1 ⵙⵉⴷⵉ ⵉⵃⴻⴽⴽⴻⵎ,

ⴻⵊⵊ ⵜⴰⵎⵎⵓⵔⵜ ⴰⴷ ⵜⴼⴰⵔⵃ,

ⴰⴷ ⴰⵔⴻⵛⵇⴻⵏⵜ ⵎⴰⵔⵔⴰ ⵜⴻⴳⵥⵉⵔⵉⵏ. ^■  

2 ⵇⵓⵡⵡⴰⵔⴻⵏ ⴰⵙ ⵉⵙⴻⵢⵏⵓⵜⴻⵏ ⴷ ⵢⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ,

ⵜⴰⵙⴻⴳⴷⴰ ⴷ ⵍⵃⴻⵇⵇ ⴰⵇⴰ ⴰⵜⴻⵏ ⴷ ⴷⵙⴰⵙ ⵏ ⵍⵄⴰⵔⵛ ⵏⵏⴻⵙ.

3 ⵜⵉⵎⴻⵙⵙⵉ ⵜⴻⴳⴳⵓⵔ ⴰⵙ ⵖⴰⵔ ⵥⵥⴰⵜ ⵏ ⵡⵓⴷⴻⵎ ⵏⵏⴻⵙ,

ⵜⵇⴻⴷⴷ ⵉⵖⵔⵉⵎⴻⵏ ⵏⵏⴻⵙ ⵉ ⴷ ⴰⵙ ⴷⴷ-ⵉⵜⵜⴻⵏⵏⴹⴻⵏ.

4 ⴰⵙⵙⴰⵎⴻⵏ ⵏⵏⴻⵙ ⵙⵙⵍⴰⵇⵇⴰⵏ ⴷⴷⵓⵏⴻⵛⵜ,

ⵜⴰⵎⵎⵓⵔⵜ ⵜⵥⴰⵔⵔ ⵉ-ⵜⵜ, ⵜⴻⵏⵀⴻⵥⵥⴰ. ^■  

5 ⵉⴷⵓⵔⴰⵔ ⴼⴻⵙⵙⵢⴻⵏ ⴰⵎ ⵛⵛⵎⴻⵄ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ,

ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ.

6 ⵉⵊⴻⵏⵡⴰⵏ ⵜⵜⴱⴰⵔⵔⵃⴻⵏ ⵜⴰⵙⴻⴳⴷⴰ ⵏⵏⴻⵙ,

ⵎⴰⵔⵔⴰ ⵍⴻⴳⵏⵓⵙ ⵜⵜⵡⴰⵍⴰⵏ ⴰⵄⵓⴵⵉ ⵏⵏⴻⵙ. ^■  

7 ⴻⵊⵊ ⴰⴷ ⵙⵙⴻⴹⵃⴰⵏ ⵎⴰⵔⵔⴰ ⵉⵏⵏⵉ ⵉⵜⵜⵙⴻⵅⵅⴰⵔⴻⵏ ⵉ ⵍⴻⵅⵢⴰⵍⴰⵜ ⵉⵏⴻⵇⵛⴻⵏ ⵏ ⵓⴽⴻⵛⵛⵓⴹ,

ⵎⴰⵔⵔⴰ ⵉⵏⵏⵉ ⵉⵜⵜⵛⴻⵏⵏⵄⴻⵏ ⴷⵉ ⵍ’ⴰⵚⵏⴰⵎ.

ⴰⴹⴰⵔⴻⵎ ⵥⵥⴰⵜⴻⵙ ⴽⴻⵏⵏⵉⵡ, ⵎⴰⵔⵔⴰ ⵉⵔⴻⴱⴱⵉⵜⴻⵏ!

8 ⵚⵉⵀⵢⵓⵏ ⵉⵙⵍⴰ, ⵉⴼⴰⵔⵃ,

ⵢⴻⵙⵙⵉⵙ ⵏ ⵢⴰⵀⵓⴷⴰ ⴰⵔⴻⵛⵇⴻⵏⵜ,

ⵥⵉ ⵙⵙⵉⴱⴱⴻⵜ ⵏ ⵍⴻⵃⴽⴰⵎⴰⵜ ⵏⵏⴻⴽ, ⴰ ⵙⵉⴷⵉ.

9 ⵎⴰⵖⴰⵔ ⵛⴻⴽ, ⴰ ⵙⵉⴷⵉ, ⴷ ⴰⵎⵄⵓⴵⵉ ⵅ ⵎⴰⵔⵔⴰ ⵜⴰⵎⵎⵓⵔⵜ,

ⵛⴻⴽ ⴷ ⵡⴻⵏⵏⵉ ⵢⵓⵄⵍⴰⵏ ⵇⴰⵄ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ.

10 ⴽⴻⵏⵏⵉⵡ ⵉ ⵉⵜⵜⴻⵅⵙⴻⵏ ⵙⵉⴷⵉ, ⵛⴰⵔⵀⴻⵎ ⵍⵖⴰⵔ.

ⵏⴻⵜⵜⴰ ⵉⵃⴻⵟⵟⴰ ⵅ ⵍⴻⵄⵎⵓⵔ ⵏ ⵉⵎⵜⵉⵇⵇⴰⵏ ⵏⵏⴻⵙ,

ⵏⴻⵜⵜⴰ ⵉⵙⵙⴻⵏⵊⴰⵎ ⵉ-ⵜⴻⵏ ⵥⴻⴳ ⵓⴼⵓⵙ ⵏ ⵉⵄⴻⴼⴼⴰⵏⴻⵏ. ^■  

11 ⵜⴰⴼⴰⵡⵜ ⵜᵉⵜⵜⵡⴰⵥⴰⵔⵄ ⵉ ⵓⵎⵙⴻⴳⴳⴻⴷ,

ⴷ ⵍⴻⴼⵔⴰⵃⴻⵜ ⵉ ⵢⴻⵏⵏⵉ ⵖⴰⵔ ⵉⴵⴰ ⵓⵍ ⵉⵙⴻⴳⴳⵎⴻⵏ.

12 ⴽⴻⵏⵏⵉⵡ ⵉⵎⵙⴻⴳⴳⴰⴷⴻⵏ, ⴼⴰⵔⵃⴻⵎ ⵥⵉ ⵙⵉⴷⵉ,

ⵇⴰⴷⴰⵎ ⵅⵎⵉ ⵜᵉⵜⵜⵉⴷⴰⵔⴻⵎ ⵜⴰⵇⴻⴷⴷⴰⵙⵜ ⵏⵏⴻⵙ.