103
1 ⵏ ⴷⴰⵡⵓⴷ. ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ,
ⴷ ⵎⴰⵔⵔⴰ ⵎⵉⵏ ⴷⴰⵢⵉ ⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ.
2 ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ,
ⵡⴰⵔ ⵜⵜᵉⵜⵜⵓ ⵄⴻⵎⵎⴰⵔⵚ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ ⵉⵚⴻⴱⵃⴻⵏ.
3 ⵏⴻⵜⵜⴰ ⴷ ⵡⴻⵏⵏⵉ ⴷ ⴰⵛ ⵉⵖⴻⴼⴼⴰⵔⴻⵏ ⵎⴰⵔⵔⴰ ⴷⴷⵏⵓⴱ ⵏⵏⴻⴽ,
ⵡⴻⵏⵏⵉ ⵉⵙⵙⴳⴻⵏⴼⴰⵏ ⵎⴰⵔⵔⴰ ⵍⴻⵀⵍⴰⵛⴰⵜ ⵏⵏⴻⴽ,
4 ⵡⴻⵏⵏⵉ ⵉⵙⵙⴻⵏⵊⴰⵎⴻⵏ ⵜⵓⴷⴰⵔⵜ ⵏⵏⴻⴽ ⵥⴻⴳ ⵡⴻⵏⴹⴻⵍ,
ⵡⴻⵏⵏⵉ ⵅⴰⴽ ⵉⴳⴳⵉⵏ ⵉⵊⵊ ⵏ ⵜⵜⴰⵊ ⵏ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⴰⵔⵔⴻⵃⵎⴻⵜ,
5 ⵡⴻⵏⵏⵉ ⵉⵙⵙⵊⵊⴰⵡⴰⵏⴻⵏ ⴰⵇⴻⵎⵎⵓⵎ ⵏⵏⴻⴽ ⵙ ⵎⵉⵏ ⵉⵚⴻⴱⵃⴻⵏ,
ⵡⴻⵏⵏⵉ ⵉⵜⵜⴰⵔⵔⴰⵏ ⵜⴻⵎⵥⵉ ⵏⵏⴻⴽ ⴰⵎ ⵓⴳⵉⴷⴻⵔ.
6 ⵙⵉⴷⵉ ⵉⵜⵜⴻⴳⴳ ⵜⴰⵙⴻⴳⴷⴰ ⴷ ⵍⵃⴻⵇⵇ
ⵉ ⵎⴰⵔⵔⴰ ⵉⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ.
7 ⵏⴻⵜⵜⴰ ⵉⵙⵙⵛⴻⵏ ⵉ ⵎⵓⵙⴰ ⵉⴱⵔⵉⴷⴻⵏ ⵏⵏⴻⵙ,
ⵉ ⴰⵢⵜ ⵏ ⵉⵙⵔⴰⵉⵍ ⵜⵉⵎⴻⴳⴳⴰ ⵏⵏⴻⵙ.
8 ⵙⵉⴷⵉ ⴷ ⴰⵔⵃⵉⵎ ⴷ ⴰⵃⵏⵉⵏ,
ⵖⴰⵔⴻⵙ ⵜⵜⴰⵙⵉⵄ ⵏ ⵍⵅⴰⴹⴰⵔ, ⵉⵛⵛⵓⵔ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ. ■
9 ⵏⴻⵜⵜⴰ ⵡⴰⵔ ⵉⵜⵜⴻⵎⵛⵓⴱⴱⵓⵛ ⵉ ⵍⴻⴱⴷⴰ,
ⵡⴰⵔ ⵉⵜⵜⵖⵉⵎⵉ ⵉⵜⵜⵅⴻⵢⵢⵉⵇ ⵉ ⵍⴻⴱⴷⴰ. ■
10 ⵏⴻⵜⵜⴰ ⵡⴰⵔ ⴷ ⴰⵏⴻⵖ ⵉⵜⵜⴻⴳⴳ ⵄⵍⴰⵃⵙⴰⴱ ⴷⴷⵏⵓⴱ ⵏⵏⴻⵖ,
ⵓ ⵡⴰⵔ ⵥⵥⴰⵢⵏⴻⵖ ⵉⵅⴻⴵⴻⴼ ⵄⵍⴰⵃⵙⴰⴱ ⵍⵎⵓⵄⵚⵉⵢⵢⴻⵜ ⵏⵏⴻⵖ,
11 ⵎⴰⵖⴰⵔ ⴰⵎ ⵓⵊⴻⵏⵏⴰ ⵢⵓⵄⵍⴰⵏ ⵅ ⵜⴻⵎⵎⵓⵔⵜ,
ⴰⵎⵎⵓ ⵉ ⵜⴻⵎⵖⴰⵔ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ
ⵙⴻⵏⵏⴻⵊ ⵉ ⵎⴰⵔⵔⴰ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ.
12 ⴰⵎ ⵉⴳⴳⵯⴻⵊ ⵛⵛⴰⵔⵇ ⵅ ⵍⵖⴰⵔⴱ,
ⴰⵎⵎⵓ ⵉ ⵉⵙⵙⵉⴳⴳⵯⴻⵊ ⵏⴻⵜⵜⴰ ⵉⵅⴻⵟⵟⴰⵏ ⵏⵏⴻⵖ ⵅⴰⵏⴻⵖ.
