰⵙ ⵍⵀⴰⵔⴷ ⵏ ⵙⵉⴷⵉ.
20 ⵉⵙⵙⴻⴽⴽ ⵓⵊⴻⴵⵉⴷ ⵉⵊⵊ ⵃⵉⵎⴰ ⴰⴷ ⴰⵙ ⵉⵙⵙⴰⵔⵅⵓ,
ⵍⵃⴰⴽⴻⵎ ⵏ ⵍⴻⴳⵏⵓⵙ ⵉⴹⵍⴻⵇ ⵉ-ⵜ.
21 ⵏⴻⵜⵜⴰ ⵉⴳⴳⴰ ⵉ-ⵜ ⴷ ⴱⴰⴱ ⵅ ⵜⴰⴷⴷⴰⵔⵜ ⵏⵏⴻⵙ,
ⵓⵍⴰ ⴷ ⵍⵃⴰⴽⴻⵎ ⵅ ⵎⴰⵔⵔⴰ ⵎⵉⵏ ⵖⴰⵔⴻⵙ. ■
22 ⵃⵉⵎⴰ ⴰⴷ ⵖⴰⵔⴻⵙ ⵉⵛⴻⴷⴷ ⵍⵃⵓⴽⴽⴰⵎ,
ⵓ ⵃⵉⵎⴰ ⴰⴷ ⵉⵙⵙⴻⵍⵎⴻⴷ ⵜⵉⵖⵉⵜ ⵉ ⵉⵎⵖⴰⵔⴻⵏ ⵏⵏⴻⵙ.
23 ⴰⵡⴰⵔⵏⵉ ⴰⵢⴰ ⵢⵓⵙⴰ-ⴷⴷ ⵉⵙⵔⴰⵉⵍ ⵖⴰⵔ ⵎⵉⵚⵔⴰ,
ⵉⵇⵇⵉⵎ ⵢⴰⵄⵇⵓⴱ ⴰⵎ ⵓⴱⴰⵔⵔⴰⵏⵉ ⴷⵉ ⵜⴻⵎⵎⵓⵔⵜ ⵏ ⵃⴰⵎ.
24 ⵏⴻⵜⵜⴰ ⵉⴳⴳⴰ ⵍⵖⵉⴵⴻⵜ ⴷⵉ ⵍⴳⴻⵏⵙ ⵏⵏⴻⵙ ⴰⵟⵟⴰⵙ,
ⵢⴰⵔⵔⴰ ⵉ-ⵜ ⵉⵊⵀⴻⴷ ⵅ ⵢⴻⵏⵏⵉ ⵜ ⵉⵃⴻⵚⵚⴰⵔⴻⵏ. ■
25 ⵏⴻⵜⵜⴰ ⵢⴰⵔⵔⴰ ⵓⵍ ⵏⵙⴻⵏ ⵉⵏⵏⴻⵇⵍⴻⴱ,
ⴰⵍⴰⵎⵉ ⴷⴻⵡⵍⴻⵏ ⵛⴰⵔⵔⵀⴻⵏ ⵍⴳⴻⵏⵙ ⵏⵏⴻⵙ,
ⴷⴻⵡⵍⴻⵏ ⵖⴻⴷⴷⴰⵔⴻⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ. ■
26 ⵅⴻⵏⵏⵉ ⵉⵙⵙⴻⴽⴽ-ⴷⴷ ⵎⵓⵙⴰ, ⴰⵎⵙⴻⵅⵅⴰⵔ ⵏⵏⴻⵙ,
ⴷ ⵀⴰⵔⵓⵏ ⵡⴻⵏⵏⵉ ⵉⴼⴰⵔⵥ ⵉ-ⵜ ⵏⴻⵜⵜⴰ. ■
27 ⵏⵉⵜⵏⵉ ⴳⴳⵉⵏ ⵍⴻⵄⵍⴰⵎⴰⵜ ⵏⵙⴻⵏ ⵉⴼⴰⵔⵥⴻⵏ ⵊⴰⵔ ⴰⵙⴻⵏ,
ⵓ ⴳⴳⵉⵏ ⵍⵎⵓⵄⵊⵉⵥⴰⵜ ⴷⵉ ⵜⴻⵎⵎⵓⵔⵜ ⵏ ⵃⴰⵎ. ■
28 ⵏⴻⵜⵜⴰ ⵉⵙⵙⴻⴽⴽ-ⴷⴷ ⵜⴰⴵⴻⵙⵜ ⵓⵛⴰ ⵜⴻⴷⵡⴻⵍ ⵎⴰⵔⵔⴰ ⴷ ⵜⴰⴵⴻⵙⵜ.
ⵏⵉⵜⵏⵉ ⵡⴰⵔ ⵖⴻⵡⵡⵖⴻⵏ ⵛⴰ ⵅ ⵡⴰⵡⴰⵍⴻⵏ ⵏⵏⴻⵙ.
29 ⵏⴻⵜⵜⴰ ⵢⴰⵔⵔⴰ ⴰⵎⴰⵏ ⵏⵙⴻⵏ ⴷ ⵉⴷⴰⵎⵎⴻⵏ,
ⵓ ⵉⵏⵖⴰ ⵉⵙⴻⵍⵎⴰⵏ ⵏⵙⴻⵏ.
30 ⵏⴻⵜⵜⴰ ⵢⴰⵔⵔⴰ ⵜⴰⵎⵎⵓⵔⵜ ⵏⵙⴻⵏ ⵜⵙⴻⴼⴼⴰⵢ ⵙ ⵉⵇⴰⵔⵇⵔⵉⵡⴻⵏ,
ⴰⵍ ⴷⴰⵅⴻⵍ ⴷⴻⴳ ⵉⵅⵅⴰⵎⴻⵏ ⵏ ⵉⵊⴻⴵⵉⴷⴻⵏ ⵏⵙⴻⵏ.
31 ⵏⴻⵜⵜⴰ ⵉⵙⵙⵉⵡⴻⵍ ⵓⵛⴰ ⵢⵓⵙⴰ-ⴷⴷ ⵡⴻⵢⵍⴰⴼ ⵏ ⵉⴱⴻⵄⵄⴰⵛ,
ⵏⵏⴰⵎⵓⵙ ⵡⴹⴰⵏ-ⴷⴷ ⵅ ⵜⴻⵎⵎⵓⵔⵜ ⵏⵙⴻⵏ ⵎⴰⵔⵔⴰ.
32 ⵏⴻⵜⵜⴰ ⵢⴰⵔⵔⴰ ⴰⵏⵥⴰⵔ ⵏⵙⴻⵏ ⴷ ⴰⴱⵔⵓⵔⵔⵉ,
ⵉⵙⵙⴻⴽⴽ-ⴷⴷ ⵜⵉⵎⴻⵙⵙⵉ ⴷ ⵉⵛⴻⵄⵄⴰⵍⴻⵏ ⵅ ⵜⴻⵎⵎⵓⵔⵜ ⵏⵙⴻⵏ.
33 ⵏⴻⵜⵜⴰ ⵉⵡⵜⴰ ⵜⴰⵥⴰⵢⴰⵔⵜ ⵏⵙⴻⵏ ⴷ ⵡⴰⵔⵜⵓ ⵏⵙⴻⵏ,
ⵢⴰⵔⵥⴰ ⵜⵉⵛⴻⵊⵊⵓⵔⴰ ⴷⵉ ⵜⴻⵎⵎⵓⵔⵜ ⵏⵙⴻⵏ.
34 ⵏⴻⵜⵜⴰ ⵉⵙⵙⵉⵡⴻⵍ, ⵅⴻⵏⵏⵉ ⵜⵓⵙⴰ-ⴷⴷ ⵜⵎⵓⵖⵔⵉ,
ⵓⵍⴰ ⴷ ⴱⵓ-ⵡⴻⵍⵙⴰⵃ, ⴰⵇⴰ ⴰⵜⴻⵏ ⴱⵍⴰ ⵍⴻⵃⵙⴰⴱ.
35 ⵏⵉⵜⵏⵉ ⵛⵛⵉⵏ ⵎⴰⵔⵔⴰ ⴰⴼⵙⵓ ⴷⵉ ⵜⴻⵎⵎⵓⵔⵜ ⵏⵙⴻⵏ,
ⵛⵛⵉⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵏⵙⴻⵏ.
36 ⵏⴻⵜⵜⴰ ⵉⵏⵖⴰ ⵎⴰⵔⵔⴰ ⵉⵎⴻⵏⵥⴰ ⴷⵉ ⵜⴻⵎⵎⵓⵔⵜ ⵏⵙⴻⵏ,
ⴰⵎⴻⵏⵥⵓ ⵏ ⵎⴰⵔⵔⴰ ⵜⴰⵔⵢⴰⵙⵜ ⵏⵙⴻⵏ. ■
37 ⵏⴻⵜⵜⴰ ⵉⵙⵙⵓⴼⴼⴻⵖ ⵉ-ⵜⴻⵏ-ⴷⴷ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ,
ⵡⴰⵔ ⴷⵉⵏ ⵜⵓⵖⵉ ⵓⵍⴰ ⴷ ⵉⵊⵊ ⴷⵉ ⵜⵇⴻⴱⴱⴰⵍ ⵏⵙⴻⵏ ⵉ ⵉⵏⴷⴻⵔⴼⴻⵏ.
38 ⵎⵉⵚⵔⴰ ⵜⴼⴰⵔⵃ ⵙ ⵡⵓⴼⴼⵓⵖ ⵏⵙⴻⵏ,
ⵎⴰⵖⴰⵔ ⵜⴻⵡⴹⴰ-ⴷⴷ ⵅⴰⵙⴻⵏ ⵜⵉⴳⴳⵯⵓⴷⵉ ⵜⴻⵎⵖⴰⵔ. ■
39 ⵏⴻⵜⵜⴰ ⵉⴱⴻⵥⵥⴻⵄ ⴰⵙⴻⵢⵏⵓ ⴰⵎ ⵉⵊⵊ ⵏ ⴰⵔⵡⴰⵇ,
ⵓ ⵜⵎⴻⵙⵙⵉ ⵃⵉⵎⴰ ⴰⴷ ⵜⴻⵡⵛ ⵜⴰⴼⴰⵡⵜ ⵙ ⴵⵉⵍⴻⵜ.
40 ⵏⵉⵜⵏⵉ ⵥⵥⵓⴵⴻⵏ ⵓ ⵏⴻⵜⵜⴰ ⵢⴰⵔⵔⴰ ⴰⴷ ⴷⴷ-ⴰⵙⴻⵏⵜ ⵜⵉⵙⴻⴽⴽⵓⵔⵉⵏ,
ⵉⵙⵙⵊⵊⵉⵡⴻⵏ ⵉ-ⵜⴻⵏ ⵙ ⵡⴻⵖⵔⵓⵎ ⵏ ⵓⵊⴻⵏⵏⴰ.
41 ⵏⴻⵜⵜⴰ ⵢⴰⵔⵥⴻⵎ ⵜⴰⵚⴹⴰⵔⵜ, ⴰⵎⴰⵏ ⴷⴷⵓⵇⵇⵥⴻⵏ-ⴷⴷ ⵥⵥⴰⵢⴻⵙ,
ⵓⵥⵥⵍⴻⵏ ⵅ ⵍⴰⵥⴰⵖ ⵓ ⴷⴻⵡⵍⴻⵏ ⴰⵎ ⵢⴻⵖⵥⴰⵔ.
42 ⵎⴰⵖⴰⵔ ⵏⴻⵜⵜⴰ ⵉⵄⵇⴻⵍ ⵅ ⵡⴰⵡⴰⵍ ⵏⵏⴻⵙ ⵉⵇⴻⴷⴷⵙⴻⵏ,
ⵅ ⵓⵎⵙⴻⵅⵅⴰⵔ ⵏⵏⴻⵙ ⵉⴱⵔⴰⵀⵉⵎ. ■
43 ⵏⴻⵜⵜⴰ ⵉⵙⵙⵓⴼⴼⴻⵖ-ⴷⴷ ⵍⴳⴻⵏⵙ ⵏⵏⴻⵙ ⵙ ⵍⴻⴼⵔⴰⵃⴻⵜ,
ⵉⵏⵏⵉ ⵥⵥⴰⵢⴻⵙ ⵉⵜⵜⵡⴰⴼⴰⵔⵥⴻⵏ ⵙ ⵓⵙⵍⵉⵡⵍⴻⵡ. ■
44 ⵏⴻⵜⵜⴰ ⵉⵡⵛⴰ ⴰⵙⴻⵏ ⵜⵉⵎⵎⵓⵔⴰ ⵏ ⵍⴻⴳⵏⵓⵙ,
ⵏⵉⵜⵏⵉ ⵡⴰⵔⵜⴻⵏ ⵜⴰⵎⴰⵔⴰ ⵏ ⵛⵛⵓⵄⵓⴱ,
45 ⵃⵉⵎⴰ ⴰⴷ ⵟⵟⴼⴻⵏ ⴷⵉ ⵜⵡⴻⵚⵚⴰ ⵏⵏⴻⵙ,
ⴰⴷ ⵃⴹⴰⵏ ⵉⵥⴻⵔⴼⴰⵏ ⵏⵏⴻⵙ. ⵀⴰⵍⵍⵉⵍⵓ-ⵢⴰⵀ. ■