102
1 ⵜⴰⵥⴰⴵⵉⵜ ⵏ ⵡⴻⵏⵏⵉ ⵉⵃⴻⵚⵚⴰⵔⴻⵏ ⵎⴰⵍⴰ ⵎⴰⵏⴰⵢⴻⵏⵏⵉ ⴷ ⴰⵟⵟⴰⵙ ⵅⴰⵙ, ⵓⵛⴰ ⵅⴻⵏⵏⵉ ⵉⵜⵜⴼⴰⵔⵔⴻⵖ ⵉⵎⵓⵏⴰⵙ ⵏⵏⴻⵙ ⵥⵥⴰⵜ ⵉ ⵙⵉⴷⵉ.
2 ⴰ ⵙⵉⴷⵉ, ⵙⴻⵍ ⵖⴰⵔ ⵜⵥⴰⴵⵉⵜ ⵉⵏⵓ,
ⴻⵊⵊ ⴰⵖⵓⵢⵢⵉ ⵉⵏⵓ ⴰⴷ ⵖⴰⵔⴻⴽ ⴷⴷ-ⵢⴰⵡⴻⴹ.
3 ⵡⴰⵔ ⵜⵜⴻⴼⴼⴰⵔ ⵓⴷⴻⵎ ⵏⵏⴻⴽ ⵅⴰⴼⵉ ⴷⴻⴳ ⵡⴰⵙⵙ ⵉ ⴷⵉ ⵜⵜⵡⴰⵃⵚⴰⵔⴻⵖ.
ⴰⵔⵔ-ⴷⴷ ⵖⴰⵔⵉ ⴰⵎⴻⵥⵥⵓⵖ ⵏⵏⴻⴽ ⴷⴻⴳ ⵡⴰⵙⵙ ⵉ ⴷⵉ ⵍⴰⵖⵉⵖ,
ⵙⴻⵍ-ⴷⴷ ⵅⴻⵏⵏⵉ ⵖⴰⵔⵉ ⴷⴻⵖⵢⴰ,
4 ⵎⵉⵏⵥⵉ ⵓⵙⵙⴰⵏ ⵉⵏⵓ ⵄⴷⵓⵏ ⴰⵎ ⴷⴷⴻⵅⵅⴰⵏ,
ⵉⵅⵙⴰⵏ ⵉⵏⵓ ⴰⵎ ⵜⴻⴼⵇⵓⵏⵜ ⵉⵛⴻⵎⴹⴻⵏ. ■
5 ⵓⵍ ⵉⵏⵓ ⵉⵜⵜⵉⵙⵍⴰⵡ ⵓ ⵢⵓⵥⴻⵖ ⴰⵎ ⴰⵔⵔⴱⵉⵄ,
ⴰⵍⴰⵎⵉ ⵜⵜⵓⵖ ⴰⴷ ⵛⵛⴻⵖ ⴰⵖⵔⵓⵎ ⵉⵏⵓ.
6 ⵉⵅⵙⴰⵏ ⵉⵏⵓ ⵍⴻⵚⵇⴻⵏ ⵖⴰⵔ ⵜⴻⵍⵎⴻⵛⵜ ⵉⵏⵓ
ⵥⵉ ⵙⵙⵉⴱⴱⴻⵜ ⵏ ⵓⵥⴻⵀⵀⴰⵔ ⵢⵓⴵⵖⴻⵏ ⵉⵏⵓ.
7 ⵏⴻⵛⵛ ⴰⵎ ⵉⵊⵊ ⴱⵓ-ⵓⵄⵓⵇⵇⵉ ⵏ ⵓⵊⴹⵉⴹ ⴷⵉ ⵍⴻⵅⵍⴰ,
ⴷⴻⵡⵍⴻⵖ ⴰⵎ ⵉⵊⵊ ⵏ ⵎⵓⴽⴰ ⵊⴰⵔ ⵍⵅⵉⵔⴱⴰⵜ.
8 ⵏⴻⵛⵛ ⴱⴻⴷⴷⴻⵖ ⴼⴰⵇⴻⵖ,
ⴷⴻⵡⵍⴻⵖ ⴰⵎ ⵢⵉⵊⵊ ⵏ ⵡⴻⵊⴹⵉⴹ ⵉ ⵉⵇⵇⵉⵎⴻⵏ ⵡⴻⵃⵃⴷⴻⵙ ⵅ ⵜⵥⴻⵇⵇⴰ.
9 ⵍⵄⴻⴷⵢⴰⵏ ⵉⵏⵓ ⵜⵜⴻⴽⴽⵡⴰⵔⴻⵏ ⴰⵢⵉ ⴰⵙⵙ ⵎⴰⵔⵔⴰ.
ⵉⵏⵏⵉ ⵅⴰⴼⵉ ⵉⵜⵜⵄⴻⴷⴷⴰⵏ,
ⵏⴻⵄⵄⵍⴻⵏ ⴰⵎ ⵇⵇⴰⵔⴻⵏ ⵉⵙⴻⵎ ⵉⵏⵓ.
10 ⵎⴰⵖⴰⵔ ⵜⵜᵉⵜⵜⴻⵖ ⵉⵖⵖⴻⴹ ⴰⵎ ⵡⴻⵖⵔⵓⵎ,
ⵓ ⵅⴻⴵⴹⴻⵖ ⵜⵉⵙⴻⵙⵙⵉⵜ ⵉⵏⵓ ⵙ ⵉⵎⴻⵟⵟⴰⵡⴻⵏ ⵉⵏⵓ
11 ⵥⵉ ⵙⵙⵉⴱⴱⴻⵜ ⵏ ⵡⴻⵙⵅⴻⴹ ⵏⵏⴻⴽ ⴷ ⵓⴷⵓⵇⵇⴻⵥ ⵏ ⵡⴻⵖⴹⴰⴱ ⵏⵏⴻⴽ,
ⵎⴰⵖⴰⵔ ⵛⴻⴽ ⵜⴻⵙⵙⴳⴻⵄⵄⴷⴻⴷ ⴰⵢⵉ ⵓ ⵜⴻⵏⴹⴰⵔⴻⴷ ⴰⵢⵉ ⵄⴰⵡⴻⴷ ⵖⴰⵔ ⵜⴻⵎⵎⵓⵔⵜ.
12 ⵓⵙⵙⴰⵏ ⵉⵏⵓ ⴰⵎ ⵉⵛⵜ ⵏ ⵜⵉⵍⵉ ⵉⵥⵥⵓⴳⴳⴰⵔⵜⴻⵏ,
ⵓ ⵏⴻⵛⵛ ⵜⴰⵥⵖⴻⵖ ⴰⵎ ⵜⵓⴳⴰ.
13 ⵎⴰⵛⴰ ⵛⴻⴽ, ⴰ ⵙⵉⴷⵉ, ⴰⴷ ⵜⴻⵇⵇⵉⵎⴻⴷ ⵉ ⵍⴻⴱⴷⴰ,
ⵥⵉ ⵊⵊⵉⵍ ⴰⵍ ⵊⵊⵉⵍ ⴰⴷ ⴷⴰⵢⴻⴽ ⵅⴰⵔⵔⵚⴻⵏ.
14 ⵛⴻⴽ ⴰⴷ ⵜⴻⴽⴽⴰⵔⴻⴷ ⴰⴷ ⵜⴰⵔⵃⵎⴻⴷ ⵅ ⵚⵉⵀⵢⵓⵏ,
ⵎⴰⵖⴰⵔ ⴰⵇⴰ ⴷ ⵍⵡⴻⵇⵜ ⵎⴰⵃⴻⵏⴷ ⴰⴷ ⵅⴰⵙ ⵜⵃⵉⵏⵏⴻⴷ,
ⵎⵉⵏⵥⵉ ⵍⵡⴻⵇⵜ ⵉⵜⵜⵡⴰⴳⴳⴻⵏ ⴰⵇⴰ ⵜⵉⵡⴻⴹ-ⴷⴷ.
15 ⵎⴰⵖⴰⵔ ⵉⵥⵔⴰ ⵏⵏⴻⵙ ⵓⵙⵉⵏ-ⴷⴷ ⵅ ⵍⵅⴰⴹⴰⵔ ⵏ ⵉⵎⵙⴻⵅⵅⴰⵔⴻⵏ ⵏⵏⴻⴽ
ⵓ ⵏⵉⵜⵏⵉ ⴽⵙⵉⵏ ⵙ ⵡⴻⵙⵃⵉⵙⵙⴻⴼ ⴷⵉ ⵜⵄⴻⵊⵊⴰⵊⵜ ⵏⵙⴻⵏ.
16 ⵍⴻⴳⵏⵓⵙ ⴰⴷ ⴳⴳⵯⴻⴷⴻⵏ ⵉⵙⴻⵎ ⵏ ⵙⵉⴷⵉ,
ⵎⴰⵔⵔⴰ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴰⴷ ⴳⴳⵯⴻⴷⴻⵏ ⴰⵄⵓⴵⵉ ⵏⵏⴻⴽ,
17 ⵅⵎⵉ ⵉ ⵖⴰ ⵉⴱⵏⴰ ⵙⵉⴷⵉ ⵚⵉⵀⵢⵓⵏ ⵜⵡⴰⵍⴰⵜ ⵏⵏⴻⵖⵏⵉⵜ,
ⴰⴷ ⴷⴷ-ⵉⴱⴰⵏ ⴷⴻⴳ ⵓⵄⵓⴵⵉ ⵏⵏⴻⵙ,
18 ⴰⴷ ⵉⵍⵀⴰ ⴰⴽ-ⴷ ⵜⵥⴰⴵⵉⵜ ⵏ ⵓⵎⴻⵥⵍⵓⴹ,
ⵓ ⵡⴰⵔ ⵉⵙⵙⴻⵃⵇⴰⵔⴰ ⵛⴰ ⵜⴰⵥⴰⴵⵉⵜ ⵏⵙⴻⵏ.
19 ⵎⴰⵏ ⴰⵢⴰ ⴰⴷ ⵉⵜⵜⵡⴰⵔⵉ ⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ,
ⵍⴳⴻⵏⵙ ⵏⵏⵉ ⴷⴷ ⵖⴰ ⵉⵜⵜⵡⴰⵅⴻⵍⵇⴻⵏ,
ⴰⴷ ⵉⵚⴻⴱⴱⴻⵃ ⵉ ⵙⵉⴷⵉ,
20 ⵎⴰⵖⴰⵔ ⵏⴻⵜⵜⴰ ⴰⵇⴰ ⵉⵙⵙⵉⵊⵊ-ⴷⴷ ⵥⵉ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ ⵢⵓⵄⵍⴰⵏ,
ⵥⴻⴳ ⵓⵊⴻⵏⵏⴰ ⵉⵅⵥⴰⵔ-ⴷⴷ ⵙⵉⴷⵉ ⵖⴰⵔ ⵜⴻⵎⵎⵓⵔⵜ ⵙⵡⴰⴷⴷⴰⵢ
21 ⵃⵉⵎⴰ ⴰⴷ ⵉⵙⴻⵍ ⴰⵏⵉⵅⵙⵉⵙ ⵏ ⵓⵎⴻⵃⴱⵓⵙ,
ⵃⵉⵎⴰ ⴰⴷ ⵢⴰⵔⵅⵓ ⵉ ⵢⴻⵏⵏⵉ ⵉⴵⴰⵏ ⴷ ⵜⴰⵔⵡⴰ ⵏ ⵍⵎⴻⵡⵜ,
22 ⵎⴰⵃⴻⵏⴷ ⴰⴷ ⴱⴰⵔⵔⵃⴻⵏ ⵙ ⵢⵉⵙⴻⵎ ⵏ ⵙⵉⴷⵉ ⴷⵉ ⵚⵉⵀⵢⵓⵏ,
ⴷ ⵛⵛⴻⵏⵄⴻⵜ ⵏⵏⴻⵙ ⴷⵉ ⵓⵔⵛⴰⵍⵉⵎ,
23 ⵅⵎⵉ ⴷⵉⵏⵏⵉ ⵉ ⵖⴰ ⵜⵜⵡⴰⵙⵎⵓⵏⴻⵏ ⵍⴻⴳⵏⵓⵙ,
ⵊⵎⵉⵄ ⴰⴽ-ⴷ ⵜⴳⴻⵍⴷⵉⵡⵉⵏ ⵃⵉⵎⴰ ⴰⴷ ⵙⴻⵅⵅⴰⵔⴻⵏⵜ ⵉ ⵙⵉⴷⵉ.