13 ⴰⵎ ⵎⴰⵎⵎⴻⵛ ⵉⵃⵉⵏⵏ ⵉⵊⵊ ⵏ ⵜⴱⴰⴱⴰⵜ ⵅ ⵉⵃⴻⵏⵊⵉⵔⴻⵏ ⵏⵏⴻⵙ,
ⴰⵎⵎⵓ ⵉ ⵉⵃⵉⵏⵏ ⵙⵉⴷⵉ ⵅ ⵢⴻⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ.
14 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵏ ⵎⴰⵎⵎⴻⵛ ⵏⴻⵜⵜⵡⴰⴳⴳ,
ⵉⵄⵇⴻⵍ ⴰⵇⴰ ⵏⴻⵛⵛⵉⵏ ⴷ ⴰⵛⴰⵍ.
15 ⵓⵙⵙⴰⵏ ⵏ ⴱⵏⴰⴷⴻⵎ ⴰⵎⴻⵛⵏⴰⵡ ⵜⵓⴳⴰ,
ⵏⴻⵜⵜⴰ ⵉⵜⵜⵏⵓⵡⴰⵔ ⴰⵎⴻⵛⵏⴰⵡ ⵜⴰⵏⵓⵡⵡⴰⵛⵜ ⵏ ⵢⴻⵢⵢⴰⵔ. ■
16 ⵎⴰⵍⴰ ⵉⴽⴽⴰ-ⴷⴷ ⵅⴰⵙ ⵓⵙⴻⵎⵎⵉⴹ, ⵡⴰⵔ ⵜⴻⵇⵇⵉⵎ,
ⵓ ⴰⵎⵛⴰⵏ ⵎⴰⵏⵉ ⵜⵓⵖⴰ ⵜⴱⴻⴷⴷ, ⵡⴰⵔ ⵅⴰⵙ ⵉⵙⵙⵉⵏ ⵄⴰⴷ.
17 ⵎⴰⵛⴰ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵙⵉⴷⵉ,
ⵜᵉⵜⵜⵖⵉⵎⴰ ⵥⵉ ⵍⴻⴱⴷⴰ ⴰⵍ ⵍⴻⴱⴷⴰ ⵙⴻⵏⵏⴻⵊ ⵉ ⵢⴻⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ,
ⵓ ⵜⴰⵙⴻⴳⴷⴰ ⵏⵏⴻⵙ ⵜᵉⵜⵜⵖⵉⵎⴰ ⵉ ⵡⴰⵔⵔⴰⵡ ⵏ ⵡⴰⵔⵔⴰⵡ,
18 ⵉ ⵎⴰⵔⵔⴰ ⵉⵏⵏⵉ ⵉⵃⴻⵟⵟⴰⵏ ⵍⵄⴰⵀⴷ ⵏⵏⴻⵙ,
ⵓ ⵉⵄⴻⵇⵇⵍⴻⵏ ⵅ ⵍⵓⵎⵓⵔⴰⵜ ⵏⵏⴻⵙ ⵎⴰⵃⴻⵏⴷ ⴰⴷ ⵥⵥⴰⵢⵙⴻⵏ ⵜⵜⴻⴳⴳⴻⵏ. ■
19 ⵙⵉⴷⵉ ⵉⵙⵙⴱⴻⴷⴷ ⵍⵄⴰⵔⵛ ⵏⵏⴻⵙ ⴷⴻⴳ ⵓⵊⴻⵏⵏⴰ,
ⵜⴰⴳⴻⵍⴷⴰ ⵏⵏⴻⵙ ⵜⵃⴻⴽⴽⴻⵎ ⵅ ⵎⴰⵔⵔⴰ ⵎⵉⵏ ⵉⴵⴰⵏ.
20 ⴱⴰⵔⴽⴻⵏⵜ ⵙⵉⴷⵉ, ⴽⴻⵏⵏⵉⵏⵜ, ⵍⵎⴰⵍⴰⴽⴰⵜ ⵏⵏⴻⵙ,
ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ ⵉⵏⵏⵉ ⵉⵜⵜⴻⴳⴳⴻⵏ ⴰⵡⴰⵍ ⵏⵏⴻⵙ,
ⵉⵏⵏⵉ ⵉⵜⵜⴻⵙⵍⴰⵏ ⵉ ⵜⵎⵉⵊⵊⴰ ⵏ ⵡⴰⵡⴰⵍ ⵏⵏⴻⵙ.
21 ⴱⴰⵔⴽⴻⵏⵜ ⵙⵉⴷⵉ, ⵎⴰⵔⵔⴰ ⵍⵄⴻⵙⴽⴰⵔⴰⵜ ⵏⵏⴻⵙ,
ⴽⴻⵏⵏⵉⵡ, ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵉⵏⵏⵉ ⵉⵜⵜⴻⴳⴳⴻⵏ ⵎⵉⵏ ⴷ ⴰⵙ ⵢⴰⵔⴻⵛⵇⴻⵏ! ■
22 ⴱⴰⵔⴽⴻⵎ ⵙⵉⴷⵉ, ⴰ ⵎⴰⵔⵔⴰ ⵎⵉⵏ ⵉⵜⵜⵡⴰⴳⴳⴻⵏ ⵙ ⵓⴼⵓⵙ ⵏⵏⴻⵙ,
ⴷⵉ ⵎⴰⵏⵉ ⵎⴰ ⵉ ⵜⴻⴵⴰ ⵍⴻⵃⴽⴰⵎⴻⵜ ⵏⵏⴻⵙ.
ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ.