1 ⵙⵉⴷⵉ ⵉⵃⴻⴽⴽⴻⵎ, ⴻⵊⵊ ⴰⴷ ⴰⵔⵊⵉⵊⴻⵏ ⵍⴻⴳⵏⵓⵙ.

ⵏⴻⵜⵜⴰ ⵉⵇⵇⵉⵎ ⵙⴻⵏⵏⴻⵊ ⵉ ⵉⴽⵉⵔⵓⴱⴻⵏ, ⵜⴰⵎⵎⵓⵔⵜ ⵜⴻⴱⴷⴰ ⴰⴷ ⵜⴻⵏⵀⴻⵥⵥ. ^□  

2 ⵙⵉⴷⵉ ⴷ ⴰⵎⴻⵇⵇⵔⴰⵏ ⴷⵉ ⵚⵉⵀⵢⵓⵏ,

ⵏⴻⵜⵜⴰ ⵢⵓⵄⵍⴰ ⴰⵟⵟⴰⵙ ⵅ ⵎⴰⵔⵔⴰ ⵍⴻⴳⵏⵓⵙ.

3 ⴻⵊⵊ ⵉ-ⵜⴻⵏ ⴰⴷ ⵇⴰⴷⴰⵏ ⵉⵙⴻⵎ ⵏⵏⴻⴽ ⴰⵎⴻⵇⵇⵔⴰⵏ ⵉⵙⵙⴰⴳⴳⵯⴰⴷⴻⵏ,

ⴰⴷ ⵉⵏⵉⵏ: “ⴰⵇⴰ ⵏⴻⵜⵜⴰ ⴷ ⴰⵎⵇⴻⴷⴷⴰⵙ!”

4 ⵊⵊⴻⵀⴷ ⵏ ⵓⵊⴻⴵⵉⴷ ⴰⵇⴰ ⵏⴻⵜⵜⴰ ⵉⵜⵜⴻⵅⵙ ⵍⵃⴻⵇⵇ.

ⵛⴻⴽ ⵜⴻⴳⴳⵉⴷ ⴰⵎⵛⴰⵏ ⵉⵎⵜⴻⵏ ⵉ ⵜⵙⴻⴳⴷⴰ,

ⵜⴻⴳⴳⵉⴷ ⵍⵃⴻⵇⵇ ⴷ ⵜⵙⴻⴳⴷⴰ ⴷⵉ ⵢⴰⵄⵇⵓⴱ.

5 ⵙⵄⵓⴵⴻⵎ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,

ⴰⴹⴰⵔⴻⵎ ⵥⵥⴰⵜ ⵉ ⵜⵏⴻⴱⴷⴰⵜ ⵏ ⵉⴹⴰⵔⴻⵏ ⵏⵏⴻⵙ.

ⴰⵇⴰ ⵏⴻⵜⵜⴰ ⴷ ⴰⵎⵇⴻⴷⴷⴻⵙ!

6 ⵎⵓⵙⴰ ⴷ ⵀⴰⵔⵓⵏ ⵜⵓⵖⴰ ⴰⵜⴻⵏ ⵥⴻⴳ ⵉⴽⴻⵀⵀⴰⵏⴻⵏ ⵏⵏⴻⵙ,

ⵛⴰⵎⵡⵉⵍ ⵜⵓⵖⴰ ⵥⴻⴳ ⵉⵏⵏⵉ ⵉⵍⴰⵖⴰⵏ ⵉⵙⴻⵎ ⵏⵏⴻⵙ.

ⵏⵉⵜⵏⵉ ⵍⴰⵖⴰⵏ ⵖⴰⵔ ⵙⵉⴷⵉ ⵓⵛⴰ ⵏⴻⵜⵜⴰ ⵉⵙⵍⴰ ⴰⵙⴻⵏ.

7 ⵉⵙⵙⵉⵡⴻⵍ ⴰⴽⵉⴷⵙⴻⵏ ⵥⴻⴳ ⵓⵇⴻⵍⵍⵉⵊ ⵏ ⵓⵙⴻⵢⵏⵓ.

ⵏⵉⵜⵏⵉ ⵃⴹⴰⵏ ⵛⵛⵀⴰⴷⴰⵜ ⵏⵏⴻⵙ,

ⵓⵍⴰ ⴷ ⵜⵉⵡⴻⵚⵚⴰ ⵏⵏⴻⵙ ⵏⵏⵉ ⴷ ⴰⵙⴻⵏ ⵉⵡⵛⴰ.

8 ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵛⴻⴽ ⵜⴻⵙⵍⵉⴷ ⴰⵙⴻⵏ.

ⵛⴻⴽ ⴷ ⵉⵊⵊ ⵏ ⴰⵔⴻⴱⴱⵉ ⵉⵖⴻⴼⴼⴰⵔⴻⵏ,

ⵎⴰⵛⴰ ⵓⵍⴰ ⴷ ⵓⵎⵜⴰⵇⴻⵎ ⵅ ⵜⵎⴻⴳⴳⴰ ⵏⵙⴻⵏ.

9 ⵙⵄⵓⴵⴻⵎ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,

ⴰⴹⴰⵔⴻⵎ ⵥⵥⴰⵜ ⵉ ⵡⴻⴷⵔⴰⵔ ⵏⵏⴻⵙ ⵉⵇⴻⴷⴷⵙⴻⵏ,

ⵎⴰⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴷ ⴰⵎⵇⴻⴷⴷⴻⵙ ⵉ ⵉⴵⴰ.