24 ⵏⴻⵜⵜⴰ ⵉⵙⵙⴰⵔⵅⵓ ⵊⵊⴻⵀⴷ ⵉⵏⵓ ⴰⴽ-ⴷ ⵡⴻⴱⵔⵉⴷ,
ⵏⴻⵜⵜⴰ ⵉⵙⵙⴻⵎⵥⵉ ⴷⴻⴳ ⵡⵓⵙⵙⴰⵏ ⵉⵏⵓ.
25 ⵏⴻⵛⵛ ⵏⵏⵉⵖ: ‘ⵡⴰⵔ ⴷ ⴰⵢⵉ ⴽⴻⵙⵙⵉ ⴷⴻⴳ ⵡⴻⵥⵢⴻⵏ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉⵏⵓ, ⴰ ⴰⵔⴻⴱⴱⵉ,
ⴰⵇⴰ ⵉⵙⴻⴳⴳⵯⵓⵙⴰ ⵏⵏⴻⴽ ⵜⵜⵖⵉⵎⴰⵏ ⵥⵉ ⵊⵊⵉⵍ ⴰⵍ ⵊⵊⵉⵍ.
26 ⵣⴻⴳ ⵡⴻⵛⵃⴰⵍ ⵓⵢⴰ ⵜⴻⴳⴳⵉⴷ ⴷⵙⴰⵙ ⵉ ⵜⴻⵎⵎⵓⵔⵜ,
ⵉⵊⴻⵏⵡⴰⵏ ⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⴽ.
27 ⵉⵏⴰ ⴰⴷ ⴼⵏⴰⵏ, ⵎⴰⵛⴰ ⵛⴻⴽ ⴰⴷ ⵜⴷⵓⵎⴻⴷ.
ⵏⵉⵜⵏⵉ ⵎⴰⵔⵔⴰ ⴰⴷ ⴰⵔⵛⴰⵏ ⴰⵎ ⵡⴰⵔⵔⵓⴹ,
ⵛⴻⴽ ⴰⴷ ⵜⴻⵏ ⵜⴱⴻⴷⴷⵍⴻⴷ ⴰⵎ ⵉⵛⵜ ⵏ ⵍⴻⵄⴱⴰⵢⴻⵜ,
ⴰⵎⵎⵓ ⵉ ⵖⴰ ⵜⵜⵡⴰⴱⴻⴷⴷⵍⴻⵏ.
28 ⵛⴻⴽ ⵎⴰⵛⴰ ⴷ ⵛⴻⴽ,
ⵉⵙⴻⴳⴳⵯⵓⵙⴰ ⵏⵏⴻⴽ ⵡⴰⵔ ⵇⴻⵟⵟⵉⵏ ⵄⴻⵎⵎⴰⵔⵚ.’
29 ⵉⵃⴻⵏⵊⵉⵔⴻⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⴽ ⴰⴷ ⴷⵉⵏ ⵥⴻⴷⵖⴻⵏ,
ⵓ ⵜⴰⵔⵡⴰ ⵏⵙⴻⵏ ⴰⴷ ⵜⵜⵡⴰⵙⵎⴻⵜⵏⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ.