104
1 ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ! ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵎⴰⵎⵎⴻⵛ ⴷ ⴰⵎⴻⵇⵇⵔⴰⵏ ⵛⴻⴽ!
ⵛⴻⴽ ⵜⵢⴰⵔⴹⴻⴷ ⵙ ⵍⵄⴰⴹⴰⵎⴰ ⴷ ⵍⵄⴻⵥⵥ.
2 ⵏⴻⵜⵜⴰ ⵉⵍⴻⵃⵃⴻⴼ ⵉⵅⴻⴼ ⵏⵏⴻⵙ ⵙ ⵜⴼⴰⵡⵜ ⴰⵎⴻⵛⵏⴰⵡ ⵙ ⵉⵊⵊ ⵏ ⵓⴱⴰⵔⵜⴻⵙⵙⵓ,
ⵏⴻⵜⵜⴰ ⵉⵜⵜⴱⴻⵥⵥⴻⵄ ⴰⵊⴻⵏⵏⴰ ⴰⵎ ⵜⵊⴰⵔⵜⵉⵍⵜ ⵏ ⵓⵇⵉⴹⵓⵏ. ■
3 ⴰⵇⴰ ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⴰⵔⵙⴻⵏ ⵜⵃⴻⵏⵢⴰ ⵏ ⵡⴻⵙⵇⴻⴼ ⵙⴰⴷⵓ ⵉⵅⵅⴰⵎⴻⵏ ⵏⵏⴻⵙ ⵅ ⵡⴰⵎⴰⵏ,
ⴷ ⵡⴻⵏⵏⵉ ⵉⴳⴳⵉⵏ ⵉⵙⴻⵢⵏⵓⵜⴻⵏ ⴷ ⴰⴽⴰⵔⵔⵓ ⵏⵏⴻⵙ,
ⴷ ⵡⴻⵏⵏⵉ ⵉⴳⴳⵓⵔⴻⵏ ⵅ ⵡⴰⴼⵔⵉⵡⴻⵏ ⵏ ⵓⵙⴻⵎⵎⵉⴹ, ■
4 ⴷ ⵡⴻⵏⵏⵉ ⵉⴳⴳⵉⵏ ⵍⵎⴰⵍⴰⴽⴰⵜ ⵏⵏⴻⵙ ⴰⵎ ⵉⵙⴻⵎⵎⵉⴹⴻⵏ,
ⵓ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵉⵛⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ. ■
5 ⵏⴻⵜⵜⴰ ⵉⵙⵙⴱⴻⴷⴷ ⵜⴰⵎⵎⵓⵔⵜ ⵅ ⴷⵙⵓⵙⴰ ⵏⵏⴻⵙ,
ⵡⴰⵔ ⴳⴳⵓⵔ ⴰⴷ ⵜⴻⵏⵀⴻⵥⵥ ⵄⴻⵎⵎⴰⵔⵚ ⵉ ⵍⴻⴱⴷⴰ. ■
6 ⵛⴻⴽ ⵜⵍⴻⵃⵃⴼⴻⴷ ⴰⵙ ⵙ ⵡⴰⵎⴰⵏ ⵢⵓⵥⵖⴻⵏ ⴰⵎ ⵙ ⵢⵉⵊⵊ ⵏ ⵡⴰⵔⵔⵓⴹ,
ⴰⵎⴰⵏ ⴱⴻⴷⴷⴻⵏ ⵜⵉⵡⴰ ⵉ ⵉⴷⵓⵔⴰⵔ.
7 ⵏⵉⵜⵏⵉ ⴰⵔⴻⵡⵍⴻⵏ ⵥⴻⴳ ⵓⵙⵉⴳⴳⵯⴻⴷ ⵏⵏⴻⴽ,
ⵇⴻⴵⵇⴻⵏ ⴰⴷ ⴼⴼⵖⴻⵏ ⵥⵉ ⵜⵎⵉⵊⵊⴰ ⵏ ⵡⴰⵊⵊⴰⵊ ⵏⵏⴻⴽ.
8 ⵜⵜⵡⴰⵙⵙⴳⴻⵄⵄⴷⴻⵏ ⵉⴷⵓⵔⴰⵔ, ⵀⴻⴽⴽⵡⴰⵏⵜ ⵜⴻⵢⵙⴰⵔⵉⵏ,
ⴷⴻⴳ ⵡⴻⵎⵛⴰⵏ ⵉ ⴷ ⴰⵙⴻⵏ ⵜⴻⴳⴳⵉⴷ.
9 ⵛⴻⴽ ⵜⴻⴳⴳⵉⴷ ⴰⵢⵎⵉⵔ ⵉ ⵡⴰⵎⴰⵏ ⵓ ⵡⴰⵔ ⴳⴳⵓⵔ ⴰⴷ ⵜ ⵄⴷⵓⵏ,
ⵡⴰⵔ ⴷⴷ-ⴷⴻⴽⴽⵡⵉⵍⴻⵏ ⵎⴰⵃⴻⵏⴷ ⴰⴷ ⴷⵍⴻⵏ ⵜⴰⵎⵎⵓⵔⵜ.
10 ⵛⴻⴽ ⴷ ⵡⴻⵏⵏⵉ ⵉⵏⴻⴷⴷⵀⴻⵏ ⵜⴰⵍⴰⵡⵉⵏ ⴷⵉ ⵜⴻⵖⵥⵓⵔⵉⵏ,
ⴰⵇⴰ ⵜⵜⴰⵥⵥⵍⴻⵏⵜ ⴷⵉⵏ ⵊⴰⵔ ⵉⴷⵓⵔⴰⵔ.
11 ⴰⵇⴰ ⵡⴰⵔⵔⴷⴻⵏⵜ ⵎⴰⵔⵔⴰ ⵍⵎⴰⵍ ⵏ ⵢⴻⵢⵢⴰⵔ,
ⵉⵖⵢⴰⵍ ⵏ ⵍⴻⵅⵍⴰ ⵜⵜⴻⴽⴽⵙⴻⵏ ⴰⴼⴰⴷⵉ ⵏⵙⴻⵏ ⵥⵥⴰⵢⵙⴻⵏⵜ.
12 ⵉⵊⴹⴰⴹ ⵏ ⵓⵊⴻⵏⵏⴰ ⵥⴻⴷⴷⵖⴻⵏ ⵖⴰⵔ ⵜⴻⵎⵎⴰⵡⵉⵏ ⵏⵙⴻⵏ,
ⵥⵉ ⵊⴰⵔ ⵍⴻⴼⵔⵓⵄ ⵜᵉⵜⵜⴻⴽⴽ-ⴷⴷ ⵜⵎⵉⵊⵊⴰ ⵏⵙⴻⵏ.
13 ⵏⴻⵜⵜⴰ ⴰⵇⴰ ⴷ ⵡⴻⵏⵏⵉ ⵉⵜⵜⴻⵙⵙⵓⵏ ⵉⴷⵓⵔⴰⵔ ⵥⴻⴳ ⵉⵅⵅⴰⵎⴻⵏ ⵏⵏⴻⵙ ⴷⴻⴳ ⵓⵊⴻⵏⵏⴰ,
ⵜⴰⵎⵎⵓⵔⵜ ⵜᵉⵜⵜⵢⴰⵡⴰⵏ ⵥⵉ ⵍⵖⵉⴵⴻⵜ ⵉ ⴷⴷ-ⵉⴼⴼⵖⴻⵏ ⵥⵉ ⵎⵉⵏ ⵜⴻⴳⴳⵉⴷ ⵛⴻⴽ. □
14 ⵏⴻⵜⵜⴰ ⵉⴳⴳⴰ ⴰⵔⵔⴱⵉⵄ ⵉⵖⴻⵎⵎⵉ ⵉ ⵍⵎⴰⵔ,
ⵓⵍⴰ ⴷ ⴰⵖⴻⵎⵎⵓⵢ ⴷⵉ ⵟⵟⵡⴻⵄ ⵏ ⴱⵏⴰⴷⴻⵎ,
ⵎⴰⵃⴻⵏⴷ ⴰⴷ ⴷⴷ-ⵢⴰⵡⵉ ⴰⵖⵔⵓⵎ ⵥⵉ ⵜⴻⵎⵎⵓⵔⵜ
15 ⵓ ⴱⵉⵏⵓ ⵏⵏⵉ ⵉⵙⵙⴼⴰⵔⵔⴰⵃⴻⵏ ⵓⵍ ⵏ ⴱⵏⴰⴷⴻⵎ.,
ⴰⵍⴰⵎⵉ ⵉⵖⴻⵎⴱⴰⴱ ⴰⴷ ⵥⵥⴰⵢⴻⵙ ⵡⴻⵙⵙⴳⴻⵏ ⵎⴰⵀⵓ ⵥⵉ ⵥⵥⴻⵛⵜ,
ⵓⵍⴰ ⴷ ⴰⵖⵔⵓⵎ ⵏⵏⵉ ⵉⵙⵙⴻⵊⵀⴻⴷ ⵓⵍ ⵏ ⴱⵏⴰⴷⴻⵎ.
16 ⵜⵉⵛⴻⵊⵊⵓⵔⴰ ⵏ ⵙⵉⴷⵉ ⵜⵜⵢⴰⵡⴰⵏⴻⵏⵜ,
ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⵏ ⵍⵓⴱⵏⴰⵏ ⵏⵏⵉ ⵉⵥⵥⵓ ⵏⴻⵜⵜⴰ,
17 ⵎⴰⵏⵉ ⵜⵜⴻⴳⴳⴻⵏ ⵉⵊⴹⴰⴹ ⵍⵄⵓⵛⵛ ⵏⵙⴻⵏ,
ⵎⴰⵏⵉ ⵉ ⵜⴻⴵⴰ ⵜⴰⴷⴷⴰⵔⵜ ⵏ ⵓⴱⴻⵍⵍⴰⵔⵊ ⴷⵉ ⵜⵛⴻⵊⵊⵓⵔⴰ ⵏ ⵓⵎⴻⵔⵥⵉ. □
18 ⵉⴷⵓⵔⴰⵔ ⵢⵓⵄⵍⴰⵏ ⴰⵇⴰ ⴰⵜⴻⵏ ⵉ ⵉⵖⴰⵢⴹⴻⵏ ⵏ ⵜⵚⵓⴹⴰⵔ,
ⵍⴻⵊⵔⵓⴼ ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ ⵉ ⵉⴽⴰⵡⴽⴰⵡⴻⵏ ⵏ ⵜⴻⵚⴹⴰⵔⵜ.
19 ⵏⴻⵜⵜⴰ ⵉⴳⴳⴰ ⵜⴰⵥⵉⵔⵉ ⴷ ⵍⴻⵄⴱⴰⵔ ⵉ ⵉⴽⵓⴷⴻⵏ ⵉⵜⵜⵡⴰⴳⴳⴻⵏ,
ⵜⴰⴼⵓⵛⵜ ⵜⴻⵙⵙⴻⵏ ⵎⴻⵍⵎⵉ ⵉ ⵖⴰ ⵜⴻⵖⵍⵉ.
20 ⵛⴻⴽ ⵜⴻⵙⵙⴻⴽⴽⵉⴷ-ⴷⴷ ⵜⴰⴵⴻⵙⵜ ⵓ ⵜⴻⵡⴹⴰ-ⴷⴷ ⴵⵉⵍⴻⵜ,
ⵉ ⴷⵉ ⵜⵜⴻⵅⵜⵓⵜⵢⴻⵏ ⵎⴰⵔⵔⴰ ⵍⴻⵡⵃⵓⵛ ⵏ ⵡⴻⵥⵖⴰⵔ. □
21 ⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵥⴻⵀⵀⴰⵔⴻⵏ ⵅ ⵥⵥⴰⵔⴷⴻⵜ,
ⵎⴰⵃⴻⵏⴷ ⴰⴷ ⴰⵔⵥⵓⵏ ⵅ ⵎⴰⵛⵛⴰ ⵏⵙⴻⵏ ⵥⵉ ⴰⵔⴻⴱⴱⵉ. ■
22 ⵎⴰⵍⴰ ⵜⴻⴼⴼⴻⵖ-ⴷⴷ ⵅⴻⵏⵏⵉ ⵜⴼⵓⵛⵜ, ⵜⵜⴻⵛⵔⵓⵔⵓⴷⴻⵏ ⵖⴰⵔ ⵍⵎⴰⵔⴳⴻⵃ,
ⵓⵛⴰ ⵜⵜⵖⴻⵎⵎⴰⵔⴻⵏ ⴷⴻⴳ ⵉⴼⵔⴰⵏ ⵏⵙⴻⵏ.
23 ⵅⴻⵏⵏⵉ ⵉⵜⵜⴻⴼⴼⴻⵖ ⴱⵏⴰⴷⴻⵎ ⵖⴰⵔ ⵍⵅⴻⴷⵎⴻⵜ ⵏⵏⴻⵙ,
ⵖⴰⵔ ⵜⴻⵡⵡⵓⵔⵉ ⵏⵏⴻⵙ ⴰⵍ ⵜⴰⵎⴻⴷⴷⵉⵜ.
24 ⵎⴰⵎⵎⴻⵛ ⴰⵟⵟⴰⵙ ⵉ ⵜⴻⴳⴳⵉⴷ, ⴰ ⵙⵉⴷⵉ,
ⵙ ⵜⵉⵖⵉⵜ ⵉ ⵜⴻⴳⴳⵉⴷ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ,
ⵜⴰⵎⵎⵓⵔⵜ ⵜᵉⵜⵜⵡⴰⵛⵛⵓⵔ ⵙ ⵡⴰⴳⵍⴰ ⵏⵏⴻⴽ.
25 ⴰⵇⴰ ⴷⵉⵏ ⵍⴻⴱⵃⴰⵔ ⵉⵎⵖⴰⵔ, ⵢⵉⵔⵉⵡ ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏⵏⴻⵙ,
ⵎⴰⵏⵉ ⵉⵙⵙⴼⵓⴼⴼⴻⵢ ⵎⴰⵔⵔⴰ ⵙ ⵉⵎⵓⴷⴷⴰⵔⴻⵏ ⵉⵎⴻⵇⵇⵔⴰⵏⴻⵏ ⴷ ⵉⵎⴻⵥⵢⴰⵏⴻⵏ, ⴱⵍⴰ ⵍⴻⵃⵙⴰⴱ,
26 ⵎⴰⵏⵉ ⴳⴳⵓⵔⴻⵏ ⵉⵖⴰⵔⵔⵓⴱⴰ,
‘ⵍⵉ$ⵉⵢⴰⵜⴰⵏ’ ⵏⵏⵉ ⵜⴻⴳⴳⵉⴷ ⵃⵉⵎⴰ ⴰⴷ ⴷⴰⵢⴻⵙ ⵉⵜⵜⵉⵔⴰⵔ.
27 ⵏⵉⵜⵏⵉ ⵎⴰⵔⵔⴰ ⵜⵜⵔⴰⵊⴰⵏ ⵛⴻⴽ,
ⴰⴷ ⴰⵙⴻⵏ ⵜⴻⵡⵛⴻⴷ ⵎⴰⵛⵛⴰ ⵏⵙⴻⵏ ⴷⵉ ⵍⵡⴻⵇⵜ ⵏⵏⴻⵙ. ■
28 ⵎⴰⵍⴰ ⵜⴻⵡⵛⵉⴷ ⴰⵙⴻⵏ, ⵢⴰⵔⵔⵡⴻⵏ ⵏⵉⵜⵏⵉ,
ⵎⴰⵍⴰ ⵜⴰⵔⵥⵎⴻⴷ ⴰⴼⵓⵙ ⵏⵏⴻⴽ,
ⴷⴷⴰⴽⴽⵡⴰⵍⴻⵏ ⵊⵊⵉⵡⵏⴻⵏ ⵙ ⵍⵅⴰⵔ.
29 ⵎⴰⵍⴰ ⵜⴻⴼⴼⴰⵔⴻⴷ ⵓⴷⴻⵎ ⵏⵏⴻⴽ,
ⴰⵇⴰ ⵜⵜⵏⴻⵅⵍⴰⵄⴻⵏ,
ⵎⴰⵍⴰ ⵜⴽⴻⵙⵙⵉⴷ ⴰⵙⴻⵏ ⵏⵏⴻⴼⵙ,
ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ ⵓ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵓⵛⴰⵍ ⵏⵙⴻⵏ. ■
30 ⵎⴰⵍⴰ ⵜⴻⵙⵙⴻⴽⴽⴻⴷ-ⴷⴷ ⴰⵔⵔⵓⵃ ⵏⵏⴻⴽ,
ⵅⴻⵏⵏⵉ ⵜⵜⵡⴰⵅⴻⵍⵇⴻⵏ-ⴷⴷ ⵏⵉⵜⵏⵉ,
ⵓ ⴰⴷ ⵜⴰⵔⵔⵉⴷ ⴰⵖⴻⵎⴱⵓⴱ ⵏ ⵜⴻⵎⵎⵓⵔⵜ ⴷ ⴰⵎⴰⵢⵏⵓ.
31 ⴰⵄⵓⴵⵉ ⵏ ⵙⵉⴷⵉ ⴰⴷ ⵢⵉⵍⵉ ⵉ ⵍⴻⴱⴷⴰ,
ⵙⵉⴷⵉ ⴰⴷ ⵉⴼⴰⵔⵃ ⵉ ⵎⴰⵔⵔⴰ ⵎⵉⵏ ⵉⴳⴳⴰ.
32 ⵎⴰⵍⴰ ⵏⴻⵜⵜⴰ ⵉⵅⴻⵥⵥⴰⵔ ⴷⵉ ⵜⴻⵎⵎⵓⵔⵜ, ⵜᵉⵜⵜⴰⵔⵊⵉⵊⵉ,
ⵎⴰⵍⴰ ⵉⵃⴰⴷⴰ ⵉⴷⵓⵔⴰⵔ, ⴰⴷ ⴷⴷⵓⵅⵅⵏⴻⵏ.
33 ⵏⴻⵛⵛ ⵅⵙⴻⵖ ⴰⴷ ⵖⴻⵏⵏⵊⴻⵖ ⵉ ⵙⵉⴷⵉ ⵎⵉⵏ ⵖⴰ ⴽⴽⴻⵖ ⴷⴷⴰⵔⴻⵖ,
ⴰⴷ ⵥⴻⵀⵀⴷⴻⵖ ⵉ ⴰⵔⴻⴱⴱⵉ ⵉⵏⵓ ⵎⵉⵏ ⴷⴰ ⵉ ⵖⴰ ⴽⴽⴻⵖ ⴵⵉⵖ. ■
34 ⴰⵅⴻⵎⵎⴻⵎ ⵉⵏⵓ ⴰⴷ ⴷⴷ-ⵢⴰⵙ ⵅ ⵍⵅⴰⴹⴰⵔ ⵏⵏⴻⵙ,
ⴰⴷ ⴼⴰⵔⵃⴻⵖ ⴷⵉ ⵙⵉⴷⵉ.
35 ⵉⵎⴻⴷⵏⴰⴱ ⴰⴷ ⵜⵜⵡⴰⵜⴻⵃⵃⴰⵏ ⵇⴰⵄ ⵥⵉ ⵜⴻⵎⵎⵓⵔⵜ,
ⵉⵄⴻⴼⴼⴰⵏⴻⵏ ⵡⴰⵔ ⵜⵜⵉⵍⵉⵏ ⵄⴰⴷ.
ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ. ⵀⴰⵍⵍⵉⵍⵓ-ⵢⴰⵀ!